رواية الوجه الاخر للرحمة الفصل الواحد والثلاثون بقلم عبير إدريس
السلام عليكم ورحمة الله
كل عام وانتم بألف خير حبايبي الراقين
يارب ينعاد عليكم بالصحة والسلامة وتحقيق الامنيات ويحفظ احبابكم ويحفظكم ان شاءالله
________________
بغداد
الساعة الثامنة مساءاً
شهم : الو ها فارس وين صرت ؟
فارس : دخلت بغداد ، ما حصلت يوسف ؟
شهم : ما حصلته اتصل عليه مغلق وهو وعدني قبل ساعة تسعة يكون بالبيت..
فارس : هسه يطلع رايح لمكان يرتاح وغالق تليفونه
شهم : اتفقنا يرجع حتى يشوف ريحانة
فارس : صدك شنو وضعها ؟
شهم : لحد اﻵن ما صحت بس جذبت على يوسف وكلتله كعدت وسألت عنك حتى يرجع بس الظاهر حتى الجذب ما نفع وياه ...
فارس : اكيد يرجع قابل ناوي يتركها عندك بالبيت مستحيل يسويها ، طلع عين أمنا وهو يريد يطلعها من المصح هسه يتخلى عنها ؟ تلكاه حب ينفرد بنفسه بعد اللي سمعه منك
شهم : فارس هاي بلوة قنبلة وعلى غفلة تنفجر بوجهنا وكلنا ندخل السجن ،واللي وراها ما معروفة نواياهم اتجاهنا والصراحة اللي خوفني أكثر سكوتهم لحد اﻵن كل شوية اسأل نفسي ليش ساكتين ؟وليش محد سأل عنها ولا بلغوا بأختفاءها
فارس: احتمال ما شكوا بينا انت ليش كل شي تحسبله حساب وتكبره
شهم : لأن الموضوع جبير اصلاً بس سويتها في سبيل يوسف يطلع من هذا المكان القذر ويترك البؤرة الفاسدة وبالتالي عاف ريحانة يمي ويكولي ارجع اداوم هذا بيا لغة تحاجيه ويفهم ؟
فارس : ما اعرف شنو احجي الصراحة ، بس الشغلة واضح مليوصة
شهم : مو شلون مجان
فارس : ربع ساعة وانه عندك من اوصل نشوف شنو نسوي او وين ندور عليه
شهم : منتظرك لا تسوق بسرعة الدنيا ما طايرة
فارس : ان شاءالله ، انه رايح موبايلي خلص شحن وماجايب شاحنة وياي
شهم : تمام حبيبي
سده منه ورجع للغرفة يباوع لريحانة صافن عليها ، نايمة والممرضة كاعدة على صفحة ، سحب نفس وسد الباب ، طلع موبايله اتصل على صديقه يسأله عن نتيجة التحاليل ..
شهم : ها بشر شنو طلع وياك ؟
_ماطلع شي تحاليلها سليمة ، مابيها اي مادة غريبة
شهم : غريب
_شنو الغريب بالموضوع ؟ قريبتك تتعاطى شي معين ؟ شاك بشي ؟
شهم : لالا بس داخت فجأة ونامت والنومة نومة بس كعدت مرة وحدة ورادت مي بعدها رجعت نامت
_ احتمال تحتاج تحاليل من نوع ثاني شنو رأيك اسويها الها ؟
شهم : نسويها ليش لا
_انطيني دكتور يوسف عندي كم استفسار صغير حتى اعرف شنو اسوي بالضبط
شهم : يوسف ها اي اي يوسف ، هسه هو طالع يرجع ونتصل بيك وبالنسبة للحساب
قاطعه
_ ما بينا حساب دكتور عيب
شهم : حبيبي دزلي الحساب برسالة حتى احوله الك فدوة لعينك
_تمام هسه ادزلك واي شي تحتاج بلغني
شهم : تسلم ممنون منك
_ حبيبي دكتور
سده منه واندك الباب طلع فتحه ، شاف فارس حظنه بقوة وصاح
شهم : لك فارس تعبت ما ظل بية حيل بعد تعبت والله
طبطب على ظهره وكال
فارس : ادري قابل طفل ويظل بالك عليه ؟ هسه شوية ويرجع وين يروح يعني؟
شهم : ما ادري گلبي واجعني عليه
فارس : قبل شوية هم اتصلت عليه موبايله مغلق يمكن حب يبتعد شوية مثل ما كلتلك..
دفعه بخفة مسح عيونه باوعله وكال
شهم : ابقى انت بالبيت يم البنات وانه رايح اشوفه بالعيادة اكيد الكاه هناك احتمال نام...
فارس : اجي وياك ؟
شهم : لالا ابقى هنا كل شي يصير البنات امانة عندي
فارس : يا بنات ؟ شو كمت تجمع ؟
شهم : يوسف جاب ممرضة تداري ريحانة وهسه هي يمها بالغرفة ...
فارس : ها هيج
شهم : اي ، يلة رايح ما اتأخر ان شاءالله واي شي يصير اتصل بية
فارس : صار لا يظل بالك
صعد سيارته وتوجه للعيادة ، وصل شاف سيارة يوسف واكفة تطمن شوية ، صف سيارته ونزل منها دخل للعمارة اللي بيها العيادة ، وصل الباب مقفول استغرب ، دكها بقوة محد فتح ، آخذ رقم العيادة واتصل عليه مغلق ، مشى لخارج العمارة يسأل ابو المحل اللي بصفها
شهم : السلام عليكم
_ وعليكم السلام
شهم : بلا زحمة الدكتور يوسف شوكت طلع من العيادة ؟ عندك خبر ؟
_شنو تصير منه حضرتك ؟
شهم : انه اخوه
_وشلون اعرف انت اخوه ؟
شهم : هاي هويتي واقرا الأسم
عرض الهوية كباله باوعلها وحجى متردد
_ما ادري اسأل واحد غيري ، كل شي ما اعرف
شهم : اذا تعرف شي احجيلي الله يخليك موبايله مغلق وسيارته بالباب واكفة والعيادة مقفولة ظل بالي لا يكون صايرله شي لا سامح الله ..
سكتت متردد وشهم بقى يلح عليه لان عرف عنده معلومات عن يوسف...
_ اذا حجيتلك ما تجيب اسمي بالموضوع ؟
شهم : لا الك الامان احجي
_العصر اجت قوة شالته
شهم : قوة ؟ أمن قصدك ؟
_اي اعتقلوه
باوعله مصدوم ، اختل توازنه لزم الميز وكال
شهم : ما عرفت شنو السبب ؟
_لا والله ما عرفت
شهم : مو اكو سكرتيرة تشتغل هنا تعرفها ؟
_اي سهى
شهم : عندك رقمها الشخصي اتواصل وياها ؟
_اتصل على رقم العيادة او حساباتهم اتوقع هي مسؤولة عنهن
شهم : اي اي اكيد مشكور
_ اسمي لا تجيبه بالطاري
هز راسه وطلع من المحل دخل على حسابات العيادة ودز رسالة كتب بيها (سهى هذا رقمي اتصلي علية انه شهم اخو يوسف )
رجع كعد بالسيارة ورا ربع ساعة اتصل عليه رقم غريب جاوبه .
شهم : الو
سهى : الو السلام عليكم ، اني سهى مساعدة الدكتور يوسف
شهم : هلو سهى شنو صاير ؟ يوسف وين ؟
سهى : ما اعرف شنو اكولك بس الدكتور اجتي مفرزة وشالته
شهم : احجيلي شنو صار بالضبط
حجتله اللي صار من اول ما داومت بالعيادة لحد ما صارت الحادثة ، سده منها واتصل على صديقه يشتغل بمكان حساس ، وبلغه يجيبله معلومات عن مكان يوسف ، ورا نصف ساعة اتصل عليه وجابله المركز اللي بيه يوسف ، سده منه وتوجه له ، وصل للمركز ، دخل سأل عنه....
