رواية خيط وابرة الفصل الثالث بقلم شمس العراقية
سميعه ...
ـ تمشي بينا السياره وأني كاعده ليورا وقادر يسوق وعمي بصفه وصباح كاعد بصفي كل شوي يباوعلي ويرد يصد وجهه عني ويصفك بإيده بقهر .
قادر ـ شفته يابه شفته ولا نزل من غرفته ولا شارك ولا حجه دكول مو أهله ، صدك ما يغزر بعينه ياما ركضناله بمرض مرته وبالفاتحه ، چا شنسويلك بعد مرتك ماتت والله يرحمها قابل احنه جتلناها هي خبله من يومها وخبالاتها عم عليها .
ياسين ـ عوفه مالك شغل بي ولا أحد يحاجي .
قادر ـ ليش هو أحد يكدر يحاجي عبالك عزرائيل .
صباح ـ هسه شجلبت بي يمعود دعوفه ووگته هالحجي بيا حال أحنه عايفيلي مصيبتنا المصخمه وتسولفلي بمحمود ، شبيك متگلي .
سميعه ـ يحجون على محمود مدري شنهي سالفتهم وياه ، هذا هم فاين بخته وحظ ما عنده وأمر مني
هم أمه هجمت حياته بسبب عدواتها ويه عطايات وادور اليه ما معلوم نهايتي على يد منو ، صباح الصرت بذمته لو هلي الذبوني بير اظلم وبحلك مهديه .
وصلنا وقادر شال البيت شيل بالهورن ونزل عمي يصييح على ابوي بعالي صوته هو وقادر
ياسين ـ حبيب يحبيب وينك يحبيب تضحك علينا يحبيب
سميعه ـ طلعوا أهلي عالصوت وصباح جرني من شعري وسحلني بالكاع واني لازمه أيده اريده يفك عني راح يخنكني ، صحت بصوت مخنوك راح أموت
صباح ـ وموتت جلاب السود ، ميته وخلصان منج ومن عارج الطمستي بركبتي أنه صايم مصلي أخذ وحده لاعبه لعب ، أمشي خل أهلج يطمون عارج ياعار
سميعه ـ الله يخليك ساعدني والله مالي ذنب صباح أبوس أيدك والله أنه مظلومه والله ، توسلت وبوست أيديه ما أقتنع جرني ودفعني يم رجليه أبوي وأخواني
حبيب ـ خير شنهي سالفتكم وليش هيج مسوين بنتي؟ .
سميعه ـ صباح وكف يحجيلهم وباوعت على مشعان يفرك بوجهه ظنيته عنده علم بالسالفه وأبوي يباوعلي بنظرات حاقده ولا دكول أبوي وأمي أجتي وشافتني ودكت على صدرها وصاحت بيهم .
الحجيه عطايات ـ شنهي سالفتكم يا بيت البله أنه ما أخلص من طلايبكم كلما أكولن هالمره يصيرون أوادم ترجعون تصيرون أنكس ما توبت من موت المرحومه وأنطيتكم سميعه ادور جايبنها جنازه ولك صبيح حاجيني شمالكم هادين علينا والشر بين عيونكم .
صباح ـ عمه شتحجين ليش إحنه حاطين الشر بين عيوننا لو أنتِ التردين تأخذين ثأر موتت بنتج من عدنا ليش سالفتج سالفه وتسولف بديوان ودكتج الناقصه هاي متسولف مو صباح اليسكت لا عبالج أنه فقير أنه افضحج واخزيج بالعرب واخلي فضيحتج على كل لسان هاج بنتج المعيوبه الضحكتوا بيها عليه هم مبدلينها بأختها لميعه وهو ملعوب بيها .
ياسين ـ تضحك عليه يحبيب تضحك على أخوك لا فوك غلطتكم بحقنا أدور البت مكسوره ومعيوبه .
الحجيه عطايات ـ منين جبتوا هالحجي هاذ أنتوا صدك ما تستحون وتتبلون على بنتي حسبي الله عليكم
صباح ـ بشنو نتبلى عليكم عمه غير بنتج حجتلنا گلشي وحجتلنا كل مخططاتج وكيدج علينا وسويتي كل هذا علمود تكبعينها برأسي وگلتي الها صباح فقير وابن عمج وغصباً على رأسه يسترج أبن عمج ما راح يعوفج وطلعتي أنتِ وعمي حبيب متفقين عليه وبدلتوا لميعه بسميعه كل هذا علمود تخلصون من عارها وتذبونه بركبتي .
ياسين ـ سالفتكم هاي ينرادلها كعدة زلم تكعد بديوان وتكابلك يحبيب ويأخذولي حقي وحق أبني الضحكتوا عليه وكسرتوا گلبه وبدلتوا سمعيه بلميعه المعيوبه
وضحكت على عقلك عطايات وكالتك صباح كسرها بس لان عشگ أختها لميعه ، تردون تكسرون ركبته وتصخمون وجهه بفضيحه هو لا بيها لا عليها وفوكاها تكبعونه بسميعه المدري منو ضاحك عليها وكسرها وأنت تركض ورى شغل عطايات هيج يحبيب هيج يخوي هيج تجازيني وأنه أخوك .
سميعه ـ كلها تتصايح محد ينطي درب الثاني يحجي ياهو يكول انه الاحجي ويردون زلم وكعده زلوم تحل سالفتهم ما يرضون تالي مشعان صاح بيهم وسكتهم
مشعان ـ يا زلــم التكعد يا ديواووين عمي شتحجي أنت والله لــو تطير هاي محد يدخل ديوان ويگابلني بهل السالفه ، عمي ياسين حقك عندي بس لا تخلي السالفه تطلع غاد واحنه دمنا واحد لاتفضحون نفسكم وتفضحونه ، خل نكعد ونحجي والسالفه ما تنحل عالواكف ، يله بويه يله يله ، صبــاح تحرك أمشينا .
سميعه ـ عمي ياسين نفض عبايته وگوه دخل وقادر معاند ما يمشي بالكوه مشعان قنعهم ودخلوا وأبوي وأكف وساكت ويباوعلي وأجه تقرب عليه وجرني من شعري ويضرب بيه موتني من الكتل .
حبيب ـ فوك ما سترناج تردين تصخميين وجوهناا تردين تنزلين روؤسنا ولج سميعه أنه ذباحج شعلتي نار الفتنه بيني وبين بيت أخوي ، الأ اكطعج واذبج لجلاب السود تأكلج وأخلص منج ومن عارج .
سميعه ـ ضربني ضرب اقوى منهم وكل هالأذيه وبقيت عايشه وتمنيت لو أموت وأخلص من هالعذاب
ذبني على أمي وگال الها .
