رواية السكن الفصل السادس بقلم غدير الحيدري
ارجوك
دعني اضيعُ قليلا
بين دنيا لم تحترم احلامي
وعالم لم يفقه اين انمى
بين لوم و لؤم
اين انا؟
ارجوك
دعني اتلاشى لا داعي لأن تفهم المعنى
......
من طفولتي وانا اسمع خطابات كراهية
ما كنت اعرف احدد ماهيتها
لكن كنت احس بشعور سيء وانا اسمعها
كان قتال بالالسن والافكار
ايهما افضل؟
روح الله ام خاتم انبياء الله
ايهما اجدر بأن يتبعهُ الخلق؟
المعجزة التي وضعت ببطن مريم العذراء
وتجسدت لنا بشرا
ام نبيٌ ارسله الله للعالمين وانزل على صدره قرأنا عربيا كي لا يظلون!
الاثنان يحملان رسالة الله
لما الكراهية!؟
من سنين طويلة
وقبل ان اولد
كان للمسيح جيرانٌ مُسلمين
كانوا يتعايشون رغما عن الأختلاف
يهنئون بعضهم البعض بالاعياد
ويواسون بعضهم حين تهب رياح الاحزان
حتى قرر الحب أن يجد مكانه بين قلبين
رجل مسلم و إمرأة مسيحية
وعندما علم الأهل بذلك
زادوا الجدار الواقع بينهم طابوقا
ليرتفع علوا دليلا على القطع والنزاع
اغلقوا الابواب بوجه بعضهم البعض
حلت الكراهية وملأت الافاق
الحبُ اشبه بالطفل المشاغب
مليء بالبراءة ولكنه يهدم الأرجاء
الحبُ زارنا والحقت به الكراهية
حتى اظلمت بيوتنا وعشنا العناء
وفي ليلة مُظلمة
تزوجها سراً وهربا الى بغداد
منذ ذلك اليوم وعمتي "ناز" بعيدةٌ عنا
وقريبة من زوجها المسلم "محمد"
شاع مؤخرا بأن لها ولد منه
اسمه عبدالله
لكنه يعيش في لبنان بل مستقرٌ هناك
ولا يزورهم ابدا لأسباب ومشكلات عائلية
....
دخلت عمتي ناز للغرفة
ذبيت القلم
خلتلي العصير ع الميز وكالت
ناز: عجبتج الغرفة؟
كلت بتعب
روناك: عمة ليش تعبتي نفسج؟
ناز: لا ولو اخيرا من بعد هالسنين التقيت بوحدة من ريحة اهلي
روناك: عمة سؤال
كعدت ع السرير
وكالت
ناز: اعرف سؤالج، انتي مستغربة شلون رجعت علاقتي بأهلي بعد سنين الكطع
هزيت راسي بمعنى اي
دمعت عيونها وابتسمت
ناز: حاولت اصالحهم ورفضوني، وبعد سنين هواي سمعت عمج يعقوب مريض وديسوولة عملية هنا بمستشفيات بغداد
طلعت دون علم عمج محمد، ورحت الهم وكعت ع رجلهم وترجيتهم رفضوني هواي واني ما مليت بقيت يوميا اروح لحد ما تقبلوني
عقدت حاجبي
كالت
ناز: يمكن تستغربين من كلامي لكن الاخ ما يريد من اختة شي، يريد يشوفها سعيدة وعنة بعيدة واصلا الاخ ما يدور اختة نادرا تلكين اخ يسأل عن اختة بس يريد منها تدورة وتسأل عنة
كلت بأستغراب
روناك: علاقتج بعمو محمد شلونها؟
ابتسمت
ناز: حلوة هواي بس يمة خليها ببالج الحب مو كلشي ولا تعيدين غلطتي
وكفت وهي تكول بأرتباك
ناز: يلا اخليج ترتاحين اساسا البيت فارغ بس انا وعمج محمد وعمج من الصبح للظهر بالدوام ومن العصر لليل بالمحل يعني براحتج
بدون شعور كلت
روناك: وابنج عبدالله؟
تغيرت ملامح وجهها وكالت
ناز: لا تجيبيلي سيرتة ابوه مسويلة غرفة فوك بس هو ما فد يوم اجة نام او سكن بيها من عمر ١٨ سنة دايح بلبنان صارلة ١٢ سنة ما يندلنا، لا تشغلين بالج بي ما يجي يلا نامي وراج دوام باجر
طلعت وعافتني
صرت اباوع بتعجب وافكر بكلامها
هو شنو اللي يخلي ام تحجي عن ابنها هيج؟!
