رواية خيط وابرة الفصل الثاني عشر بقلم شمس العراقية
لميعه ...
ـ كاعدين يسولفون باللي صار وأمي ساكته ما شاركت لان كلها تلوم بنافع محد رأضي على تصرفه ويه خواله
ومشعان من عاود من بغداد وسمع ضل يحجي عليه ما قصر بي خنت حيلي هو ضل ساكت ما فتح حلگه وياه
... وأمي ما حجت ما تريد تزعله وهو من أجه لحد هسه ساكن الجول بس وكت النوم يجي ينام بالديوان وأمي تضل تتنظره ما ترتاح أذا ما تشوفه نايم بفراشه ما حبت ولدها بگد ما تحب نافع لا مشعان ولا منعم ولا جاسم ، نافع وبس .
الحجيه عطايات ـ گومي لحكي وشوفي وين صار غوربت الدنيا وهو ما راجع ، خل يجيني كوليله حبوبتك تريدك
لميعه ـ طلعت للكاع واكف لوحده ويعاين عالزرع وبأيده جگارته ، الله يساعدك ، رفع عينه وحاجبه ما يكصه سيف ، شبيك يبعد عمتك شو مگدر خلكك
نافع ـ لا على شــنو
ـ چا أمش حبوبتك تريدك .
ـ أبوي رد الولايه لو بعده
ـ لا بعده ، ضايج من أبوك ميخالف عميمه هو علمودك ولصالحك حجه عليك ما يريدلك الححايه ويضلون خوالك وأمك هم خطيه أمها وأخواتها
... أنت يعمه الله يسلمك تهورت وطكيتهن شمالك ما كظيت أعصابك وتسودنت عليهن .
ـ عمه ما تحملت ينجاب طاريها بالموزين ويحجون بشرفها الدم صعد برأسي عقل ما ضل عندي بهذيج اللحظه لو اكو بانزين وجداجه أحركهم حرك ، ما تدرين شصار بيه
كلشي الا هي خط أحمر واللي يتدنالها، أشرب دمه
ـ هيج تحبها يبعد عمتك
ـ ويه نفسي اليصعد وينزل هي
ـ شجابك على درب العشك شوازك متكولي يبعد عمتك
ـ أحلى حب هو حبها ، والله عايش علمودها ، أحسب الها يوم يوم علما تكبر واجيبها يمي، عمه أحبها حب ما تتخيلنه أبداً ، أمها الجابتها متحبها بگدي والله
وهسه السادس شاغل تفكيري وياها أكثر منها ، شگد ما أكدر ما أريد اشغلها عن دراستها وتالي طلعت الها هالسالفه خربت كل واهسها الله يخرب ديارهم .
ـ أيده بجيبه وأيد لازم جگارته ويحجي وينكت جمر الجكارة بطارف أصبعه وملامح وجهه مكتظه بالحزن
ومخنوك عليها .
أنه هم أختنكت عليه مدري ليش گلبي يگولي ينكسر گلبه عليها وأن شاء الله ما ينكسر وخنت حيلي عليك يعمه ، امش رد القصر حبوبتك عينها عالدرب أتانيك.
ـ هسه شوية أنوب
ـ براحتك ، رتبت على أجتافه هونها وهي تهون ورديت القصر وبلغت أمي ودنجت مقهوره عليه وضل الحال فترة وهو خنت حيلي عليه رد الولايه ادري بي ما يگدر يفاركها شيصبره وهي بعيده عنه ولخاطرهم ضل والا هو جابوا سحل من البيت .
نشتغل أنه ووهبيه وهي من الصبح مالها خلك ، جان ضليتي وانه اكفي الشغل لوحدي والبنات موجودات يعاونني ليش اجيتي خاف ضغطج هبط .
وهبيه ـ لا الشغل شعلي وأحنه ششمتغلين هذن على شغل كبل ما يسون شيء نفضي خلك الله وگيلج .
.. بس أني اهجس شيء نايم على افادي وصدري مقموت مدري شبلاني ما مرتاحه من البارحه باليل يمكن ثكلت عالعشه وحربي خنت حيلي جابلنا بهل المشواي تخمنا تخم .
ـ يجوز ، ذبي من أيدج وردي للقصر هسه أكمل وأجيب مخضر من الخضره والحكج صالحه تتنظرني تحط الجدر عالنار
وجاي نحجي وأجانا جاسم يركض وفحطان اجانا
ابو العلوم أنه هاي ركضته گلبي يقبضني منها ما يوم أجاني بالخير مشيته مشية واحد جاي وجايب الشر وياه
ـ گولي يالله شوف شگو وعمتي دزته علينا ، ها جاسم
لميعه ـ كعد أخذ نفس وأنه أعاين على دشداشته كلها دم ووهبيه كامت وتعثرت وصلته وتنفض بي
وهبيه ـ شنهو هذا الدم شبلاك يجاسم
لميعه ـ احجي يجاسم شعلومك أنه گلبي علمني من اجيتنا مهرف وتطارد والعجاجه وراك احجي شعلومك.
جاسم ـ حربي حربي
وهبيه ـ يمه وليدي شبي حربي ولك احجي شبي
لميعه ـ وهبيه لزمته وتنفض بي يامعوده كيفج أواش انطي مجال يتنفس ويحجي ، احجي يجاسم
جاسم ـ حربي طگ واحد من العرب ضرب طلقة برأسه والعرب كلها التمت على المكتول
وهبيه ـ يبوووووي يبوووووي يمه ولدي يمه سوده بوجه أمك ولك يمه حربي .
لميعه ـ وهبيه كامت تدك وتلطم ومشت تعيط وجاسم يباوع الدم على أيده ويرجف وانه تخشبت بكاعي رجعت عليه انكت بي منهو المكتول يجاسم حاجيني وليش طگه وياهو ولك وليش گتله .
ـ فليح أبن فرهود
ـ وشنهي كونته ويه فليح
ـ مدري بس شفته من سحله بالطينه وگتله جدام العرب كلها وأنه ردت اگظه وأمنعه ما كدرت ما كدرت وتالي الزلمه طاح بكاعه ومات ، فليح مات يلميعه .
ـ أمش ، أمش ما يوم اجيتني اذا ما متكبع بالشر كومته ومشينا للقصر والدنيا معتلگه كلها واكفه يم بابنا وتتغايث وكوامة طلابة وفتالة شر
يا حافظ يا ربي دخيلك وين جانتلنه هالمصيبه هاي .
وحربي شماله تسودن وكام يطگ خلك الله رصاص شنهي طلابته ويه فليح وفليح أبن فرهود شمسوي من فاينه !
.. والله فرهود خوش زلمه رجال طيب ناس مالهم أذيه عالخلك شمالها الأوادم تسودنت، دخيلك ربي فضها عالخير، شمالكم يعمه نصابيتوا بعين خرب بحظك يمشعان بعدها طلابة نافع ما خلصانين منها أدور حربي .
" رجليه ما يعينيني أرد أصل وأشوفن حربي بس ما لحگت عليه كظوا الحكومه وأخذوا يمه خنت حيلي وين مأخذينه ولكم حاجوني وين مأخذينه هذا شيخنا مو مال هاي السوالف .
أدافع بالنسوان ارد اصل ومنعم منعني، وين مأخذينه حاجيني يخوي شنهي السالفه گلبي جمر واحد منكم يعلمني بالسالفه شنهي طلابته ويه فليح؟
منعم ـ مو وگته الحجي فوتي على أمي لاتطلعن
جاسم جيبلي النقال أخابر على باقر .
لميعه ـ طبيت البيت ووهبيه ما ميته اليوم الا من عام الأول ويكبن عليها ماي ويكعدن بيها وصالحه تنفض بيها وأمي مدنجه وتضرب برجلها قوي وحلكها يابس يمه حربي شوداك على فليح
الحجيه عطايات ـ هسه يجون ونعلم بالسالفه كلها لاتزيدينها عليَّ .
ـ تضرب على رجلها وعينها عالباب وتحجي وصوتها مطبك شيء خانگها خنك، گمت اخاف عليها وهي ما تقبل أحد يكرب صوبها ودخل جاسم يدك على رأسه ، لاتجوعر متشوف أمي شحالها
جاسم ـ كظوا الحكومه وخذوا كظوا شيخنا ، وولد فرهود متحزمين يردون يگتلونه كبل لايوصل المركز .
الحجيه عطايات ـ يبووووو طين على رأسج يعطايات يمه سوده بوجهي عليك يمشعان يمه ولدك انعانوا طكتهم بسحر مهديه وفرطتهم مثل السبحه، ما فاتت جيسسها بنت زكيه ، سالفة نافع تفوتها النا بارده لا شلون اذا ما تشعل نار بگلبي عليهم يمه ويلادي يمه خنت حيلي عليكم حبوبه يمه خنت حيلي عليكم حبوبه ولكم شحجي شگول يمه نفسي اليصعد وينزل هما يمه حالي ومالي هلي وطوايفي كلهم يمه ويلادي شجابك عالسلاح يمسودن مو أنت الشيخ وجبير أخوتك وجبير الگوم والعاقل وكلنا بركبتك شجاك تسودنت يحبوبه، طين برأسج يوهبيه على هالصركاعه الوكعت علينا يبوووووه يبووووه
لميعه ـ القصر اظلم علينا وأنه أعاين عالدرب ولا زلمه ضل بالقصر كلها مشت، وتذكرت الموبايل خل اخابر بلكي واحد منهم يرد عليه ، خل اشوفن نافع ودگيت عليه شكثر يله حصلته ها ولك عمه وينكم حاحيني أخوك وينه شنهي كونته .
