رواية حرم الاسود الفصل السادس بقلم بتول ابو الليل
متوهمين مو احنه التغيرنه بس دكاتهم كسرت خواطرنا ..💔
____________♠___________
اريانا : اجت علينه ام هيثم للبيت ڪلتلي امي اسوي ضيافه وادخل اسلم عليها
سويت ودخلت ضيفتها وسلمت عليها جايه هيه وياها مره ثانيه ماعرفها.
ام هيثم : شلونج اريانا
_الحمدالله بخير انتِ شلونج خاله البنات شلونهم.
ام هيثم : حبيبتي كلنه بخير انتِ تعرفين احنه علمود شنو جايين مو لأن هاي مو اول مره نجي
_اي خاله اعرف
ام هيثم : اي حبيبتي احنه كل فترا نرجع عليج لأن نعرفج زين ونعرف تربية اهلج ومانريد تروحين لشخص غريب احنه اهل وجورتنه صارلها سنين وانتِ تعرفين ابني زين ودارسين سويه وشايفته وشايفج والحمدالله هسه موظف ويشتغل وراتبه زين وحالتنه كلش زينه.
جميله : والله هاي من الصبح احجي وياها اكلها ماما ماتلڪين احسن منهم
خوله : اي والله هيثم ورده ماتلكه مثله مؤدب وخلوق وصدكوني مراح تخسر الي ترتبط بيه.
ام هيثم : هسه ڪولي خاله راضيه حته يصير الحجي رسمي ونخلي ابو هيثم واعمامنه تجي عليكم تطلب ايدج من ابوج.
احتاريت شجاوب احس نفسي ممستعده لهيج موضوع احلام وطموحات هواي عندي صح تخرجت بس بالي اشتغل واتعب علئ نفسي بس امي حيل مصره وبابا هم دائماً تجيني عالم ويسالني هيثم دارسين اني وياه بنفس الجامعه ونفس القسم كلش حباب ومؤدب بقيت مدنكه راسي وماجاوبتها.
ام هيثم : بنيتي مانجبرج اذا متردين تزوجين كولي عادي هاي حياتج ومستقبلج.
_لا خاله موافقه
ام هيثم ; حبيبتي انتِ والله راح يدللج هيثم صدكيني مراح تتندمين علئ قرارج بيوم
خوله : مبروك لعد ليوم نحجي ويه الحجي ونجيڪم باقرب وقت نخطب
جميله : ڪل الهلا بيڪم بأي وقت
ام هيثم : يلا احنه نترخص لازم نروح هسه نجيكم باقرب وقت انشالله
جميله :بعد وڪت كملو الكهوه.
ام هيثم : بالفراح نشربها انشالله هسه تدرين البنات جايات علينه واريد اخذهم ونروح للمول يريدون يتسڪون وهسه من يسمعون بالخبر لازم يخططون للخطبه شنوو يلبسون.
هزت راسها امي بأي طلعو من البيت بقيت اني كاعده ودايخه خايفه ومتوتره وافڪاري كلها مشوشه
استعجلت بقراري لوو احسن الي استقر بحياتي
جميله : الف مبروك يروح امج واخيراً اقتنعتي.
_ماما خايفه واحس نفسي ستعجلت حيل
جميله : لأ حبيبتي ماستعجلتي هذا احسن قرار اخذتي بحياتج الولد دراس وحالته زينه وحته يخليج تتوظفين لأن همه عادي عدهم البنات تشتغل بناتهم ڪلهن موظفات.
_والله مادري وبابا شتڪولين يقبل؟
جميله : اي طبعاً لأن يعرفهم من سنين وعمرهم ماطلعت عليهم سالفه موزينه
_الله ڪريم بس يمه شلون يخطبوني واليان مموجوده ماكدر اسوي أي شيء اذا هيه مموجوده وياي.
جميله ; واحنه هسه شنوو سوينه الخطبه بعدهم ماحاجين ويه ابوج يحجون ويخصمون المهر ونحدد يوم للخطبه انشالله منا لهذاك اليوم ترجع سالمه للبيت
_انشالله يارب
جميله : يلا اني رايحه اسوي غده صدك نسيت هاج ذني الفلوس روحي اشتريلنه من الاسواق ورق سمبوسه و فروله و جبن وبيض وزيتون.