وما تتمنى تشوفة!
ثاني يوم كعدت الصبح
احس اكو خنكة بداخلي
طلعت برا لكيت عمتي محضرة الريوك
زوجها رجل كلش محترم
ابتسملي وكام راح لدوامة
تريكت شوي لان مالي نفس
وراها طلعت لجامعة بغداد
كانت قريبة علينة
ودلاني عليها بابا البارحة
فضلت ان اروح مشي
صرت اتمشى وانا محتارة
شلون راح اتأقلم؟!
دخلت للجامعة
قسم العلوم
من مكان لمكان
رحت للعمادة حتى اسوي المباشرة
دخلت لغرفة مقرر القسم
كال
: اممم الطالبة الجديدة روناك راح تسوين مباشرة كطالبة مرحلة اولى
عقدت حاجبي وكلت بأستغراب
روناك: لالا دكتور انا مرحلة ثانية
جاوب ببرود
: اعرف لكن بسبب النقل من الادنى للاعلى وماكو مقاصة علمية يعني المواد اللي دارستها هناك بيها اختلاف عن موادنا هنا لهذا ترجعين للمرحلة الاولى واني بلغت والدج بهالشي ووافق، ماعندج علم؟!
امتلت عيوني بالدموع
وطلعت من المكان مخنوكة وابجي
مااعرف وين ماخذتني رجلي
......
عطاء
كنت امشي بأروقة الجامعة
افكر بأهلي ومشتاقة الهم
شفت بنية كاعدة ع المسطبة تبجي
لفتت انتباهي
لا شعوريا رحت الها
وصلت يمها وكلت
عطاء: ليش تبجين محتاجة مساعدة؟
باوعتلي وكالت
روناك: ها؟!
عطاء: محتاجة مساعدة؟ خو ما بيج شي؟
نطيتها الماي اللي بأيدي
وهي مسحت دموعها
كعدت يمها
عطاء: مرحلة اولى انتي ومشتاقة لاهلج صح؟ تصدكين انا هم
باوعتلي ورجعت تبجي
روناك: بس انا مو مرحلة اولى رجعووني للمرحلة الاولى
عطاء: رجعوج؟ ليش؟
وسولفتلي قصتها وهي تبجي
كلت
عطاء: انتي كوردية مسيحية؟
روناك: وانتي جنوبية مسلمة، عندج مشكلة وي هالشي؟
ابتسمت وحكيت جبيني
عطاء: هههه لالا ابد كلنا اهل واخوة بس انتبهتلج ما ضابطة العربي زين تحجين مكسر، وو انتبهت للصليب
اشرت ع ركبتها
كالت وهي تمسح دموعها
روناك: هو بس هذا بقالي، انتي علوم؟
عطاء: اي ومرحلة اولى
روناك: يعني اذا بقيت هنا اداوم وياج
عطاء: ايي اكيد، بس انتي عندج امل ترجعين؟
دمعت عيونها
روناك: اني مااعرف ليش اجيت اساسا
تنهدت وكلت
عطاء: لعله خيرا
من بعيد شفت حسين
واكف وي مجموعة طلاب
لا شعوريا بقيت اباوع الة
حسيت عليها تكول
روناك: ما عرفتيني عليج
كلت بأرتباك وانا اشتت نظري
عطاء: اسمي عطاء وانا من الحلة وساكنة بشقة قريبة منا انا ومجموعة بنات تحبين اعرفج عليهم؟ او اذا ما عندج سكن تجين ويانا
روناك: عادي اتعرف عليهم بس انا ساكنة يم عمتي بيتها بالشارع الثاني
عطاء: جا كومي وياية
اخذتها ومشينا
مريت من يم حسين لا شعوريا باوعتلة وابتسمت
وهو هم ابتسم!
