رواية خيط وابرة الفصل الحادي عشر بقلم شمس العراقية
السلام عليكم أحبتي قبل القراءه نطلب منكم التصويت والتعليق بين الفقرات فضلاً وليس أمراً 🙏🏻
نور ...
ـ كل المواقف التصير بحياتي مخربطه من يوم رجعت بيت خوالي أني ما مرتاحه مشاكل ونافع يوم راضي عشره زعلان أدون سبب يزعل ويتذكر أخر مره شصار ويانا مشكلته ما ينسى ويضل ياكل بروحه قهر ..
الى متى تضل هيج على كلشي تعصب وتنفعل ترى الصار ما يستوجب ، شوف نافع صدك هاي أخر رساله مني وبعدها تحلم تسمع مني حرف حتى خيالي أحرمك منه ولو أعرف السبب مني انطيك عذرك بس أني ما سويت شيء وأذا على غافر أني من يوم يومي هاي علاقتي بي وكدام عيونك شنو التغيير هسه وخلاك تكرهه قربي لغافر!وتمنعني اروحلهم ، أذا تغار تعال لبسني حلقه وخلصني من غيرتك لان السادس مطول
نافع ـ تهددين نوره، شوفي أني ما أتهدد لو روحي تتعلك بهل البشر
ـ أي شفت أذن أنت ما تحبني والدليل كلامك
ـ أي أني ما تلويني مره
ـ المن هالحجي نافع؟ أليه
ـ هذا الحجي الج أنتِ منو غيرج يحاجيني
ـ أذا هيج تشوف براحتك
ـ براحتي مو براحتي هذا أني
ـ أي براحتك
ـ نور قسم بالله الأ أربيج وأتوبج وبالله العظيم الا أرجعج بشر طبيعي ، أنتِ مو مال عين وأغاتي ، نطيت مجال زايد ودللت زايد وخفت عليج زايد وهذا كله بعينج ماله داعي لان مو مهتمه اصلاً ونافع أخر أولوياتج .
ـ لا مو أخر أولوياتي وجبيره بحقي مال اربيج ششايفيني أنت ما مربيه لو بنت شوارع! كافي نافع اني التحملتك زايد وأذا على روحة خوالي ترى من رحت بلغتك بس أنت تريد مشاكل والصار من أيدك أني مالي دخل وتصرفت بحسن نيه وخوف على غافر شسوي لتفكيرك .
ـ لا من أيدج والله يزيدج وأني الج على كلامج تهدديني مو بسيطه نور
ـ أنت مريض تدري بنفسك
ـ منو المريض! مو أجي اسحلج
ـ خرب مشتاقه لسوالفه كافي زعل نافع لو تحجي وياي مثل قبل لو ننهي كلشي .
ـ أنتِ بس تردين تخلصين مني
ـ لا غلطان أني أحبك ومتحمله كلامك وفشارك عليه وعلى أهلي صارلي عمري شجابرني لما حبك بگلبي .
ـ غصباً عليج
ـ ميخالف غصباً عليه .
ـ تمام عندي شغله اخلصها وأمرلج لبيتكم أشوفج
ـ خوش أني أحبك
ـ أني أعشقج مدمنج نواريتي فدوه اروح لبناتي .
ـ ما أعرف ليش أختنگت وغصه بصدري عفت موبايل وكعدت أبجي بالأخص من أتذكر كلام بيبي وشلون تريد تزوجني مصطفى يربي أموت والله وما أصير لغير نافع شايفته أمي وأبويه مو بس حبيبي .
وصلتني رساله من عنده
نافع ـ شُـنو هذا الحجي السمعته ليش ما حجيتلي
نور ـ يا حجي
ـ مهديه أم السحوره تريد تزوجج لابن قويدر
ـ أي منو كالك
ـ ليش ما حجيتي
ـ لان تحجي بكيفها وبابا ما يوافق أمي حجتله وضحك گال خلوها تحجي ونور خل تكمل سادس مو مال زواج هسه عاد سدوا الموضوع .
ـ شكلج تجين تكملين السادس يمي
ـ ما فهمت ليش تريد تجي تتقدم
ـ نعم وبكل سرور وأني أدرسج وشلون معدل تجيبين صفر على صفر تكظينها بس صافنه عليه وعلى كتاب
ـ ضحكت نافع بدون قشمره احجي الصدك
ـ الله كريم حبيبتي ، هسه أهم شيء دراستج
ـ شوكت تجي مو كلت امرلكم
ـ صارتلي شغله غير مره
ـ تمام على راحتك ومن بعدها گام ما يجينا مثل قبل ما أعرف ليش شگيت بابا حاجي وياه حتى غافر وگمت أروح ويه ميثم هو يوصلني المدرسين الخصوصي مو مثل قبل نافع لو غافر الظاهر بسبب كلام بيبي .
بدأ الموسم الدراسي وكلش التهييت حتى نافع قليل نحجي بس وياي ويدعمني وساندني ودوم يحجي عليه من يشوفني فاتحه أنترنت ما يقبل الزم الموبايل
نافع ـ عوفي الصخام أنتبهي لدراستج هذا سادس ما يتشاقه ترة ، يفر رأسج فر خاف ما تدرين والموبايل المفروض أسحبه منج بس أني شلون وين أولي أديح والله ، مشكله ، نعلة على روحج مهديه .
نور ـ أسمع كلامه وأعوفه ومن أشتاقله أراسله وهيج تمر بيه الأيام مرات زينه مرات لا والله المشاكل التصير
ما تخلي واهس الواحد يدرس .
جنت راجعه من المدرسه وما لكيت أمي بالبيت أتصلت عليها عايفه موبايلها!إستغربت بس ما خليت بالي گلت يجوز يم خالتي صبيحه بس غيرت ملابسي وصلتني رساله من نافع .
نافع ـ أمج شتسوي يم بيت (.... )
ـ منو هذول
ـ ناس أمج تعرفهم سأليها وهي تجاوبج
ـ منو هذولي البيت نافع خوفتني على أمي
ـ بعدين أحاجيج ولاتسألينها خوش
ـ نافع تعال فهمني لاتخليني دايخه
ـ گلت بعدين
ـ عفته وللظهر أمي أجتي ذبت عبايتها وعيوني تراقبها
وأبالي كلام نافع والف تفكير أجه برأسي لا أستغفر الله هذا نافع تخبل .
وبعد ما حجيت ويه نافع وهو هم ما حجالي بعد غلق الموضوع وما كدرت الح عليه بس ضل أبالي حتى أخذ حيز من تفكيري
تغدينا وأمي جانت بالمطبخ وبابا صاحلي
صباح ـ نور بابا تعالي بدليلي هالمخده يمكن أمج مبدله كطعنها اليوم ، شو عاليه جيبلي وحده ثانيه ناصيه
نور ـ أي يمكن أخذتها منه وأتلمس بيها مثل منفوشه وكطنها هسه مخليته أطبطب عليها وأني اتلمس بيها أجه شيء بملمس أيدي ومديت أيدي اشوف شنو وأمي شافتني أجتي سحبتها مني بسرعه وخوف .
سميعه ـ شتسوين بيها هاي مو مخدتج .
نور ـ أي هاي مخدة بابا كال عاليه يمكن نافشه كطعنها ويريد ناصيه .
ـ أي هسه أنه أجيبله وحده ثانيه
ـ عافتني ودخلت الغرفه وردت الباب وراها فتحته عالكيفك أجاني فضول أشوف شبيها وشفتها طلعت شيء وخلته بالمخده الثانيه دفعت الباب ماما شنو هذا
فزت وكعت المخده من أيديها
ـ شنو قابل شعليج أنتِ ، سوالف أكبر منج خل أودي المخده لأبوج هسه يضل يصييح
ـ منعتها ماما هذا سحر مو!
