رواية سيرة القدر كاملة جميع الفصول بقلم فجر المساري
القدر هو الذي قدرة الله لنا في حياتنا وكل مايحدث
لنا مكتوب ومقدر لنا… .
راح احجيلكم قصتي والاحداث الي مريت بيها
من وعيت ع الدنيا يتيمة الاب وبعمر 3 سنوات
صرت يتيمة الام وصرت يتيمة الاب والام وتوفت
امي سمية… .قصه جديده واقعية…
...سراب لاح الافق ام ايامي اصبحت كالسراب…
اسمي ســراب عمري 18 سنه طالبه معهد معلمات
مرحله رابعة صاحبة عيون ملونة بشرتي بيضة
وشعري اشقر وطويل متوسطة الطول وجسمي
متناشق ورشيقة ورموشي طويلة …
اني الوحيده لامي لان ابويه تئاسر بحرب ايران
وامي جانت حامل بيه…
جنت اتمنى ادخل للجامعة واكمل دراستي…
امي سمية جانت معلمة وتزوجت ابويه عن حب
اخت صديقه شافها وحبها وتزوجها ..
امي حلوه وزغيره وهوايه اتقدموا الها بس جانت
ترفض الزواج وجانت ع امل يجي يوم ويرجع
زوجها وحبيبها صالح…
سميه صبرت ع حجي الناس الى ان اجتي بنوتي سراب لدنيا ونورت حياتي سميتها سراب لان بقيت انتظر ابوهه يرجع بلكي بيوم من الايام ..
بقيت عايشة بيت اهلي بعد ان فقدت زوجي
لان نسوان حمويني يسوولي مشاكل…
ربيت بنتي سراب وحاولت ماقصر وياهه باي شي
او تحس بنقص فقدان والدها صرت الها الاب والام
بنفس الوقت وهالشي صعب…
وسراب محبوبه بيت جدها اهل ابوهه والكل يحبها
وبدت المضايقات لان سمية حلوه وزغيره بالعمر
وعانت من اهلها واخوانها وبدوا يحاسبوها ع
لبسها وع كلامها وتعاملها وبلطلعة والطبة
لان جانت معلمة وعدها دووووام ..
جانت امي ع تواصل دائم بيت جدي اهل ابويه
وكل خميس تاخذني نروح لبيت جدو علي
وجانوا كلش يحبوني ويصيحولي غاليه بنت الغالي
ولان امي اصغر الجناين واحلاهن بدت الغيره
بين زوجات الاخ ( زوجات عمامي ) عبالهم امي
تريد تاخذ منهم ازواجهم…
وبدوا يسوولها مشاكل ويه اهل زوجها ..
ويحجون عليها حجي ويتهموها الى فد يوم
طردها جدي علي من البيت واخذوني منها واني
ابجي واصيح ماما وجدوا لازمني وامي تبجي
وتتوسل بي لا ياخذني منها ونزلت ع رجله تتوسل
بي دفرها وجرها وطلعها من البيت… برا وبقت
امي تبجي وتصيح اسمعها واني ابجي… واصيح
اريد ماما…
سمية… كل خميس اخذ سراب لبيت جدها فد يوم ورحت عليهم…
فتحت الباب مرت حمايه الجبير سلوى هيه متحبني
من اول يوم دخلت بي لهذا البيت ماعرف ليش
كارهتني سلمت عليها و دخلت جوه كعدت وسراب
تلعب يمي… واني كاعده ..
