رواية سراج السادة الفصل الثالث والأربعون بقلم غسق ادريس
خلونا ويا السادة
" جهاد "
اصعب فراق يمر على الانسان هوا فراق الاحبه
والاصعب ب الفراق هوا فراق الام لضناها
الضنى عزيز
جزء من الجسد والروح يعيش بداخل رحم الام من يطلع لدنيا يصير جزء من الحياة وسبب من اسباب عيش الام
عون من مو بس قطعه مني هوا سبب من اسباب استمراري ب الحياة
من اجه لدنيا صار عندي سبب يخلي الدنيا وردية بعيني
شوفتة يضحك شوفته يركض كدامي
شوفته نايم وياكل جانت اسعد لحظاتي
جانت امنيتي اشوفة عريس
امنيتي اشوفة لابسة العمامه السودة ويمشي ويا ابوي واخواني
جنت متمنيه اشوف اطفاله كدام عيوني
هواي رسمت بعون احلام وامنيات
بس الحياة جان الها قرار ثاني
مرات ما احاسب الدنيا والومها
لا السبب الاساسي لظلمه الحياة بعيني
حقد البشر وسواد قلوبهم
عون ابني انقتل ما مات انقتل انسلبت روحه ب ارادة البشر
كل يوم تزورني ذكرى وفاته
كل يوم اموت الف موته واني اتذكر الي صار
ما جان ابالي بس سؤال واحد
شنو جان احساس عون والوجع الي عاشه وهوا ينحر ب السجينه؟
مسحت على وجهي عيوني على الاطفال بردهه الخدج
كلهم صغار توهم اجو لدنيا
التفتت على مفرقد شفته صافن على الطفل ب ابتسامه
حجيت عيوني على الطفل
_جهاد :: شلون راح تصرفون من يجون اهله؟
كطع صفنته يباوعلي
مسح على وجهه وحجه بحيرة
_مفرقد :: ماعرف السيد شنو يدور براسة
_جهاد :: ما ترجع وياهم مهره
فز من مكانه
حجه
_مفرقد :: لا ماترجع اذا رجعت يأذوها
التفتت على الطفل ابن مهره الصغير
حجيت عيوني عليه
_جهاد :: ابنها يبقى عندها مفرقد مستحيل تتحمل فراقة
_مفرقد :: ماعرف عمه بس مستحيل اسمح الهم ياخذو هذا امانه عدنا هوا وامه
هزيت راسي ب اي ساكته
رجعت للخلف كاعدة على كرسي الانتظار
ومفرقد استمر بوكفته عيونه ما نزلت عن الطفل
رفعت راسي على خطواته راجحه
شفتها جاية ب اتجاهي
ابتسمت بوجهي وكعدت
حجت
_راجحه :: حسن
عكدت احواجبي ب استغراب
باوعتلها مافاهمه
ابتسمت بوجهي وحجت
_راجحه :: مهره تريد اسم ابنها حسن
_جهاد :: صارت ام حسن
هزت راسها ب اي مبتسمه
استمرينا على كعدتنا منتظرين اهل مهره يجون
ماعرف شنو جاي يدور براس السيد
مرت ساعة ضبط
التفتت اني وراجحه على جيه السادة ابوي السيد عبد الروؤف وولد اخواني كلهم
وخلفهم دلهب وثنين زلم ضخام مدكدين
اخيرهم الضابط جزام
اجو ب اتجاهنا بس الضابط جزام وكف بمكانه من بعيد مكتف ايديه وشامر حيله على الحايط
مشه السيد ب اتجاه مفرقد عيونه على الطفل
ايليا من شاف راجحه كاعدة يمي ابتعد عن المكان
فقار والباقين وكفو يحجون بينهم
همس السيد ب اذن مفرقد
عكد مفرقد حواجبه ب استغراب
التفت السيد يباوعلي
حجه يسمع الكل
_عبد الروؤف :: اهل البنيه وصلو
الكل ساكت يعرفون بجيتهم
وكف السيد يباوع من بعيد منتظر دخلتهم
اقل العشر دقايق دخلو مجموعه زلم وياهم ثنين نسوان
جايبين وياهم ضابط رتبه ملازم اول وثنين من النجدة
مشه رجال جبير ب اتجاه السيد يسلم عليه
وخلفه ثنين زلم كبار
أشر على نفسة وحجه
_قصي :: انا ابو مسلم عم البنيه وهذول عمامها وولد عمامها وهذا
حجاها يأشر على ولد شاب واكف مكتف ايديه يخزر ب السيد ومفرقد سبق عمه وحجه بتحزم وعصبية
_محمد :: انا اخوها محمد
هز السيد راسة ب اي ما مهتم
حجت وحدة من النسوان الواكفات
_جنان :: وين بنتي؟؟
_عبد الروؤف :: البنيه ما صاحيه بعدها
_جنان :: ابنها وين؟
أشر السيد على ردهه الاطفال بدون مايحجي مشت هيا والي وياها يباوعون للاطفال
عكدت احواجبها والتفتت مستغربه
_جنان :: منو ابنها؟
توا السيد جاي يحجي
وراجحه سبقته
حجت ب انزعاج تباوع لام مهره
_راجحه :: لو واكفة ويا بنتج وساندتها جان عرفتي ابنها منو
التفتت ام مهره على راجحه خازرتها
صاحت بعصبية تأشر على السادة
_جنان :: لووو انتو ماخاطفين بنتي جان عرفت
_مفرقد :: العفو منو خاطف بنتج؟
_جنان :: انتووو خطفتوها وشجعتوها تطلع من بيت رجلها وتشتكي على رجلها
صارت هوسة ب المكان الام خبصت المكان تصرخ وتغلط على السادة
عكس السادة ساكتين ماحجو شي منتظرين السيد يحجي لان السيد محذر الكل
صاح اخوها
التفت الكل على اخوها
حجه فاتح عيونه بعصبية خازر السيد
_محمد :: اختي وابنها راح يرجعون ويانا لبغداد
حجاها والتفتت يريد يمشي
وكف دلهب بوجهه هوا والمدكدين
رفع دلهب حاجبه وحجه ب استهزاز
_دلهب :: خصمت الجلسة ومشيت؟
_محمد :: انت منو؟؟
_دلهب :: دفان النجف
حجه السيد بهدوء وثبات
_عبد الروؤف :: البنيه وابنها مايرجعون لبغداد وجيتكم هنا توقعون بس وحتى تعرفون هيا وين وب أمانه منو
حجه عم مهره عيونه على السيد
_قصي :: سيد احنا مانرجع اذا مهره والولد مو ويانا
_عبد الروؤف :: وانا كلت البنيه ماترجع لبغداد
صاح اخو مهره بوجه السيد
_محمد :: وانت منووو وتريد تمشي حجياتك علينا مو زين من عدنا ما شتكينا عليكم وعلى ولدكم
صاح مفرقد
_مفرقد :: وين الزينيه بيكم احنا طلعنا البنيه من الموت زين من عدنا ماشتكينا عليكم مزوجين بنتكم ب الاجبار وكل يوم تتعرض للاعتداء من زوجها وهيا حامل واخررر مره حاول يقتلها على ايده
حجه دلهب يباوع لاخو مهره
_دلهب': وزيد عليها ابنهم المحترم والشريف يتعاطى مخدرات ويتاجر بيها للمراهقين
حجه فقار
_فقار :: تتوقعون من هربتو محد راح يعرفون مكانه
_دلهب :: صغيركم وجبيركم مراقب وابو العرك هذا ينلزم وينسحل للسجن
صارو واحد يباوع بوجه الثاني بحيرة وخجل مايعرفون شنو يحجون
حجه السيد
_عبد الروؤف :: البنيه دخلت جوا عباية السادة يعني مالكم عدنا شي الي عدنا امانه من الله ومانسلم الامانه اذا مانضمن حقها
صاح اخو مهره راكض على السيد بعصبية
_محمد :: مو بكيفكك انتتتت ترجع وغصباً عليكم وعليها
