رواية أحببت من لايبالي الفصل الثامن بقلم مجهول
زين : وره مال طلعنا من بيت عمتي لاحظت امي مو على بعضها
جهاد : مريم بيج شي
مريم : لا
جهاد : جاا ليش كالبه وجهج
مريم : لا عليمن اكلب وجهي بس ابني راح يزوج بعد اسبوعين واني اخر من يعلم
جهاد : مريم كلشي صار ركض ركض وماصار مجال اكلج
مريم : حتى اذا اني امه ولازم اعرف اول الناس مو اخرهم ولو الواضح اني مالي اي اهميه بهاي العائله حتى تاخذون رائيي وعافتهم وراحت
جهاد : لحك مريم حتى يفهمها الموضوع
زين : (بداخله)هاي بعدها مااجت وبدت المشاكل جاا لو تجي شيصير شنو هالبلاء الي ابتليت بي ياربي صعدت لغرفتي غيرت ملابسي لتراك نيلي وكعدت احاجي صديقي حتى يشوفلي مكان مناسب اريد افتح عياده هاي الايام مااحب اكعد بالبيت اريد اشتغل اندك الباب
: تفضل
مريم : هاا زيوني خو ماعندك شغل اريد احجي وياك
زين : بابتسامه حتى اذا عندي شغل اعوفه على مودج تفضلي
مريم : اجه ابوك سولفلي على الموضوع واني ايدت كلامه ومن شفتني عصبت تره مو لان رافضه بالعكس براء خوش بنيه وحبابه واكيد متلكه احسن منها بس ضجت لان ابوك ماكلي قبل ليخطي هالخطوه لا اكثر ف هسه اجيت اكلك يا ابني انت هسه راح تتزوج لازم تراعي بنت العالم وتبطل اسلوبك البارد والقاسي اعرف كلامي ماراح يعجبك بس هاي الحقيقه شوف انت ابني واني مااخجل منك تره المره تحب الشخص الي يحسسها بانوثتها الي يدللها ويدير باله عليها كلمه حلوه لمسه حنونه شبيك لتباوعلي هيج ادري بيك متعرف تتعامل ويه النسوان بس هسه الوضع اختلف هسه راح تزوج وتكون مسوؤل عن بيت وعائله شلون راح تكدر تمشي بحياتك الزوجيه وانت بهالبرود حبيبي والله اني اموت قهر من اشوفك عازل نفسك عن العالم لا تحجي لا تسولف ماعندك اي نشاطات غير الشغل والرسم كافي ابني انسى لندن والي شفته بيها مو كل البنات سوه بكل مكان اكو الشريفه والموشريفه اتمنى تسمع كلامي تره محد يعرف مصلحتك بكد امك
زين : الله كريم
مريم : صفكت ايدها مصيرلك جاره خلي اطلع احسلي
زين : هاي امي من كل عقلها تحجي تريدني اني اعامل براء بكلمه حلوه ولمسه حنونه دخل اطيقها بالبدايه وبعدين عود افكر اكلها كلمه حلوه
____________
صباحا
براء : كعدت اليوم متاخرة باوعت الساعه ب12الظهر كمت دخلت للحمام حتى اسبح واصلي لان صرت زينه صار اربع ايام نايمه بالمستشفى وتقريبا الجرح التأم نزعت ملابس واول ما خليت جسمي جوه الدوش تذكرت باجر عقدي المفروض البنيه بهيج يوم تكون فرحانه ومتحمسه حتى تجهز لعرسها الا اني احس باجر راح ياخذوني لحبل المشنقه وغير هيج خايفه من زين احسه يكرهني وميطيقني شلون راح نتزوج ونتراهم سوه حالنا حال البشر الطبيعيين ماادري
كملت سبح وطلعت ابدل لبست تراكسود احمر كعدت امشط شعري على كيفي مااريد اوصل للجرح لان لسه ياذني رغم طاب دخلت ماما وعمه ندى محملات كوه اشياء هاي شنو اجتي عمه ندى
ندى : الف الف مبروك حبيبت عمتج ربي يجعلها زواجه الدهر انشالله
براء : حاولت ابين نفسي فرحانه ... حبيبتي عمه الله يبارك بيج يوم لعلي انشالله
ندى : الله يسمع منج بعد كلبي
ناديه : تعالي ماما شوفي البدله الي جبتها الج هي والسيت الابيض
