رواية سراج السادة الفصل الرابع والأربعون بقلم غسق ادريس
اللهم يا مقلب القلوب ثبت قلبي على دينك.
الحمدلله
الحمدلله
الحمدلله
سبحان الله
سبحان الله
سبحان الله
لاحول ولاقوة الابالله العلي العظيم
لاحول ولاقوة الابالله العلي العظيم
لاحول ولاقوة الابالله العلي العظيم
استغفرالله العظيم واتوب اليه
استغفرالله العظيم واتوب اليه
استغفرالله العظيم واتوب اليه
الله اكبر
الله اكبر
الله اكبر
اللهم صلِّ على محمد وآل محمد
تصويت وتعليق بين الفقرات
صوتو على إستطلاع بنهاية البارت
خلونا ويا الساده....
🤍.
" مهره "
طلعنا من بيت السيد عبد الروؤف
بعد ماودعنا العلويات اني وراجحه
اخذت راجحه حسن مني شالته ومشت تطلع من البيت
استوقفنه صوت العلوية جهاد
التفتنا اني وراجحه نباوعلها
اجت ب اتجاهنا تباوعلنا ب استغراب
حجت
_جهاد :: هاي وين؟
_مهره :: للبيت علويه
_جهاد :: اي وشنو للبيت تمشن وحدجن؟
_راجحه :: علويه برمضان ماينخاف علينه وحدنا
باوعت العلويه لراجحه صفح
كتفت ايديها
وحجت
_جهاد :: ماكو هيج ماتمشن وحدجن والطفل وياجن هم.... انتظرن اشوف مفرقد وين ياخذجن
مشت تدخل جوا
باوعتلي راجحه وحجت
_راجحه :: لو اعرف متصله على امي تجي تاخذنا
هزيت راسي ب اي ساكته
ام راجحه رجعت بعد الفطور لان تعبت واحتاجت ترتاح لهذا رجعت قبلنا
بوكفتنا انفتح باب المصلى الخارجي طلع السيد مفرقد، وخلفه شخص ماعرفه بس سمعت السيد مفرقد صاحه داوود
اجه مفرقد ب اتجاهنا مدنك راسه
حجه
_مفرقد': يلا خويه ام حسن
حجه داوود مقاطع مفرقد
_داوود :: سيد جاي شحجي وياك كتلك انا طالع بطريقي يصير دربهن
التفت مفرقد على داوود
حجه
_مفرقد :: مو مشكله اجي وياكم
_داوود :: لاكمل العندك انت.. يلا خويه اذا ماعدكم شي امشونا
سكت مفرقد مستسلم لداوود
وكف بحيره مدنك راسه
واني وراجحه مشينه خلف داوود
التفتت على السيد مفرقد من صاح
_مفرقد :: داوود هاي أمانه عندك
_داوود :: ب الحرص والصون
طلعنا من البيت داوود كدامنا يمشي واني وراجحه خلفه ساكتات
جنت متوقعه حرصهم هذا وخوفهم طبيعي
ماجنت اعرف الي راح يصير وقتها وليش جانو خايفين نطلع وحدنا
جنا نمشي بفرع شبه ضيق جان مثل السوك
واحنا نمشي طلع من الفرع شخص التلفون ب ايده مدنك راسه
صار يمشي خلفنه
شفت داوود التفت يباوعله عاكد حواجبه
اتراجع داوود يمشي خلفنه واحنا كدامه
حسيت ب الخطوات تزايدت
درت وجهي على النص شفت ثلاثه غير الي طلع من الفرع يمشون خلفنه
مادري ليش ما ارتاحيت الهم
رغم هما جانو يمشون بشكل طبيعي بس اني ما ارتاحيت الهم
انتبهت لداوود فتح التلفون كتبت رساله ورجع سد الاتصال
باوعتله ابتسم بنص خد عيونه على الطريق ابتسامته
غريبه مو فرح لا
يباوع للولد ويرجع يكمل طريقه
حاوطنا داوود معاني وجهه تغيرت
بعصبيه وغيض
طلعنا من الفرع صار كدامنا شارع مفتوح
الشارع فارغ من الناس
انتبهت اكو سيارتين كبار واكفات على الشارع متروسه زلم مانتبهت منو ب السياره استحيت اركز ب الزلم
صارو الاربعه الي يمشون خلفنه قريبين علينه
اتقرب داوود من عدنا بدون مايطخنا ويباوع النا
حجه بصوت ناصي
_داوود :: بس اصيح بيجن.. اريدجن تركضن راجعات لبيت السيد عبد الروؤف
_راجحه :: ها؟
التفنه اني وراجحه نباوع لداوود ب استغراب
بعدنا ما مستوعبات قصده
وسمعنه صوت صيحه
وكفت ب الطريق فاتحه عيوني بصدمه من سمعت صوته... شفته نزل من السياره يمشي ب اتجاهنا
انفتحت بيبان السيارتين ونزلو منها الي موجودين
رجعت بخطواتي واني اشوف محمد اخوي وولد عمي نازلين من السياره يمشون ب اتجاهنا
أشرت لراجحه ترجع
حضنت راجحه حسن لصدرها تباوع لاخوي محمد
باوعتلي بخوف
صارت عيوني على حسن باوعتلها وحجيت بخوف عيوني مدمعه
_مهره :: راجحه حسن...
جاي نرجع اني وراجحه وصارو الاربعه بضهرنا مانعينا صاح بيهم داوود يمنعهم يطخونا
انتبهت على راجحه حضنت حسن لصدرها وركضت راجعه
ركضت وراها اصرخ
انسحبت من شالي بقوة
رجعت ورا اصرخ من قوة السحبه شالي راجع
ركضو ثنين خلف راجحه مانعيها
حضنت حسن لصدرها تصرخ وتغلط عليهم
اباوع الهم جتفو داوود محاوطي كلهم
التفتت بخوف على اخوي محمد شفته يباوعلي ب ابتسامه كلها حقد وخبث
حجه بفرح
_محمد :: هلا بعارنا هلا ب الي نزلت روسنا
_مهره :: محمد الله يخليك لا
سحبني من شعري يصيح
_محمد :: تعرفين الله انتِ ب....