_بس خلي البس شيء فوك ملابسي
صعدت لغرفتي لبست بشت فوك ملابسي لان ملابس بيت ماڪدر اروح بيهن الاسواق.
رفعت شعري بقراصه اخذت فلوس وطلعت للاسواق.
دخلت اخذت سله وخليت بيها كلشي احتاجه اشتريت الي حلويات و اغراض مطبخ عجبني كلاص مرسوم عليه باندا ابو القصبه
اخلي بيه كهوه مرات واشرب واتابع افلام اخذت مشترياتي وانطيتهم للمحاسب شويه ودخل هيثم الي ع اساس راح يصير خطيبي باوعلي من فوك لتحت اكلني اكل بعيونه دنڪت راسي وبقيت منتظره يخلون المشتريات بعلاكه.
راح هوه اشتره باڪيت جكاير وڪف برا بالباب اخذت العلاليك وطلعت اجه تمشه يمي وكال
هيثم : شلونج اريانا
_الحمدالله انتَ شلونك
هيثم : كلشش زين سمعت راضيه بالخطوبه
_اممم اي
هيثم : متتخيلين فرحتي بيج من زمان منتظر هل يوم واخيراً راح يتحقق.
_ليش هل ڪد فرحان ؟
هيثم : احبج من ايام الكليه ولاتسوين نفسج متدرين تعرفين ڪلش زين لأن نظراتي الج فاضحتني ههههه
ابتسمت ودنڪت راسي بخجل هوه هم ابتسم حك حاجبه وكال
هيثم : لتدنكين ريونه احب اشوف عيونج الحلوات.
_روح منا يلا لايشوفك شخص بعدك ماصرت خطيبي موو اخذك الواهس
هيثم : ههههه يلا رايح رايح ماريد يصير شيء ويخرب علينه فرحتنه.
هزيت راسي بأي عافني وراح ابتسمت احسه حباب وكلامه حلو انشالله يكون قراري صح وارتاح بالزواج منه.
رجعت للبيت انطيت الاغراض الامي واخذت حلوياتي واشيائي وصعدت لغرفتي.
...
خدرني آرون وخلاني فقدت مادري ليش سوه هيج مادري شڪد بقيت واني نايمه
ڪعدت واني دايخه لزمت راسي بوجع اباوع حواليه غرفه من طين وبوفيه صغيره عليها فراشات واغطيه.
ڪعدت علئ حيلي واني صافنه هذا وين هالكني هل مره اباوع لباب مفتوح وماڪوو أي شخص يمي معقوله هيج مأمن يعوف الباب ويروح اكيد كاعد برا
شفت ملابسي مغيرات لابسه دشداشه؟
منوو غيرلي ملابسي وين اني وشديصير بيه راح اتخبل يالله
ڪمت علئ حيلي الدشداشه قديفه شويه كصيره عليه وتصميمها قديم حيييل وبيها طرز مال نسوان كبااار
بقيت لازمه الدشداشه واباوع عليها مصدومه شصار وياي منوو غيرلي ملابسي وين اني
طلعت من الغرفه فتحت عيووني علئ وسعهن من شفت مكاني بنص الهور !!
شجابني علئ الاهوار وليش اني هنا شوصلني الله ياخذك آرون الله لايوفقك علئ هل عمله.
باوعت يمين يسار نسوان تنطي حشيش للبقر وحده تخبز بتنور الطين وحيوانات هواي دجاج طيور بط غنم ابقار جاموس كلشي وريحه المكان تلعب النفس كلها مال فضلات الحيوانات.
فزيت علئ صوت مره عجوز تصيحلي جنت حافيه باوعت حواليه شلبس دخلت للغرفه الحذاء موجود بس ماكدر امـشي بيه
شفت نعال لبسته وطلعت رحت عليهم كلهن يباوعن عليه يضحكن.