حاوطو السادة السيد واهل مهره وكفو بوجه ابنهم يمنعو يتقدم على السيد
بدت ام مهره تصرخ وتخرمش بوجهه تتحسب علينا
والناس بدت تتجمع
الدكاترة يطردون ب اهل مهره
واخو مهره واكف يهدد ب السيد
_محمد :: اخذها اخذهاااا من شاربك يا سيد
ركض فقار ومفرقد على اخو مهره من سمعو هيج حجه
وكفو اهل مهره بوجهم مانعي
اباوع لدلهب سحب محمد من ياخه ملابسة بعصبية
_دلهب :: ولك تهددد منووو انت
_فقار :: ماتاخذ شي واذا كدرت واخذتها انزين شواربنا ونكعد
انسحبنا اني وراجحه للخلف نباوعلهم من بعيد
التفت اخو مهره على الضابط الي جاي ويا وصاح
_محمد :: سامممرر جاي تسمع اعتقلهممممم ولكك هذول خاطفيننن اختي وابنها
التفت محمد على مفرقد
بحركه غير متوقعه دفع مفرقد من اكتافة
هيا ثواني بس من لحظات الصدمه وعدم الاستيعاب الي صار
سحب مفرقد اخو مهره ضاربه على وجهه
ودلهب مو اقل من مفرقد
وكفت ام مهره تريد تدخل بنص الزلم تحمي ابنها
سحبتها راجحه مرجعتها
باوعتلها وصاحت
_راجحه :: ما احترك كلبج على بنتج من تشوفيها تنكتل لووو بس ابنج
_جنان :: ولججج انتِ منووو ابتعدييي عني
التفتت على السيد شفته واكف مكتف ايديه يباوع للعركه والهوسة بدون رد فعل
عيوني صارت على الضابط جزام لا ارادي شفته واكف مكتف ايديه عيونه ب اتجاهي
من التفتت عليه دنك راسة للارض
سحبت راجحه مبعدتها عن المكان ماريد احد يطخها ب الغلط
التفتت على صيحه عم مهره بوجه اخوها
_قصي': ولككك كافي لا تطيحنا ويااا السادة
_محمد :: ولكمممم اختتييي اريد اختييي
_قصي :: عوفها نرجعها غصباً عليها هسة اسكتتت
_محمد :: مارجعععع بدون مهره
صاح مفرقد بوجهه
بحركه كلب
_مفرقد :: ماترجععع وياك لو اعرف اموت ما خليها ترجع ب الغصببب
_محمد :: غصباً عليك وعلى اعمامتك ترجع
هاي ماجانت حجاية بسيطه ب النسبة النا جانت مس بعمامه جدنا رسول الله ومكانتنا
السادة مو طبعهم صياح وعرك يحبون ياخذون حقهم اي بس ب الهدوء والتفاهم ماعدهم شي اسمه صياح وضرب بس هل مرة لا اختلف كلشي
سحب مفرقد محمد اخو مهره نايم على صدره يكتل بيه والباقين حاوطو عمام مهره وولد عمها لان هدو ويا ابن عمهم
صارت هوسة وصياح بنص المستشفى
باوعت لسيد التفت على جزام بس أشر اله بعيونه
هز جزام راسة ب اي
واجه يتمشه ب اتجاهنا
وكف خلف دلهب همس ب اذنه هز دلهب راسة ب اي
بعدو مفرقد عن محمد
جر جزام محمد من ملابسة دفعه ورا وصاح بيه
_جزام :: التكمله برا المستشفى
_محمد :: انت منوووو وشنو بكيفكم تحجون
_دلهب :: اي غالينا احنا نحب نجزء العركه يللاااا لككك يلا
سحبو محمد من ملابسة هوا وولد عمه
محد بقى بس السيد ابوي وعم مهره وامها والمرة الثانيه وعلى الاغلب هاي ام مسلم
باوع السيد لعم مهره
حجه
_عبد الروؤف :: هل مره راح اعتبرة صغير ومحروك كلبه على اخته بس المره الثانيه ما اضمن الك الي يصير
_قصي :: اعذرة سيد هم اخته وكلبه محترك عليها
صاحت ام مسلم
_كوثر :: ترا ماصايرة هاي سيد ابني شارد من الحكومه لايسجنو ومرته وابنه هنا انتو رافضين تسلمونا ياهم وين صايرة هاي يابشر يقبلها مهره عرضناااا والطفل ابنا نريدهم يرجعون ويانا حتى كلبنا يبرد ويطمأن هما بخير
حجه السيد
_عبد الروؤف :: وليش منو وصلها لهاي المرحله غيركم من تعرفون ابنكم مو خوش شلون هيج تسوون وتظلمون البنيه ويا.. ماخفتو الله.. هاي لا الله ولا البشر ولا حتى الحيوان يقبلها بنيه عايشة ويا انسان بخوف ماضامنه حياتها وعلى اي لحظة ما يحس بروحهه ويقتلها
بدون مايباوع لام مهره حجه قاصدها ب الكلام
_عبد الروؤف :: حسابكم عند الله جبير وهذا فعلكم راح يبقى محفور بداخل بنتكم طول عمرها
باوع لعم مهره وحجه
_عبد الروؤف ': يلا نكمل تسجيل الطفل حتى تمشون وترجعون لديرتكم
سكت عم مهره بدون مايحجي شي
مشو يسجلون الطفل واني وراجحه وام مهره وعمتها واكفات بمكانه
باوعت راجحه لام مهره وحجت
_راجحه :: والله حرام انتِ ام مهره.. ماكو ام تغدر بنتها وتسلمها لموتها غيرج حسبي الله ونعم الوكيل عليج
جاي ترد ام مهره على راجحه واني خزرتها مسكتتها
سحبت راجحه ومشيت مبعدتها عنهن
باوعتلها وحجيت
_جهاد :: السانج راجحه
_راجحه :: محترك كلبي على مهره والله امنيتي هيج اخنك امها ب ايدي اطلع روحهااا من مكانها
باوعتلها كلش جانت منفعله ومحروك كلبها
حقها مهره الي صار وياها مو قليل والسبب اهلها
ماعرف شنو صار برا وشلون تصرفو ويا اخو مهره وولد عمها بس الي اعرفه الي صار مو خير الهم
رجعت مره ثانيه صارت هوسة علمود ياخذون الطفل هل مره رفضو مهره بس الطفل رادو
فزيت من مكاني من عرفت
اتخيلت ياخذو صدك من حضن امه لا مستحيل اكيد تموت وماتتحمل هل اذية
كعدت مهره وسلمناها ابنها بيدها وبحضنها
مهره مو غريبة ب النسبة الي صارت بنتي وعزيزة عندي
مرت الايام واني اتردد لمهره حتى ماحسسها بوحدتها وماخليها تحس هيا وحيدة وماعندها احد
بيوم من الايام جنت توني راجعه من الحوزة
رفعت نقابي اريد ادخل للغرفة
استوقفني صوت فقار وهوا يحجي ويا السيد
_فقار :: انا اشوف هذا احسن قرار حتى عمتي ترتاح وانت بالك يطمأن
_عبد الروؤف :: بالي يطمأن اروح ازوج بنتي؟؟
_فقار :: ليش انت مو تريد راحتها
اسمع السيد صاح بفقار بعصبية
_عبد الروؤف :: اريد راحتها بس هذا مو يعني ازوجها ولمنو لجزام؟
_فقار :: ليش سيدد شبيه جزام؟
_عبد الروؤف :: مابية عيب الزلمه بس مايتراهمون ولا تنسى جزام نفسه فتح قضية عون يعني اذا صارت فعلاً وتزوجو
سكت السيد يزفر نفسه بعصبية
صفنت بعدم استيعاب اسمع الهم
رجع فقار حجه
_فقار :: هوا طلب مني اوصلك هذا الكلام
_عبد الروؤف :: ماكوو فقار سد الموضوع ولا يوصل شي لجهاد ماريدها تعرف جزام خطبها...