حسيت كلبي طار
وصرت امشي بسرعة من الفرحة
والبنية تحاول تلحك بية
اخذتها لقسم ضي
والمفاجأة من بين زحمة الطلاب
من بعيد لمحت ضي واكفة
وفكرها شارد
خفت يكون صاير الها شي
وصلت الها وكلت
عطاء: ضي شبيج؟
كالت بتوتر
ضي: هااا عطاء شجابج؟
عطاء: خو ما بيج شي؟
ضي: لالا بس احس تعبت واريد ارجع للسكن
عطاء: حبيت اعرفج ع روناك زميلتي الجديدة
ضي: هلا روناك
حسيت سلامها بارد
وتتلفت كأنما بيها شي
باوعت لروناك وكلت
عطاء: سكنا قريب منا والمحاضرات مملة تجين نشرب جاي سوة لو تخافين؟
ابتسمت وكالت بخنكة
روناك: ما بقة شي ما صار بية، يعني شراح تسويلي ها؟
لزمت ايدها وكلت
عطاء: اكو اشياء تصير بحياتنا منعرف سببها لكن دائما نكول لعله خيرا
اخذتها واخذت ضي
ورجعنا للسكن
المفاجأة لكينا باب الشقة مفتوحة!
توقعت احد البنات راجعة قبلنا
لكن انصدمت من شفت ام ضوية جاية
ضوية ركضت لحضنها صارت تبوس بيها
وتحاول تتطمن خو ما صاير شي
وامها تطمنها
: ماكو شي بس ابوج اجة يبيع المسواك بالعلوة وجابني وياه ولكينة عم عطاء هو فتحلنا الشقة وانا اجيت جبتلج مسواك ورتبت اغراضج ونظفتلكم الشقة
ابتسمت وكلت
عطاء: عاشت ايدج خالة ليش تعبتي نفسج
: انتن بناتي
اخذت بنتها ودخلت للغرفة
وانا خليت روناك تكعد بالصالة
وسويت جاي
عطاء: روناك اخذي راحتج محد غريب هنا
روناك: شلون ساكنين وحدكم هنا
عطاء: العمارة مال عمي ومخلي بيها بواب يحرسها وقبل ما ننام نقفل الابواب زين والله هو اللي يستر
صبيت جاي
عطاء: روناك انتي هواي حلوة حقة ابوج يخاف عليج
روناك: يخاف علية من الارهاب وكعدني يمهم
عقدت حاجبي
عطاء: شلون؟! مفهمت؟
ارتبكت وكالت
روناك: ااا انا اعتذر كلش اعتذر مو قصدي بس زوج عمتي يعني م. مسلم
عطاء: واذا؟
روناك: ماادري بس والدي يكول المسلمين ارهاب اااا يعني مو كلهم
ابتسمت
عطاء: انتي تشوفيني ارهابية؟
روناك: ولو اشوفج هيج اشاركج كوب الجاي؟ او اجي لشقتكم واني مااعرفج غير من نص ساعة؟
تنهدت
عطاء: بسبب اللي يفجرون بأسم الله، ينتهكون اعراض تحت راية الاسلام، يقتلون الناس بسبب الفروقات الدينية والمذهبية، بسبب المتسترين بدين النبي محمد صلوات الله علية احنا وصلنا لهنا
روناك: اكو ارهاب ثاني
كلت بأستغراب
عطاء: كلامج غريب مجاي افهمة، منو هو؟
روناك: ابن عمتي اللي انا ساكنة يمهم
عطاء: ارهابي؟ يعني اقصد عندة جرائم
ميلت راسها وكالت
روناك: مو بهذا المعنى لكن يكولون عنة مو زين وعاق وي اهلة وعندة سوالف مكسرة وحتى امة اللي هي عمتي ما تحبة
عطاء: ووحدة حلوة وصغيرة مثلج شلون تسكن وياه بنفس البيت
رفعت حاجبها بتعجب
روناك: ساكن بلبنان ومستقر هناك وما يجي لأهلة
عطاء: همم وانتي ليش تسولفين عنة؟
روناك: مستغربة ان الانسان سمعتة السيئة تطغي ع وجودة
عطاء: لهذا يكولون اهم ما بالانسان سمعتة
بهالاثناء دخلت حبيبة
حبيبة: هلوو، باب الشقة مفتوح منتظرين احد
شافت روناك وكالت بتعجب
حبيبة: هالحلوة منو؟
عطاء: هههه زميلتي الجديدة روناك
حبيبة: تسكن يمنا؟
عطاء: لا
حبيبة: جا هلا بيج هم زين ما تسكنين هنا لان اذا يشوفج حازم يعوفني
باوعتلي روناك بأستغراب
ابتسمت وكلت
عطاء: معليج بيها تتشاقة