نافع ـ سالفه جبيره عمه
ـ ولك عمه أدري سالفه جبيره چا عليمن داكه عليك ارد افهم طلابته حاجيني على أخوك وين أخذوا وشنهي كونته ويه هذا فليح ليش گتله
ـ عمه مو وگته بعدين بعدين
ـ ولك عمه محد يحجيلنا شيءوكلها مشت وحبوبتك تخبلت وهبيه راح تموت على أبنها ،فدوه لطولك أحجيلي وطمن گلبي على أخوك .
ـ بس خل أحصل درب وأجيكم
ـ سد الخط ودكيت على باقر ولا واحد حصلته وضلينا نتاني وسمعنا صوت أحد أجانا ركضت وشفت سيارة طبت هذا نافع ، نزل وصار الرمي علينا من كل صوب وگمنا نتعايط يمه نافع يمه وليدي دخيلك يا أبو فاضل نافــــع ولك عمه
الحجيه عطايات ـ ولك حبوبه وليدي نافـــع تموت حبوبتك يمه وليدي يمه لاتطگونه يمه موتوني أنه خذو ثأركم مني انه أموت بمكان فليح ولا تطگون واحد منهم،نافع يحيل حبوبتك
لميعه ـ گامت كوه تمشي وتعيط وتتوسل رادت تطلع ومنعناها يمه وين تردين تموتين ما تشوفين الرمي من كل صوب أمشي بسد الحايط لما يخف الرمي
الحجيه عطايات ـ ولجن نافع ماكو وانه كاعده أخافن من الموت گبر يلمني ولا هالقصر يحميني وخرن عن دربي خلني أموت موتت جلاب السود .
ـ ودفعتنا توها فتحت الباب ما حسينا الا نافع حضنها وكع هو وياها وسد الباب برجله وكلنا أنحصرنا بالزاويه وهو حاضن أمي وهي كاظته كل قوتها وتلم بي تخاف عليه لاتجي طلقه وعاينت زين ودمه بطوله يمه متصاوب نافع متصاوب .
الحجيه عطايات ـ يمه أمي وأبوي متصاوب ولك حبوبه صابتك طلقه كون هالطلقه بصدري
نافع ـ لاتخافين حبوبه ما تموت هالطلقه خفيفه بجتفي بس انتوا طمنوني عليكم ما بيكم شيء
الحجيه عطايات ـ ولك حبوبه عوفك من عنده ، أنت متصاوب ودمك ينفض من أجتافك سوده بوجهك حربي على هالكونه وين جانتلنه ، ولك حبوبه دمك راح يخلص
نافع ـ ما عليه شيء أبقن لاتتحركن لما أخابر باقر
لميعه ـ الرمي أنكطع علينا وكلنا محصورين بالزاويه ونافع امي حاضنته ودمه بإيدها وتبجي وهو يخابر وكاتم وجعه سوده بوجهي .
نافع ـ ربك لطف اجتفي بجتفي جان أجتي برأسي بس نزلت من السياره صار الرمي وأحتميت بالسياره وطفرت داخل الكواويد سووا سيارتي منخل ، لا لا البيت عالي كلهم بسدي ، لا خف الرمي هساع بس باقر أستعجلنا بالدوريه هذولي ما اضمنهم وأنه متصاوب ، ماشي
لميعه ـ نباوعله وأمي تبجي وهو يسگت بيها ولازم جتافه وسمعنه صوت وگام وامي مجلبه بي ودخل مشعان وشاف نافع لو تخبل اجه يركض وحضنه يبوس بي .
الحجيه عطايات ـ الله يعلكهم بذيال دشداشتك يا يمه
مشعان ـ بيك شيء يابه ، الحمدلله خفيفه أنتَ سبع أمشي للمستشفى ، منعم خلك بالقصر والدوريه يم الباب لما نشوف تاليها .
وهبيه ـ ابوس أيدك ورجلك أبني حربي واحد منكم يحاجيني ويبرد نار گلبي شنو طلابته ويه فليح أخذوني اشوفه
مشعان ـ وين أخذج يا مره ولاتخافين وبعد هساع أخذوا كلشي ما فاهمين ولا أبنج يرضى يفگ حلگه انه ادري شجاه تسودن وطگ ابن فرهود خبل المخابيل شجابك شوداك عليهم شنهي كونتك وياهم صام حلگه .
لميعه ـ أخذوا نافع المستشفى ومنعم ضل يمنا والدوريه يم الباب يفترون حوالين القصر والدنيا نكلبت علينا والزلوم كلها يم بابنه ولا واحد حجه وگال شنو طلابه فليح ويه حربي!
تسسمنا بهل اليوم محد عينه خذت نوم ضلينا مكابلين الباب ونافع ما جابوا ونوب أمي تخبلت وتخابر بي الحمدلله ما بي شيء بس ماضل وگت كالوا الصبح يجيبوا .
بالف يا ويلاه خلص هالليل وليل الاكشر علينا والصبح أجه نافع ومشعان دخل بغرفة أمي تمددت وجلب بيه
نافع ـ عميمه خاف تخابرج لاتجيبين طاري الها گوليلها كلشي ما بي ، ما أريد اشغل تفكيرها وتخاف عليه
لميعه ـ الناس بالناس والكرعه تحك بالرأس ، خلك برويحتك هسه مو وكت نوره ، ارتاح وراك شغل منتظرك وأخوك يريد زلوم تفك طلابته .
ـ صدك جذب عميمه أفدي بروحي هذا شيخنا .
ـ الله يفگ طلابته على خير يعمه أرتاح أنتَ جرحك بعده أخضر لاتگوم خلك ساتر علينا وأنه اروح أشوفن أبوك وعمامك وأفتهم منهم بلجن واحد منهن يحجيلي ..
.. طلعت عليهم ، منعم يخابر وطلع مستعجل وأمي تتعكز وتفتر وراهم وكفت شامخه بالطرمه وحدرن يمها نسوان وعجايز من عربنا وگرايبنا عمتي ام خضير هم من سمعت جابت بناتها واجتها وكعدن تكابلن انه ما رحت بقيت اعاين من بعيد .
والعرفته أبوي ما راد وياهم كايل ما ارد اذا مو حربي وياي .
وضلينا كاعدين ودخل مشعان مستعجل وباقر يخابر وصاح على أمه ويحاجيها وهي تتوسل بي تعرف شيء على حربي .
باقر ـ يمه لايضل بالج عليه والله بخير ويسلم عليج چا توصيني على أخوي ، بس هسه أهدي واسمعيني لان مو مال اكعد احاجيج وكلها تريدني الدنيا نكلبت علينا وخوالي كلهم جايين لهنا .
وهبيه ـ شلون ما يجون خوالك يفدونكم بدمهم غير موبايلي ما طفه يبعد أمك وجدك متحزم وجاي .
لميعه ـ العرفته منهم مشتكين على بيت فرهود لان نافع أنصاب وسالفة حربي ما حصلنا لا حگ ولا باطل يكولون ما يحجي وبعدها التحيقيقات جاريه .
وسمعت صوت هورنات سيارات جثيره وطلعوا مشعان ومنعم .
مشعان ـ باقر وينه ، باقر بابا خوالك وصلوا بسرررعه
لميعه ـ ونزلوا كومة زلوم وشيوخ كلها معكله خوال حربي من الغربيه، واستقبلهم مشعان ومنعم وباقر وناجح وعمي رزاق وياهم واعاين عالسيارات شكثر ما شاء الله
.. ودخلوا الحوش وتقدمت وهبيه تبجي تقدم شيخهم باسها من رأسها ويسكت بيها ، وأخوانها سبعه كلهم لابسين زي وعگل وبيهم عسكري رتبه وزي رسمي كلهم سلموا عليها وتقدم الشيخ هو وولده سلموا على أمي .
الشيخ ذياب الفهداوي ـ الحجيه أم مشعان مصابچ مصابنه، ودمچ دمنه وحربي مو بس أولدچ، حربي ولدنا وخواله الفهداويين ما يهون عليهم
ويمه السجن ما هو عيب ، العيب يمّه على اللي ما عنده رجال تطلعه وحفيدج رجّال وابن أصول، واحنه نعرف زين معدنكم وإحنه حاضرين بالروح والمال والرجال
.. من هاللحظة لحد ما يطلع وعينه تشوف الشمس
أيدنا بإيدكم وولدي سبعتهم ولدكم وما نخليچ توگفين على الباب لوحدچ احنه خواله وياكم لحد ما تفض السالفه .
وعد شيوخ... ما ننام ولا يغمضلنا جفن لحد نشوفه يفتر بديرته مرفوع الراس وكلمن و يتعدى عليكم نوگف بوجه .
بعدها التفت على ولده وگال بصوت مسموع للكل
"سجلوها يول... بيت الشيخ حبيب خط أحمر، واللي يتقرب قصرهم نكص رجلينو .