حبيب ـ أدعي ربج أنتِ وبنتج يرضون يأخذونها وياهم لان بس يمشون وهالسكط تضل كبالي من البيت لمكبره أنه ما عندي بنات ينزلن رأسي ، خل تفض ويصير خير
سميعه ـ راح الديوان وأمي لزمتني من شعري ودگت رأسي بالكاع قوي ورجعت رفعتني وتحاجيني بغضب وحقد تارس وجهه ولا كأنما أمي هاي مو أمي عطايات
الحجيه عطايات ـ ولج سميعه رحتي أستسريتي وكتيتي الأول والتالي بحلك مهديه ورجلها وخليتي سرج وسر أمج بحلك مهديه ولج سليمه ، هيج أنه وصيتج وعلمتج؟
مو أمشي وأوصي بيج ما تفتحين حلكج لو تهري من جلدج جلد حلكج يضل مخيط وكتلج من يجون أنه أحلها عوفيها ؏ أمج ، هيج يسميعه من موت الكرفج يا يمه
سميعه ـ والله يا يمه غصب عني غصب ما تدرين بالضرب والعذاب الشفته منهم يمه الكافر ما يجرعه ما كدرت يمه غصب عني ، دخيلج يمه لاتعوفيني بعد
الحجيه عطايات ـ ولج من لا الج الأم على سالفتج هاي خلهم يگتلونج ويخلصوني منج ومن عارج ، ولج يمصخمه البين أنه سويت كل هاذ علمودن مو علمودج يسليمه ولج أهون عليه يضربونج ويهينون بيج ولا أخوانج وأبوج يذبحونج كدامي
ولج كسرت گلب أختج وأنطيتها لخضير بس علمود أطم عارج بركبة صباح وكلت تولي وخل يگتلها وخل يجيبها ويهوبز هو واهله وأنه وابوج نعرف شون نسكتهم ونفرها عليهم ونكول مهديه دزتهم علينا تتنقم مني وكعده وحجايه وعمك خالك ، وتفض واكبعج بصباح وتزوجين وتنسترين ومع الوكت تشغلين هذا مخج المجيم وتكسبينه وتعيشين بس هسه على صخامج وجهج الزك سالفتج بيش الزكها شخيط منها شجبج منها ، ولج شصخم بيج حتى كدام أبوج صخمتي وجهي روحي الله يغضب عليج من بين البنات .
سميعه ـ يمه يمه دفعتني ومشت تفهم السالفه وشصار وياهم صحت وراها يمه دخيلج .
الحجيه عطايات ـ لا أنه أمج ولا أنتِ بنتي من لا الج الأم سكتي ما اريدن اسمع صوتج ، نهاوند أمشي صيحي منعم يجيني يفهمني شصار على صخام وجه أختج من الله يأخذها .
سميعه ـ گوه گمت وصالحه تباوعلي وتبجي على حالي رادت تساعدني وأمي ما خلتها ، كعدت ولميت ثوبي ومسحت الدم من وجهي وأعاين عليها وهي تصد وجهه وتفتر تتنظر نهاوند ومر الوگت ودخل مشعان
حجه ويه أمي
الحجيه عطايات ـ ها يمه بشر شصار على سالفة أختك المغضوبه من أنكصف عمرها صخمت وجهنا .
مشعان ـ شيصير أكثر من الصار يمه شيصير عمي ياسين وولده مقهوررررين جثير وما يتفاهمون ورادوا يردون لميعه بمكان سميعه بس عمي رزاق كال الهم لميعه صارت حرمة أبني خضير من يومين!! غير لو شفتي صباح شسوى شعمل ما خله ما كسر اربع زلوم ما كظوا من نار گلبه عليها تخبل خبال ليش هيج يمه ليش هو شنو ذنبه بعدواتج ويه مهديه ليش كسرتي گلبه على لميعه .
الحجيه عطايات ـ ردت أستر أختك السكط بس طلعت جلبه راحت أستسرت بمهديه ، وأمشي خذها گبل لايمشون لا تخليها نايمه على گلبي خل يأخذها وياه ويخلصني من عارها ما اريدكم تبتلون بيها وتوسخون أيدكم بدمها النجس ، أخذها ما أريدن اشوف خلقتها متبريه منها ما عندي بنيه تكسر بإمها وتنطي سرها وتصخم وجهي كدام الأوادم .
سميعه ـ بدون كلام صدتت وجهه عليه واجه سحلني وطلعني برة وكفني بظهره وأمي أجتي ما تباوعلي
مشعان ـ صباح قبل لاتمشي أخذها وياك وهي بعد صارت حرمتك لخاطري وأنت خال جهالي خل تفض ونخلص .
حبيب ـ أخذوا هالجلبه وياكم أحنه متبرين منها ليوم الدين واذا تعوفونها هسه نذبحها كدامكم ، أخذها صارت حرمتك بعد .
الحجيه عطايات ـ أمشي الحكي زلمتج وخل مهديه وبناتها يفيدجن خل هي تصيرلج أم عكب أمج السوت كلشي علمودج ، أمشي لا بارك الله بيج .
سميعه ـ أباوع على صباح الوجه أحمر وبإيده جگارته وعيونه مليانه دموع يمكن جان يبجي على لميعه كبل صد وجهه يدخن وقبل لا أمشي عمي ياسين صاح بيه
ياسين ـ وين تجيين ردي على هلج وأذا عبالكم السالفه فضت لا بويه أنتوا غلطانين بس أحنه سگتنا حشمه لنفسنا وللعيب ولخاطر أخوي الجبير رزاق أبو خضير حشمه لحيته ما ردت أكسر كلمته وأرده خايب والا أنتوا مو مال واحد يسكتلكم ويقدركم لان سالفتكم ما تسولف وهاي الدكه الناقصه يحبيب الغريب ما يسويها مو عاد أنت أخوي بس لخاطر أبو خضير ولميعه بعد صارت حرمة أبنه الله يسعدهم وأنه أبني الله بجبر كسرة گلبه وازوجه أغاتها بس مال تردون ترجعون علينا سميعه مره ثانيه لا عمي مشعان كافي الشفناه منكم هواي ولخاطرك أنه كعدت الديوان وگابلت أهلك والا أنتوا مو مال واحد يگابلكم بعد تنكسون وبنتكم عدكم تخلونها تغسلون عاركم مالنا شغل لا بيكم ولا بيها .
سميعه ـ مشى عمي ياسين مقهور وأبوي صاح وراه بعصبيه وعزم
حبيب ـ ياسين خذ جنتك وياك وأمشي ولاتضل تلغي زايد .
ياسين ـ ما الك كوه عليه يحبيب تفرض كلمتك وتأمرني وتصيح عليه أخذ بنتك ، لا مـا أخذها خلها عدكم هذه عيبكم أنتوا تحملونه أنه مالي شغل بيها
وهسه أخلي يطلكها .
وأنه وعائلتي ما يجمعني ولا يربطني بيكم شيء بس عروبه وماتت وضلن بناتها ويربن عند ابوهن وأذا على خوتنا الما أحترمتها وقدرتها يحبيب أكطع عرجها وأدوس عليها ، وهاي كدام أخونا الجبير ابو خضير لا أنت أخوي ولا أنه أخوك ولو متت ما أريدك تحضر جنازتي وحوبة كسر گلب أبني برگبتك يحبيب وأجتي منك مو مني
رزاق ـ ياسين ولك بويه شنهي هالحجي الماصخ هاذ أحنه أخوان لخاطري ردوا خل نتفاهم ونحلها ماكو سالفه ما الها حل كولوا يالله تبيعون الخوه علمود سوالف وعدواة نسوان ولكم صدك تحجون من كثرنا والأخو منو اله غير أخوه سنده وعزوته .