براء : شسوي بي السيت الابيض
ناديه : يحظي غير تعقدين بي
براء : هاا ؟
ناديه : اي يله تعاي
براء : اجيت اشوف البدله حلوه لونها وردي هادئ قصيره وبدون ردانات ومنفوشه من جوه يمكن لو بغير ظرف جان عجبتني بس هسه كولشي عندي عادي وماله طعم
ناديه : هاا شلونها هاي اختيار عمتج ام علي
براء: بابتسامه مصطنعه كولش حلووه عاشت ايدج عمه
ندى : حبيبتي ايدج العايشه
ناديه : هاج شوفي السيت
براء : شفته طويل وزيكه كولش نازل يعني يطلع الصدر كوله ماما هاي شنو هذا يخزي مستحيل البسه
ناديه : ليش شبي
براء : ماما اوفر ومامستور
ندى : حبيبتي لازم تلبسين ابيض من تعقدين
براء : بس ما مستور .. يله بكيفجن
ندى : لعد يله نزلي حتى نتغده ونروح للصالون ورانه بعد هواي شغل
براء : اوك بس اصلي والحكجن ... رحت صليت وطلعت صايه البسها من نطلع ونزلت البيت هدوء لعد وينهم
براء : ماما لعد وين الباقين
ناديه : محمد اخذ امير وطلع يجيبلي سفريات حتى امليها بالاشياء الي حنقدمها باجر وروان جانت ويانه وصعدت تكدر ملابسها ويمكن هسه نامت
براء : اهاا خوش لعد
ندى : يله تعاي تغدي
براء : تغدينه على السريع ورحت لبست شالي ونزلت لكيت روان مبدله وكاعده بالصاله رفعتلها حاجبي مستهزئه
روان : شبيج تباوعيلي هيج اكو شي بوجهي
براء : لا بس متعجبه على صلافتج
روان : والله اني الي متعجبه على حضج الكاعد بعد كل الي سويتي طحتيلج بواحد يكل للكمر اغيب اني بمكانك وجماله دكتور وزنكين شيريد الواحد من الله بعد
براء : كلامها استفزني ... شوفي لج انتي تعرفين كولش زين اني ممسويه شي وانتي الي تبليتي عليه فسدي حلكج ولتسمعيني صوتج فاااهمه
ندى : شبيجن بنات ليش صوتجن عالي
براء : لا عمه ماكو شي هيج دنتناقش
ندى : يله لعد امشونه
طلعنا اخذنه تكسي ورحنه للصالون لان ماكو احد بالبيت ياخذنه وصلنا
ناديه : يله تعالي
دخلنا وبدت الصالون تسوي وجهي بس يمه متت ياله كملت باوعت على وجهي بلمرايه تغير شكلي وطلع وجهي لان هاي اول مره احف
: شنو رائيج اصبغ شعرج اشقر وانتي بيضه يطلع يخبل عليج
براء : لالا كولشي لتسوين بي عوفي
: ليش متردين
براء : احب لون شعري مااريد اغيره
: براحتج يله تعالي نسويلج تنظيف وعنايه بالبشره
براء : اوك
احس نفسي آله كولشي داسوي بدون مشاعر مجرد اكول لو اي لو لا.... كملت وامي وعمه ندى هم حفن وصبغن شعرهن .. للمغرب كملنا واتفقت ماما نجيها الظهر على مود تسويلي مكياج العقد ورجعنا اول ما وصلت رحت لغرفتي وذبيت نفسي على الجربايه وماحسيت بشي بعد
_____________
_____________
نجمه : ماما وينج
جميله : شتردين منها طلعت من زمان تشتري النيشان هي وشمس خذاهم زين
نجمه : يااا لعد ليش ماخذوني وياهم غير اخت العريس اني شو محد مسويلي اعتبار شنو طرطور اني
جميله : لا حشاج حبيبتي انكس
نجمه : شنوو ولج
جميله : ولاجه بسنج
نجمه : ولج شلوون بيه لسه مامشتريه ملابس وباجر العقد هسه ادري عليمن مستعجلين مشيه ونيشان وعقد بنفس اليوم
جميله : شنسوي بعد شفتي الي صار موقليل وبعدين خالو هم يريد يستعجل يخاف لا زين يطنكر ويغير رائيه وتعال جيب الي يقنعه
