رواية خيط وابرة الفصل الرابع بقلم شمس العراقية
سميعه ...
ـ ضليت ساكته مدري شحجي ، ومشه وكال .
صباح ـ كملي وتعالي أنتظرج يم باب الحوش .
سميعه ـ كعدت وصفنت يربي اروح لا ، أي ليش ما اروح خما اضل أخدم هم من حقي أعيش چا بس هنه عايشات ومتونسات ، خل اروح وياه والله كريم شيصير بعد أكثر من الصار وتعلمت كلبي جرت عليه مصايب .
صعدت لبست عبايتي ولميت ملابسي ونزلت شافتني عفاف وضحكت
عفاف ـ أجاج الفرج الف الحمدلله صبرتي والله هداه صباح عليج وأنتِ طيبه وتستاهلين .
سميعه ـ الله يسلمج ، أنتِ هم طيبه ما شفت منج الا كل خير .
ـ أدعيلي أني يجي يوم وأخلص أني وبناتي
ـ أن شاء الله ، سلمت عليها وطلعت لكيته واكف يم السياره وصعدت وطلعنا للبيت مو نفس البيت وشفت صبيجه هذا بيتها .
صباح ـ نزلي يم أختج
سميعه ـ تلكتني ونزلت خذتني الغرفتها وأباوعلها ما فاهمه شيء وهي مستعجله رايحه راده وسمعت هوسه زلم مدري شكو ، صبيحه تعالي حاجيني تخليني مثل الأطرش بالزفه .
صبيحه ـ دصبري لما أصب والجاي وأجيج أفهمج
ـ بس فهميني شنهي السالفه راحت صبتلهم الجاي واجتي كابلتني .
ـ السالفه وما بيها يعالجون أغلاط أهلج وسوالف أمج العوجه الما ينلبس عليها عباه .
ـ شيسون .
ـ يعيدون عقدج أنتِ وصباح عقدكم باطل وحرام لان هو راد لميعه وأهلج بدلوج ، الله ما يرضى بهل الشغل
ـ مو كالوا يطلگني
ـ يا طلاك أنتِ الثانيه وين تولين اذا تطلگتي ، نريد نسترج تحاجيني بالطلاك غير صارلنا يومين نقنع بصباح يردج على ذمته
ـ منو ومنو يقنع بي
ـ كاظم ومشعان كعدوا وياه وقنعوا لان ندري مهديه ما تجوز منه الا تطلگج وتعرفين النسوان شون يفرن عقول الزلم ومهديه وحده منهن تعرف شون تفر عقل أبنها مثل ما فرته وزوجته خلال أسبوع وأنتِ عروس ، همزين تلاحكنه الج ونردج اله ونفض هالسالفه ونخلص
ـ وشون أقتنع لان أجييت وياه وعبالك مضروبه عالراسي لان الفضحني كدام هلي وأهله ما ظنتي اشوف منه خير .
ـ لا أن شاء الله تشوفين منه كل الخير ، وكعدوا وياه وحجوا الا بزعوا وهو گلبه طيب والله هداه عليج واذا على سالفتج منو اليسكت بهل الوگت لا فوك الصخام صخامين هي ريتها كظت على سالفتج ليش كسرة گلبه نسيتها ، أكوم اشوفهم واجيج .
ـ راحت واجتني مستعجله ها بشري
ـ گومي گومي .
ـ گمت وياها وعادوا العقد من جديد وتم كلشي عالخير الحمدلله وصبيحه تبوس بيه .
ـ الله يصلح حالج يله امشي ويه زلمتج وديري بالج عليه
ـ عود تعاليلي مشتاكتلج اريد احضنج ابجي مخنوكه خنك
ـ هسه تشوفين صباح تنسيني وتنسين خنكتج
ـ ضحكت وطلعت وياها وشفت مشعان باوعلي بس ما حجه وكاله
مشعان ـ وعقد المحكمه لاتنساه هاليومين روح اكظي واخلصوا من هالسالفه
صباح ـ أن شاء الله ، يله سميعه
سميعه ـ مشيت وراه ووصلنا ودخلت البيت وتذكرتها هي وأسمها الما ينذكر قلق!! وگلبي عصرني بس ما لكيتها موجوده بالبيت وضلت عيني أدور عليها .
ـ دخلي ليش وگفتي
ـ ومرتك
ـ شبيها هاا أي بيتها لوحدها أجرتلها وأنتِ هنا تسكنين
هذا بيتج ومالج شغل بإحد وبيت أهلي ما توصليهم وحتى لو يدزن عليج تنظيف مدري شنو مـا تروحين فقط بالمناسبات ووياي ، واليسألج ليش وليش بس گولي صباح ما يقبل وما عليج بالباقي ، وبس أختج صبيحه تروحليها لأن اعرف بس هي الضلت الج من أهلج فما أحرمج منها وهي خوش مره وزوجها أدمي
وحجي زايد ناقص وسوالف نسوان ما أريد ..
فهمتي سميعه .
ـ اي فهمت
ـ يله شوفي شغلج
ـ مشه وكعدت ريح گلبي من كالي بيتها لوحدها همزين مو وياي نفس البيت مالي خلك مشاكل گلبي خلصان من سوالف مهديه وكلامه عجبني يارب حنن گلبه عليه ويكون خوش رجال ما ينفر عقله بكلام مهديه وتهجم بيتي والله تعبت ،الله ينطيج يصبيحه ويحفظلج زلمتج .
دخل الأستقبال وأنه رحت الغرفه شفت الكنتور فارغ واكو جنط مليانه ملابس يمكن مفرغه الكنتور من جانت هنا مستعملته وعايفه الملابس بالجنط ، كلشي مرتبته وعايفته .
وكف يم الباب وباوعلي على صفنتي حس بيه دايخه وهاي الملابس المن شتصرف بيها أخاف البس منهن ويكولي هذن مو الج لو هدايا لميعه والله أحتاريت .
صباح ـ گلشي بالغرفة الج تصرفي بي ورتبي غرفتج
ومن تخلصين شغلج سويلي عشه .
سميعه ـ أن شاء الله ، أستبشرت خير وفرحت وكعدت أرتب وأنه فرحانه اي والله فرحانه والملابس حيل حلوات والغرفه هم كلشي بيها حلو هاي صارت غرفتي وبعد ما انام بالكاع ولا اسمع صوت مهديه ولا تكفخ نوريه محمود مشكور ربي ..
كملتها وسبحت ولبست ثوب جديد ورحت المطبخ المسواك عالكاونتر رتبته وسويتله العشه وخدرت الجاي ورحت صحتله صباح العشه حاضر .
ـ اي هسه اجي .
ـ وأجه وباوعلي
ـ كعدي تعشي وياي تضلين واكفه
ـ كعدت وكابتله مستحيه منه اكلت كم لكمه وكمت وهو شرب الجاي وطلع من البيت يمكن راح لأهله
كملت شغلي ورحت الغرفه تمددت مرتاحه ..
حسيت بوجوده دخل الغرفه ورفع الغطا ونام بصفي جسمي كل جفل بقيت منطيته ظهري لما حسيته غفه انداريت عالكيف شفته نايم ، رجعت غمضت عيوني أول يوم أنام مرتاحه عكب هذاك اليوم المصخم يوم عرسي ، الله لايردها من ايام گشره مرت عليَّ ...
لصبح كعدت لكيته رايح لدوام وأنه ولا دريت بي نمت مثل الميته مدري الفراش ريح جسمي ، شفت ملابسه صفنت عليهن صرتي بذمة رجال يسميعه وكمت غسلت ونظفت البيت كله وكعدت اطبخ الغده وأندك الباب منهو يجينا هساع .!
كمت وصحت منو؟
صبيحه ـ أني ولج أني أختج صبيحه فتحيلي .
سميعه ـ صبيحه يمه ، فتحت الباب وحضنتها وبجيت عالصدرها أوووف شمحتاجه حضنج يخيتي .
صبيحه ـ اسم الله شكو صباح بي شيء أجييت أتطمن
ـ لا لا ما بي شيء بس من هذاك اليوم أنه مخنوكه ولا تدرين مهديه وبناتها شسون بيه لاعبن لعب
ـ سوده بوجهي ، ادري ليش مـا ادري سوالف مهديه كلها تدري بيهن ، أمشي عيني أنتِ لاتبجين الحمدلله من أجاج الفرج وتلطف بحالج ورجعتي لبيتج وخلصتي
ـ بس عالضره يصبيحه شايفه هيج حظ ، هذا حظ أختج المصخم ما شفت بس المر تمرمرت بحياتي لا أهل لا رجال لا عيال
ـ ميخالف شتسوين مو زين كظت هيج ، امشي داخل نسولف وأشوفج وتحجيلي وأحجيلج محملة كومة سوالف .
