رواية جثة نادية الفصل الرابع بقلم محمود الأمين
_صلاح اتقتل يا باشا، المساجين بيقولوا انه اتخانق مع واحد وهو اللي عمل فيه كده، ضربوا بآلة حادة في بطنه
= ازاي يا حسن؟... ازاي المتهم يدخل جوه الحجز ومعاه آلة حادة، اللي حصل ده تهريج انت عارف يعني ايه صلاح مات يعني احنا مش هنعرف نمسك اي دليل على اللي اسمه راجح ده
_ ازاي يا فندم؟.. هو مش صلاح حكالك كل حاجه؟
= لا يا حسن، صلاح كان مخبي سر عن الاستاذ ساهر اللي في غيبوبه دلوقتي في المستشفى
...
اول ما قولت كده، عرفت دلوقتي ان الدور على ساهر، اكيد راجح هو اللي ورا اللي حصل لصلاح في الحجز الموضوع اكيد مش صدفه، واكيد دلوقتي هيحاول يخلص من اخوه عشان يكتم على السر اللي عنده، انا لازم اكون اسرع منه
بس قبل ما اخرج، لقيت في ناس داخله من باب الشقه كان واضح انه البواب بتاع العمارة ومعاه الجيران واول ما شافني إتكلم وقال
_ انت مين يا جدع انت ودخلت هنا ازاي؟
= انا المقدم كرم، انت مين؟
_ عدم المؤاخذه سعادتك، اللي ما يعرفك يجهلك، انا عبد التواب البواب بتاع العماره دي بس قلقت لما لقيت شقه الاستاذ ساهر مفتوحة، اصل انا عارف ان هو في المستشفى في غيبوبة فقولت أكيد رجع
= انت تعرف الاستاذ ساهر كويس؟
_اومال يا بيه، ده عشره عمر ربنا يقومه بالسلامه يا رب
= طيب طالما تعرفوا كده، تعالى معايا مشوار
_ على فين يا بيه، انا ماسك العماره دلوقتي وما ينفعش اتحرك، وبعدين انا ما عملتش حاجه
= اتحرك معايا، انا مش فاضل الكلام ده ده لو كنت عاوز تنقذ الاستاذ ساهر
_ حاضر يا بيه حاضر
...
خرجت ومعايا عبد التواب البواب، ركبنا عربيتي واتحركنا بسرعه على المستشفى اللي فيها الاستاذ ساهر، وفي الطريق بدات اتكلم مع عبد التواب وعرفت منه معلومة خطيره جداً
_ انا لما دخلت شقه الاستاذ ساهر، لقيت جوه صوره كان فيها هو وبنت صغيره، هو الاستاذ ساهر كان عنده عيال
= كان عنده بنت صغيره، اتخطفت من زمان واللي خطفها ما اتصلش بيه ولا حاول يتواصل معاه
_ غريبه دي، اكيد اللي خطفها ده ما كانش عرضه فلوس بقى
= مش عارف والله يا بيه، بس هو بعدها سافر بره ولما رجع كان باين عليه التعب لحد ما في يوم لقيت الاستاذ راجح اخوه جاي ومعاه ناس شكلها غريب لابسين لبس مستشفى، واخدوه معاهم ووقتها عرفت ان المستشفى دي مستشفى المجانين
_ طيب الاستاذ ساهر، كان فعلا مجنون يعني تصرفاته كانت تدل على ده
= لا يا بيه نهائي، ما كانش بتدل على الكلام ده خالص
_ تمام يا عبد التواب
...
وصلنا المستشفى وكنت متوقع ان راجح حاول يقتل اخوه زي ما قتل صلاح، لكن لقيت الدكتور بيقولى
_ ابن حلال يا باشا كنت لسه هكلمك، الاستاذ ساهر فاق من الغيبوبة بس افضل انك تيجي بكره تتكلم معاه، حالته دلوقتي خطيرة
= تمام يا دكتور الف شكر
...
رجعت عبد التواب مكانه، ورجعت انا على المديرية طبعا الدنيا كانت مقلوبه بسبب قتل صلاح، والواد اللي قتله كان مشرف في مكتبي
_ اسمك ايه يلا؟
= اسمي زكريا بس بيقولولي يا سكة
_ سكة اه، ومين اللي بعتك تقتل الواد اللي في الحجز
= ما حدش يا باشا، مشكله عاديه بيني وبينه بس هو كان مصمم يتغابى فاخد اللي في النصيب عادي يعني
_ وحياه امك، انت هتصيع عليا يلا، انطق والا قسما بالله لاجيبلك اعدام في القضيه دي، صدقني
ما حدش هينفعك، ولو حد وعدك بحاجة مش هيقدر يعملها طول ما انا اللي ماسك القضيه
= يا باشا انا قولت اللي عندي
...
ما قدرتش امسك نفسي، نزلت ضرب فيه ولولا حسن كنت خلصت عليه خالص، لكن طلع بيجي بالضرب واتكلم وقال
_ خلاص يا باشا هقول، اللي طلب مني كده واحد اسمه راجح، المشكله اللي حصلت قدام المديرية كانت مترتبة عشان يتقبض عليا وادخل الحجز وانا اللي افتعلت المشكله معاه عشان اخلص عليه
= انت هتقول الكلام ده قدام النيابة بكرة ولو عقلك وزك تغير اقوالك هوريك الوش التاني فاهم يالا
_ فاهم يا باشا
...