_وءءء ين اني؟
صبيحه : خيبه فدوة لهل حلك شوف شحلاتها هشجم بيِتك يل دلال صدك يغير الواحدد
_خاله شدتحجين بس كوليلي وين اني منوو وصلني لهنا وين آرون ليش خلاني وراح؟
صبيحه : آرون شنهي نوب
_آرون الخاطف الي جابني عليكم لهنا.
جواهر : ههه يمه اضنها تحجي علئ ايسر.
_ايسر منوو ؟
جواهر : راح وعافج يمنه ورجع
_انتِ صدوك تحجين شنوو عافني وراح شلووون يخليني هنا مافڪر بيه.
صبيحه : يااع چا شعدج تكعدين حالج من حالنه هسه احنه شعدنه بس نربط الحلال ونورده ماي ونحلب الهوايش. تعلمي لاتضلين فاهيه ومايعه بلا اخذتيلج رجل عده حلال شتسويله
_ياااربي دخيلك شهل ورطه الي وكعت بيها.
جواهر : تعاي خيه تعاي امشي وياي احلب الهوايش وسولفي عليه بهاي سوالفج الحلوات خلينه نعرفج منين من ياعمام.
لعبت نفسي ڪلش تقيئت من الريحه الخوفه الصارت بيه احس عيوني طلعت اجتني المره الجبيره لزمت راسي وصاحت عليهن يجيبلي مي.
بطني فارغ مابي شي تقيئت ماي مر حسيت روحي طلعت
جواهر : عمت عيني شجاج خايبه هاج اشربيلج ماي.
_ماڪدر ماڪدر اتحمل اعيش هنا رجعووني الاهلي.
صبيحه : تعاي يمه تعاي وياي.
لزمت ايدي واخذتني رجعتني للغرفه كعدت علئ الفراش واني ارجف واشهك جسمي صار كله يرجف اريد ارجع لبيتي ياربي راح اموت ماكدر اعيش دقيقه هنا
عمري ماوصلت لهل حاله من انولدت لحد هذا يومي اني مدللهه وعايشه بعز ودلال ماناقصني شيء شهل حاله الي اني بيها هسه.
صبيحه : خيبه يمه عليمن هل بجي احنه هم مثلج بشر لاتخافين منه كلشي مانسويلج وايسر خلاج يمنه امانه وشحده ليوصلج وحگ علي غير مايريد روحه.
هسه اجيبلج لبن اخليلج عليه شويه ملح واشربي حته تروح لعبت الروح منج وبس تخلص جواهر من حلب الهوايش اخليها تخبز وسويلج لگمه وجهج صاير اصفر وزوعتي ماضل شيء بطنج
_خاله فدوة لعينج رجعوني الاهلي والله راح اموت ماكدر ابقه هنا اخاف من الحيوانات اني بابا راح يتنازل والله هوه كال يتنازل يعني يصير الي تردونه بس خلوني اطلع فدووة
صبيحه : والله يايمه مادري عليمن جايبج ايسر علينه بس هوه وصاني عليج وكالي لاتخلينها تروح لمكان منا لحد ما يجيج هوه وياخذج
_الله ياااااخذه هل حرااامي النذل شووفي شسوووه بيه والله ممسويتله شيء ولا مأذيته لاتوكفين وياه بالغلط خلوني ارجع لبيتي فدووة خاله دبريلي سياره او قارب بس خليني اطلع من هل مكان فدوة والله مانسه معروفج وماخلي أي بشر يأذيج .
صبيحه : لا يمه لا انه اعرفه ايسر مايغلط وعمره ماسوه شيء غلط واذا جابج علينه وامنج يمي مستحيل اخون الأمانه تضلين يمي منا لحد مايجي هوه وياخذج وعود بهذيج الساعه تفاهمي انتِ وياه وخلي يرجعج الاهلج.
خليت ايدي علئ وجهي وبجيت ياربي دخيلك شسوي هسه شلوون اطلع من هل مكان.
عافتني وطلعت بقيت حايره بزماني ماعرف شسوي شلوون اطلع
من كل التجهات اڪو مي وڪصب ماكدر اطلع ماڪو شيء يخليني انهزم منه عرف شلون يحبسني بدون قفل ورباط.