ـ ودخلنا وحاضتني وتبوس بيه وأنه نمت بحضنها احب ريحتج صبيحه أنتِ من يومج صرتيلي أم من يومج حنيننه من دون أهلي گلبج عليَّ .
ـ لاتضلين تقهرين بروحج والله كريم شوي شوي اليوم رجعتي لبيتج وباجر تتحسن علاقتج بصباح وعكبها أهلي!
ـ كلهن اي الا أهلج أبداً والله
ـ شو هيج سميعه أهلج ولج شون وأمي
ـ للموت يصبيحه أنتِ ما شفتيهم شون كتلوني وشون امي طردتني وتحاجيني وتبرت مني وغضبت عليَّ ليش الكلام ينسي لا ما ينسي وكلشي انساه الا دگتهم الناقصه بيه ، خاف مشعان اي بي مجال لان اهون من أهلي لما هو أنه جان من زمان ميته .
ـ يبوه عبالي كلبج أهون من كلب أمي طلعتي عناد اكثر منها
ـ ها شفتي هاي بلسانج حجيتها يعني هي ما تريدني بعد
ـ مقهوره منج حـيل وحتى أبوي لان خسر عمي ياسين
ـ هاي هي بعد لاتجيبين طاريهم كدامي أنه متت وهما الله يسامحهم بس أنه ما اسامحهم أبداً
ـ هاي هي سوالف أمي ما حصلت منهن بس الخراب أنتِ نزلت عليج ضره ولميعه.
ـ وسكتت شبيها لميعه .
ـ الله يكون بعونها هم مو سهله عليها التحبه اخذ أختها بس بعد قسمتها ، شگول على تدابير أمي شالت خطايطجن بهل الزواج .
ـ أيباه شكثر تحبه أختي واعرفها بكل سالفه ينجاب طاري تضل تتبسم وتالي وين صفى الوگت بعشگها
ـ قسمتها ، شتسوي بعد
ـ تدرين أحس رجعني لان أشبهه يعني على ريحتها مو حباً بيه .
ـ شما يكون أرحم من مهديه لو عجبتج السكنه عدها
ـ لا دخيلج كطيعه تكطعها هي وبناتها ما عولت خلصت منهن .
ـ اي زين ، أي شلونه وياج حاجاج
ـ أي حجينا وهمزين مرته مأجرلها وهذا البيت بس أنه بي
ـ اي سمعت من مشعان الف الحمدلله وو ... هذيج السالفه احجيلي لاتستحين .
ـ يا سالفه
ـ شبيج تغشمين نفسج بين الرجال والمره شيصير
ـ لا لايروح بالج
ـ كشختي أشسويتي لو نمتي بثوبج
ـ اي بثوبي چا شلبس
ـ يحظي عليج
ـ شمدريني قابل متزوجه گبل وأمي ما علمتني بس كظت عمرها تحجيلي وتحذر بيه تالي من كثر ما نطقت بالشر حضر .
ـ هم صدك شمدريج گومي وياي للغرفه أني أعلمج وشتلبسين وشتسوين وشون تفرين عقله وتكسبينه لاتنسين عندج ضره وشمات مهديه وبناتها ، صرتي متزوجه وأم بيت وبيتج قصر شحلاته كلهن يتمنن مكانج ، يله گومي أعلمج شتسوين .
ـ أخذتني الغرفه وطلعت ملابس النوم وكعدت تحجيلي وتعلمني وأنه استحي وتمكيجني وتعلمني وهيج لما صار الظهر وكشختني بثوب الوان يولي ليش ذبيتي ثوب الأسود
ـ تزوجتي بعد وعروس ورجلج من حقه يشوفج بالالوان
ما عليج العتب وعروبه الله يرحمها الحزن ما يرجعها احنه لابسين وأنتِ تلاحكي رجلج وبيتج عوفي الاسود والحزن هسه محد يعتب عليج ولو حجن ما عليج خل يحجن
ـ ولميعه ذبت الأسود
ـ لا والله بعدها لابسته ، شلج بيها التفتي على حياتج وهي الله يتلطف بحالها .
ـ أن شاء الله
ـ يله اروح تأخرت عود أمرلج وما اوصييج دوم ريحتج طيبه ولو أنت من دور جنتي بنيه بس تلمعين بروحج وريحتج شحلاتها وبعد على التعلوم خوش خيتي .
ـ أن شاء الله خيتي بوستها وراحت ورجعت اباوع لروحي
شحلاتني وشعري ناعم على ظهري وتذكرته عالجيه يبوي گلبي يركع لوحده ....
جهزت كلشي وسمعت طبة الباب أجه ودخل السياره بالحوش وأنه احوص مدري وين اضم رويحتي منه شكول عليج صبيجه أخاف فشله وعيب منه .
أعصر بإيدياتي ودخل المطبخ وصفن بوجهي واني ابلع بريكي غركت بهدومي .
صباح ـ الله يساعدج
سميعه ـ هلا بيك ويساعدك
ـ شطابختي غده ، ريحه الأكل مالتج من رأس الفرع اشمها من دور جنتي بيت أهلي .
ـ مركة لحم وتمن .
ـ تعالي لغرفه احاجيج .
ـ باوعلي وعالوجه أبتسامه عيونه تحجي راح الغرفه وأنه تخشبت بكاعي شيوديني للغرفه شبعدها صارت عليَّ كله منج يصبيحه خليتني اتحمر وخبلت الرجال
ـ سميعه وين صرتي بويه تعالي .
ـ حجه وضحك ، يمه فلك كون يسميعه، تسودن الرجال وعلي تسودن .
مشيت الغرفه بس وصلت سحبني من أيدي وقفل الباب وصار اللي صار ...
العصر دخل الحمام وانه حميت الغده وكعدت امشط بشعري وفرحانه ، طلع حنين وگلبه طيب وخوش زلمه
بس غصه بصدري من أتذكر أختي تعشگه عفت المشط من أيدي وصفنت وأندك الباب جفلت يا حافظ هالدگه أعرفها المن! وصباح يمكن قافل باب الحوش لان
يعرف امه تدخل تدرعم دكول مداهمه .
لميت شعري وطلع صباح لبس عالسريع
صباح ـ هاي أمي .
سميعه ـ فتح الباب ودفعته ودخلت عصبيه والوجه مكظم سماد صايره ، اجتي هاده عليه وتحجي
مهديه ـ لا وفاگه الحزن ولابسه الحمارات وفاله الشعر من فلك فلكجن كون بعد تراب أختجن اخضر ماتت شابه لازم تنكسر عيونجن لو ميتات عالرجال ما صدكن ولدي يكبلوجن ويسونجن أمهات بيوت وكاعدات بقصور خلف الله على ولدي لفوجن من الوسخ وكن الدجاج لقصر بحلم هم ما تحلمن بي .
صباح ـ يمه شلزومه هالحجي هذا وبعدين الحزن ما يرجع ميت يمه .
ـ أنت أسگت عبالي تطلع زين أخواتك طلعت أنكسسهم ما صدكت مهديه تمشي لأهلها ، اجيت وراي وجبتها وياك كمت تموت علما تواسد بنات عطايات عالمخده وحده .
ـ يمه فضحيتنا شهل الحجي المخازي منا الجيران
ـ ولهدة تنام على گلبك من عمت عين أمك ولك صارلي شهر ارطن واكولك طلگها وأنت تطب من هالاذن تطلع من هالأذن وحجايتي مالها قيمه ومنو لعب وضحك على عقلك كالك تأجر لقلق وتسكن ام الوصخ العايبه بهل القصر هاا منو كالك تضرب وتشور من رأسك ، هذا كويظم ومشعان والله فلا فاتت جيسهم .
ـ يمه النسوان نسواني والبيت بيتي أني حر اسكن منو وأجر لمنو وهي تكعد بهل البيت وهم قريبه على بيت أختها وقلق يم اجرتلها قريب أهلها وعالمدرستها بعد شگو هالحجي مالتج
ـ وسالفتكم وياك ودگتهم الناقصه نسيت ولك نسيت نستك سميعه سحرتلك بفراشها ولك يالأغم هاي المعيوبه الضحكوا بيها عليك ملعوب بيها ما لعبت نفسك من جستها ولك گبلك واحد جايسها شنهي من نفس نفسك يالطايح الحظ ، ولك ضحكوا عليك يالمضحكه .
سميعه ـ ما حجه شيء سگتت وأنه هم ما حجيت ليش سليمه تنطي درب واحد يحاجيها .
