رواية السكن كاملة جميع الفصول بقلم غدير الحيدري
تحية طيبة
نظراً لكون الرواية تحملُ الكثير من النزاعات الطائفية والمذهبية اود لفت انتباهكم قليلاً، الهدفُ منها لا يكمنُ في زيادة الزعزعة بينَ افراد الشعب العراقيُ العظيم، انما تعزيز التلاحم الوطني بيننا كافة، توضيح وجهات النظر، والسير قدماً لبلوغ السلام
هنا ستجدون المسلمُ والمسيحي، السني والشيعي فأنتم مجبرون على الإحترام.
اي نزاعٍ طائفي في التعاليق سيواجه بالكتم والحظر
غدير الحيدري
بقلمي
غدير الحيدري
......
صباحنا ليس مثل كُل الصباحات
هذا الصباح مُشرق
يحملُ بينَ نسماته عبيرُ بغداد
بغدادُ الحُب والسلام
بغداد الحضارة
عروس العراق وقلبه النابض
ومسرح العلم ومرسى العلماء
......
عطاء
كنت اباوع للشقة
تحتاج تنظيف وتعديل
الاغراض بكل مكان
هفف
فتحت الشباك
هبت نسمات الهوى وحركت شعري
الله يا بغداد
صح راح نسكنج مؤقتا
بس انتي ساكنتنا من زمان
جرتني ضوية من ايدي
وكالت بنبرة انزعاج
وصوت ناصي وهي صاكة اسنانها
ضوية: متأكدة من ذول البنات اللي ويانا خوش بنات؟؟ لو هيج مسكنتهم ويانا
ابتسمت وكلت بهدوء
وانا احاول اخفف من خوفها
عطاء: شبيج ضي لتخافين ذول البنات بضمانة عمي هو كال لابوية خلي تكعد عطاء وصديقتها بالشقة وانا اجيب وياهم طالبات ع معرفتي وابقى اراجعهم كل فترة والمنطقة امنة يعني لتخافين
صارت تباوع للمكان
وهي تكول
ضي: احس تندمت من اجيت لهنا جاي افكر بأهلي ومدري ممرتاحة لهاي ام صبغ اظافر
بهالاثناء سمعنا اصوات البنات بالغرفة الثانية
زهراء: يعني ميصير هيج من البارحة اجيتي والاغراض بعدهي بالكاع كومي حبيبة احنا منا متأخرين ع الدوام اسبوع
حبيبة: اوي زهراء تدرين بية مااحب اشتغل وهالوحدة لأهلي ومدللة عدهم ويني وين حياة السكن، اكلج يصير انطيهم فلوس ويشتغلون بمكاني؟
اباوع لضوية طلعت بسرعة
عرفت راح تصير مصيبة
لحكتها وهي راحت تتهجم ع حبيبة
ضي: احترمييي نفسج واوزنييي كلامجج احنا مو خدم عندج
حبيبة خافت منها
وانا جريتها
عطاء: ضي ع كيفج اهدي جاي تتشاقة متقصد
غمزت لحبيبة وكلت
عطاء: تتشاقين مو؟
كالت بخوف
حبيبة: اي اي اتشاقة مااقصد ابد
ضي: خليهااا معلومة ببالج انااا صح بنت فلاح بس مو معناها خدامة عندج كل واحد هنا بالبيت يعرف حدودة وشغلة ويحترم نفسة
جريتها وانا اكول الها بهدوء
عطاء: كافيي ضي الموضوع ما يسوى تكبري كلنا خوات يلا امشي كملي تبديل حتى نروح تأخرنا ع الجامعة
عافتني وراحت وهي عيونها مدمعة
باوعت ع البنات وكلت
عطاء: بنات اعذروني ترا ضوية كلبها طيب بس هي شوي عصبية انتو اكيد راح تتعودون عليها وتشوفون شكد كلبها طيب
زهراء باوعت ع حبيبة وهي منزعجة منها
زهراء: البنية حقها وحبيبة تعيل مو لازم تحجي هيج
كلت بأرتباك
عطاء: اااا راح اروح اكمل تبديل، تداومون اليوم؟!
