رواية حرم الاسود الفصل التاسع بقلم بتول ابو الليل
"والرُوحُ للرُوحِ تَدرِي مَن يُناغِمُهَا
كالطَيْرِ للطَيرِ فِي الإنشادِ مَيَالُ"
____________♠___________
آرون : ابوي الي مسجون
بقيت صافنه ومستغربه من كلامه كعدت عدل بلعت ريكي وكلت
_ليش انسجن وبابا شعلي ؟
آرون : تصدكيني اذا احجيلج وتوكفين وياي ضد ابوج
_أذا كلامك مابي جذب اساعدك بس ما اوكف ضد بابا لأن اعرفه كلش زين ميأذي انسان ولا يغلط بحق شخص مستحيل اعرفه اكثرر من نفسي.
آرون : موو كلشي تعرفين عنه يمكن طلعين غلطانه بتفكيرج ابوي جان يشتغل ويه ابوج بالشركه مع هذا خلاه ينسجن ولاهمه ابدد ولافكر بيه.
_يشتغل ويه بابا؟
آرون : اي جان حارس علئ الشركه هذا الحجي قبل سنه ونص تقريباً جان يبقه حارس باب الشركه وياه واحد ثاني.
_ايي وليش انسجن شسووه حته يدخلونه سجن
آرون : ممكن بس تخليني اكمل كلامي
_أي كمل
آرون : جان يشتغل حارس يخلص نهار ليل يشتغل وعمره ماسوه شيء غلط ولا خان ثقة شخص من اهلج بس همه شلوون جازوه اتهمو وخلوه يدخل سجن علئ سالفه هوه لابيها ولا عليها شمروها براسه
_علئ شنوو اتهمو شسوه غير افتهم.
آرون : بيوم ابوج عاقد شراكه ويه شركة ثانيه علمود يشترون مصنع ماعرف شنوو المهم ماخذ نص المبلغ منهم تقريباً يطلع 100 مليون اكثر ومخلي المبلغ داخل الشركه ماماخذه وياه للبيت ولا محوله للبنك
وطالع من الشركه بنفس اليوم مختفي المبلغ ومالكو ربع منه والمشكله موو هنا المشكله الشركه جانت مسدوده وماكو غير ابوي حارس عليها بهذيج اليله
اتهمو هوه الي اخذ الفلوس هل حجي اني جنت باربيل اعالج بأاختي وماكدرت ادافع عنه واثبت برأته.
_اختك عندك اخت ؟
آرون : عندي اخت وحده ومعوقه ماتكدر تمشي وجنت اسويلها جلسات باأربيل عند دكتور معروف مجنت اشتغل بس ادرس هناك لأن ابوي جان مصر عليه حيل اكمل دراستي وحقق حلمه مجان يريد اكون مثله فقير وماكدر اسوي شيء خلاني كملت جامعتي هناك.
_زين يمكن يطلع ابوك صدك ماخذ المبلغ علمود يعالج اختك او محتاجه بفد شغله معينه شلوون عرفت موو هوه الي اخذه
آرون : لاااا اليان لا اني اعرف ابوي اكثر من نفسي انتِ لوو بس تشوفينه فقيييير وماياكل حرام بعمره صايم مصلي يخاف علينه ويجمع الفلوس ربع ربع حته يخلينه مرتاحين اختي يدفع علاجها واني يدفع للجامعه مالتي عمره ماخذ من شخص رغم هوه رجال جبير عمره 52 سنه يشتغل ليل مع نهار ومايكول تعبت حته ما نضوج عليه صدكيني مايسويها وحته لوو يسويها يحجيلي اني ما يضم شيء عليه
بس اهلج لعبو عليه لعبه وصخه واحد اخذ الفلوس وشمر السالفه كلها براس ابوي
_زين انتَ ماكلفت محامي شيء واثبتت برأته ماحجيت ويه بابا هل كلام وفهمته اذا صدك مماخذهن ابوك صدكني بابا يتفهمك وضعكم
آرون : حاولت صدكيني حاولت اول ماسمعت بالخبر خليت اختي هناك ورجعت لبغداد رحت الابوي للسجن وافتهمت الموضوع منه.
كال بليلتها هوه نايم مايدري اذا شخص داخل للشركه بهل اثناء
حاولت اطلعه بكل الطرق ماكدرت رحت لشركة ابوج بس ماخلوني ادخل ولا حته سمعو الموضوع منه طردوني من هناك
خلو ابوي يصعد محكمه وينحكم 3 سنوات علئ شيء هوه ممسوي اليان بس تخيلي ابوج يورطونه بهيج سالفه شتسوين لوو انتِ مكاني ماتساعدينه ماتاخذين حقه ثقي بالله ماخلوو كدامي غير هل حل لامحامي كدر يساعده ولا خلوني احجي ويه ابوج كل مايروح عليهم ويعرفون بيه ابن الحارس يطردوني من الباب حته مايخلوني اشوف واحد م̷ـــِْن اخوانج لوو ابوج ابدد حاولت شكدد اساعده ماكدرت ابدد والفلوس هواي ماكدرت اجمعهن ورجعهن الابوج.