صباح ـ يمه عيب هالحجي هذا كافي الصار صار وسميعه جنتج حالها من حال جنايينج الباقيات وسميعه حرمتي وطلاك ما أطلگها
ـ لا مو حرمتك وتطلگها غصباً على رأسك ولك تريد تخليها وتكثر عرجهن من بنات عطايات ولك تريد تجيبلي أحفاد من عرجهن من صواب كطعهن .
والله لو أموت يصبيج سميعه الليله تمشي على أهلها هسه تطلكها ما تبقيها على ذمتك هساع .
ـ يمه سميعه صارت حرمتي وما اطلگها وهيج أنتِ تكرهين عطايات وبناتها لاتجيين وتشوفينها هي أبيتها وأنتِ بيتج وكان الله يحب المحسنين .
ـ تطردني من بيتك يصبيح ولك تطرد أمك
ـ ما أطرج يا يمه والله ما أطردج والبيت بيتج واحنه خدام عندج بس چاي أفهمج ، شو فوتي داخل وخل نشرب أستكان جاي ونحجي بهدوء
ـ ما اشرب سم ولي عن وجهي ، فركستوا گلبي أنت وأخوك محمود ما بيكم زلمه ناصح كلكم تمشون بشور عطايات .
سميعه ـ أخذها يقنع بيها دخيلك ربي مو مره مدرعه
سويت الجاي توني صبيتها وطلعت تهف بعبايتها وعصابتها دكول جبل تخوف ، وكفت يم باب المطبخ وكالت .
مهديه ـ عود ما أوصيج الكفي بساع وجيبله بنيه مثل أختج سربتهن وحده ولا الثانيه أربعه من فلك فلكجن وفلك خلفتجن ، كطعيه لاحملتي كون ولاشفتي الخلفه كون تحملين بومه وتضل عاله عالكلبج .
سميعه ـ ما جاجيتها حجت حجت وولت وصبيت الغده وتغدينا وكعدت اشرب الجاي أنه وياه .
صباح ـ هالراديو يوميه ينسمع على رأسج وأنتِ مثل ما أوصييج سمعي وسگتيي أولاً أمي واجبج تحترمينها وثانياً حقها الصار مو قليل ولا ينسي بس الوكت يجبرك تتقبل وتبلع لسانك وقهرك وتسكت فالاحسن سكتي ولاتردين حجايه بوجه أمي لسانج أكصه اذا بيوم دريت مرادده أمي
سميعه ـ أن شاء الله التريده تامر بي .
ـ أني رايح ساعة زمان وأرجع
ـ وين تروح
ـ بيتي الثاني ليش محتاجه شيء
ـ لا سلامتك
ـ ارجع ما أبات وليله يمج وليله يمها واختج تجي يمج وزلمتها بالدوام يعني ما تضلين وحدج لاتخافين .
ـ هزيت رأسي وهو طلع رجعت كملت شغلي وسويت العشه وهو لليل رجع وجان زين يحاجيني ويسألني بس انه متردده صورة لميعه گبالي وأختنك وكظت عالليله عالمخده وحده ، نايم واني بصفه واجتني صورة لميعه
وسوالفها وغزلها نزلت دمعتي الوكت ظلمنا يخيتي .
مر كم شهر وعقدنا محكمه وبس صبيحه تجيني وأنه اروحلها من يروح على مرته وصبيحه اكلت رأسي تريد تاخذني الدكتوره تشوف حملي
صبيحه ـ ليش هيج بارده ولج ما تخافين عالبطنج
سميعه ـ لا ما اخاف الله يحفظه مثل ما حفظني وبعدين اذا رحنا شنكول لصباح واذا سالنا شعندجن يم الدكتورة هم نجذب عليه مثل هذيج المره انه مليت من الضم .
ـ لعد تكولين اله حامل ويروح يطش الخبر بحلك مهديه وبناتها يومين ويجفصن بطنج ويموتنه ، شبيج نسيتي سوالفهن ، واني علمودج تحصليج طفل منه الجاهل يربطج بهل الزواج لان مهديه ما تجوز منج
ـ وانه اضل ضامته على أبوه
ـ اي كم شهر وعود حاجي وكوليله ضميت عليك خفت تصير مشاكل وأنت اعرف وهو راح يقدر وضعج وأني احسه كاتل نفسه على ريحة الخلفه لان مرته قلق لحد هسه ما حبلت .
ـ هيج تكولين
ـ اي ، وهسه كومي لبيتج وسالفة الدكتوره ناجلها هسه .
ـ يولي أهجس بي شاك بيه
ـ شون ولج
ـ اي والله مو كتله عليه الشهريه وما صدكني هي متنزل بس شو ضل يباوعلي بنظرات مدري شونها
ـ أنتِ كل شهر نفس تأريخ تكوليله عندج عذر
ـ يعني مرات انسى وافوت كم يوم واكوله كفختني شكو شبيج
ـ أمداج أكيد يلاحظ ويشك بيج يجوز ما لحكتي تنظفين كلتي اله عليه عذر
ـ اي لان مالي خلكه نفسي تلعب منه وهو بس ملاحكني مثل الديج من يلاحك الدجاجات شالع گلبي
ـ اهنا الصوج.، أكولج سميعه تعالي حاجيني يعني صباح يريدج يريدج
ـ بشنو
ـ وثول يعني ما فهمتي
ـ اي احسه ما يرتاح بس يمي واليوم التكون ليلته عندي ما ينام غير بحضني هذاك اليوم كال لو عندي عقل هسه جان ما وصلتج ووصلت نفسي لهل حال مدري شيقصد يمكن متندم على سالفته وياي .
ـ اي ليش وأنت تنحبين وصدك سميعه تحبينه
ـ دنجت راسي ،مدري
ـ أحجيلي خيتي ليش مستحيه وهو رجلج والج ولو عيب ولا حرام
ـ ولميعه
ـ وشتسويلها بعد لميعه حظها وقسمتها هيج
ـ اي أحبه وشوفة عينج منو اليه غيره ، ومن يوم الرجعني ما شفت منه الا كل ريج طيب حنين وزين وياي صح مرات يعصب ويسمع حجي يغث من اهله ومن مهديه بس اهون ينجرع وينعاش وياه گلبه طيب
ـ الحمدلله الله يسعدكم ويسهل عليج حملج وتكومين بالسلامه .
ـ الله يسلمج يله اروح اخاف يجي واني لحد الان ما طابخه الغده .
ـ ليش اليوم مو غداه يم مرته قلق
ـ أي يمها بس كالي اجي اتغدى يمج والعصر يروحلها
ـ ها زين ديله روحي وديري بالج على البطنج
ـ ان شاء الله خيتي ، رجعت بيتي وطبخت الغده وركضت سبحت ورتبت روحي مثل كل يوم وسمعت صوت الباب أجه ، طلعت ملتهفه لشوفته وبهتت من شفت وياه قلق ، گبل رجعت داخل وهو صاح وراي
صباح ـ سميعه وين بويه تعاي سلمي .
سميعه ـ رجعت الغرفه وسديت الباب جايبها وجاي ويريدني اسلم عليها والله ما اطلع لو شيصير .
ودخل عليه ..
صباح ـ سميعه مو وياج مو احاجيج شمعنى تعوفيني وتمشين لغرفتج شكو بيها هالمهجومه نكبرتي بيها
سميعه ـ ليش جايبها وياك مو گلت هي بيتها وأنتِ بيتج بعد شكو جايه بيتي
ـ بيتي من يمت هالحجي هذا
ـ ليش مو بيتي لو جنت تضحك عليه
ـ لا اله الا الله على خبال النسوان الما ينجرع ثكبت عمي بعد شيطفيها بيتج عمي بيتج بس أمشي سلمي عالمره .
ـ شوف صباح أنه ما عندي مشكله وياها بس ما أكدر افهم ما اكدر اشوفها ، الله يطول بعمرك وديها بيتها
ـ تغارين ولج
ـ ليش ما اغار مو رجلي
ـ باوعتي على نفسج شون صرتي وجهج صار جمره كله لان جبتها واجييت ، لعد من اروحلها شيصير بيج
ـ الليل ما أنامه واحترك حرك وأضل ادعي على أهلي واهلك أنبش شيب أبهاتهم على هالقسمه هاي تجي وحده تشاركني بيك بس شگول خليها بالگلب احسن
ـ باوعيلي وعوفيلي الزعل ما يلوكلج
ـ باوعتله وجرني وحضني وباسني وضحكت مو وگته
ـ لا وگته يمت ما أريدج وكته ، وهسه لخاطري أطلعي سلمي عليها يولي عدها ربو وصدرها تنك عليها أختنكت جان ماتت أخذتها المستشفى وهاي رجعتي ولازم ترتاح وانه وعدتج أجي اتغدى يمج فكلت اجيبها واجيج هم هي خطيه وهم ما أفارك هالوجه اليلطم .