الحجيه عطايات ـ والنعم منكم ويا كُل الهلا بجيتكم مناك لهناك كل خطوه بهلأ وما تقصرون دومكم صاحبين واجب ،أتفضلوا يمه البيت بيتكم .
لميعه ـ دخلوا الديوان ومشعان نخبص بيهم وطلع جاسم مهرف فتح الباب ودخلن ثلاث سيارت ، لفيت لثامي ، عاينت زين عمي ياسين وولده كلهم قادر ومحمود لابس ملابس العسكريه وارد اركز زين اكو زلوم ثانيه وراهم وشفته هذا صباح أي والله شجابك يمصخم البين والله هو ومحمود تقدم على أمي باسها ويعافيلها على سلامة نافع وشافني من بين النسوان
لبدت بصف الحايط وومحمود كرب من بعيد گال
محمود ـ چا نافع وينه أرد أشوفه هالجلب هذا .
لميعه ـ بغرفة أمي ، جاسم مشه كدامه وهو مشه من كدامي ودخلوا كلهم وكفوا يسلمون على أمي .
محمود ـ ها ولك جلب كالوا متصاوب بس أنتَ شيموتك عمرك عمر النسر ، الحمدلله على سلامتك
خالي
نافع ـ الله يسلمك خالي .
ـ أمك من سمعت صارت وصلتين كطعت نفسها هسه اجتي وراي ناجح جابها ، خلك خلك ارتاح جرحك بعده .
لميعه ـ طلع وعبرني ولزم موبايله بعده نفس شخصيته وجماله ولا كبران ، وكف يحجي وياهم ودخلوا يسلمون على خوال حربي ودخلت سيارة ناجح ونزلت منها حربيه عبرتهن تركض هي مزاعلته من سالفة خواله .
حربيه ـ يمه نافع سوده بوجه أمك وينه وينه
لميعه ـ بغرفة أمي أخذتها ودخلت حضنته وتبوس بي
حربيه ـ ليش هيج ولك أشسويت بيه تريد تموتني أنت
نافع ـ لاتخافين يمه ما بيه شيء خفيفه
صالحه ـ لميعه تعاي وياي كلها التمت نسوي جاي ونقدم ماي القصر انترس ماكو رجل تمشين منو يكول ياسين عكب هالعمر يجيب ولده ويجي على أخوه .
ـ لا يصالحه جنج ما تعرفين دم أهل الجنوب ووكفاتهم بهيج محنه وشده لو كل خلافات ما يضل زعل على حاله والله يطيب النفوس ، أمشي للمطبخ يصالحه.
ورحنا سوينا الجاي وجاسم وناجح ياخذون الصياني وما نلحك البوفيه كلها فرغناها من الاستكاين والصياني
كلها للخطار والف هلا بالخطار يارب تفض هالسالفه عالخير ونجتمع بالافراح
وانه ضليت انتقل من مكان لمكان ونافع يصييح عليه يرد يكوم ولك عمه اركد بفراشك وينك وين الگومه .
نافع ـ خل أكوم عمه مو مال كعدة ، بس صيحيلي ناجح .
لميعه ـ صحتله وطلعه سانده على خواله وشافهم نزل رأسه فشلان منهم وحربيه تطبطب على كتافه وتقدم سلم على جده ياسين بس قادر شوي وجهه ثكيل بس هم سلم عليه وتحمدله بالسلامه ولبدت بصف الشباج من شفت صباح سلم عليه وكف بنصهم وصالحه ندهتني بجتافي .
صالحه ـ والله الزلوم ولا تحقد وتشيل بگلبها رغم كل الصار ، ردت گلوبهم وأجو يساندون عمهم وأبن عمهم بهل الشدة ، بس مهديه شعجب ما أجت وياهم
لميعه ـ مدري شلونج يصالحه شتجي على سالفة نافع الله يعينها حتى عينها مكسوره ، عوفينا منها هسع
يله خل نرد المطبخ مو مال نكظيها سوالف هسه يجون يردون جاي وننخبص .
وطلع نافع يخابر ودخلوا غافر واختي صبيحه ونهاوند
سلمت عليهن وغافر حاضن نافع بكل قوته سوده عليه يخاف على أخوه
غافر ـ من أحاجيك متكولي متصاوب وأني أخر من يدري والله بيك طلقه ثانيه على هالسالفه السويتها بيه حسابك بعدين هاي ما انساها الك .
نافع ـ لاتخاف عليه ما أموت وأعوفك
ـ أنت أخوي شلون ما أخاف عليك .
لميعه ـ دخلن أخواتي وأمي تباوع بين الوجوه مدري ليش حسيتها تدور على سميعه! لان كلها أجتي الا هي حتى رجلها نسى البكلبه واجه على عمه وهي ما أجتي
.. ومشينا المطبخ ومن كثر ما صبينا جاي وطابين طالعين رجلين ما ضلت عندي وللظهر جابوا الذبايح ومشعان ومحمود ذبحوا وصلخوا الذبايح وكطعوها وجابوا النا واستلمنا الطبخ انه وهبيه وصالحه وهبيه التطبخ دائماً بالعزايم نخليها هي التطبخ وأنه ام يحربي
رغم نار كلبها ما قصرت خطيه وفضينا الغده بس خوال حربي وعمامي وأحنه الباقيين محد ضل عالغده ...
والعصر اجت زلوم وصارت كعدة بالديوان وأنه كمت ما اشوف دربي من التعب وأمي كامت تحجي على حربيه
الحجيه عطايات ـ جان جبتي بناتج وياج ما تكولن هالبنيه وكعت على صفحه .
لميعه ـ كعدت بسد أمي تعبانه وانطيتها علاجها
الحجيه عطايات ـ ولج يمه ابن أخوج خذه دواه هذا ما يهم لجرحه واخافن عليه ما تشوفنه اكل لكمه يعوض دماته الخسرهن ، شويتله المعلاك وهو ولا رگد بكاعه يتحرك هواي بسلامه عافيته وطوله .
لميعه ـ اي يمه لاتشيلين همه أنه عيني عليه وهذا ابن الحلال أجه ، دخل لازم أيده وعماته كامن سلمن عليه وطلعن وضلينا بس أنه وحربيه وأمي هزت رأسها وكالتله
الحجيه عطايات ـ هم خابرت حبابيك أقصد عمتك
نافع ـ ليش حبوبه .
ـ شني ليش يحبوبه چا عمتك مو من عدنا من جان أستحت شگد كلبها اسود ليش ناقصه أيد رجل لو ما تندل الدرب لو ما وصلها خبر ابن أخوها دخل السجن وطلابته الدنيا كلها مخبوصها بيها ونكلبت علينا
... جان گالت أروحن وأشوفن أمي وأبوي وأخوي وأوكف وياهم بهل المحنه السوده تجي حالها من حال أخواتها حتى الغرب أجو علينا وبيت عمك رزاق كلهن أجن كاعدات يمي ما عافني وعمتك أم حصن مخابره مـا خابرت ، شگد جلبه عمتك .
ـ والله ما أدري حبوبه أعذريها مـا تعرف مالات الأوادم
ـ لا والله تعرفهن بس جلبه حتى رجلها أخير منها من سمع أجه وسلم عليه عكب كل اللي صار الا هي
ـ شتسويلها حبوبه هي هالشكل بعد، يله أنه أروح اشوف خالي محمود وعمه حضري ملابس لحربي ما كدرت اكول لماما .
ـ هسع أنه أحضرهن وطلع ورحت حضرتله وشافتهن وهبيه وكامت تبجي ونافع حضنها ويسگت بيها ودخل باقر مستعجل اخذهن وطلع ولليل فضت الكعده والفهمته منهم اتفقوا باجر الكعدة الجبيره وتحضر بيها شيوخ العشيره ووجهاء من طرفنا ومن طرفهم ..
وأهل وهبيه باتوا عدنا وأنه تمددت تعبانه من الشغل
وأمي تغير ضماد نافع لان تحرك هواي وحربيه عالأيدها وما خلته يكوم فرشتله ونومته يمها تخاف على جرحه لا يلتهب ..
من الفجر گمنا عالقصر أنه ونهاوند بس صبيحه ما بيها رادت تكوم وامي ما خلتها وعاينت من الشباج بيت عمي ياسين أجوو ومحمود دخل طبگ سيارته ليجدام وطلع عليه نافع ونزلن بناته شجابهن يمه بنات عروبه
دخلن وهنا من زمان ما جايات علينا وسلمت عليهن ونورس صايره شحلاتها گمر ويضوي ومتغيرات ولا عرفتهن ملابس وشكلهن .
نورس ـ شلونج خاله .
لميعه ـ الحمدلله هلا بنورس ودخلن على أمي وتبوس وتشتم مصت دمهن مص ما جايتنا من زمان عبالك عروبه اليوم دخلت علينا .
الحجيه عطايات ـ يمه هلا يمه هلا ، يمه ريحة الغوالي يمه بنياتها ، لما حربي يدخل السجن انه ما اشوفجن
لميعه ـ باوعتله شعجب ما اجتي وياهن
نافع ـ منو
ـ تغشم نفسك ولك منو غير نوره
ـ ما كتلها والله وهي أساساً ضايجه من ورى عمتي لان ما اجتي وحجتها البنات وين تعوفهن محسستهن بنات يرضعنن وحدتهن بگد البغل .