ياسين ـ لا يخوي خوتنا المشت بحجي النسوان ما تلزمني بعد والباعني بكلمة من عطايات ما أريده ولا اريد خوته خل عطايات تفيده وما عندي هيج أخوه يله يابه أمشوا ، صباح طلگها وخل نخلص ونكطع العلاقه من العرج ونولي والموت ما يجمعنا بعد يحبيب .
سميعه ـ طلعوا عمي ياسين وقادر وعمي رزاق وراهم وصباح واكف غاد يدخن ما تحرك ومشعان باوع لأمي ساكته ما حجت شيء وأبوي مدنج رأسه وباوعلي وأجه ركض عليه يضرب بيه موتني ومشعان يريد يخلصني منه .
حبيب ـ اليوم أذبحج وأخلص منج ومن عارج اليوم اذبحج شعلتي الفتنه بيني وبين أخوي ، خسرت أخوي بسببج يالعار بسببج يالعار اليوم أموتج وأطم عارج .
سميعه ـ أمي ما تدخلت أبداً كأنما تحاجيني وتگولي تستاهلين ما سمعتي كلمتي ، ولما مشعان جان نذبحت أخر لحظات وأموتن راد يخنگني ومشعان خلصني منه وسحب أبوي وصاح على منعم وعمي رزاق اجو اخذوا الديوان ورجع صاح بيه
مشعان ـ گومي ولي لحگي زلمتج أمشي الله يأخذج أمشي تردين تموتين ابقي وأذا تردين تعيشين لحكي صباح گبل لايمششون يله گومي ، صالحه عباه من يمج بساع .
سميعه ـ گومني وجابتلي عبايه غطاني بيها ولزمني من أيدي وقبل لانمشي گتله أوكف عندي حجايتين أكولن لأمي وبعدها أمشي وما عاد تشوفون وجهي
مشعان ـ مو وگته سميعه مو وكته الموت يحوم عليج امشي عاد .
سميعه ـ أنداريت عليها وصدتت وجهه عني ، مو أنتِ الگلتي سويتي كل هاذ علمود لايذبحوني علمود لا أموت عود أنتِ أمي وخايفه عليه لا أنذبح ، شو لعد ما شفتج أهتزيتي من أبوي كظني كدامج وضربني وما رحمني ما سحبتيني من أيده وكلتي مالها ذنب ليش يمه ليش أنه مو بنتج! ها نسيت أنتِ ما عدتي أمي تبريتي مني وغضبتي عليه ولا عدتوا هلي تبريتوا مني مو
يله ميخالف وأنه هم متبريه منكم وعلى هضمتي وكسرة گلبي لا احضر جنازييكم ولا تحضرون جنازتي وحوبتي وخطيتي لابد يجي يوم وتبين والدنيا دواره يمه اليوم الدنيا الج يجي يوم وتصير الي وكسرة گلبي ما أنساها أبداً مـا أنساها الكم أبدأ لان ماكو أهل يسون بنتهم الي أنتوا سويتوا بيه على ذنب أني مالي ذنب بي وأنتِ زين تعرفين منو سوى بيه كل هاذ بس مع ذلك ضحتيتي بيه علمود تتنقمين من مهديه وتالي ثارج هذا يمت يخلص ليا جيل تخلص ثأرتجن قبل طميتن عروبه بالتراب وهسه طميتن سميعه وهي عايشه ماكو فرق الميت والعايش نفس الشيء عندي
وقبل لا أمشي أكولج كلمه وتذكريها زين بكل صلاة أدعي ربج لاتنفحعين بإعزاز گلبج لان المظلوم اله حوبه
ما حسيت غير ضربتني الا وكعتني من قوة ضربتها اذاني ضلت توش عليه .
الحجيه عطايات ـ مشعان وين رحت تعال أخذها من كدامي لا أنه أذبحها بإيدي واخلص منها .
سميعه ـ لا أنه ماشيه وأخلصج مني ومن عاري
مشعان ـ وينج ساعه يله تجيين أمشي بالگوه قنعت صباح يأخذج وياه أمشي وگت سوالف هسه .
سميعه ـ مشيت وياه وبس صباح موجود الباقيين رايحين ، مشعان شمر عليه السويج
مشعان ـ هذا سويج سيارتي ، يله اصعدي .
سميعه ـ صعدت ليورا وهو مشعان يحجي وياه وما يرد عليه تالي مشينا ومرينا من كدام باب بيت عمي رزاق وگف وباوع عالباب بالدقيقه ضل موكف السياره وصافن تالي شمر الجگاره ومشينا وأنه طول الدرب ابجي وكاظه عبايتي لما وصلنا طبك باب بيته نزل دخل وانه ضليت تالي نزلت ولحكته وأتلفت مدري وين راح عاينت زين الباب المطبخ مفتوح دخلت منه .
ضليت كاعده بالمطبخ مثل المجتفه وهو ماهو مدري وين راح تالي سمعت صوته يكح من يم المضيف يسمونه الاستقبال .
كمت باوعتله ساد الباب شوي مفتوح وشفت مخلي كدامه مكاتيب ومراسيل وهدايا وشغلات تخصها جانوا يتبادلونها بينهم حاطهن ويبجي اي يبجي عليها هيج تحبها ما جنت ادري حبكم هيج قوي لان دوم نضحك ونتقشمر عليها وعلى حبها الك وما نسميك غير صبيح وهي تعصب وتضوج وتكول كولن المعلم صباح هسه عرفت هالحب شكثر قوي وعميق ...
وين وصلتينا يايمه أني وأخواتي بثأرتج أنتِ ومهديه .
باوعلي گبل رجعت سريع انه وعباتي وتالي سمعت صوت المفاتيح قفل الباب ، ضليت كاعده بالمطبخ وشفت مو مال اضل كاعده ، كمت للغرفه ادورلي شيء البسه ريحة الدم والزفره خنكتتني وصلت الغرفه جانت حـــيل حلوه أحلى غرفة شافتها عيوني رغم مشعان تزوج مرتين واشترى ارقى غرفه بس مو مثل هاي صاجيه والصاج مو فاتح لا غامق حيل وثكيله ومرتبه كلش وصلت الكنتور وريتني ما فاتحته مو كنتور سوك اشكال والوان من الملابس الحلوه بيت وطلعه ونوم العين وما تشتهي كلشي تحتاجه البنت موجود وأكثر ، حتى ما أكدر المسسهن أيدي ترجف بالكوه خذيتلي ثوب ودخلت سبحت .
طلعت وكفت وعاينت عالميز التواليت وشفت الجرار هل بوطره وعطورات شكد حلوه والمكياج ما مخلي ما جايب ومشتري دكول جايبلها السوك كله وكلشي مبين من احسنه .
وشفت صورها البوم كامل الها هاذ من يمت يحبها ومصورها وريتني ما شفت فتحته بس ركزت على صورة ماخذها بعرس مشعان وحربيه
رجعته وباوعت لنفسي عباره عن وروم وشعر مكطع
لفيت ربطتي زين وكمت وباوعت عالفراش وتذكرت هذيج الليله! شگول عليج يمه .
تالي كبيت ماي جسمي وسبحت ومشيت عالجربايه خليت رأسي وجسمي كله يون عليه بس اريد أتمدد وأرتاح تعبت حيل ، من الوجع ما حسيت غير للصبح فزييت على صوت مهديه وأنرعبت مالي حيل لضرب بعد والله جسمي يون عليه لو تموتوني لو تخلوني عايشه .