ـ أبداً والله لو مو مريضه لو جاي تموت هم ما أطلعلها
عدها بيت أخذها بيتها وخل أمها وأخواتها يدارنها مو عدها اهل بعد شگو أني ما مفتحه دار استتراحه .
ـ سميعه اجييت وياج بالحسنى لاتشلعين کلبي عاد أمشي سلمي عليها عيب بويه المره دايسه بيتج شنو ما تعرفين الأوصول .
ـ لا ما أعرف الأوصول زين ، عفته ومشيت وصاح وراي
ً ـ سميعه لاتيبسسين راسسج لا أكسره الج
ـ لو شتسوي ما أروح اسلم لو هسه تحطني وتكتلني وتصبغ جلدي ما أروح
ـ شغلة عناد
ـ شتسميها سميها
ـ يصير خير سميعه اني الج وهذا رأسج مكبرته عليه الا أكسره وأطيح حظج بنت الكواويد
ـ الكواوويد عمامك ماله داعي الغلط
ـ سميعه لاترراددين حلگج أفرگه اجفص عليج والله ادوسج بحذائي وأنعل والديج .
ـ سگتت خفت منه لايضربني لان حيل عصب وخله وطلع ومشيت وراه شفته واكف يحاجيها وهي تكح ولاحظت عليها لابسه ربطه بس نص شعرها طالع حجابيش هذا! وملابسها حلوات ومرتبات وجنطتها حيل حلوه هاي منين تجيب هالسوالف عود معلمه
شكو تاخذين متزوج .
ركزت عليها طويله وحلوه ومتروسه وشكره لان شعرها ذهبي وجهه أبيض يمكن بيها نمش والله تعرفين تختارين نسوان يمهديه ام السحوره
ضلت تكح وفتح جنطتها انطاها علاجها ويحجي وياها ولزمها من أيدها لـو نار وثكبت بصدري اريد املخه يابه اشتعلت شعل وخذاها وراح .
طلعوا ورحت للمطبخ وصحت وراه صباح ، صباح .
صباح ـ وجعة أبو صباح تنام بگلبج شگوو شتردين
سميعه ـ تنام بگلبي هاا
ـ لا تنام بگلبي وتخلصيين مني أحجي شتردين أريد أولي
ـ لا أسم عليك يومي گبل يومك شعندي غيرك شو لا أهل لا عيال منو الي عداك أنت كل هلي وناسي يبعد حيلي لا هيج تحجي وتوجع گلبي .
ـ كولي شتردين
ـ بعدك زعلان مني مو
ـ ما عندج سالفه أولي أحسن
ـ مشى وجلبت بي من قميصه لا عندي سالفه وديها وارجعلي مشتاكتلك وما اريدك تمشي وأنت زعلان مني
ـ يصير خير .
ـ راح وزعله ما يفك بساع ، ضليت كاعده وأنتظرته تأخر يمكن ما يجي وصار الليل وهو ما بين تالي لبست عبايتي ورحت على صبيحه نمت يمها وضلت بس تحجي عليه ، فگي عني صبيحه ما ناقصتج .
صبيحه ـ هيج احسنلج أخذها وعافج لاتنجلبين عليه وتشوفين نفسج والمره كالج مريضه شصار عليج لو طالعه مسلمه عليها تأكلج قابل .
ـ ما تدرين بنار گلبي ساعه شفتها وأنتِ شايفتها شون لابسه وكاشخه وتتنفض وتتنعوص عليه
ـ طبيعي تلبس وتكشخ معلمه وراجعه من دوامها وأنتِ هم مو قصره ولا هو مقصر وياج كلمن على ذبته ياعيني .
ـ خليني بهمي
ـ سميعه يمه مو زين كظت هيج والمره مريضه ياعيني وأنتِ مو تكولين نفسي تلعب منه وناستتج صعبه وشالع گلبج خل يفك منج وترتاحين .
ـ لا ميخالف
ـ ها سميعه فلك تحبينه هلكثر ونار الغيره تأكل بيج
ـ ما رديت بس بجييت وأفكر بي لما نمت تعبانه لثاني يوم العصر يله سمعت صوته يحاجي صبيحه وسويت روحي نايمه .
صباح ـ ام غافر كعديها خل نمشي ووصيها تكبر عقلها
صبيحه ـ أنتِ هم دير بالك عليها ومرتك وبنت عمك وباجر عكبه تصير أم جهالك
ـ أم جهالي! ليش أكو شيء بالطريق
ـ الله كريم ما تدري شضموم الك من رزق وهي هم تعذبت وشافت الضيم أعذرها .
ـ بس قلق ما إلها ذنب علمود ما تستقبلها وتسلم عليها هي هيج الأوصول يأم غافر ، بس يله نماشيها على كد عقلها صيحيها خيتي صيحيها
سميعه ـ كعدت وجهزت نفسي وشافتني صبيحه وتوصي بيه ليش لمحتي اله مو گلتي ننتظر كم شهر
ـ ردت يدير باله عليج ، يله كومي ولاتضلين مطنكره
ـ مشيت لعنده سلمت ورد السلام وطلعنا للبيت وحسيت عنده حجايه ، گبل الغرفه ولحگني ودفر الباب
ـ سميعه ليش ضامه حملج عليَّ
ـ ما ضامه
ـ لا ضامه لاعبالج أني غشيم وما أعرف سوالفجن بس كلت يوم يومين وتجي تگولي ، ليش ضميتي حملج
ـ مو أنه الضميته والوگت والبشريه المعاشرتها هي خلتني اضمه خفت عليه لايموتنه بطني
ـ مو لهل الدرجه صح عاملنج بقساوه بس ما توصل بيهن للموت ويكتلن طفل لاتثخينها عاد ، وجم شهر الج
ـ أربعة اشهر
ـ يعني من يوم جددت العقد حملتي بساعتها
ـ نزلت رأسي مستحيه منه أي
ـ بيها الخير ، الله يكومج بالسلامه
ـ الله يسلمك صباح عود لاتگول لاحد هسه بالأخص أمك
ـ وليش ناهبه غير أبني وأني أبوه سوالفج التعبانه بطليها سميعه ، وأمي مالها شغل بيج لاتخافين ترى حفيدها وأكثر وحده تلكينها تفرحلنا حتى لو ما تحبج .
ـ بگلبي هذا شحجي وياه لو يشوف بعينه ما يصدك أسكت وأجاري أحسن الي ، هزيت رأسي صدك ومرتك
ـ شبيها مرتي والها أسم لو مو من أعجاب حضرتج
ـ حملت لا
ـ لا ما جاي يصيرلها وجاي تراجع عند الدكتوره والله كريم ، الله يرزقها مثل ما رزقج
ـ ليش تريد منها خلفه
ـ أي ليش لا مو حرمتي وحالها من حالج لو أنتِ وحد
ـ شبيك متغيير عليه ، حصره ما أحجيلي حجايه تثكب بنار عليه .
ـ ما متغير بس هذا حق وأنتِ أحسج صايره أنانيه تردين بس الج وتصرفج تجاه قلق أبداً ما عجبني بس عديتها لان بعدج زعطوط .
ـ عصب وعافني احترك بنار كلامه ، يحبها الها واضح من دفاعها عنها ما ينطي بيها أبداً وحالها من حالي شيفضها على رأسي شيفضيها ساعه السوده نوب حبيته من خفتني انه وكلبي على هالحب الأكشر .
ضليت على هالحال مناكر أنه وياه وساعاتنا مو واحد يوم شحلاتنا وعشرة أيام معارك ومزاعل ودومه يذب الصوج بيه ويكولي تغيرتي ، ومرته بعد ما شفتها
وبطني كبرت وكاعده يم صبيحه ،أخذيني السوك ملابسي صغرن عليه
صبيحه ـ أي ميخالف گايله لزمتج
ـ أي گالي روحي وأنطاني فلوس بس احس ميكفن
ـ لا هواي شعندج قابل هنا ملابس بيت وأخذلج فستان وعبايه طلعي بيهن وكنتورج مليان من تولدين لبسيهن
ـ لا عندي محبس ابيعه وأجيب بي حاجاتي
ـ وليش تبيعين صيغتج وتشترين بيها خلاگين شو متخبله وكاعده والرجال انطاج فلوس بعد شكو هالتبذير
ـ هسه تمشين وياي
ـ أمشي وياج بس بالمعقول تأخذين التحتاجينه بس
ـ ديله خل أحضر نفسي ونروح ، صفنت عليه شبيج
ـ ما ادري أحس كلامج صاير يختلف عن قبل ولهجتج هم تغييرت
ـ ترديني أضل أحجي نفس لهجتي ما اصير مثلكم ومثل صباح وأهله
ـ أي حلو واحد يضل على أصله ولهجته ، دومج تكولين أتهير هسه لو اتحضر لو أتجهز .