ـ شتسويلها
ـ يله أنه أمشي ، أروح اساعدهم انصب الجوادر .
ـ دير بالك على جرحك
ـ بس أوكف يمهم مهم ما اضل كاعد .
ـ راحلهم ونصبوا الجوادر للفصل وأعاين سيارات شكثر عالم بالعادة تصير عدنا فصول بس مثل هالكعدة ما صايره هواي عالم أجتنا ، وجابوا الذبايح وذبحوا بعد ما يفض الفصل كالوا يصبون الغده يله يمشون العالم وعيب من شيوخ عشايرنا وشيوخ أهل الغريبه خوال حربي .
... ذبحوا ودخل نافع لازم ايده خنت عليك يعمه كون الصواب بعمتك ووياه الطباخ اي زين ما سويت يفكر بعمته لاتتعب فدوه لطولك .
.. وخلصنا من سالفة الطبخ والجاي لان جابوا جايجي وكهوجي واستلموا كلشي برى ، ضلينا بس احنه داخل القصر والبنات نادرات شلون يشتغلن شغل وينظفن تنظيف معدلات مثل أمهن الله يرحمها وهاي نورس تأكل من الكاع وصله وصبيحه صافنه عليه وأمي هم اخذتلها صفنه تعاين الها .
لميعه ـ كعدت أنه وياهن وكعدن يسولفن نورس أمها نسخه منها شكثر تشبهه .
صالحه ـ شجابجن منو دلاجن الدرب منين طلعت الشمس
نورس ـ والله عمه أبويه أجانا باليل الوقت متأخر كال تحضرن الصبح تمشن وياي للقريه على بيت خوالجن تساعدن خالتجن لميعه وكعت عالصفحه من الشغل وماكو من البنات وحده تساعدها واجينا والعرفته بنات خالي مشعان ولا وحده جايه .
صالحه ـ اي زين ما سوه أبوج على اقل احسن من أخته بالجذب ما جابت وحده من بناتها يساعدنه بالشغل أنه حامل وأخافن على البطني وخالتجن خطيه وكعت على صفحهه وانتن يمه شون بنات معدلات وسباعيات الله يرحمها معلمتجن كلشي، تعرفن تطبخن مو
نبأ ـ أي عمه نعرف نطبخ .
لميعه ـ يحجن وانه صافنه عليهن تذكرت أختي وضلينا كاعدين لان بعد كله عالطباخ خلصنا ضلن نواعم ما عدنا شيء ودخل نافع وصاحلي
نافع ـ عمه تعاي .
لميعه ـ ها عمه گول .
نافع ـ أريد ملابس ، ملابسي صارت دهن عالحاله
ـ اي عمه هسه جبتله ملابسه ودخل غيرهن وطلعت شايله هدومه وأمي صاحت على نورس .
الحجيه عطايات ـ نورس حبوبه أخذي هدوم أبن خالج وغسليهن بدال خالتج تعبت .
نورس ـ اي بيبي هسه .
لميعه ـ باوعت على أمي، الله يستر منج شنو أبالج اخذتهن مني وغسلتهن هذاك الغسل شونه ونشرتهن عالحبل أيدها خفيفه عالشغله نفس شمرت أمهن .
وكعدت بالمطبخ خذيت موبايلي لكيت نوره متصله عليه وأتصلت عليها ها نوره ماما جنت اشتغل
نور ـ شلونج خاله والله فشلانه منكم حقكم عليه بس شسوي مو بإيدي والله جان أجييت
ـ لا يعين خالتج معذوره ، شلونج أنتِ
ـ زينه، خاله نافع قريب منج
ـ لا والله يم الزلم واجه غير ملابسه وراح
ـ اي الصبح خابرني كالي ما عنده مجال وربي يفضها على خير والله حربي ما يستاهل .
ـ اي والله ما يستاهل ، الله يسمع منج وعفتها لان مشعان اجه گبل عفت الموبايل وانخبصنا وياه يردون خاوليات حضرتهن وراح ، وباوعت يمكن بلش الفصل
سدوا البردات هو وناجح وباقر وكف يم الباب صحتله
نافع ـ ها عمه
لميعه ـ تعال احجيلي
ـ هسه راح يبلش الفصل بس ينتظرون جدي يجي
ـ ليش جدك ما اجه
ـ لا وين ليش أقتنع يجي نوم ما نايم كاعد بالمكتب مالت باقر ينتظر حربي هسع راحوا يجيبونه
ـ يارب يتلطف بينا ويفگ هالطلابه على خير وهسه شني شيصير
ـ يفصلونه فصل على دم أبنهم وحضروا ناس وشيوخ عشيرتهم واحنه هم شيوخ عشيرتنا وخوال حربي هم حضروا شيوخ منهم غير لو افتح ألج الباب وأشوفج العالم والسيارات شكثر ثلاث جوادر طبك سوه يله كفن .
ـ اي هواي عالم ما شاء الله وبعدين شيصير
ـ فصل وبعدها يضل حق العام القانون يأخذ مجراه المشكله حربي مخيط حلكه خياط، هو لو بس يحجي ونفهم منه ليش گتله لازم أكو سبب قوي يخلي يسحله بالطين چدام العرب وضاربه طلقه برأسه عامل العمل بي قبل لا يگتله الظاهر قبلها متعاركين ومتلاوين هو وياه بس على شُــنو محد يعرف .
ـ يمه الزهره
ـ أي والله وحقهم أهله فاير دمهم فور وفرهود متحزم حزام والرجال گلبه محترك على أبنه والله لو يوالني يأكلني بدون ملح سلت عالمعده .
ـ يمه دخيلك يا أبو فاضل
ـ چا شعبالج گاتل جبيرهم جبير أخوانه ضال بدون زواج
بس لازم وراه سالفه جايده لازم اخ لو يخلوني احقق ويه حربي بس شوصلني للتحقيق أنه دفاع مدني لو أكطع نفسي تكطع ما أوصله .
ـ الله يفضها عالخير .
ـ يله عميمه انطيتج من وكتي لانج عزيزه أمشي منا
ـ ماشيه عمه وأنت دش داخل ترى مشعان كلبه مورم منكم يجيب ويوصي لايطلعون برى يخاف عليكم .
ـ الروح ما يأخذها غير الخالقها .
ـ الله يحفظكم ودخلت يمهم وأمي ما صبرت شدت العزم وكامت وصاحت بيهم ودخلتهم البيت بالغصب ما خلتهم يطلعون لان هذولاك دمهم فاير ما يندري واحد منهم طايش ويخالف شور الكبار ويكوم يرمي ويصوبهم اسم الله .
الحجية عطايات ـ والله اليطلع ويوكف الا اكسر هالعصا على ظهره ، تردون تموتونا ، أركدوا بكاعهم لما تفض طلابة أخوكم وأنت متصاوب وجرحك ملتهب شعندك تسحل بيهم ، أمش أرتاح بفراشك ولو فضت يدزون عليك .
نافع ـ شنو نسوان أحنه تكعدينا بالبيت صدك جذب حبوبه
ـ أكعدكم وأكسر راسكم وليش شبيهن النسوان مو من أعجابك ما نحضر فضول .
ـ لا والله من أعجابك وتلوكلج بساعة زمان تذبيحنهم وتفضينها مو حبوبه .
ـ ولا ينگدرلك لا والله ، يله أخذ أخوانك وأمش كدامي
ـ دخلوا جوه ونافع يفتر مثل المگوك كوه عليه وناجح يخابر وأنه ما صبرت لزمت الشباج وكفت بسد صالحه وعاينت زين ها تشوفين شيء .
ـ أي هاي مو سيارة باقر أجه
ـ اي هو فدوه لطوله خنت حيلي شون التعب مبين على وجهه ، نزل وسند جده تعبان ومشعان تلكاه واشر لباقر يدخل البيت باقر طلع جگارته وعند ما يمشي عاد محمود سحبه وجابه للبيت وهو يحجي ما راضي .
باقر ـ ترى ما يصير يابه ، شگو جايبني البيت عمي أهووو ، ترة مو وضعيه هاي بالعباس مهزله .
محمود ـ أنت أكثر واحد نخاف عليك أمشي داخل ولا تشلع گلبنا تريد تموووت هااا أمش الموت ينتظرك أخوان فليح گومة زلوم وما كاظتهم واصلاً غلط منك رحت المركز وتجيب جدك
باقر ـ والله مال بيكسي وأخرطهم خرط وأنعل الكواد اليطلع وراهم متخلوني ساكت .
لميعه ـ نافع ساكت ما حجه واصلاً باقر صاير جمر فراكس ما ينداس طفة جكارته جفص عليها وورث الثانيه وأشر لنبأ .
باقر ـ گرسي أكعد عليه .
لميعه ـ جابتله وكعد مورث جگارته ويباوع عالجوادر من الباب مفتوح طلاگه وحده وما كعد يگوم ويرد يكعد وعلى هالمنوال،وأجتي عليه وهبيه حاجته وعاط بيها .