اخدت اقواله في محضر رسمي، بس كان لازم افهم الحكايه كلها وعشان كده تاني يوم رحت على المستشفى وقابلت الاستاذ ساهر، المره دي صحته كانت احسن واتكلم وقال
_ خليني اتكلم على طول عشان الوقت مش في صالحي، انا كان عندي بنت اتخطفت وهي لسه صغيرة وكنت فاكر اللي خطفها هيتصل بيا ويطلب فدية زي ما بيحصل في الافلام، لكن ده ما حصلش سافرت بره للعيلة انا من عيله كبيره بس مش فاضل فيها غير اخويا ومراته اللي هي اصلا بنت عمي، كنت مكتئب ومش عارف ازعل على مراتي اللي ماتت ولا بنتي اللي اتخطفت لحد ما قررت ارجع مصر، كنت معدي على اشاره المرور بالعربيه وشوفت بنت صغيرة مش عارف ليه قلبي كان بيقول ان دي بنتك، اتكلمت معاها كتير يومها بس لما حاولت اخدها معايا رفضت، رحت واتكلمت مع اخويا وكنت فاكر انه هيقف جنبي
بس هو قال ان ده كلام فاضي ورفض يصدقني ويساعدني، كنت كل يوم بروح اقف فى اشاره المرور
بتفرج عليها وهي بتبيع مناديل وفل، بس ما كنتش اعرف ان اخويا مراقبني
وفي يوم كنت قاعد في البيت والباب خبط ولما فتحت لقيت اخويا ومعاه ناس شكلهم غريب عني لقيتهم بيكتفوني واخدوني على المصحة، ولقيت نفسي قاعد بتعالج من الجنان باخد ادوية وانا اصلا مش عيان بس قدرت اهرب من هناك، وطبعا المصحة اكيد بلغت راجح، بس ما كنتش اتخيل ان راجح بنفسه هو اللي يخبطني بالعربية ويسيبني ويهرب وكل ده ليه؟... عشان ابويا الله يرحمه كان كاتب كل حاجه ليا، عشان اخويا ما كانش كويس معاه وانا عارف ان ده غلط وما كانش عندي مشكله انه ياخد نصيبه بس هو عمره ما طلبه مني، خطف بنتي ورماها في الشارع وخلاني مجنون مره وحاول يقتلني مره رغم اني معايا ورق في خزنتي يوديه في 60 الف داهيه لكن عمري ما فكرت زي ما هو فكر
ولما قريت خبر وفاه بنتي في الجرايد، عرفت ان هو وصلها وقتلها كنت عايز اقابلك عشان احكيلك، وتاخد الورق اللي في الخزنة عشان حتى لو فلت من تهمة القتل ما يفلتش من تهمة التخابر مع دوله اجنبيه ايوه اخويا خاين لبلده وبينقل اسرار مهمه لبره
...
بعد ما خلص الاستاذ ساهر كلامه، رحت على شقته واخدت كل الاوراق من الخزنة، الاوراق اللي كانت كارثه حرفيا تودي راجح ده ورا الشمس
طلعت على طول على مكتب النائب العام ومعايا الورق اللي يثبت إدانة راجح وطلع امر بالقبض عليه
وطبعا لما وصل المديرية واتواجه باعترافات الواد سكه وكلام اخوه انكر كل حاجة، لكن لما إتوجهله تهمه التخابر بالادلة انهار وما قدرش ينكر واعترف بكل حاجه
_ انا كان كل همي الفلوس، بعد ما ابويا حرمني منها وكتب كل حاجه لاخويا، كنت هشحت وموضوع اني اروح اطلب منه كانت اهانه بالنسبالى انا بعترف ان انا اللي قتلت ناديه بعد ما اتاكدت انها بنت اخويا فعلاً حقنتها بسم المفروض اعراضه ما تظهرش، وقتلت صلاح قبل ما يتكلم ويحكي اللي عنده
اما بالنسبه للتخابر، فالناس دي اللي بسببها انا بقيت راجح بيه، انا بقي معايا فلوس بسبب الناس دي فلوس ما تتعدش بقيت ملياردير حرفيا بس
ما كنتش عارف انه هيجي اليوم اللي هتكشف فيه
...
بعد الاعترافات اتحول راجح للنيابة ومن النيابة للمحكمة ومش هو لوحده معاه مراته كمان مدام سمر، اللي اعترفت هي كمان انها كانت شريكه في قتل نادية
واكتر حاجه طفت ناري وانا سامع حكم القاضي وهو بيأمر بتحويل اوراقهم الى فضيله المفتي، كانت هي اللحظة اللي حسيت فيها بالانتصار وكفايه الفرحة اللي كانت في عينين الاستاذ ساهر اللي اخد حق بنته من واحد المفروض انه اخ
لكن للاسف ده الواقع واللي ما فيش هروب منه أبداً.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