ـ وليش ما أصير مثلكم ربكم وحد أني هم أريد أعيش
ـ ليش بيت أهلي ما جنتي عايشه مو أمي تلبسج أحسن الملابس وأحسن الأكل مدللين أحنه .
ـ وأني ما گايله شيء عالكيفج بس أقصد يعني البس أكشخ ، وهناك الحياة شغل وزرع وحلال وهنا الحياة تختلف لبس وطلعت وعزايم وناس تباوع لناس
ـ ترى كله أدري بي بس من تحجين حجايه احجيها بوزن سميعه هنا أوادم تأكل الوجه ويركزون عالحجايه التطلع منج ، أنتِ من تكولين اريد اعيش يعني جاي تكولين أنه جنت مظلومه وما عايشه بيت أهلي وتنطيين بيهم وعيب بالأخص كدام مهديه .
ـ لا شسالفه شحجايه وأذا اشوفها بس عالكد السلام شافها البين وقسمها نصين ، يله نكوم
ـ أي هسه ، غافر شوفلي ابوك اجه من بيت خالك
سمعت صوت بلكي واكف يم الباب .
سميعه ـ علاقة كاظم ومشعان حيل حلوه دوم يروحلهم وهي هم عبالك بيت واحد ، الأ أني ولا أحد يدك بابي بس مهديه تجيني بس تعيب وتتأمر وما يعجبها العجب
لهذا قررت أني الأروح واطلع واشوف وبرأسي هواي شغلات راح أسويها وأغيرها كبل لا أولد .
وطلعنا لسوك وأخذت هواي شغلات اليه وللبيت وملابس فلوس ما كفتني وبعت محبسي وصبيحه كظت الطريق بس تحجي عليه ، فضينا يا صبيحه هسه بعته وأشتريت بعد .
صبيحه ـ هسه لو محتاجه اجي وياج شكو بيها بس مو تشترين شغلات ما محتاجها ولا ملابس اخذتي هالكثر وين تلبييسنها ياعيني
ـ من أطلع ويه صباح ليش وين البسها
ـ هو وين طلعاتج حدج بيت مهديه بالشهر مره بالليل ولبسج بالمعقول ، كمتي اخذتي ملابس موظفات ومناسبات وأنتِ حامل كلهن بعد كم شهر يصغرن عليج .
ـ من أولد وأضعف والبسهن ، لاتطلعينهن من عيني
ـ أيسي بعد الولاده تضعفين وراج رضاعه وتعب وسهر مدري شگول عليج ، مالها داعي هالصريفات وأخاف رجلج يشوفهن ويضل يحجي ويحاسب شتگوليله بعت صيغتي التنضم للعوزه .
ـ لا ما يشوفهن من الدوام يروح على المغضوبه من خفتها وخفت أسمها ، نوب صارلها فتره تراجع وملاحكها كامت تغار شون سميعه حملت وأني لا
ـ سميعه المره من حقها تصير الام لاتصيرين أنانيه
ـ عوفينها لخاطر ربج ، ما لكت الا متزوج ومعلمه وهالله هالله ما تسكتين دومج تدافعين الها .
ـ ولج سميعه زعلتي مني اني حجيت هيج لان هم خطيه هي والمره ما شفتي منها شيء وأذا على الملابس أني علمودج خفت يرجع يحجي عليج وهم صيغيتج تفيدج لوكت ما تدرين الدنيا شضامتلنا .
ـ لا من كلهم ازعل الا منج لا ، أنتِ أمي أني مو ضلي أهل غيرج أنتِ محد وكف وياي وساعدني عداج
ـ يمه فدوه لبنيتي الله يكومج بالسلامه يله خل نوصل تعبتي
ـ اي والله شوكت أولد واخلص
ـ ما ضل شيء كلها كم شهر وتخلصين .
ـ خطيه وصلتني ورتبت الأغراض وياي وفرحانه بيهن وسوتلي العشه وأخذت إبنها وراحت وأني دخلت سبحت ورتبت نفسي ، وأجه دخل الحمام سبح وطلع اليوم تأخرت عليه .
صباح ـ وهسه اجييت ، صبي عشه نتعشى علمود نروح بيت أهلي
سميعه ـ ليش صاير شيء
ـ الأ يصير شيء يله نروحلهم ونمر على محمود والبنات واليوم رحتي اليوم ما أخذتيلهن شيء وياج
ـ لا والله نسيت ما عبالي نروح أنت ما گتلي
ـ يلا غير مره نروحلهم
ـ لا الله عليك خل نروحلهم اليوم مشتاگه للبنات
ـ يله نروح ، هم تمرين على بيت أخوج لان صاير بصفهم حايط عالحايط كيفج ما أمنعج منهم ومشعان صاحب فضل عليج وكف وياج وساعدج .
ـ أي امر أسلم
ـ صبي عشه ما ضل وكت هم يله لما تبدلين ولبسي عبايه عالملابسج بطنج جبيره
ـ ليش العبايه! جبت ملابس عريضه وحلوات
ـ بس هذا لبسج من يومه شتغيير هسه وتردين تذبين العبايه! لازم تثقفتي سميعه
ـ هي مو عالثقافه بس اني من يومي ماأحبها عادي ما البسها والبس اللي اشتريتهن اليوم والله حلوات تشوفهن
ـ خل نتعشى ولبسي ونشوف ، ديله خفي إيدج
ـ أن شاء الله ورحت صبيت العشه من فرحتي ما أكلت بس أريد اطلع وأكشخ وياه وأقهرهن اللي كالهن عافها وبعد مـا يريدها ، عالسريع كملت شغلي وصبيت الجاي وركضت الغرفه لبست فستان عريض ومستور وميكجت ورتبت ربطتي اجه باوعلي وصفن ها
ـ حلو ما بي شيء بس لو عبايه أحلى
ـ شو مرتك قلق ما تلبسها عبايه لو بس سميعه
ـ وقلق شگو دخليتها بالسالفه ، عليج بنفسج وبس
وكيفج لاتلبسينها بس علمودج ولان حامل مو مال تذبين العبايه هسه وولدي وعكبها الله كريم شوي شوي ما امنعج من شيء أني بس العافيه بالتداريج أبويه وما أريد تسمعين حجايه تغثج .
ـ طلع قبلي وعندت ما لبستها ولحكته ماحجه شيء وصلنا بيت أهله وكلهن يباعن عليه وحده تغمز الثانيه تجاهلتهن وكعدت بصفه .
مهديه ـ يا هلا بيكم همزين جبتها وياك ، حابسها بهل البيت ومحد يطبلها
صباح ـ والله يمه اجي من الدوام تعبان
مهديه ـ الله يكون بعونك يمه ، شلونج يمه سميعه شون عافيتج ، البطنج شونه وشكد الج
سميعه ـ الحمدلله زينه عمه ودخلت السادس تحاجيني وصباح مبتسم واني صافنه عليها هاي مهديه لو مبدلينها!
نوريه ـ شو بطنج جبيره بس لا بيج بنيه
سميعه ـ العلم عند الله
نوريه ـ لا أنتن توارثتهن خلفه البنات ميراث ، أختج كبلج لبطت ورادت ما حصلت الولد وخلتهن ثلاثه على گلب اخويه
مهديه ـ وشبيها البنيه الله يسهل الج يمه وديري بالج على البطنج وشنو يرزقج نعمة ما الج شغل بالحجي
ـ ما حجيت بس أبتسمت وصباح يحاجي عمي ياسين ومخليني ونوريه تعلج بلحمي وتحجي طك بطك لاتخاف ولاتستحي ومهديه تدافعلي شجاي يصير بهل الدنيا .
مهديه ـ أكول يمه سميعه شعجب ما رحتي صالحتي أمج وابوج لو هاي هي
ـ لا هاي هي
ـ ها وينطيج گلبج
ـ أي بنطيني گلبي ، صباح باوعلي وهزله راسه معناها سكتي .
ـ زين تسوين أهلج دكتهم بيج ما تنغفر وبالأخص أمج سوايتها مو سواية أم تريد الخير لبنتها هي هاي أمج من يوم يومها تشبج شبج ولاتزعلين أحنه اهلج .
ـ ما حاجيتها وشوي وصباح ترخص وگمنا
ـ طابلكم عاودوا يمه ، ودير بالك عليها يمه صباح
صباح ـ ان شاء الله عيني يمه ، يله سميعه
سميعه ـ اي اجييت
نوريه ـ مـا يلوكلج هاللبس ، لاتغيرين مهدامج كلمن وذبته حاصره جسمج بهل الثوب عليمن وعبايتج وين لو تثقفتي وكمتي تغارين من ضرتج وتردين تصيرين مثلها
سحاب ـ عاد قلق المره معلمه وتلبس وتكشخ يلوك الها هو ياهو الاجه ولبس وكشخ صار من الأوادم .
