رواية خيط وابرة الفصل الثالث عشر بقلم شمس العراقية
مساء الخير أحبتي 🤎
"صمتُ طويلاً ليس عجزاً عن الجواب، بل لأن الجرح حين يُستدعى يتقدّم قبل الكلمات
ثم قلت
أن يخونك وهو يحفظ تفاصيلك عن ظهر قلب
يعرف مواضع ضعفك كما يعرف اسمه
ويعرف أيَّ الطرق أقصر إلى كسرك فيسلكها عامداً
أسوأ من الخيانة
أن تكون بريئاً في محكمة قلبك
ويصدر الحكم ضدك
فتُدان لأنك صدّقت
وتُعاقب لأنك أحببت أكثر مما ينبغي
الخيانه لحظة
لكن ما بعدها امتداد موجع
أن تعيد ترتيب ذاكرتك كل ليلة
أن تشكّ في ضحكتك في اندفاعك في نواياك الصافية
أن تسأل نفسك
هل كنتُ ساذجاً أم كان هو متقناً للكذب؟
أسوأ من الخيانة
أن يعتذر لا ليُصلح بل ليُخفف شعوره بالذنب
أن يقول "لم أقصد"
وكأن الأذى يحتاج نية ليكون حقيقياً
أن يتركك بنصف قلب
نصفه يحنّ لما كان
ونصفه يرتجف خوفاً مما سيكون
أسوأ من الخيانة
أن تنجو منه
لكن لا تنجو منه بداخلك ...
نور ...
ـ كاعده وأسمع حركتهم بالبيت باوعت الساعه ورجعت باوعت على موبايل يتصل! ضليت صافنه على رقمه انقطع الأتصال وفتحت الرسائل .
نافع ـ صباح السعادة يسعادتي...
" نايمه وكعدتج حبيبي بس شسوي حبيبج ملكوف أعذريني متوتر ما اعرف وين اروح كلت أجي عليج أتورج وياي ليش انه لوحدي متوتر ودايخ وليلي ما نايمه من التفكير والقلق وكلشي شتردين حتى أنتِ تخيلتج بحضني وبستج وشميت عطرج الاحبه وتلمست خصلات شعرج وضليت هيج لما طلعت الشمس وأجيتج ...
ـ هلا بيك
ـ شبيج يروحي شو الهلا مالتج بارده
ـ ما بيه شيء بس ما نايمه رأسي يوجعني
ـ اخذي باندول لاتقلقين ماكو شيء الا الخير يصيبنا
شوية نوب يخلص دوامي وارجع البيت وبيت جدي
يجون علينا ويطلعون منا عليكم
ـ أنت تجي وياهم
ـ لا بس أهلي ليش تردين أجي
ـ لا بس سألت
ـ يمج أني حتى لو ما أجي وياهم
ـ نزلت دموعي على رسائله ورجع دزلي
ـ لاتشيلين هم بعد ماكو حجرة عثره بطريقنه الاهل وتصالحوا وتصافوا بينهم ، يله حبيبتي راح أطلع للبيت واشوف الاوضاع وأسبح واكل لكمه وارتاح واراسلج .
ـ كتبت اله ماشي وقطعت كلمة حبيبي عفت موبايلي وحضنت مخدتي وأبجي وكاتمة صوتي وعبرتي تذبح بصدري ...
... شلون أكدر أكمل يومي من دونه وأني ربيت بحضنه على ريحة انفاسه على حنيته ودلاله والله هو صارلي أهل واصدقاء وحبيب وزرعلي الدنيا ورود وشايفه بي كل حياتي ، شلون بابا ترديني أكمل حياتي من دون نافع وحبه وصوته شلون .
.. بقيت نايمه وأسمع أمي تغسل البيت طلعت أخواتي بعدهن نايمات وأمي غاسله الكراج ومعطره البيت ومبخرته صفنت عليها لأول مره أهلها يجون بيتها يا ترى شلون يكون اللقاء وأني اذا اختاريــت
نافع اصير مثلها بدون أهل ..
نور ـ بابا وين
سميعه ـ أخذ أختج لبنى جديتج مهديه دزت عليها وهذيج ملكوفه رفچت وياها .
ـ شتريد منها
ـ خالات ابوج منعجبات بخياطها ودزت عليها تعرفين ما يوصلن بيت ابوج بيت يهودي
ـ علمود الخياط غير شگو بيها
ـ يمعوده أبوج لايحجي لايگول وأنت بنتك طعنت بشرفها ما تخاف عليهن منها هيج أم يتأمن بيها اخذ بناتي عليها ..
.. واذا خياطه تكعد بيتها وهنا يجن عليها مو العكس هي تروحلهن وبعدين تخيط النا وكم وحده كافيات عليها منين طلعن خالاته وهسه صارت أدز عليهن شو من ماتت أمهن لليوم محد وصلهن ولا أحد ذكرهن
ـ شتردين منهن ماما ، قابل رايحات يتونسن
ـ لا يبوي شعليه يله فوتي الحمام اسبحي وأرتاحي محد يستاهل يله أمي يله بنيتي والج الله بلكي يشوفهم ويغيير رأيه
ـ دخلت سبحت بالكوه مشطت وأمي اجتي كشختني عيب من اهلها، وضليت كاعده وموبايلي عفته ودخلت أمي متوتره وتبلع بريگها وتعدل بحجابها ها ماما
سميعه ـ بطريق راح يوصلون هسه عمج محمود خابرهم، شايله هم شلون أطلع عليهم .