شهم : يوسف عبد الملك اعتقلتوه بهذا المركز قبل ساعات ، اريد اعرف وينه وشنو صار وياه ؟
الضابط يكلب بالاوراق اللي كدامه رفع عينه عليه ببرود وكال
_ماعندنا اي معلومات بهالاسم
شهم : شلون ما عندكم ؟ انتم اخذتوه من عيادته اليوم المغرب...
الضابط رجع يكمل كتابة ، كأنه ما سمع شي رجع شهم كرر السؤال عليه ، رفع عينه وكال
_كلتلك ماعندنا اي معلومات عنه ليش تلح ؟
شهم تقدم خطوة وحجى بصوت حازم
شهم : اسمعني زين يوسف مو شخص عابر او عادي حتى يختفي بهيج طريقة كولي وين وديتوه ؟ عبالكم ماكو وراه احد يسأل عنه ؟
_كلتلك ما عندي اي معلومات عنه اذا ماعندك معاملة رسمية تفضل اطلع برا
حاول وياهم محد قبل ينطي اي معلومة عنه ، هنا فهم أن الموضوع مو طبيعي واكو شغلة كيدية او جهة متعمدة تخفي كل شي ...
طلع من المركز وكف برا ، آخذ نفس قوي طلع موبايله واتصل بمحامي العائلة ..
شهم : مرحباً استاذ كريم ، شلون الصحة ؟
كريم : اهلاً دكتور الحمد لله بخير انت شلونك ؟
شهم : الحمدلله
كريم : بشنو اخدمك ؟
شهم : العفو حبيبي ، خادم ربك ، اكو شغلة صارت واريد استشيرك بيها
كريم : تفضل اسمعك
حجاله اللي صار وية يوسف وشنو صار بالمركز ، ورا نصف ساعة ، وصلت سيارة المحامي ونزل منها سلم على شهم تصافحوا ودخلوا للمركز
برز هويته القانونية كدام الضابط وكال ...
كريم : اني الوكيل القانوني للعائلة ، وأي احتجاز بدون السماح بالتواصل القانوني يعتبر تجاوز رسمي ، يا اما تسمحلي اتقابل مع موكلي هسه ، أو أكمل الموضوع بطريقة ثانية ...
ساد الصمت بالمكان ، تبادلوا الضباط النظرات بينهم ، بعد دقائق من التوتر طلع الضابط خارج الغرفة ورجع باوعلهم وكال
_ تفضلوا برا دقايق واخليكم تشوفوه
طلعوا يمشون بالممر ينتظرون الوقت اللي يشوفون يوسف بيه ، ورا شوية اجى شرطي واشرلهم يروحون وراه ، تبعوه لغرفة بابها مسدود ، انفتح الباب ، ظهر يوسف ، كاعد على الكرسي قميصه متوسخ ، وآثار التعب واضحة على وجهه ، رفع راسه شاف شهم ارتخت ملامحه وابتسم ابتسامة خفيفة ..همس
يوسف : جنت منتظرك عرفت راح تجي
دخل شهم حضنه بقوة وطبطب على ظهره ، بعدها مد ايده وسلم على المحامي
شهم : شنو صاير ؟ شنو هاي المصيبة ؟ ليش اعتقلوك ؟ شنو السبب ؟
سكت ثواني وعيونه تباوعلهم بحيرة ، باوع للمحامي وكال
يوسف : زرعولي مواد مخدرة بالمكتب وكل شي مترتب ضدي
المحامي طلع دفتر صغير من الجنطة باوعله وكال
كريم : أريد كل شي تحجيلي بالتفصيل ، من لحظة دخولك للعيادة لحين اعتقالك ، لا تنسى اي شي ، اقل تفصيلة تشوفها تافهة ممكن تفيدنا وتغير مسار القضية..
بدأ يحجي ، بعده ما واصل للتفاصيل العميقة ، انفتح الباب بقوة ودخل الضابط ، ملامحه ما تبشر بخير ، باوعلهم وكال
_ خلص الوقت والحديث الجاي لازم يكون بحضورنا
شهم التفت عليه بعصبية وكال ...
شهم : ما صارلنا خمس دقايق من دخلنا
كريم : وغير هيج المتهم إله حق يحجي وية محاميه بدون مراقبة هذا اللي اعرفه ..
الضابط ابتسم ابتسامة باردة وكال
_ مو كل المتهمين نفس الشي نعاملهم خليها ابالك استاذ..
ردله المحامي بنبرة حادة
كريم : المتهم يبقى بريء لحين اثبات ادانته ، واذا عندك أمر رسمي يمنع التواصل القانوني طلعه اشوفه ، غير هيج انت دتخترق القانون ..
باوعلهم بنظرة مليانة شر وكال
_ دقيقتين عندكم بس ، والباب يبقى مفتوح ...
طلع الضابط واثنين من العناصر ظلوا واكفين برا الباب يراقبون
المحامي تقرب من يوسف بسرعة وهمس بأذنه
كريم : اسمعني زين الضاهر اكو جهة تريد توكعك واي كلمة تحجيها تنحسب عليك فاحجي وياهم بدقة ولا تنطي عليك اي لزمة
يوسف مرر إيده على وجهه بتعب ، آخذ نفس طويل بعدها كال
يوسف : تمام
كريم : كمل شنو صار وياك ؟
يوسف : فتحنا الحجز وبلشت السكرتيرة تثبت مواعيد ، اجاها موعد عن طريق الفيس بوك من وحدة اسمها علياء غانم
وسردله باقي التفاصيل الى ان وصل للمركز..
كريم : معناها البصمات مالتك ماكو على الجيس
يوسف : اي لأن ما لزمتها
كريم : حلو الشغلة ان شاء الله سهلة ومحلولة
يوسف : ان شاءالله
شهم : اريد مفتاح العيادة ارجع الكامرات
يوسف : سهى قفلتها تلكاه عندها
شهم : انطيني عنوان بيتها
نطاه عنوانها ، شهم ديريد يحجي ، واحد من العناصر الأمنية دخل وكال
_ الوقت انتهى تفضلوا برا
المحامي آخذ جنطته وطلعوا ، من وصلوا للباب شهم التفت عليه وكال
شهم : لا تخاف تطلع منها وباجر بالزايد تنام ابيتك
هز راسه بقهر وابتسم ابتسامة ضياع ، طلعوا من المركز حجوا شوية بالباب والمحامي صعد سيارته و راح ، شهم توجه لبيت سهى بعدما اتصل بيها وبلغها تحضر المفتاح ،من وصل آخذه منها ، باوعلها وكال
شهم : كل شي تتذكريه عن البنية احجيه
حاولت ترتب افكارها وبدأت تحجي
سهى : طويلة شوية ، شعرها أسود وطويل ، عندها وحمة بوجها ، وجانت لابسة جاكيت لونه بيجي هذا اللي اتذكره
شهم : اكو شي ثاني تحجيلي عنه ؟
هزت راسها بلا
شهم : انطيني الرقم اللي اتصلت منه على العيادة
سهى : ما اتصلت برقم تواصلت وياية بحساب على الفيس بوك
شهم : انطيني حسابها
سهى : لحظة اجيب الحاسبة
راحت جابتها وطلعتله الحساب صوره و صعد سيارته توجه للعيادة ، فتح القفل ودخل ، وكف كدام الشاشة يراقب ، رجع الكامرات للوقت اللي دخلت بيه هاي البنية ، ظهرت بالشاشة ، نفس المواصفات اللي ذكرتها سهى ، قرب الصورة وصورها بموبايله صورة واضحة ، اتصل على صديقه حتى يجيبله معلومات عنها ..
_ شنو تريد اجيبلك بالضبط ؟
شهم : اسمها الكامل ، عنوانها ، وكل شي عنها ، اللي اعرفه اسمها علياء غانم ودزيتلك الأكاونت مالتها
_لحظة خليك وياي
شهم : تمام منتظرك
ورا ربع ساعة كال
_شهم ، هاي اسمها علياء غانم جبار ، ساكنة بمنطقة الدورة ...