_مهره :: محمدد فدوة
صاح ب الولد
_محمد :: جيبو الطفللللل وصعدو للسياره
_مهره :: لاااااا محمد كلشي ولا ابنننيييي
اباوعلهم حاوطو راجحه يسحبون محمد منها شكد حاولت تمنعهم وتبعدهم ماكدرت
سحبها واحد من ولد عمي من شالها
التفتت على داوود شفته ينازع بينهم
خمسه محاوطي يتعاركون ويا
انسحبت من شعري ب الارض بقوه
صرخت متوجعه اتوسل لمحمد يعتقني
شفتهم صعدو حسن لسياره صرخت اريد اركض لابني
سحبني محمد لاطمني على وجهي
صاح
_محمد :: تردين ابنجج موو
_مهره': محمد لااا تأذي طفللل محمد اني أذيني ولا تأذي حسن
_محمد :: ااخ يا الحنينه ثنينكم راح تمشون وياي انتِ ب الذات عندي الج هديه كلش حلوة
حجاها ونزل علي ضرب بنص الشارع شكد صرخت وبجيت ماكو نتيجه جان يزيد ب الضرب
سحلني ماخذني لسياره
اسمع بس صريخ راجحه وبجيها تسحبني منه وهوا يدفعها يضرب بيها
انتهيت كلش جوا وهاي جانت البدايه
وبيد اخوي لو ياخذوني لمسلم شراح يصير
فتح باب السياره الثانيه مو نفسها الي بيها حسن
يدفعني حتى اصعد لسياره واني صامده ماصعد الى ويا ابني
سحبني محمد من شعري وضربني بباب السياره بقوه مكررها اكثر من مره
ركضت راجحه عليه تبعده عني باوع لراجحه وضربها على وجهه بقوة
رجعت راجحه للخلف دايخه من الضربه
سمعت صوت بجي حسن لو فرفحت روحي
صرت ابجي واصرخ الطم على وجهي
خشمي يصب دم عبايتي وشالي مادري وين راحن شعري طالع واني وملابسي ننسحل بنص الشارع
شكد حاول داوود يوصل لمحمد ماكدر التمو عليه كلهم يضربو والكثره تغلب الشجاعه
ركضت اريد ابتعد عن محمد
ماحس غير شعري انشال من مكانه مسحوبه
ضربني ب جامه السياره حيل
هنا مادري شصار بيه صارت وشه براسي
حسيت بماي صار براسي
دارت الدنيا بيه اباوع لسياره البيها حسن بس صوته صرت اسمعه
وكفت بمكاني طايحه عيوني تغمض وتفتح
جنت ادعي بداخلي واتوسل ب الله واهل البيت
حجيت واني اغمض بعيوني
_مهره :: يا ابو الحسنين اني بديرتك ودخيله عندك لا تعوفني الهم
حجيتها وغمضت عيوني مستسلمه للواقع
" راجحه "
صرخت ابجي واني اشوف مهره طايحه جوا السياره بس الدم يجري منها
كمت من مكاني اركض عليها
باوعلي اخوها فاتح عيونه يريد يفترسني
_محمد :: اذا تقربتي الها تصيرين بمكانها
_راجحه :: ولك جللببب اختك هاي يا نذل
ركض علي يريد يضربني
رجعت للخلف ايدي على وجهي خايفه منه يضربني
قبل لايتقرب مني سمعت صوت رجعلي الأمل والفرح
بعدت ايدي عن وجهي
التفتت للخلف شفتهم
ابتسمت الدموع بعيوني شفتهم اجو يركضون كلهم
السادة كلها وخطيب عاتكه وحتى السيد عبد الروؤف
كلهم موجودين
صاح دلهب
_دلهب :: ولك محمد ايدك اكسرها
باوعت لاخو مهره طلع من جيبه سجينه وركض بيها عليهم
ابتعدت اركض ب اتجاه مهره
شفتها غايبه عن الوعي الدم تارس وجهه
خليت راسها بحضني امسح على وجهه وابجي
رفعت راسي شفتهم تكابلو السادة واهل مهره
صارت مجزرة ب الشارع
السادة هذول الي الفقره الحبابين اليخافون يأذون نمله ب الغلط يضربون ويعاركون بكل قوتهم وين اليوجعك
دلهب جان اكثر واحد مسيطر بحيث يطبك ثنين ثنين
اشوفة جر اخو مهره من ملابسة نزع النعال يضرب بيه على راسه
اهل مهره جانو يعاركون بسجاجين صغار بس السادة لا ب ايديهم
اباوع لسيد مفرقد يتلفتت بين الموجودين صارت عينه علينا كمز من مكانه يركض ب اتجاهنا
صارت عيونه على حمره فتح عيونه بصدمه وهوا يشوف الحاله الي بيها مهره
أشرت اله على عبايتها وشالها
ركض يجيبهن واجه يغطي بمهره
فتحت مهره عيونها صارت عينها بعين السيد حجت تغمض بعينها
_مهره :: حسن... حسن وين
_راجحه :: اني اني اجيب حسننن
ركضت على السياره الخلو بيها حسن
شفته ساكر من البجي وجهه ازركك
شلته اهدي بيه واسكته اباوع لسيد مفرقد شال مهره من الارض مغمض عيونه بقله حيله مايكدر يتركها بهاي الحاله
ركض بيها راجع واني بيدي حسن اركض خلفهم
صارت سياره اخو شاهيناز ساجد كدامنا صعدو مهره ب السياره وطلعو بيها للمستشفى
جنت امسح بدموعي كل ما اذكر الي صار ابجي
شلون تجمعو علينا كلهم لو ماخذين مهره وحسن شنو جانو راح يسوون؟
اقل فعل الهم يقتلوها اكيد
وصلنا للمستشفى ركضو بمهره الدكاتره واني خلفهم اركض
كعدت على الكرسي اسكت بحسن بسته بخده ياروحي شلون عندك حض انت وامك طحتو بهيج ناس ماتخاف الله
بين ماكعدت مهره وبين مارجعنا لبيت السيد
عرفت السادة مشتكين على اخو مهره وولد عمها وكلهم ب السجن
بقت مهره ببيت السادة لان خافو يرجعون اهلها يغدروها بس اني رجعت لبيتنا
" جهاد "
فتحت باب المصلى ودخلت عاكده حواجبي بعصبيه
شفت السيد كاعده وحده ب المصلى يرتب ب الكتب
كعدت كدامه الانزعاج والعصبيه واضحه علي
باوعلي السيد وحجه
_عبد الروؤف :: شبيها عمه السادة معصبه
_جهاد :: على مهره
_عبد الروؤف :: ليش؟
_جهاد :: لان وضعها ماينسكت عنه البنيه من البارحه ساكته مانطقت بشي ولا حتى أكلت مكتفيه ب السكوت... خايفه لا يصير بيها شي لو تأذي نفسها
اتحسر السيد وحجه بحيره
_عبد الروؤف :: الي جاي تمر بيه هاي البنيه صعب وماينحمل
_جهاد :: سيد لاتتركها وحدها تحارب هاي الدنيا
رفع راسه عاكد حواجبه
حجه يهز راسه بنفي
نزل الكتاب من ايده وحجه بحده
_عبد الروؤف :: جهاد مهره دخلت جوا عبايه السادة شلون اتركها هاي صارت وحدة من حفيداتي وانا عندي حفيداتي خط احمر
حجيت
_جهاد :: وشلون راح تصرف؟
_عبد الروؤف :: اطلكها من زوجها
_جهاد :: اكيدد بدون شك تطلك بس وبعدين؟
باوعلي بحيره متردد يحجي
حجيت مستغربه وضعه
_جهاد :: اعرف هاي حيرتك ماتجي الى من ضياع
_عبد الروؤف :: مو ضياع بس ماريد اظلم احد بقراري هذا
_جهاد :: شنو قرارك سيد
زفر نفسه يهز راسه بحيرة
عرفت فعلاً السيد ضايع بقراره ويخاف يظلم احد ب الي راح يسوي
طلعت من المصلى محتاره ويا السيد بعد ما عرفت الي يدور براسه
فتحت باب الغرفه شفت مهره كاعده على الجرباية بحضنها ابنها حسن صافنه
سديت باب الغرفه ورجعت امسح على وجهي
كعدت على القنفه اهز رجلي كلام السيد يدور براسي
صفنت متذكرة الي صار بمهره وشنو ممكن يصير ب المستقبل اذا بقت على وضعها
اهلها مجرمين مايهتمون بشي ولا راح تجي بعينهم بنتهم... لان ماجاي يدور براسهم غير انو مهره عار وجابتلهم العار لان رادت تعيش حياه هيا تريدها مو هما
بعد ما صفنت وعرفت حياه مهره فعلاً متوقفه على هذا الشي واذا ماصار البنيه راح تضيع حياتها وحياه ابنها بيد ناس مايخافون الله
ب اليوم الثاني شفت السيد واكف يحجي ويا مفرقد وفقار
وكفت بصف السيد اسمع وياهم
حجه
_عبد الروؤف :: اهل ام حسن اليوم يوصلون
_مفرقد :: سيد انت ماشاركتنا الي تريد تسوي
_عبد الروؤف :: راح تعرفون بعدين... فقار اتصل على دلهب اريده موجود
_فقار :: صار سيد
هز السيد راسه ب اي ساكت
التفت يباوعلي دنكت راسي بدون ماحجي مادري شلون راح يستقبل الموضوع معقولة يرفض لو يوافق؟
العصر وصلو اهل مهره
اني والبنات ومهره كلنا جنا ب الصاله كاعدات منتظرات الي راح يصير...