بقيت صافنه ودايخه بكلشي ديحجي معقوله يطلع كلامه صح وابوه داخل سجن ظلم ياربي دخيلك شسوي هسه اصدكه لوو ماثق بكلامه.
_زين شلون شغلك بابا بالشركه وياه ماتعرف عليك وانتَ ابن الانسان السجنه ؟
آرون : غيرت جنسيتي سويت وحده جديده اني اسمي موو آرون اسمي أيسر رحيم **
فتحت عيوني مصدومه شديصير ياربي احس نفسي بحلم موو حقيقه مجاي استوعب شيء معقوله كل هل شيء يصير وبابا ميحس عليه ولاحلا من هاذا مشغله وياه بالشركه.
_مجاي افتهم شيء ولا استوعب كلامك ابدد احسك متحجيلي الحقيقه.
آرون : اليان باوعي لعيوني تشوفين بيهن جذب اقسملج بكل ايات القرآن ماجذبت بحرف واحد عليج ابوي داخل سجن ظلم مامسوي شيء ربع مامخذ من فلوس ابوج
اشتغلت ويه ابوج وحاولت اجمع المبلغ بس ماكدرت هواي واني راتبي قليل وكل شهر ادزه الاختي تتعالج باأربيل عد عمتي
ابوي هم اروحله للسجن واخذله شنوو يحتاج متمرض وحالته حيييل تعبانه بيه قلب اني وحيد بهاي الدنيا ماعندي اعمام لا خوال كلهم مابيهم خير ولا عدهم غيره.
_ليش امك وين عنك مو گلت عايشه هيه ؟
آرون : ههه امي يا ام التحجين عنها اليان امي باعتنه بارخص ثمن شافت ابوي حالته تعبانه واختي معوقه وجانت تلعب نفسها حته ماتغسلها ولا تساعدها بالسبح راحت سوت علاقه ويه عمي تخيلي الموضوع جان يجينه عمي عود ع اساس يشوف ابوي بس هوه يدري بيه يطلع للشغل هيج وقت يجي حته .. ااااخ بويه.
دنك راسه وخله اديه ثنينهم عليه انعصر كلبي عصر عليه احس نفسي ظلمته حيل بتفكيري.
_يعني امك تخون ابوك ويه عمك؟
رفع راسه عيونه مدمعه عض شفته السفليه وهز راسه بأي خليت ايدي علئ حلكي مصدومه
آرون : من عرف ابوي بيهم طلكها وكطعنه كل صلتنه باعمامي وعشنه حياتنه وحدنه بس القدر ماخلانه نعيش مرتاحين اخذ ابونه وتيتمنه واهلنه عايشين بالحياة اختي بديره واني بديره وابوي كل واحد بمكان وكلنه جاي نتعذب بدون سبب ولا مأذين أي بشر بحياتنه ماعرف ليش الناس العدها فلوس تحس نفسها تملك كلشي بالحياة وماتقدر الفقير ولا تفكر عنده عائله راح تدمر وراه.
نزلت دموعي حيل انقهرت عليه صعبه كلش فقدان حنان الام والاب اني امي عافتني لحد هاي الحظه ابجي عليها واحن الهاا رغم ابوي يمي ومامنقص شيء عليه
_شلون اكدر اساعدك شسويلك هسه.
آرون : بس خلي ابوي يطلع كلشي ماريد منكم والله و المبلغ ارجعه الكم ربع ربع ماخلي شيء اسدده كله حته اذا يريد ابوج يخليني اني بالسجن بمكان ابوي عادي مايهمني المهم يطلع لأن اختي مريضه وحيل محتاجته وهوه هم مريض اخاف عليه يموت بالسجن واخسره.
_مستحيل اخليك تدخل سجن وراح اساعدك طلع ابوك من السجن وعد راح اخلي بابا يعرف كل الحقيقه.
ابتسم بحزن وهز راسه بأي بقيت صافنه بكلامه متاكده بابا ميسوي هيج شيء اكيد هاي لعبه من اقاربنه بس منوو ممكن يكون سواها وشمر السالفه براس ابو آرون؟
_اسفه لأن غلطت عليك وحجيت هواي مجنت اعرف الموضوع كله سامحني.
آرون : لاتعتذرين اصلاً ماضوج منج لان حقج تحجين هيج خليتج تخافين وخطفتج اكيد مراح تكونين مرتاحه وياي.
_لو حاجيلي الموضوع من الاول مجان وصلنه لهل حاله .
آرون : مجنت متخيل راح تصدكيني لأن اول ماخطفتج جنتي متخبله وماترضين تحجين شيء وتساعديني
_اممم أي شعرفني انتَ خاطفني علمود طلع ابوك من السجن لوو اعرف جان ساعدتك ومخليت نفسي هيج تتعذب.
آرون : برأيج التصرف السويته وياج صح
_انتَ كلت سويت كلشي وماطلع ابوك واني اشوف هذا احسن حل بعدين اني هسه مرتاحه هنا وتونست هههه شفت حيوانات والهور بعمري مشايفه هيج اجواء بس انتَ حيل خوفتني وخليتني ابجي هواي وغلطت بحقي .