نور ـ تفرك بإيديها وتفتر ودخل علينا بابا باوعلنا وكال
صباح ـ حجايه وخليها بإذنج وبإذن بنتج من هسه اذا صار العكس تلحكين أهلج ما الج ضله بعد اخذي بنتج وروحي حتى ميثم أحرمج منج وورقة طلاگج توصلج
سميعه ـ حرام عليك صباح هاي بنتك ليش هيج تسوي بينا
نور ـ فتح الباب وطلع وأمي ازداد قلقها وأني ساكته وسمعنا الصوت وصلوا طلعنا أني وياها ودخلوا ونزل خالي مشعان وجدي حبيب گوه يمشي واستقبله ابوي وعمي محمود سلموا عليه وتقدمت أمي على جدي تريد تسلم عليه ونفض نفسه منها
حبيب ـ وخري منا .
سميعه ـ لا يابه لا .
نور ـ وكعت على أيده تبوس بيها وهو گبل سحبها وحضنها ويبوس بيها ويبجي وهي بحضنه تبوس بأيديه ورأسه وتبجي
حبيب ـ العمر اله حوبه يسميعه وحوبتج كسرت ظهري
نور ـ تبجي وتبوس بإيديه وخالي مشعان سحبها والتفت حبوبه وراها ، وگفت وتباوع على خالي.
مشعان ـ روحيلها يسميعه گافي العمر شضل منه .
نور ـ تقدمت وكفت وتباوع على حبوبه تالي وكعت عليها وباوستها من رأسها وحبوبه حضنتها وتبوس بيها وأمي خطيه بس تبجي بالگوه عمتي حربيه سگتتها
سميعه ـ هلا بيكم يمه
نور ـ تقدمت سلمت عليهم ودخلوا الاستقبال واني رحت المطبخ وجانوا جايين عمتي حربيه وخالي مشعان وجدي وحبوبه وعمي محمود جان موجود ...
وگفت يم الباب الداخلي وأسمع كلامهم من بعد السلام والحجي صار الكلام ودگات گلبي تسارعت ويه أنفاسي والدنيا صارت تخنگني ..
الشيخ حبيب ـ بسم الله الرحمٰن الرحيم والصلاة على خير الانبياء ، بوية صباح الگلوب أن شاء الله تصافت وأحنه ما أچيناك خطار ثگيل جايين عليك بطلب أنتوا تعرفونه
صباح ـ أي عمي كُل الهلا بيكم .
الحجية عطايات ـ نريد بنيتك نوره لابننا نافع وأحسن ما تسد السالفه وحلوگ الناس برجال غريب، أبن خالها أولى بيها ولحمها ما يروح للغريب .
صباح ـ والله حجيه بنتي ما تحتاج أحد يستر عليها والحجي الينگال عليها حجي ناس فارغه ما عدها شغل وعمل وهي أشرف من الشرف لا نافع ولا غيره يسترها وبنتي ما مفكر أزوجها هساع اريدها تكمل دراستها
الحجية عطايات ـ تكمل دراستها عنده وهسه بهذا وگتنا التتزوج تدرس والأم تدرس هذا مو عذر وأنتِ أمها يسميعه شتگولين
سميعه ـ شگول يمه خل يكبعها ويأخذها ما نلكي أحسن من نافع ونور بنيتكم وربت بيني وبينكم رغم كل اللي صار بيناتنا ما منعتها منكم ما عندي مانع يمه
مشعان ـ أبو نور عيني لا عبالك أجيينا علمود الحجي الطلع وأجيبناك لان رايدين نـور لنافع أنه رايد النسب وياك لو گلبك بعده ما صفى
حبيب ـ ها عمي أحجي شو جنك ما راضي لسانك يگول هلا وعينك تگول لأ ،شسالفتك يعمي
صباح ـ لا عمي ليش مـا ارضى وجيتكم عزيزة وعلى رأسي مناك على راسي وأتشرف بيكم ونافع خوش ولد وأنه مربي وأبن خالها بس البنية بعدها صغيرة، وبالها ويا كتبها وامتحاناتها ما اريد اكسر بخاطرها علمود حچي الناس ولا اريد ازوجها غصب علمود اسد حلوگ اليحجون عنها
اذا على حچي الناس حچي الناس ما يخلص ..
واذا على الماضي والعداوة.. الماي مشى، والگلب صفه، والباب بيننا مفتوح ..
بس الزواج مو ترگيع جروح، الزواج عمر.
.. وأني ما أجبرها بالأخص أذا زواج علمود حجي الناس وأثبت كلامهم صح ما يحتاج لان بنتي ومربيها وأعرفها شـــنو وما مخلي أبالي لا نافع ولا غيره والزواج بالأقناع وهم قسمة ونصيب
مشعان ـ والولد السمعنه أمشي عليكم تنطونه
صباح ـ لا ما أنطي والولد خوش ولد بس گتلكم الزواج مو أبالها وبالأخص هسه وگت أمتحانات وأريدها تدرس وتفرحني بشهادتها .
الحجية عطايات ـ نــور وينها خل تجي ونسمع منها گومي صيحي بنتج خل هي تحچي بلسانها شو هذا الحجي ما دش عقلي وخبصوتني بدراستها كلنا ندرسها شلزومه هالحجي هسه .
مشعان ـ محمود أنت عمها شتكول
محمود ـ والله أني ما عندي مانع بس القرار يرجع لابوها ثم ألها طبعاً بموافقتها وأذا على حجي الناس ما خلصانين .
نور ـ وعمي دگ موبايله وطلع برى يخابر وبعد ما رجع ..