شهم : متزوجة عندها عائلة ؟ اكو سجل اجرامي عليها ؟
_ لحظة اشوفلك
_ماكو شي سجلها نظيف ومتزوجة من واحد اسمه يوسف ...
شهم : ممنون يابة
_ تدلل بس امانة اذا احتاجيت شي اني بالخدمة
شهم : راح احتاجك هواي هاي الفترة ويمكن ادوخك وياي
_شنو السالفة احنا اصدقاء وعشرة عمر اذا انت ما اوكفلك لمنو اوكف ...
شهم : حبيبي والله ما تقصر مع السلامة
_ الله وياك
قفل العيادة وطلع صعد سيارته اتصل بفارس اكثر من مرة ما يرد ، ضرب الاستيرنك بقوة وهو يحاول يقنع نفسه ، ممكن نام او بالحمام او اي شي ثاني رغم اكو مخاوف تداهم عقله ...
شهم : اخ يافارس اخ وينك ما تكولي ؟ هسه وكتك تنام
فر السيارة وقرر يرجع للبيت حتى ياخذ فارس وياه ويرحون لبيت علياء ، وصل للبيت قبل لا يصف السيارة ، جمد من شاف الباب مفتوح ، آخذ سلاحه الشخصي ونزل، دخل للبيت بخطوات بطيئة ، عيونه تدور بكل زاوية بالحديقة ، باب البيت الداخلي هم جان مفتوح ، هنا تأكد اكو شي مو طبيعي صاير
صاح بصوت عالي
شهم : فارس فارس
ماكو جواب ، دخل للبيت بخطوات حذرة ، گلبه صار يدك بسرعة ، مشى للهول الداخلي ولمح ظهر فارس كاعد على كرسي وراسه مايل على كتفه ، ركض عليه بسرعة وانصدم من شاف إيده ورجله مربوطات بحبل، وآثار دم خفيفة على جبينه ، هزة خفيف ويصيح بأسمه
شهم : فارس فارس تسمعني ...
ماكو رد ولا اي حركة منه ، ركض للمطبخ جاب مي وشمره على وجهه ، فك الحبال بعصبية وهو يصيح بأسمه الى ان بدا يصحى شوية شوية ويفتح عيونه بصعوبة ...
شهم : شنو صار ؟ منو سوة بيك هيج ؟ احجي
فارس يفتح ويسد بعيونه ويحاول يركز
شهم : تسمعني ؟ باوعلي داحجي وياك فارس
بدأ يحجي بس لسانه ثكيل
فارس : ضربوني ضربوني وراها ماحسيت بشي
شهم : منو ؟ احجي منو ضربك ؟
فارس : ما ادري
شهم : شنو ما تدري ؟
كاعد على اركباته ويباوعله بخوف...
فارس : من طلعت انت وراك بنصف ساعة اندك الجرس باوعت بالكامرات ماكو أحد ماطلعت ، ورا شوية اندك مرة ثانية ، عبالي طفل يتحارش ، أو واحد غلطان بالبيت ..
سكت ولزم راسه متألم
شهم : كمل كمل لا تسكت ؟
فارس : طلعت ، مجرد ما فتحت الباب ، ما أعرف منين طلعولي ، أكثر من واحد ، بعدني ما مستوعب اللي صار التموا علية وضربوني على راسي وماحسيت الا وانت تكعدني ....
هز راسه ساكت وفجأة التفت للممر باوع للغرفة اللي بيها ريحانة بابها مسدود ، دخل الخوف لگلبه لمجرد فكر ممكن يكون احساسه صحيح ، كام ركض باتجاه غرفتها ، فتح الباب بقوة انصدم من شاف الغرفة فارغة ، لا ريحانة ولا الممرضة بيها ، دخل للحمام فارغ ، طلع للهول وجهه شاحب وملامحه بيها الف سؤال شافه فارس ، كام وكف لازم راسه ويحجي...
فارس : ها آخذوها ؟
التفتله شهم وعيونه نار ، هز راسه بأي وهمس
شهم : معناها اللي صار وياك مو صدفة جايين عليها وآخذوها
كعد على القنفة حط ايده على راسه وفارس دايخ يريد يتوازن حتى يكدر يسوي شي لشهم او يساعده
بهذه الاثناء رن موبايل ، شهم طلع تليفونه وفارس كذلك ، استغربوا ، حتى مو نفس نغمة موبايلاتهم ، واحد باوع على الثاني وكفت الرنة ورجع الموبايل يرن من جديد ، كاموا يدورون عليه ويتبعون الصوت الى ان وصلوا للمكان الموجود بيه ، موبايل شاشته مكسورة وما عليه رقم ، فارس مد ايده حتى يرد شهم سحبها بقوة وصاح ...
شهم : انت شداتسوي ؟
فارس : ارد اشوف منو
شهم : شلون ترد منو يكول ما البيت ملغوم واحتمال من ترد ينفجر بينا ..
فارس عكد حاجبه ما مستوعب الحجي ، احساس ثكيل نزل بصدورهم ، شهم تراجع خطوة للخلف باوعله فارس مصدوم
فارس : شنو احنا وين عايشين ؟
شهم : بالعراق حبيبي بالعراق
فارس : وشنو راح نسوي هسه ؟
شهم : آخذ الشغلات المهمة ونطلع من البيت بسرعة فارس لا تلزم شي ولا تحرك شي ابقى بمكانك بين ما انزل
ركض لغرفة النوم آخذ مستمسكاتهم والاوراق المهمة وكم لبسة حطهم بالجنطة ونزل ، سحب فارس من إيده وطلعوا من البيت ، وكفوا برا ...بعجها شهم قرر يتصل بوحدة مكافحة المتفجرات وانطى بلاغ عن البيت ، بعد عشرين دقيقة الشارع انسد ، سيارات الأمن وصلت ، ورجال ببدلات خاصة نزلوا من السيارات بسرعة ، واحد من الخبراء دخل البيت بحذر و لازم بيده جهاز كشف المتفجرات ، والبقية واكفين يراقبون ، مرت دقيقة اثنين ، وفجأة سمعوا صوت الرجال يصيح من داخل البيت ..
_ الكل يرجع ليورا بسرعة
ركضوا العناصر يسحبون بالناس بعيد عن المكان ، شهم تقرب منه بعصبية وكال
شهم : شنو شفت احجي ؟
الخبير وجهه تغير وكال
_ البيت كله ملغوم ، المتفجرات مزروعة بأكثر من مكان ، والتليفون مربوط بدائرة تفجير ، مجرد تجاوبون على الاتصال او نحاول نفتح النظام ينفجر البيت بالكامل ...
فارس : يعني جانوا ناوين يموتونا واحنا داخل البيت ؟
الخبير جاوبه بجدية وكال..
_ لا ، جانوا متأكدين منكم راح تموتون بس طلعتوا اذكى منهم من ما رديتوا على الاتصال ..
شهم : سيدي بس هذا البيت مو بيتي مأجره واذا راح انه اخسر فلوسه كلها شنو ذنب الناس تتحمل ، ياريت تفككون العبوات بدون اي ضرر الله يخليك..
تباحثوا بينهم بالموضوع وخبير ثاني لبس خوذة واقية وقرر يدخل يوشف شنو ممكن يسوي ، تقرب من البيت بحذر ، والبقية ثبتوا أجهزة تشويش حول المكان
فارس تقرب من شهم وهمس بأذنه
فارس : اذا غلطوا اقل غلط البيت كله يروح واحنا هم لو ما طلبت منهم يفككوه ياشهم
شهم ما رد بقى واكف يراقب بعصبية ، ويحجي وية نفسه ، اذا مستعدين يفجرون بيت كامل بناسه ، لعد شكد مستعدين يسوون بعد أكثر حتى يخفون الحقيقة ...
بهذه الاثناء دخل الخبير الاول للبيت يساعدهم ، والكل واكف منتظرهم على اعصابه ، واحد منهم طلع وصاح بصوت عالي ...