ـ لا يمه أسم الله سحريش منين جبتي هالحجي هذا حجاب من زمان أنه وخالتج سويناه يم الشيخ الج ولاخوج مال رقيه لحسد وطرد عين علمود جديتج مهديه لاتضركم بسحورتها
ـ ماما أني مو غبيه وأذكر قبل جنتي تحجين على نافع من جنتي تكولين بكل دروبه يطلعلي شنو جنتي تسوين بالدرابين تسوين سحوره مثل بيبي مهديه
ـ هذا نافع ما خله عقل برأسج وصلت بي المواصيل يخربج عليه ويتهمني أسوي سحوره مثل أمه وخالاته وجديته ، أمشي ولي عن وجهي وصمي حلكج لا أبوج يسمعج وتسويلنا سالفه بسبب نافع وسوالفه واحد ما يخاف ربه شكد سماني مثل جديته .
ـ بس هو ما گال أمج تسوي سحوره أني الحجيت وشفت بعيني الحجاب مخليته بالمخده ليش ماما وخالتي صبيحه تدري بهذا شغلج لو هي هم ماشيه وياج على هالدرب
صباح ـ نور بابا وين صرتي نمتي خوما نمتي .
سميعه ـ عجبج هسه أمشي ولي لغرفتج بعدين حسابج أني الج نوب عليه السحوره اني سحورت جديتج ما خلصانه منها .
نور ـ راحتله وأني نهزمت لغرفتي وقفلت الباب مصدومه بأمي هيج ماما بس لا أكيد حجاب مال عين أي أمي ما عدها هالسوالف ، راسلته وينك
نافع ـ أمج رجعت البيت لـو بعدها .
نور ـ لا رجعت من زمان مو معقوله تضل لهل الوكت شبيك نافع ومستحيل أمي سحوره أكيد غلطان وظالمها هذولي ناس تروحلهم علمود رقيه مال عين وحسد وطرد السحر من بيتنا ومن عدنا .
ـ أي وأني شگايل
ـ نافع وأنت شمدريك هي يمهم جنت مراقبها
ـ ترى أني من زمان أدري بس مغلس عليها وما لازمها لزمة يد بس اليوم لزمتها وشفتها شوف العين .
ـ نافع أحجيلي كلشي
ـ التسوي سحوره أعرفلها من عيونها وأنه تربيه عطايات اشم السحر شموم وأمج تسوي سحوره ينوره .
ـ لا نافع أزعل منك والله ، درينا ما تحبها بس مال تبطل عليها بهيج سوالف أزعل منك والله السحوره ما تندل دربه گتلك حجاب
ـ يا حجاب أكولج حبيبي هي حتى لو ما تندله دربه تسأل وتندله وتلاحكت أبوج گبل لا مهديه تطگه بسحر وتعمي وأمج كالت خل اتلاحك عمري وأطكه بسحر وأخذه اليه أحسن ما يأخذنه ويخبلنا عليه والدليل ما خلفت بس أنتِ وميثم بالف نذر والشيوخ والساده الجانت تروحلهم انه غافر نندلهم .
ـ يعني ماما مسويه سحر لبابا .
ـ أي حبيبي البابا مسحور لان أساساً جان ما يحبها يحب عمتي لميعه وهاي سالفة عشگهم كلنا نعرفها
وهسه هو مو بس مسحور مثول وكاعد طاگته سحر بسعر كلياتي .
ـ عليك الله گولي ما ناصب عليه
ـ وغلاتج عيونج الساحرتني بيهن ما ناصب عليج
ـ نوب أني اسحرك خرب مستحيل أصدك
ـ بكيفج حبيبي يجوز أنه ظالمها
ـ طيب ليش هيج تسوي أمي موهيج لازم أحجي وياها وأمنعها تعوف هالطريق حرام اللي جاي تسوي
ـ لا عوفيها لان بعد ما يفيد وخليها تفيدنا خاف أبوج يعارض على زواجنه أخليها تطگه بسحر ويوافق وبعدين اخليها توب وأزورها بس بعد ما أخذج يمي
ـ خوش عندك سوالف وما فكرت أذا خالك فك منه السحر ولكاني مرتك شيسوي بيك
ـ وگتها أنتِ مالتي أبن أمه وأبوه اليأخذج مني وبعدين تعالي شو عجبتج سالفة السحوره لو لان عرجج نكس طابتلج السالفه
ـ أستغفر الله نافع لاهيج تحجي والله مصدومه بأمي ومستحيل أصدك الا اتأكد وعلى سالفة بابا ترة جاي أحجي وياك بضحك مستحيل أوافق على هل الأمور وأبني سعادتي بأمور مشعوذه وشيطانيه
ـ أي عفيه حبيبتي هيج أريدج عبالي ضارب عليج الدمار
ـ لا ما ضارب لاتشبهني بيها، شگد جنت أحبها وعايفه مشاكلها ويه أمي وأروحلها بس من أخر موقف نزلت من عيني .
ـ هاي مهديه من يوم يومها الكاع تتعوذ منها وهسه أريد منج تعوفين هالمشاكل وكل الأمور زواج حب مدري ايش وتتنبيهين بس على دراستج خلصي السادس وبعدين يصير الخير .
ـ تمام حبيبي ، وسمعت كلامه ومرات أروح بيت خالتي يصادف أشوفه هناك ،وهو الوحيد المصبرني وساندني رغم كل اللي اليصير من مشاكل وهيج تمشي بيه الايام لما أجه اليوم قلب حياتي رأساً على عقب!
جنت وحدي بالبيت وأمي طالعه گالت تمر على خالتي واخواتي شفتهن طلعن متوقعه يروحن بيت خالي مشعان لان صفا صديقه لينا عكسي أني علاقتي بيها مو هلكد هي للسان وما تحب قربي أما لبنى لا مالي بيها محترمه نفسها ما عليها بإحد تعجبني شخصيتها
" صح بعيده عنهن بس من توصل أحد يجيب طاريهن ويحجي عليهن اشرب من دمه والله حتى أمي ما أرضى على تصرفاتها ومعاملتها الهن بس شسوي إلها أمي.
سمعت صوت بالبيت صوت نسوان طبگت كتابي وطلعت منو وشفت بيبي مهديه وعمتي نوريه وزوجة عمي قادر الأولى زمن ، هلا بيبي تقدمت أسلم عليها صدت عني .
مهديه ـ أمج وأبوج وين .
نوريه ـ أكيد دايحه يم دروب الدلالات والسحارات متشوفين البيت فارغ .
نور ـ يم بيت خالتي
مهديه ـ أمشي صيحيها وخابري على أبوج وأمج متيهه لبيت وعايفتج لوحدج خوش أم بيت ما تعرف ترگد بكاعها .
نور ـ هو هسه على جيه أتفضلن ، طلعت لبيت خالتي وعفتهن بالاستقبال ، دگييت الباب وطلعلي غافر أمي يمكم .
غافر ـ اي موجوده ، شبيج
نور ـ يمعود صيحها بيبي مهديه يمنا وماكو أحد وطلعت أمي مستعجله وتمشي سريع وتحجي عليه
سميعه ـ شگو عفتيهن بالبيت وأجيتيني مو عندج موبايل خابريني لو خابري على خالتج هنا هذن يتأمن بيهن ، شگد شفت ثولان مثلج ما شفت أمشي
نور ـ دخلنا لگينا بابا هسه جاي وكاعد وياهن وأمي سلمت وكعدت وأني واكفه بابا هزلي رأسه .
صباح ـ سويلنا جاي بابا .