واجه عمي غلط وحجي واخذ مني سراب
وتصيح ماما وتبجي واني اتوسل بي وماعرف ليش
هيج سوا بيه ونسوان حمويني واكفات ويضحكون
طلعني برا وسد الباب وابجي واكله عمي اخذ روحي
ولا تاخذ سراب مني سراب روحي والله اموت بدونها
من اخذو سراب مني طلعوني بالشارع بقيت ادك
بالباب والعالم تباوع عليه بعدهه اخذت تكسي
ورجعت للبيت وطول لطريق ابجي…
وصلت للبيت وابجي واشهك شافتني امي اجتي
عليه تركض شبيج يمه كعدت بالكاع واشهك بلكوه
احجي. مرت اخويه اسراء ركضت جابتلي كلاص
مي شربت شويه وحجيتلهم شصار واتوسل بيهم
يرجعولي سراب راحوا اخوتي،ورجعوا كالوا
جدها ميقبل يرجعها يكول بتنه واحنه اوله بيها
بقيت ايام ابجي وحته دوووامي بالمدرسه تركته
والاكل قطعته وتمرضت ودخلت للمستشفى
وعمي ميقبل يرجعلي سراب ولا يخليني اشوفها
وذبلت يوم عن يوم اكثر وتدهورت حالتها الصحية
ودخلت مستشفى وبقت ايام وحتار الاطباء بحالتها
وبمرضها…
واني بقيت بيت جدو علي ايام ومعامله زوجات
عمامي الي موزينه كلما اكول اريد ماما يصيحون
عليه…
وسمعوا بحاله سمية خطره…
سمية جنت نايمة واسمع صوت سراب تكلي ماما
جنت اتصور نفسي احلم وفتحت عيوني بتعب
شفتها كبالي ع السرير كاعده وعمتي وحماي
حيدر وياهه بالغرفه… وهيه بيدها الصغيره الناعمة تتلمس وجهي وتكلي ماما كومي نروح للبيت
ابتسمتلها بتعب ودموعي نزلت وافكر بيها لو اموت
شنووو راح يكون مصيرها الدنيا ظالمة وماترحم
مارحمتني الي… ترحمها ..الها…
حضنتها بقوه وبقيت اشم بعطرها وابوس بيها شكد مشتاقتلهاواتلمس شعرها الحلو وعيونها وملامحها الطفولية ودمعت عيوني اخاف اموت واتركها
وحدها بهاي الدنيا مثل ماتركنه ابوها الدنيا ظالمة وتوجع حضنتها ونامت ونمت وياها…
الممرضه نادية… اجتي مريضة حالتها خطره
الاطباء احتاروا بيها بقت ايام وهيه حالتها يوم عن
يوم اسوء وتنام وتكعد وتصيح بنتي سراب
وبقت يومين ع هالحال وفد يوم واني بالغرفه
اقيس ضغطها دخلوا مرة جبيره بالعمر ورجال
وياهم بنوته صغيرة عمرها تقريبا 3 سنوات
شافت امها ركضت عليها وكالوا احنه اقاربها واني
طلعت بعد ساعتين عدها علاج دخلت للغرفه لكيت
سمية نايمة وسراب نايمة بحضنها اقتربت منها
حاولت اكعدها مكعدت خفت رحت صحت الدكتور
المشرف ع حالتها وسراب طلعوها برا تبجي وتصيح
ماما اريد ماما…
اجه الدكتور وفحصها وكال ماتت…
انقهرت عليها كلش .. واخذوها ..
سمية مااتت بعز شبابها وسراب خسرت امها وابوها
وخسرت كل شي حلووو وياهم وهي طفلة
واخذوا سمية ودفنوها وسووا فاتحه وسراب
متعرف شي طفلة عمرها 3 سنوات…
وهي طفلة انحرمت من حنان الام والاب ومحبتهم
اخذت سراب…
ام سمية حجية نعيمة هيه اخذتها و ربتها وعلمتها
والحلال والحرام والصح والغلط…
وربتها احسن تربيه ومرت الايام وكبرت سراب
وجانت سراب كل خميس وجمعة تروح لبيت جدهاعلي اهل ابوهه وعمامهه وعماتهه جانوا
يحبوهه ومقصروا وياهه ...
سراب… جنت كل ماروح لبيت جدو علي عندي
عم اسمه عادل مهندس ويشتغل بالبصرة مستقر
ومتزوج هناك وحالته الماديه كلش زينه وعنده 3 ولد وبنات 2 وحده ويجي بس بالاعياد والمناسبات
لبغداد لاهله ويجيب وياه اشكال الهدايا والملابس
اما حصتي جانت من كل شي يجيبه الهم وجانوا يصيحولي
الغاليه بنت الغالي…
اني بطبعي مطيعة وهادئه وحبيببه بيبي نعيمة
جنت استلم راتب امي الله يرحمها تقاعدي وعندي
راتب ابويه جنت اصرف الي احتاجه والباقي اضمه
وجنت كل سنه اسوي قطعه ذهب واضمها لزمن
حجيه نعيمة تكلي سوي ذهب متخسر زينه وخزينه
وجانت تكلي اخاف عليج من الزمن متعرفين شنوو
ظامه الج ..