كالوا بوقت واحد
حبيبة: اي
زهراء: لا
حسيت الاجواء متوترة
زهراء: لا عطاء منداوم اليوم الشقة هواي مخربطة لازم ننظفها ونعدلها داومي انتي وضوية واحنا راح ننظف ونسوي غدة وان شاء الله باجر نداوم
كالت حبيبة بأنزعاج
حبيبة: بس احنااا صار اسبوع ما مداومين وهيج راح نتأخر اكثر
زهراء: من البارحة انتي هنا بس بسبب كركبتج الزايدة ما نطلع للجامعة
نطتها الماسحة
وانا ابتسمت بمجاملة
وطلعت وانا امشي عثرت بالجنطة
كلت
ضي: اعتذر
زهراء: عادي
مشيت واسمعهم وراية يحجون
زهراء: شفتي شلون فشلتينا ؟ وشلون عيب من البنية شقة عمها اذا ع طول السنة تبقين بهالبعثرة هاي ماابقى وياج بغرفة وحدة
حبيبة: اووووه شراح يخلصنا ترا بفلوسنا جايين مو ع حسابها ولا كرم زايد منها
تنهدت
بعدها السنة بأولها
اخذت ضوية وطلعت
كنت امشي وانا احس بتفاؤل
وضوية تمشي يمي مرتبكة وخايفة
تعدل بحجابها
كالت
ضي: يمكن ابوية عندة حق من رفض جيتي لهنا ماادري احس المكان مو مكاني
عطاء: يمعودة كولي يا الله وشوفي بغداد شلون حلوة صدكيني راح تتعودين
العمارة كانت قريبة ع كلياتنا
افترقنا وكل وحدة راحت لكليتها
وقبل ما نفترق اتفقنا بنهاية الدوام
نلتقي عند هذا المكان
ونرجع للسكن
وخلص الدوام ما بين هوسة المباشرة
وارتباكي كطالبة مرحلة اولى
رجعت وشفت ضوية تنتظرني
تعدل بنظارتها وخايفة
من بعيد الاحظ توترها
يا ربي وي هالبنية
ابتسمت ووصلت الها
وكلت
عطاء: ها ضوية دنطي عطوة لروحج وكافي خوف
زفرت بقوة وكالت
ضي: الف الحمدلله يمة هسة ارتاحيت حسيت نفسي ضايعة
عطاء: احجيلي شلونة الدوام وياج؟
ضي: ما شفت شي بس سويت المباشرة
عطاء: انا هم اساسا احنا رايحين متأخرين والكلية ازدحام مدري احنا ما نندل
وصلنا قريب ع السكن
كالت ضوية بعصبية
ضي: هذا شعندةةة جاي لهنااا؟
عقدت حاجبي
شفت شاب واكف ينتظر كبال باب العمارة
ضوية وين تعرفة!؟
اباوع لضوية راحت بسرعة
تهجمت علية وهي تكول
ضي: شعندك جاي لهناااا؟ وشمدريييك هذا سكنيي
الشاب بالبداية انصدم
بعدين صار يبتسم
كال بهدوء
حسين: هنا ساكنة انتي؟!
سحبت ضوية ع جهة وعيني علية
كلت
عطاء: يمكن صاير سوء فهم
باوعلي وهو يبتسم
احس كلبي خفق دون قصد!!
دون قصد ابدا..
ضوية بعدها تحجي وتهوس
وانا احس انعزلت عن العالم
بهالاثناء اجت زهراء تركض
وكفت ما بين ضوية
وبين الشاب وهي تكول بخوف
زهراء: ضوييةةة شبيييج هذا حسين اخوية
باوعتلة وصفنت علية
وهو يباوع ع ضوية ويبتسم
ما باوعلي ابد..
حسين!