حبيب ـ هسه عوفونه من حجي الناس احنه جايين نريد البنيه لاپننا ما جايين نسبي جايين نريد نسب يلم شملنا عكب هالسنين المضت
... والوگت مو مناسب وسالفة حربي ما محلوله ودايخيين بيها بس أنه أجيت وكلني حشم بيك تنطينا نوره بنيتنا واذا على الحجي والسواليف الصارت أنه مالي بهل المواضيع عمري خلص وهالسوالف ما كظت
وياي
نور ـ أجتني أمي وأني أفرك بوجهي ما أكدر ماما أفهميني صعبه عليه والله ما شفتيهم شلون مصمميهن على كلمتهم حتى حبوبه شگت أكو شيء
سميعه ـ منج لابوج ما جان حجيتي هالحجي اله ليش ضليتي ساكته مو سمعتي قبل لايجون شگال أذا هالزواج يصير حتى أني اتطلك والحكج ويأخذ مني ميثم وابوج خلاج بوجه المدفع وأنتِ سكتي وما حجيتي ..
والله لو عليه أخلي يكبعج ويأخذج ويرتاح گلبي على أقل ما أكون ظلمتج لاتبجين ماما كلشي قسمه ونصيب هذا وعدج من الدنيا وأبوج ما تكدرين تخالفيين شوره .
نور ـ حضنتني وهي مقهوره عليه مسحت وجهي وأخذت نفس تمام هذا هو ماما .
سميعه ـ شقررتي شنو أبالج
نور ـ خل أدخل عليهم والله كريم ، دخلت وحبوبه اشرتلي كعدت يمها ومنزله رأسي .
الحجية عطايات ـ كعدي يحبوبه وأنه دزيت عليج أريد أسمع منج لان السمعته من أبوج ما قنعني ولا قنع خوالج ..
.. وعوفيلي سالفة الدراسه هساع لان زين تعرفون نافع يخلها تكمل هاي موحجه تحاجونه بيها ، أحجي يحبوبه نسمعج .
نور ـ أخذت نفس وحجيت حبوبه أني كلمتي من كلمة بابا
حربيه ـ يعني شُــنو ما موافقه على نافع
نور ـ غمضت عيني ونزلت دمعتي وحجيت أي عمه ما موافقة لا على نافع ولا غير نافع، وما مفكرة بالزواج الافكر بي دراستي وبس وأذا علمود الحچي الطلع عليه والطعن بشرفي فما أحتاج أحد يسترني ويبيض صفحتي كدام العالم والحجوا عليه منو ما يكونون مسلمتهم بيد الله وأهل البيت .
الحجيه عطايات ـ شُنو هالحجي ولج نويره جديده هاي ما موافقه على نافع چا مو بينكم راده والولد هاويج تردون تكسرون گلب حفيدي أنتِ وابوج تلعبون علينا ...
.. سميعه احجي شنو هذا الحجي الاسمعنه من بنتج لان نوره وأعرف شگو بكلبها تردون تستحون تزعلون ترضون نوره لنافع بس ألاريد أفهمنه البنت شغيره رأيها غاصبينها تحجي هالحجي احجوا گولوا لاتخلونه على عمى عيوننه .
نور ـ أمي مالها دخل والقرار الأول والأخير يرجع اليه وأهلي ما يجبروني على شيء لا بابا ولا ماما .
حبوبه ضربت على رجلها قوي وباوعت على جدي ويباوعلي نزلت رأسي أتهرب من نظراتهم وعمتي حربيه باوعت خالي مشعان ورجعت باوعت على بابا وكالت .
حربيه ـ خويه صباح شو هيج ووين كلامك اليه من حاجيتك قبل بوقت وگتلي أبشري والبنت بنتج شو الحجي هنا اختلف طلعت بنتك ما تريدنا ليش عمه شسامعه علينا ونافع صار ما يعجبج .
الحجيه عطايات ـ احجي يول حبوبه لاتجمرين گلبي
نور ـ منزله رأسي وأفرك بإيدي أني ونافع ما نتوالم ونتراهم كل واحد من بيئه مو من مستواي نختلف بكلشي حتى بالعقليه واكو خلافات عائليه قديمه وهيج زواج ما ينجح والافضل أنه ما يتم
حربيه ـ كوليها ما تردين ابني ليش مستحيه
نور ـ أي عمه ما أريده خطبيله التستاهله ومن مستواه والزواج قسمه ونصيب وأني مو من نصيبه ، حجيتها ونزلت دمعتي .
مشعان ـ بابا نور ارفعي رأسج وحاجيني وگولي وأحجي اذا أبوج وأمج غاصبينج تحجين هيج ما الج شغله بيهم أنه وياج وبظهرج ..
.. ونكعد ونحجي ونقنع ابوج وأمج ونفض السالفه كلها ونتمم الفرح ونسد الجروح القديمه وخلي گلشي على خالج بس أرفعي رأسج وباوعيلي ولاتخافين من أي أحد محد يكدر يغصبج على شيء أنتِ ما تردينه كولي بابا أحجيلي عوفج من الباقين بس أنه .
نور ـ رفعت رأسي وبابا باوعلي وباوع لأمي واخذت نفس وجاوبته بثقه لا خالوا أهلي ما غاصبيني على شيء هذا كلامي وقراري أني ما أريد أتزوج .