بقيت ڪاعده بالغرفه وحدي مره ابجي مره اصفن مره ادوخ وراسي يوجعني مليت من الكعده صار المغرب طلعت من الغرفه اباوع علئ المكان غابت الشمس منظرها حلوو ناس جايبه كصب وياها ونسوان تشتغل
قسم ينطي للحيوانات اكل وقسم يخبز ويطبخ علئ جمر.
مشيت علئ جواهر مخليه شبجه وعليها سمجه تشوي بيها رحت كعدت يمهاا علئ صخره جبيره.
جواهر : ها شلونج هسه
_الحمدالله
جواهر : يوعانه ؟
_شنوو يوعانه
جواهر : تردين اكل
_هاا اي ميته جوع
جواهر : شوفي سويت سمج شوي هستوهم صايدينه يخبل بعده بدمه
_شون انتِ تشوي بايدج متخافين تحتركين
جواهر : ياا خيه چا هسه انه ماكاضه السمج بيدي مخليتها علئ الجمريه هستوني خبزت اخلي ايدي بالتنور الطين واطلع الخبزات انتِ تعرفين تخبزين مو
_هههه لا والله كلشي ماعرف اسوي بس كهوه اعرف اسويها.
جواهر : ياااع چا شلون اذا باجر اخذتيلج رجل تسويله بس كهوه .
_عادي اخلي يجيبلي مساعده بالبيت او اتعلم اني بفترت الخطوبه
جواهر : مساعده شنهي؟
_يعني تنظف تطبخ تشتغل بالبيت عرفتي
جواهر : يااا مثل الافلام والمسلسلات
_هههه اي عفيه مثلهم.
جواهر : يا خيه احنه هنانه كلشي نسوي بدينه نخبز ونعجن ونطبخ ونحش حشيش ونمطل مطاب كلشي.
_مطال شنو؟
جواهر : هههههه فضلات الهوش نسوي مطال ونخلي بالتنور يصير جمر.
_صدك تحجين؟
جواهر : چا شنهي اجذب عليج
_والله ماعرف اول مره بحياتي اسمع بهيج شيء
جواهر : تعلمين كلشي هنانه ياا اخذتنه السوالف جا احتركت السمجه هاج اخذيها وانه راح اييب الخبز
راحت شلت السجينه احاول اكلب السمجه بالماعون ماكدر
لزمت وصله قماش وشلت الشبجه الي شوت عليها السمجه كلها ورحت للغرفه جانت الحجيه فارشه حصيره باب الغرفه ومخليه لبن وخضره وتمر رحت يمها خليت السمجه
صبيحه : شو طبيت للغرفه مالكيتج كلت ياايمه راحت البنيه طلعت شفتج ويه جواهر يلا رتاحيت
_ وين اروح ماكدر اتحرك لمكان كله مي اشمر روحي بالهور
صبيحه : خيبه يمه وعلي تتونسين هنانه اخليج تعلمين الخبز والعجن واخذج الجاموساتي اعرفج عليهن.
ابستمت هزيت راسي بأي احسها لطيفه هيه وبتها طلعت السمجه خلتها ماعون اجت جواهر خلت الخبز كعدنه احنه الـ 3 نتعشه رغم جنت خايفه ولعبانه نفسي بس من اكلت وياهم كلش حبيت الاكل جان بيه طعم غير شكل وهمه ميطنكرون بوجهي لا بالعكس بشوشين ويضحكون ويسولفون ويايه
صبتلي كلاص لبن شربت منه يجنن طعمه بيه دسومه مال بقر مدري جاموس
_شكد صارلكم عايشين هنا ؟
صبيحه : صارلنه 10 سنوات هنانه جنه عايشين بالهور بالجبايش ونوب شلنه هنانه وي عربنه لأن ماضل النه مجان هناكه وبناتنه تزوجن ضلت بس هاي عدي جواهر .
_زين خاله ماعندج ولد بس بنات ؟
صبيحه : عدي جانو ثنين وستشهدو بحرب صدام.