روناك: حازم منو
عطاء: ع اساس حبيبها
حبيبة: لا، حازم زوجي بس مع وقف التنفيذ
عطاء: شششش ام ضوية هنا
حبيبة: ها؟ بعد شوي تكوليلي حازم هنا ام ضوية شجابها، اااا اقصد هلا بيها بس شنو المناسبة
عطاء: شش تشوف بنتها
كعدت وصبت جاي لنفسها
كالت
حبيبة: متزوجة مخطوبة تحبين؟
روناك: كلها لا
حبيبة: اكو واحد بالعمارة اليمنا اسمر طويل لا تجين يمة
عطاء: معليج بيها تتشاقة
روناك مستغربة من حبيبة
وانا كاتمة ضحكتي
حبيبة: اكلج لوراك
عطاء: روناك
حبيبة: سريلاك اي شي المهم كاف بالنهاية
روناك: كولي
حبيبة: مسيحية انتي مو؟
روناك: اي
حبيبة: تشرفنا، اكلج صدك تعتبرون النبي عيسى هو الله؟
خليت ايدي على راسي
عطاء: كافي تفشلين بينا اسكتييي
روناك: احنا مانكول عيسى نكول يسوع المسيح وهو الله المتجسد ع هيئة بشر
حبيبة: استغفر الله ربي واتوب اليك شهالحجي
عطاء: روناك معليج بيها ولا تجاوبيها بعد
حبيبة عدلت كعدتها وكالت
حبيبة: اي عفية لتجاوبيني انا حسناتي ع كدي بجوابج يطيرن
عطاء: هي وي الكل هيج تحب تتشاقة
روناك: ههه عادي، يلا بنات صار لازم اروح تأخرت واخاف عمتي تقلق علية
عطاء: راح ترجعين لكركوك؟
روناك: مااعتقد
عطاء: فكري واذا قررتي تبقين وقتها اني كسبت احلى زميلة
ابتسمتلي وكالت
روناك: انتي تنحبين بسرعة وخففتي عني هواي
عطاء: وانتي تنحبين هواي وهلا بيج
ودعناها وحبيبة توصي بيها
حبيبة: هاي العمارة اليمنا من تمريلها عبري كبل لا تتلفتين
عطاء: هههه نزول عليج حبيبة
ودعناها واول ما راحت كرصت حبيبة من ايدها
حبيبة: ااااخ انكسرررت ايدج عطوة
عطاء: فشلتييينا كدام البنيةةة شهالحجي الماصخ
حبيبة:تصدكين حازم شافني اليوم وما سلم علية ومثكل كلش جا والعلاج؟ وقطعة الكيكة؟
عطاء: تستاهليين مو كتلج اثكلي يبنية الثكل حلو
حبيبة: والله لو تحبين تلكين نفسج تبتسميلة دون ما تحسين
صفنت ع كلامها
وتذكرت حسين
كلت
عطاء: ها؟!
حبيبة: اووي خلي افوت ابدل
كعدت بالصالة
خليت ايدي ع راسي
انا ليش هيج صار بية؟
لالا لا معجبة ولا احب
مجرد خرابيط..
بهالاثناء طلعت ام ضوية
وصارت توصيني عليها
وتوصينا حتى ننتبه ع نفسنا
ضوية حبت توصلها لباب العمارة
بس امها رفضت
وكالت الها
:لالا لتخلين ابوج يشوفج حتى ما يصير عصبي
اباوع لضوية رجعت للخلف
ودمعت عينها
هو شنو اللي يخلي الاباء
يكرهون شوفة ابنائهم؟!
ام ضوية جايبتلنا دولمة
خليتها ع النار
ورحت بدلت
اباوع لضوية صافنة
كلت
عطاء: شبيج صاير شي؟
ضي: ابوي مأذي امي بس امي تكابر ع جرحها وما تحجي
كعدت يمها
لزمت كتفها
عطاء: امج قوية وابوج مو سيء لهالدرجة
باوعتلي والدمعة بعيونها
وكالت ببرود
ضي: امي جاية حتى تنظف الشقة وترتب سريري بس مو هذي غايتها، غايتها تلمس اي دليل على غلطي حتى ترجعني وياها امي ما تريد تتأذة وتحارب علمود وحدة ما تستاهل
عطاء: وامج لكت دليل؟
ضي: لا، لهذا رجعت بوحدها حتى تحارب علمودي لان شافتني استاهل
ضميتها الي
صارت تبجي بحضني
اجت حبيبة للغرفة
وكالت
حبيبة: بنات ال٥٠ مالتي خليتها ع الميز الصبح قبل مااروح للدوام شفتوها؟؟
باوعت ضي ع حبيبة
وخرت من يمي وراحت يمها
وكالت بنبرة مليانة غضب مدفون
ضي: شقصدج يعني امي بواكة؟!