" ملاك "
لحظات من الصمت عمت المكان
عكد السيد حواجبه ب استغراب وصدمه يباوع لعمتي
باوعتله عمتي وهزت راسها تضحك
_جهاد :: اي اريد اتزوج مو انتو تردون استقر واعيش مثلي مثلكم تمام مو مشكله اني موافقة اتزوج
التفت السيد يباوع للعلوية لباب والعلوية زهراء
أشر على عمتي وصاح
_عبد الروؤف :: شوفووو الثار وين وصلها تريد تزوج حتى تاخذ حق ابنهاا
_جهاد :: اايي اايي ابني اريد حقه
اشرت على صدرها وحجت الدموع بعينها
_جهاد :: ماتطفى ناري اذا ماشوفهم كدامي مذلولين
_عبد الروؤف :: ماتطفى !!!
_جهاد :: ليش !!!!
سكت السيد يبلع ريكه دايخ
حاوطو فقار وايليا يهدو حتى يكعد ومايتخربط
كعد على القنفه ايده على راسة محتار
حجت عمتي تباوع للسيد
_جهاد :: كلبي محروك ليش ماتحس بيه بوية
رفع السيد عيونه على عمتي
عيونه كلهن دموع
دنك راسة وحجه بحزن
_عبد الروؤف :: ماريد كلبج ينكسر مرتين جهاد
_جهاد :: ليش؟
سكت السيد بدون مايحجي وينطي جواب
مشت عمتي كعدت جوا رجلي
اخذت ايديه بين ايديها تبجي والسيد يبجي وياها
حجت
_جهاد :: تعرفهم سيد تعرف الي قتلو ابني مو؟
باوع السيد لعمتي عيونه تتوزع على وجهه
_جهاد :: سيد لاتلجم كلبي
سكت السيد بس عيونه بعين عمتي
جانت تتوسله بعيونها ودموعها تريدة يحجي لو ينطق
دنك السيد راسة وكام من مكانه دايخ فقار حاضنه
مشه يدخل للمصلى تارك عمتي بنارها وحيرتها ودموعها
قبل لايدخل للمصلى التفت على عمتي
جانت كاعده ب الارض ظهرها على السيد صافنه ب الفراغ بس دموعها يطيحن
فتح باب المصلى ودخل
مشينه اني والبنات محاوطات عمتي
نبجي لبجيها
مانتحمل نشوف عمتي هيج متأذية ومقهورة
اخذت قدس فاطمه الزهراء خالتها بحضن عمتي
رفعت فاطمه عيونها تباوع لعمتي
ضحكت تجر بخشم عمتي
ابتسمت عمتي بوسط دموعها تباوع لفاطمه
من ضحكت عمتي فاطمه جرتها بشهكه بيها ضحكه
ضحكنا كلنا على ضحكتها حتى عمتي الي جانت تبجي ابتسمت
اخذتها تبوس بركبتها وتشم بيها
حجه عماد يباوع لعمتي
_عماد :: بيبي اخذي فاطمه عندج وصيري امها حتى لاتبجين بعد
رفعت عمتي راسها تباوع لعماد
باوعت لقدس الي جانت صافنه
حجت
_جهاد :: عزيزة عند امها
_قدس :: ماتعز عليج عمه
_مهجان :: خوش ام انتِ
ضحكت عمتي نص خد
اخذت فاطمه من حضنها مرجعتها لحضن عمتي
مشت ب اتجاه غرفتها ساكته
مرت الأيام وعمتي ساكنه غرفتها بهدوء
وهذا الهدوء بيت السيد عبد الروؤف كلهم يخافون منه...
" عاتكه "
اخذت الثلج من الثلاجه اكسرة حتى ابرد بيه ب البن
باوعت للبنات يتعاونون بينهن حتى نكمل الفطور من وكت
خليت الثلج على حافة الشباك وطلعت من المطبخ امسح ب ايدي
شفت العلوية زهراء والعلوية لباب كاعدات ب الصالة يقرن قرأن المحسنات محاوطاتهن كل وحدة بيدها جزء تقراه
صعدت الدرج ماشية لغرفتي
فتحت باب الغرفه شفت التلفون على الميز
اخذت التلفون من الميز وكعدت على الجرباية الابتسامه بوجهي
عضيت على شفتي من شفته دازلي صورته توا كاعد من النوم لابس فانينه نص ردن عيونه كوا فاتحهن
كاتب جوا الصورة
_ :: كعدت علويتي
قبلها جنت متصلة عليه مرتين حتى يكوم يكعد
كتبت اله
_عاتكه :: صح النوم حبيبي
صفنت بيني وبين نفسي شنو حبيبي لا عيب بعد وكت على هاي الكلمه مسحت الحبيبي وكتبت
_عاتكه :: صح النوم دلهب
اي هيج احسن دزيتله الرسالة ونزلت جوا التلفون بيدي خاف يراسلني حتى ارد عليه بسرعه
دخلت للمطبخ
شفت ملاك ومهجان وشاهيناز يتداهرن مثل كل مرة
صاحت شاهيناز
_شاهيناز :: البن يصير احلى ب النعناع
التفتت مهجان على شاهيناز
حجت
_مهجان :: ماحبببب النعناع ب البببننن
_شاهيناز :: انننييي احبه
حجت ملاك
_ملاك :: مو كتلجن اليوم مانشرب لبن
التفتن ثنينهن على ملاك بعصبية
_شاهيناز :: ست ملاك مانمشي بكيفج
_مهجان :: شلوون نسوي فطور بدون لبننن لعد السيد ويامن ياكل التمر
_ملاك :: ويا النومي
رجعت كبت بينهن مرة ثانيه
كعدت على الكرسي انظف الخضرة بعدم اهتمام
تعودت على دهرتهن كل يوم هيج
اخذت السجينه انظف ب الفجل
توني ابلش واجه اشعار من التلفون
فزيت من مكاني
اخذت التلفون الابتسامه شاكه حلكي
شفت دلهب دازلي رسالة
_دلهب :: صح بدنج علويتي وحبيبتي وزوجتيي وعزيزة قلبي وروحي واحلى متدينه وام عباية شفتها
ضحكت على اخر رسالة
كتبت اله
_عاتكه :: دلهب شنو احلى متدينه وام عباية
رد بنفس الحظة
_دلهب :: اذن شلون اتغزل بيج وانتِ كل حجاية والثانيه تصيحين عيب واستحي..هذا غزل للعلويات وامهات العباية يرهم
ضحكت ايدي على خدي
رفعت عيوني مختفية ضحكتي
شفتهن صافنات يباوعلي رافعات حواجبهن ويتغامزن
اتحمحمت وحجيت ضامه ضحكتي
_عاتكه :: ها شبيجن؟
_شاهيناز :: ضحكينا وياج
ضحكت بدون مارد عليهن
رجعت اكمل الخضرة واراسل دلهب
اليوم ال 12 برمضان كل يوم هيج وقت نتجمع اني و البنات نتساعد ب الفطور
احب هاي الاجواء كل سنه ينعاد رمضان تنعاد ويا هاي الفرحه
رغم احنا كل يوم متجمعين بس برمضان تصير النفسية غير والجمعه غير
تصير اكو فرحه وحب من نوع اخر
دفو وحنان بداخل كل فرد من العائلة
وهذا اخر رمضان اقضي ببيت اهلي اني والبنات
مهجان واني وشاهيناز زواجنا بعد رمضان
اني وشاهيناز راح ننتقل لبغداد ويا ازواجنا
ومهجان لبيت اهل رجلها
لهذا جاي نقضي اخر رمضان ببيت السيد ونستغل كل ايام رمضان لان يمكن هاي الايام ماتتكرر مرة ثانيه
رفعت عيوني على ملاك شفتها تشرب من العصير
ملاك ماصايمه لان ب اخر اشهر حملها والدكتورة منعتها من الصيام لصحه الجنين
رجعت ارسل بدلهب مرة ثانيه الابتسامه بوجهي
من انخطبت الدلهب اكتشفت بيه هوا خصال ما جنت متوقعه بيوم اكتشفهن عنده
من جنت اشوفة واسمع عنه جان كل الي ابالي هوا انسان صارم وعصبي ومغرور ومايطيق الانس والجن
