رواية أحببت من لايبالي الفصل السابع بقلم مجهول
زين : اوكف يابه ماكو داعي للتفكير بهذا الموضوع اني موافق
جهاد : ابتسم وهذا الي جنت متوقعه منك
:::من سمع زين كلام جهاد للحظه تخيل نفسه بمكان ابو سال نفسه ياترى لو كانت مريم ماره بنفس موقف براء هل كان من الممكن انو يتركها بدون مساعده جاوب نفسه مباشرتا مستحيل فحس بشعور ابو وجاوب بسرعه انو موافق على زواجه من براء لان مهما يكن تبقى بنت عمته ولازم يساعدها بس حلف بداخله يخليها تعض اصابعها ندم على كلشي غلط سوته
جهاد : طلعت من الاستقبال واحس اكو فرحه بكلبي مااكدر اوصفها اولا لان كدرت انفذ وعدي واساعد بت اختي وثانيا لان ابني الي صارلي سنين اعاني بسبب بروده وقساوته راح يتزوج
الشباب : هاا يابه شو تاخرتو
لؤي : بشر وافق لو لا
سجاد : انشالله يكون وافق
قصي : اني اكول ماوافق ولكم هذا زين العقده مستحيل يتزوج
جهاد : باوعله وكال وافق
قصي : شنو ؟
لؤي: وجعو شبيك متسمع جاي يكلك وافق
طلع زين
زين : هاا شو لسه مارحتو
الشباب : مبروك ابو الزون
زين : ببرود على شنو
الشباب : على زواجك
زين : مجرد موافقه مبدئيه بعدني ماتزوجت لتاكلون راسي وعافهم
قصي : بشرفكم هذا هم وجهه واحد يريد يتزوج
جهاد : كافي حجي يله امشو تاخرنه زين تروح ويانه
زين : وهو يصعد الدرج اي شويه واجي وراكم
جهاد : خوش يله شباب امشونه
::: طلعو وزين راح يرتاح ساعه ويرجع للمستشفى
زين : نجمه
نجمه : هااا
زين : كعديني بعد ساعه مو تنسين
نجمه : صار
___________
براء : وره ما طلع خالو اجتني الممرضه كعدت يمي
: عفيه ممكن تساعدني اروح للحمام
الممرضه : اي اكيد
: دخلتني للحمام وطلعت تنتظرني بره باوعت على وجهي بالمرايه وبجيت راسي مشدوده ووجهي مورم لان بابا ضربني على وجهي بقيت فتره اباوع على نفسي وابجي واكول ليش ربي بشنو خطأت اني حتى تعاقبني هيج عقاب فزيت على صوت الممرضه
: شو تاخرتي خو مابيج شي
: مسحت دموعي لا مابيه شي بس اغسل واطلع غسلت وطلعت ساعدتني ارجع كتلها
: شكرا
الممرضه : عفوا تدللين بس ممكن اسالج سؤال
: تفضلي
الممرضه : الدكتور زين شيصير منج
: ابن خالي بس شمعرفج بي
الممرضه : ليش هو اكو واحد ميعرفه جراح جدا معروف وماخذ هواي جوائز وتكريمات من نقابه الاطباء بالعالم انسان جدا محترم معقوله انتي بت عمته ومتعرفين هالاشياء عنه
: لا والله مااعرف
: كعدت تسولف ويايه واني بالي بغير عالم ولا يمها افكر اذا طلعت منا وين اروح اني متاكده بابا بعد ميستقلني ولا يقبل ارجع للبيت هو من البدايه يضوج مني وهسه طلعتلي هاي السالفه خلته يكرهني بالزايد اوووف إلهي دخيلك حلها تره تعبت وبعد مااتحمل