مهديه ـ وينها العايبه وينها وين ولت ولج محتله البيت وسابحه ولابسه ليكون صدكتي نفسج تزوجتي وصرتي زوجة ابني وتنحسبين عليه جنه من جنايين بيت ياسين وعبالج هذا بيتج لا حبيبه أنت تبقين المعيوبه بنت عطايات أم الفواين .
وهذا البيت والاثاث والترتيب والملابس والمكياج وكلشي مو الج ، جان لـ لميعه وبعد لميعه راحت لخضير وتزوجت ومن بعدها ما تجين أنتِ ، لا تجي غيرج تأخذه تجي تاج رأسج أنتِ وأمج وأهلج والله على كسرة گلبه الا ازوجه أغاتجن ، أمشن نزعنها وخل تلبس الثوب الجت بي من بيت اهلها ام الوسخ .
سميعه ـ عافتني ودخلت على أبنها ونوريه بنتها الجبيره ما متزوجه وسحاب أجني يعتن بيه ودخلني الحمام بالكوه اتوسل بيهن اني انزع نزعني ثوبي اخذته من الكنتور جان لونه نيلي ، ولبسني ثوبي الاسود كله دم ومبلل حتى الربطه جرنها من شعري .
نوريه ـ لبس العواريس مو الج حبيبه ، كافي عليج خلاكينج الجيتي بيها ، يله أمشي ويانا ما الج كعده بهالبيت ، هالبيت اله شيخاته مو العارات المثلج أنتِ كافي عليج الخدمه النا ولجهال قادر ، يله تحركي .
سميعه ـ يجرن بيه وطلعت مهديه وهو ما تحرك على كعدته باوعتله يدخن جكاير وامه حاجته .
مهديه ـ لاتهتم وليدي ولا تزعل والله الا ازوجك أغاتها باجر نروح أني وأبوك ونخطبك وحده أحلى منها ولا تضل بخاطرك الا اخليها تنسيك عشيرتك هم شتريد بعد .
سميعه ـ ما حجه ولا باوع
مهديه ـ ولكم تردون تخبلوني أنت وهذاك أخوك متكولولي شمسويات الكم بنات عطايات شبيهن وهيج تخبلتوا عليهن قحط نسوان ، زلم انتوا زلم
عمت عين أمكم أي والله
سميعه ـ هزت رأسها وجرني وياهن ولا منعني ولا كال وين مأخذتها ، اني كلت انتفض شوي وحجيت ما امشي وياجن عوفني بحالي كافي عاد
انه هم مالي ذنب ، بعدني احجي وتكابلن عليه .
مهديه ـ فطسنها من الكتل عفيه بناتي علمنها الاصول لان عطايات ما تعلم ولا تربي ، الا اعيد ترتبيج يا بنت عطايات ، يله كافي لاتموت ونبتلي كافي خلنها خدامه الجن تفيدجن .
سميعه ـ توسلت وصيحت ولا اجه ولا وصل ، تالي مشيت وياهن ارضى ما ارضى هذا وعدي وقسمتي اعيش تحت رحمه مهديه عدوة أمي ...
دخلت بيتهم مگلوب والجهال شكثر تحاوس واجو يتراكضون ويصيحوون عليه ويضحكون
ـ الخبله الخبله الخبله .
عفاف زوجة قادر ـ لا يمه عيب شنو هالحجي ولكم سگتوا منو علمكم ، صدك جذب فضحتونا
مهديه ـ وشلج غرض بيهم قابل مجذيين هي صدك خبله مثل اختها .
سميعه ـ فزيت على صوت محمود نازل من طابق الثاني .
محمود ـ يمه تحشمين روحج وتكظين لسانج لو شون
وانتوا الاسمع منه صوت وعلي أعلكة بالبنگة سبع أيام
يله ولوا غاد يله .
سميعه ـ طلعوا يتراكضون يمكن يخافون منه عبرنا وطلع وركع الباب قوي الا فزينا .
مهديه ـ خبالك يخبلك كون ، طكك عرج من بنات عطايات ، هم زلمه وتنحسب عالزلم زعلان على مره أمداك من بين خلفتي يا يمه ، أمشي جيبلي كلاص ماي نشف ريكي بنات عطايات ما وراهن بس شلعان الگلب عوذه عبالي اكطع العرج واخلص وهم ما خلصت رجعت تجددت عليه بهل السليمه المكابلتني ، أمشي ولي من جدامي نوريه يمه اخذيها وكربي عليها بشغل البيت كله .
نوريه ـ أمشي وياي ما تحركين شمالج تخشبتي .
سميعه ـ أي ، مشيت وياها والوجع يصل عليه عظامي توجعني والله ما لحكت اتنفس ، دخلتني المطبخ جبير وبي نسوان اثنين عرفتهن نسوان قادر .
نوريه ـ طلعن خلن سميعه تغسل المواعين وتنظف المطبخ وتطبخ الغده ومنا هيج الشغل كله عليها انتن حيرن بجهالجن مالجن شغل بعد ، خوش اجتجن خدامه
عفاف ـ لانتقاسم الشغل أني وياها عادي
نوريه ـ خايبه لاتنعوصيين تتقاسمن الشغل هو انتِ وضرتج ماكلات روؤسنا نوب وياها كطيعه تكطعجن كون ، شو ولي على زعاطيطج وأنتِ بنت عطايات خفت اسمج وأسمها كطيعه تكطعجن كون شوفي شغلج يله قبل لا يرد أبوي وأخواني الغده يجهز .
سميعه ـ بس هزيت رأسي وباوعت المطبخ ما ينلزم من المواعين هاي الريوك هلكثر چا الغده شگد الله يعين كلبج يسميعه فدواتك ربي .
كعدت أغسل وانظف وكملت وجابن اللحم وطبخت الغده وبس تتأمر وتصييح وتغلط شوي تشوف غلط تضرب ، هسه عرفت عرفت ليش ماتت وليش أمي جانت ما تريدها ترد بيت عيالها مدري شون جانت عايشه بنص عالعيال دكول وحوش ، لا جاهلهم نظيف لا بيتهم مرتب دوم مخبوص ومهوس ما بي ذرة راحه مقتم ويخنك شكد انظف بي ما يبين عليه .
ومن كثر الضرب تعلم جسمي عالتكفخ مرات اعاند اشبع كتل ومرات اسكت يفكن عني ، تالي كمت احشم روحي واسكت واكمل شغلي واروح انام بغرفة بنات عروبه
خطيه يحبني وينامن بحضني ، افرح من اكمل شغلي والكاهن ينتظرني اهجس كل تعبي يروح اشوف بيهن اختي عروبه ، هنا فقيرات مثل امهن ولاحظت مهديه ما تكرب صوبهن ولا الها شغله بيهن يمكن تخاف من محمود ، بغرفتهن فوك وغرفتهن حلوه ومرتبه كلشي مبين من أيد أختي لمساتها بكل مكان حلو الله يرحمج
نورس فقيره وهادئه نفس أمها ، نبأ تشبه أبوها وسبأ بين ابوها وبين أمها .