نور ـ اي بابا رحت سويت جاي وصار الحجي وكفت يم الباب اسمع وكلام جديتي خشن عبالك جاية تعارك عكس عمتي زمن تحجي بهدوء .
مهديه ـ الموضوع الجايه بي تعرفونه وأنه كلت تخلص السادس بس الاشوفه البنيه مو مال دراسه لان الأم متيهه البيت وكاظبه دربها وأنت خليني ساكته عنك تشتغل وشغلك ما مبين عليك مدري وين تودي ماليتك والوياك بيوت وأنت بطرك هالبيت والسياره كل معكوب ماكو.
صباح ـ يمه فدوه لعينج شنو هالحجي هذا وقابل وين مودي ماليتي غير معيش بيها عيالي ولاتنسين عندي ثلاث بنات وكلهن يردن مني .
مهديه ـ خلني أكمل حجايتي يمه وبناتك هذنيج لاتعدهن تراني بعدني ما خرفت وذاكرتي زينه وادري امهن عافتلهن راتبها مو بحالك وبحال ماليتك وتلوف السالفه عليه ، المهم يمه أنه ما جايه أحاسبك انه جايتك بسالفه تخصك بنتك نور .
زمن ـ الصراحه يا أبو نور احنه ناوين نجي ويه الزلم بس تعرف كلمن ملتهي وعمتي بسلامتها مستعجله وكالت اشوف صباح بالأول وعكبها نجي ونعقدلهم .
صباح ـ تعقدون المن ، يمه يا عقد ليكون تقصدين مصطاف ترى هذا الموضوع حاجيتج بي وگتلح نور ما ازوجها هسه اريدها تكمل دراستها وسديته وياج ليش تزعليني منج .
مهديه ـ هذا أنت تكول ما ازوجها بس حرمتك ناويه تنطيها لنافع لو لابن اختها شوف يمه انه ساكته بس الحجي الطلع عليك وعلى بنتك ما ينسكت عنه ودربها البيت خوالها وين ابن خالها خلني ساكته عنه واذا تريد تصم حلوك الناس وتسكتهم خلنا نزوجهم ونسترها
سميعه ـ الدرب التحجين عنه درب خوالها مو غرب عنها وأنه كطعتوا رجلي منهم بس بنتي هذول يضلون خوالها رضيتوا أو ما رضيتوا مالكم حق تحرمونها من خوالها .
وبنتي ما أنطيها الج ولا لغيرج وبنتي وأنه حره ازوجها المن اريد ما الج كوه عليه ولو جابيبتلي واحد براسه خير وشهادته بأيده ما يكتلني قهر ، مقدمتلي مصطاف لنور ، واحد ملهس منتف لاشغل لا عمل كاظيها بالكهاوي انطي نور ليش يمه ما عندي خبز أعيشها .
مهديه ـ أشوفج تفرعتني يالخانسه الله يرحم أيامج جنتي طكة بيج وطگة بالجلب ، خلف الله علينا لفيناج وسويناج أم بيت بس يصير خير يسميعه وأنت ابقى مثل الطلي ويه حرمتك ما منك فايده مثل اخوك محمود ضل ملاحك ذيال عروبه ولحد هسه بدون مره كاظيها زواج متع صايرلي جلب وفي من موت كرفكم من صرتوا مخانيث لبنات عطايات يا يمه .
نور ـ دگت عوجيتها وگامت ورحت عالجاي لكيته مدخن خرب أحترك وكبت العيطه وبابا مجلب بيها شصار خرب
مهديه ـ عبالج اخليج العمر كله مطممه يبنت عطايات ما عاشت الترد مهديه وتحاجيها معلك ولج انه مهديه بنت زكيه دربنا معروف اهاليتج كلهم ما كدرولنا تجيين أنتِ تخلين رأسج برأسي ، فكي حلكج ينوريه وانشري شراعها بين الخلايگ .
صباح ـ يمه دخيلج مو وگته هالحجي ابوس راسج فوتي البيت خل نحجي شبيج متحمله عليه ،خل نحجي وعكبها التردينه يصيير وسميعه عليه أخليها تبوس رأسج بس لاتطلعين زعلانه من بيتي .
مهديه ـ لا يمه خلني أمشي وخل بنتك الك ومصطاف الف من تتمناه الظاهر من مقامكم ويصير نسيب حرمتك ، تريد إلها من حبابيها! تريد حظ بنتها يكعد مثل ما كعد حظها وياك ، يله نوريه أمشينا يمه .
نور ـ طلعت وعمتي نوريه تحجي وصوتها عالي حتى الجيران طلعوا وگالت حجايه قشعر جسمي منها .
نوريه ـ عمرها المعيوبه ما عمرت ديارها .
نور ـ راحن وخلن الكلام وراهن الجيران ناس تسأل ناس شكوو شبيهم بيت أبو نور!
ودخلن أخواتي يباعن وبابا حيـل عصب ودخل البيت جر أمي اللي واكفه متخشبه كأنما تدري شنو راح يصير دخلها الاستقبال وصوته عليها جان عالي ويحجي بخصوص الماضي مالتها هي ما الها ذنب بي أمي هم نظلمت ،ولينا ولبنى واكفات وأني دمعتي على خدي ما اعرف ابجي على أمي لو على نفسي .
صباح ـ إشسويتي سميعه شون تراددين أمي وتحجين واني اريد اقنعها واسكتها وكلت انه أحاجيها وأقنعها بهدوء أمي وأعرفها تجين أنتِ تبعرين السالفه .. وتحاجينها معلك وبخشم عالي وصاروا ولد أخوي مو من أعجابج وتعيرنهم دايحين بالكهاوي! ومنو أنتِ ما يعجبج مصطاف وغيره ونور بنتي وأنه أبوها وأحجي
سميعه ـ صارلي عمر ساكته عمر ونور بنتي وحيدتي تريدني انطيها الهن وهو أني كفرني بعيشتي لعبن بيه لعب ، شلون أذا أنطيتهن نور .
ـ أني الأحجي مو أنتِ مو كتلج عوفيها عليه وسالفة مصطفى أني اتكفلها وانهيها من عرجها اجيتي أنتِ خربتي الأول التالي
ليش هيج سويتي كدامهن ليش هسه عاجبج الوضع عاجبج عبالج أمي راح تفوتها الج بارده مبرده
ـ ادري ما راح يسكتن ، سمعت أختك شكالت عليه ادري زين قصدها اجيتكم معيوبه وأنتَ تسترت عليه
ـ دام تعرفين بيهن ما راح يسكتن وتعرفين قصدهن ليش مـا أحترمتي نفسج وسگتتي ، ماضيج عدهن وتحجين بخشم كم مره منبه عليج لاتجبيين الحجايه لنفسج بس ما يفيد بيج عبس .
ـ أي أعرف بيهن وكبل ما حجن هسه راح يحجن ويأثرن على سمعة بنتي شلون سميعه تعيش مرتاحه وبنتها هم لازم يدمرني أنه وبنتي واللي صار اني مالي ذنب بي لاتعيرني بماضيي يصباح
ما كافي أنت وأهلك فضحتوني طيحتوا حظي ما خليتوا احد ما حجيتوا اله بسالفتي حتى من صارتلي نور باذني سمعت حجيهن كالن البنيه نغل اكيد بنت حرام وانه السالفه مر عليها وگت يله تزوجتك
حتى بنتي ما تسلم من هالماضي يصباح شحجيلك على سوالف أمك وأخواتك وتريد مني اسكت وانطي نور الهن والله لو أعرف أموت نور ما يلمسن اظفر من أظافرها .
نور ـ مشيت ما اريد أسمع اكثر وسمعت لينا تحاجي لبنى .
لينا ـ طلعت استغفرالله ... وتستشرف برأسنا .