باقر ـ يمه عليج العباس أبو فاضل فگي عني ترى ذبحتيني جاهل أنه تركضين وراي
لميعه ـ رجعت كعدت وأحنه كاعدين ننتظر ومر وگت هواي طولوا شمالهم، ودخل مشعان يالله وكمنا عليه
الحجيه عطايات ـ ها يمه مشعان بشر فضت
مشعان ـ أي يمه نگول فضت خل نصب الزاد ونعزب العالم گبل لايمشون وأجيكم باقر بابا تعال وياي خوالك دزوا عليك ، نافع وين تريد أرجع
نافع ـ غير أجي وياك يابه شسالفه مو فصلوا خلوني أطلع .
مشعان ـ گلت ما تطلع وأنت متصاوب شعندك طالع منو عاتب عليك .
نافع ـ تخلون الواحد يشگ هدومه
لميعه ـ مشعان أخذ باقر ومشه وضل نافع يحمس بروحه حمس ، وعاينت عليهم بلشوا يصبون الغده
وجابولنا صياني وفضينا عالنسوان ونافع دفر باب غرفة باقر واقتحمها اي هاي الزينه يبعد عمتك وأنت متصاوب محد يعتب عليك كظ فراشك وأرتاح
.. ما رد عليه وجبتله غداه وعفته وطلعت صبيت جاي أنه والبنات للنسوان وهيج لما فضت عالخير وأهل وهبيه دزوا عليها سلموا عليها ومشوا الله وياهم ما قصروا الناس بس جيتهم كافي ودخل مشعان الوجه صاير سماد من القهر على أبنه
الحجيه عطايات ـ ها يمه مشعان
مشعان ـ يمه فصلوا وأهل الغربيه خجلوني بكرمكم والله دگوا صدرهم كدام العشائر وكالوا فصلكم علينا .
الشيخ ذياب الفهداوي ـ مشكلة حربي أحنه نحلها وماكو فرق أحنه خوال الولد واهله وعمامه ما يقصرون والنعم منهم كلهم ينطونكم حقكم وزايد بس أحنه نريد نتكفل ونساندهم بهل المحنه وحربي أبننا
مشعان ـ هما دفعوا الفصل عمي الشيخ ذياب هو تكفل بالفصل ودفعه الهم وأنطاهم حگهم وزايد وأبني المحگوك عبنا مـا حجه ويضل الباقي القانون يأخذ مجراه
وهبيه ـ يمه وحربي يضل بالسجن يعني ما فضت طلابته ما يطلع أبني يمشعان
مشعان ـ چا ذابحله دجاجه غير كاتل زلمه شبيج يحرمه وأبنج محكوك لان ما حجه وما گال ليش گتله وهذا اخله أهل فليح يتخبلون لان حقگهم أبنهم ودمه مو رخيص عدهم يمره
.. موزين كظت هيج وهسه الباقي ضل بالقانون ويدبرها الله نشوف إشلون تفض .
... لميعه علاج أبوي لان تعبان راح يوكع بالگوه كظه الفصل
الحجيه عطايات ـ وفرهود وولده خوما يتعرضون الكم
مشعان ـ لا أخذنا منكم كلمه وشيخهم دگ صدره محد يتعرض والسالفه فضت بفصل وتبقى يم القانون
والله يا يمه أنه كاسر گلبي فرهود رجال من طيبة الناس طول الفصل كاعد مدنج رأسه ،صايره دايره أحنه وياهم نتفاصل ناس صارلنا عمر معاشرينهم ،غير لو حربي يحجي شنهي طلابته ويه فليــح جان أرتاح گلبي
لميعه ـ طلعوا وللعصر يله خفت الرجل ضلوا يمنا بيت عمي رزاق وعمي ياسين هم سمعت ضال ومحمود وبناته بعدهن يمنا .
كاعدين وهبيه تبجي وأمي تواسيها وهي ملخت نفسها وأحنه نبجي وياها ، ودخل نافع
نافع ـ عمه كولي البنات يتحضرن خالي محمود يريد يمشي .
الحجيه عطايات ـ گوله حبوبه تگولك خلهن جم يوم أشبع منهن .
نافع ـ صار
لميعه ـ راحله ومن الباب هزلي راسه ها وافق أي الحمدلله ،مدري شعجب وافق يبقن وهنا من ماتت أمهن جانن يجن بس من كبرن وصارت عليهن العين گامن ما يجن أبوهن ما يقبل وهنا صلاوات كبرنات ومحلوات .
وضلن يمنا أسبوع وراحن ويه صبيحه ضلت يمنا بس غافر لا رجع ثاني يوم لان عنده دوام ونافع لان بعده جرحه ..
ومر شهر والقصر حزين على فراك الشيخ من بعد هالحادثه صاروا يصيحون اله الشيخ وأبوي دوم يگول هذا خليفتي وجبير الگوم ، الله يفگ اسرك يعمه وين جانتلك هالمصيبه يعمه .
وحربي أنحكم سجن وهبيه حالها مو حال دومها تعن وتبجي وأمي ما ترضى عليها البجي موزين بس گلب والده الله يكون بعونها وباقر مشعان ما يعوفه حتى لدوام يروح وياه بعدنا حاطين أيدينه على گلوبنا لا واحد منهم يتعرض الهم .
مر كم شهر وحالنا بالضيم محد اله خلگ ، كاعده أخبز وهبيه كاعده باب الصغير وصافنه عالزرع والهوايش جابهن جاسم ، تفكر بحربي هيج وگت يفتر هو وجده بالكاع وعلى الفلاليح وهساع أبوي حتى للكاع ما يوصل وصحته تعبانه وخايفين عليه السالفه جبير وتقهر .
كملت الخبز وأجتي صالحه خذت الخبز مني
صالحه ـ نافع أجه وسأل عليج
لميعه ـ نافع أجه! شجابه بهل المغربيه خاف صاير شيء ولج
ـ لا بس أحسنه ضايج وماله خلگ لان يصفط بهل الجكاير وأنه نافع أعرفنه أباله سالفه شاغلته واكف باب غرفه عمتي ينتظرها تخلص صلاتها مبينه مستعجل يفتر مثل المگوك .
ـ شغلتي بالي يصالحه هاج الخبز ، أروحن اشوفه شبي الأعرفه باجر عنده دوام شجابه بهل الوگت، عفتها ودشيت القصر وشفته واكف باب غرفة أمي
ها عميمه أشلونك .
نافع ـ هلا عمتي ، متگوليلي يمت تكظي صلاتها
ـ وشتريد منها
ـ هيج
ـ لچن شبيك مهرف الهيج مالتك مو خاليه
ـ كملت ها حبوبه الگوه ، تقبل الله
الحجيه عطايات ـ منا ومنك يحبوبه ، هلا يمه شجابك يحبوبه ، شني علومك
نافع ـ جابتني رجليه وبنت بنتج
ـ خيرك شبيها بنت بنتي
ـ عمه ردي الباب .
ـ رديت الباب وكعدت .
ـ حبوبه السالفه الجايج بيها شاغله تفكيري وحلها مستعجل وأنه أعتبريني دخيل عندج وفگي طلابتي
ـ يمه الزهره ولك حبوبه كمشت گلبي من الخوف شنهي طلابتك هم جاتل واحد تردون تموتيني
ـ لا حبوبه السالفه وما بيها نور
ـ هنا ضيم گلبك شبيها
ـ أمي أجتي وگالتلي خوالك ناوين على نية وبسبب الحجي الطلع على نور مقررين بينهم يزجونها لواحد من كرايبهم ما ادري كالت ابن خالها هم منتسب لان مصفطى مو من مقام عمتك ما ترضى بي لهذا راح يردون ينطونها لهذا ابن خال أمي .
ـ والمطلوب شنو يحبوبه
ـ حبوبه شنو ، شنو المطلوب وتعرفين وتدرين بيه أريدها ومأخذ منج كلمه نور اليه ما تصير لغيري لو أعرف أكتل كل خوالي محد يگرب صوبها ، خيالها محد يلمحه نور مالتي أنه الربيتها هاي بناتي حبوبه وتسأليني شنو المطلوب .
والوگت مناسب مو يردون يسترونها بحجة الحجي الطالع عليها وهما الفضحوها وهم يردون يسترونها هيج أهل كواويد ما شفت .
أريد منج تمشين تخطبينها اليه وتسدين حلوگهم لا أبن خالهم ولا كواد يوصل بابها
والخلقها وزرع حبها بگلبي ونبته أسويها بحر من دم وما أخلي غيري يأخذها خليها أبالج حبوبه نور اليه .
ـ ولك حبوبه تسودنت شني نسيت طلابة أخوك وينه وين المشية هساع .
ـ حبوبه جايج وروحي لايبه والدنيا طالعه من عيني أمشي خطبيها كبل لايجرونها ويعقدولها على النكس المحضرينه الها .
ـ مو وگته يحبوبه شمالك نسيت مالات ألاوادم اخوك طلابته طلابه ونايم بالسجن وهو جبيركم وشيخكم شون تراضاها على نفسك .
لميعه ـ نفض نفسه بعصبيه وحجه بصيغة تهديد
نافع ـ اذا ما تمشين تخطبينها اليه قسم بجلالته أطلع من هالباب لما تموتين ما تشوفين وجهي حتى جنازتج ما احضرها .