نجمه : لا لتخافين مادام زين كال حجايه مستحيل يتراجع عنها اسأليني الي.... وهسه حبابه تعالي نكول لحسن ياخذنه للمول حبابه اروحلج فدوه انتي ومريومه ام كفشه
جميله : هههه امشي مصلحجيه
حسن : جنت كاعد اشوف تلفيزيون واجتني جميله
جميله : اكول حبيبي ممكن اطلب طلب
حسن : كولي حبيبتي شتردين
جميله : بس حباب لترفض ... اريد تاخذنه اني ونجمه نشتري ملابس لعقد زين
حسن : ماشي بس بشرط
جميله : والي هو ؟
حسن : وهو ياشر على شفته بس بوسه
جميله : حسن مو وكتها هسه حباب كوم
حسن : ماكو بوسه مااخذجن
جميله : هف دنكت تبوسه بخده دار وجهه عليها وخله شفته على شفتها وجرها عليه وكام يحرك شفايفه على شفايفها ببطئ حتى يلعب باعصابها وهي رجف جسمها من حركته وماكدرت تقاومه فحضنت وجهه الها وبادلته وبقو يتباوسون فتره لحد ما فزو على صوت مريومه
مريومه : ببكاء باباااااااااا
جميله : وخرت عن حسن .. هااا حبيبتي شبيج وراحت شالتها وباستها وهي ادفع بامها
مريومه : وخلي مااليدج
جميله : ههه ليش حبيبتي تعالي نبدل حتى نطلع نشتريلج شغلات حلوه
مريومه : تشتليلي لاابه ( لعابه)
جميله : اي طبعا ونشتريلج بدله هم
مريومه : تدوك
جميله : اي صدوك
مريومه : هيييي حبج مامي
جميله : ههه واني اموت عليج روح مامي
حسن : خرب يومج هم خربتي اللحضه الحلوه علينا وهم وين مصلحتج تروحين
مريومه : تضحك
حسن : لعلعلا ابيج شكد احبج ههههه
جميله : بدلت لمريم واني هم بدلت وكلت لنجمه تلبس بسرعه حتى نطلع
...................
مريم : زين تعال شوف هذا حلو
زين : واني شمعرفني بسوالف النسوان اشتري الي يعجبج
مريم : لعد اني المن كتلك تعال وياي غير حتى تشتري الذهب لمرتك
زين : اووف ماادري يمه خلي شمس تساعدج ... ودرت وجهي عنها طبعا اتخبل من طلعت النسوان يفترن السوك كله وتاليتها لو يرجعن يشترن من اول واحد لو ميشترن شي اصلا ... شيخلص هالاسبوعين واخلص من هالمهزله اجت عيني على طقم مال ذهب كلش حلو وبسيط على شكل فراشات ناعمات ومرصعات بالالماس ناعم حيلل عجبني بس مااتوقع يعجب البنات لان يحبن الذهب الثكيل البارز
شمس : شفت زين يباوع لطقم يخبل نازك كولش اشرت الخالتي عليه
مريم : هاا زين عجبك هذا الطقم
زين : اي حلو وبسيط
مريم : صحيح شنو رائيك ناخذه
زين : ببرود بكيفج
مريم : خلي النه هذا الطقم رجاءا وطلعنا الخواتم
الصايغ : تدللون
زين : اخذنه الخواتم
مريم : شوف زين اني اخذت طقم ثكيل بس حلو وشمس عجبنها اسوارات هم اخذناهن واخذت اربع محابس و حجل وهذا الطقم هم اخذنا كافيات لو تريد بعد اشتريلها
زين : مااعرف اني اشوف هذا كافي
شمس : اي خاله واذا رادت العروسه بعد ناخذها ونشتريلها الي يعجبها
مريم : لعد خوش خل ادفع المبلغ حتى نطلع نشتري الورد وباقي الشغلات الخاصه بالعروس
زين : وين رايحه
مريم : اريد ادفع
زين : احد كلج ماعندي فلوس وانتي ادفعين
مريم : بس هاي هديتي اني وابوك
زين : رحم الله والديكم اريدكم سالمين مصاريف عرسي كلها اني اتكفلها مااقبل اي واحد يدفع ربع دينار من جيبه
مريم : بكيفك يمه بس لتكلب وجهك ... وبعدها رحنه اشترينه باقي الشغلات ورجعنا للبيت
____________________
براء : اني نايمه ومااشوف غير صارت مداهمه على غرفتي