نور ـ لينا عيدي شگلتي
لبنى ـ هيج ما حجت شيء ، لينا فوتي الغرفه .
نور ـ أكص لسانج أذا جبتي طاري أمي والله أموتج فاهمه .
لينا ـ شبيج حميتي ترة ما حجيت شيء بس يعني علمود أستوعب صدمتي بيج وهسه فهمت أنتِ عليمن طالعه اثاري أنتِ وأمج نفس الشيء هسه تطلعين مثلها إذا مو أنكس منها وجديتي مهديه تعرفجن وحجت هالحجي .
نور ـ عليمن هالحجي أنتِ سأله على روحج تردين تموتين والله اليوم أقضي على حياتج أدبسزز ، لزمتها من شعرها وهي تجر وأني اجر ولبنى تفازع بينا اخر شيء عضتني بكل قوتها واني اعيط وانكز فرفحت وطلعوا بابا وماما على صوتنا بابا سحب مني لينا وأني بحضن ماما واني نار تفور بصدري عليها حجايتها جبيره بحق أمي .
صباح ـ تخبلتن من خبال كون ، أمشي أخذي أختج وكبريها بالغرفه لا أكبرجن وأخلص من مشاكلجن وأنتِ نور بابا شبيج نجلبتي تردين تخبليني أنتِ وأمج وأخواتج والله الاسمع بيها متعاركه لو مسويه مشكلة أعلكها بالسكف سبع أيام وأنعل والديها من أنعل أبوجن لأبو اليعيش وياجن كطعيه تكطعجن بس مشاكل .
نور ـ بابا ركع الباب وراه وطلع وأمي اخذتني لغرفتها باوعتلها ونزلت رأسها عيونها دم باجيه الا بزعانه حضنتها أنتِ ما الج ذنب لاتبجبين لخاطري وميخالف خل تحجي وخل تأثر على سمعتي فدوه الج وأنتِ نظلمتي .
سميعه ـ نظلمت بس ما أريدج تنظلمين مثلي جديتج محد يعرفها بگدي ما راح تسكت
ـ حضنتها وبجييت وياها ومن هذاك اليوم أمي صارت وحده ثانيه حتى قليل أسمعلها صوت ولا عادت تطلع نفس الأول أمي تغييرت حجاية بيبي بماضي أمي أثرن عليها رجعت لنقطة الصفر .
حتى واهسي بالدراسه طفه ونافع كوه احجي وياه وهو ملتهي ويه خالوا مشعان ودوامه وعايفيي علمود أقرا ما يدري باللي صار طفاني .
الصبح جان يوم عطله واجو علينا نسوان أثنين من جيرانه ، بالعاده يجون بس بالمناسبات او حاله مرضييه كلت يجوز أمي عازمتهن بس الاستغربته وانصدمت بي صدمة عمري ودمرتني .
أم رسول ـ والله يا أم نور أحنه لما نحبج ونعرفج شنو ما نجي عليج ونحجيلج لان السوالف الجاي تطلع عليج وعلى بنتج ما ينلبس عليها ثوب ما تنحجي يا أختي عيب والعالم ما ترحم والما يعرفك ما يثمنك وأنتوا سيرتكم مثل المسك من عمر احنه جيران ما شفنا منج الا كل خير والنعم منج ومن اصلج .
سميعه ـ بارك الله بيج أم رسول وأنتوا حسبة أهلي الله شاهد بس أكدر أعرف شنو الحجي الينحجي عليه وعلى بنتي.
أم محمد ـ عمتج مهديه وبناتها يمشن ويحجن عليج وعلى نور وينطن فلوس لدلاله ام وليد هي تحجي بيج لنسوان اليجن يشترن منها والحجي اليحجنه والله ما ادري شگولج خل أم رسول تحجيلج .
أم رسول ـ خيتي أم نور والله ما اعرف منين أبدي بس تحجي عليج أنتِ ماخذينج مو بنيه وصباح ساترج وسوالف هواي عيب أحجيها.
سميعه ـ وبنتي نور شحجن عليها .
ام محمد ـ يگولن عليها نور مو بنيه! أعوذ الله منهن وكايلات ردنا نستر عليها ونزوجها لمصطاف بس بعدين تراجعنا لان قبل سترنا على أمها نوبه نستر على بنتها
نور ـ رجليه ما عاد تحملني رجعت المطبخ جريت الكرسي ولبنى جابت الصينيه وتباوعلي وأني فاتحه عيوني على وسعهن شفت النسوان طلعن ويواسن بإمي ولبنى تقدمت عليه تهز بإكتافي
لبنى ـ نــور بيج شيء ، نــور .
نور ـ ما حجيت بس دموعي تنزل ودخلت أمي كعدت بالكاع تدك وتلطم ملخت وجهه الا طلعت الدم .
سميعه ـ سوده بوجهج يسميعه طين برأسي ربي صوبهن بصواب وخلصني من شرهن ربي أنه تمررت أدور بنيتي شنهي ذنبها شنهي ذنبها ينطعن بشرفها ادور بنتي يمهديه رديتي على نويره عساج بمرض ماله علاج أنتِ وبناتج .
ـ تلطم وتدك على صدرها ودمعتها على خدها تسكت وترجع تكب من القهر وتضرب قوي على صدرها وتباوعلي وأني ابجي وياها .
ـ يمه صخام بوجهي عليج يا يمه شحجي شگول وين أودي وجهي من الجيران والخلك كلها درت نشرت شراعي جديتج فضحتني جديتي ولج نـــــوره شگت طوبتج جدييييتج لعبت لعب بشرفج يبووووو يبووووو يبوووو
الحكيييييني يعطايات الحكيييني هسه عرفت ثمن كلمتج يمه هسه بعدما إنفضحت يمه وينج يمه طگ گلبي وأنه لوحدي كظيت العمر وحيده وصابره وجارعه سوالفهن وتالي ما سلمت على شرف بنتي .
ـ كمت من طولي أريد أوصلها وأحضنها بس وكعت وصوت لبنى تصرخ عليه وصوت كلام النسوان صداهن برأسي نور مو بنيه! نور مو بنيه .
فتحت عيوني بحضن أمي وتغسل بوجهي وتنخي أهل البيت وأحس حلكي مبنج ، ماما
سميعه ـ يمه الزهره يمه بنيتي نور يمه حاجيني أندار على عمرج لاتعوفيني شطلعت من دنيا غيرج شعندج أنه غيرج ، باوعيلي يعيون أمج الاشوفن بيهن دربي ما عليج منهن يحجن اليحجنه أنتِ أشرف من الشرف عساها بناتهن وكلمن تجيب طاريج كون ربي بصواب بعزيز گلبها .
ـ حضنتني وتبوس بيه وأجه بابا مستعجل ويسأل عني سحبني من حضن أمي وأخذني بحضنه ويسأل عني وأمي بس تبجي .
صباح ـ شبيها نــور أحجي شبيها شبيج ساكته
سميعه ـ شحجيلك يصباح سوالف ما تنحجي بعدين مو وكته البنيه تعبانه خلها ترتاح هسه .
نور ـ ضليت بحضنه الا أن غفيت صحيت باليل ما ادري بيش الساعه وأسمع أمي تحجي على الموبايل وتتوسل ، منو
سميعه ـ يمه فدوه أروحلك عوفهن لا لاتخاف عليها زينه هسه هي نايمه لو تكعد والله تعال للبيت واطمئن عليها شتريد بعد بس عوفهن عساها بحظهن وبختهن كلمن يطعن بشرفها .
نور ـ ماما هذا نافع .