كلام منقول من السيد مفرقد الى العلوية جهاد..
طلعنا انا وفقار وايليا ودلهب خلف السيد نستقبل اهل ام حسن
اجو عمامها كلهم وخالها الجبير وامها جانت موجودة وياهم
دخلو للمصلى كعدو كلهم واحنا كعدنا
كامت ام مهره تريد تطلع من المصلى تدخل للصاله حجه السيد مستوقفها
_عبد الروؤف :: وين ام محمد؟
_جنان :: اريد اشوف بنتي مهره
_عبد الروؤف :: افضل ماتشوفيها لان البنيه تعبانه وماتريد تشوف احد
وكفت تباوع لسيد بعصبيه
أشرت على نفسها وحجيت
_جنان :: انا امها مو احد شنو ماتريد تشوفني
_عبد الروؤف :: ام محمد خويه الام مو كلمه بسيطه الأم فعل وحنان ب النسبه لام حسن ماشافت هذا الشي منج لان ما استقبلت من افعالج غير الغدر وتسليمها بيدج لموتها... تفضلي خويه رجعي لمكانج افضل
دنكت راسها راجعه تكعد بمكانها خجلانه وضايجه من كلام السيد
بدو عمامها يحجون ويتعذرون عن الي صار
حجه عمها ابو مسلم
_قصي :: سيد يشهد الله محد بينا جان يعرف بسالفتهم ولا شنو يدور براسهم.. غافلونا وطلعو وصار الي صار واحنا هسه جايين نعتذر منك ومن السادة ونحاول نطيب النفوس
هز السيد راسه ب اي
حجه
_عبد الروؤف :: وقت الاعتذار انتهى ابو مسلم والاعتذار مو الي لا لبنت اخوك لان هيا الي تأذت مو انا ولا السادة
رجع عمها قصي يريد يحجي
والسيد حجه ناهي يكمل
_عبد الروؤف :: ابو مسلم كعدتنا هاي مو للاعتذار كعدتنا هاي نخصم الموضوع لطرفين
حجه واحد من عمامها
_ :: وهذا الي نريده احنا سيد نريد نسد السالفه لان الناس بدت تحجي وانت تعرف حجي الناس سم وماينحمل
_عبد الروؤف :: اي صح حجي الناس سم وافعالكم عسل
حجه عمها الثاني
_:: والله سيد افعالنا مابيها شي هاي بكل بيت تشوفها والي صار مو عيب ولا حرام افعالنا تأديب لبنتنا لان نحرفت وطلعت من الطريق وانت شوف بعينك وين وصلتنا افعالها زوجها هارب من الدوله واخوها وولد عمها ب السجن وهيا ببيت الناس... احلفك ب الله شلون تشوف افعالها مقبولة لو لا؟
حجه السيد ب انزعاج يباوع لعمها
_عبد الروؤف :: اولاً زوجها مو محترم وهاي القانون والعدالة ابن اخوك يتعاطى المخدرات من يمتى فعله مو عيب وحرام؟.. وثانياً اخوها وولد عمها تهجمو عليها وحاول يقتلوها من يمتى هيج فعل مو عيب وحرام؟ ثالثاً البنيه ماشافت بيكم واحد يكدر يحميها ويوكف وياها لهذا التجأت لمكان يقدم الها الأمان من يمتى فعلها عيب وحرام؟
حجه عمها قصي
_قصي :: سيد انت تشوف ماكو عيب وحرام بس احنا نشوف فعلها غير مقبول على العموم احنا جايين نتعذر منك وناخذ بنيتنا وابنها ونمشي نطلع الولد من السجن يتعذرون منك ونفض السالفه والمشكله كلها
باوع السيد لعمها صفح
سد عينه وزفر نفسه بصوت كاتم عصبيته
فتح عيونه وحجه
_عبد الروؤف :: البنيه ماتطلع من هذا البيت
_قصي :: سيد كعدتها غلط هنا
_عبد الروؤف :: ماكو غلط بكعدتها هنا الغلط بتفكيركم مركزين على العيب وحجي الناس اكثر من اغلاطكم واذيه البنيه
حجه خالها
_:: زين سيد ولو اقاطعك بس شنو الحل وشنو الي تريده انت؟
سكت السيد لثواني
التفت على خالها وحجه
_عبد الروؤف :: تتطلك
انصدمو كل الموجودين بقرار السيد وجوابه
حجه عمها بعصبيه
_قصي :: لا شلون تطلك ماعدنا بنيه تطلك
_عبد الروؤف :: تطلك وحتى بعد ماتطلك ماترجع لبغداد تبقى هنا
صاحت امها
_جنان :: شلون تبقى هنااااا
_عبد الروؤف :: اي نعم بعدها تنسون عندكم بنيه
حجه خالها
_:: شلون تطلك سيد هذا مو حل
_عبد الروؤف :: هذا العندي
_قصي :: واذا رفضنا؟
ابتسم السيد بوجه عمها وحجه
_عبد الروؤف :: تتوقع الطلاق راح يوكف على موافقتكم ورفضكم... لا انا بس اريدكم موجودين وقت الطلاق واريد مسلم موجود
انصدمو اهلها واحد يباوع بوجه الثاني
حجه عمها
_قصي :: سيد بس احنا مانعرف مسلم وين
ابتسم السيد وحجه
_عبد الروؤف :: انا وياك نعرف انت والموجودين تعرفون مسلم وين شارد... اذا تحجي هيج خوفاً عليه مو مشكله انا انطيك كلمه مسلم يجي يدخل لنجف بكل امأن وحرص ومحد يتقرب اله ب اذيه
دنك عمها راسها بحيره هوا والموجودين مايعرفون شيحجون
رجع السيد حجه
_عبد الروؤف :: هاا وصح مو مشكله اذا رفضت وتخوفت على ابنك انا ماعندي مشكله اذا ولدكم الي ب السجون ماطلعو من السجن وانحكم عليهم لان لاتنسى فعلهم جريمه بحد ذاته تهجم ومحاوله قتل وخطف
اباوعلهم وجهم صار اصفر والحيره بوجهم واحد يباوع لثاني
حجه السيد
_عبد الروؤف :: مسلم انا ب امأنتي وبحمايتي يدخل لنجف بسلام وهذا دلهب موجود هوا يجيبه ب ايده
التفتت على دلهب شفته مدخل شفايفه بحلكه هز راسه ب اي وحجه
_دلهب :: اي ليش لا يدلل علينه مسلم وابو مسلم.. شلونك ابو مسلم
_قصي :: هلا بيك
ابتسم يهز راسه
حجت ام مهره
_جنان :: سيد ليش هيج تسوي يعني جاي تحيرنا لو ولدنا لو بتنا
_عبد الروؤف :: لا انا جاي انطيكم اقتراح يفيدكم لو تطلعون ولدكم لو لا
هز عمها راسه بحيرة
وكف السيد الكل باوعله
حجه السيد ناهي الموضوع
_عبد الروؤف :: هذا كل العندي وهاا...
