رواية صراع الشيوخ الفصل الحادي عشر بقلم ليال القمر
الممرضة بقلق : شمالچ حبيبة ليش تبچين
ارجوان ببكاء : مشتاقة لاهلي كووولش
الممرضة بابتسامة : ولويش ما تروحين ليهم
ارجوان بحرگة گلب : اخذوني فصل شحچي بعد
الممرضة شفقت عليهة وضلت تواسيهة وتخفف عنهة وارجوان حالتهة مدمرة نفسياً وجسديا
بعد مرور ثلاث ايام
زاد تعلق كرم بارجوان اربعه وعشرين ساعه يمهة وهي بس ساكته متحچي شي لان متگدر تطرده من الغرفة اما كرم كان واگف يراقبهة ودگ تلفونه
: الو ها بوية
ابو كرم : تعال دنعقد علة بنات عمامك ولاختك
كرم بصدمة : شلووووووووووون شديصير بوية لا تخبلني
ابو كرم : انت تركت الگعدة واتفقنه ناخذ بناتهم وهمه ياخذون بناتنه وانت تعال وجيب وياك ارجوان
كرم بحدة : بوية صدك تحچي شنهو اختي شنهو بنات عمامي شنهو جيب ارجوان فهمني شديصير
ابو كرم بتعب : هسة انت تعال وتفتهم كلشي
كرم بحيرة : صار بوية هسة جايك بس ارجوان ما اگدر اجيبهة لان نايمة
ابو كرم بحزم : لازم تجيبهة لازم بيهة حياة وموت ابني
كرم ويناظر لارجوان النايمة : صار هسة اجيبهة
سد كرم الخط و هز كتفهة : ارجوان گومي يالله عيني يالله بوية شو گومي
فتحت ارجوان عيونهة بذعر وابتعدت عنه
كرم بتعب : يلة ارجوان گومي لازم نطلع من المشفه
ارجوان بقلق : ليش
كرم بتنهيدة : والله ما ادري هو رايحين نشوف شكو شصاير
گامت ارجوان عدلت گعدتهة ولبست حجابهة وكرم طلع يسويلهة ورقة خروج ودخل الهة بعد فترة : يلة عيني امشي علكيفچ
مشت ارجوان بخطوات غير متزنة وكرم سندهة عله صدره ومشه بيهة وطلعوا من المستشفى وركبهة السيارة بهدوء وحذر وارجوان خلت راسهة عله الَشباك مال السيارة وتباوع عله الطريق وكرم دار وجهة عليهة شافهة صافنة ابتسم وحرك السيارة وتوجه لبيت ابو
¤¤¤¤¤¤¤¤¤¤¤¤¤¤¤¤¤¤¤¤¤
في الديوان في بيت ابو كرم
حسن بخبث وهمس لامير : هاي شني راح تاخذ احله وحدة من البنات
امير بابتسامة جانبية : دخليني اشوفهة بالاول موتتني بجمالهة
ابو كرم بضيق : اسمعني وليدي امير انه ماعرف ردة فعل كرم لمن يعرف انك تريد مريته لان ما گتله اي شي
امير ببرود : مو مشكله انه اعرف شون اتعامل ويا
ابو كرم بحيرة : ليش ما تاخذ بنتي وتترك الفصلية
امير بحدة : آنه شتفقت وياكم تره تصير عدكم ثارات وية عشيرتهة لان عندي ادلة عله الحادث وابنكم الغلطان واخذتوا بنتهم ظلم وفلوسهم ودم ابنهم راح هدر لا تخليني اروح اشتكي عليكم
سكت ابو كرم ومن داخله يغلي من الغضب لان كل الادلة والاثباتات عدهم وبس يعترفون ينفضحون ويرحون بالرجلين وأذا بيهم سمعوا صوت سيارة سبورتية لونهة رمادي ونزل كرم منهة وتوجه لباب ارجوان حته ينزلهة وارجوان نزلت بتعب وكرم لازم ايدهة ويسحبهة ويا وهي رادت توگع بسبب الدوار لزمهة حيل حاوط خصرهة وخله راسهة علة صدرة ومشة بيهة للديوان ووگفوا كل الزلم لمن دخل وارجوان تقريباً بحظنه
كرم باستغراب ويباوع عله الوجوه : السلام عليكم
الكل : وعليكم السلام
حسن ويهمس باذن امير : شوف الصاكة ولك شوف شلون حاضنهة
امير وهو يدير وجهة ناحيتهة والتقت نظراته ونظراتهة البريئة الي تستفسر شديصير امير بين نفسه { اشتعلت عشيرتك كرم الله يلعن بليسك شني هالجمال الله لاينطيك هم اخذت سهام وهم اخذت امريكية لا وهمات صاكة شوف يا ربي شلون نازكة وتدور بعيونهة ماتدري وين راح يوديهة الزمن }
كرم : ها بوية هاذي ارجوان جبتهة شرايد منهة
ابو كرم : جيبهة يمي خليهة تتقرب
ارجوان باعتراض وبضعف : لااا ما ... اريد .. لتوديني عنده ... Please