تمام هوا فعلاً مايطيق احد بس ويا الناس المقربين اله غير
نسمه من الحب والحنان متجمعات بدلهب
هذا دفان النجف الي يشوفة مايتوقع يلكه عنده ذرة حب وحنان طلع كتله من الحب والحنان
ابتسمت متذكرة ذاك الموقف الي ماراح انسى عمري كله
رابع يوم من خطبتنا
جنت بعدني مامتعودة علية ولا شايلة الحدود كلها منه بعدني استحي واخاف منه واشوفة نفسه هذاك الدفان الماعنده رحمه ولا ضمير
كل مره يتصل ويحجي وياي يحاول يعودني عليه ويخليني ارتاح ويا وماتقيد بس اني لا بكل مرة يحاول يكبر دائرة علاقتنه ارجع اصغرها
بذاك اليوم الساعه ب 1 ونص بليل
اتصل علي دلهب
بيومها جنت مريضة وماخذة برد
رفعت الخط اشخط بصوتي كوا احجي
سمعته فز من سمع صوتي
حجه بخوف وقلق
_دلهب :: ها بوية شبيج؟
_عاتكه :: مابية شي
_دلهب :: شنو مابيج شي صوتج رايح مريضة؟
_عاتكه :: اي ماخذة برد
حجه بحدة ولوم
_دلهب :: طبعاً تتمرضين اذا انتِ كل ماتضوجين رحتي سبحتي وكعدتي ب الحديقة تقرين
_عاتكه :: غير اقره قرأن؟
_دلهب :: ماعندج غير الحديقة تقرين بيها؟؟؟
كحيت بتعب اريد ارد عليه
سبقني ب الرد
_دلهب :: مووووو اكثر من مرة نبهتج لاتسبحين وتكعدين ب الحديقة تاخذينن برد بس منو اليسمع الحجايه
_عاتكه :: شبيك دلهب ليش تصيح؟؟
صصاح بعصبية
_دلهب :: منوو كال مصيح؟
_عاتكه :: مو جاي اسمعك تصيح؟
_دلهب :: سمعتيني اصيح بس ماسمعتيني من حذرتج من كعدة الحديقة؟
صار صوتي عالي بدون قصد
حجيت
_عاتكه :- كافي دلهب لاتصيححح
_دلهب :: عاتكه صوتج؟؟
_عاتكه :: تعبانه اني وانتتت تصيح عوفني مع السلامة
سديت الاتصال بوجهه مزعوجه منه شلون يصيح هسة حتى وان جان خايف عليه مايصير يصيح يكدر يحجي بهدوء ليش الصياح؟
رجع اتصل مرة ثانيه مارديت بسرعه خليته من راد الاتصال ينكطع يلا رديت
حجيت
_عاتكه :: تفضل؟
_دلهب :: تسدين الاتصال بوجهي؟
خليت ايدي على راسي تعبانه مالي خلك العتاب والحجي الراح اسمعه
بجيت بدون ماحس مقهورة من نبرة صوته وهوا يصيح عليه ويرزل
انقهرت واني منا مريضة ومابية احرك روحي
صحت بيه الشهكه بصوتي
_عاتكه :: كاافففييي عوفني دلهب
_دلهب :: شبيج؟
_عاتكه :: مابية شي
حجيتها ودعته وسديت الاتصال مقهورة
شلون اني ويا تونا مخطوبين وهوا يصيح ماتحملت ولا اني اصلا حمل رزايل يكفي الي حصلته من اهلي
اجيت اغمض عيوني حتى ارجع انام ماكدرت
كل شوي اباوع لتلفون منتظرته يراسل لو يتصل يعني معقولة يهون عليه انام واني مقهورة وزعلانه منه؟
استمرت كعدتي للفجر عيوني ماغمضت رغم اني مريضة وتعبانه بس ماكدرت انام
نفسي ماسمحت الي اتصل عليه شلون اتصل غير اني الزعلانه وهوا سمعني ابجي غير هوا يتصل
نزلت جوا ب المصلى شفت السيد كاعد يقرة قرأن ب المصلى كعدت يمه اسمع اله وهوا يقرة
سمعت صوت الباب يندك
اتصدق السيد وكام يفتح الباب
بقيت على كعدتي صافنه
فزيت من مكاني على صوته
عدلت كعدتي احاول اميز الصوت عدل
هذا صوت دلهب جاي يحجي ويا السيد؟
كمت من مكاني اركض ب اتجاه الباب توني اريد افتحه
والسيد فتحه يسمح اله يدخل
صار دلهب كدامي بيده بوكي ورد وعلاكه سودة جبيرة
لابس شفقه سودة وبنطرون جوزي غامق وقميص كابوي ابتسم بوجهي ابتسامه ماعرفت افسرها بس كلهااا حنان وحب
صفنت بوجهه واكفة ب الباب اباوعله مشه السيد لخارج المصلى حتى يشوف منوو كاعدة تحظر الضيافه يعرف بيه تعبانه وماكدر
بقينى اني ودلهب وحدنا ب المصلى
نزل الورد والعلاكه ب الارض واخذني بحضنه ضامني يمسح على ضهري
باسني براسي وحجه يباوع بعيوني
_دلهب :: علويتي مريضة وماجي اشوفها
باسني بخدي بوسة سريعه واني على وكفتي ما انطيت رد فعل لان بعدني مصدومه وما مستوعبه دلهب كدامي
باوعلي بتركيز اخذ خدة على خدي صار خدي طابع بخدة حجه بهمس
_دلهب :: حرارتج مرتفعه
_عاتكه :: هااا..
بعد عني ماخذ ب ايدي
سحبني من ايدي مكعدني بصفة
اخذ ايدي ب ايده يبوس بيهن
حجيت بخجل مدنكه راسي
_عاتكه :: عبالي رحت نمت
_دلهب :: لا شلون انام
رفع راسي ب ايده يباوع لعيوني
حسيته انطاني جرعه من الحب والدفو ساعتها
مابعدني عنه حتى من اجه السيد بقى متمسك بيه وحاضن ايدي
مشه بعد ساعتين من كعدته رغم السيد منعه يمشي بس جان مصر يرجع لبغداد
موقفة هذا زرع بداخلي حب جبير اله
صار وقت الاذان كلنا توضينة وصلينه
فطرنا على تمر ولبن وقرينه قرأن
من كمل الكل
بدو يتجمعون ب المصلى
السيد كل سنه برمضان يجبر الكل يتجمعون على سفرة وحدة ببيت السيد
السيد يحب يشوف احفادة واولادة متجمعين كلهم بمكان واحد كدام عيونه
وصادف هاي السنه عمتي رجعت وملاك
صارت الجمعه احلى
صبينه الفطور وبدينه نفطر
الكل مجرب هاي الكعدة والجمعه بدون ما اوصفها
الروح التصير ب الكعدة على سفرة رمضان بيها جرعه من الحب
باوع السيد النا ب ابتسامه
_عبد الروؤف :: يوم 15 رمضان نسوي فطور جماعي لكل الاحبه
ابتسمنا اني والبنات بفرح
بهذا اليوم يصادف ولادة الامام الحسن عليه السلام
وتجمع الاحبه يعني الكل راح يتجمع والسيد راح يسوي سفرة لكل الاقارب
واكيد اهل دلهب راح يجون
ب اليوم الثاني انفتح باب البيت ودخلو احفاد العلوية لباب واولادها
الكل جان موجود حتى عمران وزوجته عدا السيد معراج ما اجه
وهيج بدينا نحظر ليوم الجمعه بعد ما السيد انطه علم للكل واصر عليهم يجون وخصهم ب الجيه ماكو اعذار
" مهره "
توني بلش عندي الهدوء والسكينه
البيت فرغ من صوت الاصياح والبجي
بس صوت البنكه مسموع
غمضت عيوني براحه احس كلبي هدء والابتسامه توزعت على وجهي
بدت اجفاني تغمض وتلتقي بعد يوم كامل من العناء والسهر
جاي اسحب نفس حتى اروح ب احلامي
فجأة... !!!!...