سميعه ـ اي هو هاج حاجي هدي لاتخلينه يروح عليهن وابوج راحلهن هو يتفاهم ويحلها ، أخاف يسوله شيء
نور ـ اخذت الموبايل ها نافع
نافع ـ ها يروح نافع شلونج شلون صرتي
نور ـ زينه ، نافع عوفهن بابا يتصرف وياهن
نافع ـ مالي شغلج بإبوج وأنه اليحجي عليج حاجي عليه وعيونج الماكو أعز منهن عندي دقايق ويوصلج خبر كل واحد جاب طاريج وحجه بشرفج أزوعه حليب أمه، يطعنون بشرفج ولد الزنا والله لأنعل شيب أهاليتهم وأخلي نسوانهم تلطم عليهم
ـ لا نافع عليك الله عوفهن
ـ تطعن بشرفج وهي جديتج شخلت للغريب متكوليلي بس ياسين المخنث الشادهن أصليات مو تقليد اليوم أعلكه هو ومرته والله الا أخليهم يركضون ويه خيل الحمزه على كل كلمة نكالت عليج .
ـ نافع
ـ اليوم اسحلهم ومهديه وبناتها اليوم بفجر الله أنصب جوادر عزاءهن .
ـ قطع الخط وأمي لبست عبايتها وين ماما
ـ أروح الحكه أخاف عليه لايضربنه بمنيه ويموتنه هذا البرأسه يسوي ، دمه حار سوده بوجهي .
ـ طلعت وأني ما بيه حـيل حتى أمشي يمكن ضغطي اجتني لبنى تساعدني ولينا واكفه متخصره وتباوع نظرات صعب افسرها بالوقت الحالي تجاهلتها لان مالي خلكها .
ضليت أنتظرها لا أكدر أروح وأتصل عليه مغلق وأمي عايفه موبايل ومر الوقت ودخلت أمي لوحدها فاحطه
ركضت عليها ها ماما شصار .
سميعه ـ شصار يا يمه غير ثلاث زلم ما كدروا اله دفع جدج على وجهه وخله ابوج حاير بي وأستلمهن أريد بس أكظه والزمه ما ينلزم وحربيه وياي تدك وتلطم وتتوسل بي طبكنا أثنينا وتوالهن الضرب مال موت جايبله توثيه هاي التوثيه مالت حبوبتي من زمان محضرتها الجن بس انه الاكسرها عليجن وتوالهن وين اليوجعهن واجه عمج محمود بعديش بعد ما حيل بهت عليهن من عدا لسانه يصلي صلي عليهن ما سگت ولا رگد .
ـ وهسه هو وينه .
ـ أخذوا ابوج وعمتج للبيت وعمج محمود اخذهن المستشفى الله يستر بس لا صكطهن خايفه عليه منهن والله اذا تسمع جديتج عطايات وحده منهن تطخ شعره منه تحرك الولايه عليهن وعلى الخلفوهن .
ـ ضليت خايفه عليه وأمي تخابر محد يجاوبها وين عمتي جاوبتها وتبجي كلشي ما فهمنا منها عزه بس لا ماتت
ركضت الغرفه اتصلت عليه ما يجاوبني خرب إشسويت نافع هذا شغل شغلك وبهل الاثناء خالتي اتصلت الو خاله
لميعه ـ وينج أتصل عليج ماكو تعالي احجيلي نافع شمسوي على شنو مصكط نويره وكاسر أيد جديته
ـ سالفه طويله هو يحجيلج بس شلون مصكطها ودخلت أمي وطلبت افتح سبيكر وفتحته وكعدت وياي تسمعها.
ـ طافي عينها ما بيها كل أمل تشوف بعد وجديته كاسر أيدها والله العرفته الكسر قوي من عدا الضربات على باقي جسمهن ولج عامل العمايل خابزهن خبز .
ـ ياربي ونافع وينه أتصا عليه ماكو
ـ بالبيت خابرنه كلنا تعال ما يفعل ما يجي وحبيب وحبوبتج كظوا السياره بهل الليل واجو للولايه اجو عليه يأخذونه لان قادر ومحمود سانين سنونهم عليه وقادر عامل العمايل مزبل هواي سوالف ما تنحجي أمداه من يومه عار والله يستر من تاليها هسه حبوبتج توصل وتاخذه وشوف شون تفك تالي هالطلابه
ـ خاله خايفه عليه
ـ لاتخافين عليه بظهره جده وحبوبته غير ما شفتيهم بس سمعموا عجاجهم يفتل بالقصر وأمي كظت عبايتها ولو تعرف تسوق جان هي ساقت السياره عاد حربي جابهم واجاكم ، بيت جدج بيت الطلايب ويه عمي ياسين بيت البله وشون أثنين.
لاتخافين عليه شعره ما يكدرون يطخون منه غير عطايات بنت كتيبه تذبحهم وما تسأل على أحد منهم
كلشي ولا أحفادها ونافع عزيز گلبها وأنوبه برد گلبها وكتلهن لما العيب من جدج حبيب الا تهوس وتدبج بس كظت نفسها وخايفه على نافع من شرهن ومن قويدر العار .
ـ ماشي عيني خاله عود نتخابر .
ـ ماشي عيون خالتج
ـ راحت وأمي ضلت تدك على رجليها شفهمتي من عمتي حربيه
ـ شفهمت بس تبجي حقها أمها وأختها والكاتلهن أبنها الله يكون بعونها ، هسه خابرت ابوج وحجيت يكول ما يقنع يعوف البيت ومشعان مو هنا بايت بغداد خايفين من عمامج يهدون عليه ما يسكتون نوبه جدج ياسين متخربط وهم حايرين بي بس لايموت من الهبطه .
ـ ضلييت كاعده ويه أمي ومر الوكت ودخل علينا أبويه
سميعه ـ ها صباح
صباح ـ طين على رأس صباح حتى المستشفى ما أكدر أوصل شوصل على يا سواد الوجه .
سميعه ـ نافع وينه خاف يضل بالبيت وتكبر السالفه
صباح ـ لا جديته وحبيب وحربي اجو سحلوا سحل وأخذوا وياهم للقريه ، دگ رجليه للحايط هيج واحد عناد ما شفت فاتح صدره للموت وقادر مخبل اكثر منه همزين أخذوا جان موت امه من الخوف عليه ، سود وجوهنا الله يسود وجهه واحد خبل المخابيل منو رايد منك .
نور ـ عفتهم يحجون وطلعت باوعت على غرفة أخواتي طافيات الاضويه نايمات ، دخلت غرفتي لكيته دازلي
نافع ـ حرب أسويها كلمن يجيب طاريج .
نور ـ أخاف عليك لاهيج تسوي وتتهور
ـ لاتخافين عليه ، يله روحي نامي والصار خلي ذكرى لطيفه خفيفه .
ـ تمام وصلت لو بعدك
ـ بالطريق بعدنا حربي ما يسوق سرعه حاط الحكومة بالسياره نخاف عليهم خيتمنا هذولي .
ـ الله يحفظكم من توصل طمني
ـ ان شاء الله حبيبتي .
ـ عفت الموبايل وأجتني ماما ها شصار حجيتوا
ـ شحجينا مقهور عليهن ويحجي على نافع بس ما يحجي عليهن من طعنن بشرف بنتك شايل همهم ويخابر بمحمود عساهن لا طلعن كون من المستشفى كبل للمكبره .
. يله أنه أروح نامي وراج دراسه .
ـ طلعت ونمت ضلينا أيام عايشين بقلق ونافع يومين ورجع من القريه ونحلت السالفه بوديه عمي محمود حلها بينهم الحمدلله فضت عالخير بس الحجي النحجه عليه وعلى شرفي هيج يمر عادي وأبويه راحلهم مره وحده وبعد ما وصل ....