الممرضه : يبنيه احاجيج وين رحتي
: هاا اسفه شردت شويه عفوا شنو كلتي
الممرضه : كتلج راح اروح شويه فد نص ساعه وارجعلج خو متخافين
: لا لا براحتج
طلعت الممرضه واني رجعت على صفنتي وكعدت افكر بالموبايل وشجابه لكنتوري للحظه من اللحظات شكيت بروحي وبديت اراجع نفسي خاف مره من المرات اني ماخذه هيج صور وناسيه احذفهن بس ماكو و حتى الملابس الي بالصور مو الي ياربي راح انجن من التفكير شويه وسمعت الباب انفتح ودخل خالو والشباب
جهاد : السلام عليكم شلونج بابا جا وين الممرضه
: وعليكم السلام هستوها طلعت
جهاد : خوش شوفي جبتلج ملابس واكل هسه اكل للممرضه تبدلج حتى تكعدين تاكلين وتاخذين دواج وبعدها نشوف الدكتور شيكول على طلعتج
: بس وين اروح اذا طلعت وبابا ميقبل ارجع للبيت
لؤي : شنو هالحجي انتي اختنه اذا ماقبل ابوج ترجعين تجين تبقين عدنه ونحطج بعيونه
: مااعرف شلون اوصف هالعائله لساني يعجز عن وصفهم و كد ماتاثرت بكلام لؤي دمعت عيوني
سجاد : براء كافي تبجين مو حتى عيونج انعمن انوب منو يقبل بيج اذا انعميتي هاا
براء : رغم ما مقهوره بس كلام سجاد ضحكني
قصي : ههه هي صاحيه والاخ كوه قبل مو انوب تصير عميه الله وكيلكم ياخذ هدومه ويرجع
: شنو؟
جهاد : ههه عوفي بنيتي هذا يمسلت وحده وخزره
حسن : بهمس خرب يومك شكد اجفص سد حلكك وبعد لتحجي
قصي : هسه اني شكلت شبيكم عليه
حسن : ماكلت شي بس اسكت
جهاد : قصي روح كل للدكتور نريد نطلع براء شوف شنو يكلك وصيح للممرضه خلي تجي تساعد البنيه
قصي : صار يابه
صاح قصي للممرضه وراح يحاجي الدكتور اجه زين
زين : السلام عليكم
الكل : وعليكم السلام
زين : ليش كاعدين بره
جهاد : جاي تبدل بت عمتك
لؤي بخبث : قصدك مرته
زين : بحده بعدها ماصارت مرتي كافي حجي زايد
حسن : اعصابك زين شبيك يشاقه وياك
زين :باوعله صفح وماجاوبه
طلعت الممرضه
يشاقه وياك
زين :باوعله صفح وماجاوبه
طلعت الممرضه
:كملت تكدرون ادخلون
براء : دخلو وكعدو يسولفون بس طول ماهمه كاعدين زين يباوعلي بنظرات بارده ماكدرت افسر شنو معناها وره شويه دخل قصي
قصي : الدكتور كال وضعها صار تمام تكدرون اطلعوها
جهاد : الحمدلله يله اني رايح اكل للدكتور يسويلها ورقه خروج حتى نطلع
براء : طبعا كولش منحرجه من بيت خالو يعني همه مامجبورين يتحملون مسؤليتي واهلي موجودين خطيه حتى تكاليف المستشفى خالو جهاد دفعها والله استحي حتى اباوع بوجهم
جهاد : يله بنيتي اذا ماعندج شي خلي نطلع
براء : وين حروح
جهاد : لبيتكم قابل وين