جرتها من شعرها ووكعتها بالكاع
حبيبة صارت تصرخ
وضوية تبجي وتصيح
ضي: اميييي ما تبووووك امييي مووو بواكةةة
انصدمت من الاشوفة!
كمزت ع ضوية ودفعتها بعيد
ودون مااحس ضربتها راشدي
وصرت اصرخ عليها
عطاء: ضووووية اصحييييي البنيةةةة جاي تسأل مو تتهم
كامت حبيبة من الارض
وهي تلم بشعرها وتبجي
حبيبة: والله ما قصدت شي والله مااتهمت احد انا انا بس اسأل بس انتي مريضةةةة نفسيا
صارت تصرخ
حبيبة: ماااسمحلج تمدييين ايدج علييية ومرررة ثانيية اكسرهاااا
اباوع لضوية صافنة ودموعها تنزل
وحبيبة انهارت بالبجي
وراحت لغرفتها وسدت الباب
التفتت ع ضوية وكلت
عطاء: ضوية انا اسفة، ما تمالكت اعصابي وضربتج انا بس....
كالت ببرود والدموع ع وجهها
ضي: اسمي ضي مو ضوية
لزمت كتفها
عطاء: ضوية او ضي الاسمين حلو، المهم اا. انا اسفة لان مديت ايدي عليج
كالت بنفس البرود
ضي: من سألني اليوم عن اسمي استحيت اكلة اسمي ضوية وكتلة ضي، لأول مرة استحي من حقيقتي كدام بشر، مااعرف ليش من دونهم سألني ومااعرف ليش كتلة ضي
عقدت حاجبي وكلت بخوف
عطاء: ضي انتي بخير؟؟ عن منووو تحجين جاوبيني
وخرت ايدي وكالت
ضي: اريد انام
راحت لسريرها وتركتني بصدمة!
بهالاثناء اجت زهراء من الجامعة
دخلت للغرفة وصارت تبدل
اسمعها تكول
زهراء: صدك حبيبة عود شفت ٥٠ ع الميز واخذتها الصبح لان كنت مستعجلة ونسيت استأذنج هاج هاي ال٥٠ خليتها ع الميز مالتج
كالت ضوية بخنكة
ضي: صدكتي ان امي مو بواكة
كلت بتعب
عطاء: لا اله الا الله هو اساسا محد جاب سيرة امج
دخلت حبيبة للغرفة وكالت
حبيبة: بس اللي عايش حياة سيئة يظن كلشي يصير موجه الة
زهراء: صاير شي وانا ما ادري بي؟ شبيكم بنات
عطاء: خلونا نطلع برا ضي تريد ترتاح
.....
حازم
دخل سراج للشقة وهو يصيح
سراج: مرتااااح ع الاخررررر
حازم: خير يا ربي شصاير؟
ابتسم واجة كعد كبالي
سراج: شفتلك شوفة اليوووم يا بووية ما تتفوت
حازم: المن شفت بنت سياسي؟
سراج: هههههه وك لا ادهى بعد انت انتظر وهسة تشوف اللعب ع المضبوط
طلع خالد من الغرفة وكال
خالد: يا لعب اكو لعبة اليوم؟
سراج: اي
خالد: منو ومنو؟
سراج: انااا وبرائتها هههههههه
دخل سراج للغرفة وهو يضحك
خالد عقد حاجبة وكال
خالد: شبي؟ عن منو يحجي؟
حازم: سالفتة تعبانة هذا عوفة
خالد: سوالف بنات؟
حازم: ايي
خالد: زين مو حرام؟
حازم: لا مو حرام لان الكل تعرفة شنو هو صار سنتين يعيد بالمرحلة الاولى وصار معروف بالجامعة ابو علاقات وما تسوي وياه علاقة غير المثلة
خالد: ومابيها مجال يتوب؟
حازم: العلم عند الله، احجيلي شلون كان يومك
خالد: عادي مصار شي وانت؟
حازم: اليوم من شفتها تذكرت كلامك شو خفت منها وما سلمت عليها
خالد: منو ام العلاج؟
حازم: ششش لا يسمعوك
خالد: بس انا ما كتلك عوفها
حازم: كلامك عن الجراءة قلقني
خالد: الجريء يريد خجولة بس الخجول مثلك اظن تناسبو جريئة
حازم: يعني باجر اسلم عليها؟