_ ابتعدوا عن المكان ابتعدوا قدر الامكان اسحبوا السيارات بسرعة ..
الكل رجع ليورا وشهم بعدوه عن البيت غصب، سحلوه سحل ، تقدم الخبير وكف كبالهم وكال ...
_ اكو كرسي جوا عليه اربطة ، هذا الكرسي رابطيه بجهاز حساس للحركة ، مجرد تحريكه من المكان يشتغل النظام الاحتياطي والبيت يتفجر..
الخبير الثاني كال
_ عندنا اقل من دقيقة و يتفجر بالكامل
فارس شحب وجهه بلع ريكه وكال...
فارس : يعني لو انه متحرك اريد افك القيد مال ايدي جان تفجر البيت ومتت لو ما انت جاي قبلها جان انه ميت مو ؟ جان هسه متوذر لا ايد ولا رجل مو شهم احجي عليش ساكت ؟
شهم بس يباوع مصدوم وهو يتخيل لو باقي يدور على علياء وما راجع للبيت لو متأخر عليه شوية لو هو صاحي ومتحرك جان هسه مات ، مسح وجهه بعصبية ومشى كعد على الرصيف ، ايده ترجف وجسمه يختض ...
ورا نصف ساعة طلع الخبير يلهث من التعب باوعلهم وكال
_ تم إبطال المرحلة الأولى ، بس بعد أكو عبوات داخلية ، وللأسف الشغل احترافي جداً
شهم : شلون يعني ؟
_ الشغل مو شغل عصابة عادية ، اللي مسويه هذا مدرب عسكرياً او عنده جهة تدعمه مستحيل يكون شخص عادي...
طلع الخبير الثاني وكال ..
_ فككنا أغلب العبوات ، لكن أكو وحدة مرتبطة بدائرة مخفية مدا أكدر اوصللها ، والصراحة ما اضمن تفكيكها بأمان ..
وكف الخبير بنص الشارع يباوع للبيت والخبير الأول دخل وياه اثنين ، والعناصر البقية انسحبت وسحبوا الناس اللي رجعت اتقربت من الفضول ، بعدوهم بمسافة آمنة ، ثواني مرت وانفجر البيت ، الكاع اهتزت بقوة والنار انفجرت من الشبابيك دفعة وحدة ، شهم جان الأقرب للبيت اندفع بقوة على الكاع من شدة العصف ، وأذنه بدات تصفر ، ركضله فارس ورفع راسه بحضنه ، ويصيح خايف ...
فارس : مابيك شي مو ؟ كولي ماصارلك شي احجي ، كلتلك ابقى يمي ليش تعاند الموت ما تكولي ؟
الزجاج والمخلفات طارت بكل الاتجاهات والدخان الأسود غطى المكان خلال ثواني معدودة..
الخبير الأول اللي دخل ما طلع من المكان واثنين من الفريق انصابوا بشضايا ...
فارس : شهم كوم مو احجي وياك ؟
بقى جامد بمكانه وعيونه مليانة صدمة وغضب وحسرة ، صوت صفارات الإسعاف والاطفائية ملئت المكان ، من بين هاي الهوسة كلها رن موبايل شهم ، باوع ماكو رقم رد وحطه على أذنه اجاه صوت يكوله
_ شكلك أذكى مما توقعت ، حجولي عنك بس ما صدكت ، بس حابب انصحك تبطل تدور ورانا وريحانة انسوا امرها انت واخوك التوأم ، لأن هي بمكان اذا حاولت توصله ، راح تتمنى ما وصلت ، اللي صار مجرد رسالة صغيرة ، حتى تعرفون حجم الناس اللي دخلتوا بحرب وياهم ..
شهم : اندكيتوا بالشخص الغلط ، أقسم بالله راح أخليكم تتمنون هالانفجار ياخذكم بدل ما تاخذكم إيدي ..
انقطع الاتصال ، ورا ساعة واحد من الضباط تقدم و وكف يسألهم
_ تتهمون احد معين ؟ تعرضتوا لتهديد سابقاً من شخص او احد تعرضلكم ؟
شهم : لا ماكو
_للأسف ما واضح شي او ما اتوقع نوصل للجاني لأن الانفجار مسح كل الأدلة ...
فارس همس لشهم
فارس : كوللهم على عدنان وربعه ليش سكتت
شهم اشرله يسكت ، ثاني يوم بلش التحقيق وية الجيران والافرع القريبة واطلعوا على كامرات البيوت القريبة من موقع الحادث وراها دزوا على شهم وفارس وراحوا للمركز بغرفة التحقيق ، المحقق يكلب بالاوراق باوعلهم وكال
_ لا بصمات واضحة ، ولا تسجيلات قابلة للاسترجاع ، لاشهود تعرفوا على الوجوه ،وحتى السيارة المستخدمة بدون أرقام ، اما بالنسبة للاتصال اللي اجاك على موبايلك اجى من خطوط مجهولة او مشفرة ، لهذا القضية تُقيّد ضد مجهول لحين ورود معلومات جديدة ...
ختم الورقة ودفعها لشهم ، قراها بعيونه وهمس يضحك ...
شهم : ضد مجهول
طلعوا من المركز فارس التفت عليه وكال
فارس : ليش ما ذكرت اسمائهم ؟ ليش ما جريت رجلهم للتحقيق ؟
صعدوا السيارة ، شهم التفت عليه وكال
شهم : شنو دليلك عليهم ؟
فارس : التسجيلات اللي كلتلي عليها بموبايلك
شهم : ما تثبت شي
فارس : ممكن نورطهم شمدريك ؟
شهم : انه راح اوصللهم بنفسي وصدكني ادمرهم ، قبل جانت القضية تخص يوسف وحده ، بس هسه تخصني انه شخصياً ...
فارس : عوفهم لخاطر الله وخلينا نطلع يوسف من مصيبته ونرجع للقرية
شهم : ليش شايفني جبان حتى اتركهم ؟
فارس : قذارتهم اكبر منك ومن يوسف ، شفت شنو يكدرون يسوون ؟ اخوك بالحبس ، وانه وانت جان هسه ميتين وحتى جثث ما بقت النا ، ألعن الشيطان وخلينا نخلص من هالسالفة كلها شو كل مرة رجلنا تفوت بالوحل أكثر
شهم : انه عاجبني العب وية الشيطان هالمرة
باوعله فارس وسكت ، حرك السيارة وطلعوا بوجههم لبيت علياء ، وكف شهم كبال الباب يشوف الوضع التفتله فارس
فارس : وين احنا ؟ وليش وكفت هنا؟
شهم : هذا بيت اللي ورطت اخوك بسالفة المخدرات اريد اشوف منو وراها
فارس : بلغ عنها ، شنو راح نشتغل شغل مخابرات ؟
شهم : نشتغل ليش لا ؟
فارس : ياربي بشنو بليتني ؟ ولك انه جنت مرتاح، اقصى احلامي اتزوج واجيب جهال مو اشتغل شغل عصابات ومراقبة وروح وتعال ، والله جنت عايش بترف واكبر همي اجيب عثك موز لمصيول واخلي الراتب يكفيني لنهاية الشهر وما اطلب من صدمة تنطيني ، سودة بوجه عدنان بعد ما تشوف ابوك يا مصيول ، او احتمال تزوره بالسجون تلكاه هناك معفن
شهم : فارس سد حلكك
فارس : ولك ياحلكي التسده وانت فتحت علينا حلوك
شهم : فارس اسكت كافي لا اطلع ضيم گلبي كله بيك
دار وجهه على الجامة وسكت ، بقوا يراقبون ساعات الى ان صار العصر وعلياء طلعت من البيت صعدت سيارة جانت منتظرتها تبعوها لحد ما وصلت لمكان ونزلت كبال شركة اهلية ، نزل شهم وراحلها قبل لا تدخل البناية وكف كبالها وكال ...
