رواية لقيت نفسي معاك الفصل العاشر بقلم وعد محمد
قومت من علي السرير وانا بجري ورا نفسي ومن لبختي خبطت في الكومود ..مسكت رجلي وقعدت اعيط جمب الموبايل اللي كان قفل ورن تاني..رديت
= ايوا يا سلمي ..فينك كل دا ؟
كنت باخد نفسي بين شهقاتي وانا بعيط وهو سمع دا ورجع اتكلم
= اي اللي حصل وبتعيطي ليه بس .
– اتخبطت في الكومود و مخدتش بالي من الساعه وكده الاجتماع هيضيع عليا هو كمان
= كنت مفكرك صحيتي من بدري.. متزعليش حقك عليا انا ..انا اسف .
هو ليه قلقان كده .. ليه بيعتذر وهو معملش فيا حاجه انا زعلي مهم عنده للدرجادي ؟
=هتقدري تدوسي علي رجلك ؟
– ايوا
= طب يلا ..قومي اجهزي وانا هأجل الاجتماع نص ساعه ..ومسافة الطريق هكون عندك عشان اخدك ونروح سوا .
– ليه كل دا انا هطلب ان درايڤ علي ماخلص يكون وصل وهاجي بسرعه علطول .
= سلمي انا قولت جاي يعني جاي بلاش نقاش بقي قومي البسي انتِ يلا
وبالفعل قفل معايا بعد ما قال كلمته الاخيره ..لا استني كده انت بتعاملني كده ليه ؟
منتظرين مني اقوم البس وكده صح ..بس للأسف قومت لبست يجماعه انتوا مسمعتوش صوته وهو بيقولها !
غسلت وشي بسرعة وحاولت أخفي أثر العياط، بس عنيا كانت فاضحاني مهما عملت.
خلصت ولقيته بيرن عليا ..فتحت
= انا تحت ..خلصتي ؟
– ايوا نازله اهو
قفل وانا خارجه مستعجله وكمان منمتش فمش مركزه نهائي.. لقيت تيتا وجدو في الصاله .
ـ عنيكي حمرا ليه كده ياسلمي ..انتِ كويسه ؟
– كلو تمام بس معلش مستعجله ويوسف مستني تحت .
تيتا كانت بتبصلي وبتحاول تحلل تعبيرات وشي وحركات ايدي عشان توصل لأي حاجه ..بس الحمدلله موصلتش او تقريبا انا اللي فكرت كده بس .
سيبتهم ومشيت بسرعه .. نازله علي السلم بأسرع ما فيا كان واقف جمب العربيه زبما شافني بالشكل دا علي صوته نسبيا
= براحتك يا سلمي بتجري كده ليه ولما تقعي؟
هعيط والله هو بيزعقلي ليه ..الحق عليا اني مش عايزه اخره علي الاجتماع بتاعه واللي يعتبر اول اجتماع احضره وهو فيه بسبب مراد الزفت بعتلي كل الشغل بتاع انهارده عشان اجهزه فلازم اكون حاضره عشان الداتا معايا .
مردتش عليه اكتفيت بنظره تبينله اني فعلا اتدايقت لما علاّ صوته ورجع اتكلم بقلق واضح في نبرة صوته
= رجلك بقت كويسه؟
هزيت راسي
= طيب يلا اركبي
ركبت جمبه قدام وطول الطريق ساكت وكل شويه حد من الشركه يرن عليه بسبب التأخير ..قفل موبايله عشان ميكلمش حد تاني كان باين عليه العصبيه وقد ايه هو متدايق ..كنت خايفه اتنفس جمبه عشان ميزعقلش .
وهو لاحظ دا
= متخافيش ..مش هتعصب عليكي انتِ غيرهم.
ثانيه واحد انا قلبي بيدق جامد كده ليه..يعني ايه انا غيرهم حقيقي وشي احمر من كتر الكسوف اللي كنت فيه.
كنا وصلنا وقف العربيه ونزلت
= اسبقي انتِ علي ماركن واجي .
مش عارفه بس حسيته عمل كده عشان محدش يشوفني داخله معاه يقول حاجه مش حلوه عليا ..لأن الباركنج قبل ما بندخل جوا كان ممكن يركن وننزل سوا !