الحجيه عطايات ـ ولك أخوك بالسجن شمالك تسودنت وعيب من العالم شتگول علينا ومن ابوك ما تستحي منه وهو من يوم دخل السجن حالته حاله وتعبان وأنت حايرلي بنور .
وتروح تجي أغاتها ولك حبوبه الخلقها خلق غيرها
قابل ما ضلت نسوان بس هي شمالك معمي على عيونك .
ـ أي معمي وعيني ما تشوف نسوان بس هي وأنتِ زين تدرين بيه احبها ليش مـا تردينها ليش .
لـو لان بنت سميعه ما تردينها مو ، گلبج الاسود ما نسى الماضي مو تردين نافع ونور يدفعون الثمن مو هذا التردينه حبوبه .
ـ حاجيني عدل لا أكوم أكسر هالعوجيه على جنابك .
ـ حبوبه تمشين تخطبينها لو لا گولي
ـ ولك حبوبه وراها طلايب وعمام ونگول قنعت جدك وأبوك ومشينا نخطبها ألك وأهلها من يگول يوافقون وينطونها الك .
ـ لا ينطون مو تراضيتوا وتصالحتوا وحضروا الفصل كلهم بعد شگو ما ضلتلكم حجه لو هاي شكليات كدام أهل الغربيه .
ـ نجب ولك شو گمت تخربط بسوالفك .
ـ وهسه حبوبه تالي وياج واذبيحها على قبله وريحي گلبي المتعلل ومحترك بنار والله نوم ما نايم من وراها كل دمعه منها تزرف گلبي بتيزاب .
ـ من أنعل أبوك لابو نور على هالعشك هذا ، أزامط بيك جدام الكل نافع ونافع تالي ما تالي سحلتك وحده بگد الفصمه .
ـ راضي يالأسلام راضي ،يرحم أمج بس خطبيها ما الج شغل هي خل تصير الي الباقي مگدور عليه حبوبه
ـ مو من نسوانك لا والله مو من نسوانك أنت توالمك دنگه هيج شيخات شيخات هذن يلوكن الك مو شطب الرمان بنت الدلال هدومك ما تعرف تغسلهن
ـ لا من نسواني والله شيخة النسوان هي، غير أنتِِ گلبج اسود ما تشوفينها زين بس أنه شايفها مفصله تفصال ، مربيها على أصابعي .
ـ نجب أشلون ما أحبها بس والله يحبوبه مو وگتها
لميعه ـ يمه سهلي أمره خطيه لاتكسرين گلبه باوعتلي وهزت رأسها وهو واكف منتظر منها الرد
الحجيه عطايات ـ أنطيني جم يوم أحاجي جدك وأبوك وأقنعهم لان ما ظنتي يوافقون والوگت مو مناسب
ـ لا يوافقون يوافقون أنتِ بس تلحلحي من مكانج وهاا بس يومين زايد ما أكدر أنطيج لان خوالي ما بيهم أمان شريفهم ينكس النكس .
ـ ولك لسانك لسانك وهذول خوالك اذا صارت من نصيبك ما تريدلك واحد يگابلك بس تنعل وتشتم بيهم .
ـ هسه دخل تصير وأخذها يمي عود أفكر بيهم، يله حبوبه أنه أمشي باجر ارجع الكاج مجهزه نفسج
ـ وين تمشي بهل الليل ومو گلت يومين شو صار يوم
ـ أي هذا اليوم وخلص وباجر هم هاي هي شعندج قابل
يله فيمالا .
لميعه ـ طلع مستعجل وأمي تصييح وراه ما أهتم يمه عوفي جاهل هو
الحجيه عطايات ـ ما ردته يطلع زعلانه وكلت خل يبات والصبح يتوكل هسه أخافن عليه من ولد فرهود لا يتختلون اله والله حربي خله كلبي بأيدي وين جانتلنه
.. نوب اجاني نافع بسالفه وين بنت أختج ، هذا درب العشك ما أخلص منه شجنيت منه بس شلعان الگلب
لميعه ـ طلعت وعافتني وكلامها جانت تقصدني بي غمضت عيوني روح ربي ما يكسر گلبك مثل نكسر گلب عمتك ينافع ...
___________
نور ...
ـ صرت أحس نفسي داخل أمتحان بسبب الضغوطات أتمنى أنام وأكعد والكي كلشي منتهي لان والله بس تعب السادس يكفيني، بس مرات غصب عنه نواجه ونعيش تحت ضغط نفسي وبكل الظروف والناس وأذيتهم على الرغم مقربين من عدنه بس هم يأذون
صار أيام عايشه بصمت وأباوعلهم لا أمي مرتاحه ولا أني ، صرت ضربيه أدفع أخطاء الماضي محد رحم أمي يرحموني .
رغم حلوا المشاكل البينهم ورجعوا أصحاب وأحباب بس احس قلوبهم ما صفت الماضي ما ناسينه ونافع وسوالفه ما تنحمل بميزان ومحد راضي على تصرفه حتى أني بالأخص بابا يطب ويطلع يحجي عليه لان وضع جديتي تعبان يگولون مريضه وبسبب الضربه والقهر على عمتي نوريه وعينها بعد متشوف بيها كله بس تهور نافع دمر وخرب گلشي ترك بصمه سوده بصفحته كدام أهلي وبيت جدي كلهم .
نافع ـ ليش ما تجاوبين على رسائلي من الصبح أراسلج وينج مختفيه .
نور ـ تعبانه مالي واهس
ـ شبيج أذا تعبتي عوفي الكتاب بعدين أرتاحي وأقري
ـ لا مو من الدارسه منكم ومنك بالأخص
ـ أني! ليش شمسوي
ـ تعرف نفسك إشسويت نافع السويته غلط واذا جديتي ماتت كلها ما ترحمك تدري بيها صحتها تعبانه
ـ أي أدري وأنتِ جايه تحاسبيني
ـ لا
ـ أهلج بالبيت مو
ـ أي موجودين اصلاّ بابا حتى للمحل گام ما يروح من الدوام يبقى بالبيت حيل متأثر على جديتي وأني فشلانه منه أحس أني السبب بكلشي صار لان من يوم مشكلتك وياهم هي تعبانه
ـ أنتِ ما الج دخل وعوفي الموضوع عليه أني أحله ووعد ما اخلي شيء يضوجج ويزعلج بس أنطيني مجال كلها مسألة وقت لا أكثر وكلشي ينحل .
ـ تمام
ـ أنتبهي لدراستج حبيبي .
ـ أوك ، نهيت المراسله لان سمعت صوت بابا أجه فتحت الكتاب أقرا ودخلت ماما باوعتلي وصفنت ورجعت طلعت ضل بالي ليش تباوعلي هيج .
عفت الكتاب ولحكتها وأسمع صوتها تحجي ويه بابا
سميعه ـ وأني هذا منين أعرفه
صباح ـ أنه أعرفه وبعد هي حجايه حجينا بيها وهساع أروحلهم وأفهم منهم .
ـ يعني أذا هما مقتنعين أنت تقتنع
ـ گتلج بعد كيفي السالفه
ـ ليش مو كيفك چا كيفن البنيه بنتك مو بنتهم محد اله گوه عليك ولا احد يگدر يفرض كلمته عليك لاتتهور صباح وتظلم بنتك مثل ما أهلي ظلموني
ـ خليني أولي وأفهم منهم يا مره وأهلي أهلها وهما لما خايفين عليها ما يتصرفون من شورهم
ـ خايفين عليها لو صدك خايفين جان سگتوا أمك وأخواتك من طعنوا بشرفها وطشت سالفتها نور مو بنيه وهسه صرتوا تخافون من حجي العالم وتطممون السالفه وتلزكونها بزواج شلون ماجان
ـ شتردين أنتِ شتردين خبلتيني أنتِ وبنتج
نور ـ طلع وشافني وصفن بوجهي نزلت رأسي فشلانه منه وطلع مستعجل باوعت لماما ، بابا شبي تعرفين شيء وضامته عني
سميعه ـ أهلج من لا ألج الاهل أن شاء الله
ـ شبيهم
ـ يردون يزوجونج ويسدون حلوك العالم الجديتج فتحت حلوگهم بشرفج، هما يطعنون بشرفج وهما يطممون سوالفهن
ـ وأنتِ ماما موافقه
ـ لا ماما ما موافقه وكلت تصالحوا وردوا حبايب
ـ وصلت لعندها يعني أنتِ موافقه على نافع ماما هزت راسها وبجت وأخذتني بحضنها
ـ ماكو أم تريد خراب بنتها ما أكدر اكسر كلبج حتى أهلي كاسرين كلبي ومتبرين مني أنطيج بثوبج الهم ولا اشوفج منزله رأسج ومكسور خاطرج .
ـ يا حبيبتي يماما ومسحت دموعي وبابا هم يوافق
ـ يمكن ما معلوم بس عمتج حربيه حاجيه وياه لان هي تريدج لنافع وتدري بإهلها لان سمعته يحاجيها وكال الها اجي لبيت أهلي ويصير خير بعد ما ادري يا بنتي .
ـ نوعاً ما أستبشرت خير بس گلبي قابضني
ـ روحي أدرسي عندج أمتحانات .