_راجحه :: الرحمممههههه اتوسل الك
طاحت دمعتي من عيوني بس سمعت صوت صريخه والبجي
صرنا اني وراجحه ندك على وجهنا
بلش حسن ب المنبه الي مؤقته النا كل مانريد انام لو نرتاح
مرات احسه يتقصد يبجي حتى نضل سهرانات ويا وما انام
لفيت راسي ب الحاف وصحت
_مهره :: راجحهه حبابة
_راجحه :: صرتت دبابةةة مو حبابة
_مهره :: واني صرت ذبانه
رفعت راسي اباوع لحسن يشهك ب البجي والصريخ
باوعت لساعه توها ب ٢ ونص بليل
حتى ما مرت ربع ساعة من نام وين لحكك يشبع نوم ويكعد
كمت من مكاني اسحل بروحي حتى اوصل لحسن
اخذته من فراشة خالته بحضني اهز بيه
كامت راجحه تحظر اله الحليب
هزيته بحضني عيوني طالعه من مكانها اريد اشيله واركعه ب الكاع لو مانقهر عليه واكول ابني جان صدك ركعته
_مهره :: كافي ماما.. كافي حسوني كافي ياعيون امك
اجت راجحه ب ايدها الممه انطتني ياها خليتها بحلكه بس صارت بحلكه سكت
كعدت راجحه كدامي تفرك بعيونها
انقهرت عليها واكفة وياي وتركض بيه وبحسن حتى لا اتعب وحدي بيه صرنا نتداور عليه مرة اني مرة هيا
باوعتلها وحجيت
_مهره :: كومي نامي راجحه حتى ترتاحين
_راجحه :: لا من حسن ينام انام
_مهره :: حسن ماينام هوا والفجر
_راجحه :: غصباً عليه وعلى ابو ينام
حجتها وتثاوبت بتعب
ضحكت عليها من سنحت بنص الغرفة نايمه
بديت اهز حسن بحضني شوي شوي الى ان... نمت
اي اني نمت مو حسن مادري حسن شصار بيه ماصار الي اتذكره غمضت عيوني وغفيت
مافزيت الى على صوت الاذان الي احتل المكان
فتحت عيوني بتعب ما مستوعبه الوضع
باوعت لراجحه على نومتها متغضية ب حضينه حسن
باوعت لحسن بحضني الممه ب ايدي باقي بيها شوي وهوا مطلع ايديه من الحضينه نايم وفاتح حلكه
كزكزت عليه بسته منه حلكه ادعي الله يحفظه الي ومايحرمني شوفته لان روحي صارت بيه
اخذت مخدته وفراشة فرشتهن ب المكان الكاعدة بيه شلته من حضني ونزلته على الفرشة
كمت من مكاني افرك بوجهي
مشيت ب اتجاه الشباك فتحت الشباك الهوا يخبل يفتح الصدر وصوت الجوامع من كل مكان ينسمع
لان المكان الكاعدين بيه محاوط ب الجوامع الاصوات تتعالى وقت الاذان
رحت اتوضة حتى اصلي
دخلت للحمام غسلت وطلعت توضيت اخذت المحرم اصلي
من كملت صلاتي كعدت على السجادة صافنه ماعرف شنو ادعي وشنو اطلب من الله بداخلي هوااايي بس ماعرف بيمن ابدي وشلون احجيهن
فضلت السكوت يكفي الله يعلم الي بداخلي ودعائي والي احتاجه
جاي الم السجادة وطلعت راجحه من الغرفة تتعثر بمشيتها
باوعتلي تمسح على وجهه
_راجحه :: تقبل الله
_مهره :: منا ومنج صالح الاعمال
راحت توضت واجت تصلي بمكاني
من كملت كعدنا ثنينه صافنات ب الفراغ
حجيت
_مهره :: العلوية جهاد اتصلت البارحه كالت معزومين عدهم على الفطور
باوعتلي ب استغراب
_راجحه :: منو؟
_مهره :: احنا
_راجحه :: زين لعد
_مهره :: نروح مو؟
هزت راسها بلا
مسحت على شعرها وحجت
_راجحه :: روحي انتِ وامي اني ماروح
_مهره :: ليش؟
ضحكت بدون ماتباوعلي
مسحت على وجهه
اتحسرت وباوعتلي
_راجحه :: استحي
_مهره :: من شنو
_راجحه :: من السيد ايليا
كعدت حواجبي ب استغراب مافاهمه قصدها
باوعتلي وباوعت لباب غرفة امها تخاف لا تطلع من الغرفة
رجعت باوعتلي وهمست
_راجحه :: ما اريد اروح لمكان يجمعني بيه
_مهره :: ليش شمسوي؟
صفنت تعض على شفايفها
ضربت على كصتها بخجل متذكرة
حجيت
_مهره :: غيررر تحجين
_راجحه :: سكتي كل ماتذكر استحي من نفسي
_مهره :: ليشش
ضحكت بخجل تفرك ب ايديها
باوعتلي وهمست
_راجحه :: اعترفت اله ورفضني
خليت ايدي على حلكي مصدومه
باوعتلي هزت راسها ب اي وضحكت
_راجحه :: ماجنتتت افهم مراهقه
_مهره :: شلوننن
_راجحه :: جان عمري 15
حجتها وضحكت تذكر الماضي
كملت كلامها تمسح على وجهه
_راجحه :: السيد عبد الروؤف متكفل بينا اني وامي يدز النا راتب واكل وغيرها من الاحتياجات... ف مرات مايصير عنده وقت يجي يدز واحد من احفادة بفتره من الفترات صار ايليا هوا الي يتردد علينا
ضحكت تضرب على افخادها
صاحت وهيا تأشر على الباب
_راجحه :: جان يدخل قنينه الغاز امي ماجانت موجودة وكتها حصرته عند عتبه الباب كتله اني احبك واريد اتزوجكك
غطيت وجهي ب ايدي وهيا غطت روحها ب السجادة ثنينه خجلانات اني خجلانه من اعترافها وهيا خجلانه من الي سوته
باوعتلها كاتمه ضحكتي وهيا تخرمش بوجهه من الفشلة وتضحك
رجعت تضرب على رجليها
_راجحه :: بساعتها وجهه صار اصفر شوي ويطيح من طولة واني مستمره ب اعترافي... اهخخ يمه اتمنى ينعاد الزمن واكطع النعال على روحي
حجيت بصدمه
_مهره :: وشصصاارر بعدين؟
_راجحه :: شصار رزلني ساعتها كال... انتِ مثل عاتكه اختي وعيب هيج تحجين وتبادرين لاي شخص كان من يكن حتى لحد يستغلج ويأذيج
اتحسرت ب انزعاج
حجت
_راجحه :: بس والله جنت مراهقه وقتها والي يضحك بوجهي اركض افتح اله احضاني ولو رجعت بيه الزمن ما اخطي هيج خطوة... رغم عدت سنوات على الموقف بس بعدني اخجل من السيد ايليا
مسحت على ظهرها
باوعتلي مبرطمه
حجيت
_مهره :: مو مهم ساعه طيش وكلنا نرتكب نفس الخطأء يكفي هوا نبهج وماحجه لامج شي
هزت راسها ب اي ساكته
حجيت
_مهره :: اني هم باجر اتصل على العلوية جهاد اتعذر الها
_راجحه :: هاي ليش؟
_مهره :: احسن ابقى كاعدة وياج
حجت
_راجحه :: خوش ناس بيت السادة
اتحسرت وحجيت متذكرة مواقفهم ووكفتهم وياي
_مهره :: مستحيل انسى فضلهم حتى مرات اخجل من اتذكر شكد تعبتهم وياي
_راجحه :: السيد عبد الروؤف ويا الكل هيج.. تدرين السيد شكد متكفل عوائل وناس محتاجه مرات احسه يتمنى الناس كلها فقرة حتى يساعدهم ويكسب الاجر
رفعت حواجبي وحجيت
_مهره :: شلون عرفتي
حجت بحماس مثل الي تذكرت موقف وتربد تسو
_راجحه :: سنه من السنوات وحدة جارتنا المره ماتت الله يرحمها ارمله وعدها ثنين بنات وولد صغير صادف بهاي السنه ابنها تمرض جانت تدرس ويانا ب الحوزة مره من المرات اخذتنا السوالف ب الحوزة وحجت المره حالة ابنها وجانت تبجي وتشكي بقهر لان ماعدها احد يصرف عليها وعلى اطفالها
حجيت
_مهره :: خطيه
_راجحه :: اي بهذا اليوم جانن حفيدات السيد عبد الروؤف موجودات اني جنت اشوفهن واكفات يسمعن للمره بس مانطن رد فعل ولا بادرن ب المساعده وقتها اني وجم وحدة من البنات حجينه وذمينه بيهن لان جان محروك على المره وهنا فضلن السكوت
سكتت صافنه بينها وبين نفسها
رجعت كملت كلامها