_هاا. الله يرحمهم
صبيحه : يرحم موتاج انتِ شڪد عدج خوات خوان
_عندي 3 خوان وماعندي خوات امي ميته وابوي عايش.
جواهر : الله يرحمه مثلي انه هم ابوي مات واخواني ضلت بس امي اليه.
_الله يحفظها الج
جواهر : فدوتج
صبيحه : الله يرحم امج خوش مخلفه بنيه جنها حوريه
جواهر : أي والله حلوه تخبلين.
_شكراً انتو الحلوين.
جواهر : انه اول ماشفتج تعجبت بلبسج كلت لمي منين هاي كالت ايسر جابها علينه وراح
_صدك ايسر شيصير منكم يقربلكم لوو شنو ؟
صبيحه : امه تصير بنت عمي
_هاا هيج
صبيحه : أي
_تدرون هذا ايسر خاطفني وجابني عليكم هسه يدخلكم بمشكله جبيره
جواهر : يااا شنو خاطفج
_والله خدرني وجابني لهنا واني كلشي مادري
صبيحه : ايسر ماكوو باخلاقه وطيبة گلبه اكيد انجبر هيج يسوي وياج او عنده سالفه انه اعرفنه
_لا انجبر ولاشي لايغركم المظهر مالته اني هم بالاول عبالي حباب وخلوق طلع واحد مخادع وجذاب
صبيحه : ولج لاتحجين عليه كدامي مارضه
سكتت ضاهر يحبونه ميقبلون احجي عليه دنكت راسي وكملت اكلي.
خلصنه لميت السفره ويه جواهر راحت جابت مي من الهور بجدر جبير تغسل بيه المواعين.
رحت كعدت يمها صارت تجلف وتشمرلي بالجدر واني اشطف واخلي بالصينيه ونسوالف حيل حلوه سوالفهن.
كملنه صار اليل دخلنه للغرفه شغلت فانوص الحجيه وطلعت سجاده وكعدت تصلي اني احس نفسي وصخه ماكدر اصلي
كعدنه اني وجواهر علئ صفحه بالغرفه نسوالف نزلت النه 2 بطانيات تغطينه بيهم.
جواهر : انتِ اصلج من بغداد لو منين
_اي اني من بغداد جنت ادرس بالمانيا وقبل فترا رجعت للعراق.
جواهر : صدك عود وصعدتي طياره
_ههه اي اكثر من مره صعدت طيارة
جواهر : والله اتمنئ اصعد طياره حلمي
_انشالله حبيبتي تحققين كلشي بالج
جواهر : شوفي حالتنه شحقق مكابله هل هوايش والهور والكصب وكاعده
_زين انتو ليش متنتقلون لبغداد وهناك اني اساعدكم واشتريلكم بيت علئ حسابي.
جواهر : چا انتِ منيلج الفلوس وتشتريلنه ؟
_عندي حسابي الخاص بيه فلوسي وبابا عنده شركات واكدر اساعدكم بكلشي تحتاجو
جواهر : امي ماترضه تعوف اهلنه لهنانه واخواتي هم ماخذات هنا تكول نعيش ويه عربنه ونموت وياهم.
_بس متشوفون شيء بحيااتكم لوو طلعين وتشوفين العالم وين وصلت وشنوو حققت جان كلتي شلون كاعده لحد هسه هنا.
جواهر : چا شسوي ماكدر اعوفن امي بس هيه ضلت الي بالدنيا
_الله يحفظها الج
جواهر : فدوة لكلبج .. صدك ماعرفت شنو اسمج
_اسمي اليان وانتِ
جواهر : فدوة الله حته اسمج حلوو انه اسمي جواهر.
_اوي عمري اسمج يجنن
جواهر : مو مثلج
_بالعكس انتِ تخبلين
جواهر : فدوتج.
_اكلج اني اريد اسبح عدكم حمام مو؟
جواهر : اي عدنه بس اله احميلج ماي علئ نار لأن الماي بارد ماينسبح بيه
_ياا شلون هسه
جواهر : يلا كومي شعدنه هسه اشغل نار واخليلج جدر عليها يحمه مايه.