شهم : عندي وياج كلمتين تحبين نحجيها على انفراد لو كدام العالم ؟ بكيفج
علياء : انت منو ؟ وشنو تريد مني ؟
شهم : هسه تعرفين تعاي وياي
علياء : ما اعرفك ليش اجي وياك ؟ شنو هالصلافة هاي؟
شهم : تتعرفين علية مو مشكلة
سحبها من إيدها بقوة ومشى بيها للسيارة ، فتحلها الباب رفضت تصعد ، دفعها بقوة وفارس نزل صعد بمكانه يسوق وهو صعد ليكدام وقفلوا الابواب عليها ، كامت تصيح وتحاول تنزل وتهدد بيهم التفت عليها شهم خازرها ...
شهم : اسمعي لج ، مو من مصلحتج الداتسويه اصبري وراح تعرفين كل شي ، منا الى ان نوصل صوتج ما اسمعه..
آخذوها لمكان فارغ ، التفت عليها وكال
شهم : بدون لف ودوران جاوبيني ، ليش رحتي ليوسف ؟
ارتبكت وحاولت تغطي ارتباكها بصوتها العالي
علياء : يا يوسف ما اعرفه
طلع سلاحه شهره بوجهها
شهم : ادفنج هنا ومحد يحس ، الاحسن تسولفين كل شي تعرفيه ومنو ساعدج و منو دزج عليه
علياء : اني ما سويت شي ، ليش مصر تتهمني ؟
شهم تقرب منها باوعلها بنظرة خلتها ترجف
شهم : اذا يوسف انضر بسببج ، أقسم بالله ما يفيدج أحد ، احجيلي وخلصي نفسج ، مجرد ما تنطيني الاسماء اللي وراج اخليج تروحين لأهلج
انهارت بالبجي وكالت
علياء : والله غصباً عني ، اني ما علية بشي واصلاً ما اعرف شمو موجود بالجيس
شهم : اعتبريني مصدكج ، منو غصبج تروحيله وليش خليتي مخدرات بمكتبه ؟ شلون تجرأتي ؟ اكيد هذا شغلج لأن الضاهر انتِ متمرسة بهذا الشي
علياء : مو اني صدكني مو اني
شهم : منو ساعدج ؟
علياء : هذا سيف ورطني هو اللي دزني عليه الله لا يوفقه
شهم ضيق عيونه وكال
شهم : منو سيف ؟ انطيني عنوانه
علياء : زوجي واذا دليتك على مكانه راح يعرف اني وصدكني يقتلوني
شهم : اذا مو هم يقتلوج انه راح اقتلج بالحالتين انتِ ميتة..
بلعت ريكها بخوف ، جرت نفس وعيونها تتوزع عليهم ، بعدها دلتهم بالعنوان ، توجهوا عليه مباشرتاً وهي وياهم بالسيارة ، التفت شهم سحب جنطتها منها حتى ما تحاول تدزله شي او تنبههه بوصولهم ، وصلوا لمنطقة صناعية ، واشرتلهم على محله ..
علياء : هذا محله يشتغل فيتر مال سيارات بعد ساعة يعزل..
شهم : حلو خوش غطاء لوساختهم مسوين
طلع موبايلها من الجنطة حطه بجيبه وشمرلها جنطتها ، نزلوا هو وفارس وقفلوا السيارة عليها ، تمشوا لمحله شهم دخل وفارس وكف كبال مخزن قديم بصف المحل ..
جان اكو عمال يشتغلون بسيارة رافعيها ، وكف شهم وسألهم عن سيف ، واحد باوع بوجه الثاني ، بعدها واحد منهم طلع من جوا السيارة يمسح بإيده سوا نفسه ما شاف شهم وحاول يبتعد عنه ...
شهم شك بيه هو سيف ، والضاهر هذاك عرف بشهم شك بيه بهذا ركض وطلع خارج المحل حتى ينهزم ، تلكاه فارس بالباب ولكمه بقوة ، وكع على وجهه ، اجى شهم يتمشى برهاوة ، دنك يم راسه وكال..
شهم : فرغ المكان بسرعة واطلب من جماعتك يسدون حلكهم لأن نعرف عنك وعن اهلك كل شي وما راح نعوفك تعيش دقيقة وحدة اذا بلغوا ، وزوجتك الست علياء عندي..
انصدم يباوع عليهم ما يعرف شنو يسوي
صاح على العمال يفرغون من المكان ، ونبه عليهم ما يسوون اي شي واللي صار مشكلة بينه وبين جماعته ، طلعوا وشهم سحله لداخل المحل يحقق وياه
شهم : منو وراك ؟
حاول ينكر بالبداية بس الضرب اللي اكله منهم خلاه ينهار ويعترف بكل شي...
_حازم والله حازم هو اللي كلفني وأمرني بكل شي
شهم : ياحازم هذا ؟
هو يعرفه بس راده يكول اسمه الكامل لأن جان فاتح تسجيل بموبايله
سيف : الدكتور حازم يشتغل بمستشفى ______ بغداد
شهم : ليش دزك ؟
سيف : دزني بعد
ضربه شهم على راسه وكال
شهم : ليش دزك احجي
سيف : هو عندهم صفقة جبيرة واخوك الدكتور يوسف عرف عنها بالصدفة ورادوا يسكتوه قبل لا يحجي ...
شهم : شنو هاي الصفقة احجيلي عنها بسرعة
سيف : صفقة أدوية
شهم : كمل هاي الصفقة شلون تدخل احجي
سيف : حاويتين داخلات بشكل رسمي للبلد ، عن طريق شركة استيراد طبية وهمية بأسم عدنان
شهم : أوراق الحاويات رسمية ؟
هز راسه وكال
سيف : اي رسمية
شهم : شنو بيها بالضبط ؟
سيف : أدوية علاج أورام ومضادات حيوية نادرة
شهم : هاي باﻷسم الرسمي ، الحقيقة شنو ؟
دنك راسه ساكت ، فارس دنك ضربه بوكس جرا الدم من خشمه ، رفع راسه بيده وخلاه يركز على شهم وكال
فارس : جاوب تاج راسك
سيف : اللي اعرفه مواد مخدرة مركبة تنخلط وية الأدوية الأصلية وتتوزع للمصحات والمخازن الطبية بدون ما أحد يشك بيها ..
شهم : شنو شغلتهم بيها ؟
سيف : مافهمت
شهم : يعني لشنو يستخدموها ؟
سيف : استخدامها يكون بشكل غير قانوني
شهم : اعرف مو زمال كدامك ، لمنو يستخدموها وليش ؟
سيف : حتى يسيطرون على سوك الإدمان أو يربحون من بيعها للمصحات الفاسدة مبالغ خيالية ..
شهم : مثلاً
سيف : يعني اكو بعض الكوادر الفاسدة تستخدم مهدئات قوية للمريض حتى يتخلصون منه بدون ما يبين نيتهم بقتله ، لأن العلبة الموجود بيها العلاج تشبه العلبة الأصلية مال الدوة الحقيقي فهمت علية ؟
شهم : وبعد ؟
سيف : مسكنات تسبب الإدمان اذا استخدمت بجرعات معينة واكو ناس تطلبها وتُصرف الهم بوصفات مزورة
شهم : كمل بالنسبة للمرضى شنو يستخدمون الهم بالضبط ؟
سيف : أدوية نفسية يتم التلاعب بتركيبها حتى تسبب التعلق والإدمان ، أو مواد أولية تدخل بصناعة حبوب مخدرة داخل مختبرات سرية ينطوها الهم حسب الحالة..
شهم : احجيلي بالتفاصيل المملة شنو بهاي الحاويتين
سيف : حجيتلك
شهم : عيد اللي حجيته
سيف : الحاويتين بيهن شحنات أدوية أصلية فعلاً ، بس بين الكراتين أكو عبوات مختومة بيها مادة مركبة تحقن أو تنخلط وية المواد الأصلية بالمخازن او المختبرات السرية كبل توزيعها
شهم : يعني هي مو مخدرات بالشكل التقليدي مثل اللي يتعاطوها بالشوارع ؟
سيف : لالا كلها مواد طبية وتنباع رسمياً بأسعار عالية وتدخل للمستشفيات والمصحات عادي
شهم : قصدك اللي بيها فساد أداري بدون إثارة اي شك تدخل صح ؟
سيف : صحيح..