_راجحه :: شوفي احنا البشر بسرعه نحكم على الانسان وناخذ غيبته ونشيل ذنبه... اتذكر جنت كاعدة بليل اباوع من الشباك شفت سيارة وكفت كدام بيت المره نزلو منها ثنين زلم فتحو صندوك السيارة نزلو منه صناديق اكل ومسواك بباب البيت ومشو بدون علم احد
وبقو كل يوم مستمرين بهاي الشغله ينزلون غراض كدام البيت ويمشون والمره تكعد يوم ثاني مصدومه تشوف بس رسالة مكتوب بيها
" من خيرات الله "
الى ان اجه يوم وشفت السيد عبد الروؤف نازل من السيارة ويا الولد ينزل الغراض وعرفتتت ساعتها السيد نفسه جان يساعد المره بس بمو ب العلن لا بينه وبين الله ومو اول موقف اله هواي مواقف صادفتني ويا السيد واحفادة ينطون بدون مايكولون هذا من عدنا جانت رسالتهم وحدة بس
" من خيرات الله "
ابتسمت اسمع الكلامها
ثاني يوم الصبح اتصلت على العلوية جهاد اتعذر منها على الفطور
ردت علي ب
_جهاد :: مهره بنتي هذا الرفض غير مقبول.. انتِ وراجحه والوالدة موجودات على سفرة الفطور ان شاءالله واني راح ادزلكم واحد من السادة يجي عليجن ب السيارة
باوعت لراجحه ساكته ماكدرنا نرفض وقتها لان جانت مصرة على جيتنه لهذا ماجان عدنا خيار ثاني غير الموافقة
" شاهيناز "
دخلت للمطبخ مغمضه عيوني اشتم ريحه الاكل الطيب الي طلعت تتوزع ب البيت
شفت البنات كلهن متجمعات ب المطبخ
حفيدات العلوية لباب ويانا وصفية اخت دلهب وكفاية اخت جادح وقدس وخلود
الكل موجود يساعد
اتربعت بصف صفية نوزع الطرشي على الكاسات
باوعتلي تضحك
_صفية :: هاي خامس مره اريد اكل من الطرشي واتذكر اني صايمه
باوعتلها تشتغل بهمه ونشاط
تذكرت من السيد اتصل على دلهب وعزمه على الفطور
_دلهب :: يعني اجي من بغداد للنجف علمود الفطور؟
_عبد الروؤف :: ليش مستهان بهذا الفطور؟
_دلهب :: لا سيد العفو بس مصدوم يعني عزيمتكم وصلت للمحافظات
وفعلاً اجو اهل دلهب وغيرهم بيت السيد عبد المعز والسيد عبد المقتدر وكل الي نحبهم ويحبونا
غمضت عيوني واني اسمع صوتها ب المطبخ
_سهام :: ماتفتحن باب الحديقة خلي الهوا يداور ب المطبخ شكد خنكه
ها اها شرفت سهام اكيد عرفتوها لان المعرف لا يعرف
سهام زوجه عمران ابن العلوية لباب الي صادفتنا وياها مواقف ابد مو مرضية ب الايام الماضية
رجعت ويا حفيدات العلوية لباب لنجف وهاي الكعدة راح تستمر للعيد
طبعاً اني ماطردها وللا اكش بوجهه بس اتمنى ما نرجع نفتح مصايب الماضي ونجلط السيد ويانا لان احنا وسهام مانتراهم مثل الزيت والماي
كمت من مكاني افتح باب المطبخ لان فعلاً هوا المطبخ صارت يخنك ونفس واحد
فتحت باب المطبخ المتصل ب الحديقة
التفتت على صوت العلوية لباب من صاحت ب اسمي
_شاهيناز :: ها علوية
_لباب :: شهودة اخذي هذا الثلج ب الحديقة فرشي الحاف وكسري حتى نبرد بيه العصاير
_شاهيناز :: ان شاء الله
اخذت الثلج اجمعه ب الحديقة حتى اكسره
طلعت قدس وياي تساعدني اني اكسر وهيا تغسل ب الثلج خاف يلوحه تراب لو شوائب
كعدنا ب الحديقة على الحشيش فرشنا الحاف انكسر ب الثلج جان عماد كاعد على المرجوحه بيده قرأن يقره ابتسمت اباوعله عماد كلش متعلق ب القرأن يحب يقره ويعتزل العالم ب القرأن
التفتت على قدس شفتها صافنه بتعب كل شوي تتحسر بحيرة
باوعتلها وحجيت
_شاهيناز :: شبيج قدوسة اذا تعبانه تركي البيدج اني اكمل
_قدس :: ما تعبانه من الشغل
_شاهيناز :: لعد؟
_قدس :: تعبانه على نفسي وعلى بنتي
صفنت عليها مافاهمه شي
_شاهيناز :: شبيها فاطمه؟
_قدس :: ماعرف شاهيناز خايفة عليها
_شاهيناز :: من شنو احجيلي؟
صفنت مترددة تحجي باوعتلي اتحسرت وهزت راسها ب لا ساكته
حاولت اخذ وانطي وياها ب الحجي جانت رافضة تحجي عفتها براحتها من ترتاح تحجي
كمت من مكاني اجيب صلاحيات العصاير اترسهن ثلج دخلت للمطبخ بدخلتي طلعت سهام من المطبخ
ما اهتميت ولا ركزت مشيت داخله للمطبخ
وكفت اسمع لحفيدات العلوية لباب يحجن ويا عاتكه وكفاية على اجواء ايرأن وشلون خلصن وقتهن
واني والبنات نسمع الهن
بنص السوالف فزيت على صوت صياح عماد جاي من الحديقة
ركضت اني والبنات للحديقة نشوفه شبيه
شفته كاعد على المرجوحه القرأن بحضنه ايده على راسه مغمض عيونه بوجع يصرخ
ركضت عليه بخوف احاول ابعد ايده عن راسه
_شاهيناز :: شبيكك عمادد شبيه راسك؟؟
_عماد :: ضربتنيي
_شاهيناز :: منو؟
أشر على سهام الي جانت كاعدة بمكاني من جنت اكسر الثلج عكدت حواجبها ب استغراب تباوع لعماد
صاحت عليه ب انزعاج
_سهام :: شسالفة ولكك جاي اتشاقة وياك بيمن ضربتك هيا ثلجه صغيره واجت صفح
باوع لكصته محمرة من الضربة
عيونه حمر مبرطم حلكه بحزن
باوعلي وحجه بصوت محتقن
_عماد :: والله تأذيت
غمضت عيوني من سمعته حلف
التفتت على سهام ب انزعاج
_شاهيناز :: مو طفلة انتِ تشاقين ويا طفل بكد ابنج وبعدين ماتشوفينه كاعد يقره قرأن ما استحيتي من كتاب الله الي بحضنه
صاحت كايمه من مكانها
_سهام :: هاااا هااا خيررر شنو صايرة محاميه لعماد؟
_شاهيناز :: اليوم وباجر اني محاميه لعماد ما مسموح الج تمسينه بحجاية مو بفعل بحجاية بس يا سهام
رفعت حواجبها ب اندهاش تباوعلي
_سهام :: شوف شلون حاركه كلبها عليه نسيت اني صار ابن رجلج
باوعت لعماد وحجت بحزن
_سهام :: عماد حبيبي هاي الواكفه تدافع الك نفسها الي جانت السبب بطلاق امك وابوك وهيا الحرمتك من امك هسة صارت زينه وتعارك عليك
فتحت عيوني بصدمه من بجاحتها ب الكلام وقلة الادب الي عندها
باوعت للبنات كلهن خازراتها يردن يفترسنها بس محد تكدر لان السيد حذرنا وغيرها هيا خطار عدنا والبارحه جاية
رجعت صاحت
_سهام :: ماعدجن اخلاق ولا احترام للاكبر منجن عود كلت انخطبن وصارن زينات وعاقلات و... ااخخخخخخ
بنص كلامها وصياحها صاحت متوجعه من ضربة اجتها على عينها
التفتنا كلنا على المكان الاجت منه الضربة
شفنا صفية اخت دلهب بيدها فاطمه اخت عاتكه الصغيرة بيدها ثلجه صغيرة
صاحت صفية بصدمه تباوع لفاطمه
_صفية :: يياا يااا فاطمه مو عيب شلون تضربين خالة وهيا تحجي
انتبهت على خلود غطت وجهه ب ايدها تضحك
وعاتكه دنكت راسها تضيع وجهه
ماعرف ليش حسيت وقتها صفية الضربت سهام مو فاطمه
حجت صفية تباوع لسهام
_صفية :: اي حبيبتي كملي يكلك الخير كتله ولا تكطع سالفته
سكتت سهام خازرة صفية
مشت طالعه من المطبخ تخوزر بينا
بس طلعت سهام البنات طكنها بضحكه
باوعتلي صفية وغمزت
_صفية :: فاطمه ايدها خفيفة
فتحت عيوني ب اندهاش اضحك
كل البنات انسحبن راجعات للمطبخ
التفتت على عماد ابتسمت بوجهه
حجه
_عماد :: ماسويت الها شي
_شاهيناز :: لا تهتم بيها هيا تحب تضوج الناس لان ماعدها شغل وعمل... يلا انت كمل قرأتك