_لا لا عوفي صبح اسبح هسه رتاحيتي انتِ صارلج ساعه تشتغلين
جواهر : لا والله شعندي ماتعب من هيج شغلات اذا تردين هسه احميلج ماي بسرعه
_لا عمري اشكرج الصبح اسبح اصلاً هسه الجو حيل بارد صار اخاف اتمرض.
جواهر : اي والله صدك تتمرضين
خلصت الحجيه من صلاتها كامت خلت السجاده بالبوفيه ونزلت النه من فوك البوفيه منادر وكالت
صبيحه : هاجن افرشن فراشاتجن ونامي كافي تسولفن حته دوهنتني من الصلاه
ابتسمت علئ سوالفها كمت اخذت مندر وجواهر هم اخذت واحد خليت فراشي يم جواهر نزلنه بطاطين اني اخذت 2 لأن ابرد بسرعه
بقينه ليل كله نسوالف تحجيلي عن حياتهم واني متعجبه اكول الحمدالله شلون هسه عايشين ومتعودين علئ الوضع اني ماكدر اسوي ابسط شغله يسووها
تعلمت كلشي يجيني جاهز وكامل ماتعلمت علئ أي شي بحياتي غير السفر الدراسه الطلعات المولات هذا كلشي افتهمته من حياتي
شفت بعيون جواهر هوواي احلام وماتڪدر تحققهن أمنيات ڪلش بسيطه بس الاسف متكدر تسوي شيء
والله لو تقبل امهاا تطلع من هل مكان اني جان تڪفت بكلشي يخصهن جان اشتريت الهن بيت وراتب شهري يجيهم وعلمت جواهر علئ القرايه والكتابه متعرف تقرا شيء خطيه
نمت واني احس نفسي عشت بعالم ثاني عالم مختلف جذرياً عن عالمي الجنت عايشه بيه.
ڪعدت الصبح علئ صوت جواهر تكعد بيه بالكوه افتح عيوني من النعاس
جواهر : كومي شڪد تنامين صار الظهر وانتِ نايمه
_عفيه عوفيني شويه والله تعبانه
جواهر : رايحه اعلف الجاموس ورجع عليج
عافتني وراحت رجعت غطيت راسي ونمت ماكوو نص ساعه ورجعت عليه سلمت امري لربي وكمت
اباوع للساعه الي بايدي بـ 7 ونص ياااا هاي من كل عقلها مكعدتني هيج وكت وتكول صارر الظهر.
طلعت برا الغرفه كلها كاعده وكملن يُشَتغلً شغلته بالكوه مفتحه عيوني من النعاس
جان اكو مي بجدر رحت غسلت وجهي منه واني احس عيوني مورمات ويوجعني لان بجيت هواي وسهرت وكعدت من وكت
رحت كعدت باب الغرفه لميت رجليه علئ صدري واني صافنه بالمكان الي اني بيه اجت جواهر شايله جدر مي خلته بالارض واجت يمي.
جواهر : هاا شوفنج صافنه
_راسي يوجعني وعيوني تأذيني هم
جواهر : تريكي وانه اشوفلج عمتي بلكت عدها دوه مال راس.
_شتريك شتاكلون علئ الريوك انتم
جواهر : خيرر من الله بيض كيمر عرب دهن حر زبد شتردين انتِ شنوو تاكلينه.
_اريد اجرب الكيمر مالتكم
جواهر : هسه مو عساج علئ كيمر
_فدوة لكلبج چا خاله وين اشو ماكو
جواهر : هناكه يم عماتي راحت
_ها تمام
راحت خطيه جواهر حمت الجاي وانطتني كيمر ماعون وخبزه حمتها علئ الجمر حاره.
اباوع للخبزه بيها تراب ياربي شلون اكل منها هسه لزمت الخبزه ونكتتها وكعت التراب منهاا.
خليت شويه كيمر بالخبزه واكلت منه نفس الطعم الي نشتري من السوك بس دسم اكثر هذا.
جواهر : چا شو ماكلتي
_اني هيج ماكل الصبح اشكرج حبيبتي تعبتج.