شهم : ويوسف شنو من كل هذا ؟
سيف : يوسف اكتشف اختلاف بأرقام التشغيلات والتحاليل بحكم خبرته ، ولاحظ اكثر من مرة اثناء استعماله للمواد العلاجية ، اكو نسب مو طبيعية ، واكو أعراض إدمان ظهرت على المرضى وما يرتاحون اﻹ ياخذون من نفس العلاج ، وزاد شكه أكثر من بعض مرضاه صار عندهم انتكاسات غريبة بعد ما اخذوا العلاج
وهذا الشي خلاه يبحث اكثر وعرفوا بيه تقرب كلش من كشف الحقيقة وراح يوصل للشبكة كلها ، وغير هيج جان ناوي يسوي مؤتمر طبي بحضور وزير الصحة ويعرض عليهم ملفات الفساد واتفق وية جهة معينة بس وصل الخبر لعدنان وربعه لهذا قرروا يلفقون عليه قضية المخدرات حتى يسكتوه ويخسر مصداقيته بالكامل ..
شهم : وانت شغلك مو فيتر هذا غطاء صح ؟
سيف : العوز خلاني اشتغل وياهم اني ما علية
شهم : شلون وثقوا بيك وعرفت كل هاي الأسرار عنهم ؟
سيف : احنا اربعة مو بس اني واكو شغلات خلتهم يثقون بية..
شهم : شنو شغلك وياهم ؟
سيف : اني والولد ، شغلنا ندخل الحاويات ونشرف على توزيعها وراها نختفي كلمن يروح لشغله الاصلي
شهم : شكد ارباحكم من قتل الناس ؟
سيف : خير من الله ، هاي شوفة عينك طورت شغلي الخاص وعندي عمال جوا ايدي ، جنت موظف عادي بوزارة الصحة راتبي ما يكفي حفاظات وحليب ﻷبني
شهم : وتوكله حرام هيج الدنيا صارت؟ خلتكم ناس تاكل ناس في سبيل تحصلون على المادة
سيف : صارت بعد سيدي
شهم : امشي وياي
سيف : وين ماخذني انت كلت تحجي واعوفك
شهم : اتأكد من صحة كلامك ساعتها ارجعك لأهلك
صعده للسيارة وكعد يمه ليورا انصدم من شاف علياء ، شهم منعه يحجي وياها اي شي ، بس هي من شافت زوجها ضلت تبجي وتلوم بيه ...
شهم دز مسج لفارس كتبله ،آخذنا على بيت يوسف ،قراها وباوعله بالمرايا هز راسه ، من وصلوا طلع المفتاح من السيارة ونطاه لفارس فتح الباب الخارجي ودخلوا بالسيارة جوا ، سدوا الباب ودخلوهم للبيت ، كل واحد حطوه بغرفة منفصلة عن الثاني وقفلوا عليهم ، كعدوا بالمطبخ شهم يفرك بوجهه بحيرة وفارس واكف يباوعله مصدوم ...
فارس : جنت تدري بيوسف عنده هيج معلومات خطيرة ؟ وعلى شنو جان ناوي ؟
ضرب إيد بإيد وكال
شهم : لا ماجنت أدري بيه ، اللي سولفه شغلات تافهة بالنسبة لللي سمعته هسه بس ليش ما حجى ليش ما حطني بالصورة شلون يجازف بنفسه ويسوي مؤتمر يفضحهم بيه ،وهو يعرف شنو مصيره بعدها، ليش نفسه هالكد رخيصة ؟
فارس : يعني لهذا السبب خلوه يدمن وحاولوا يقتلوه وبعدها لفقوله تهمة المخدرات واحنا عبالنا بس علمود المرضى وبالاخص ريحانة ؟
شهم : لا مو بس هيج اكو شغلات يوسف حجالي عنها اعمق من اللي انت حجيته ، واني الغبي من زرعت التسجيل بغرفة عدنان وسمعتهم يحجون بصفقة الأدوية كمت وضميت السالفة عن يوسف طلع يدري بيها ونابشها نبش واصل للشبكة الاصلية وجان يشتغلهم بهدوء بدون علمي وانه عبالي دا احميه منهم
...
فارس : عبالنا بس نطلع ريحانة ينتهي كل شي ونخلص
شهم : يا نخلص ، الله اعلم شلون راح تفض..
بعدها كعدوا يفكرون بحل شلون يسيطرون على هاي الشاحنات خلص الليل دخل عليهم الفجر ، شهم كام راح للغرفة الللي بيها سيف فتح الباب ودخل لكاه كاعد وحاط ايده فوك راسه ..
شهم : الحاويتين شوكت يوصلن ، و وين ؟
سيف : فجر الثلاثاء تجي من الميناء لمخزن خارج بغداد ، وبعدها نوزعها
شهم : يعني بعد باجر ؟
سيف : اي
شهم : اكو حرس وشكد عددهم ؟
سيف : اغلبهم مدنيين بس عندهم سلاح اخاف يصير شي او ينكشفون يدافعون بيه عن نفسهم
شهم : هاي بالمخزن ؟
سيف : اي
شهم : الحاويات من تجي بيها حرس ؟
سيف : لا فقط سايق الشاحنة واحنا الأربعة نطلع نتلكاهم بالطريق ...
شهم : وبعد ؟
سيف : كل اللي اعرفه كلته ، الله يخليك لا تأذيني بعائلتي اتوسل بيك خليني احاجيهم تليفون واحد بس
شهم : اذا ما تريد أذيتهم وتطمن عليهم سوي الراح اكولك عليه
حجى وياه وطلع لفارس كعد يمه للصبح ، وراها كام سبح لبس ملابس من يوسف ، وصى فارس عينه على البيت وهو راح للمصح ...
صف السيارة كباله ، دخل من الباب الرئيسي للبناية ، واتجه لمكتب عدنان ، السكرتيرة حاولت تمنعه دفع الباب بقوة ودخل ، عدنان رفع عينه ببرود وكال
عدنان : سبحان الخالق صدك طلعتوا نسخة قذرة ، والواضح من دخلتك لغرفتي ، بعدكم ما تعلمتوا درس
شهم شمر ورقة كدامه على الميز وكال
شهم : لا بالعكس دكتور تعلمنا ولهذا السبب اجيت حتى آخذ إجازة ليوسف لحد ما تنحل قضيته ..
ابتسم مستهزء وكال
عدنان : يوسف انتهى موضوعه
حجاها وسحب من الجرار ملف وشمره على الميز وكال ..
عدنان : هذا قرار فصله الرسمي بتهمة الاتجار بالمخدرات وتعاطيها واﻹضرار بسمعة المؤسسة آخذه واحتفل وية اخوك بتقاعده المبكر ..
شهم : بس بعد ما ثبت عليه شي وبالنسبة للتعاطي ماكو اي دليل ضده اتوقع هاي القضية انسدت لصالح يوسف
عدنان : بالنسبة الكم انسدت من يمنا لا ، خصوصاً قضيته الحالية صعبة وكل يوم رجله تدخل بالوحل أكثر من اليوم اللي قبله..
شهم : ممنون منك وانتظر مني اتصال قريب نسولف بيه شوية وراح اشرحلك عن الوحل وطبيعته ..
تركه وطلع اعصابه نار وإيده ترجف من العصبية ، راح لدوامه خلصه شلون ما جان ، من خلص الدوام رجع للبيت تغدوا هو وفارس ، ودز بيده لسيف وعلياء كل واحد لفة وبطل مي ، وراها كعدوا لساعة وحدة بالليل بعدها راح لسيف وبلغه بالخطة وهدده ، اي تلاعب منه اهله راح يتأذون وبالأخص ابنه ومرته موجودة عندهم ، وعده يساعده بدون ما يغدر بيهم ..