آرون : موو بقصد خوفتج الله شاهد اني عمري ماتخيلت أذي بنيه لأن اشوفج مثل اختي الصغيره واخاف عليج اكثر من نفسي والله.
_ليش
آرون : اخاف يصيرلج شيء واني الخطفتج وجبتج لهنا اني المسؤل عنج هسه اذا صارلج شيء مراح ارتاح بعمري كله ولا راح اكدر اساعد ابوي يدمر كلشي سويت هل خطوه بصعوبه عمري مافكرت اخطف بنيه وأذيها واخليها تخاف اتخيل اختي تصير مكانها شنوو وضعي راح يكون.
_اممم اي هذاك اليوم جان متت شنو جنت راح تسوي بهل حاله.
آرون : تخبلت ماعرفت شسوي من شفتج شبهه الميته بس الحمدالله ربي كتبلج عمر جديد
تذكرت كلام جواهر بلعت ركي ودنكت راسي بتوتر
سكتت و هوه هم سكت بقيت افكر بكلامه واني حايره وخايفه انو بابا يطلع يجذب علئ آرون وميطلع ابوه حته لوو ميطلعه اني راح اطلعه واوكف وياه واخلي يرجع البنته وابنه.
آرون : تعاي نطلع برا
هزيت راسي بأي طلعنه من الغرفه جانت صبيحه مخليه علف كدام الجاموس وياكلن وهيه واكفه يمهن هيه وجواهر رحنه يمهم اني اخاف منهن حيل من بعيد واكفه آرون وكف ومسح علئ ظهر الجاموسه.
آرون : تعاي اليان
_لٱ لا عوفني هنا احسن
جواهر : هههههه اظنها تخاف منهن
صبيحه : خايبه تعاي فقيرات مايعضنج
_لا خاله عوفيني اخاف يزكطني
جواهر : ههههه خيبه وعلي مايسولج شيء فقيرات جاموساتنه تتعاي.
رحت بالكوه اصرو حيل عليه وكفت قرب آرون مديت ايدي اريد الزمها اباوعلها بطرف عين وخايفه حيل
مد ايده آرون خلاها فوك ايدي وخلاهن ثنيهم علئ ظهر الجاموسه.
درت وجهي اباوعله واكف ورايه ولازم ايدي باوع داخل عيوني وبتسم بهدوء توترت كلش سحبت ايدي عنه بسرعه ماريد انعجب بيه اصلاً هوه كال معتبرج مثل اختي شلوون افكر بيه اني.
صبيحه : اكلكم انتم شو لاشغله ولا عمله كاعدين نعلف عليكم مثل الهوش روحو جيبو حشيش للهوايش مالاتي لاتخلوني اربطكم وياهن.
آرون : ههههههههه رحمةالله والديج حجيه سويتينه هوش
_منين نجيب حشيش للبقر عادي نروح اني وآرون احب اشوف الطبيعه اني.
صبيحه : شوف الثقافه ماتكول هوش بقر خاله وين عايشه انتِ بالمنصور؟
_ههههه لا بالكراده
صبيحه : عود صدك لو تشاقين
_والله
جواهر : ماتشوفينها يمه مايعه چا مثل حضي.
صبيحه : چا شبينه احنه الحمدالله والشكر هسه روحو انتَ وهاي المايعه جيبو حشيش للبقرات علئ كولتها ماضل عدي علف الهن واريد احلب الجاموس جايتني طلبيه يردون حليب.
_تبيعين حليب خاله
صبيحه : مو دائماً مرات من يصير عندي هواي وموسمهن احلب وابيع
_أي سامعه حليب الجاموس غالي هوه والكيمر.
صبيحه : چا شلون وين اكوو مثل حليبهن.
آرون : منين نجيبلج شو هور من كل مكان ؟
صبيحه : انتَ بس اصعد وكول للولد ياخذك لمكان الزرع يندله
آرون : ماشي
_اروح وياك
آرون : مو تخافين من البلم
_ههه لا عادي اصعد والزم ايدك ماخاف
آرون : اممم يلا تعالي
صبيحه : ايي اخذها وياك خليها تعلم علئ الشغل مخلينها كلشي ماكو مطفيه اخس مني
_يااا خاله شنو مطفيه اني محاميه ودارسه بارقئ الجامعات ماخذه 3شهدات ع فكره
صبيحه : وشنهي هسه شفرقج عنه نفس الشي كاعده وساكته
دنك آرون راسه وضحك رفعت عيوني ملل عافني وراح آرون رحت اركض وراه اريده ياخذني اريد اطلع حيل مختنكه وضايجه.