حبيب ـ هذا هو جدي الزواج مو أجباري ، يله أمشونا
الحجيه عطايات ـ هسه نافع صار مو من مستواج ينوره
هاي هي يحبوبه يجرالج جنج ما طلبتي الا حقج وأنتِ كلتيها الزواج قسمه ونصيب وأنتِ مو نصيبه
نور ـ گالتها وأحس شگت گلبي نصين وطلعوا وجدي طلع مزعوج وعمتي تحجي ويه حبوبه ويسولفن ويباعن اليه وأمي ساكته وخلوا ومشوا وخالي وگف حجه ويه بابا
مشعان ـ صباح عوف سوالف الماضي على صفحه وأحنه ولد اليوم وانه رايد نسبك شنو ما تريد تناسبني وأبني أنت تعرفه ومربي أكعد ويه بنتك وحاجيها وأفهم منها شنو السبب
صباح ـ گتلكم بنتي ما أغصبها على شيء ما تريده وهي ما تريد تتزوج جم مره أعيد هالحجايه
الحجيه عطايات ـ مشعان يمه أمشينا ماله لزوم تتوسل بعد مو غصب البنيه ما تريده وهاي هي لاتريده هسه نافع صار مـا ينراد .
نور ـ مشه خالي مشعان وعيونه عليه يحاجيني بيهن لاتكسرين گلب أبني ويمشي ويتلفت كأنما يگولي غيري رايج نافع منتظرني ومنتظر نبشره شگوله إذا سألني عليج .
.. وأنسد الباب وأنسد باب گلبي وباوعت على يابا ونزلت دمعتي وبجيت وأمي تقربت حضنتني وكالتله
سميعه ـ أرتاحييت هسه أخذت ثأرك منهم وطفيت نارك على لميعه وطلعتها بنتك وبنافع دنام رغد يصباح
أنه هيج أب ما شفت متونس على خراب بنتك متونس
صباح ـ أحجي عدل لأ أكسر حلگج وهسه نافع صار عزيز من تصالحتي أنتِ وأهلج تردين تناسبين أخوج بس لو مو الصلح لو يبوسون قنادر ويتوسلون بيه ليل نهار لو أبن أخوج ينام بابي يجديها ما أنطيها اله .
ـ وهو شُـنو ذنبه ليش بس أبن أخويه مو أبن أختك وخالي ويبعد خالي وأنتَ ربيته ودامك هيج حاقد عليهم ليش أستقبلتهم بيتك وحاجيتهم بوجه حلو لو بس تريد تقهرني .
ـ أستقبتلهم لان ما أريد أصير مثل أهلج أنذال من أخذتج الهم بهذاك اليوم المصخم الدزوج بي عليه مصخم وجهج ..
وتالي أستقبال ما أستقبلوج طردوج وتبروا منج وسنين مرت سنين ما شفت جلب وصل منهم وسأل عنج هسه صاروا أهلج هسه وكلبج حن عليهم هسه
... أذا أنتِ نسيتي سوالفهم ودگات أمج وياج وهسه وكعتي عليهم وسامحوج وعفيتي عنهم أنه لما أموت ما أنسى دگتهم الناقصه بيه ولا أنسى كسرتي على لميعه وللموت مـا أنساها وأطلعها من عيونهم لو عندي عشرين بنيه ما أنطيهم جلبه مو بنيه وأنطييها لكواويد ولـ الأهلج ما أنطي مره ...
... هاي أمج عينها عين **** وتحاجيني معلك بنت كتيبه أم الفواين والدكايك حتى من سلمتي عليها رافعه بوزها متر وما نزلت نفسها وگالت بنتي ..
... هسه تحاجيني على أهلج سميعه هسه .
ونافع ترديني انطي مره وهو صكط اختي طفالها عينها وضرب أمي ضرب مال موت أيده أيد البغل هاي باجر عكبها أذا يضرب بنتج ينومها مستشفى ..
سميعه ـ من إيديهن ليش حجن وطعنن بشرفها هو شالته الغيره على بنت عمته ما تحمل ينجاب طاريها بالموزين وهد عليهم ويستاهلن .
ـ وأنتِ تدافعيله هاي ما طلعتي أنتِ دازته
ـ أنه ما دزيته هو من كيفه راح .
ـ أي وكل سوالفه الناقصه ويه أهلي وتردين مني أنطي مره شبيه تخبلت ليش أهلي متبرين مني لو أمي ما تهمني لو أختي كلبي ما يوجعني عليها ..
..ولج أخاف جانت اليه نيه أنطي بس من بعد سوايته ويه أمي وأخواتي لو يموت ومو بس أني كل عمامها وجدها وجديتها ما ينطونها ما شفتي ولا واحد حضر منهم بس محمود وهذا اللوكي مال مشعان لان ساكن يمه وساترله على بناته من يروح الدوام ومن يطلع سفرات ودياحه يذبهن يم حربيه يعني على مصلحته .
ـ گول هيج من الأول ليش تذبها برأس أهلي كول اهلك ما موافقين وخلص ليش كعدت تحجي سوالف قديمه مالها داعي .
ـ أي ما موافقين ولا يوافقون والشور مو بس شوري هما أهلها وشورهم يمشي عليه وعليها وعليج هم..
.. وأمي من الناس حلفت عليه أذا أنطي نور لنافع تتبرى وتغضب عليه وأني ما مستعد أخسر أمي وأهلي علمودج أنتِ وبنتج وتكمل السادس ويصير خير
سميعه ـ ما أنطيتها لنافع ما تنطيها لأحد ثاني مو گلت الهم ما تتزوج وتريد تدرس وتأخذ شهادتها هذا هو
صباح ـ وأني أمشي على كيفج وكيف أهلج بنتي وأني حر أزوجها منو ما يكون لا أنتِ ولا غيرج يقررون منو اناسب .
نور ـ كافي بابا ماله داعي هالكلام كله لاتجرح أمي ولاتجرحني منك ، والزواج ورفضته واصلاً بعد حتى لو توافق على نافع أني ما أقبل ، كرهت الأهل والاقارب والزواج وكلشي بسبب ماضيكم ومشاكلكم .