_______________
لبنى ـ من بعد المشاكل الصارت رجعت الاوضاع طبيعية بس النفوس مو مستقره عن نفسي ما تدخلت لا من بعيد ولا من قريب بينهم حتى لينا منعتها رغم تحوص وتريد تطلع تسمع دخلتها الغرفه وقفلت الباب بس للسانها أويلي من لسانها راح تجيبلي الجلطه .
والحمدلله هالفتره خلصانه من خالتي حتى لو ما انظف متگولي لينا تكول عينها مكسوره لان صرنا نعرف ماضيها وسبحان الما عنده ماضي ما عليه بالبشريه
والصراحه من بعد اخر موقف بيت غافر كرهتها على شنو اركض وراها وهي هاي نظرتها وتفكيرها بينا
لينا ـ أروح المدرسه وارجع الكاج نايمه مو تركضين تردين رضاها ترى مو امج ختولي النكسه وهي مكسوره عينها ما تكدر تتأمر عليج .
لبنى ـ لينا ما نريد مشاكل وبعدين اني اعرف اتصرف ما يحتاج تعلميني على شغلي ، غمتني وراحت ورجعت نمت كعدت بالعشره لكيتها طابخه ومنظفة
ومنج من الشيطان ما فجرتي الغرفه عليه يله زين لكيت الحوش ما مغسول غسلته عاد الشغلات نواعم اني اكملها والزم مكينتي .
للظهر لينا تدرس بالاستقبال وسمعت صوتها متلاغيه بس لاتعاركت ويه نور رحتلهن شكو شبيجن .
نور ـ لزمي أختج لا ادزها الج جثه وعلي
لبنى ـ ليش يابه تايهتلج تدزلياه جثه اسم الله عليها
وعلى عمرها
لينا ـ شوفي اذا ما تطلعين من الاستقبال وتخليني ادرس اسوي ما اسوي لا عبالج ساكته اخاف منج ومن امج ام دروب لا حبيبتي خليني ساكته انتن بعد ما تخوفن جلبي .
نور ـ هاي عليمن ادبسزز
ـ أدبسزز بعينج عليمن ادبسزز والله مره ثانيه بس اسمعج تكوليلي ادبسزز أذا ما شگيت حلكج وفرعته واطلع لسانج واكصه عبالج كلها مثلج ومثل اخلاقج كلمه والثانيه ادبسزز ، انتقي الفاظج وربي نفسج يا مربايه وبطريقج گولي لامج خل تربيج زين احسن ما لازمه درب الدلالات والسحارات ونايمه بيت خالتج وعايفتج على حل شعرج
ـ أني ما مربايه ولج هاي عليمن هالحجي
ـ عليج عيني عليج قابل على أختي لبلب بس أخلاقها تشهدلها مو مثلج
لبنى ـ وحده ترد عالثانيه وأني بينهم وما احس غير صارت من الشعر الف يا ويلاه يله فازعتهن دخلتها الغرفه سحل وشعر نور بين اصابعها وتالي وياج تضلين هيج بس عرك ومشاكل
لينا ـ والله ما اسكتلها هي وأمها البربوك عبالج انساها من جانت تتأمر علينا وتخليج تنظفين لاختها لا والله الا اطلعهن من عيونها وحده وحده مو يگولون كلمن واله زمن وأني اجه زمني والوقت الأربيهن بي هي وأمها البرابيك .
ـ أستغفر الله غضب أنتِ مو بنيه يعني هم ترجعين للمشاكل وهنا البيهن مكفيهن .
ـ لبنى سكتي خليني ابرد گلبي واتشمت بيهن نسيتي إشسوت بينا هي وأمها ونسيتي من بطلج من المدرسه .
"من ماتت أمي لليوم ما سمعت منهن كلمه طيبه هيج بشر حرام أتعامل وياه بإصلي وهنا نجلبن علينا وتبجج دگول امي مظلومه والله ألمظلوم ما يظلم اليتامى وينجلب على عباد الله هاي أجتي على أبويه مكسوره عينها وهيج مستجلبه لو جايته كامله مكمله جانت إشسوت! .
ـ صخام سگتيي ولج سكتتي
ـ عوذه شلون بشريه عينهم كويه وصلفه ،أني لو منها ما اطلع غرفتي ما اوصل عتبة الباب مو اضل افرفر بالداربين ومن بيت اختي للخياطات .
والبنت تطلع على أمها وأذا ما أنكس منها هم جانت نافشه ريشها علينا مثل الطاووس ومن بيت لبيت وتتكشخ وتتفيك علينا ومن سياره لسياره ، خلف على جديتي مهديه كسرت رجلها وكعدتها بالبيت ولعلمج لما هاي السالفه الصارت وطشت بين الجيران وبابا منعها من الطلعه تلكينها هسه لو بيت خالتها صبيحه لو عمتي حربيه اخف من الريشه وكلشي جوه أيدها ليش لان العرج دساس عليمن تطلع عليه قابل أكيد على أمها وعلمج كفايه خو سمعتي .
ـ بس كافي عاد مهما يكون أختج الجبيره أحترميها شله داعي هالكلام عيب ماما عيب .
ـ يا أختي الجبيره ماكو جبير بس الله أبو خيمة الزركه
وما أوصييج ابقي بهذا طبعج عيب وعيب والله لو أنتِ مكانها تفله ما تتفل بوجهج بس شسوي لكلبج الفطير
ـ عفتها ورحت على نور لكيتها تبجي نقهرت عليها لازم احجي ويه لينا تبطل تسمعها كلام وتقهرها مهما يكون تضل أمها خطيه هي شنو ذنبها .
واجتي امها خفت تحجيلها بس ما كالت الها همزين ورجعت حجيت ويه لينا بس ما اظن تسمعلي بس تهز برأسها مثل الخبل وتالي شالت موبايلها ومشت على صفا ديري بالج لاتنكتلين .
لينا ـ منو يكتلني غير أرجعه لبطن أمه .
لبنى ـ هزيت رأسي ومشت مستعجله لاتتأخرين خل ميثم يوصلج
ـ اي ميخالف .
ـ طلعت من الغرفه أشوف شگو ماكو خالتي تنظف غرفتها وطلعت ملابس بابا تكويهن ونور على كعدتها أيدها على خدها وصافنه وكتابها بحضنها يمكن كلام لينا ضوجها وصاحت عليه خالتي .
سميعه ـ أذا ما عندج شيء سوي عشه لما اكوي ملابس ابوج
ـ اي خاله هسه
ـ إختج وين راحت
ـ بيت عمتي حربيه على صفا
ـ ووصيتها مـا تتأخر وابوج يرجع تعبان وعصبي يضل بس يحجي مالي خلك لمشاكل وعينج على اختج وخليها تخف رجليها من بيت عمتها انه على بنتي ما سلمت انوبه عليجن سترن عليه .
ـ لا لا تخافين عليها أختي وأعرفها ما عدها شيء وتروحلها علمود يدرسن سوه
ـ ليش شكالولج علينا وبنتي شعدها قابل بس الناس ما ترحم الك يطعن بيك ، وأنه العندي كلتلج عليه وأختج أنتِ مسؤوله عنها .
ـ أن شاء الله خاله ، عفتها خرب ولا أتوب ونفس الوقت حجايتها صدك وهاي صفا ما مرتاحتلها لازم أحاول أمنعها تروحلها هالكثر .
كملت العشه ورجعت لينا وصعدت عالكاونتر كعدت نزلي لاتشوفج
لينا ـ كاونتر الخلفوها عشتوا .
لبنى ـ منو وصلج .