مهديه ـ سكتن ولجن شنهو هالحجي مو عيب مرت أخوجن .
سميعه ـ تمنيته يحاجيهن بس ما حجه وسلم باس رأس امه وطلعنا ، كل مره يحجن وأنت ما تردهن راحت بنفسي يوم اشوفك تدافعلي .
صباح ـ والله أنتِ تجيبين الحجايه لنفسج ،أني شحجيت وياج قبل لانطلع وبعدين أمي ما ترضى عليهن شعليج منهن عليج بأمي دام رضت عليج بعد هاي هي ما شفتيها شون تدافعلج .
سميعه ـ اي شفت والله أمك تحير أكبر واحد ولا عرفتها
ـ لاتحير ولا شيء هاي هي أمي كلبها طيب وحقها بالبدايه ماكو أم ترضى بكسرة أبنها وكل اهلي ما رضوا وأعذرها لو حجت وقست عليج ، بس هسه اشوفها تغيرت من حملتي بحفيدها واكولها الج أهم شيء بالعيال هي أمي تكسبينها تكسبين العيال كلهم ومبين عليها شكثر فرحانه بحملج ودوم تسألني عليج
سميعه ـ ما حاجيته لان ما مستوعبه خل ارد البيت واصفنلها وأستوعب زين ووصلنا بيت محمود دك الباب وطلع محمود سلمنا والبنات ما لكيتهن يم عمتهن حربيه بيت مشعان وباوعت البيت نظيف ومرتب عيني هنا البنات .
صباح ـ نترخص منك وسميعه تريد تشوفهن وهم تسلم على بيت أخوها
محمود ـ اخذوا راحتكم وياهلا بيكم .
سميعه ـ دك بابهم وطلع النا نافع ها ولك بوسته شلونك
نافع ـ زين ، أتفضلوا .
سميعه ـ دخلنا وطلعوا النا حربيه حامل مبين عليها ومشعان طلع من الاستقبال يدخن باوعلي وسلم على صباح ، السلام عليكم ، شلونك مشعان رد عليه وجه ثكيل .
مشعان ـ وعليكم السلام
سميعه ـ دخلنا الاستقبال وبوست الجهال واجتي عليه زهور أكبر من نافع بوستها وحربيه بصفي كرصتني
حربيه ـ يمصخمه جان لبستي عبايه على ثوبج متشوفين كرشج شكبره حتى أني استحيت وأخوج استحى وبعدين وين عبايتج
ـ ذبيتها
ـ ليش ذبيتها تخبلتي
ـ لا ليش تخبلت وبعدين ثوب عريض شبي لو هم مثل امج مهديه وأخواتج ما تكعدن اذا ما تغثن
ـ علمودج اني وهم أخوج يستحي
ـ على شنو يستحي بايكه مو متزوجه بالحلال .
ـ لا بس مشعان وأنتِ تعرفينه وتعرفين طبعه يستحي من اخواته وصبيحه من حملت بغافر لما جابت ما شوفت شكلها ، علمودج حجيت ولبسي اللي تلبسينه شعليه .
مشعان ـ صباح من رخصتك أريد احاجي أختي وأصلح المشاكل البينها وبين أهلي
صباح ـ مرخوص أبو حربي شيء خاص بينكم وأني هم أروح اشوف محمود ما شفته .
سميعه ـ طلع صباح وهمس بصوت ناصي
صباح ـ كبري عقلج .
سميعه ـ ما حاجيته وطلع ومشعان باوعلي وكال
مشعان ـ أي بويه سميعه ما ناويه تصالحين أمي .
سميعه ـ لا ما اصالحها وأبد لاتحاجيني بهل السالفه .
ـ ليش بويه ، الأم تضل ام لما شما تحجي واللي صار جان مو سهل لا عليها ولا علينا كلنا وأنه اكول أتهيري باجر أمرلج وأخذج وياي توكعين على رجليها وتطلبين رضاها .
ـ لا مشعان ما يحتاج لا اروحلها ولا تجيني
ـ تجيج لا هاي العايزه شو ما تعرفين مالات الأوادم أشوفنج ضيعتيهن كلهن .
ـ ترى أمي الغلطت بحقي وأني بسببها تعذبت وتمرمرت ولما عدواتها هي ومهديه جان وصلنا لهل الحال وهي السبب بگلشي هي دمرتنا وطيحت حظنا وتكولي تعالي أمشي صالحيها .
ـ سميعه أحجي عدل لا أكوم أكسر حلكج وادوسج والتحجين عليها أمي وأمج يل طايحة الحظ يالخزي بكل عين صلفه وبوجهي تكولين أمي غلطت بحقي ولج لو تذبحج ما تحجين حجايه وحده .
حربيه ـ مشعان گول يالله ، أتعوذ من الشيطان
مشعان ـ متعوذ من الشيطان بس أختي ما تصيرلها جاره عبالي تزوجتي وعقلتي وصرتي أدمي بس من يومج عوجه وتضلين عوجه وفاتت ما كسرت حلكج هذاك اليوم جان عرفتي شون تحاجيني هسه
ـ مشعان سويت وياي معروف كثر الله خير بس مو معناها تضل تغلط وتهيين بيه وأني اذا ساكته ومحد رايد منك تدخل بيني وبين أهلي واللي صار محد جرع مرارته بگدي .
ـ أنجبي ولج أنجبي سميعه أكسر حلكج والله وادوسج لج العوجه أنتِ هيج تحاجيني ليش أنه جاهل صغير كدامج .
ـ ما حجيت شي عليك كتلك كثر الله خيرك بس ما لك حق تكسر حلگي وزلمتي موجود وعيب عليك كلمه والثانيه أدوسج وأني أختك وانت زين تعرف التخطيطات اللي صار ومرتك أول وحده تدري وبيدك كتلتها وردت تطلكها ليش هسه جايني وتحاجيني معلك وتذب الصوج بس بيه وأني مالي ذنب .
ـ شنو هالحجي هاذ ، حربيه ما لكيتي اذا هاي تستسرين بيها العوجه
ـ ليش شبيه عوجه عيب عليك كافي تهيين بيه لو لان صرت صاحب فضل عليه خلصتني من أهلي ما جان من الأول تحاجي أمي وتكف شرها عن مهديه شو هسه تندرت عليه لو فرعنتكم بس عالفقير
ـ ولج سميعه أهيينج وأكسرج واطلعج محمله بتابوت هم أدبسزز زوجناج وسترناج انجلبتي علينا والله من أنعل شيب أبهاتج
هي تنلام أمي بيج لا والله حلالات عليها بس هي كسارة رأسج يا زماله
ـ تقدم ضربني وكعني بالكاع واني حامل ما رحمني بالكوه حربيه خلصتني منه .
حربيه ـ كافي عوفها المره حامل متشوف كرشها ارحم حالها كافي تظلمون بيها بسك عاد يمشعان بسك عاد
والله اطلع اعييط بالشارع والم الاوادم عليكم كافي لاتموت البطنها وتشيل خطيته ما كافي خطية أمه
مشعان ـ أدبسزز أني الج ولج بعد بنعال محد يشتريج تفله محد يتفل بوجهج ومثل جلب تبقين ساكنه بهل الفرع ومحد يطب بيتج واحنه ناس تطب على ناس الا أنتِ طول عمرج تبقين منبوذه ومحد يدك بابج لان عار وعبالي اسويج ادمي طلعت غلطان اصلاً صباح شجابه عليج لما حظه المصخم تكبع بوحده مثلج والا هو زايد عليج أنتِ دواج الذبح ، ويله أمشي أطلعي من بيتي ومثل ما تبروا منج أهلي أنه هم متبري منج وما عندي أخت صلفه وما تحترم وعار مثلج ، يله برى والدرب الجابج يرجعج .
حربيه ـ مشعان كافي كافي أرحم حالها لاتطردها خيتك هاي .
مشعان ـ حربيه لاتتدخلين قسم بالله حجايه منج اطلكج واشمرج بيت أهلج ، وتف على هيج أخت ما شفنا منها بس الفضايح والمصايب الأخ خسر أخو وابن عم خساره عمامه ، عوذه كطعيه تكطعج من البنات .