طلعوا بالسيارة شهم وفارس وسيف ، شهم طلع موبايل سيف وبلغه يتصل بسواق الشاحنة يشوفهم وين وصلوا ، اتصل بيهم وبلغوه بمكانهم ، طلب منهم يبقون بنفس المكان وما يتحركون منه الى ان يوصللهم ...
فارس التفت لشهم وكال
فارس : شهم بالنسبة لباقي جماعته اكيد راح يشكون بالوضع وخصوصاً سيف مختفي صارله يوم ونص
شهم : حليتها لا تشيل هم
فارس : شلون ؟
شهم : صارت شغلة ( وحجاله عنها )
فارس : مهما يكون لا تثق بيهم زايد اكيد راح يوصلون لحازم ويحجوله ما اتوقع يضمون عليه هيج شي ...
شهم : نوصل والله كريم اذا واصلهم خبر سيف يتصرف ويحلها لخاطر ابنه الوحيد مو صح ؟
سيف : هسه ابني شعليه
شهم : واخوي شعليه ورطتوه بهيج تهمة ؟
وصلوا للمكان المقصود قبل الفجر بساعة وحدة ، وبدات تبين أضوية الشاحنات من بعيد ، شهم وكف السيارة وطفاها ، التفت لسيف وكال
شهم : يلة شوف شغلك
سيف : ومنو يسوق الشاحنات ؟
شهم : كلنا نعرف نسوق ما راح نختلف
سيف : بس شلون اضربهم همه اثنين
شهم : تصرف مو شغلي ، بس لاتنسى اقل حركة قذرة تروح بيها انت والعائلة ، لو اكولك نزل واحد واحد سولف وياهم وجيبهم لهنا يمي..
هز راسه ساكت ، نزل يتمشى وصل للشاحنة الأولى حجى وية السايق وخلاه ينزل ، مشى وياه للمكان اللي هم بيه ، من وصلوا نزل شهم من السيارة وحط المسدس براسه ، سدوا حلكه بلاصق وشدوا ايده ورجله ومددوه بعيد عن الشارع العام ، والسايق الثاني سووا وياه نفس الشي ..
شهم طلب من فارس يبعد السيارة مسافة وياخذ تكسي ويرجعله حتى كل واحد يسوق شاحنة ، نفذ فارس توجيهاته وراح ورا شوية رجع بتكسي نزل منه على بعد مسافة من الشاحنات وكمل مشي ، وصل يمهم ، الشاحنة الأولى صعدوا بيها شهم وسيف والثانية فارس ، ومشوا بيها ، اي سيطرة توكفهم سيف يحاجيهم ويبرز الأوراق الرسمية مال الشاحنة والمواد اللي بيها ودخلت بشكل طبيعي ، طلعوا بيهن للقرية ، على الشارع السريع ، شهم صف الشاحنة وطلب من سيف ينزل ، باوعله بصدمة وكال ..
سيف : وين منزلني ؟ لا عندي فلوس لا موبايل شلون ارجع ؟
شهم : دبر نفسك وسلملي على اسيادك
سيف : بس راح يكتلوني ، اكيد السواق راح يحجون كل شي وجماعتي يشووفهم الرسائل اللي دزيتها بتغيير موعد الشاحنات الله يخليك لا تعوفني شغلني وياكم
شهم : شنو شايفني عصابجي واشغلك وياي بعدين واذ كتلوك تستاهل
سيف : عندي طفل حرام عليك
شهم : مو مشكلتي حبيبي انزل بهدوء لو تريد انهي حياتك هنا ؟
سيف : بس
شهم نزل وفتح الباب الثانية وسحبه بقوة شمره من الشاحنة ورجع صعد تركه يتوسل ، وساقوا الشحانات للقرية ، وصلوا للبستان الثاني مالتهم ، بس هذا لابيه بيت تسكنه عائلة ولا بيه زرع يحصدون منه ، يعني هيج تاركيه بس بيه مخزن قديم متروك ..
صفوا الشاحنات ونقلوا الكراتين اللي بيها للمخزن للساعة اربعة العصر خلصوا كل شي وطلعوا بالشاحنات مشوا بيها مسافة بعيدة عن القرية وتركوها بطريق ترابي مابيه لا كامرات ولا ناس تمر منه شبه مقطوع ...
نزلوا تمشوا الى ان وصلوا للشارع العام صعدوا تكسي وراحوا للسيارة اخذوها وطلعوا لبغداد ، من وصلوا لبيت يوسف آخذوا منه الشغلات المهمة والخاصة بيوسف والبنية ، قفلوا البيت وطلعوا بيها لمنطقة ثانية قبل لا ينزلوها شهم التفت عليها وكال
شهم : نصيحة مني هاي اذا ضليتي عايشة ، انتِ بنية عيب عليج تشتغلين هيج شغل اليوم وكعتي بإيد ناس غيورة ما سوتلج شي باجر عكبة توكعين بإيد ناس قذرة تربيج من جديد او تنهي حياتج التهي ابيتج وربي ابنج عدل ولا توكليه حرام..
هزت راسها وآخذت جنطتها ونزلت تركض ، فارس التفت على شهم وكال ...
فارس : اللي سويته غلط شلون تركتهم المفروض تسلمهم للشرطة
شهم : اسلمهم لا تخاف بس مو هسه
فارس : واذا سافروا شلون ؟
شهم : المهم عندي اطلع يوسف وراها اشوف شنو اسوي
فارس : بس الاصح نبلغ عليهم
شهم : ونروح وياهم بالرجلين ، شبيك انت ناسي شنو آخذنا منهم ؟ مخدرات على بلاوي زركة ، اصبر عليهم هسه الروس الكبيرة تصفيهم وينالون ما يستحقون ..
بقوا يفترون بالسيارة الليل كله ، ثاني يوم شهم سحب فلوس وراح أجر بيت ودفع ايجار ٣ اشهر ليكدام ، وراحوا اشتروا اثاث بسيط يدبرون بيه نفسهم ..
بكل هاي الهوسة اكو اتصالات بين شهم والمحامي ، جان يتابع قضية يوسف ووين وصلت بس للأسف المحامي كل شي ماكدر يسوي التهمة ثابتة او يحاولون يثبتوها عليه ..
غير هيج ابو البيت كل شوية يتصل بيه ويصيح يريد تعويض ضرر عن بيته اللي راح ، وشهم يكوله فلوس البيت راح توصلك كاملة واللي صار قضاء وقدر ولو ميت هو من وين ياخذ التعويض وهيج يقنعه ويسد المكالمة ...
بس صاحب الملك إنسان كلش طماع ونذل كل ما يحاجيه يرجع يتصل ويهدد يسويها عشاير وياه اذا ما عوضه ، بالأخير اتفقوا على مهلة مدتها شهر واحد وراها إله حق يتصرف باللي يعجبه اذا ما عوضه ...
ثاني يوم شهم اتصل بعدنان من رقم ثاني ...
شهم : دكتور شلونك ؟ انه شهم
جاوبه بصوت يرجف
عدنان : هذا انت ؟
شهم : اي انه ، اتصلت بيك حتى ابلغك احنا ما تعلمنا الدرس وتدري شوية دماغي ثكيل واستيعابي بطيئ يحتاجلي اعادة بين فترة وفترة..
عدنان : شنو تريد ؟
شهم : تعرف اللي اريده واتوقع رسالتي وصلتك ..
عدنان : يا رسالة ؟
شهم : الأمانة صارت عندي واذا تريدها ترجعلكم وما ابلغ ، تطلع يوسف من الحبس والقضية تختفي تماماً وملفه ينغلق وسالفة فصله تستبدلها بإجازة مدتها خمس سنوات وتكتب بيها شوكت ما يحب يقطعها ويرجع يداوم يقطعها ، شلون ؟ وليش ؟ هاي مو شغلتي دبروها .. وها دكتور اريد يوسف اليوم يبات بالبيت
عدنان : صعب خليني ادورها براسي انطيني مهلة
شهم : منا لباجر عندك وراها اتلف الأمانة وابلغ
عدنان : بس
بعده ما مكمل جملته سد الخط بوجهه وغلق الجهاز
للعصر اجاه مسج من ضحى تريد ترجع للبيت ، ضحك وباوع لفارس ...