نورس ـ خاله عوفي الملابس أني بعدين أرتبهن اكعدي ارتاحي هواي اشتغلتي ما كافي من الصبح لليل تشتغلين.
سميعه ـ لا يبعد خالتج عادي تعودت وملابسجن لازم تترتب .
نورس ـ خاله اذا طلعنا من البيت لاتنقهرين .
سميعه ـ وكعن الملابس من ايدي ليش وين تروحن
ـ أبوي كال بعد كم يوم يكمل البيت ونطلع منا كالي جمعي ملابسج أنتِ وأخواتج .
ـ تشيلون
ـ اي ، أبويه قبل لاتتوفى امي أشترى قطعة كاع بس ما لحك يبنيها ومن توفت بلش يبني بيها .
ـ الله يرحمج يعروبه ، اي وليش تشيلون وأنتن بنات وين يعوفجن وحدتجن من يروح الدوام.
سبأ ـ لا هو البارحه گال النا البيت قريب من عمتي حريبه من يروح الدوام تجي يمنا او احنه نروح يمها .
ـ أذا هيج زين
ـ خاله امانه لاتضوجين عود نجيج او أنتِ تعالي علينا
ـ لا خاله مهم سعادتجن ، الله كريم يله نامن ، صفنت عليهن أكذب اذا كلت ما انقهر طك گلبي منو الهن شون يدبرن نفسهن ونورس والله بعدها خطيه تتحمل بمسؤولية معقوله يريد يتزوج اي ليش لا يسويها ابن مهديه .
سمعت هوسة وهلاهل استغربت شنهي الهلاهل منهو معرس هسه ، كمت وعاينت من الدرج ونوريه وسحاب يهلهن وصباح واكف بصف أمه وأبوه وقادر ومهديه تحاجي وتبوس بي وتهوس وتدبج كدامهم .
مهديه ـ جبنالك برنو ما ملعوب بسرگيها
سميعه ـ تهوس وتدبج وتباوعلي وفرحانه ونوريه تفرك بإيديها عناد بيه عرفت راحن خطبن اله ، هو رفع رأسه شافني عفته ورجعت الغرفه يم البنات سويتها ورحت خطبت يا صباح وين صايره وين دايره عروس رابع يوم من زواجها وتنزل عليج ضرة يسميعه ، زواج المصخم يا زواج هذا هم انحسب عليه زواج شبعت كتل وتكفخ عظام جسمي سحونها سحن وگلبي المحد رحمه بالحجي والمسبات ما يسموني غير وين راحت العار وين اجتي العار من كثر يحجون تعلمت لان بس اريد برودة الكاع واريد اسلم على رويحتي من الضرب متت اريد اعيش اخاف يوم يطكني ويسكطني نوب فوك العاله أعتلى فوك الضيم ضيم أمر .
ضليت أتگلب مدري مـا يجيني نوم شيء بداخلي مشتعل ومعدتي تعصر بيه مختنگه خنك معقوله أنقهر عليه لا عشتوا ششفت منه خل يتزوج بالطگاك هو وأمه وأخواته سليمات البله تنلام أمي ما تسميهم غير بيت البله .
للصبح عاندت وبقيت بفراشي ما گمت بس شفت البنات يجمعن ملابسهن ها يبعد خالتجن عالعزم تمشن اليوم .
نورس ـ اي والله خاله هسه اجتي عمتي حربيه وكالت حضرن ملابسجن وأغراضجن
سميعه ـ عمتج حربيه يمت أجتي وما سألت عليه
نورس ـ أي من ساعه أجتي وشافتج نايمه كالت عوفنها
ـ وجديتج وعماتج وين ولن شو ما أسمع الهن صوت
ـ موجودات راحن السوك يجيبن ملابس للعيد
ـ اي خاله ملابس للعيد ، لا كولي ملابس لعرس عمج راح يتزوج عود ما تردين تكولين اليه ، دريت البارحه جديتج لا مستحيه ولا خايفه ، شسوي هاي هي
وسمعت صوت محمود يا حافظ شبي ابوجن ثكب خلجن لاتنزلن عفتهن وباوعت من فوك يصييح على مهديه بعصبيه والشر بين عيونه وبملابس الدوام
محمود ـ أنه گتلج ووصيتج البيت الينسمع منه هلاهل ويندك بي طبل ويصير بي عرس والسنه ما دارت على موتت المرحومه البيت أحركه عليج أنتِ وبناتج وأحرك روحي وياجن وأنعل أبوجن لابو شيب الخلفوجن
مهديه ـ كافي عاد تخبلت على عمرك خبلتك عروبه شنهي بس أنت ترملت وهي جانت خبله ومريضه من يومها وحظك بعد احنه شكو محملنه سبب موتتها .
ـ ما محمل احد سبب موتتها وأذا ماتت فخلصت مني ومنجن ، وعــــروبه مــــو مريضه عــــروبه مـــــو مريضه مـــو خبله مـــو خبله وقسم بالله العظيم اذا سمعت هالكلمتين أخذ بناتي وأهج وتموتين ما أخليج تشوفيني بعد ، كافي شبعت منج كلام وهي عايشه ما اريد أسمع كلمه يعد وهي ميته دفنتها واجييت شتردين من محمود تطلبيني طلابه ، خليني أولي وكاتلتج المحنه على بناتي الدرب ما تبعد عليه سياره
يله أبويه نورس نبأ سبأ يله بابا وين صرتن .
سميعه ـ بوستهن وودعتهن ديرن بالجن على نفسجن واذا شفتن عمتجن حربيه كولن لها خل تمرلي .
نورس ـ أن شاء الله خاله مع السلامة .
سميعه ـ الله وياجن خاله درب السلامه ، راحن وبجيت وراهن ومهديه ولا خلتني اشبع بجي عاطت بيه ونفضت ثوبي ماتت سميعه وخلصتوا منها.
مهديه ـ وينج سليمه يالعار نمتي فوك شو البنات ومشن المن ضاله معلگه بهالغرفه ، نزلي لا اصعد انعنع عظامج عظم عظم خوش لكيتلج راحه ، شوكت يجي الخميس ويعرس صباح وأحرك گلبج مثل ما حركتن گلبه .
سميعه ـ نزلت عليها وأجتي سريع عبالي شافت شيء ما احسها غير تريد تضربني گبل منعتها وجتفت إيديها وشافتني نوريه لو تخبلت
نوريه ـ ولج تلزمين إيد أمي وتمنعيها اليوم كتلج حلال
سحاب ولج سحاب تعالي عاونيني نكتل بنت عطايات
مهديه ـ نامن عليها أريدجن تعيدين تربيتها هالخزي
فطسنها اي يبعد امي وأبوي عفيه بناتي عفيه كتلن كتلن هذني بنات عطايات جلدهن قوي ولا دكول قبل يومين مكتوله جبناها جلدها مهري هري من الكتل وتشتغل شغل الدابه ، غضب الله عليجن لا سحوره تركدجن لا كتل لا زلوم تحكمجن شايخات على الأوادم من الله يكمعجن ويخلصنا منج ، من فلك عبالي
اكطع عرجن من بيتي وهم مـا خلصت مدري شمسويات لويلادي .
سحاب ـ سحوره يمه سحوره .