دخلت الشركه وقابلت مراد اول حاجه وقالي
' لينا حساب علي التأخير دا..بس الوقتي يلا على الاوضه اللي فيها الاجتماع .
مشيت من غير ما انطق كلمه ..هيجيلي عين اتكلم ازاي وانا سبب اللخبطه اللي هما فيها دلوقتي وعصبية يوسف كمان.. انا مني لله والله .
يوسف كان دخل وخدت بالي انه واقف مع مراد
= براحه عليها شويه يا مراد
' يعني شايف اللي حصل دا عادي ؟
= لا مش عادي بس دا كان غصب عنها
' ماشي يا يوسف اما اشوف اخرتها معاك ايه .
= كل خير ان شاء الله.
دخلوا الاوضه والاجتماع بدأ وكان ماشي بنظام وهدوء الحمدلله..بس دا ميمنعش ان يوسف موقفش نظرات من ساعة مادخل وحرفيا مكنتش علي بعضي نهائي ..اعتقد مراد خد باله
حاولت أبعد عيني عن يوسف وأركز في شاشة اللابتوب اللي قدامي، بس الموضوع كان أصعب مما توقعت. كل شوية ألاقي نفسي برفع عيني غصب عني ناحية المكان اللي واقف فيه.
الاجتماع خلص بعد حوالي ساعة، والحمد لله كل حاجة عدت على خير. كنت متوقعة أول ما يخلص مراد يمسك فيا بسبب التأخير، لكنه اكتفى بنظرة طويلة وهو بيجمع ورقه.
وقال بصوت واطي وهو خارج
' حسابنا بعدين
ينهار مش فايت ..هو بيقولها كده ليه وانا خوفت من نبرة صوته بالشكل دا ليه..منك لله يا بعيد بقيت مصدر الرعب بتاعي اليومين دا .
بدأت الناس تخرج واحد واحد وانا كنت بلم حاجتي بسرعه عشان اهرب قبل ما حد يكلمني او يزعقلي تاني منا خلاص بقيت ملطشت اليوم .
خارجه من الاوضه ووقفني صوته وهو بينده عليا .
= سلمي ؟
– نعم
= رجلك عامله ايه الوقتي ؟
– بقت احسن ..الوجع خف خالص
فضل يبصلي كام ثانيه كأنه بيتأكد بنفسه إذا كنت كويسه والا لأ وقال
= لو حسيتي بوجع في اي وقت عرفيني .
هزيت راسي وانا حاسه بإحساس حلو اوي ..فكرة ان اهتمامه بيا موجود دي مخلياني متلخبطه ومش علي بعضي طول اليوم .
روحت علي مكتبي وبدأت شغلي وحاولت اشغل نفسي بأي حاجه عشان مفكرش فيه .. هو انا مقولتلكوش مش انا حاليا مش عارفه اشيله من بالي كأنه جزء أساسي في عقلي مش راضي يتشال ..بس دا مش معناه حاجه يعني !
شوفته وهو داخل مكتب مراد
' تعالي احكيلي بقي اي اللي حصل امبارح وانت عندها ؟
= كان حتت يوم يا مراد جدها وجدتها طيبين جدا وخفاف تحب القعده معاهم بجد وكنت مرتاحه وسطهم و معاها .!
' اهو عنيه هتطلع قلوب اهي
= يا بني ادم يا فصيل سيبني اكمل كلام .
' اتفضل ياخويا كمل
= قلبي كان مرتاح في قربها وعيني كانت مبسوطه وانا شايفاها قدامي .. حبيت توترها اللي بيبان عليها وهيا معايا وطعم الشاي اللي حبيته من ايدها ...وحبها لجدها وجدتها وتعلقها بيهم..كان نفسي افضل قاعد معاهم والله .
' المهم يعني اعترفتلها ؟
يعترف لمين؟!
كنت لسه هخبط عشان ادخل لمراد عشان اشأله علي حاجه تبع العقود اللي المفروض الشركه هتمضيها انهارده وسمعته وهو بيقول كده كنت عايزه افهم يعترف بإيه ولمين بس من غبائي اتخبطت في الڤازا اللي جمب الباب في رجلي اللي اتخبطت فيها الصبح …