يفيدج بايامج السوده ومرت الايام وصرت بالمتوسطه وجنت شاطره كلش واحب الدراسه
ونجحت من لصف الثالث متوسط وجنت افكر
ادخل علمي لو ادبي…
بس للقـــدر راي اخر…
حجيه نعيمة خافت عليه ومارادت اروح كليه
لان احنه بالانبار وتخاف عليه…
اروح اقسام داخليه فسجلتلي بمعهد المعلمات.
سراب… جان حلمي اكمل دراستي وادخل كليه
مثل بنات عمامي فضة وصفا وامال ..
عندي 3 عمام و2 عمات…
واتعرف ع شاب ويحبني واحبه ويجي يخطبني
ههههههه… واحجي ويه نفسي ولج شبيج تحجين
ويه نفسج تخبلتي،معقوله يجي هذا اليوم والبس
واخلي كحله بعيوني…
طبعا ممنوع اخلي مكياج الا ازوج… ميقبلون ..
جنت واكفه ع المرايه واحجي ويه نفسي … اندكت الباب
ودخلت حجيه نعيمة … .
وكالت سراب سجلتلج بمعهد… المعلمات اني
اتخبلت وكمت ابجي بيبي ليش هيج…
اريد اكمل كليه مثل بنات عمامي مااريد معهد
معلمات وبلحظه حلمي اتبخر…
بيبي الله يخليج اريد اكمل دراستي مثل باقي
البنات حاولت اقنعها بس مقبلت ولاعمامي ولا خوالي قبلوا اكمل دراستي ..
حاولت اقنعهم بس مفاد وبدت السنة الجديدة
وصار اسبوع ع الدوام بالمعهد،
واني مقبلت اداوم ..بالمعهد،وابجي واتوسل بيهم
وكالوا لو داومين بالمعهد لو تكعدين بالبيت ماكو
دراسة وانجبرت اداوم . غصبا عني ودمعتي بعيني
اووووف…
لو هسه امي وابويه موجودين جان خلوني
اكمل دراستي واحقق حلمي ...
اجتي لصبح حجية نعيمة تكعد بيه وتمسح ع راسي
وتكلي ياعيني كومي… روحي لدوام
كمت غسلت ورحت حضرت ريوك بالكوه داومت
اول يوم بالمعهد لبست قميص ابيض وتنورة سوده
وجنطه وشال لون وردي وطلعت اجه ابو الخط
وصعدت واني ساكته الى ان وصلت للمعهد
نزلت بلكوه اجر بنفسي واحجي،لا مو هذا حلمي
وطموحي… ومرت الايام عادي وماعندي واهس
لدوام ولا الدراسه وبديت ادرس ع كد النجاح وبس
ماريد معدل طموحي وحلم حياتي راح مني،
مثل ماراحت كل احلامي…
وهما حدددو قدري،…
من ارجع من المعهد اساعد بالبيت حجية نعيمة
بتنظيف البيت،ومرت الايام بس الطبخ متقبل احد يطبخ…
هيه تطبخ واني اكمل تنظيف واروح لغرفتي وغرفه
حجية نعيمة اني انام يمها بنفس الغرفة اقرا ومشت الايام والسنوات…
وصلت لمرحلة رابعة بالمعهد وبعد سنة واتخرج
وفد يوم رجعت من المعهد ودخلت للبيت وشفت
بيت جدي علي اهل ابويه وعمامي جاييتن
ودخلت بملابس الدووام سلمت عليهم وطلعت
رحت ابدل ملابسي،واندكت الباب وصاحتلي وسن
بنت خالي سعد وكالت حجية نعيمة تصيحج
كتلها هسه اجي لبست شالي وطلعت، دخلت لصاله
وكعدت والكل يباوعلي شنووو القصه ..
حجية نعيمة اندارت عليه وكالت بيت عمج عادل
جايين اليوم يخطبونج لابنهم ياسر…
سراب… من سمعت هالكلام انصدمت بقيت صافنه
مكدرت احجي،لا ارفض ولا اوافق خفت من عمامي
بيت عمي عادل جانوا عايشين بالبصرة،بس بسبب شغل عمي عادل…
انتقلوا لبغداد واشتروا بيت بالمنصور ...