اخو زهراء!؟
رجعت لوعيي وصرت ارمش
سحبت ضوية وكلت بأرتباك
عطاء: اااا اعذرونا صار سوء فهم وضي ما تدري هذا اخوج ههه خافت عبالها واحد غريب
كال
حسين: لا ولا يهمكم عادي
وهو عيونة ما نزلت عن ضوية ابد
وضوية تخزر بي
اخذتها حتى نصعد كال
حسين: انا اعتذر منكم بس اجيت حتى اتطمن ع اختي واحنا طلعنا ساكنين بنفس الشارع وذيج العمارة اللي احنا بيها اذا احتاجيتوا شي ما نقصر
صار يأشر ع عمارة قريبة منا
ضوية سحبتني ودخلنا
وهي تكول
ضوية: من شافنييي بالجامعة وهو يبتسم موتنييي ووين مااروح اشوفة صرت اخاف منةةة
كلت بأرتباك
عطاء: اذاج بشي؟ تحرش بيج؟
ضي: لااا
عطاء: جا شبيج منفعلةةة؟
مشت كدامي وهي تكول
ضي: ماارتاحيت الة خفت منة
ابتسمت وكلت بهدوء
عطاء: بالعكس مبين هواي محترم وخوش ولد
التفتت علية وكالت بعصبية
ضي: جايين ندرس مجايين نحب
كلت بأرتباك
عطاء: شبيج ضوية حب شنو؟! بعدين هو يباوع الج
ضي: اخذي الج انتي انا مااريد
ودخلت للشقة
بقيت واكفة بالباب
خليت ايدي ع كلبي الينبض بقوة
وكلت
عطاء: اخذة الي؟!
.......
في العمارة المجاورة
في احد الشقق القديمة
سراج: ايييي اخذة الك مو انت جبتة
حازم: لا عيني لا انا جبتة حتى يكمل العدد ونحل مشكلة الايجار بس انا سريري هنااا يمك وهو راح ينام بالغرفة الثانية يم حسين
هز ايدة وكال
سراج: لااا هواي راح يتفاهم وي حسين
حازم: انااا رتبت اغراضي وفراشي بهالغرفة ماابقى انقل بيها شنو السالفةةةة
بهالاثناء اجة حسين
كال
حسين: شبي حسين سمعت اسمي
كام سراج من مكانة
وكال وهو يأشر علية
سراج: هذا الشفية جايبلنا واحد ما نعرفة منو ويريد يسكنة ويانة بالشقة
حسين: طالب هو؟
حازم: اي طالب
كال حسين وهو يمشي
حسين: اذا خوش ولد شنو المشكلة؟
سراج: المشكلة راح ينومة يمك بالغرفة
التفت علينا
وكال
حسين: وشنو المشكلة؟!
خليت ايدي ع حلك سراج وكلت
حازم: يابةةة دصلوا ع النبي ماكو اي مشكلة ومعليك بهذا حاروكة يريد يسوي مشاكل الولد خوش ولد
حسين صار يفتح بقميصة
ويكول
حسين: زين مجاي افهم وين لكيتة وشلون لحد البارحة احنا موتنا روحنا وما لكينة احد يسكن ويانة
حازم: يابة كنت طالع للدوام شفت الولد حاير بجنطة واغراضة رحت علية كلت اساعدة بعدين من سألتة هو جاي ديسكن اقسام وشايف وضعية الاقسام هوسة ما مرتاح الها عاد فكر يأجر شقة وشفتة مناسب واحنا محتاجي كلت خلي يجي ويانة
كال سراج وهو مو مقتنع
سراج: حسين راضي؟
حسين: اذا خوش ولد شكو بيها بس المهم نخلص من ابو وديع اللي كل يوم خابصنا علمود الايجار يريد ٢٠٠ والشقة ما تسوالها ١٠٠
كال سراج بأستهزاء
سراج: الله يهني جرادة بحجي عصفور بس اذا صار المكافش للشارع انا معلية وما احاجز
حسين عقد حاجبة وكال
حسين: هذا شبي ليش يحجي هيج؟