ـ تمام ماما عفتها ورجعت اقرا وبالي مو صافي وصلتني رساله من عنده وارجع أتصل ها عمري
نافع ـ باجر أجيب أهلي وكل ناسي وأخطبج بناتي
نور ـ تجي لازم وصل الك الخبر
ـ ماكو شيء ينضم عليه وهسه راجع وأطلب من خالي محمود يحاجي ويبلغه بس بعد حبوبه تحاجي جدي وأبوي والباقي مگدور عليه مهم أجي أخطبج وأنهي هالسالفه كلها والكواد بعد يفتح حلكه بحجايه تمس شرفج .
ـ ما أعرف خايفه نافع
ـ لاتخافين حبيبتي أني موجود وتخافين ما عاش ولا صار اليخوفج، كل الناس والظروف ما تكدر تأخذج مني
بس يوافقون اسجلج بإسمي بظرف اسبوع أخذج يمي أحاول قبل الأمتحانات أنتِ عندي .
ـ نافع
ـ عيونه وروحه وعمره الما يعيشه من دونج أمري حبيبتي
ـ تعرف أني أحبك هواي حتى أكثر من أهلي تعرف هالشيء مو
ـ أعرف أنه الأعرف
ـ وتعرف الأمان المضيعته الكي بس بحضنك ولمسة أيدك على أكتافي ، يالله يانافع من تحضني شگد أعيش بإمان .
أختنك وصوت راح بجيت وعبرتي بصدري اذا ما وافقوا شلون نافع أني شلون أعيش من دونك فهمني
ـ لا حبيبي شهل الحجي أنتِ اليه وعيونج الأحبهن ودموعج الغاليات عندي أخذيها كلمه من نافع مو رجال اليعوف اليحبها ووعد مني خلال هالشهر أنتِ يمي وحضني ينتظرج .
ـ تمام حبيبي كلني ثقه بيك وردلي خبر من تجون تمام
ـ چا شلون حبيبتي روحي أنتِ خلاص لاتبجين وتوجعين گلبي
ـ تمام حبيبي
ـ نورايتي مشتاقلج مفركس گلبي علما أشوفج ما أعرف أشتغل ولا عايش والله ، نص ساعه وأوصل بيتنا وأمر من بابكم بس أرتوي منج بس أشوف عيونج
ـ من توصل كولي رغم أخاف بابا يجي بس ميخالف من الباب اطلعلك
ـ من أوصل أخابرج
ـ أنتظرك ، راح وگمت رفعت شعري كبايه وطلعت شال وباوعت على أمي بالحمام وأخواتي لينا ما موجوده بس لبنى اسمع صوت مكينتها وأتصل موبايلي ها حبيبي
ـ وصلت اطلعيلي
ـ لبست شالي وطلعت مستعجله فتحت الباب وشفته يمه شكثر مشتاقتله تقدم شايل علاكة حلويات ودفر الباب ودخل شو دخلت .
ـ غير أنه ابو البيت الله يرحم أيام زمان تذكرين المرجوحه جنت انومج بحضني بيها وغافر يدفعها النا وأنتِ تضحكين علينا ما تنامين متونسه عالحضن من يومج تحبين حضني .
ـ من يومي روحي بيك ، صفن بوجهي ولزم أيدي وباسها قوي وخلاه جيس الحلويات بيها
ـ كاظ روحي مـا أبوسج بس هانت هالشهر أجيبج يمي
ـ نزلت رأسي خجلانه منه يله روح خاف بابا يجي تقرب تنفس من خصلات شعري وغمزلي شبيك
ـ تردين تموتيني فوك عذابي تعذبين بيه شادة شعرج يطريقه الأعشقها هاي طريقتي تذكرينها
ـ اي .
ـ أحبج
ـ وأني هم
ـ يله فوتي البيت أشوف طولج أنطيني مكفاج يبنيه
ـ مشيت وهو ضل يباوعلي وصلت باب المطبخ رفعلي أيده ورد الباب وراح الله وياه وهمزين محد حس كبل دخلت غرفتي فتحت الجيس كومه مشتريتلي وگلشي احبه جايبه اليه النساتل الاحبهن الله .
أكلت كم قطعه وتجددت الطاقة بيه وكعدت أقرا ودخلت امي شافت الأكياس واستغربت
سميعه ـ منو اشترالج بس لا طلعتي الاسواق نور ماما ابوج ما يقبل ليش العناد
نور ـ لا ما طلعت
ـ چا منين هذن
ـ نافع جابهن
ـ أستري علينا ماما وتالي وياج
ـ والله بس أنطاهن من الباب وراح اصلاً مستعجل راجع من القريه وتعبان وعنده دوام
ـ ماشي ، اكليهن بالعافيه .
ـ طلعت وضليت بالغرفه فرحانه يارب تمم على خير
.. لليل تأخر الوقت وبابا ما بين وماما مشغول بابا وتفرك بإيديها عكسي اني فرحانه وطبخت العشه اني ولبنى تعلمني ، لبنى منا وهيج اريد منج تعلميني طبخات هيج نفس طبخج كلش طيب
لبنى ـ خلصي أمتحاناتج وتدللين شتردين أعلمج
نور ـ اي فدواتج ما تقصرين ، وسويت العشه وياها نص اني نص هي مهم شاركت
... وصورت ودزيته هذا طبخي بس بمساعدة لبنى هي كالت تعلمني عالطبخ علمود اطبخلك اكلات طيبه وما يعيبون عليه يگولون اخذله وحده كلشي ما تعرف
نافع ـ هههه ويگولون اليگولونه أنتِ بس تعالي يمي عود نعيش على اللفات ، شو شكلها يشهي جعت ولج
شنو اسمها هاي الأكله خبيطه لو شنو
ـ لا مو خبيطه ههه هاي اسمها مخلمة باذنجان تفوتك طعمها رهيب هاي لبنى طبخها يموت وأني اريد اتعلم منها .
ـ تعلمي حبيبي ليش لا ، خالي رجع لو بعده
ـ لا والله من يرجع أكولك ليش
ـ هيج يله أخذي راحتج اروح عندي دوام تأخرت
ـ تمام حبيبي ، راح وكعدنا ننتظر بابا وأجه دخل كبل الغرفه وأمي لحكته وصبينا العشه ولينا كامت تأكل شبيج أنتظري بابا وماما .
لينا ـ والله أني جوعانه وصارلنا شگد ننتظر
لبنى ـ لينا أصبري لما العصر أكلتي شبسرعه جعتي
لينا ـ طبخح يشهي وهاي الأكله أحبها
نور ـ أبتسمت أحم أني سويتها
لينا ـ أنتِ! ومن شوكت تعرفين تطبخين شويه تعلمي لاتأخذين تعب غيرج ترى أعرف طبخ لبنى .
لبنى ـ لا نور طبختها
لينا ـ مو على أساس ما تعرف
نور ـ لبنى علمتني طيبه مو انطيني رايج احجي وياها ولبنى كوه لازمه ضحكتها وهي تأكل وتمد بشفتها ما عاجبها عابتلج عاد وكفت على ذوقج شو دوخري راح تخلصينها
لينا ـ ما اوخر واذا أنتِ طابختها بس لبنى ساعدتج
نور ـ تعاركنا بس بضحك لبنى بس تبتسم وصاح بينا بابا
صباح ـ گافي عاد أكعدن
سميعه ـ نور ماما تعالي أبوج يريدج
نور ـ مشه الغرفه باوعت لأخواتي وهنا يباوعن اليه
لينا ـ اني راح أتعشى السالفه مطوله ما بيه اضل انتظر
سميعه ـ لبنى تعشن أنت أختج وصيحي ميثم هم وغسلي المواعين ونظفي المطبخ .
لبنى ـ ماشي خاله ، لينا روحي صيحي ميثم .
لينا ـ اهوووو ما يجي هو .
نور ـ باوعت على ماما وأشرتلها ها ماما
سميعه ـ تعالي .
نور ـ مشيت ودخلت الغرفه وماما ردت الباب وراها وبابا واكف ، ها بابا
صباح ـ أكعدي بابا!
نور ـ بابا صاير شيء ، كعدت وهو واكف وأمي كعدت بالكاع وأحسها تريد تبجي اباوعلها ما اباوع لبابا وحجه
صباح ـ بابا نور أنتِ ما تردين الاذيه لابوج مو
ـ اي أكيد بابا بدون ما تگولي
ـ شوفي بابا أعرف الوقت مو مناسب وأنتِ سادس وينرادلج فكر صافي علمود تركزين على أمتحاناتج بس اللي صار لازم ينحل وأكيد أمج حجتلج .
ـ حجتلي بشنو
سميعه ـ لا ما حجيت الها ، أنت أحجيلها مو هذا التردونه أنت واهلك ومتفقين على خراب بنتي ما أنتوا خربتوها شخليتوا بيها طعنتوا بشرفها .