... عفتهم ودخلت غرفتي وقفلت الباب وبجيت الا طلعت روحي ، لا أهل ينصفونك لا واقع تكدر تتعايش وياه ويريدني أدرس وهو كلامه مثل السم يعير أمي كدامي وهو بدون مستحى يكول ما ناسيها ما عرفناك ساعه تحب امي وتباوع على حلكها ساعه تكول ما ناسي خالتي عود عندك وفاء يا وفه تحجي عنه بابا ...
بقيت ابجي وأمي تدك الباب عليه
سميعه ـ نور ماما فتحيلي الباب يروح أمج ولج شطالع بيدي عليج يا بنتي ، سوه البرأسه ومشه لأهله وخله جمره بأيدي كون ميته ولا شوف لوعتج سوده بوجهي
ولج نور يمه سمعيني صوتج
نور ـ ضليت أبجي وصار موبايلي كدامي يتصل عليه من عدا الرسائل الدازهن اليه ، گلبت الموبايل وخليت رأسي بالمخده وعيطت نار گلبي أهلي سببها ...
_____________
لميعه ...
ـ متحضرين يردون يمشون وأريد أروح وياهم بس أخاف أحجي وأمي تفشلني وصلت الباب وصاحت عليه ها يمه .
الحجيه عطايات ـ لبسي عالسريع تمشين ويانا نافع خابر يريدج
ـ ها خوما احضر المشيه
ـ لا شعندج رايحه المشيه بس تبقين بالبيت يم بنات أخوج احسن ما كاعده وحيدج هم تفضين خلگج ، يله أستعجلي كبل لا أخوج يخبصنا .
ـ اي يمه هسه دشيت غرفتي همزين الله هداج عليَّ بس اعرفج يعطايات لما نافع يخابر ويوصي ما تأخذيني
لبست علسريع واخذتلي ثوب وياي خاف يبقون وعندي قطع قماش هدايا من أخواتي ابقيهن يم زهور تدزهن لبنى شعليها خياط مرتب حبيت خياطها تبين خوش خياطه ..
الحجيه عطايات ـ يله يلميعه وين صرتي نمتي تأخرنا ورانا درب علما نوصل .
لميعه ـ اي يمه أجييت وطلعت عاينت على مهدامي عبالها اكشخ علموده ما تدري الگلب مات وصار رماد
ومشينا الولايه وحاطة أيدي على كلبي لا يصير الشيء الخايفه منه يارب دخيلك كون صباح ما يكسر گلوبهم
طول الطريق أتصل عليها متجاوبني ودزيت الها رسايل هم ماكو قلقتني وشغلتلي بالي وتالي وصلنا وضلوا ينتظرونه واجه من الدوام خنت حيلي فرحان الكاع ما واسعته وأمي شبكته وتبوس بي ومشوا الله وياهم
نافع ـ ما جبتوا وياك دهن حر ، روبه جوعان جوعان عميمه اريد منج ريوك نفس التسوينه هناك مشتهي اكل من أيدج .
لميعه ـ تدلل يعين عمتك وسويتله الريوك وكعد يأكل ويسولف ويه زهور منطلق وعينه بالموبايل منتظر منها رساله عود بشرني من تبشرك نوره .
نافع ـ أول وحده أبشرج بس خل بالأول أتبشر مو عبالك طولوا ، شتكولين أخابر لالا أروح اجيبهم ها عمه أروح
لميعه ـ لا اصبر هسه يجون لاتستعجل على رزقك
نافع ـ أنه أمي طمنتني بس هم خايف من خالي
لميعه ـ بگلبي وأنه خايفه اكثر منك ، وكعدت وهو يتصل محد يرد عليه وطلع بالحوش ولحكته ، صفا غسلي المواعين گبل لاتجي حبوبتج وتحجي عليجن
صفا ـ هسه خل نفهم بالاول ينطون لا عكبها أغسل
زهور ـ گومي غسليهن شلج بهل الكلاوات .
لميعه ـ نافع عينه بموبايله وعينه عليَّ ها عميمه
نافع ـ ما تجاوب على مهجوم ما تجاوب تخوفني من تعوف موبايلها ، بس فتحي الخط يامعوده .
لميعه ـ وسمعنا صوت السيارة يمكن وصلوا.. طلع الهم حليم فتح الباب وناجح توه كاعد من النوم سلم عليه وكعد يتريك
ناجح ـ ها بشروا عقدتوا بعدكم
نافع ـ يا عقد غير نمشي بالأول شبيك مطفي
لميعه ـ ودخلوا وأنه اعاين على الوجوه نزل أبوي ودخل الاستقبال ونافع يباوعلهم ومشعان كاعد على درجات مال الطرمه وأمي وحربيه يباعن على نافع ، ها يمه
نافع ـ حبوبه بشريني بالخير الله يبشرج
لميعه ـ ما حجن شيء ساكتات
الحجيه عطايات ـ جيبلي ماي يبستلي ريجي بنت سميعه
نافع ـ شبيها ، حبوبه ليش ما تحجين.. ، شبيكم ساكتين بشروا حمامه غراب يمه حطي عينج بعيني واحجي أخوج شگال .
حربيه ـ ما الك شيء يم خالك ماكو نصيب وليدي والخلق نور خلق الف وحده غيرها الله يعوضك ماما .
نافع ـ يعوضني!! بشُــنو يعوضني ، شهل الحجي هذا ، يابه أحجي فهمني، حبوبه ، جدي عيني أنتَ
أبوس رأسك أحجي شصار .