سميعه ـ عوفنييي ما سويت والله ما سويييت شيء كافي دخيلج نوريه كافي ، نامن عليه ويعضن بأيديه وسحاب تجرني من شعري ، عاد سكتن وعافني من سمعن صوته
صباح ـ شنو هالصوت العياط واصل لرأس الفرع عوفنها تخبلتن من خبال كون ، عفيه بيت ما يركد بس عياط ومشاكل شنو كاوليه أحنه خوما كاوليه .
سميعه ـ ثوبي جان مرفوع كبل نزلته وسترت نفسي وشلت ربطتي ومشيت للمطبخ نهزمت وعفته يحجي عليهن همزين سمعت الك صوت واجييت تدافعلي بعد وگت بس يله تضل رجلي أمداه الوكت من يظلم حظك وبختك تضل مكفخ لليسوى والما يسوى وأنه بنت عطايات الكل يخاف منها ويحسبلها الف حساب تالي ما تالي وكعت على أيد مهديه ام السحوره ...
دخلت عليه عفاف باوعتلي بحزن احسها طيبه بس ما تكدر تساعدني ولا تحاجيني تخاف من عمتها سليمة الگبور وهم ضرتها تكون بنت أخت مهديه ساكنه بيت وحده وكحه عكسها هي والفقير بهل البيت ميعيش
عفاف ـ الله يباوعلج ويتلطف بحالج .
سميعه ـ الله يسمع منج ، ما تحملت نظرات الشفقه كمت ورى البيت لما يفكن خبالهن وادخل وين صار الظهر وعمي عالجيه توني ارد اكوم اجتني سحاب شمرت عليه ثوب وملابس ملبوسه .
سحاب ـ هاج هذن ملابسي بس مو جديدات خلاگين كلت أحسن ما اذبن انطيهن الج لأن أمي كالت خل تغير مهدامها خطيه رجلج شافج وأنتِ لازكه على هالثوب من يوم جبناج بي وريحتج طلعت منه بلكي يشوف كاشخه وريحتج طيبه يحن عليج ويردج .
سميعه ـ لا مشكوره مـا أريد مشيت ولزمتني قوي عوفيني سحاب فكي عني ماكافي عاد ما مليتن
سحاب ـ البسيهن لا أكول لأمي وتشوف شغلها وياج
ـ ما البسهن چا هي گوه فكي عني دفعتها ومشيت المطبخ شلبس منهن وأنه لاعبه نفسي منهم البيت ابداً ريحته مو طيبه لـو شكد انظفه والمع بي ما بي ريحه حلوه مثل بيتنا ، هناك بس ارش الطرمه البيت ريحته ترد الروح مدري هنا يخنك خنك ريحه ما جاي أعرف اميزه الريحه مال شنهي!
صبيت الغده ويه عفاف وبناتها عدها بس بنات اربعه وضرتها خلفتها بس ولد هم اربعه ، صبينا الغده واجه قادر اليوم اهنا مبيته وفاين بس يباوع لمرته وكل شوي يضربها على... لعب نفسي ولا يستحي من أخواته .
كملت وسمعت صوته
صباح ـ يالله
سميعه ـ مدري شصارلي نخبصت خليت الخبز وارد امشي ومهديه گبل حجت
مهديه ـ أمشي ولي بالمطبخ تزقنبي .
سميعه ـ هو موليه ليش يا يوم مأكله وياكم .
مهديه ـ أشوفج صايره وكحه وتردين الحجايه سمعت ياسين بنت أخوك شون نجلبت الظاهر شافت دلال زايد
سميعه ـ مشيت وهو ضل واكف حجايه ما حجه بس ساكت ادري مو رجلي ، چا شكو جبتني وياك وشلت خطيتي خدامه لامك وأخواتك جان ضليت يم أهلي أخدم نسوان أخواني وخلفتهم اشرف من مهديه وبناتها النكسات ، حتى حرام الواحد يعيش وياهن جوه سكف واحد ، مدري كلشي بيهن مو راحه !..
مهديه ـ سميعه يسميعه وين وليتي تعالي شيلي المواعين وجيبي الجاي .
سميعه ـ كلشي سميعه كون تموت سميعه وتفتكون منها ومن عارها مو انه عار عليكم وعلى اهلي من ساعه الكشره التزوجت بيها .
صبيتتلهم الجاي وقدمتله اخذه ولا جن شايفيني كدامه أي عمي خاطب شيسوي بسميعه من جابها لحد هسه لازكه بهل الثوب ليش فكر بيه كال عندي حرمه اتفكدتها
واكفه امسح بالكاونتر وارتب وراهن اتجفى شرهن وفزيت على صوته .
صباح ـ أكو چاي .
سميعه ـ مدري شحجي ، اي أكو أصبلك .
ـ أي صبيلي خوش چاي ريحة الهيل طاعنه بي بالكوب لا بالاستكان .
ـ صبيتله وأخذه ومشه ، عاينت عالساعه اذن الظهر ولا صليت ، شدهوني هالعيال فلك ولا واحد بيهم يصلي واشوفه وأتذكر صلاتي حتى عمي يصلي وگت وگت
لا اكوم اصير مثلهم خل اتوضى واصلي منو يفيديني عگبها .
صعدت غرفة البنات ريحتهن بالغرفه أختنكت عليهن ولا حربيه اجتني وطمنتني عليهن ، صليت وأنه اصلي هجست الباب أنفتح وواحد يباوعلي ، سلمت ماكو أحد عاينت من الدرج البيت صنطه ، شافتني عفاف وضحكت وكالت .
عفاف ـ يولي شفت صباح صعدلج حجيتوا لا .
سميعه ـ صعدلي
ـ أي ولج انه شفته صعد
ـ مدري جنت أصلي ، عفتها ورديت الغرفتي وبشنو يحجي وياي هو لو يريدني جان ما خلاني مكفخه لأمه وأخواته .
للعصر سمعت صوت حربيه ونزلت وشفت نافع ها ولك شجابك منو دلك الدرب .
نافع ـ شجابني غير بيت خوالي
ـ وانه شحجيت شبيك تحاجيني من گفه خشمك امك وين
ـ يم مهديه
ـ شو مهديه مو جديتك
ـ ما عندي بس حبوبه وحده هي عطايات .
ـ چا خوش ما اشتاكيتلي
ـ أي
ـ بسته وكعدت أنتظر حربيه وأجتني رادت تجي تبوسني بس وگفت وتفرك بإيديها
حربيه ـ شلونج سميعه .
سميعه ـ هالكدامج الحمدلله عايشه ، حاجيتها بصوت ناصي عود تعالي لمطبخ نحجي اسألج عالبنات وشوي ولحكتني وركزت على وجهه بي طعنات شبي وجهج .
ـ ما بي شيء
ـ مشعان ضربج مو
ـ لان جذبت عليه زين ما طلگني لما عمتي وكفت بوجهه لخاطر جهال عافني
ـ تحجي وتبجي
ـ احجيلي شبيكم وأمج شتريد منج .
ـ هيج تسأل علمود قلق!
ـ شنو هاي أنوب أكله لو شنهي!
ـ زوجة صباح ضرتج كرة عينج ما تعرفين إسمها
ـ لا وين ولا أحد جاب طاري هسه من حلگج سمعت
ليش أسمها قلق!