_اجي وياك هااا
آرون : ايي اليوم اكرب عليج
_شنوو يعني؟
آرون :هههههه هيج تعاي
_باوع اخاف نروح ويشوفنه شخص ويكول لبابا شلوون بهل حاله؟
آرون : لاتخافين مكانج مايخطر علئ بال شخص بعيد كلش
_شكد نذل وين هالكني
آرون : هاا رجعنه مو ع أساس عرفتي الحقيقه وراح توكفين وياي
_والله كل ماتذكر سوالفك وشلوون خليتني انرعب وابجي شكدد اكرهك وماطيقك
آرون : وهسه؟
_شنوو هسه صرنه اصدقاء
آرون : اكيد صديقتي الزنكيله
_ترا الفلوس موو كلشي بالحياة لاعبالك اني غنيه ومتكبره وكذا لاا والله مختلفه عن عائلتي واخواني أخر همي الفلوس
آرون : يمكن تكون الفلوس موو مهمه عندج لأن شبعانه منهن بس ثقي بالله بدونهن كلشي متكدرين تسوين تتربط اديج ورجليج بدون هل فلوس مجنتي تكدرين تكملين دراستج بارقئ الجامعات ولا جنتي تكدرين تشترين ارقئ ملابس وارقئ عطور ولاتكدرين تسوقين سيارات هذا كله بالفلوس يصير
خطفتج هسه اني فترا وشفتي العذاب بعينج لأن ممتعوده علئ هيج اجواء ولا بعمرج عشتيهن
عايشه حياتج بعز ودلال وخيرر يمكن تكونين مختلفه بشي واحد انوو الفلوس ماخلتج مغروره بنفسج ولاخلتج تتكبرين علئ الفقير هذا الشي الوحيد الي مختلفه بيه عن اهلج.
سكتني بكلامه ماعرفت شنوو اجاوبه مناقشته بالكلام تخليني اوعه علئ هواي امور احسه حيييل مثقف وفاهم الحياة صح.
آرون : يلا ادخلي البسي عبايه وشال حته نروح ماخذج هل شكل عيب
_وين العيب شبيهم ملابسي؟
آرون : شوفي اليان احنه حالياً بين ناس عرب ناس متحشمه الئ ابعد حد ماعدهم مره تطلع بدون حجاب ولا مره تشمي بس بالدشداشه عدهم هل شيء قلت تربيه واخلاق وانتِ هسه محسوبه منهم لأن لبسج منهم واني ماريد أي بشر يمسج بحجايه فأ يابويه البسي بس نروح ونرجع انزعيهن.
طريقت كلامه وياي خلتني اصفن احس عنده حنيه خرب يومج اليان لاتحبينه حته لوو حنين نظراتي فضحني دنكت راسي وهزيته بأي
عفته ودخلت للغرفه گلبي يدك بسررعه حيل متوتره ياربي شديصير بيه هوه كلش محترم وياي ليش تفكيري هيج وياه لازم اضبط نفسي ومشاعري.
طلعت شال لبسته عدل واخذت عبايه خليها علئ كتافي طلعت اديه من الفتحات صارت مثل الجبه عليه
ماكدر اخليها علئ راسي لأن تزلك وتوكع وتسحب حته الشال وياها.
طلعت من الغرفه جان واكف ويخابر من شافني سد الاتصال ابتسم وكال.
آرون : اصيله
ابتسمت ودنكت راسي مدلي ايده حيل متوتره وخجلانه منه متردده الزم ايده ضحك وكال
آرون : تستحين تلزمين ايدي لوو شنو بالضبط؟
_ههه لا مو هيج بس
آرون : بس شنوو
_هيج ولاشي
لزمت ايده لزم ايدي بقوه ومشينه وصلنه لحد جرف الشط شاف واحد اجه بالبلم اشرله علينه اجه نحونه وكف البلم وصعدنه وياه جان جايب وياه آرون" منجل " يحش بيها حشيش.
اخاف حيل من البلم لزمت ايد آرون بكل قوتي وتمسكت بيه هوه ماسوه أي ردت فعل لأن يعرفني خايفه.
گال آرون للولد ياخذنه لمكان الحشيش اخذنه موو بعيد قريب علئ الهور بسرعه بس لاف البلم وطلعنه من المنطقه الي بيها بيت صبيحه وصلنه للمكان.
آرون : تكدر تنتظرنه مانطول عليك
::اي خويه بالخدمه
آرون : حبيبي الله يخليك ..يلا اليان
نزل آرون كدامي ومدلي ايده كمت علئ حيلي عدلت عبايتي ولزمت ايده ونزلت من البلم
مشينه مسافه جان اكوو هوايه عالم تحشش حشيش وكصب " وبردي "
_اكول هسه هذا الكصب شون تاكله الحيونات؟
آرون : بعده اخضر تكدر تاكل منه والبعض يجيبونه موو بس للحيونات يستخدمونه للبناء
_للبناء؟
آرون : أي كل البيوت الي بالاهوار متكونه من كصب واكوو هواي شيوخ عشاير مسويه دواوين من الكصب.
_ياااا وشون يصير
آرون : يصير احلا واضبط من بنية الطابوك
_والله
آرون : وعيونج.
سكتني من كال هل كلمه خلاني اتوتر واخجل هزيت راسي ودرت وجهي عنه شلوون ويه آرون اني.
وصلنه للمكان المطلوب رفع آرون دشداشته تحزم بيها ولف جراويه علئ راسه ودنك يحش.
اني كاعده وصافنه عليه طوله جماله كلش كلش حلوو يالله كامل مكمل اول مره يعجبني انسان لهل درجه.