براء : بس خالو انت تعرف بابا ونزلت دمعتها
جهاد : لتخافين بنتي حاجيته قابل اخذج من كيفي
براء : بفرح صدوك خالو يعني بابا صدكني
جهاد : باوعلها بحزن وما عرف شيجاوبها لحد مانقذه من هالموقف لؤي
لؤي : يله يابه نمشي
جهاد : اي يله
:::طلعو وبراء تباوع على زين الي يمشي كدامها تمنت توكف بصفه حتى تشوف فارق الطول بيناتهم اكيد راح تطلع تفشل اذا وكفت يمه لان كولش طويل ابتسمت على تفكيرها
براء : دنمشي وانتبهت على الممرضات و وياهن هاي الي جانت يمي ياشرن على زين ويتهامسن وهو ولا يمه يمشي عبالك ملك شدعوه هالغرور هسه من جمالك وشايف نفسك لا لا براء الصراحه تنكال الولد حلو اووف هسه اني ويني وين هالسوالف خلي اركز على مصيبتي الي مااعتقد حتخلص
::: طلعو من البوابه وبراء راحت بسياره زين هي وجهاد وسجاد والباقي لحكوهم ووره نص ساعه وصلو لبيت غيث وبراء بس شافت بيتهم تذكرت هذاك اليوم الاسود الي دمر حياتها ودموعها كامت تجري انتبه عليها سجاد
سجاد : بهمس لتبجين خليج قويه ما دامج ما مسويه شي لصيرين ضعيفه
براء : هزيتله راسي ..بدون مااحجي .. دك خالو الجرس وانتظرنه يفتحون الباب .. واول مافتح الباب امير شافني واجه يركض شبكني وكام يبجي
امير : بروئه حبيبتي الحمدلله على سلامتج كولش اشتاقيتلج
براء : حضنته بس ردت ابجي وحضن امير بجاني ...رفعت راسي شفت بابا واكف يباوعلي بنظرات كولها كرهه
غيث : ابو لؤي اني مو كتلك مااريد هاي اطب لبيتي اني وافقت على طلبك وكتلك اخذها بس مااريد اشوفها بعد
جهاد : ابو محمد البنيه ستوها طالعه من المستشفى خلي تدخل جوه موزين عليها وتعال ندخل حتى افهمك الي ابالي
غيث : ماشي راح ادخلها بس هاي لخاطرك والا تحلم ادخلها لبيتي
براء : تفاجئت من كلام بابا ومافهمت وين يريد خالو جهاد ياخذني ياربي دخيل اسمك ساعدني
جهاد : همسلها دخلي خالو ومعليج بالحجي شتسمعين لتجاوبين خوش
براء : اوك ودخلت للمطبخ شفت ماما تباوعلي بدموع رحت ركض حضنتها وابجي
: ماما والله اني بريئه والله انتي مصدكتني مو
ناديه : اي ياروحي شلون ما اصدكج انتي تربيتي وبنيتي العاقله متاكده ميطلع منج هالشي
: لعد ليش مااجيتي واني بالمستشفى
ناديه : ابوج ماخلاني اروح واتوسل بمحمد ميقبل ياخذني شسوي يا يمه نجبرت اكعد بالبيت واسمع اخبارج من خالج سولفيلي شلون صرتي هسه
براء : الحمدلله احسن ورجعت حضنتها وهي تمسح على راسي وكل شويه تبوسني شلت راسي على صوت
روان : هاا براء الحمدلله على السلامه
براء : اجتي تحضني دفعتها ... ايالج وبالج تدنين يمي روحي خلي بنات عمج يفيدنج
روان : براء والل...