باوع السيد لساعه أشر على الساعه وحجه
_عبد الروؤف :: عندكم وقت ل 12 بليل ترجعون الخبر 12 ودقيقه ما استقبل منكم رد
وكفنا انا والولد ويا السيد
جان كلام السيد مثل الصدمه الهم ماتوقعو هيج راح يصير والسيد يخيرهم بين مهره واخوها وولد عمها
وكفو اهل مهره
باوع عمها لسيد وحجه
_قصي :: زين سيد ومهره وين تروح وشلون تبقى هيج؟
دنك السيد راسه
حجه
_عبد الروؤف :: مهره ماتبقى هيج مهره راح تصير زوجه حفيدي
التفتنا كلنا على السيد بصدمه
باوعت لسيد عاكد حواجبي ب استغراب وصدمه
محد جان متوقع هذا القرار من السيد
طلعو اهل مهره الرفض والحيره على وجههم
مشيت ب اتجاه السيد
حجيت
_مفرقد :: سيد شنو هاي؟
_عبد الروؤف :: شنو
_مفرقد :: لمن... لمنو تريد مهره؟
باوعلي السيد ب ابتسامه
حجه
_عبد الروؤف :: ل ايليا
سكتت صافن بوجه السيد
اجه دلهب ب اتجاه السيد حجه
_دلهب :: سيد شلون تريدني انااا اروح لمسلم واجيبه بسلام وأمان وانا حالف اذا اشوف مسلم اطلع كل سوالفه من ع....
التفتنا على دلهب
صاح فقار
_فقار :: دلهب لسانك
_دلهب :: مادري حبيبي الحجايه طفرت بدون قصد
حجه السيد يباوع لدلهب
_عبد الروؤف :: اي دلهب انت اريدك تجيب مسلم ب ايدك لان بس انت تكدر تأمن عليه
_دلهب :: سيد انا ما اكدر اضمنلك مسلم يجيك بسلام
صفن السيد
باوع لدلهب وحجه
_عبد الروؤف :: تريد العرس ب العيد انت كلت مو؟
_دلهب :: تدلل سيد مسلم ب ايد أمينه محد يكدر يأذي بشعره.. ونرجع ونكول لاتبتزني بعرسي
ابتسم السيد يربت على كتف دلهب
حجه فقار
_فقار :: سيد شلون تريد نأمن على مسلم من الدوله هذا الفعل بحد ذاته مامقبول
_عبد الروؤف :: سيد فقار راح ارجع اكررها الك.. مسلم يدخل لنجف ب أمان مفهوم... !!
......
باوعت لمفرقد خال ايده على حلكه يهز رجليه بقوه عيونه يردن يطلعن من مكانهن
باوعلي وحجه
_مفرقد :: عمه احجي ويااا السيد
_جهاد :: شنو احجي؟
بلع ريكه محتار شيحجي
باوعلي وحجه
_مفرقد :: يعني شلون السيد يقرر يزوج البنيه؟
_جهاد :: اي ليش وين المشكله؟
فتح عيونه بعصبيه واندهاش
حجه
_مفرقد :: شلونننن !!!
_جهاد :: اي عادي ب العكس احسن شي قرار السيد هذا مهره خوش بنيه وين المشكله بقرار السيد
مسح على وجهه
بعد ايده عن وجهه وصاح
_مفرقد :: ليشش ايليا !؟!
رفعت حواجبي كاتمه ضحكتي
حجيت واني اكوم من مكاني
_جهاد :: لان انت رافض فكره الزواج وغضيمر اصغر من ايليا
حجيتها وطلعت من المطبخ الابتسامه على وجهي
طرقت باب المصلى اجاني صوت السيد يسمح الي ادخل
فتحت باب المصلى ودخلت اضحك
باوعت لسيد وحجيت
_جهاد :: هاي شلون صارت؟
_عبد الروؤف :: شلون؟
كعدت كدام السيد الابتسامه على وجهي
_جهاد :: مو جنت رايد مفرقد يعقد على مهره شلون غيرت قرارك وصار ايليا؟
ابتسم السيد وهز راسه
حجه
_عبد الروؤف :: ولحد هاي الحظة الاختيار على مفرقد بس ما اريد انا الي اطلب منه اريده هوا الي يطلب حتى لابعدين يكول السيد اجبرني
هزيت راسي ب اي مبتسمه
باوعت لسيد وحجيت ب استغراب
_جهاد :: رجعولك اهل مهره خبر؟
_عبد الروؤف :: لحد هاي الحظة لا بس انا متأكد راح يرجعولي خبر قبل ال 12
_جهاد :: ان شاءالله خير
استأذنت من السيد وكمت من مكاني طالعه
استوقفني صوت السيد
التفتت عليه
حجيت
_جهاد :: تفضل سيد؟
باوعلي السيد صافن بوجهي
دنك راسه يتحمحم
بلع ريكه وحجه
_عبد الروؤف :: علوية عندي سؤال الج واريدج صريحه بجوابج
_جهاد :: شنو سؤالك سيد؟
رفع راسه يباوعلي بحيره متردد يحجي
حجه
_عبد الروؤف :: الضابط جزام رجع فتح وياي نفس الموضوع... رجع خطبج مني مره ثانيه
بلعت ريكي
رجفه غريبه سارت بجسمي
حجه السيد مكمل سؤاله
_عبد الروؤف :: انا ما اريد اتصرف من يمي وارفض ولا اكدر ارجع الموافقه لان القرار الج... بابا جهاد انتِ موافقه عن الخطوبه؟
دنكت راسي ساكته ماعندي شي احجي
رجع حجه السيد
_عبد الروؤف :: اخذي راحتج ب التفكير علويه عندج وقت ترديلي قرارج
هزيت راسي ب اي فتحت باب المصلى وطلعت من المصلى امسح على وجهي
بليل قبل ال 12 رجعو النا خبر موافقين على طلاق مهره ومسلم نفسه راح يجي يطلكها
ثاني يوم دلهب راح لبغداد يجيبهم تحت حمايته هوا واصدقائه لان مسلم بعدال مطلوب
باوعت لمهره شفتها حاضنه ابنها لصدرها عيونها مدمعه خليت ايدي على كتفها
باوعتلي
حجيت
_جهاد :: محد يكدر يحجي وياج بعد
_مهره :: خايفه
_جهاد :: ماكو خوف بعد صار وقت المواجهة
سكتت تباوع لابنها
مر الوقت واهل مهره وصلو
باوعت اني ومهره والبنات من الكامره
نزلو دلهب ومسلم وعمها قصي وامها من السيارة
طلع السيد يستقبلهم
تقرب مسلم يسلم على السيد ابتعد عنه السيد راد عليه من بعيد
أشر الهم السيد يدخلون
دخلو للبيت باوعت لمهره اشجعها
بلعت ريكها خايفه ومترددة تدخل
باوعتلي وحجت
_مهره :: شلون اذا طالب ياخذ حسن
_جهاد :: مايكدر.. شجعي نفسج ودخلي بدون خوف لاتخليهم يأثرون عليج تمام !!