كمت ورحت للغرفه وكعدت ابجي على حظي
يقررون مصيري بكيفهم شنووو اني وين رايي
بقيت ابجي الليل كله سمعتني حجية نعيمة وحصنتني وتمسح ع راسي
بيبي الله يخليج ماريد اتزوج اريد اكمل دراستي
وهيه اتكلي البنيه مصيرها الاول والاخير الزواج
وانتي يتيمة واني خايفه عليج بعد ماموت وين
تروحين…
واني من سمعت عمج عادل رايدج لياسر فرحت
وكلت سراب راح تزوج ابن عمها راح يحبها ويصونها
ويحافظ عليها وتبقى بين اهلها واموت واني
مرتاحه… عليها لان يتيمة وماعدها احد وراح
تبقى قريبه عليه…
سراب… مااريد اتزوج…
بيبي هاي قسمتج قبلي بيها
خلي اطمئن عليج قبل لا اموت…
بقيت ساكته ومحتاره…
كتلهم اوافق بس بشرط… كالوا شنو شرطج
كتلهم اكمل دراستي واتعيين كالوا ماعدنه مانع
وبعد اسبوع صارت الخطوبة واجوي عمامي وعماتي
سوينه حفلة بالبيت بس العائله والكرايب ..
كعدت الصبح والبيت مخبوص وعماتي اجوي من
الصبح واخذوني لصالون ولبست بدله لون ذهبي
ومكياج سموك ذهبي وسويت شعري تسريحة
وحمره ماروني طلعت اخبل كلها تكلي شنو هالجمال
هنياله لياسر،.. واني ابتسم،…
واجه عمووو اخذنه من الصالون وادخلت للبيت
والهلاهل واجت حجية نعيمة وحضنتني وباستني
هيه جانت الي الام والاب بعطفها وحنانها وخوفها
عليه وطيبه قلبها…
وعقدنه سيد واجه ياسر كعد وباس راسي و لبسني الذهب مداليه
والسوار والحلقه،واني هم لبسته الحلقه واشوف
الكل فرحانين ويركصون ..
ويغنون وخلصت الحفلة وكالوا بعد شهر الزواج
ناخذها ويانه .. وثاني يوم عقدنه بالمحكمه بغداد
ولبست تنوره بيج وقميص زيتوني وشال وجنطه
لون بيج… وحجية نعيمة كلش فرحانه .
كملنه وطلعنه من المحكمة ورجعنه للبيت
والكل فرحانين بس اني بداخلي ممرتاحة
بس جنت ابتسم… حته مبين هالشي ..
وطبعا حجية نعيمة فرحت لان راح اتزوج ابن عمي
لان تتوقع هو الي راح يصوني ويحبني ويخاف
عليه وابقئ قريبه منها…
وكلتلي اموت واني مرتاحه…
حضنتها… اسم الله عليج بيبي
لا بيبي كل واحد ويومة… وهاي دنيه ممضمونة
وانتي يتيمة ومالج احد بهالدنيا ..
سراب… اني ماعرف ياسر…
يمكن مرتين شايفتة بيت جدي علي اهل ابوية
بس السلام بينه ..
بس من كلام بنات عمي عنه ومدلل وماعنده
حس المسؤليه… خفت منه ..
بيبي… ياسر ماعنده مسوليه ومدلل
يمه بعده شاب… من يزوج يعقل ويصير
عنده مره وجهال ويتحمل مسؤليه…
ويتغيير…
سراب ..طلعنه اني وحجية نعيمة
جهزوني من كلشي ومن احسنه …
وعمي انطانه فلوس وكال انتو جهزوا بكيفكم
واشتريت ملابس وبدلات ومكياج وعطور
ودانه عمي ومن كملنه دكينه عليه ياخذنه رجعنه للبيت
رجعت هلكانه من التعب من هالكد مافترينه ..
بدلت ملابسي وتغدينه…
ورحت اتمددت واني افكر…
وعايشه رعب وحرب نفسية ..
واني بداخلي مرايده هالزواج… من جهة
واشوف الكل فرحانين ..من جهة ثانية،..
ومنتظرين العرس يصير ..