لينا ـ نافع جان طالع بشغله ذبني يم الباب وراح
لبنى ـ لا ربحنا نوبه نافع وبسيارته تريدين تجلطيني أنتِ
ـ شگو غير أبن عمتي شبيج
ـ ونور هم أبن خالتها وأبن خالها وطلع عليها حجي أشكال والوان وطعنوا بشرفها وصارت مشاكل للضالين لازم يصيرلج درس ، شو أمشي لا اكسر راسج بهل الجفجير وطلعه بعد ماكو حدج للمدرسه وهناك تشاوفن شكو موليه عليها للبيت وبيتهم مليان زلم
ـ هاي سميعه حشت برأسج عليه دخل تسكت
ـ أستغفر الله أنتِ ما ناويه عالخير ، أمشي داكولج
ـ مشينا بس اني الها البرميل الطرشي تقرأ برأسج عليه مو بسيطه .
ـ دخلت الغرفه تدردم وخالتي تهز بإيدها وأذن توضيت ودخلت الغرفه أصلي ليش تباعيلي شكو
ـ جنتي أكول عليج ما الج صوت فقيره والبزونه تأكل عشاج ، طلعتي تأمنين مستقبلج وادكين ثكل برأسي!
ـ احجي عدل لينا لا أكسر راسج
ـ يله الحياة تتطلب منج شتسوين تأمنين حياتج لازم تحصلين على واحد حلو والحياة ما تنعاش بدون حلوين
ـ لينا
ـ اليوم أكو شخصية جداً مثقفه ومحترمه ومهمه أيضاً سألوا عنج ويسلمون عليج سلام خاص جداً جداً!!
ـ تتقشمرين حضرتج.
ـ لا والله أحجي الصدك ، صلي صلي ليش عفتج صلاتج المؤمنه المحتسبه وادعيلنا الله يرزقنا باليسأل علينا ويفتقد وجودنا!
ـ كعدت يمها منو
ـ أشوفج عفتي صلاتج مو أنتِ الثكيله!
ـ كمزت من يمها وجبلت بيه عوفيني أكمل صلاتي
ـ غافر شافني وسألني عليج والأحلى سؤاله عنج جداً مميز
ـ غافر وشُــنو سألج
ـ گال گال
ـ وجع أحجي عاد شكال
ـ الست لبنى وين
ـ الست لبنى!
ـ اي والله وعاد كتله والله بطلت من المدرسه
ـ وليش بطلت حرامات
ـ كتله ما ادري أهلي بطلوها بس حسيته ضاج
ـ افتقدتها والله بالعاده تجيينا ودائماً يمنا حتى الحجيه تسأل عنها
لبنى ـ غافر هيج كال
لينا ـ اي وكال بعد سلميلي عليها هواي وكلش مشتاقلها
لبنى ـ جذابه
لينا ـ ههههه لا بس كال سلميلي عليها ولاتكطع رجلها من بيتنا وبس والله .
لبنى ـ صفنت وأبتسمت ولينا تغمزلي شكوو
ـ وضوئج بطل لان شردتي بالحُوب .
ـ دولي أنتِ والحوب يا حب غير بطرانه بس أستغربت سؤاله عني ، عفتها ورجعت كملت صلاتي واكذب اذا ما كلت دوخني سؤاله! ولينا سوتني ميز ونصبت عليه وكلما تشوفني تغمزلي خرب شيخلصني منها واكيد سأل عني بحسن نيه هو خوش رجال وأفتقدني لان جنت أنظف وأساعد الحجيه وزينه عليها أكيد هيج والا هو يحب نور ونور تحبه بعد على شنو اشغل تفكيري لا يابه لا .
الثاني يوم الصبح خالتي تطبخ الغده وأني أغسل الحوش واليوم كعدت من وگت لان عندي فصالات لزهور خطيه تريد فستان مرتب ، وأندك الباب وخالتي صاحت عليه .
سميعه ـ شوفي منو ، ونزلي ثوبي وغطي ركبتج
لبنى ـ هاي شبيها اكيد أنزل ثوبي وفتحت الباب بدون ما أكول منو وصار گبالي بملابسه العسكريه من صدمتي بي ضليت صافنه بوجهه خرب شموقف خايس جان وضحك وحك خشمه وكال .
باقر ـ يول حدري لاتدوخيني أكثر ما أنه دايخ ومسطور!
لبنى ـ ما ادري شلون مشيت من كدامه وصلت خالتي خاله هذا اجه عليج
ـ منو هذا ، منو ولج ، ياهو
باقر ـ أنه عميمه باقر باقر .
سميعه ـ يمه هلا هلا ، شلونك .
لبنى ـ سلمت ورحبت بي وأني واكفه يم الباب ومشيت يم السنك مدري شسوي بس ما أريد أروح من كدامه وهو يحجي ويه عمته ويباوعلي نظراته دافيه ومليانه حنيه .
باقر ـ اليوم التحقت لدوام والحجيه وحبوبه وعمتي لميعه دزوا وياي قماش وقياسات مدري كالوا عدكم خياطه إسمها لبنى .
سميعه ـ اي هالكدامك ، لهناك وصل خياطها خير أن شاء الله تعالي أخذي القماش وشوفي وأتفضل يمه خوما تضل واكف وأول مره تجي بيت عمتك ما يصير
باقر ـ لا عميمه ما أكدر اتأخر عندي دوام والله وكلت امرلكم قبل لا اروح علمود من أنزل امر أخذهن أذا يكملن قبل نزولي .
لبنى ـ يحجي ويباوعلي يوجهلي كلامه جاوبت أي أن شاء الله أكملهن .
سميعه ـ تعالي شوفيهن وأفهمي منه لان يريد يروح
لبنى ـ تقدمت وأخذت العلاكه وشفت كل وحده دازه قطعتين وقياسات أي هذا هو ، رفعت رأسي لكيته صافن بوجهي وخالتي ضربتني بأيدها ومشيت المطبخ ، وجابتله كلاص ماي ورجعت تحجي عليه
سميعه ـ شعندج جلبتي ورة الباب لو يم السنك شو أمشي منا
لبنى ـ شمسويه خاله شتردين مني
ـ شريد منج بس ولي منا لزكتي بالباب دبگتي
ـ غير أبن اخوج يروح وأكمل غسل الحوش
ـ من يروح انه أكولج بس امشي لغرفتج لاتبقين واكفه
ـ وكفت تسويله جاي وهو طلع جكارته ورثها ورفعلي عيونه يباوعلي مبتسم وكفت يم السنك أغسل مواعين مغسوله وخالتي سوتله جاي وشافتني
ـ أثنولت بنت قلق أثنولت من ثول شگو تغسليهن منو رايد منج تغلسين وليش ما تمشين انه ويامن احجي ويه الحياطيين .
ـ عندت عناد بيها ما أمشي وهو يضحك ضحكه خفيفه ويه روحه اخذتله الجاي ودخل غافر
غافر ـ بابكم مفتوح ، ها ضابطنا هنا اليوم شلونك يابه الأهل شلونهم يا هلا بالسياده .
باقر ـ هلا بيك .
غافر ـ ها ست لبنى شلونج شدعوه ما تمرين علينا ترمين علينا السلام حتى الحجيه تسأل عليج .
لبنى ـ حرت شجاوبه أهلا بيك أستاذ والله موجوده وسگتت من شفت باقر ذب جكارته وطلع الثانيه دخنها سريع وعيونه تريد تأكل غافر ويباوعلي أحس النار تطلع من رأسه وأني واكفه باب المطبخ وكفتي فاول بينهم ربي نعمتك مطشره ليش لاتحيير عبدتك المؤمنه بين عبادك الخوش زلم ، أثنينهم أوادم واني هم اصير خوش أدمي وأمشي .
غافر ـ شنو سبب هالزياره الحلوه مو بالعاده .
سميعه ـ جديتك وخالاتك دزن قماش مو لبنى خياطه
غافر ـ ها الست لبنى خياطه أي شگو بيها .