هزت راسها ب اي ساكته
صاحها مفرقد تدخل ورا للمصلى
دخلت ورا مفرقد مدنكه راسها تواجه اهلها وتطلك من هذا الانسان المجرم...
" مهره "
دخلت للمصلى عيوني ب الارض ماكدرت ارفعهن وماعندي القوة ارفعهن واشوفهم كدامي اخاف منهم لحد هاي الحظة اني خايفه بس ينذكر اسم مسلم كدامي اخاف متذكرة كل الي مريت بيه بسببه
جنت اسمع اصواتهم بس ماعندي الشجاعه ارفع عيوني واشوفهم
حجه السيد عبد الروؤف
موجه كلامه الي
_عبد الروؤف :: رفعي راسج بابا مهره
رفعت راسي بخوف وتردد صارت عيوني بعين مسلم شفته خازرني عيونه حمر يردن يطلعن من مكانهن
باوعت لامي شفتها هم خازرتني تريد تفترسني
حجه السيد عبد الروؤف
_عبد الروؤف :: اشمر يمين الطلاق مسلم
باوعلي مسلم وحجه
_مسلم :: مهره انتِ طالق طالق طالق...
كلماته هاي جانت مثل حال السجين من يفتحوله باب السجن ويكلوله انت حر هيج حالي ساعتها
محد حجه من اهلي ولا حتى مسلم السيد عبد الروؤف جان محذرهم وخالسهم
طلعو من البيت بعد ما طلقني جاي اطلع من المصلى سمعت السيد عبد الروؤف حجه
_عبد الروؤف :: خلي دلهب يسلم مسلم لدوله
_فقار :: سيد بس احنا انطيناهم كلمه؟
_عبد الروؤف :: اي كلمتنه جانت يدخل لنجف بأمان وتحت حمايتنا بس ما اذكر كلت يطلع من النجف ب أمان؟
عرفت السيد لعبهم ولعب مسلم
وبنفس اليوم عرفت القضو القبض على مسلم وسجنو وهنا جانت فرحتي ماتوصف السيد ماطل اهلي هواي حتى محمد والولد ماطلعهم من السجن الى بعد ما أدبهم وسوالهم جره اذن
رجعت لبيت ام راجحه صح السيد عبد الروؤف ماجان موافق بس اني اصريت ارجع لان ماعرف اتأقلم ببيت السيد
" قس "
بدت ايام شهر رمضان وهذا رمضان قدس مو ويانا
جنت صافنه متذكرة ايامنا وشلون جنه نخلص رمضان
كسرت صفنتي اباوع لنضال
جانت كاعدة على القنفه تباوع النا بخجل مترددة تحجي الكل جان موجود عمي وقمر وابتهال مجتبى وباسم وقاسم ونسوانهم
حجت نضال تفرك ب ايديها
_نضال :: عندي الكم خبر حلو
التفتنا كلنا عليها منتضريها تحجي خبرها الحلو
ابتسمت وحجت مدنكه راسها
_نضال :: اني حامل
كلمتين نطقتهن نضال جانت كفيلة تنزل علينه مثل الصاعقه
صرنا واحد يتلفتت على الثاني
فتحت قمر عيونها بصدمه تباوع لعمي
الي جان مو اقل صدمه من قمر يباوع لنضال بدون مايرمش
صاحت ابتهال بصدمه
_ابتهال :: شنووووو
_مجتبى :: شلون يمه ليشششش... كولي جاي اتشاقه وياكم يمه
_نضال :: لا ماجاي اتشاقه وياكم هذا موضوع مال شقهه؟؟؟
خلت ابتهال ايدها على راسها
_ابتهال :: ليش يمه ليشش
_مجتبى :: شلون اخلي عيني بعين أصدقائي؟
صاحت نضال بعصبيه
_نضال :: ولد الجلب منين حامل انا غير من ابوكممم
_قس :: هياااا هاي المشكلة
التفت عمي يباوعلي بعصبية
رجع باوع لنضال وحجه
_محمد :: نضال احجي بدون شقه صدك حامل؟
_نضال :: لا جاي اتشاقه وياكم بس شنو رأيكم احمل صدك؟
_قمر :: يااا غيوره غرتي لانو انا حامل
وكفت نضال تباوع لقمر خازرتها
_نضال :: ليششش عيني الحمل بس الججج صار
_قمر :: ما انتي ختيرتي وصرتي كبيرة على الحمل
_نضال :: سكتي لج بعدني صغيره... شتكول محمدد
وكف عمي محمد يباوع لنضال ب ابتسامه
_محمد :: لا شلون بعدها صغيره ام مجتبى
حجاها ومشه يبوس نضال
كامت قمر من مكانها داخله لغرفتها بعصبية
باوعت لنضال جانت فرحانه ومبتسمه
ابتسمت لابتسامتها جنت متوقعه نضال وكفت انتاج لان صارت جبيرة بس لا نضال طلعت مستمرة ب الإنتاج وتريد تحمل الحمدلله طلعت تشاقه لان مستحيل اتحمل طفل ثاني من نضال
كمزت من مكاني متذكرة
ركضت اصعد الدرج ب اتجاه غرفتي
فتحت باب الغرفه ركضت على التلفون
فتحت التلفون اشوف اذا رد لو بعده
ابتسمت من شفته رد
دخلت على المحادثة جان كاتب
_💬 : هلا بيك... الحمدلله انا بخير وانت شلونك؟
رديت عليه
_💬: هلا بسيد معراج.. الحمدلله انا بخير دام انت بخير
نمت على الجربايه الابتسامه بوجهي
بنفس الثانيه رد علي
_💬: يا غالي.... البارحه بالي ضل يمك اختفيت ومارديت بعد؟
كتبت اله
_💬: هاا. اي مو النت فصل ونمت
رجع رد علي وهيج استمرينا نتراسل الى ان استأذن يروح لشغله
قفلت التلفون وكعدت مبتسمه
هاا اي صح نسيت اكلكم من مده بديت اتواصل ويا السيد معراج هوا مايعرف اني قس ولا يعرف اني انثى لان اعرف راح يتكهرب من يعرف بيه بنيه
لا يعرفني ب اسم عز الدين صديق اله
شايفني بصورة مجتبى ابن عمي لان ماشايف مجتبى بس ماسامع صوتي وكل مايكول تعال اتصل عليك اطلع عذر وينسى السالفه
مر الوقت الى ان اجه موعد الاذان نزلت اباوعلهم فارشين السفره ينزلون الاكل
باوعتلي نضال وصاحت
_نضال :: يا هلا بقس شنو جنتي صاعده بالسطح تأذنين
_قس :: هاا شنو
_ابتهال :: شنو ست قس مانشوفج بس ب الفطور قبل الفطور تختفين
وكفت على الدرج
باوعتلها وحجيت
_قس :: اي حبيبتي اتعبد غير
هزت ايدها ومشت تدخل للمطبخ
نزلت الدرج بسرعه اركض للمطبخ