براء : لتحلفين يلمتخافين الله شوكت شفتي الموبايل بكنتوري هااا هو انتي اصلا ادخلين لغرفتي وبعدين هاله من صعدت وحدها محد راح وياها ليش شهدتي ضدي زور ليش كلتي اني جنت ويه هاله وطلعت الموبايل من كنتور براء ليش لج اني اختج .. شكد حاولت اكون قويه بس مكدرت رئسن بجيت المشكله محد يعرف شعور المظلوم غير المظلوم نفسه
ناديه : كافي امي عوفيها وانتي روان طلعي لتراويني وجهج
روان : انتي ضلي دافعي لهلساقطه ام الزلم
ناديه : امشيي ولي ادبسزز حسابج بعدين .... وانتي براء تعالي ويايه لغرفتج مااريد محمد وابوج يشوفوج منا لحد ما يخلصن هالاسبوعين وتروحين
براء : باستغراب وين اروح
ناديه : ليش ماكلج خالج
براء : لا
ناديه : ياا لعد سمعي خالج خ..... قاطعها صوت محمد
محمد : يمه خالي يريد يحجي ويه بنتج خليها تروحله للاستقبال
ناديه : اي هسه كومي براء روحي شوفي خالج شيريد منج
براء : كمت واني بالي الف سؤال شيريد مني خالو و وين يريد ياخذني وليش لازم ابقه بس اسبوعين هنا و وره الاسبوعين وين حروح دكيت باب الاستقبال ودخلت ... هااا خالو صحتني
جهاد : اي بنتي تعالي كعدي يمي اريد احجي وياج
براء : رحت كعدت يمه .. تفضل خالو اسمعك
جهاد : من رخصتكم شباب طلعو شويه
براء : طلعو الشباب وحجه خالو
جهاد : براء بنتي الي راح احجي هسه راح ينقذج من هالمهزله الي صارت وماراح تنجبرين تتزوجين ابن عمج ولا راح تسمعين حجي يمس سمعتج بس كون توافقين عليه
براء : بفرح اي خالو اني موافقه على اي شي بس كون اطلع من هالمشكله اني مستعده كولشي اسوي بس خلصني من هالتهمه
جهاد : خوش واني راح اساعدج
براء : شلون ؟
جهاد : اني خطبتج لزين وبعد اسبوعين زواجكم
براء : بصدمه شنوووو
جهاد : مثل ما سمعتي ماكو غير هالحل عندي وبس بهالطريقه اكدر اساعدج
براء : وزين شنو رائيه بالموضوع
جهاد : موافق اكيد خو مااجي اخطبله بدون علم
جهاد : موافق اكيد خو مااجي اخطبله بدون علمه
براء : بس خالو الرجال مامجبور يتزوج وحده ادمرت سمعتها
جهاد : لتحجين هيج اصلا ابني محظوظ ليش وين يلكه وحده حلوه ومؤدبه وعاقله
براء : ضحكت مستهضمه جنت خالو جنت البنيه المؤدبه والعاقله هسه انحطت عليه علامه اكس × وياريت لو مسويه شي حتى اكول استاهل
جهاد : ماعاش ولا كان الي يخلي على مرت ابني شي وخلي يكون بعلمج الشريفه تبقه شريفه لو يذبوها بنص الملهى ف شمى تحجي وشمى تكول الناس مادام انتي واثقه من نفسج مامسويه شي خليج متمسكه باخلاقج وهاا اني ما جاي اخذ رائيج اني جاي ابلغج انو عرسج بعد اسبوعين
براء : بدموع بس خالو اني بعدني صغيره مااريد اتزوج اريد اكمل دراستي واكون لنفسي كيان مستقل بالمجتمع الزواج كان ومازال اخر شي ممكن افكر بي
جهاد : بنتي الظروف احيانا تجبرنا نتنازل عن احلامنا ونخضع للامر الواقع وبعدين حبيبتي انتي لازم توافقين لان ابوج انطاني مهله لمده اسبوعين اذا ماتزوجتي راح يطردج لو يزوجج لاي واحد يتقدملج
براء : بجيت الكلام الي داسمعه صعب على عقلي استيعابه