حازم: عووفة معليك بي لان ماكدر يدفع فلوس الشقة من فلوس ابو السياسي جاي يستهزأ بينا
كال حسين وهو يضحك
حسين: وبعدك مصدك ان ابو سياسي؟ بوية هذا جذاب لو ابو بالدولة شيجيبة يسكن ويانة
كال سراج وهو يضحك
سراج: حقك ما شايف عقاب السياسيين لأبنائهم
حسين: هسة احجيلي يا ابن السياسي وعوف العقاب شطبخت النا؟
سراج: مركة بيتنجان
حسين: صلوووات اخيرا خلصنا من الفاصوليا صار ٣ ايام ناكلها
حازم: ديلا سراج كمل معروفك وصبلنا
سراج: لا ابوية لا انت راح تصب
حازم: مو بكيفك انا كنت بالدوام وتعبان انت شسويت نايم هنا؟
حسين: صدك سراج اجيت اليوم لكليتك ما لكيتك
سراج: ليش جاي لكليتي شتريد مني؟
حسين: مو تكول عندك معارف هنا عبالي تلكالي شغل
حازم: كان لكيت انا شغل صار اسبوع ادور
سراج: اكووول حسين انت مو ابوك معمم وحسب ما اشوف حالتكم المادية زينة شعجب تدور شغل؟
حسين: واذا ابوية معمم؟ بعدين انا مااريد اخذ فلوس من ابوية اريد اعتمد ع نفسي
حازم: المعممين الشرفاء بهالبلد ميبوكون مثل السياسيين
كال سراج وهو يصب اكل
سراج: حاليا متزاعل وي اهلي والخلاف جبير من احاجيهم عود ادافع عن السياسيين الجاي تقصدهم
ضحكنا انا وحسين
حسين: ههههه والله سراج وردة
تمددت بالصالة
وحسين راح يبدل
اباوع علية يباوع للاغراض مال خالد
حسين: زين ليش ما ننتظر الولد عيب ناكل وهو بعدة ماكو
حازم: كال اخذوا راحتكم ولتنتظروني اتأخر اليوم
سراج: يا حبيبي هسة تطلع عندة دروب مكسرة
حازم: محد غيرك عندة دروب مكسرة دوام ما تداوم بس تجي للشقة ب٢ بالليل عادي
عم السكوت بيناتنا
وكعدنا ناكل
واحد ما يعرف الثاني
وما صارلنا اسبوع من انجمعنا هنا
جمعتنا الدراسة
وتألفنا كأننا نعرف بعض من قبل سنين طويلة
غسلت الصحون
وتمددت بالصالة اكلب بالملازم
وسراج دخل للغرفة يتصل ع حبيباتة
وحسين بالغرفة فاتح الباب
وكاعد يدرس وفاتح زيارة عاشوراء
بصوت باسم الكربلائي
كان الصوت حلو وهادئ
ويجلب الراحة والسكينة
بهالاثناء دخل خالد
باوعلي وكال
خالد: السلام عليكم
حازم: عليكم السلام هلا بيك بقينالك غدة اذا تريد
خالد: مشكور خوية تغديت وي الاهل
دخل للغرفة
وانا اراقب بهدوء
خالد: السلام عليكم
حسين: عليكم السلام
خالد: انا اسمي خالد
حسين: وانا حسين تشرفنا
بلش خالد يحول اغراضة ع جهة
وحسين يدرس ويراقبة
فرش السجادة حتى يصلي
وكال
خالد: خوية عادي تنصي المسجل اريد اصلي
حسين اخذ صفنة مطولة
ونصة المسجل دون ما يحجي شي
بلش يصلي خالد
طلع حسين من الغرفة
وهو يكول بعصبية
حسين: حازم؟!
كعدت وكلت بهدوء
حازم: شبيك؟
حسين: جايبلي واحد سني وفوكاها يريد اسد زيارة عاشوراء لان زعجتة؟!
بهالاثناء طلع خالد من الغرفة
وكال
خالد: وشبي السني؟!
باوعنا علية
خليت ايدي ع راسي وكلت
حازم: اخوان انطونا مجال نتفاهم
وكيف يكون التفاهم؟!
......