: شكو شكو شصار شبيكم شفت بنات خالاتي تقى وبشرى وحنان
: خيرر شكو شعدجن هنا
تقى : هيج الواحد يستقبل ضيوفه
براء : اوو اسفه شلونكم بنات اجو بوسوني وباركولي
بشرى : مبروك براء
حنان : هنيالج راح تزوجين زين شلون حظ على العموم مبروك
براء : مااعرف ليش كتلها هيج الله يبارك بيج لتضوجين حبي يوم الالج وتاخذين واحد مثل زين
حنان : لا خيه مثل رجلج ميتحصل جمال وفلوس وين لاكيتها
براء : والله يالله شوف هاي شتفكر
تقى : يله كومي دنسويلج جسمج
براء : كمت من مكاني لا عيني اشكر جهودجن مااريد احد يساعدني بشي وجسمي مسويته ماكو حاجه
بشرى : ميصير لازم تسويله تجديد
براء : لا شكرا عود اذا احتاجيت مساعده اكوللجن
حنان : على كيفج عيني هسه عبالك حنشوف الكيمر اشو العندج عدنه
براء : مو كيمر فحم جسمي ومااريد احد يشوفه وهسه من رخصتج اريد انزل اساعد ماما ... نزلت واني مالي خلك الحجي مدري منين طلعلتي حنان وباجر تجي ست نور وتكمل السبحه ... ساعدت ماما بالتغليف وكملنا تزيين الصاله لان جبيره وحنسوي الحفله بيها .... وبعدها رجعت نمت
_________________
ثاني يوم الساعه العاشره صباحا
براء : كعدت كوه اليوم نزلت شفت هوسه اليوم عماتي جايات وبنات عمي هم جايات بعين صلفه ولا كان صاير شي وخالتي خالده وبناتها جايات من البارحه شافني وسلمن عليه اجتي هاله دتريد تسلم عليه دفعتها على كيفي مااريد احد ينتبه
هاله : شلونج براء وتبتسم
براء : هله ورحت يم ماما اشوف شنو تريد
ناديه : يله براء تعالي تريكي وروحي سبحي حتى نطلع للصالون لان اليوم خميس وتعرفين الصالون يصير ازدحام بهاليوم
براء : ماشي ... ورحت اتريك ... اكل على كيفي مااريد اطلع لمكان اتمنى العصر ميجي حتى ماارتبط باحد اوووف احس نفسي مخنوكه ... كملت وصعدت اسبح كملت ولفيت المنشفه على جسمي وطلعت لكيت هاله بوجهي
: شعندج هنا انتي
هاله : اجيت احاجيج
: ماكو بيناتنه حجي طلعي بره
هاله : هههه طالعه طالعه لتخافين بس اجيت اكولج اني عد كلمتي وشفتي من كتلج اعلمج شسويت بيج بس للاسف هسه ضجت لان حظج كاعد وطلعتي منها بسهوله وراح تاخذين واحد كلها تحسدج عليه بس لتخافين هم يجي يوم ويعوفج لان محد يتحمل يتزوج .... وتقربت منها ... وحده جانت عدها علاقه ويه واحد وحايره شلاعبه وياا
براء : مااتحملت كلامي ودموعي نزلت ... مااكول غير حسبي يالله ونعم الوكيل عليج وعلى كل واحد اذاني
براء : مااتحملت كلامي ودموعي نزلت ... مااكول غير حسبي يالله ونعم الوكيل عليج وعلى كل واحد اذاني
هاله : خليج انتي كاعده هنا تدعين عليه وعلى الاذوج واني نازله هههههه
براء : حقيره ومسحت دموعي وبدلت وطلعنا للصالون اني والبنات لان امي ماكدرت تجي انتظرنه فتره لحد ما صارت بالوحده اجه دوري رجعت راسي على الكرسي وغمضت لحد ماسمعتها كالت كملت باوعت على روحي معرفت نفسي مخليلتي مكياج نازك وحلو وحمره ورديه ويه لون البدله وشايله قسم من شعري بتسريحه بسيطه وعايفه الباقي مبروم
بشرى : لج هاي شطالعه تخبلين
روئ : اليوم الرجال يتخبل
صفا : تره عاديه كل عروس تطلع حلوه غير الفضل يرجع بالمكياج