شفت هواي زلم بحياتي وحته اجانب جانو حلوين بس مارف گلبي علئ أي بشر منهم ليش هوه احسه مختلف عنهم وينتميلي؟
كطعت كصبه وبقيت مدنكه واباوع بيها ودايخه بافكاري فززني صوت آرون يصيح
آرون : شو كاعده ست اليان كومي ساعديني.
_ءءء شسوي
آرون : تعالي يمي اني احش وانتِ سوي
" كاره "
_شنو؟
آرون : يعني هيج شدات شديهم سويه
_ها اربط الكصب اسوي مجموعات قصدك
آرون : بالضبط
نكتت ايدي من التراب وكمت رحت يمه صار يحش حشيش وكصب واني اسطرهم شي فوك شي
سوينه مجموعه جبيره كام آرون وراح علئ رجال يمنه طلب منه حبل انطاه اجه للحشيش لف عليه الحبل حته يكدر يشيله.
دنك وشاله خلاه علئ متنه اني بس صافنه
آرون : يلا امشي
_هيج تمشي ومخلي علئ كتفك؟
آرون : چا وين اخلي ع راسي
_لٱ لا موو هيج قصدي بس موو ثكيل
آرون : چا شسوي غير هاي صبيحه ام البن تريد اجيبلها حشيش حسبت عليه الاكل الاكله.
_ههههههه حيل وياك تستاهل
آرون : أي انتِ تشمتي بيه تشمتي
بقيت اضحك عليه رجعنه لنفس البلم صعدنه خله آرون الحشيش يمنه رجعنه لبيت صبيحه هم شاله علئ كتفه وصله لبيتها اجتنه هيه من بعيد اخذتها من آرون وخلتها علئ راسها ومشت.
_شوف شون مخليتها علئ راسها ولا كانو.
آرون : لوو تشوفين العروبياات من يجيبن كارة حطب تتعجبين
_اكبر من هاي؟
آرون : ههههه هذا شيء بسيط عدهم الطفل يشيله لج بابا يجيبون هوواي علئ روسهم
_شون ميتأذون
آرون : متعودين علئ هذا الشغل
_الله يساعدهم حياتهم حيل صعبه
آرون : أي والله تدرين اجدادي واعمامي جانو مثلهم بالضبط
_يااا وانتَ هم وياهم
آرون : لأ هل حجي قبل لا انولد بس اني اصلي عمارجي من العماره هنا الناصريه
_شنوووو يعني هسه احنه بالناصريه؟
آرون : چا وين
_والله جان كل تفكيري انو اكون بعدني بغداد بس بغير مكان
آرون : ههههه وين اكو اهوار بغداد صدك تحجين
_شمدريني
آرون : امشي بويه امشي
مشينه ثنينه رجعنه لبيت صبيحه راح آرون يتمشه اني دخلت للغرفه لگيت جواهر تسوي بالعجين تريد تخبز
جواهر ; ها خيه رجعتي
_أي حيل تونست
جواهر : شفتي هنا حلوو المجان.
_أي والله كلش حلوو شفنه هوايه عالم تجيب حشيش
جواهر : أي خيه كلها العربان تجيب مناك.
_أي هسه انتِ شتسوين
جواهر : اريد اخبز
_اخبز وياج؟
جواهر : موو گلتي ماعرف
_اريد اجرب
جواهر : أي تعاي.
شالت الصينيه وطلعت شمرت العبايه وربطت الشال علئ راسي ولحكتها خلت الصينيه علئ برميل مال نفط مدري شنوو والتنور مال الطين مشغلته وناره هادئه صايره.
جواهر : يلا طكي خبز وانه احط بالتنور.
_اوك
اخذت العجين اجيبها منا احطها مناك طكيتها شويه انزرفت من اظافري وانشكت بالنص.
جواهر : يااا يااا خيبه مووهيج
_اكلج عفيه راح توكع شلون
جواهر : دخليها ع مخبازه راح تطيح علئ الكاع.
جابتلي المخبازه خليت عليها الخبزه مالتي عشتو هههه ملخه تملخ شبعت ضحك عليه جواهر
جواهر : هههههههه خيه خبزتج طاكها قطار.
_هههههه لاعب بيها لعب
جواهر : لاتخبزين بعد ضلي واكفه هنانه وباوعيلي شلون اخبز وتعلمي
هزيت راسي بأي بقت طك بالخبز وتلعب بيه لعب ولاتلزك علئ ايدها ولا تنشك ابد.
ودخل ايدها بطن التنور ولاتحترك ولاتنجوني اني لوو مكانها جان احتركت لأن ممتعوده ابد.
خلصت كل العجين وطلعت الخبز مكسب يخبل.
شلت الخبز اني وهيه الصينيه رجعنه للغرفه نسوالف نضحك سوينه عشه سويه.
فرشت اني الفراش كدام الباب احس تعودت علئ البيئه مالتهم.
آرون اباوعله كاعد علئ جرف الشط ويسوالف ويه رجال.
صار اليل اجت صبيحه كعدت وآرون هم اجه كعد صبينه الاكل اني وجواهر ونقلناه ع سفره.
كعدنه كلنه سويه نتعشه ابتسم آرون من شافني اشتغل وكال.