باوعتلي نضال صاحت
_نضال :: ها شعجب دخلتي للمطبخ
_قس :: سودة عليه اساعدجن مبين عليجن التعب
مشيت اخذت ب الصحونه
باوعت وين الصحن الزين المتروس اكل
اخلي على صفحه واخذ الباقي للسفره
الصحونه الزينه هاي الي اخليهن يمي والباقي الهم بعد كلمن يحتار ببطنه
كعدت على السفره نضال تباوعلي بخزرة
_نضال :: ما تبطلين طبعج
ستت مغلسه اكل
مشت ابتهال تجيب الكلاصات
واحنا ناكل
كمزت على صوت تكسير التفتت شفت ابتهال واكفه بباب المطبخ تباوع لنضال بخوف الكلاصات مكسورة
باوعتلها نضال بخزرة عيونها يردن يطلعن من مكانها لان الكلاصات جديدات الضهر اشترتهن
اشرت نضال لابتهال
_نضال :: شيلي الكزاز وجيبي غير كلاصات وتعاي تفطري عندي وياج سالفه بعد الفطور
_علي :: الله بيبي راح تكتلها
خزرت ابتهال علي ومشت تشيل الكزاز
رجعت اكل مركزة ب الاكل
كعدنا نتفطر
حجت قمر بحماس تباوع النا
_قمر :: بتعرفو شووو انا قررت؟
_محمد :: شو.. اقصد شنو؟
_قمر :: ههه ياحبيبي انت.. ااي انا قررت اذا الله رزقني ببنت اسميها اسيا
باوعتلها الاكل بحلكي مالحكت احجي ونضال سبقتني
_نضال :: اي عفيه بيت ابو شريحه نصير خوش اسم
_ابتهال :: شركه اسيا كل شهر تحول النا رصيد
هزت قمر ايديها ب انزعاج
ما اهتمت للحجي وبقت مصرة على اسم اسيا
" عاتكه "
اخر ايام رمضان بدينا اني وشاهيناز ومهجان نجهز ونشتري اغراض العرس لان يصادف رابع يوم العيد زواجنا اني وتجي وراي شاهيناز ومهجان
جنت فرحانه للعرس وبنفس الوقت زعلانه راح اترك بيت السيد والنجف وامشي لبغداد
ما اعرف شلون راح اتحمل هذا البعد
كعدت على الدرج ايدي على خدي اباوع للبيت الدمعه بعيني
شلون راح اتحمل اكعد وماشوف السيد كدامي وهوا واكف ب المطبخ يحضر الريوك لان ما انطاه كلبه يكعدنا ويكسر نومتنا
شلون اتحمل ماشوف خواتي المحسنات كدامي وانطيهن كل يوم درس
شلون اتحمل ابعد عن اخواني فقار ومفرقد وايليا وغضيمر؟
شلون اتحمل ابعد عن امي وابوي والعلوية زهراء وعمتي جهاد؟
شلون اتحمل ما اصلي ب المصلى
زين واذا صار عندي سؤال؟
جنت اركض للمصلى اذا شفت السيد اطرح عليه السؤال واذا ماشفته ابحث ب الكتب الموجودة
اتحسرت واني اشوف شريط الايام يدور براسي جمعتنا اني والبنات سوالفنا وضحكنا
مادري شلون راح اتحمل..
كمت من مكانى ماشيه ب اتجاه المصلى السيد صاحني
شفت البنات كلهن متجمعات ب المصلى
عمتي والعلويات الكبار كذالك موجودات وحتى حفيدات العلوية لباب
باوعت لسيد شفته كاعد بنص المصلى كدامه مجموعه من علب الهداية الصغيره
باوعلنا السيد وابتسم
_عبد الروؤف :: اليوم اريد اهدي لورداتي هديه مني وذكرى للعمر
حجاها وفتح اول علبه
وكف يباوع للعلوية لباب
ابتسم ب ايده العلبه
_عبد الروؤف :: اول هديه لاختي وامي لباب
ابتسمت العلوية لباب تباوع للعلبه عيونها مدمعه
فتح السيد العلبه طلع منها كلادة ناعمه من الذهب اهداها للعلوية لباب
حضنته العلوية متشكرة منه
رجع السيد اخذ العلبه الثانيه للعلوية زهراء وهم جانت كلادة بنفس الشي والنقشه
العبه الثالثه لعمتي والرابعه لامي ونسوان عمامي
وزع علينه السيد هدايانا وجانت من نفس الكلادة
حتى حفيدات العلوية لباب اهداهن نفس الكلادة
باوع النا السيد مبتسم
_عبد الروؤف :: هاي ذكرى مني ب اليوم الراح اروح بيه لدار حقي اريد هاي الكلادة تذكركم بيه
دمعت عيوني بمجرد ما اتخيلت فكره السيد يروح ويبتعد عنا
كلها بجت وانقهرت من كلام السيد محد بينا يتحمل هاي الفكره ومستحيل نفكر بيوم نستوعبها
قرر السيد ب العيد يجمع كل الاحبه نعيد سوا ونحتفل وهاي من الخصال الي احبها ب السيد
يحب يشوف كل الي يحبهم متجمعين بمكان واحد يحب يجمع الكل ويشوف الكل كدام عيونه
بدينا نجهز للعيد وللجمعه الي راح تصير ب العيد
الكل جان فرحان محد جان يدري هاي اخر ايام فرحنا وهذا اخر عيد نفرح بيه ماجنت اعرف الاعياد القادمه راح تصير ذكرى حزينه تمر علينا.....
" صفيه "
اليوم اول يوم عيد جنت فرحانهه ومتونسه مو لان عيد لاا لان راح نروح لبيت السيد عبد الروؤف
حجيت بفرح اصفك ب ايدي
_صفيه :: كلش متحمسه يمتى نوصلل
باوعلي دلهب من مرايه السياره عكد حواجبه وحجه ب استغراب
_دلهب :: شنو سر هاي الفرحه
_صفيه :: مو راح اشوف عاتكه والعلويات طبعاً افرح
_دلهب :: اها.. صفصف اريدج هادئه وحبابه بيت السيد عبد الروؤف مو مثلنا ولا مثل طبعنه يحبون الهدوء والثكل
التفتت امي على دلهب تباوعله صفح
حجت
_وفاء :: ليش احنا شبينه؟
_دلهب :: دايحين احنا
_صفيه :: ولا يهمك دلهوبي اطمأن اني تربيتك ماراح اخيب ضنك
حجت امي
_وفاء:: هيا المشكلة لان تربيته
_دلهب :: لا تلجميني هيج
ضحكت عيوني على الطريق
كمل دلهب سياقه لنجف
جنت متحمسه واحسب دقيقه دقيقه يمتى نوصل
مر الوقت بين صفنتي وبين سوالف امي ودلهب
وصلنا لنجف اخيراً..