لميعه ـ يروح منا ويجي منا وراح عالجده الاستقبال ورجع على مشعان وجاوبه
مشعان ـ الله يعوضك بابا وصاح بي وحربيه كعدت تبجي .
نافع ـ بابا أني دازكم تخطبونها اليه مو ترجعون تگولون الله يعوضك ما أريد عوض أريدها هي...
.. شتحجون أنتوا واحد منكم يحجي لو اشغل السياره وأروح عليهم أفهم السالفه شنهي ، تلعبون لـو ناصبين عليه أنتوا هاا أحجوا .
الحجيه عطايات ـ الرفض مو من خالك ولا من عمتك يحبوبه
نافع ـ چا منين .
الحجيه عطايات ـ منها .. من نـوره يحبوبه طلعت هي ما تريد تتزوج ولا تريدك .. وأنتَ طلعت ما تنراد يحبوبه ومو من مستواها وبيئتها تحاجيني بالمستويات والبيئات بنت سميعه .
نافع ـ بضحك لا أنتوا ناصبين عليه ومو وگته قسم بالله مو وكته حاجوني بالصدك ، حبوبه أحجيها كبل اكرهه هاي الدروب فدوه لشيباتج .
لميعه ـ گامت تقدمت بعوجيتها عليه وهو وأكف بطوله ولابس تيشرت أبيض وبجامه سوده وشعره مرفوع وجان محلق جديد وموبايله بإيده وحده من أيده كامت ترجف هو ما مصدك بس أنه صدكت لان مشعان يباوعله ومختنك وحربيه تبجي عليَّ
.. السالفه صدك يعمه
... تقربت أمي وباسته من خده وحضنته من وجهه
الحجيه عطايات ـ لو أدري تكسرلك گلبك بنت سميعه الدار الساكن بيها اشيلك منها ولا أشوف هاليوم هذا وأشوفك مكسور يحيل حبوبتك يبعد طوايفي وهلي
أبوي أنتَ لاتقهر روحك ازوجك أغاتها كلهن يتمنن يصيرنن من نسوانك مبخته التصير حرمتك يحبوبه .
لميعه ـ ضحك وسحب نفسه من أمي ورجع باوعلهم وعگد حواجبه وكصته وكال
نافع ـ لا لا أنتوا تجذبون عليَّ وما أصدك بإحد الأ أسمع منها ، أذا أذني ما تسمع صوتها ما أصدك بأحد ..
.. اني رايحلها وأحجي وياها ما أخذ منكم صدك
و نور ما تسويها يا مستويات يا بيئه شتحجون أنتوا بابا هاي بنيتي مربيها على أيدي ما تخالف شوري مو عاد ترفضني .
.. صفا السويج بسرعه
صفا ـ أي
مشعان ـ أروح وياك بابا
نافع ـ ما يحتاج اروح لوحدي
مشعان ـ لا اجي وياك وأريد احجي ويه عمتك سميعه لان اشك البنيه غاصبينها تحجي هيج، شجاها تبدل رأيها .
لميعه ـ أخذ السويج من صفا وصعد السياره ومشعان وراه وأمي تصييح عليه
الحجيه عطايات ـ أستعجل گبل لايشغلها ولاتعوفه وحيده .
لميعه ـ صعد السياره وطلعوا وأمي تضرب على رجليها وحربيه لازمه رأسها وصفا كالت .
صفا ـ فواكاها هي الترفض عوزها وعوازها تحصلها رجل مثل أخوي يله بعد أحسن عاد هي من حورها جنها سلبوح مدري شيحب بيها .
لميعه ـ كطتها حربيه بالنعال أجه براسها وعاطت بيها
حربيه ـ نجبي أكص لسانج اذا تجيبين طاريها شكو نبصتي نفسج امشي ولي ساعدي أخواتج وغسلتي ملابس أخوج من رجع الدوام لا .. أكيد لحد الان مشمورات على جربايته .
صفا ـ لا زهور غسلتهن .
لميعه ـ كعدت بصف أمي أرد افهم منها يمه حاجيني شني السالفه نور ليش رفضت وشكالت الكم .
الحجيه عطايات ـ شايله خشمها علينا بنت أمها شتطلع
ولا تريده بعد أحسن اصلاً أنه أبالي وحيده توالمه وتلمه ويلمها ..
.. بنت الدلال ما تعيش عنده ينكسر عودها يومين تكوم تتبجج وتتأمر عليه تشلع گلبها بس تتنعوص وهو زلمه ماله خلك لدلال النسوان .
لميعه ـ صفنت عليها وعرفت وين صفت نيتها
الله يستر من أفكارج يمه بعدما نهجمت تربعتي
....
_____________
نور ...
ـ كاعده بغرفتي وأمي فتحت الباب بالنسخه العدها وكعدت يمي ومسحت دموعي .
سميعه ـ كافي يا أمي موتتي نفسج ما تفكرين بيه منو اليه غيرج ، كومي غسلي وجهج قبل لايرجع أبوج ويضل يحجي ويسمعني كلام يغثني ويغثج
ـ ليش وين راح
ـ راح بيت أهلج يجيب أختج لبنى يله أمي كومي كبل لايجن ويشوفنج ما اريدهن يعرفن ويتشمتن بيج بالاخص هاي شعرة الشيطان تريد الزله علينا .
ـ هسه تقربت باستني وطلعت وسمعت صوت الجرس والباب ينيدك قوي ، باوعت على شاشة الموبايل يطلع ضوه جنت كالبته رفعته نافع يتصل بك ...
عفته ورجعت رجيت رأسي عالتاج وصفنت ودخلت أمي مستعجله وخايفه
سميعه ـ گومي هذا أجه عليج يريد يحجي وياج ما مصدك بأهله .