_عماد :: راح اكمل ب المصلى
_شاهيناز :: يلا عفية
مشه شايل قرأنه بيده اباوعله رغم صغر عمره بس من دخل للمطبخ مدنك راسة ومارفعه لا تصير عينه على وحدة من البنات
طفل بس عقلة جبير
دخلت للمطبخ اكمل العندي استغربت ليش عمتي والعلويات الكبار ما موجودات لو موجودات جان رزلن سهام وريحن كلبي بيها وخاصةً عمتي حيل تحبها
استمرت وكفتنا هاي بالمطبخ الى ان كملنا العدنا
طلعنا من المطبخ شفنا العلويات الكبار متجمعات ب الصالة وعمتي ام جادح وام دلهب وفاء وام داوود زينب كاعدات ويا العلويات
كعدت على القنفه اني والبنات
انتبهت على صفية تغمض بعيونها نعسانه
اشرت لعاتكه عليها
باوعتلها عاتكه
حجت وياها واخذتها صاعدة بيها لغرفتها ترتاح
رجعت اسمع للعلوية لباب تسولف على ايران واجوائها والعيشة ب ايران
سمعت صوت قدس تهمس ب اذني
التفتت عليها شفتها واكفه فوك راسي بيدها فاطمه
باوعتلي وحجت تهمس
_قدس :: جادح يريدج
_شاهيناز :: صدك وينه؟
_قدس :: ب الحديقة الخارجيه
هزيت راسي ب اي ساكته
كمت انسحبت من مكاني طالعه للحديقة هوا صح اني وجادح خاطبين بس استحي اوكف ويا واحجي كدام الكل اشوف بعد وكت على هل وكفه
طلعت للحديقة شفته واكف منطيني ضهره
حجيت
_شاهيناز :: جادح
التفت يباوعلي ب ابتسامه
حجه
_جادح :: روحه لجادح
ابتسمت مغطية وجهي
اخذني من ايدي حاضني لصدرة
حجه
_جادح :: شكد مشتاق لحضنج
_شاهيناز :: واني هم
_جادح :: مشتاقة لحضني
_شاهيناز :: اي مو بس انت تشتاق
ضحك بفرح شادني لحضنه
_جادح :: ما متعود عليج تشتاقين متعود بس انا اشتاقلج
_شاهيناز :: لا اني هم اشتاق بس استحي احجي مو مثلك
_جادح :: غير احبج
_شاهيناز :: اني هم احبك
بعدني من حضنه يباوع لعيوني ب اندهاش
_جادح :: شلون شلون رجعي احجيها
_شاهيناز :: جادح صوتك لا السيد يجي عيب استحي منه
_جادح :: واذا اجه السيد غير حلالي
_شاهيناز :: اي اي بس صوتك
_جادح :: كولي احبك
_شاهيناز :: جادح صوتك
هز راسة ب لا يصيح كولي احبك واني اطفر بمكاني اخاف لا يجي واحد من السادة ويشوف واني استحي منهم
كمزت اني وجادح على صوت السيد ودلهب جايين ب اتجاه الحديقة
ركضت من جادح راجعه جوا من باب المطبخ
اباوع لسيد ودلهب وكفو بصف جادح
حجه السيد يباوع لجادح
_عبد الروؤف :: شبيك ؟
_جادح :: هاا.. لا شبية واكف اسقي الزرع
باوع دلهب لجادح
_دلهب :: بعيونك تسقيهن
_جادح :: شنو؟
_دلهب :: الماي وين التسقي بيهن
_جادح :: لا حبيبي الماي الك احنا نسقي خضارنا ب الدعاء
باوع دلهب لجادح صفح وحجه
_دلهب :: اخ من عيارتكم يا السادة
لحظه صمت عمت المكان السيد يباوع لدلهب وجادح يباوع لدلهب ودلهب فاتح عيونه صافن على الشجرة
هز السيد راسة بأسف
_عبد الروؤف :: ضابط وعليك العتب
_دلهب :: العفو سيد ماقصدك ب الحجاية
_جادح :: حجاية النسوان بطلها
_دلهب :: بعيونك الفسفورية
مشه السيد يدخل جوا وجادح ودلهب ورا يتناكرون بينهم
صار وقت الاذان الكل فرش سجادته يصلي
من كملنا صلاتنا اني والبنات دخلنا للمطبخ نجهزء الفطور
باوعت للبنات شفت مهره وراجحه كاعدات على القنفه مستحيات
عمتي شلون تمتص خجلهن تخليهن يكومن يتحركن ويانا حتى لايحسن بروحهن خطار ويتقيدن
بدينه نصب الفطور الرجال ب المصلى والنساء ب الصالة وهيج بدينه نتفطر كلنا على صوت واحد من الضحكه والسوالف بدون مشاكل وبدون نفوس سودة طبعاً بس سهام غير مشمولة بهل كلمه
" راجحه "
اخذت حسن من امه من شفته متعبها ويصرخ صوته عالي وامه استحت منه لان احرجها بصريخه
شلته من حضن امه استأذنت العلويات وطلعت بيت اكعده ب الحديقة
شفت المرجوحه بزاوية الحديقة ركضت عليها بيدي حسن نيمته على المرجوحه افتح حضينته يمكن مزعوج منها
بس فتحت حضينته سكت فارش ايديه براحه
بسته بخده
باوعتله وحجيت
_راجحه :: كول اريد انزع بعد عليمن تبجي
رجعت بسته مره ثانيه اهز بيه على المرجوحه
شوي شوي بدة يبجي ويصرخ
رجعت شلته ادور بيه ب الحديقة ماكو بس يبجي
نزلته على المرجوحه وركضت اطلع من الحديقة اجيب حليبه
هوا من الغباء اترك طفل صغير وحدة ب الحديقة وعلى المرجوحه بس يعني شنو ممكن يصير الحديقة فارغه واني ماراح اتأخر بسرعه دخلت للبيت
شفت العلويات والبنات متجمعات يحجن ويا مهره مرتاحات وياها وهيا مرتاحه وياهن
اخذت الجنطه وطلعت راجعه للحديقة
جاي افتح الجنطه اطلع حليب حسن رفعت راسي فازة من مكاني من شفت واحد طويل واكف ب الحديقة شايل حسن بيده يدور بيه
ركضت عليه اشوف هذا منو
التفت صار وجهه بوجهي
صفنت بوجهه منو هذا اول مره اشوفة
دنك راسة ماشي ب اتجاه المرجوحه
باس حسن من خده ونزله على المرجوحه
حجه بدون مايباوعلي
_مشواق :: صغير بعده مايصير اتركي وحده وتمشين
_راجحه :: ما اتأخرت عليه بسرعه اجيت
هز راسة ب اي ساكت
دار وجهه يريد يمشي
اباوعله مامنتبه لنومه حسن وشلون عافة على حافة المرجوحه
فزيت من مكاني من شفت حسن دار بروحه متحرك يريد يطيح من مكانه
_راجحه :: حسنن
فز من مكانه لازم حسن قبل لايطيح
صرخ حسن يبجي لان فز
شالة من مكانه حاضنه لصدرة
استحيت اخذ حسن منه بقى يضرب على ضهره بخفة وحسن يبجي
باوعلي عاكد حواجبه
_مشواق :: شبيه؟
_راجحه :: خاف كرصته
_مشواق :: شنووو؟
_راجحه :: اكلك خاف كرصته بكه
_مشواق :: ماكو بك
_راجحه :: ذبانه
_مشواق :: ماتكرص
_راجحه :: سلاحف النينجا
صفن الزلمه واكف بمكانه مافاهم شي
رجع حسن يبجي مره ثانيه بقوة احتارينا شلون نسكته حتى الحليب مايريده
حجه بقلق
_مشواق :: خاف مريض؟
_راجحه :: لا اسم الله
_لباب :: ولكم شسويتو للطفل
التفتنا ثنينه على العلوية لباب اجت ب اتجاهنا بيدها كلاص الجاي تمشي بهمه
باوعت لحسن بخوف
وحجت
_لباب :: مشواق شبيه الصغير؟
_مشواق :: ماعرف علوية
_لباب :: جيبه
انطتني كلاص الجاي واخذت حسن من مشواق باوعتله مبرطمه
_لباب :: يمه حبيبي ليش هل دموع... قهروك مو؟؟
حجتها وهوا خبصنا ب البجي مثل المفتهم وجاي يشكي الها
وكفنا اني ومشواق صافنين حرام ب الحرم سوينه شي
اباوعلها تربعت ب الارض اخذت حضينه حسن فرشتها على رجليها نومت حسن على رجليها تسحب ب ايديه ورجليه وكمطته
شوي شوي بده يسكت ويهدء
اخذت الحليب تشربه وهوا ساكتتت وهادء ولا جنه قبل شوي خبص الدنيا
من كمل حليبه غفى بحضنها نايم
باوعتلها بصدمه ارمش بوجهه
ما مستوعبه شلون هيج نام بهدوء
اخذته من حضنها راجعه بيه لأمه
واني بعدني على صفنتي شلون هيج نام بسرعه وسكت...