سميعه ـ ما حاجيته تركته يحجي المخرنه بگلبه ولا دكول أخويه ووكفته اليه مو لله ، لميت شعري الهلسه بأيده ولفيت ربطتي ودمعتي على خدي ومشيت ونافع مجلب بثوبي وأيده على بطني ويبجي عليه
نافع ـ عمه لاتروحين ما عليج من أبويه انه احبج
سميعه ـ مسحت دموعه ومشيت وگال
مشعان ـ رجلج أكسرها اذا بعدج وصلتي بابي وما يشرفني تدوسين بيتي والتبيع أمي وتحجي عليها ما ادخلها بيتي ولا أختي ولا أعرفها .
سميعه ـ بس باوعتله والكلام غصه بصدري كلهم نفس الاذيه ، مشيت كبل للبيت لوحدي ما دكيت الباب على محمود وصباح يشوفني بهل الحال كافي الأهايين الشافها من أهلي اليه كافي ذلوني ودمروني ، خليني اولي لبيتي أحسن ، ما ضلي أحد من هسه أمي وحيده بس صبيحه أهلي ..
واجه صباح لگاني نايمه ما سألني يمكن راح يأخذني وحربيه سولفتله واكيد مقهور عليه ، نام بصفي وحضني وبجيت وضليت أشهك واشهك أختنكت بعبرتي .
صباح ـ ميخالف أخوج أخوج كلنا من نتعصب نحجي كافي تبجيين كافي سميعه بويه شو گومي غسلي
ـ سگتني وگمت غسلت وباوعت بالمرايا هاي هي هلي ولله للموت ما أنجمع بيكم بعد وظلمكم اليه ما أنساه أبداً ما أنساه ومن اذيتكم خلقتوا سميعه ثانيه
______________
لميعه
" گالولي مو قسمتك وبجيت "
ـ الأذيه التوجع أكثر مو لان الاحبه راح مني لا لان الاذيه من تجي من أقرب ناسك هما أهلك وبالأخص أمي أخذت مني عشك عمري وطفولتي وصباي وكل لحظاتي الحلوه والمراسيل وحرمتني منه وزادت أذيتها من زوجته لأختي ...
هنا الأذيه هنا الوجع ما ينسي أقرب ناسك تغدر بيك وأنت مأمن بي ومأكل وشارب وياه ، جنت أكول خل ارضى بنصيبي اذا أهلي ما أنطوني اله وخل تأخذه الغريبه بس مال تأخذه أختي وهي على درايه أنه أحبه وأموت على التراب ممشاه هاي الما جنت حاسبتلها حساب ...
صافنه وشعري نصه منثور بالكاع كدر عليه الخبل وأخذ حقه وحقوقه مني بالغصب ما يعرف المعامله يتعامل بوحشيه لان ما معاشر بشر وطول عمره معاشر بس الدواب شيطلع منه بس صار وحسبه الوكت عليه رجال
خضيير ـ گومي وأنطيني نيشانج أمي وأخواتي يشوفنه.
لميعه ـ ضحكت ورجع ضربني على رأسي وجر الوصله واخذ نيشاني وطلع وكبت الهلاهل عود ينحسب زلمه بوصله بيضه هي هاي رجولتك يالخنيث .
ضليت أيام عايشه وياه بالقدره يوميه كاتلني ويريد مني حقوقه ، طفرت روحي عباله الزواج بس بالفراش نايم وتعالي ابقي كابليني ، حاولت والله حاولت بس ما ينعاش وياه كلشي بي ما مقبول لا تصرفاته لا معاملته لا ريحته استغفرالله ...
خضير عنده ستة أخوات أربعه متزوجات كلهن من ولد خوالهن وخلفتهن بطولهن واثنين بالبيت هذن صديقاتي من دور جنت بنيه زينات الشهاده لله بس المتزوجات تكول متزوجات اخوهن بكلشي يتدخلن ومن يجن يجن سوه صارلي اسبوعين وعالصيت عرس أخوهن نايمات على گلبي أكل وخدامه بلاش وكل جهالهن وياهن وهما زلم وتركيب كله براسي والهوسه ما تنحمل بس مجبوره اتحمل واشوف تاليها منطيه نفسي الصبر على هالمر .
خديجه ـ يمه لميعه كمل غداج العيال جاعوا علمود نصب الغده وأنتِ روحي كبي ماي على جسمج هسه يجي خضير وتحضريله يمه خطيه يجي من السراحه ويشوف هالوجه الحلو تفرفح رويحته .
لميعه ـ اي عمه كمل الغده ، خل البنات يصبنه
ايمان ـ ما تصبينه أنتِ ، سبحي وتعالي شنهي تردين تنامين من هسه بغرفتج وبعد وگت عالجيه خضير
أنتصار ـ عوفيها خطيه يجوز تشوف نفسها بعدها عروس يمكن تتنظر يطلع أربعينها مو يمه .
خديجة ـ شنهي هالحجي هاذ شو سگتن ، روحي يمه
لميعه ـ ما حاجيتهن دخلت سبحت وطلعت وأجه شمر العصا ودفر الباب ودخل يصييح عليه تعوذت الشيطان هذا ولا يكول أخواتي كاعدات شو زايع المستحى فردنوب .
خضير ـ حبيبتي لمعوعه وينج أنه اشتاكيتلج .
لميعه ـ أجييت شگوو تصييح
ـ وين جنتي
ـ وين يعني بالحمام
ـ ها ريحتج طيبه ليش سبحتي لو تحضرتي اليه مو يله فوتي الغرفه مشتاكلج .
ـ وين خضير من كل عقلك أمشي وكته هسه عيب فضحتنا وبعدين فوت اسبح بالأول
ـ بعدين من اشم ريحتج عود اسبح ، تعالي هساع
ـ لزمني من أيدي ويعت بيها وخر عني وخر
ـ شبيج ثكبتي زلمتج ترة مو غريب والله أكسرج ترى ساكت ومحترم اكول بعدها ما متعوده عليه بس مال تضلين تزاكطين اكسر العصايه على ظهرج .
ـ أنه ما ثكبت بس أنت مدري شونك وفوت اسبح بعدين تعال حاجيني دفعته ودخلت الغرفه ما حسيته غير اجاني ثاكب وبإيده العصا خضير فك عني لا امشي لاهلي والله ترة مطوله خلگي عليك وأنت ما تتعاشر .
ـ أنه ولج انه والله اليوم اكسر العصا عليج شنهي تكولين فوت اسبح وتعال حاجيني وتدفعيني كدام اخواتي تهينيني لميعه تهينيني.
ـ هو أني هنتك لو أنت تجيب الاهانه لنفسك وتتفاخر كدام اخواتك وتصيح فضحتنا، كبل ضربني وعطت بي عوفني الله يكسر أيديك ودخلت عمتي خلصتني منه
ما تحملت شلت عبايتي اجتي والله جابها اني مو بنت حبيب اذا بقيت بعد وكفن اخواته بوجهي منعني وخرن عن دربي والله ما اضل اخوجن واحد مسودن انه احاجي كلمتين يجي يكتلني تكول دابه مو مره ، بطت مرارتي منه ومن العيشه وياه صار أسبوعين جارعه المر وساكته فكن عني ، الله لاينطيج يا يمه على هالقسمه الكشره أي والله من ساعة السوده الصرت بيها حرمتك
مشيت أهف بعيايتي وعمتي خديجه وراي تتوسل
خديجه ـ ولج يمه لميعه تعوذي من أبليس وردي وياي يمه السالفه ما تنحل هيج گبل كظيتي عبايتج وتمشين تردين تفضحينا بعدج عروس ولج يمه اوكفي فحطتيني وراج شمالج تكول حصان مطيوره ما عولتي خضير يطكج وتهجيين لأهلج ، يمه فلك فلكج ولج لميعه دوكفي يمه ، الله يعين كلبي على خبالك يخضييرر ولك رزاق تعال الحك بنت أخوك المره هجت .
ـ عمه فگي عني رحمه لاهلج ، أبنج مسودن ويكبن عليه خبالاته وأني ما عندي حوصله أجرعه فكي عني دخيل بختج عوفيني أنكبر بيت أهلي .
فكيت باب بيت اهلي ودخلت وشافني أبوي من صوب الديوان ما وراكم بس المر أنتوا وعگلكم وديوايونكم
من دهر صابكم .
حبيب ـ لميعه شجابج بويه وين زلمتج
لميعه ـ أبن أخوك المسودن ما يصيريلي زلمه بعد واحد مخبل وايده والعصا انه مو دابه عنده يمت ما شاكله يطكني طگت مرارتي ما أريدنه بعد ما أريدنه .
عفته ودخلت القصر وشافتني أمي وتأففت أجيتج يعطايات أجيتج وراح اكابلج طول العمر والله لو تذبحوني لخضير مااصيرله مره .
عطايات ـ خير جايه ومعججه بالشر وراج شنهي سالفتج يمكموعه اشوفنج ما ضل عقل براسج تسودنتي جايه بهل الظهريه تردين تخزيني ويه بيت خضير .