آرون : اليان شنوو هل نداره كلهاا.
_ترا شاطره بكلشي اني
آرون : منوو يكول؟
_هههه اني اكول
صبيحه : فدوة لگلبها صدك معدله
_بعد كلبي خاله
جواهر : عود رادت تخبز وياي وماكدرت
صبيحه : يلا تعلم شويه شويه
آرون : منا لحد ماتتعلم تخلص الخبز مالكم حرك وبالتنور.
_المفروض تشجعني موو تهبط معنوياتي
آرون : ههههه اتشاقه وياج
بقينه نسوالف ونضحك تعشينه خلصنه اكل شالت الصحون جواهر ماقبلت اساعدها كالت شويه هنه سوت جاي وكلتلي اروح اصبه الهم
اخذت الصينيه بيها استكاين والجاي رحت كعدت يمهم صبيت الهم صبيحه شربت وراحت تصلي هيه هيج دائما تخلص عشه يلا تروح تصلي علئ راحتها.
_آرون
آرون : ها
_عندي فكره
آرون : شنوو هيه
_خليني اخابر بابا اتصلي عليه
آرون : هسه؟
_أي هسه
آرون : لأ موو وقته هل حجي
_لأ وقته والله متريد يطلع ابوك بسرعه
آرون : اريده يطلع بس اخاف اسوي حركه غلط واتندم بعدين.
_لاتخاف والله اريد اساعدك ثق بيه.
باوعلي بتركيز سحب نفس قوي وهز راسه بأي طلع الجهاز من جيبه واتصل علئ بابا اعتقد آرون كل فترا يغير شريحته حته ميعروفن الرقم رن الجهاز عند بابا فتح سبيكر وخلاه بينه.
جاسر : ألوو منو؟
من سمعت صوت بابا احس گلبي رجف وعيوني انملت دموع حجيت بالهفه.
_بابا هاي اني اليان
جاسر : اليااااان باباتي حبيبتي وين انتِ شلوون كدرتي تخابريني احجيلي انهزمتي منهم وينج انتِ
_بابا اسمعني فدوة
جاسر : احجيلي ياروح ونبض ابوج ولج بويه ولله ليل مانايمه عليج گلبي مثل النار مشتغل وينج باباتي احجيلج وين مكانج دليلني عليج
_بابا فدوة طلع سجينهم خلصني جاي امووت الله يخليك ساعدني خلصني ليش هيج ناسيني صارلي اسبوع واني مخطوفه مانكسر گلبك عليه.
جاسر : هسه بابا هسه اطلعه والله كاعد 24 ساعه ويه المحامي وليوم قدمنه الاوراق وبس باجر لوو لبعده يطلع اصبريلي بس هل كم يوم.
_تمام راح انتظر جيتك لاتنساني احبك هواي اني ومشتاقتلك كلش
جاسر : بس كولي وين انتِ هسه شسوولج أذوج ضربوج هذول الانذال والله اذا مازوعتهم حليب امهم انيي موزلمه
اخذ الجهاز آرون وسد الخط بسرعه طلع الشريحه
_ليش سديته
آرون : اذا تبقين تحجين وياه يوصل لمكانج
_اوووف حيل مشتاقه لبابا.
آرون : سمعتي كلامه بس هل يومين وترجعين لبيتج
_انشالله
آرون : بس كون متطلع النه سالفه وتخرب علينه الوضع كله.
هزيت راسي بأي وسكتت ضم الجهاز بجيبه لزم ايدي رفعت راسي اباوعله ابتسم بهدوء وكال.
آرون : شكراً لأن ساعدتيني وصدكتي كلامي ماعرف شلوون اجازيج صدكيني السويتي الي هسه حيييل جبير
_ماكوو داعي تشكرني لوو شخص غيرك جان هم ساعتده بس انتَ لوو جاي وحاجيلي الموضوع ومخاطفني هوااي احسن اخاف بابا يعرفك وتصيرلك مشاكل.
آرون : مجنت متوقع تصدكيني لأن تعاملت ويه اخوانج وابوج مايثقون بشر ولا حته يحبون العاملين يحسونه صغار كدامهم لأن همه منصبهم اعلئ منه بس انتِ مختلفه جذرياً عنهم اكيد امج هيج وطالعه عليها الله يحفظها الج .
_ايي الكل يشبهني بماما الله يرحمها.
آرون : ميته امج
_أي من اني عمري 16 سنه
آرون : الله يرحمها ويجعل مثواها الجنه
_تسلم
آرون ; تدرين شغله الايام هذني العشتهن وياج احلا ايام بعمري عشنه قصة اكشن والمجرم جان انيي ههههه
_ههههه حلوو وتعترف بهل شيء
آرون : صريح كلش.
ابتسمت وسكتت شفت الفرحه والحماس بعيونه من سمع ابوه راح يطلع اتخيل اني مكانه اكيد راح افرح اكثرر منه لأن الاب ميتعوض.
....
اريانا : لزم بريك تيمور بس ماكدر يسيطر علئ السياره ضرب السياره الكدامنه وخلاها تنكلب واحنه هم انردمت السياره بالحايط
اتفلش الجام علينه عيوني تدريجياً صارت تغوش وراسي احسه صارر موو الي صرت افتح واغمض.