" صفية "
حبيت اجواء بيت السادة وكعدتهم وسوالفهم هيج اجواء ماعشتها بعمري
بس اليوم عشتها ويا بيت السيد عبد الروؤف
اخوي خوش عرف يختار ناس يناسبهم كلهم حبابين وقريبين على الكلب الى هذيج الي اسمها سهام ماحبيتها ولا بلعتها ابد والحمدلله الشعور جان متبادل بينه لان هيا هم ماحبتني ولا طاقتني
طلعت من البيت كاعدة ب الحديقة كلش حابه هل مكان اتونس على الحديقات يفتحن صدري ويسولي واهس اكمل اليوم
ريحه الحديقة ياس وحنه متت بالحديقة فتحت تلفوني اصور وانزل استوريات
التفتت بنص جلستي التصويرية على صوت مألوف اممم هذا الصوت اعرفه لمنو
مشيت ب اتجاه مصدر الصوت اباوعله من بعيد شايفته بس ماشايفني
جان كاعد على الحشيش كدامه بزونات اربعه صغار
صاب الهن اكل بصينيه جبيرة ياكلن منها
فتحت تلفوني اصور بيه فيديو بدون مايحس بوجودي حبيت الموقف وردت اوثقه ب التصوير
سديت الفيديو ورجعت اصور مره ثانيه مادري شلون انفتح الفلاش واني اصور
وكفت بمكاني متصنمه واني اشوفة داير يباوعلي واني والتلفون بيدي خالته بوجهه بكل ثقة مبتسمه
نزلت تلفوني بخجل
ضحكت اطمطم سالفتي
اشرت اله بيدي وحجيت
_صفية :: ههه خطية صغار مايشوفون كلت اضوي الهن
حجيتها وبلعت ريك بخجل ادور عيوني ب الحديقة
دنك راسه ساكت مامنطيني رد فعل
بقيت واكفة بمكاني اباوع للبزازين مره
ومرات اباوع للعتوي الجبير الكاعد يمهن
العفو اقصد السيد غضيمر
حجيت من شفته يمسح عليهن
_صفية :: ما تخاف من الجراثيم
هز راسة بلا
رجعت حجيت
_صفية :: احنا نخاف على روحنا
حجه بدون مايلتفت
_غضيمر :: الجراثيم ب ايدي مو ب ايد احد
_صفية :: اي بس احنا خطار عدكم مثلاً اجيت تقدم عصير لو جاي لو ماي لو غيرها بيدك وهيا كلها جراثيم من الحيوانات حرام عليك لان شاركت ب انتقال البكتريا
اباوعله ما مهتم اني احجي وهوا مكمل يمسح عليهن
حجه
_غضيمر :: نظيفات
_صفية :: مسبحهن على ايدك؟
سكتت مغلس عليه
مادري شصار بيه وقتها اجاني شعور غريب خلاني اتمشه متقربة ب اتجاهه
كعدت كدام الصينيه صح جسمي ماطاخ السيد بس هوا فز من مكانه
كام من مكانه يتلفت ب المكان
اخذت وحدة من البزازين وكمت شايلتها ب ايدي
باوعتله وحجيت اتقرب ب اتجاهه
_صفية :: هسة انت ما تلعب نفسك من البزونه بس تلعب نفسك مني؟
_غضيمر :: شنوو هل حجي خوية ما تلعب نفسي انا بس حرام مايصير هل قرب
عكدت حواجبي ب استغراب
اومأت براسي وحجيت
_صفية :: ليش حرام ترا لابسة شال وساتره نفسي
_غضيمر :: الحرام ما يوكف بوجهه القطعه التغطين بيها جسدج وشعرج
فتحت عيوني بعصبية من سمعت رده
صحت
_صفية :: قصدك اني مو شريفة؟؟؟
_غضيمر :: استغفر الله... خوية مو هيج
نزلت البزونه من ايدي للارض باوعتله وحجيت محروك كلبي منه
_صفية :: حرام عليك تطعن بشرف الناس
_غضيمر :: خويةةة ما طاعن انا اقصد
_صفية :: اييي فهمتت قصدك يعني شالي مو ستر
_غضيمر :: لااا اقصد..
_صفية :: قصدك اني...
_غضيمر :: كافي !!
حجاها ورفع عيونه بعيوني
ابتسمت بوجهه اضحك
_صفية :: اي عفية شفت شلون خليتك تباوع بعيوني حتى تعرف وجهي مابي حرام
صفن بوجهي مثل الي ما مستوعب كلامي
دنك راسة يمسح على وجهه ويستغفر مشه من يمي طالع من الحديقة
حجيت بصوت ناصي بس هوا يسمعه
_صفية :: لاتخاف سيد الله مايحاسبك لان باوعت لعيوني
وكف منطيني ضهره هز راسة بقله حيلة ومشه
ضحكت راجعه جوا
كعدت عند البنات بس بالي عند السيد كل ماتذكر رد فعله اضحك مادري ليش هيج سويت ولا جنت قاصدتها بس ماعرف الاندافع يمكن
مر الوقت على كعدتنا البنيه الي اسمها مهره وراجحه ووامهن مشن راجعات للبيت صادف الي رجعهن خطيب وحدة من العلويات اسمه داوود
ما مر وقت طويل على طلعتهم غير دقايق
فجأة كمزنا كلنا على صيحه دلهب والسيد مفرقد
ركضت اني والبنات نشوف شصار
اباوع الهم فتحو باب المصلى الخارجي وطلعو كلهم يركضون حتى بدون مايلبسون شي برجليهم طلعو حفاي يتراكضون لشارع
واول الي طلع يركض السيد مفرقد
ركضت العلوية لباب على ابنها بخوف
صاحت تريد تفهم شصار
حجه وهوا يركض يريد يلحك الباقين
_مشواق :: اهل مهره مسوين الها كمين... ماخذين ابنها وكاتليها بنص الشارع