ـ بلعت ريك بخوف شُــنو!.. ماما ما ما أطلعله والله مستحيل أحجي وياه الله عليج لاتعوفيني وحدي وياه أفهميني ماما ما أكدر ما أكدر .
ـ لا ما أعوفج والله أبقى وياج واصلاً مو لوحده خالج مشعان وياه وكومي احجي وخلي يصدك ادري صعبه عليج وعليه بس شطالع بإيدينا وابوج حاكم علينا .
ـ كومتني وطلعت غسلت وجهي وخليت شالي ماما لاتعوفيني الله عليج خليج وياي .
ـ ما أعوفج بس أنت خليج قويه ماماتي واتحسبي على الكسر گلبج لان ما بيدج شيء .
ـ دخلت وأني وراها تجر بيه وهو كاعد ومنزله رأسه وشابك أيديه وحده بالثانيه بس حس بخطواتنا رفع رأسه گبل باوعلي بعصبيه وعينه نار ...
أني نزلت عيوني بالگاع مگدرت أواجهه ...
وهو گام، وفز من مكانه، وخالي مشعان گام وياه بنفس اللحظة وخالي حط إيده على كتف نافع يهديه:
مشعان ـ نافع بابا على كيفك، هدّي روحك
نافع ـ ما مسوي شيء بابا بس أريد احجي وياها كلمتين لـوحدنا
مشعان ـ أم نور نطلع ونعوفهم يحجون وأني هم أريد احجي وياج بخصوص الموضوع
سميعه ـ لا ما أطلع وأعوف بنتي وين صايره دايره يكعد لوحده وياها.. وابو حربي ماكو شيء ينحچي بيه بعد وهي حجت العدها وأهلك بلغوك يا عمه على شنو جاي بعد مالك نصيب يمنا والسالفه أنسدت
.. عينه حمرت، وضرب بإيده على ركبته:
نافع ـ عمه سدي حلگچ.. عمه لا تحچين
مشعان ـ نافع أحترم عمتك والشغله مو غصب يا أبني والبنيه ما تريدك قابل تجبر بنتها گوه عليك هذا زواج مو لعب جهال يا أبني
نور ـ يحجون وأني منزله رأسي وبس أشوف طوله ويحرك رجله بالگاع يطبطب بيها بحركه وحده هالحركه أعرفها بس من يكون عصبي والمكان يغلي من شدة غضبه بس متمالك روحه .
هاي مو طبطبة رجل... هاي هدوء ما قبل العاصفة.
فزنني من عاط بأمي وصوته هز المكان
نافع ـ أريد أسمع منها .. مو منچ عمه
.. نور أحچيلي كوليلي شُــنو هذا الحجي السمعته ناصبه عليه مو .. عوفي الشقه ما أحبه بهيج سوالف
وعوفيلي المستويات والاختلافات نور لان هاي مو حجايتج اني اعرفچ زين .
نور ـ ضليت أسمعه وساكته ، سگت للحظه ورجع گال
نافه ـ احچيلي... احچيلي من گلبچ أسمعج احد غاصبچ؟ احد كايلج تحچين هيچي.
كولي فهميني والله ما صدگتكم عفتهم كلهم واجيتچ ركض لان ما اصدگ غيرچ بس بيچ اصدگ، وبعينچ اصدگ
.. حاجيني نور اذا اكو واحد مأذيچ، گوليلي اذا اكو سر احچيلي واني اشيله عنچ.
بس لا تذبحيني بكلمة "مستويات " وانتِ تعرفين زين أني وياج نتشارك بنفس واحد
فهميني علمود گلبي يهدأ لان اذا مشيتي وهاللغز بگلبي، والله ما ارتاح طول عمري، أحجي نور ليش ساكته ،سگوتج هذا ما مرتاحله ..
نور ـ خالي مشعان طلع برى وأني اخذت نفس وگلبي يدگ لدرجة حسيت راح يطلع من صدري وقررت اختصر الحچي كله بكلمتين، واخلص من هالعذاب ..
ـ نافع ماكو شقة بهيج موضوع مهم يخص حياتي وحياتك وماكو لغز، ولا احد غاصبني وجابرني
اني شفت القرار المناسب، وشفت انه هالطريق مو طريقنا والزواج قسمه ونصيب اني مو نصيبك ولا
أنت من مستواي! اني وياك ما نتشابه مختلفين بگلشي أعتذر ما أكدر اعيش وياك وبينا هل اختلافات
هدأ المكان... بس صوت نفسه الثگيل ينسمع وخطوة ليگدام، وصوته انكسر وكسرلي روحي .
نافع ـ مستويات واختلافات؟ منين طلعتي بهالسوالف
منو علمچ هالكلاوات؟ شتخربطين انتِ؟
انتِ غير مالتي... غير روحي. شهل الحچي هذا؟
قسمه ونصيب! والله لو تنشگ الگاع، ما اصدگ انچ مو الي.
نور ـ گلشي بالدنيا نصيب أرضى بنصيبك نافع أني وياك ما نتوالم
ضحك ضحكة مكسورة، ودمعته على طرف عينه
نافع ـ يا نصيب نور، واحلامنا وين اوديها؟ أنتِ تدرين بروحچ شتحچين؟ تدرين اشسويتي بيه لو لا؟
نوره انتِ واعية على نفسچ؟ اني نافع... نافع اللي تربيتي بحضنه.
نور ـ يضرب على صدره ويحجي جاوبته أي ولأول مره أكون بهل الوعي وهيج أحسن وأولها أحسن من تاليها ما أريد بعدين أتندم على قرار يدمرني ويحطمني نهايته
نافع ـ قرار يحطمج نهايته .