تقى : شو انتي شكد تحطين مكياج ولا يبين بيج عبالك ماحاطه شي نفس الخلقه ونفس الزراك
صفا : احترمي نفسج منو الزركه ولج
تقى : لجلاجه بسنج اي انتي زركه
بشرى : لا تقى هي مو زركه حرام تضلميها للبنيه هي بنفسجيه
براء : هههه خرب بشرى اجتي تكحلها عمتها ... وكبت العيطه
كالت خالتي خالده كافي بنات عيب احنه مو بالبيت صوتجن سكتن كافييي ... صارت خنسه
خالده : كومي خاله لبسي جبتج حتى نطلع ابن عمتج ندى راح يجينه
براء : رحت لبست العبايه وطلعت واجه علينا علي وصلت للبيت استقبلتني بيبي بوستني
حميده (البيبيه) : يمه حفيدتي كبرت واليوم راح يعقدولها
براء : حضنتها اروحلج فدوه بيبي
ناديه : واني
براء : ههه حضنتها حيل احبج ماما
ناديه : بعد كلبي بنيتي ... يله صعدي لغرفتج ولبسي السيت الابيض راح تجي المشيه بعد شويه حتى وره ميكملون يعقدولج
براء : اوك ... صعدت لبست السيت الابيض ولبست فوكه الروب الي غطه جسمي الحمدلله وكعدت وره ساعه ونص اجت ماما
ناديه : يله ماما تعالي نزلي حتعقدون وخالج بعد كلبي رفع راسي كدام اهل ابوج جايب مشيه شكبرها حتى يخبطج
براء : مااعرف ليش محسيت باي شي عبالك عادي ولا كأن اليوم عقدي
نزلت ويه ماما الي انطتني شال ابيض البسه وكعدت على كرسي يم باب الاستقبال وخلت رجليه بطشت بي هيل و ياس وخلت قران بحضني والتمن البنات يمي يسمعن كلام الشيخ الي من ضمنهن نجمه الي هستوني شفتها وخاله مريم الي تباوعلي بابتسامه ومبينه فرحانه بده الشيخ يحجي وسال زين ووافق وسألني اذا موافقه كولي" نعم وانت وكيلي "
: احس اكو شي خنكني مااكدر اكول نعم حسيت ايد ماما تضغط على ايدي تحثني حتى احجي فجاوبت
براء : نعم وانت وكيلي وتم العقد
ناديه : بستها مبروك حبيبتي يله كومي بدلي لان زين راح يدخل يبلسج الذهب
براء : اوك كمت وكولها باركتلي واني بس اهز راسي مصطنعه ابتسامه احاول اخفي حزني بقدر الامكان
صعدت لبست البدله الي طلعت ويه المكياج تجنن بس فاضحه كولش صدري طالع واديه كولهن طالعات ورجليه هم طالعات لان كولش قصيره صعدن جميله وشمس شافني وكالن
جميله : لج هاي شطالعه اليوم زين ياكلج
شمس : لا لتخافين هي هسه تاكله لان طالع يخبل اليوم وغمزتلها
براء : عززه هذني شبيهن
جميله : هههه باوع الخدود صارت حمر لتستحين حبيبتي اني هم جنت مثلج خجوله بس انحرفت من اتزوجت حسن وانتي هم حيجيج السره وتنحرفين
شمس : ههه ولج كافي عوفي البنيه يله حبيبتي تعالي ننزل
براء : نزلنا واشوف البنات مشغلات ديجي ويركصن والمكياج الاوفر واللبس المشلح عززه هاي بالعقد هيج لعد بالعرس شيسون رحت كعدت على الكراسي الي مزينيهن بالصاله شفت خاله مريم تقدمت الي طالعه تخبل صحيح جبيره بس معتنيه بنفسها هواي الله يحفظها
مريم : مبروك حبيبتي ربي يجعلها زواجه الدهر وباستها
براء : يعني خاله انتي ما زعلانه مني
مريم : بالعكس اصلا طايره بيج وبعدين اكو ام متفرح بزواج ابنها اكيد لا وابشرج من اليوم صارت عندي بنيه رابعه اعتقد تعرفين اسمها مو
براء : ابتسمت ياربي شكد كلبها طيب هالانسانه ... سمعت نجمه كالت بنات لبسن عبيجن راح يدخل العريس