فارس : شبيك تضحك تضحكنا وياك ضايجين..
شهم : سامع من تلتم تلتم
فارس : ليش صار شي جديد ؟
شهم : ضحى تريديني اكعد وياها ونحجي حتى ترجع
فارس : اي تصالحوا الدنيا خلصانة ما تسوى زعل
شهم : عبالك افوتلها السوته بسهولة وارجعها طبيعي ؟
فارس : عندها زينات تغفرلها ولاتنسى مرتك وعشرة بينكم ما يصير تعوفها زعلانة هواي
شهم : خليها تتأدب وتعرف حدودها زين
فارس : ما درت بالبيت تفجر ؟
شهم : ما اتوقع سمعت جان كالت
فارس : اي اهلها بمنطقة ثانية منين تسمع
شهم : راح انام ساعة وراها كعدني
فارس : وانه شنو جلب حراسة ما أنام ؟
شهم : كوم رتب البيت شعندك نايم ما تشوفه كايم كاعد
فارس : لو مدري منو ييجي ما اشتغل بعد ، موزين مني نظفته ورتبت كم شغلة شنو سوبر مان ؟
شهم : نام نام لاتضل تدردم جنك عجوز
فارس :انت نام وخلصني من خططك جنك زعيم عصابة ، موتتني بدمي على ما وصلت الشاحنة للقرية كل شوية اكول راح يوكفونا ونروح بيها اربعة ارهاب وانه بعدني ما متزوج
شهم : نذر علية لا ازوجك مناسك بس تفض السالفة هاي ونطلع يوسف منها
فارس : نشوف شلون تجازيني ولك انه ردت اتفجر وأيتم ابني بعمر الورد ما استاهل تجازيني بزواج ؟
شهم : بطلت اعتبرني ما حجيت
كام وكعد يم راسه
فارس : عليك العباس زوجني مو راح اطك
شهم : وخر من راسي جنك نقار الخشب
فارس : تزوجني مو ؟
شهم : اي اي بس تفض سالفة يوسف ازوجك ....
مرت ثلاث أيام وماكو اي خبر عن يوسف وشهم ما خلى شي ما سواه وعدنان ينطيه وعود وما يوفي بيها عباله يلعب وياه بس سالفة يوسف جانت صعبة كلش لأن فوك المخدرات اللي جانت بمكتبه ، اكو اكثر من واحد مبلغ عليه ومعترفين على اساس بايعلهم مواد مخدرة بدل العلاج والوصفات اللي قدموها عليهن الختم الخاص بيه ...
رابع يوم طلع يوسف رسمياً وبراءة والقضية اختفت وانسدت بطريقة غريبة ، شلون ما يدري ..
من طلع اتصل بشهم وراحوله هو وفارس اخذوه للبيت ، اول ما دخل سبح ونام من التعب ، ورا نصف ساعة اتصل رقم على موبايل الخاص بشهم ، جاوب
عدنان :اخوك صار عندك الأمانة وين ؟
شهم : توصلك بالوقت المناسب
عدنان : شوكت يعني ؟
شهم : من اضمن محد يتعرضلنا او يسببلنا مشاكل
عدنان : اوعدك محد يتعرض الكم
شهم : بالنسبة لبيتي اللي فجرتوه منو يدفع فلوسه ؟
عدنان : يابيت ؟
شهم : لا تغشم نفسك اعرف البضاعة الي عندي تسوة ملايين واذا تلفتها خسارة جبيرة الكم اما اذا سلمتها بالتسجيلات والاعترافات اللي عندي اخيسكم بالسجن اقل شي تاخذون مؤبد ...
عدان : شنو طلباتك ؟
شهم : تعوضني فلوس البيت وباجر توصلني لحسابي ، والشي الثاني ما اكدر آخذ كلمة منك لأن ادري بيك شكد نذل وغدار
عدنان : قصدك سلامتكم ؟
شهم : عليك نور
عدنان : ومنو يضمن اذا دفعتلك فلوس البيت ما راح تلعب من وراية وتسلمنا للشرطة
شهم : بعد انت وحظك ، حول الفلوس باجر الصبح والباقي نتفاهم عليه بالوقت اللي احدده الك ، لا كل شوية تتصل وتدوخني ...
عدنان : سهلة سهلة
شهم : اكيد سهلة مجرد تحويلة بسيطة ولو فلوسك كلها حرام بس بعد تعويض ضرر مجبور آخذها من عينك ...
سد الخط والتفت ليوسف لكاه كاعد يباوعله
يوسف : هذا عدنان ؟
شهم : اي
يوسف : شنو يريد ؟
شهم : عوفك منه ، ليش ما كلتلي عن صفقة الأدوية اللي عرفت بيها ورحت اشتغلت من وراية ؟
يوسف : تريد احجيلك حتى يصير بيك مثل اللي صارلي ، او ممكن تمنعني اسويها
شهم : جان فكرنا سوية ، انت تدري شنو صار بغيابك ؟
كام وعدل كعدته عكد حاجبه وكال
يوسف : شنو صار ؟
حجاله شهم كل التفاصيل اللي صارت من تفجير البيت والحاويات اللي اخذوها نهايتاً بريحانة وخطفها من البيت ، بقى صافن عليه باهت ما يعرف شنو يحجي بس كال
يوسف : وهسه ريحانة وين ؟
شهم : عند زوجها أكيد ، وسالفتها تتركها لأن قسور اتصل بية هددني واحنا بالكوة طلعناك من هاي المصيبة ، خلينا نفكر بهدوء ونتحرك سوية لا تسوي شي من راسك بدون ما ترجعلي او على الاقل يكون عندي خبر..
يوسف : بس راح يأذوها وانت تعرفهم بكدي ويمكن أكثر مني
شهم : يأذوها يحركوها ما النا دخل اهلها ، ابوية انت عوف السالفة لأن ردنا نموت انه وفارس وانت جان رحت بيها كم سنة بالسجن اذا ما لاحك المؤبد ...
سكتوا ، مر كم يوم واجى ليوسف اتصال على موبايله باوع للرقم فرح ، جاوبها ، مجرد فتح خط اجاه صوتها تبجي وتصيح ..
فرح : يوسف أمانة لا تسده مثل كل مرة اسمع مني اني راح اضيع ، ضيعوا مستقبلي ...
باوعله شهم ، اشرله بمعنى منو ؟ يوسف فتح سبيكر وكعدوا اثنينهم يسمعون
يوسف : وانه شكو بمستقبلج
فرح : اني من وراك انضريت
يوسف : شلون بلة ؟
فرح : اجاني قرار فصل رسمي
يوسف : السبب ؟
فرح : ما اعرف كاتبين ، التعاون مع جهات مشبوهة وتسريب معلومات داخلية للمصح..
يوسف : وانه شكو
حجاها وضحك
فرح : شلون انت شكو ، عدنان يتهمني متعاونة وياك
يوسف : بس انه طلعت براءة وماكو شي ضدي ، تكدرين تطعنين بالقرار وترجعين لدوامج
فرح : خليني اشوفك الله يخليك
يوسف : شوية واتصل مضطر اروح
فرح : يوسف اسمعني
يوسف : احجي
فرح : اني خسرت كل شي وما بقيت بس انت ما اريد اخسرك
يوسف : والمطلوب مني ؟
فرح : تعجل بزواجنا
يوسف : ليش هو ضل زواج بعد اللي صار
فرح : اني مالي ذنب ليش تحملني ذنوبهم يوسف اني احبك صدكني..
اشرله شهم ينهي المكالمة ، وبالفعل سد الخط والتفت عليه
شهم : هاي عدنان دازها لعبة جديدة
يوسف : اعرف
شهم : بس احنا راح نلعب عليهم هاي المرة..
يوسف : شلون ؟
شهم : تتزوج فرح