جواهر : لا ماكو تعب يلا رايحه عدي شغل من اخلص احميلج ماي وسبحي.
هزيت راسي بأي عافتني وراحت رجعت الكيمر اخذت الماعون والكلاص اغسلهن
رفعت دشداشتي من المي كعدت علئ صخره بقيت اجلف بيهن خلصتهن خليتهم علئ الصينيه اباوع لدشداشتي تبللت ودمرت طين
رحت للجدر بيه طاسه اغرف مي بيها غسلت رجليه وديه
شويه واجت جواهر جايبه وياها حضن مال حطب خلته بالارض وكالت
جواهر : هسه راح احميلج ماي تعاي وياي انطيج دشداشه مني
هزيت راسي بأي رحت وياها فتحت البوفيه مالتها وانطتني دشداشه هم قديفه وملابس داخليه ماخذت منهاا لابسه اني وابقه بيهن ماحب اتشارك بهيج امور.
دلتني علئ الحمام هوه هم من طين ومخلين علئ الباب مالته برده موو باب.
حرت وين اعلك الدشداشه او الملابس الي راح انزعهن.
دخلتلي للحمام خلت الجدر بيه مي حار حيل وجدر ثاني بيه مي بارد.
جواهر : كاسري بينهم حته يصير دافي
_شكراً بس وين اخلي الملابس
جواهر : خليهن هناك علئ هذاك السطل
هزيت راسي بأي عافتني وطلعت نزلت البرده وبقيت اتلفت واباوع خاف مخلين كامره او شيء يباوعون بيه عليه.
امنت ماكو شيء نزعت ملابسي وسبحت ماكو أي شيء اغسل بيه راسي غير التايت مال الملابس والصابونه.
خلصت نشفت بنفس الدشداشه الجنت لابستها ولبست الثانيه غسلت الدشداشه بالحمام وطلعت شريتها علئ الحطب الموجود يم الحمام.
شعري يتناكط علئ الدشداشه بللها دخلت للغرفه لگيت صبيحه كاعده
صبيحه : نعيماً
_الله ينعم عليج ..اريد منشفه انشف شعري.
صبيحه : هذاك الخاولي ورا الباب
رحت للباب جان معلك اخذته شميت ريحته يمه مو طيبه بالكوه نشفت اطراف شعري ورجعته.
مشطت شعري وربطته بقيت كاعده بالغرفه لعبانه نفسي حيل من هل وضع.
جواهر : ها خلصتي
_اي
جواهر : تعاي وياي راح اعجن اكعدي يمي
هزيت راسي بأي بس اريد نفسيتي تتغير اريد اتأقلم وارتاح من هل خنكه.
رحت وياها خلت طحين وجابت يمها ملح وخمره خلت وبدت تعجن وتسوالف عليه.
خلصت غطتها وكامت غسلت اديها اني بس افتر وراها كلشي مافاهمه
جواهر : حروح احلب الجاموس تجين وياي
_لا اخاف منهم
جواهر : بكيفج
عافتني وراحت رجعت للغرفه انطتني صبيحه خضره كلتلي اغسليها جانت تلكط بيها اخذتها منها راحت هيه ورا جواهر رحت خليتهم بالجدر وبقيت كاعده علئ صخره رافعه شويه من دشداشتي واغسل ماحس غير وراي شخص كال.
آرون : معدله.
فزيت خايفه باوعت وراي شفته آرون واكف ويضحك عليه كمت واني منزعجه
_واخيررااا اجيييت ليششش جايبني لهناااا شلوون تشمرني هل شمررره وترووووح
خله ايده علئ حلكي وسحبني للغرفه دخلني بيها وسد الباب دفعته بقوه واني اصيح بصوت عالي
_عمري ماشفت انسان انذل منك ليشش تسووووي هيج بيه اني شنوو ذنبي وتعذبني هيج موو حررام عليك بابا مو راح يتنازل ليش مترجعني ليش مخليني هنا
آرون : اول شيء اهدئي خلينه نحجي بتفاهم
فضحتينه بصياحج هسه شتكول العالم علينه
_حجيت الهم كلشي كتلهم خطفني وجابني بالغصب لهنااا فضحتك كداااام الكل عبالك اسكت لااا غلطان
آرون : ليش تفضحين الموضوع وتأذين نفسج بايدج شايفه اذا واحد من هل عالم عرف بيج مخطوفه هنا ياخذونج ويشمرونج بعيد حته ماتصيرلهم مشاكل يهلكونج مكان مامنه رجعه.