ـ أي أخزيكم ليش أنتوا خليتوا عقل برأسي على سوالفكم ودكتكم الناقصه ، هاي زيجتج اليه ركض بركض بس تردين تخلصين منه وتذبينه بركبة الرجال
ـ أنلصمي على حلكج وحشي تبن وحاجيني عدل ودرب التزعل تعوفينه وتكظين دربج وتمشين لبيت زلمتج أنه ما عندي بنت تتزعل وتتبجج وما صارلج أسبوعين من تزوجتي تردين تخزينه بين الأوادم ولج لميعه .
ـ ليش ما عندج بنات تتزعل شو عروبه من جانت يوميه زعلانه تهلين وترحبين بيها ودوم گابه المشاكل أنتِ وحبيب ورفستي بإيدج ورجليج بس ردتي تطلگينها من ابن مهديه ليش انه مو بنتج لو عروبه وحد عني ، كبل ضربتني وفرگت حلكي .
ـ حلكج افركه وادوسج ولج لميعه لاتحاجيني بحجيات يوجعن الگلب خلي الجرح راكد وهالمره امشيها بس مرتن ثانيه اذا سمعتلج حجايه أطمج بصف أخيتج
ـ دفعتني وبجييت بقهرر وحجيت بصوت مخنوك أن شاء الله تبين حوبتي بيكم بحق كفيل زينب ويكسر گلوبهم مثل ماكسرتوا گلبي ، اجتي تضرب بيه وانه ابجي وأصييح عليه عوفيني والله ما اروحله بعد ما اصيرله مره واحد مسودن
ـ غصباً على رأسج تمشين تردين تخزيني
ـ وخزيتهم هو أنتوا مفضوحين وأنه گايله لا من عمايلكم المصخمه انتو اهل أنتوا حسبي الله ونعم الوكيل بيكم سلمتكم بيد الله والعباس .
رادت تضربني بس أبويه صاحلها وعافتني ولميت شعري ومسحت وجهي بقهرر ونار ثاكبه بصدري .
عطايات ـ راجعتلج وأكسر رأسج واشوفه ياهي الما تريد ترد لبيت زلمتها غير گبل الحكج بالمرحومه فطيسه .
لميعه ـ طلعت وگمت خليت اذني اسمع ابوي شيحجي
حبيب ـ حاجي بنتج ولبسيها خل تمشي لبيت عمها
عطايات ـ حاجيتها ما تمشي معنده مال الوجع اليوجعها خلها انه احاجيها وأعقل عليها خلها تبات عدنا اليوم وترتاح وأنت هم حاجي ابن أخوك ترى هم خبالاته مل ينجرعن
ـ محد خرب عقل هالبنات غير تربيتج االسكط تردين تبينتها انه ما عندي بنات تزعل وخري عن الباب واشوف ياهي الما تمشي وياي اكسر وأنعل والديها .
لميعه ـ دفع الباب وعاط بيه
حبيب ـ أمشي ولج
لميعه ـ ما امشي بويه خضير مسودن ما ينعاش وياه
حبيب ـ وعلى أساس انتن ينعاش وياجن وحدتجن لسانها دكول مسنيه شو امشي لا انعنع عظامج
لميعه ـ جرني قوي ويعتت بيه وأمي لبستني عبايتي وطلعت ولكيته ينتظرني شافني تبسم المسودن
وابوي ضل كاظني من جتفي لحد ما دخلني بيت عمي
عفتهم ومشيت وتلكني أخواته بس شافني سگتن عفتهن ودخلت قفلت باب الغرفة وبجييت واسمعه يريد يدخل بس أمه ما تخلي
خديجه ـ عوفها هسه خل تبرد وتهدي أعصابها وبعدين رد الها دمشي يا يمه أدري دبگت يم الباب خما دبگت
لميعه ـ للمغرب طلعت عيوني مورمه وشفتهن كاعدات هنا وحهالهن زلم بطولهن أستغفر الله الواحد شيشوف كدامه ، مشيت غسلت وصليت وكملت صلاتي حسيت أحد وراي عاينت زين وابن ايمان يباوعلي من الشباج ، شتسوي ولك ، شو وخر منا .
ـ ما تجين تتعشين ويانا .
ـ لا ما أريد ، راح وگلبي نگز منه هذا من يمت يباوعلي كمت رديت الشباج زين وسمعت عمتي تحاجيهن
خديجة ـ يمه من باجر امشن لبيوتجن والبيت هم صار بي جنه وهم تريد تاخذ راحتها وتستحي ولدتجن بطولها
أيمان ـ ها يمه من هسه الجنه اخذت مكاننه وكمتي تطردين بينا لو لان خضير وحيد گلبج وبس هالجنه تحبينها .
خديجه ـ لا يمه ما قصدت هيج بس أنه من ورى أخوج ما يتعاشر وهي هم وكحه وكلت يخلالهم الجو ومن هوسة الجهال ما يأخذون راحتهم .
أنتصار ـ والله يمه محد ضربكم على أيدكم ومن يومكم تعرفون بيها وكحه شكو زوجتوا الها هيج زيجه وركض ركض عبالك ناهبه ما فهمنا سركم انتو وبيت عمي حبيب هالزواج كلها ما عاجبتني لعد اخونا الوحيد يتزوج سكتاوي لا عرس لا دنبك .
خديجه ـ انجبي ولج يمه أنتصار سريش شتخربطين شو كومي لمي جهالج الدنيا غوربت وهما ساكنين الجول
لميعه ـ شحجي ما ادري ، بلعت الحجي وسگتت ولليل اجه ويفتر عليه مثل المكوك شمالك تفتر لو تكعد لو تطلع ترة ثولتني وكافي تدخن خنكتني بالدخان .
خضير ـ أنتِ ليش ما ترديني ، تردين أحد غيري مو احجي ولج لو احط طلقه براسج وبرأسي .
ـ يا فلك تسودن الرجال
ـ حاجيني لميعه لاتخليني عقلي يتخلخل عليج
ـ ما أريد كل أحد لا أنت ولا غيرك وأنتَ كافي وزايد كرهتني بكل زلمه تشوفه عيني .
ـ جذابه لميعه أنتِ تجذبين وابالج أحد وجاي ترسمين مخطط تعوفيني وتشردين وياه متأكد شنو ابالج
ـ لا دخيلك لا تتأكد من المخططات ليش أنت يتفرط بيك ، زوجي حبيبي .
ـ لاتتقشمرين اكسر راسج ترى والله هسه أحطج وأكتلج
ـ خضير شتريد
ـ أريد گلبج
ـ شتسوي بي
ـ أحبه ويحبني بس اليه وهم اريد اعرس عليج چا انه هم عريس تضحكين عليه ولج .
ـ اهوو يخضير أنه نايمه تريد تنام نام بس لاتكرب صوبي عوفني بحالي وهذيج الشغله مو غصب وأذا تصير غصب أكوم أكرهك بالزايد وانت تريدني أحبنك لهذا لاتكرب صوبي
ـ ويمت أكرب صوبج ، ترى رجلج انه رجلج
ـ خليني على راحتي
ـ ومن تردين كوليلي
ـ شگولك فلك ، خضير ما تسگت
ـ أعوفج بس يومين خوش
ـ هزيت رأسي ونام بصفي وأبتعدت منه نفسي لاعبانه خرب بغيرتك كب ماي على جلدك ريحتك محمضه ، خرب بقسمتج الكشره يلميعه .
باوعت على رجليه مفطره وبيها طين وجسمه بي ريحة طليان ادري كابل حلالك ما بيها شيء بس تسبح هسه مو ولد اخوي عدهم حلال شحلاتها ريحتهم ليش أنت خايس خيستك تذبح .
عفته وفرشت بالكاع وكام يشخر وصوت شخيره عالي يشيل عرب گامله ، شگول عليج يمه على عميلتج وياي
الصبح كعدت ولكيت عمتي متحزمه ها عمه على وين
خديجه ـ للخضره يمه وأنتِ لمي شغل البيت ولحكي حمواتج للكاع عاوني الفلاليح بالشغل .
لميعه ـ حجت ومشت ما انطت درب احاجيها باوعت البيت ما ينلزم راسه من رجليه همزين فرغ من هوسة الجهال ، شديت شعري بربطتي ورفعت ثوبي بخصري وكبيت الماي وكمت اغسل وحسيت احد بالبيت صحت منهو هنا ، خضير رديت ، ماكو صوت باوعت ماكو احد رجعت اغسل وما احس الا واحد حضني من خصري وضربني قوي على....وعطت يمه الزهره منهو أنتَ ولك منهو .