جهاد : بنتي اعرف كلامي ممكن يكون جارح بس كتلج احنا لازم نخضع للامر الواقع فوافقي يا بنتي ماعندج غير حل وخاف عبالج اذا اذأج زين بيوم من الايام راح اسكتله لا انتي من اليوم الي دخلتي بي بيتي صرتي مثل نجمه وشمس وجميله فلتتوقعين ممكن اوكف بيوم من الايام ضدج حتى اذا على مود ابني ... هاا شكلتي
براء : مسحت دموعي وكلت ... موافقه
جهاد : باسها براسها عفيه بالعاقله وهسه تعالي نطلع نشوف الشباب ..... هاا اسفين طولنه عليكم بس جنه نتناقش اني وجنتي
الشباب : مبروك بروئه
سجاد : يسسس واخير وافقتي متتوقعين شكد فرحان يعني راح تعيشين عدنه وتضلين اطبخيلي الاكلات الاحبها
قصي : طبعا والله عرفته راح يجيب طاري الاكل عوفي براء معليج بي خلي يولي مينعطه وجهه هذا
سجاد : انت اسكت لتحجي ويه مرت اخويه اصلا اني وياها راح نسوي حزب عليكم شتكولين بروئه وغمزلها
براء : الكل باركولي واحسهم فرحانين عكس زين الي احسه مراضي على هالشي والحقيقه حتى اني ما موافقه على هالزواج بس على كوله خالو مرات الظروف تجبرنا نتنازل
جهاد : يله احنه نترخص وهاا ابو محمد عكب باجر نجي اني واخواني وباقي عوائلنا نخطب براء رسمي ونعقد بنفس الوقت فبلغ اهلك واتمنى تسوون كلشي طبيعي ولا كان صار شي
غيث : بكيفك بعد بالنسبه الي ماعندي مانع بس ياريت تستعجل لان جنتك ضيفه عندي ومدة ضيافتها تخلص بعد اسبوعين
جهاد : وهو مراضي على كلام غيث انشالله بعد اسبوعين تنور بروئه بيتنا يله شباب امشونه مع السلامه
الكل : الله وياكم
براء : دخلت اريد اروح يم ماما ليشوفوني وحدي ويضربوني وجان اسمع صوت بابا
غيث : خاف عبالج استقبلتج اليوم لسواد عيونج لا بس على مود خالك وهم مااريد الناس تدري بعملتج واحمدي ربج وشكرتي بدال المره الف محد يدري من اهل امج بعملتج والا جان موتج بدون ميرفلي جفن فحسبي حسابج وره اسبوعين تزوجين وتنسين عندج اهل مااريد اشوف وجهج بعد
ناديه : غيث شنو هالحجي
غيث : والله مثل ماسمعتي اني ميشرفني استقبل ساقطه بيتي واصلا مااعرف اخوج ليش خطبها لابنه الدكتور بعد الي شافه واني من البدايه كلت اذا ماخذاها ابن عمها انتظر اي قسمه تجيها عجوز، مطلق ،معاق اطيها بدون تفكير حتى اخلص منها مو انوب يخطبها الدكتور الزنكين وارفض اصلا احمد الله واشكره اجتها خوش قسمه تسد حلوك اخوتي وخواتي وراح نسوي حفله ولا كان صاير شي لان خواتي ميدرن بالي صار طمطمنه السالفه اني واخواني وهمه نبهو عوائلهم محد يجيب طاري الموضوع كدام احد وهسه راح اروح انام مااريد اسمع صوتكم
براء : تمنيت بعد الي سمعته انتحر واخلص من هالعيشه بس استغفرت ربي وكلت اني مو غبيه حتى اخسر اخرتي بعد ماخسرت دنيتي ..... كلت لماما
: ماما اني راح اصعد لغرفتي اتمدد عفيه لتصيحيلي اريد ارتاح
ناديه : ماشي بنتي تغطي عدل ولتشغلين السبلت موزين عليج ولتنسين باجر كون نطلع نشتري شغلات للعقد
براء : ماما روحي وحدج شتردين تشترين اشتري اني مااطلع من باب الحوش خليني اشبع منج ومن بيتنه لان وره اسبوعين محرم عليه اطبه هالبيت بعد
:::ناديه راحت باست راس بنتها وكالت
ناديه : صدكيني يمه من سمعت جهاد خطبج طرت من الفرح ماكو احسن من بيت جهاد ناس حبابين ويخافون ربهم مو لان اخويه احجي هيج هاي شهاده الناس والله واني متاكده زين راح يسعدج ويحافظ عليج
براء : انشالله