لبنى ـ قبل لا أمشي باقر كال .
باقر ـ بس عمتي لميعه كالت علمود الفصالات عدها رقم نتواصل وياها ونشوف الفصالات ونختار
لبنى ـ أنداريت باوعتله وغافر جاوبه وعلى وجهه ضحكه
غافر ـ أي عدها رقم شلون لعد .
سميعه ـ أنه أكول لنور أدزه رقمها لخالتها وهنا يتواصلن وياها .
باقر ـ خير أن شاء الله .
لبنى ـ مشيت الغرفه وبعد ما طلعت وتذكرت نظراته وأبتسمت ولكيت نفسي أباوع لروحي واشوف نفسي هم طالعه حلوه واعدل بثوبي ، وأنفتح الباب وفزيت
سميعه ـ شعندج اليوم نلكفتي كدام أبن أخوي بسمار وأندكيتي باب المطبخ واني شحجيت وياج اشوفج ما تأخذين حجايه
لبنى ـ خاله ما أسمحلج تحجين عليه كافي سكتت الچ هواي وساكته قبل وهسه لان محترمتج بس مال تحجين عليه حجي يمسسني ما ارضاها بحقي وبعدين عندي شغل وابن أخوج جايب قماش وأني خياطه غير أفهم منه وأمشي ومن أجه غافر مشيت .
ـ أني المسؤوله عليجن واحاسبجن اذا شفت غلط
ـ وعلى شنو جايه تحاسبيني ليش شمسويه من غلط يابه وبصفتج منو تحاسبيني أمي لا ، خالتي لا
مرت ابويه وبس كافي كلمه والثانيه واكفه تحجين عليه
ـ يمه طلع لسانها يمه يمه منج وأني عبالي فقيره .
ـ والله خاله ماكو أحد فقير وأنتوا الفقير تأكلونه .
ـ ديله طلعي نظفي الخضروات هسه يجن أخواتج وأبوج
ـ شگد ضوجتني منها ، طلعت سويت شغلي وغسلت القطع نشرتهن بالحديقه ورى الظهر كعدت أفصل القماش ونور شوفتني الفصالات وسميعه اجتي كعدت يمي تباوعلي .
سميعه ـ أمي خياطها يختلف خيطيلها نفس ثوبها
ـ اي خاله اعرف .
ـ هذه القطعه المن
ـ نور كالت هاي لخالتي لميعه وهي أختارتلها فصالات
ـ أي ديري بالج لاتصكطيهن القماش مبين قماش من زين وهاي القطعه صبيحه اخذتها الها .
ـ أي أن شاء الله خلت وكامت واجتي نور ها
نور ـ اكولج دزيت رقمج لخالتي هي كالت تتواصل وياج ومن ينزل باقر يمر ياخذهن تلحكين تخلصيهن مو
ـ اي ان شاء الله ، راحت ورجعت افصل وخلال يومين كملتهن كلهن وحجيت وياها وبلغتها وجانت حبابه عكس اختها .
لينا ـ تطورات يابه تطورات الخياط صار يجيج من أمكان عاليه والضباط يجيبوهن! شتردين بعد ست لبنى طگيتي صرتي فوك النجم .
لبنى ـ خرب صوتج نصي شنو هالكلام هذا عيب ماما
ـ اي واحنه شكايلين .
ـ تضحك وناصبه عليه وأني دايخه وبس أذكر أسمه أنثول وصرت احب أباوع لنفسي وأرتب بروحي محد لاحظ بس لينا وتكولي أنعجبتي بي بس أني ارفض وعقلي يرفض بس گلبي لا فرحان وطاير من الفرح
" اشتغل يجي على بالي بالبدله العسكريه طويل بطول نافع لا اقصر من نافع بشوي وجسمه مرتب ما عنده كرش عيونه مكحلات عنده غمازه وحده لا يمكن اثنين ما ادري بس الاعرفه عنده غمازه ، هيئته ومشيته تأخذ الروح وصوته من يحجي ويه خالتي .
نفضت الافكار ورجعت للواقع ، اني عاقله واضل عاقله ويضل مجرد أعجاب لا اكثر والله هو يجبر الواحد يفكر بي نظراته تجنن وجوده وحده أمان فد أمنت بي من هو جان موجود هيج شعور لا إرادي سكن روحي
ما أعرف شنو تفسيره .
مر كم يوم ودائماً مرتبه روحي لان ما عرفت يا يوم نزوله وأستحيت اسأل لا والله خفت لان خالتي عينها عليه ما أريد تجيني حجايه .
بيوم دخلت تسبح ولينا جانت بالبيت كاعده اخيط فستان زهور وصلتني رساله من خاله لميعه .
لميعه ـ السلام عليكم شلونج حبيبتي، أكولج عيني لبنى باقر راح ينزل ويمرلكم اذا كاملات علمود يأخذهن .
لبنى ـ وعليكم السلام هلا بيج خاله ، اي كاملات .
ـ هذا هو عيني هسه هو بطريق أروح أكوله يمرلكم
ـ ماشي ، يمه راح يجي كمت طلعتهن ورتبتهن بجيس ورشيت عليهن عطر ووكفت أعدل بروحي ولينا لازمه موبايلي .
لينا ـ ها راح يجي الضابط
ـ بله قشمرتج ، عود أنتِ طلعي عليه أخاف يجي وخالتي بالحمام هي بسلامتها تطول تغسل ملابس يله تطلع .
ـ ليش أني ، خو أنتِ أطلعي عليه أنطيهن اله شكو بيها
ـ لا أخاف عيب خل نور تطلعله
ـ كيفج عيني بس علمودج احسج تردين تشوفينه هو العمر مره ينعاش طلعي شوفي وفضيها وربج غفور رحيم
ـ مو عبالك زودتيها لينا ، أحجي عدل
ـ سدينا حلگنا .
ـ وأندك الجرس يمكن هو أجه ، طلعت من الغرفه وشفت نور طلعت وشويه ورجعت جانت مريضه مصخنه من الصبح
نور ـ اكولج هذا باقر دخلته واكف بالكراج طلعي عليه وانطي الدشاديش مالي خلك اوكف وياه وأمي بالحمام وهو مستعجل يريد يرجع القريه
لبنى ـ ها اي ماشي ودخلت غرفتها وطلعت لينا تدفع بيه ولج خاف عيب
لينا ـ شمسويه قابل بس انطيهن وتعالي
لبنى ـ طلعت عليه واكف منطي ظهره واني أعصر بالجيس وسمع الصوت وأندار وهو مبتسم .
باقر ـ السلام عليكم .
لبنى ـ عليكم السلام هذولي كملن تقدم يمشي بثكل انطيتهن سريع ومتوتره من وجوده رفع عيونه وصفن بيه وأني أتهرب أريد أنهزم
ـ عاشت أيدج ، أتفضلي تعب أيدج .
ـ لا لا خليهن عليه
ـ لا ما يصير ما نريد نتعبج ولو تعبناج ويانا
ـ لا عادي تدللوا ويلبسونهن بالأفراح يارب .
ـ أخذيهن من ايدي أني العليه أخذهن وانطيج تعبهن وأتشكرج
ـ العفو ، أخذتهن عالسريع هو طبيعي عكسي أني انفاسي سريعه وايديه يرجفون واحسه مركز بيه أكثر من اللازم ، كح وحجه .
ـ اذا عمتي ما موجوده أنه أمشي وأنتِ حدري أنه أرد الباب وراي .
ـ صفنت على لهجته .
ـ فيمالاا ياب.
ـ الله وياك ، مشه ورد الباب وراه ورفعلي ايده مثل التحيه ورجعت لازمه گلبي وصارت بوجهي خالتي!
سميعه ـ شتسوين!