وكفت السياره كدام بيت السيد عبد الروؤف
نزلنا من السياره
طرقنا باب البيت
طلع السيد فقار يستقبلنه
دخلنا للبيت تحت ترحيب السادة
دخلنا جوا اني وامي ودلهب للمصلى عايدت العلويات وجنت كلش مرتاحه وياهن ومتأقلمه
جانن خفيفات على الكلب يجبرن المقابل يحبهن ويرتاح وياهن
كعدنا امي ويا العلويات الكبار واني والبنات صعدنا لغرفه عاتكه
استأذنت منهن ونزلت جوا ادخل للصحيات رغم اكو فوك صحيات بس جنت رايده انزل حتى اخذ المكياج من جنطه امي
دخلت لصحيات عدلت مكياجي ورتبت نفسي ومن اكول بمكياجي ماقصد المكياج الي ابالكم لا شي بسيط كلش صح فكرته غلط وخاصاً ببيت السادة بس اني ارتاح هيج ماكدر اطلع بدون مكياج
جنت واكفه ب الحمام احجي ويا امي
صارت عيوني على الكامره شفت السيد غضيمر مشه ب اتجاه الحديقه يدخل
ابتسمت اباوع للكامره
استأذنت من ام عاتكه ادخل للحديقة
باوعتلي وابتسمت
_رقيه :: عادي حبيبتي البيت بيتج اخذ راحتج
ابتسمت بوجهه ومشيت ادخل للحديقه من باب المطبخ
دخلت بهدوء اباوعله من بعيد جان واكف صافن على الحديقه
جان منطيني ضهره ماشافني من دخلت
وكفت ورا فتحت تلفوني اصورة بسرعه وهوا واكف
صورته ومشيت ب اتجاهه فاتحه التلفون على الصورة
حجيت اباوع لصورة
_صفيه :: كلش حلوة هاي الصورة انشرها عندك
اباوعله كمز من مكانه مصدوم بدخلتي
التفت يباوعلي ب صدمه واستغراب
باوع لصورة ورفع راسه
عكدت حواجبي ب استغراب
_صفيه :: شبيك سيد؟
_غضيمر :: شنو شبيك غير صدمتيني وبعدين شنو هاي الصورة مصورتني بدون أذني !
_صفيه:: هاي ليش تصيح؟
زفر بعصبيه يمسح على وجهه
كتفت ايدي لصدري وحجيت
_صفيه :: واذا صورتك انت مو تنشر صورك على النت !!
_غضيمر :: اكو فرق !!!
_صفيه :: لا ماكو فرق بس لان انت تكرهني هيج تسوي
حجيتها وكلبت بوجهي بزعل وعصبيه
فتح عيونه ب اندهاش وصدمه
دار وجهه عني يباوع لبعيد
حجه بتردد الكلمه كوا تطلع من حنجرته
_غضيمر :: ماكرهج خوية منين جبتي هذا الحجي
_صفيه :: لاتكرهني.. وبعدين لاتكلي خوية منين اجيت اختك ماتذكر امي شالتك ببطنها 9 اشهر ! !
رجع فتح عيونه بصدمه من جوابي
غمض عيونه بحيره
حجه
_غضيمر :: خويه والله وكفتنا هنا غلط
_صفيه :: ليش ترا مامسوين شي؟
_غضيمر :: مو شرط نسوي بس تبقى هاي الوكفه مامقبولة عدنا
رفعت اكتافي بعدم اهتمام وحجيت
_صفيه :: انت تخاف
_غضيمر :: اناااا ماخاف انا اخاف عليج لا تجيج حجاية لو اخوج يزعل منج
سكتت اباوعله شوي وينفجر ماعرفت هاي عصبيه لو انزعاج وحرص
هزيت راسي ب اي
مديت ايدي بجيب الملابس طلعت منها جكليته من الجكليت الكويتي اليجي غلافه اصفر واحمر شفاف
باوعتله وحجيت
_صفيه :: هاي الجكليته الك
باوع لجكليته ب استغراب
أبتسمت بوجهه وحجيت
_صفيه :: هاي الجكليته جبتها من بغداد لنجف حتى انطيك ياها جنت ضامتها الك
حسيته هدء بشغل غريببب صار يباوع لجلكيته صافن عليها وهيا ب ايدي خليتها بوجهه حتى ياخذها مني فتح ايده نزلتها على ايده من بعيد والتفتت امشي
قبل لا ابتعد التفتت عليه وحجيت
_صفيه :: ترا اني بطبعي اكره الزلم ما احب بس اخواني بس انت عكس الزلم ماكرهتك
حجيتها وطلعت من الحديقه
" قس "
نزلت من السياره عيوني على بيت السيد
التفتت على نضال وعمي محمد نضال ايدها ب ايد علي ابن باسم
مشه عمي كدامنا يطرق باب البيت
واحنا خلفه
انفتح باب البيت طلع السيد مهدي ابو عاتكه مبتسم بوجه عمي
سلم عليه وعايده دنك راسه سلم علينه وعايدنا
أشر النا ندخل للبيت
دخلنا والسادة بدو يطلعون يرحبون بينا
الابتسامه شكت وجهي ساعتها واني اشوفهم شلون يتسابقون ب السلام و الترحيب
دخلنا اني ونضال لصاله استقبلتنه العلويه لباب وزهراء ب ابتسامه
ياخي مادري هاي العائله منين مخلوقين سلامهم حارر وترحيبهم جبير كل الي يشوفنه يجي يركض يسلم بكل حب وحنان
احسهم عائلتي وعايشه وياهم عشره عمر على حبهم هذا
انفتح باب غرفه العلوية جهاد اباوعلهم طلعت من الغرفه الابتسامه شاكه حلكها فتحت ايديها مشيت ب اتجاهه
اخذتني بحضنها تبوس بيه بفرح عايدتها واني مبتسمه لابتسامتها
رجعت كعدت بمكاني
صعدت ام الحسن تصيح البنات
نزل ورا شوي البنات يتراكضن بفرح
نزلت قدس شايله ب ايدها فاطمه الزهراء جانت لابسه فستان ابيض الكشخه يمها وبس
سلمت على البنات واخذت فاطمه ب ايدي ابوس بيها
كعدت على القنفه عيوني على ايدين فاطمه اصابعها محنايه حنه وبصبعها الصغير خاتم صغيرون يجنن جاي ويا ايديها كزكزت عليها من شفت هل ايادين والكشخه
اباوعلها خدودة سمان وحمر
فاطمه حليوة تضحك وتفرح من تشوف واحد يضحك وياها تخلي صبعها بحلكها وتضل تصيح بفرح تخلي الموجودين يتعاركون عليها
طلعت من المطبخ خلود باوعتلها ب ابتسامه
باوعتلي تضحك كمت من مكاني مشيت ب اتجاهه حضنتها اسلم عليها واتعايد وياها
باوعتلي وضحكت
_خلود :: شوف الكشخه يابه
_قس': بس عينج لاتحسديني
ضحكنا ورجعت كعدت بمكاني
الحلو هنا الكل موجود حتى حفيدات العلوية لباب