ـ أي قلق وشعجب ما طشن الخبر الج يوميه يهلهلن عاجات بالهلالهل محمود شال رأسه من وراهن ما احترمنه .
ـ شلي غرض وبحظهن وبختهن كون ،عالطاري محمود البنات شلونهن .
ـ زينات اخذتهن يمي لما ابوهن ينزل ويأخذهن قريبات بصفي
ـ الف الحمدلله ريحتي گلبي .
ـ لا الحمدلله هو ما يأمن عليهن بس يمي وأمانة المرحومه ماتت وهي توصي بيهن ، هسه عوفينا تبقين بهذا حالج
ـ چا شسوي بإيدي حالي مو شوفة عينج
ـ مدري شگولج
ـ لا گولي ضلت عليج گولي خيه
ـ سمعت من أمي أهلي يردون يطلگونج بس ينتظرون صباح يتزوج ، هو باجر العرس .
ـ يسون عليه فضل اي أدري كالوا باجر .
مهديه ـ حربيه ذابين صرتج بالمطبخ وين وليتي .
حربيه ـ أجييت ،هاج هاي ملابسج صبيحه أشترتهن ودزتهن بأيدي تريد تجيج بس رجلها غريب يتجفى المشاكل وما يقبل ، وخطيه جاي تقنع بصباح يردج بيتج بس أخوي وأعرفه ما يسمع من أحد بس من أمي
الله يهدي عليج ،يله أروح عود أمرلج .
ـ الله وياج ، فتحت الجيس مأخذتلي ثلاث دشايش وربطات وكم شغله شميتهن بيهن ريحتج يصبيحه محد ضلي من هلي عداج محد فگدني وسأل عني وگالي شمحتاجه بس أنتِ يالحنينه يا أم گلب الجبير .
رحت الحمام البنات فوك أنه اسبح بس البسهن نفسهن وبدور البنات تغطيت ولما يبس ثوبي ، لبست وعدلت ربطتي حيل فرحت بيهن عبالك العيد رغم كسرة كلبي بس حيل فرحني مدري لان من صبيحه حاجته عزيزه على گلبي من دور بنيه هي تفكدني وتعزني .
العصر كشخن ولبسن وتلمعن وطلعن ومهديه تمشي وتوصي بيه ، رغم شكثر حطن من هالعطر الطيب مدري ليش ريحتهن مو طيبه يمكن لان ما يصلن استغفر الله ربي والله ريحتهن مو طيبه مهديه وبناتها
عفاف المسكينه ما محسوبه عليهن .
مهديه ـ أرد والكي البيت مغسول ومجلوف زين شبابيج كلها تلمعينها وداير مداير البيت والجدوره هسه قادر يجيبهن تجلفيهن زين .
سميعه ـ هزيت رأسي وولت هي وحبايبهــا وأنه ولا عبالك وحده رجلها يتزوج عليها ويجيبلها ضره ، دكول گلبي ميت صخره هلبت أحس أنقهر ، عليمن يحظي ؏ حبه وعشكه اليه چا ششفت منه بس الكتل والمسبات خلاني فرجة لاهله واهلي ، خل يتزوج بلكي الله يهداه ويطلكني وأفتك واولي على اهلي بس اكولن اله يخليني بيت مشعان والله أخدم حربيه وخلفتها ولا أكابل أمي بعد .
سويت الوصتني عليه لاتجي وتكتلني هي وبناتها وحدتهن بگد البغل لو نامن عليه يملخني بسنونهن
وريحتهن تخنك .
قادر ـ هـا الگوه لا متعدله من جبناج فطيسه .
سميعه ـ تجاهلته ومشيت مدري شگله مو راحه خفت منه دخلت المطبخ ورديت الباب كلبي لعب منه
قادر ـ وينج وين وليتي تعالي أخذي الجدوره مو عرس رجلج عمي أنه من تزوجت مرتي هي شالت عرسي .
ـ ضل يحجي ما انطيته صوت وهناك سمعت صوت محمود
محمود ـ شعندك هنا؟
قادر ـ شنو شعندي غير بيت أهلي
ـ لا اقصد ليش ما رايح
ـ وين أروح شبيك محمود
ـ سميعه بالبيت
ـ اي وين تولي ، يله أني اروح اجيبهن وأنت جيب باقي الاغراض
ـ شعليه ، جيبوا أنتوا ، يله روح جيبهن وارجع جيبهن
سميعه ـ راح وخف الصوت وهناك ورجعن هنا وهوستهن واجتي زمن زوجة قادر فدوصخه وبس تأمر اشتغل عند الخلفوها بنت الگلب
زمن ـ تعالي غسلي لحمودي
سميعه ـ أنتِ أمه وكومي غسليله أنه شگو بأبنج وبعدين عندي شغل
زمن ـ سمعتيها عمه شفتي شون عينها طالعه لان صباح مو راسها نوب راح يتزوج وحده بنت عز ودلال وبنت بيوت مو مطمطه .
ـ عوجت حلكها ، عفتهن يضحكن وتحسبت عليهن وهم دزتلي ابنها ، أمشي ولي على أمك أنت وريحتك متبليه بلوه بيكم .
ردت أملخ نفسسي بس صبرت وجرعت الما ينجرع لما هلكت وهوسه العرس كلها تكبعت بيها ، ذبن عليه الطبخ ورى البيت ومن الفجر صليت وأنه أشتغل ظهري انقسم نصين اطبخ وانظف واغسل ومهديه وطلباتها الما تخلص كلشي تخليني انظفه الا غرفتها وغرفة بناتها ما تخليهن ادخل لغرفهن .!
صبوا الغده واخذوا الأكل وواكفه عالاكل عود هي الطبخت ما يدرون سلكتني سلك ، كعدت اخذ نفس واجن جنايين عالحاضر صبن وكبعن صينيه باللحم .
أباوعلهن من الشباج خابصات نفسهن ويتكشخن ومهديه لابسه البتوت مخرخشه تخرخش بالذهب
وانه بإيدي جفجيرر وهناك وطكنها بالهلاهل بعلو صوتهن عناد بيه ، لما مشن وعافن عليه الهوسه ردت اعوف كلشي واروح أنام تالي تعوذت أبليس وكملت كلشي لما سمعت صوت الهورنات دمعتي بطارف عيني ، جذب هم حزت بگلبي وخنكتني العبره على نفسي مو لان تزوج ، بس الله كريم ...
يومين مرت وأنه اشتغل وساكته يحجن وياي بس أهز برأسي لما كالن .
نوريه ـ جهزي الضيافه اليوم جنتنا عازمينها عالغده .
سميعه ـ ما حجيت وسويت العليه وطبخت واجاني نافع يجر بثوبي ها اجيتوا .
نافع ـ اي أجينا ، عمه منو هاي قلق نافشه كفشتها!
سميعه ـ ضرتي هاي شون أمك وماما وهبيه هيج
ـ وليش هيج اسمها
ـ مدري يعمه أسمها بعد ، أمك أجتي
ـ لا ما أجتي صدك عمه عمتي صبيحه تسلم عليج
ـ وعليكم السلام ليش تشوفها ويامن اجييت ولك
ـ چا غير كلنا بنفس المنطقة وأجييت ويه غافر من مدرسه وعمتي دزتلج سلام وكالت خل تكتبلي بالورقه شنو تحتاج علمود ادزه ويانا اني وغافر نجيبه الج .