اني سمعت هيج واحس رجليه كامن يرجفن خوف على ارتباك مااعرف اوصف مشاعري بهالحظه شفت نجمه دكت باب الاستقبال حتى يسمعها زين ويدخل انفتحت الباب ودخل زين يمه هاي شطالع لابس قاط نيلي حاضن عضلاته حضن وهو طويل طالع يجنن ورافع شعره ومحدد لحيته مبين هستوه مزين اباوع البنات كامن يسبلن استغفر الله هاي شبيهن راحت خاله مريم بوسته هي وخالاته ماشاء الله عنده كومه خالات وبنات خالات وهو يبوسهن ومبين عليه قرفان مااعرف ليش ..صارت عيني بعينه عززه هاي ثاني مره يصير هالموقف اوف شكد عيب اجه وكف يمي وجان اشوف فارق الطول بيناتنه عزززه هاي شنو عود اني لابسه كعب ويادوب واصله لكتفه لعد اذا انزع الكعب المن اوصل كامن خالاته يسون كولات
: حبها ولك حبها ولتخاف من امها
وعلى عناد عماته ذبن لحم خالاته وهنه صدوك ذبن لحم هههه
خاله زين سمر : بوسها خاله بوسها لتخجل صارت حلالك
نجمه : اي بوسها حباب
الكل كام يصيح : بوسها بوسها
براء : عززه ذني ولا يستحن ... انوب زين باوعلهن ورجع دنك عليه خله شفايفه على كصتي اني جسمي حار نار وهو شفته بارده رجف جسمي كوله اجت خاله مريم جابتله الذهب والحلقات حتى يلبسني انصدمت من شفته شدعوه هلكد مشتريه تره طقم واحد كافي ليش هالكد متكلفين بس لفت نظري طقم على شكل فراشات يجنن اخذه هو وفتح الكلاده وااشر على شعري يعني رفعي رفعت شعري
زين : تم العقد ودخلت البسها الخواتم والذهب اول ما طبيت للصاله اجت امي وخالاتي باركلي وجان تجي عيني على وحده ناعمه لابسه بدله ورديه قصيره عرفتها براء رحت يمها وهذني خبصني يا بوسها يا بوسها دنكت بستها براسي بس جسمها نار وترجف شبيها هاي مصخنه اخذت الكلاده واجيت البسها الها بس اشرتلها تشيل شعرها شالت شعرها ودارت جسمها باوعت لركبتها بيضه كطن وبيها شام هواي وزنودها يلالن ضليت صافن عليها بعدين اداركت نفسي ودنكت لبستها الكلاده واخذت التراجي وهم دنكت لاذنها استغفر الله هاي شطولها انكسرت ركبتي كد ما دنكت صار خشمي يم ركبتها غمضت عيوني واخذت نفس حيل ريحتها تجنن فتحت عيوني وشفت البدله مفتوحه وطالع صدرها مااعرف اذا هو هيج حجمه من الله لو نافخته استغفر الله شبيك زين شنو مراهق انت لبستها الترجيه بسرعه وكتلها انتي لبس الثانيه اخذت الخواتم مدت ايدها لزمتها مااعرف ليش ابتسمت ايدها صغيره ومتروسه مثل ايدين الاطفال
براء : طبعا قرب زين مني كولش اربكني خاصه من راد يلبسني التراجي وخشمه طخ بركبتي يمه اجيت اموت مااعرف اشصار بيه وبعدها لبسنه الخواتم لزم ايدي وحسيت قشعريره تسري بكل جسمي واخذت اني الحلقه واخذت ايده حييل ايده كولش جبيره هذا اذا ضربني راشدي يمكن اموت بساعتها وره ما كملنا صاح لخاله مريم وشاورها وطلع
مريم : اكلج ام محمد عفيه زين يريد يحاجي براء فدوه خل يكعدون سوه
ناديه : ميخالف صيحيله خلي يجي لغرفتي براء ماما كومي ويايه
براء : يمه هذا شيريد مني رحت لغرفه ماما وكعدت انتظره وره عشر دقايق دخل وسد الباب وكعد على القنفه الي كبالي
زين : احنه لازم نحجي بالاشياء الي تخص زواجنه واني عندي بعض الشروط الي لازم تسمعيها وتنفذيها بدون اعتراض حتى نتفاهم سوه مفهموم
براء : بارتباك مفهوم
زين : خوش جاا سمعي