صار يضحك بصوت عالي
خالد: هههههههههه
حازم: روووح خالد اليسمع كلامك يضيع
طلع حسين من الغرفة
حسين: اليوم الضحكة عالية خير؟
خالد: دانضحك ع مذهبك
كمز حسين ع خالد وضربة بوكس
صرت بنصهم وفاككتهم
وخالد يضحك ويستفز بحسين
حازم: خااالد شبييييك تخبلت
خالد: يابةةة هسة ارتاح كلبي اليوم غثيت عالم وما ردولي وهسة بوكس حسين خلاني ارتاح
صاح حسين
حسين: قصدك ملطشة تحب اللي يهينك
خالد: لاا بس حسيت نفسي استاهل الضرب
حازم: خالد اعتذر لان تجاوزت حدودك
خالد: اذا اعتذر منة يعتذر ع البوكس؟
حسين: لو تطلع عيونك
خالد: معناها لا انا اعتذر ولا هو بس اعتذر منك مو قصدي اتجاوز عليك حازم
وراح خالد للغرفة
باوعلي حسين بغضب
حسين: بقيت تدافع الة لحد ما تجرأ وكام يتجاوز علينا
حازم: انت استلمتة بوكسات اول مااجة الولد طكت روحة وكام يتجاوز وانت السبب
حسين: ابقى بهاي افكارك الغبية
حازم: حسين لا تتجاوز
حسين: وخر من وجهي خلي اطلع للشغل
طلع حسين
وانا احس انقهرت من تجاوز خالد
دخلت للمطبخ سويت جاي
صبيت بالكوب وكعدت ادخن
دخل خالد للمطبخ
شرب ماي
كال
خالد: حازم زعلان مني؟
حازم: وقت اللي حسيت حسين عايل بحقك خليت عقيدتي ع جهة ودافعتلك بس من تتجاوز وما تهتم للي بينا هنا من حقي ازعل
خالد: انت اخوي وانا اعتذر منك وصدكني ما اقصدها
كلت بإنزعاج
حازم: احنا مو جهال كل شوي نغلط ونعتذر انت ليش سويت هيج؟
صفن
بعدها كال
خالد: يمكن حسين عندو حق، يمكن انا عندي كراهية تجاه الشيعة بس اليوم يلا حسيت بيها وماادري ليش
كلت بأستغراب
حازم: خالد انت مستوعب الكلام اللي تكولة
فرك وجهة وكال
خالد: الغضب اللي كتمتة من كلام حسين اليوم فرغتة ع شخص مااعرفة، ومااعرف ليش
عقدت حاجبي
حازم: منو هذا الشخص؟ ولد او بنية؟
تبدل لون وجهة
وطلع من المطبخ وهو يكول
خالد: احس نفسي محتاج انام
......
زهراء: ونومة الناموا وما كعدوا ان شاء الله
حبيبة: زهراااء شبيج وياية؟؟
انداريت عليها وكلت
زهراء:عطاء من اول يوم كالت البنية تعاني من ضغوط عائلية وخطية امها جاية منظفة الشقة وانتي بكل صلافة رايحة تحجين عن ال٥٠ الف يمكن البنية اخذت ع خاطرها وحست كأن الكلام موجه الها وانهارت
كالت بعصبية
حبيبة: قسما برب الكعبةةة ما قصدتها
زهراء: وعمةةة انتييي ليش تصيحين؟
حبيبة: عوفج من ضي هاي مخبلة، برأيج حازم ليش من شافني ما اهتم الي ولا سلم علية
كلت وانا متنرفزة
زهراء: يا طلابة حويزم، شبيج مخبلة انتي؟ عمية؟ ما شايفة؟ وج بابا ليش دتركضين ورا الحب والعلاقات؟
حبيبة: جا شسوي؟
زهراء: اكعدي وعيشي دورج كأنثى وكلشي يجيج بالحلال
غطت نفسها بالبطانية وكالت
حبيبة: انتي ما تفهميني
زهراء: نامي ريحيني منج
ومر هذا اليوم
وثاني يوم داومت بكل نشاط
قبل لا ادخل للقاعة زاحمني احد الطلاب
ماانتبهت علية
لكن حجينا بوقت واحد
خالد: السلام عل..
زهراء: ممكن طريق حتى افوت؟
......