كرم بتعب : ما يسويلچ شي امشي وياي لاتخافين
ارجوان بتعب والدموع تسيل عله خدهة وتدفع بصدره وهو يرجعهة لحضنه وهي تدفع بي : راح تقتلوني لان هربت والله بعد ما اعيدهة بليييز لتسوي بيه هيچ اني ما إلي أي دخل بليييييز انت خوفتني بليييز مامي تعالي شوفي حالي آآآآه ليييييش
كرم بحدة وصوت ناصي : ششششش فضحتينه گدام الزلمة نصي صوتچ ما راح يكتلچ يريدچ بشغلة امشي لا تخافين
كلهة تباوع عليهم باستغراب
الديوان گاعدين بي بس العمام والشيوخ وكرم وامير وحسن فقط
العم سعد ( عم كرم ) : بوية لا تخافين تعاي يمي أنه احجي وياهة شيخنة
الشيخ سليمان بتهدئة : تعاي بوية تعاي ما اذيچ
تقدمت ارجوان من عنده وجسمهة كله يرتعش من الخوف والتعب واضح عله وجهة
الشيخ سليمان : تعاي بنيتي گعدي يمي وتعال كرم هم اگعد يمي
راحت ارجوان بخوف گعدت بين كرم وبين ابو
الشيخ شهاب : الكل يسمعني انه اليوم اريد اناسبكم وناخذ بنياتكم لولدنة وانشالله بعد انصير اهل وما بينه ثارات وضلينه انه والشيخ سليمان نلگه حل بس هاذ الحل الوحيد حته احنه ما نأذي بنياتكم ولاتأذون بنياتنه
الشيخ سليمان : وانه وبناتنه كلهن وافقن لخاطر زلمنه
الشيخ شهاب : آنه هم بنياتنه وافقن بارادتهن حته محد غصبهن
الشيخ سليمان : والنعم منكم والله وانشالله بنياتنه ما يشوفن الا الخير عندكم
الشيخ شهاب : انشالله وبالمقابل بناتنه هم واحنه بدون ما توصونه البنيات بعيونة لان يصيرن منه وبينه
امير وهو يباوع لكرم : انه رايد منك فصلية
كرم باستغراب : نعم شدتقصد
امير بخبث : والله انه اعرف الثارات الي بينك وبين اهل مريتك البريئة
ابتلع كرم ريقه : لا تحجي بعد عرفت السالفة
امير بابتسامه جذابه : والله انك ذكي وفهمت بسرعه انو انه عرفت وعندي الاثباتات والادله
كرم بصدمة وهو يناظر ابو : شلوووون
الشيخ سليمان : والله يا بوية راح نروح بالرجلين وزلمنة كلهة تنكتل من ورة عشيرة.... ويأشر عله ارجوان
كرم بعصبية : شلووون عرفوا شلووون
اما ارجوان فچانت بغير عالم مدنگة راسهة وتسمع بتركيز وبالهة اسئله عن كلامهم المليان الغاز
الشيخ سليمان : چانوا يراقبونه
كرم بصدمة : لا مستحيل
امير ببرود : ولويش مستحيل ماكو شي مستحيل عندي
كرم بهدوء : يعني راح تصير طلايب مرة ثانية وثارات ما تخلص
امير بخبث : احنه ما راح نحچي بشرط
كرم باستعجال : الي هو وراح يتنفذ بس دخيلك كلشي ولا هلي
امير ببرود : اخذ الفصلية مرتك
جحظت عيون كرم وناظرله بصدمة اما ارجوان رفعت راسهة لامير وتلاقت نظراتهم وهو ابتسم ابتسامته الي تدوخ البنات وهي وجهة شحب ودموعه تسيل عله وجهة
كرم وعيونه صارت تجدح : لا يا كلب تريد مريتي وهي عله ذمتي شني انت ما عندك شرف هااااا ما ترد
امير ببرود : لا عندي شرف لويش ما عندي واحترم نفسك وانچب شكلك ميفيد وياك اسلوبي ويمكن راح استخدم وجهي الثاني وياك حته تتادب
ابو كرم : هدي لا تتهور لازم تطلگ مرتك ويعقد عليهة امير
كرم بعصبية : انتو شداتحچون هااااااا دتشاقون اكيد شلون تردوني اطلگ مريتي علمود هاذ
العم جواد ( عم كرم ) بحزم : ماكو غير حل هاذ الموجود يا اما تموت اهلك واهلهة لو تضحي بيهة
كرم وهو يناظر لارجوان بحزم : مستعد اگللهم والي يصير خلي يصير انه اتحمل المسؤليه واگول انه الي گلت الابوي و چذبت عليهم حته اخذهة لان احبهة
امير بحدة : چا راح تصير بالدم الف مبروك عليكم بدال هاذ الدم الي راح ينهدر انطوني ياهة ويرجع كلشي طبيعي
صراع الشيوخ