مثل ميكولون… العرسان اثنين
ومجانين الفين،.. ومحد يعرف اكو قلوب تنكسر
وقلوب تموت وقلوب تنسعد…
حجية نعيمة.. خابروا بيت عمج عادل ..
سراب… شرادا يكولون بعد اسبوع يجون
ياخذوج حضري نفسج
ليش… وين،…
حجية نعيمة… ابيت عمتج نسرين حته يحضرون
مراسيم العرس ويسوون حفلة حنة هناك…
سراب… اهاااا… عمتي نسرين متزوجه بغداد
وخابر عمي بلليل وكالوا باجر يجون نروح لبيت
عمتي نسرين حته يسوون حفلة الحنة هناك
واني جنت محضره جنطي ..قبل اسبوع
كعدت الصبح سويت ريوك واتركنه وسبحت
وبدلت واجوي سيارتين،..
سياره عمي وزوجته وحجية نعيمةوياسر
والسياره الثانيه… خوالي وزوجاتهم…
وصلنه لبيت عمتي نسرين ودخلنه جوه
وحضرنه للحنه رحت لصالون ولبست بدله لون
ماروني. مفتوحه من الظهرومن الصدر بيها تول
ومنفوشه وبالصدر شغل ذهبي كلش حلووو
وسويت شعري تسريحة ومكياج والحفلة
جانت بسيطة بس الاقرباء والاهل وكلش حلووه
كملنه واجه عموو اخذنه اني والبنات من لصالون
دخلت للبيت شافتني حجية نعيمة…
وبوستني كعدت وكعدت يمي والكل فرحانين
ويركصون واغاني ..
فد ساعه وفات ياسر جان لابس قاط
لون رصاصي وقميص اسود ورباط رصاصي
طالع حلووو.. كعد يمي ومحجه ولا كلمة
وكلت هذا شبي ..وحناني وبعدهه
بعد مخلصت الحنه…
طلب نطلع حته يحجي ويايه وحدنه
ونفتر بالسيارة … وافقوا…
سراب… صعدت بدلت ملابسي، وخففت المكياج
ولبست قميص ابيض بي ورد بنفسجي وشال
بنفسجي وجنطة وتنورة سوده… ونزلت
ياسر… يله ولزمني من ايدي وطلعنه
وصعدنه بالسيارة كعدت يمه ليكدام
وشغل السيارة ومشينه وهو ساكت وشغل
مشغل اغنية،… كاظم الساهر
وهو يسوق وساكت واني ساكته ..
واحجي بكلبي مو طلعنه حته نحجي
شووو ساكت…
وبقه يفتر بيه،… بالسيارة بعدهه اندار عليه
وكال… جوعانه ..
كتله… اييي ..وكف يم مطعم،… ونزلنه
وكعدنه ع طاوله وجان المطعم كلش راقي وحلوو
وهو طلب اكل… مشويات ومقبلات
ومحجه شي ..اكلنه وكملنه
كمت رحت للمغاسل،غسلت ورجعت وبقه ساكت
وكلي يالله،..
خلي نمشي،نرجع للبيت… وصعدنه بالسيارة
ومشينه وهو يسوق طلع باكيت جكاير ورث
جكارة وكام يشرب وينفخ الدخان بوجهي
خفت منه وكتله…
ياسر،… خنكتني شبيك،..اختنكت ..
باوعلي ويحجي باستهزاء… هاااا
الغالية بنت الغالي…
خفتي دمعت عيوني… ودرت وجهي ..
وكال ..هااا راح تبجين وكام يسوق بسرعه
خفت كلش وصحت مخبل راح نسوي حادث
رجعني للبيت،… ونتر بيه اششش ولا كلمه
وكف مقابيل عمارة،…
ياسر ..وين جايبني رجعني للبيت كتلك،
نزل… وكلي نزلي واندار وفتح باب السياره
وجرني بقوه من ايدي ونزلني ..
ويجر بيه وصعدني فوك وهو يجر بيه واني
اصيح واكله رجعني للبيت وابجي عفيةعوفني
وين ماخذني وهو ساكت ويجر بيه
فتح باب الشقه ودخلني ودخل وقفل الباب
ودفعني وكعت بالكاع واني اصيح عليه…
ومن هنااا راح تبدي قصتي وعذابي…