تيمور صار عباره عن دم غمضت عيوني وماحسيت بأي شيء بعدد
مادري شكدد مر وقت واني فاقده راسي حيل يأذيني
كعدت لكيت نفسي بالمستشفى معلكيلي مغذي ومضمدين راسي وامي كاعده يمي.
جميله : ها ماما اريانا شلون صرتي
_وين اني
جميله : بالمستشفى
_شصار
جميله : لازم احنه نسألج شصار موو رحتي ويه صديقتج للمول شوصلج لتيمور وشعدكم طالعين وشلوون صاار الحادث
_مادري مادري بشي
جنت ممركزه كلش ودايخه من الضربه الاخذتها دخل اخوي مسلم وبابا للغرفه
حازم : الحمدالله علئ سلامتج بابا
هزيت راسي بأي اباوع لمسلم يباوعلي بغضب لأن جنت ويه تيمور سحب نفس وكال
مسلم : بابا ماما ممكن تعوفونه شويه
طلعو من الغرفه راح سد الباب وجه كعد يمي سحب نفس وكال
مسلم : احجي
_هاا
مسلم : وجعا احجي شنوو جنتي تسووين ويه تيمور انيي موو بيدي اخذتج للسوك شرجعج عليه وشلوون طلعين وياه بدون علمنه؟
_هوه والله هوه طلب يوصلنه اني ..مادري بشي.
مسلم : عبالج غشيم اني وتضحكين عليه بهذا حجيج
_ خابر انفال وسألها هيه تحجيلك كلشي
سحب نفس قوي وسكت ميكدر يخابرها ولا حته يتواصل وياها دنك راسه يمي وهمس من بين اسنانه
مسلم : اذا عرفت اكوو شيء بينكم اذبحج سمعتي لاعبالج ابوج وامج يحمونج مني اكص راسج بيدي موو اني الاختي تروح تتمعشك و تطلع وتفتر تخليلي كرون كدام العالم
سكتت مجاوبته بقيت منزله عيوني وساكته راسي حيل يأذيني ودايخه كلش حته كلام بالكوه يطلع مني عافني وطلع من الغرفه.
تذكرت كلشي صار بينه حيل جان حقير وياي تيمور شلوون كدر هيج يسوي حسيت بيه جاي يحوس عليه وباله شي
بس متوقعت يكون هيج عباله اني وحده من هذني الي يلعب عليهن ويغشهن بكلامه اذا ماخليته يتندم اني اعلمه.
بقيت بالغرفه اجت امي يمي جابتلي اكل ماكلت لأن لعبانه نفسي ودايخه انطتني الممرضه ابر دخت ورجعت نمت.
...
بقينه اني وآرون كاعدين برا بردت دخلت للغرفه اجيب بطانيه جانت صبيحه مخلصه صلاه وكاعده تسبح اشرتلي اكعد يمها
نزلت بطانيه ولفيتها عليه وكعدت يمها خلصت تسبيح وكالت
صبيحه : وين راح أيسر
_موجود برا
صبيحه : خوش عدي حجي وياج
_أي خاله كولي.
صبيحه : احجيلي الصدك بينج وبين ايسر شيء شو اشوفنه هواي يصفن عليج وحقه انتِ كامله مكمله وتخبلين
_ههه لا خاله والله ماكوو شيء من الي بالج مجرد اصدقاء اصلاً هوه معتبرني اخته.
صبيحه : وين اكو صحبه بهل وكت وبين بنيه ولد
_ليش اكوو هواي يمكن عدكم ممنوعه
صبيحه : اي والله احنه هنانه ماكوو هيج حجي البنيه مكانها بيتها وبيت رجلها لاتطلع للزلم ولا تصادق ولاتحب
_ليش هذا ظلم
صبيحه : لا يمه احنه هيج متعلمين
_والله ماعرف
دنحجي اني وياها ماحس غير دخل علينه آرون يركض وجهه مخطوف اجاني كبل جرني من ايدي
آرون : تعاااي بسرعه
_ويين
آرون : امششششي ماعندي وقت بسررعه
صبيحه ; خايب شبيك تسودنت وين ماخذ البنيه
آرون : لازم نطلع منا بأسرع وقت
_آرون شبيك شكو فهمني
آرون : ابوج عرف مكانه
_شنووو.
لزمني من وجهي وهوه يتنفس بقوه واديه ترجف
آرون : اليان حاولي تساعديني لاتخلينه ياخذج مني اذا رحتي ابوي مستحيل يطلع هاي الفرصه الاخيره كدامي واذا راحت اخسرر كلشي.
هزيت راسي بأي واني متوتره لزم الشاال خلاه علئ راسي ولبسني العبايه لزم ايدي حيل وطلعنه من البيت
سلمت علئ صبيحه وجواهر بسرعه ومشينه صعدنه بلم
آرون : خلي العبايه علئ وجهج
شلت العبايه خليتها علئ وجهي لف ايده علئ ظهري من ورا حته ما اوكع مشه البلم هووواي وطلعنه الكصب والبيوت كلها الدنيا ليل والمكان يخوووف احس گلبي يرجف لازمه ايده وعيوني مدمعه من الخوف وبطني تلويني.