بس وجه واحد ماجان مقبول بهاي الكعدة
عرفتوها اكيد؟
دخلت لصاله باوعتلنا حجت من بعيد من ورا خشمها
_سهام :: هلاو... كل عام وانتِ بخير قس يوم الرجل
_قس :: عيوني سهام يوم الحج ان شاءالله السنه الجايه واكفه كدام جبل عرفه تشوفينه وترجعين من بعيد
هزت ايديها ماعاجبها ومشت تطلع من المطبخ
باوعتلي شاهيناز بفرح ضربت على رجلي وصاحت
_شاهيناز :: ليش تكولين ماجي هاا هااا هااا
_قس :: ها خوتي ها
_عاتكه :: هاا
_قس :: كل عام وانتن بخير
_مهجان :: حبيبتي
رجعنا وكفنا مره ثانيه نتسالم ونتباوس
رجعنا كعدنا بمكانه نسولف
انتبهت على صفيه اخت دلهب طلعت من المطبخ مبتسمه بفرح
اجت ب اتجاهي وكفت اسلم عليها
همست ب اذنها
_قس :: هاي الضحكه مال مصيبه
_صفيه :: ههههه حصرت السيد غضيمر ب الحديقه
رجعت اكعد مبتسمه كوا كاتمه ضحكتي كعدت صفيه تضحك ويا البنات تضيع سالفتها
مر الوقت بين السوالف والضحك
صار موعد الغده تغدينه وتجمعنا ب الحديقه لان السيد طلب الكل يتجمع
تجمعنا ب الحديقة الكل موجود العلويات والسادة والكل
جان السيد واكف بنص الحديقة طلع من جيبه مجموعه ظروف بيض
سوا مثل المسابقه لصغار الي يجاوب ينطي ضرف
كل اطفال السادة جانو متفاعلين ويتجاوبون ويا السيد بس علي ابن باسم ساكت يباوعلهم من بعيد
باوعله السيد اشرله يجيه
مشه علي لسيد اخذ السيد ب ايد علي باسه من راسه
وحجه
_عبد الروؤف :: يلا علي حبيبي اقره النا سورة الفاتحه حتى تاخذ جأزتك
ابتسمت اباوع لعلي اريد اطلع من المكان واضم روحي لان متأكدة علي راح يمسلت ويسوي فد حركه
التفتت علينه قدس باوعتلنا مبتسمه أشرت على علي وحجت تباوع للبنات
_قدس :: ابن اخوي هذاا ابن اخوي
باوعت لعلي ايدي على عيوني
صاح بصوت عالي
_علي :: اعوذ ب الله من الشيطان الرجيم
ورده حمره وكلب الحب حبنا يبقى وللابد
صوتك همسك ونبض الكلب وانا الك بعد وبعد
اباوع الكل صفن على علي قدس على وكفتها مبتسمه بس بصدمه ونضال ادور بوجهه يمنى يسرى
صاح علي يهز بروحه
_علي :: 1 2 3 ناري ناري حبك ابد ماطفى ناري ناري مشتعل شوك ووفا
السيد على وكفته وابتسامه
بس جان مصدوم من غدره علي وسالفته كلهم ضحكو على موقف علي
حجه السيد فقار
_فقار :: اتعوذ من الشيطان وغنى
مسح دلهب على وجهه يضحك
_دلهب :: ابليس اول صدمه اخذها بعد انقطاعه بشهر رمضان هاي الصدمه
_ايليا :: استهضم وحزت بخاطره
ضحكو السادة ومن بينهم السيد عبد الروؤف
باس علي براسه وانطاه الظرف ابتسم علي ورجع لنضال مبتسم
باوعتله نضال ب ابتسامه حجت بهمس
_نضال :: اتونس بيبي وحضر لحم جسمك بس نرجع للبيت اعلسك بسنوني
وكف السيد يباوع النا
حجه ب ابتسامه
_عبد الروؤف :: هسه صار وقت عيديه ورداتنا
حجاها وطلع من جيبه سفطه 25 صارو الولد والسادة خلفه كلهم طلعو من جيبهم سفطه 25
صاح السيد لعاتكه
مشت عاتكه ب اتجاه السيد انطو السادة الكبار لسيد عيدياتهم
انطه فقار ٢٥ لسيد وايليا وغضيمر ومفرقد والسيد جادح والسيد غضنفر وغل ودلهب كلهم نفس الشي
كل ماتتقرب وحدة من العلويات يجمع السيد عيديتها من الباقين
وكفت اني وصفيه صافنات عليهم
حجيت
_قس :: ايدي حكتني وضغغطي صعد
_صفيه :: السكرر السكر صعد عندي
التفت السيد علينه ب ابتسامه
أشر النا اني وصفيه نتقدم بقينا اني وصفيه وحده تباوع بوجه الثانيه خجلانات
نستحي نتقدم
اخذ السيد عيديتنا من السادة وهما انطوها ب ابتسامه ابد ما استثقلو وكالو هذن مو من عدنا
اجه ب اتجاهنا
باوعلنت مبتسم
_عبد الروؤف :: مكانجن هنا مثل حفيداتي ماريد خجل هنا انتن بين اهلجن
حجاها وسلمنه الفلوس شكد رفضنا اني وصفيه ناخذ الفلوس بس السيد جان مصر وكال ازعل عليجن اخذنا الفلوس مستحيات كوا صارن ب ايدينا
اخذناهن وتشكرنا من السيد
اجه دلهب اخو صفيه يباوع لصفيه بنص عين
حجه
_دلهب :: ب الجذب كولي ماريد سيد استحي رفضي بسرعه خليتهن ب ايدج
خلت صفيه ايدها على صدرها فاتحه عيونها بصدمه
_صفيه :: شلون ماشفتني من رفضت بس السيد أصر اخذهن الى اني تدري بيه دلهب اخجل اخذ فلوس من احد
هز دلهب راسه ب اي يباوع لصفيه صفح
هوا لو بايع ميانه وياي جان رزلني ويا اخته بس الحمدلله يستحي مني
حتى فاطمه الزهراء انطوها عيديه وجانت ماخذه اكبر حصه من العيديه لان السادة الكبار اهدوها تراجي ذهب
رجعنا دخلنا لصاله نسولف متجمعات مرة ثانيه
كمت من مكاني عطشانه ماي
دخلت للمطبخ اشرب ماي
اخذت الكلاص ووكفت اشرب من البراد
سمعت صوت طرقات على باب البيت
صارت عيني على الباب من بعيد جان شباب المطبخ يطل على الباب هذا
طلع السيد فقار يفتح الباب
فتح باب البيت عيوني جانت على الباب
نزلت الكلاص من حلكي ارمش بصدمه واني اشوف الي جان واكف
مشيت ب اتجاه الباب اركز اكثر احاول استوعب اني جاي اشوف منو !!!
ابتسم السيد فقار وصاح بفرح
_فقار :: لكك معراج هاي يمتى اجيت !!!!
ابتسم السيد معراج يعدل بنظراته جان واكف لابس بنطرون اسود وقميص نيلي الجنطه ب ايده
يباوع لفقار ب ابتسامه...
......