_رجعني آرون فدوة رجعني كوه متحمله الوضع شتريد اسويلك بس لاتعوفني وحدي وتروح فدوة اخذني وياك رجعني الله يخليك.
احجي ودموعي تنزل غمض عيونه بقهر سحب نفس واجه يمي لزم وجهي بثنين اديه مسح دموعي دفعت ايده عني واني اباوعله بغضب.
آرون : ماريد أذيج والله ولا اريدج تبجين مابقه شيء ويخلص هل موضوع وترجعين البيتج واهلج بس شويه انطي صبر اعتبري نفسج طالعه برحله سياحيه غيري جو تعرفي علئ ناس جديده.
_ماريد كلشي ماريد بس رجعني الاهلي
آرون : احنه حجينه بهل موضوع من قبل وانتِ تعرفين ليش جبتج لهنا وشوكت اعوفج ترجعين.
_الله يااااخذك الله لايوفقك يارب يحترك گلبك مثل ماحركت گلبي وعيشتني هل خوف كله
بقه ساكت ماجاوبني عفته وطلعت من الغرفه واني ابجي انهار من اشوفه واتوسله يعوفني وميقبل.
رحت قريب من الشط كعدت وبقيت ابجي بصوت مسموع.
شويه واجه كعد يمي درت وجهي عنه واني امسح بدموعي
آرون : قبل شويه تشتغلين وصايره نادره شتغير هسه؟
مجاوبته مكتفيه بالصمت شال حصوه شمرها بالمي باوعلي وكال.
آرون : شوفي شلوون خليتج تصيرين قويه وتتعلمين امور جديده بحياتج ابوج ممسويلج هيج اشياء
_شوڪت يطلع سجينكم؟
آرون : بعد 5 ايام هيج ويطلع وترجعين لبيتج.
_احلف كول والله اخليج ترجعين
آرون : والله اخليج ترجعين
_ماثق بيك ولا اصدك كلامك اصلاً انتَ واحد جذاب ومنافق وحقير.
آرون : ههههه مشكلتج هاي بعد
بقيت ساكته درت وجهي عنه ماريد احجي وياه كارهته حيل ولوو بيدي اموته علئ هاي تصرفاته الي يسويها وياي.
آرون : يلا اني رايح اجيت اطمأن عليج واشوفج تأقلمتي ويه الوضع او لا بس طلعتي ذيبه لكلشي ترهمين.
_تعوفني وتروح ؟
آرون : اي ماكدر ابقه وياج عمتي ماعدها ولد حته اكعد وياه واستحي منهم انتِ تعودي عليهن هنه حبابات والله
_آرون لاتعوفني هنا اخذني وياك فدوة والله ماكدر اعيش هنا
آرون : ماكدر اخذج كتلج بس هل كم يوم تحملي وعد ارجعج لبيتج ماخليج طول عمرج هنا
_مراح اسامحك علئ كلشي سويته بيه راح تتندم والله
آرون : هههه ميخالف
كام من يمي ودار وجهه كمت اني هم خنكتني العبره اريد ابجي اصرخ ماريد ابقه هنا اريد ارجع وياه لبيتي.
دار وجهه يباوعلي بتأمل عيوني مليانه دموع ابتسم بهدوء وكال
آرون : كم يوم ورجع ماتأخر عليج لاتبجين
_الله ينتقم مـنـك انشالله تموت ورتاح منك.
ابتسم وهز راسه بأي عافني وراح بقيت اباوع وراه واني احس نفسي افور شسوي هسه شلوون اطلع.
سحبت نفس بقهر وجنت اريد امشي سحلكت رجلي وكعت بالهور ...