مشه هوواي تقريباً ساعه هيج يلا وصلنه للارض
وكف البلم نزلنه ثنينه انطاه فلوس آرون ولزم ايدي ومشينه بسرعه اتعثر بالعبايه
دخلنه بمكان مكطوع مابي بيوت نهائياً وبس نخل وزرع واصوات تخوف يمشي بسرعه ويجرني من ايدي عثرت رجلي وكعت.
_اااي يمممه
دار وجهه مصدوم اجاني كومني من الارض وكال
آرون : اسف اسف عوفي العبايه ختولي امشي هيج هسه
شمر العبايه مني بقيت بس بالدشداشه لزم ايدي ومشينه يمشي ويتلفت خاف اكوو شخص اتصل جهازه بسرعه رد
آرون : ها جون وينك خرررب وكتها هسه جيب تكسي جيب سيارة من صمد بس تعالي مالكه سيارة بهل وقت ماشي راح انتظرك لاطول عليه
_هاا شنو
آرون : متعطله سيارته وباقي بنص الطريق وهسه راح يخابر صاحبي ويجيب سيارته ويجينه بس سالفه طول كلش لازم نشوف مكان نكعد بيه
_يعني شكد ويوصل النه
آرون : احنه بالناصريه هسه وتبعد بغداد عن الناصريه حاولي 345 كلو متر يعني اذا يجينه بسيارة اقل شيء واذا يمشي سرعه يبقه 4 ساعات.
_هواي يلا يوصلنه اني حيل خايفه آرون المكان يخوف.
آرون : وين اخليج هسه شلون اخفيج عنهم
_ اساعدك اني واحجيلك ويه بابا لاتخاف
آرون : عبالج الموضوع سهل؟ مستحيل يقبل ابوج وهاي اذا ماخلص عليه وهوه جاي وياه فوج كامل يعني مصيري مثل مصير ابوي اذا طحت بين اديهم.
_شلون عرفت بابا عارف مكانه
آرون : جون كالي عنده واحد بالحكومه ينطي معلومات
_والله طلعتو موو سهلين
آرون : تعلمنه الشاطره من ابوج
_لاتحجي علئ بابا انبهك ترا ماساعدك
آرون : ابوج واحد ظالم لايغشج بحنيته عليج طبعاً يدللج لان بنته بس ويه الناس الغريبه لاا تصرفاته غير شكل.
_آرون اخرر مره اكلك لاتحجي عليه
آرون : خلص تمام يلا تعالي
لزم ايدي ومشينه هواي احس رجلي صارت توجعني كعدت جوه شجره لأن تعبت حيل ورجليه صارت تأذيني.
آرون : شو كعتي
_ماكدر تعبت شنوو متحس صارلنه ساعه نمشي وين راح صديقك
آرون : خلينه بس نوصل للشارع العام
_ماكدر والله رجليه صارت تأذيني
آرون : اشيلج
_لااا دير بالك
آرون : اليان اذا نبقه هنا يلكونه عاد خلينه نشوفلنه مكان نكعد بيه كومي
_روح شوف انتَ اني راح انتظرك هنا
دنك شالني من الارض ضربته علئ صدره واني منزعجه
_آرووون نزلني شدسوووي.
آرون : هسه فوك ماشايلج ومكسور ظهري ماراضيه بيج طن لحم
_ياااا والله قصدك سمينه اني
آرون : اسمن مني
_لاتجذب والله رشيقه اصلاً جنت داخله جم والعب رياضه.
آرون : شو مامبين عليج وجهج مدبدب
_ترا وجهي هوه هيج سمين وعندي خدود موو ع اكل شفتني بهل فترا الوياك اكل هواي اني
آرون : لبارحه اكلتي التمن كله
_ياااا شووكت لاتجذب اصلاً ماكلت تمن بس من الدجاجه الي انطيتنياهن انتَ
آرون : لا اكلتي اني شفتج
_والله ماكلت
يحجي وياي اثاري يريد ينسيني حته يمشي بيه مسافه طويله واني فطيره مصدكه كل كلامه
_يلا كافي نزلني صرت زينه اكدر امشي
آرون : خليني شايلج اعتبرج اثقال بالنادي.
_اممم
آرون : اليان
_ها
آرون : اذا نسجنت طلعي ابوي وخليني عادي اني شاب اتحمل بس ابوي لاا رجال جبير ومريض
_ماتنسجن اني ماخليهم يسجنوك
آرون : توعديني
_وعد
آرون : عفيه شاطره
_ادري
آرون : يلا انزلي مو اخذج الواهس
نزلني علئ الارض عدلت ملابسي واني متوتره مشه كدامي اني وراه امشي واتبسم
مشينه هواي وصلنه للشارع العام بقينه منتظرين جيت جون
اتصل بيه آرون كاله ساعه واكون يمك بقينه واكفين علئ صفحه المكان ضلااام وصوت بس الاشجار ينسمع اني خالسه من الخوف
فجأه فزينه ثنينه علئ صووت اطلاق نار ...