ـ يا عيني ، وغافر وين
ـ يستحي واكف برة ينتظرني
ـ روح صيحه لما اكتب بالورقه ، رحت كتبت الها عالسريع وشكيت الها همي ومشتاقه الها وضميتها
وشفتهن اجو واحد لازم ايد الثاني نفس الطول تقريباً بس غافر شوي صدره أعرض يشبه ابوه، حضنته أبوس بي وصافن عليه صاير زلمه فدوه لهل الطول سلملي على أمك
غافر ـ يوصل خاله اي شيء تحتاجين أجيبه الج
ـ يبعد خالتك أريد سلامتكم .
نافع ـ يله نروح
سميعه ـ روحوا شگد مستعجل ، عكد حواجبه ومشى كدام غافر ، فرحت بشوفتهم على الاقل شفت منهم محنه أحسن من الكبار .
ورجعت المطبخ ودخلت نوريه تذب بكلامها مثل سم
نوريه ـ تعالي جيبي الشربت والكيك
سميعه ـ بس وگت غده المن الشربت والكيك
ـ وأنت شعليج شو أمشي ولا تلغين زايد .
ـ امري لله ، وأخذت الصينيه ولحكتها وشفتها وگفت كاعده بصفه فاتحه الشعر عالطوله ذهبي وطويل حيل وثخين وركبتها ومكياجها ولابسه قميص وتنوره قصيره رجليها طالعات وعادي مكابلتها ويضحكن وهو يسولف ويه أمه طبيعي الأمر ، وجايبتني اقدم شربت وكيك ما تخافن من الله ، دفعتني مشيت قدمت الها وهو صفن عليه ، وصلت اله خليت الصينيه ومشيت
مهديه ـ أمج كلشي علمتج عالسوالف الموزينه والدورب والمكسرات بس ما علمتج عالاوصول تعالي سلمي على تاج رأسج الست قلق .
سميعه ـ ما سمعت الها صعدت غرفة البنات حلفت بعد ما أنزل خل يتزقنبن ويغسلن نسوان بكد الدود انه شكو
للعصر نزلت رايحيين وضليت على هالحال شهر مشموره عند مهديه صرت سلابات ضعفت حيل صرت عامود من القهر والضيم والعازه والحجي والمسبات والروح مقموته من البيت والساكني ومن كل البشريه
صبيحه ما وصلتني رجلها حالف عليها ما تدخل بيت مهديه بس دزلي مكاتيب ومراسيل بيد غافر ونافع
اقرا وادزلها وشنو احتاج ادزلي سترت عليه حتى حلويات جانت ادزلي بس نصهن نافع ياگلهن ويبوكن .
غافر ـ خاله نافع نصهن باكهن
نافع ـ ليا جذاب انه اعلمك غافر بعد فلا اصادقك ليش تجذب عليه .
سميعه ـ لا يشتاغه وياك ، عليك بالف عافيه زعل وغافر لحكه يراضي ضحكت عليهم وكعدت اقرا رسائلها وذكرت بالرساله أختي لميعه
صبيحه ـ وصلني خبر لميعه عايفه خضير ومگابله أمي شحجيلج بعد لو تشاوفنا نحجي زين .
سميعه ـ أستلمي يا يمه ، عفت المكتوب ونزلت لكيته موجود سلمت وعبرته .
صباح ـ صبيلي جاي .
سميعه ـ أي هسه ، صبيتله لوحده لان ما جايب مرته وياه ، اخذتله الجاي ومهديه معصبه ومدري على شنو حاجاها وهي مراضيه .
مهديه ـ شو گمت تضرب من رأسك چا نسيت السوته بيك عطايات وبنتها هي وحبيب نسيت شسون بيك حرمنك من عزيزة گلبك بفرحة عرسك .
سميعه ـ خليت الجاي كدامه وباوعلي گبل رجعت لمطبخ وصار عندي فضول اسمعهم هلبت يطلگني ويأخذني يم مشعان وأفتك منج يمهديه .
حاولت اسمع كلشي ما فهمت تالي سألت عنه كالوا راح مدري شصابني كلما يجي أنثول وأحب يكون موجود ومن يروح عيني اضل ادور وراه ، من يجي ريحته هلكد طيبه هو كشاخ ونظيف يلبس كله رسمي ومرات يجي بس قميص وبنطلون كشخته حلوه هو من يومه حلو وصاحب جسم وضخامه جانت لميعه تزامط وتتغزل بي واني تلعب نفسي من وصفها تالي صرت حرمته شون قدر مو حلو نكسر گلبها وگلبي وياها أثنينا ما أرتاحينا
صارت تكثر جياته علينا ومن يجي انه دومي اشتغل واكرف وسخ مهديه وبناتها وجناييها وفروخهن وعيونه تضل وراي ويراقبني من اشتغل وأنظف والجهال وراي يوسخون لو يعاندون بي يشمرون طين واصييح ولا يفيد ولا امهاتهم يحاجنهم تطفر روحي ومحد مهتملي
هو بهيج مواقف يتسلط عليها بكم جية مره اجه وحده مره مرته وياه .
جنت اغسل بالكراج ورافعه شعري بالربطه ماخذه راحتي محد موجود قادر اليوم مو يم عفاف وعمي عنده فرن خبز ماا يجيبه غير الليل .
انفتح الباب وفزيت گبل نزلت ربطتي دخل هو شكله جاي من المدرسه وسمعت صوت وحده تحاجي .
قلق ـ اني راح اروح البيت تعبانه ما بيه غير مره اجي
صباح ـ روحي هسه أجي .
سميعه ـ يمكن مرته لان وكت حلة الطلاب ودخلوا غافر ونافع شافوا وسگتوا وباوعلهم وباوعلي .
صباح ـ ها ولكم شجابكم
نافع ـ أجييت اشوف عمتي .
صباح ـ شوف عمتك منو مانعك روح سلم عليها .
سميعه ـ اجوو بوستهم ونافع همس
نافع ـ باجر اجيبلج الرساله خاف خالي يشوف
سميعه ـ هزيت رأسي وراحوا وهو دخل باوعلي دنجت رأسي أتهرب من نظراته
ـ شيردون منج
ـ هيج والله هو دائماً يجون يسلمون عليه واسويلهم لفات يحبونها .
ـ وأني هم احب الجاي مالتج سويلي جاي .
ـ أي هسه وضل واكف بطريقي وعبرته ، هذا شبي لا والله انه شبيه وهو شبي ما شارب جاي طيب مو تزوج خل قلق تسويله جاي .
سويتله ودزيتله بيد وحده من البنات لايكول عليه ما صدكت ويشوف نفسه عشتوا هسه صرت تهتم ورايح راد .
يومين مرت وهو ما بين استغربت مو عادته ولا غافر ونافع بينوا عليه ، لليل مهديه اخذت نوريه ومدري وين ولن بهل الليل عمي جان بعده ما راجع وهنا كظن عبيهن .
عفاف مخليه بناتها وتمشطلهن وانه كمت شلت الهوسه ونظفت المطبخ وفزيت على صوته .
صباح ـ الله يساعدج
سميعه ـ ويساعدك
صباح ـ سميعه جهزي نفسج تمشين وياي للبيت .