صباح ـ لو تكعدين تحترمين نفسج وتسكتين لو تطلعين برى ، بنتي وأني اعرف بمصلحتها لا أنتِ ولا غيرج يقرر عنها مستقبلها ولما خايفين على بنتج ما يقررون هالقرار والحجوا أهلها وأنتِ حجايه منج مـا أسمع فاهمه
نور ـ أمي نزلت دموعها ومسحتهن سريع وصدت وجهه وترجع تباوعلي واشرلها بإيدي شگوو ماما غمضت عيونها ونزلت دموعها وخوفتني بالزايد ورجع بابا گال
صباح ـ شوفي بابا .... أمج كطعت حجايتي الله يكطع ماي بزردومج بس تلبك ... أي بابا نور هسه جنت يم أهلج وحجينا بموضوع واللي صار جان صعب عليهم كلهم ومحد راضي ينجاب طاريج بالموزين والسبب من أمج ما كظبت لسانها وأحترمت نفسها كامت تدور مثاليات ومقامات ومصطاف مو من اعجاب حضرة جنابها .
نور ـ يحجي وأمي ساكته واني كلبي يغلي ويفور فور
كلما يحجي أخاف أكثر
صباح ـ اي بنتي السالفه وما بيها متقدملج واحد من كرايبنا يصير ابن خالي والولد خوش ولد سمعته مثل المسك وأنه ما نطيت كلمه الا احجي وياج واصلاً أنتِ نطلبتي من شخص ومن زمان وأني وافقت عليه بس الا تكملين دراستج .
وحجيت ويه عمامج وفهمتهم بعدين تخلصيين السادس ونحجي ، بس عمج محمود حاجاني طلعوا خوالج هم يردونج نافع مخابره ومبلغه باجر يجون يخطبونج الظاهر واصلهم خبر اكو احد متقدملج
ويردون يجون وأكيد أمج عدها علم وكالتلج لان نافع وأعرفه
سميعه ـ لا منك سمعت لاترجع عليه .
صباح ـ اي بابا نور هسه الموضوع الاحجي بي وياج مو الولد الخطبج لا هذا الشي حجيت بي ويه اهلج بس احاجيج على نافع وباجر من يجون خوالج يخطبونج أنه ما أنطيج بابا بس قبلها لازم أحجيلج ليش ما أنطيج وليش معارض لان من حقج تعرفين وأني اعرف بابا شگو بگلبج ..
ـ يباوعلي كأنما يقرأ عيوني وأني اجر بللحم أيدي والدمعه تريد تنزل ونار بگلبي نار .
ـ شفتي بعينج نافع شسوه ويه جديتج وعماتج والله لان حجن عليج وراح كتلهن بدون عيب ومستحى وهنا نسوان كبار وكتلهن كتل كال موت وجديتج لحد هسه تعبانه وعمتج خليها سكته طفت عينها وما كال هذن جديتي وخالاتي وعيب من خوالي وأمي ما حشم ولا قدر أحد ومعتبرها سباعيه وهذا الشي غلط وتصرف طايش ومراهق مو مال رجال عاقل
وهو شعليه بيج والحجوا عليج أهلج أنت محسوبه عليهم عرضهم وشرفهم أنتِ وعمامج كتلج ما راضين بس شسوي لحقد النسوان المتخزن بالگلوب من سنين
...ونافع واحد طايش وكلشي عنده مباح وابن دلال تربية جديتج شيطلع منها تارسته ترس ولعلمج بابا حتى لو وافقت وصار النصيب ما تعيشين اهنا يأخذج وياه للقريه وأنتِ ما تعيشين بالقريه وشغل وتعب
ـ ليش بابا شبيها القريه .
ـ مو مسألة شبيها بابا وكلنا من القريه أنه كظيت نص عمري بالقريه ربيت وترتبيت وعشت بيها أجمل سنين عمري بس بابا أنتِ بنية دلال وهناك حكم جديتج يختلف البنيه تختلف عن المتزوجه وعليج مسؤوليات وواجبات وتخيلي كلشي يتضاعف عليج اذا رحتي هناك
حتى شغل يشغلونج وهاا يثني مثل أبوه مشعان..
وعطايات ربته وتزامط بي تريده الشيخه اله لا عبالج الشيخه لحربي لا ضامتها لنافع هي هيج تفرق مو عاد تاخذج واحنه بينا سالفه تعرفينها بابا ما حاجه احجيها الج .
ـ بس بابا أنتوا تصالحتوا مو صحيح .
ـ اي صحيح بابا تصالحنا ولهل السبب هما جايين عليج ولهل السبب أني احجي وياج قبل لايجون لان بابا خليها ابالج أذا انطيج أتبرء منج وتنسين عندج أهل حتى من المنطقه أخذ أمج وأخواتج واشيل واذا حابه تعيشين نفسج أمج تبقى منبوذه طول عمرها من أهل وأخوان يسألون عنها ، تزوجي نافع بس أني ما راضي عليج ومتبري منج والقرار الج تردين تصيرين مثل أمج!
ـ بجيت ودموعي عشره عشره بس بابا أنت كتلي اني اعرف شگو بكلبج دامك تعرف ليش تكسر گلبي
ـ فهمي بنتج سميعه
سميعه ـ شفهم منها صح كلامها أنت كلت الها اعرف بكلبج شبي دامك تعرف ليش تريد تكسر كلبها ما لكيت الا نافع تأخذ ثأرك منه ، افهم صباح هما مالهم ذنب انخلقوا بصفحة بيضه وربوا سوه ليش تخلي ماضيك وسوالف أهلي بيهم وتدمرهم ، بس هالمره خليك منصف وأنصف بنتك .
ـ تردين تدمرين بنتج انطيها لاهلج بس من هسه أكولج من هسه تنسين عندج بنت وهسه خل يجي يكبعها ويأخذها وثاني يوم أخذج ونشيل والله بعد وجهه ما تشوفينه تنحرمين منها للموت ما تشوفينها تصير مثلج بالضبط
.. ومن عدا الحجي اللي راح يطلع عليها هي ونافع ويكولون كتل جديته وخالاته ليش غير علمودها وتثبتين كلام الناس صحيح وبنتج مو بنيه لان بس نافع رأسه خفيف ويطب ويطلع علينا محد يگول جديتها حجت من كيفها وماكو نار بدون دخان ...
...وتفتحين عليه باب الفضايح يسميعه وأني كافي عليه بابج ولحد الان سالفتج ما سادها وخلصان منها أدور بنتج .
سميعه ـ بس نافع
ـ لو يضل بس نافع بين الزلم ما انطي مره اذبها بحلك جلب ومـا انطيها لأهلج وباجر والقرار الج بابا والعندي گلته بعد أنتِ أختاري لو أهلج لو نافع وبدون أهل ..
نور ـ راد يطلع وأمي جلبت بي تتوسل
سميعه ـ بروح كلمن عزيز عندك لاتكسر گلبها صباح لاتخلي الماضي يعيد نفسه بنتك مالها ذنب صباح ليش تخليها مثل لميعه من كسروا گلبها عليك
صباح ـ ما عندي أحد عزيز بس بنتي وما أريد انطيها لا لنافع ولا لغيره وبكيفها بعد لو أني لو خوالها .
نور ـ طلع وضلت أمي تضرب على وجهه بقوه وكعدت يم رجليه وصفنت عليها شكثر مرت عليها ظروف دومها وحيده محد وكف وياها وساندها وسمعها لا أم ولا أخت ولا اخ فتح عليها الباب عاشت وحيدة ومظلومه
سميعه ـ نور ماما حبيبتي باوعيلي والله حاولت والله حتى رجليه وكعت عليهن وبوستهن ما ينطيج معند أكيد أهله رافضين وهو وياهم وأني فرحت من تراضوا وتصافوا كلت الحمدلله وأخيراً وهيج وما يكسرون گلب بنيتي وتأخذ التحبه .
ـ يعني أنتِ جنتي تحبين نافع وتردينه مو
ـ اي ماما شلون ما أحبه ليش شبي مو ربه وياج بس لان بسبب أهلي وأهلج وأبوج وأعرف بيهم وشگو بگلوبهم ما ردتج تتعلقين بي جنت احسب لهذا اليوم وخايفه منه وتالي أجاني واني مربطه أيديه ما بيدي شيء عليج يا أمي وأبوي أنتِ دنيتي الحلوه أنتِ شحصلت من حياتي عداج أنتِ وأخوج سوده بوجه
أمج يا ماما .
ـ أخذتني بحضنها تبوس بيه حضنتها بگل قوتي وتمسكت بيها وتمسح دموعي ضلت كاعده وتحجي وياي بس اني بالي يم كل حرف حجاه بابا تالي خليتها وكمت لغرفتي وقفلت الباب ولكيته دازلي كومة رسائل كلهن هو فرحان
نافع ـ باجر حبيبي ما ضل شيء كم ساعه ما تدرين شگد فرحان ومتوتر أحسب دقيقه دقيقه علما تخلص الساعه وتجي الساعه البعدها هيج وتصيرين الي وملكي وحلالي يبعد روحي نورايتي .
نور ـ الله كريم حبيبي ، تصبح على خير تعبانه أريد أنام
نافع ـ وأنتِ بخير حبيبتي نوم العوافي نوم الهنأ .
نور ـ حضنت الموبايل وبجيت وكاتمه صوتي ليش بابا ليش أني شنو ذنبي نافع شنو ذنبه وضليت أعاتب بابا ويه روحي ودمعتي ما نشفت للصبح أني كاعده الى أن توصلت لقرار نهائي ما منا رجعه ...🤎
🎀 لْـلْـحــكُـايُة بَقـيُة 🎀