نور ـ جاوبته بعصبيه علمود أقنعه أي يحطمني وما أريدك ولا اريد تكون نهايتي بزواج نهايته فشل
نافع ـ ليش أنه حطام يانور يوم اذيتچ؟ يا يوم كسرت خاطرچ؟ يا يوم خليتج تبچين بسببي ..
والله العظيم عمري كله واني خايف عليچ من الهوا
خايف من نظرتي اذا تزعلچ، خايف من كلمة اذا تجرحچ وخايف من ناسي وناسج لاتغثج وكل عمري واني ابني بمستقبلچ بيديه، واحلم بيچ دكتورة، وأم بيتي وجهالي ...
وهسه أنتِ خايفة على مستقبلچ مني؟
ولج اني مستقبلچ، اني الحلم اللي كل ليلة ادعي الله يصير حقيقة
ولج نور... ما يوم دخلت بيتنا وما تخيلتج ويانا.
ما يوم فكرت بعمري الجاي، اذا مو انتِ راسمته بإيدچ.
والله ما باني حلم واحد اذا مو انتِ الأساس مالته.
الفراش اللي الأفرشه، والماعون اللي اكل بيه، والباب اللي اطب منه ، كلها شايفچ بيها
هسه تجين بكل برود ، وتگولين "مستويات" "اختلافات"؟ وقرار يحطمني!
ولج اني ربيتج... شلتچ من الگاع وانتِ طفلة، وغطيتچ من المطر كل عمري واني احلم باليوم اللي البسچ بي حلقه واخذچ من بيت ابوچ لبيتي
بس طلع حلمي براسچ لعبة... وكلامچ طلع سراب.
نور ـ هيج أحسن إلنا أثنينا ..
ـ أحسن!
ـ سگوت وهدأ وأني اريده ينهي الكلام وأمشي من كدامه ما أكدر أقاوم أكثر .
ـ تدرين عتبي مو عليچ يانور... عتبي على گلبي الغبي اللي صدگ انچ الي وعتبي على الايام اللي خلتني احبچ حب مو مال هالدنيا ..
وانتِ تردين عليّه بـ "قسمة ونصيب".
قسمة ونصيب؟ مو ...
والله لو قاسميني عمري نصّين، جان انطيتچ النص الزين، واخذت أنه النص المكسور.
بس انتِ ما قبلتي حتى بالنص المكسور رفضتي كله
ـ ما جاوبته ما أريد اقهره بعد تقرب وبينا مسافه قليله مد إيده لأيدي، بس ما لمسها أصابعه وگفت بالهوا، وصوته مبحوح من الغصه البداخله وحجه
ـ قبل لا امشي ارفعي راسچ نور وخلي عينچ بعيني، وباوعيلي زين.
وگوليها... گوليها من گلبچ وريحي گليبي المتعلل بنار حبچ لان بعدني ما مقتنع، والله ما مقتنع.
گلبي ما يقتنع إلا بيچ، وما يصدگ إلا من لسانچ.
ـ المكان سكت حتى النفس إنقطع، ونزلت دمعتي غصب، بس مسحتها بطرف ردن ثوبي بسرعة، ورفعت راسي شوية شوية مثل اللي راح يعدم روحه بإيده ..
باوعت بعيونه..عيونه كانت بحر غرگ بيه وبيها وجع الدنيا كلها، وبيها رجاء طفل ضايع.
بلعت ريجي، وصوتي طلع مكسور بس ثابت:
نافع... ما اكدر.
.. أي ما أكدر اكذب على روحي، ولا اكدر اكذب عليك
اي، ارفع راسي وأباوعلك بس مو علمود اقنعك
ارفع راسي علمود امشي واني أكون ما ظلمت نفسي ولا ظلمتك وياي
... ضحك ضحكة ما بيها روح
نافع ـ ها يعني مصرة على قرارچ .. حتى عينچ ما گدرت تغش گلبي؟
نور ـ دموعي نزلت هالمرة غصب عني وجاوبته :
مصرة نافع مصرة علمود بعدين لا انكسر اني، ولا تنكسر انت وياي.
اولها نار... بس تاليها جنة.
واذا مو هسه، فبعدين راح تدعيلي ، روح الله يخليك أمشي ولا تلتفت وراك ونور أنساها خلص .
سكت وشافني ارفع راسي للمرة الثانية هالمرة ما نزلته هالمرة مشيت خطوة لورا خطوة تبعدني عنه، وتقربه من الوجع.
نافع ـ ما راح الومچ يانور ولا أعاتبج وأغثج أكثر واذا اني حطام فإعرفي زين حطامچ انتِ اللي كسرتيه بإيدچ هسه وأذا أنتِ شفتي القرار المناسب انه شفت عمري كله ضاع من قرارچ
ما كسرچ الزمن، ولا كسرتچ الناس كسرچ قرارچ
وتذكري انه اكو واحد هدم عمره علمودچ، وانتِ هدمتيه بكلمة
نور ـ مشه وعافني وطلعت وراه باوعتله وظهره بقى واكف بس من بعيد يبين مثل الحايط المهدوم واني هدمته بأيدي
مشعان ـ نافع بابا اوكف وين رايح نافع
نور ـ طلع مستعجل ولحگه خالي مشعان وأني مشيت وعفت أمي تحجي على بابا وبيت جدي والدنيا كلها
دخلت غرفتي، وسديت الباب بيدي وبديت اضرب على وجهي بقووه علمود احس بألم غير ألم البگلبي.
أمي اجت تركض، حضنتني وضمتني لصدرها
يمه ليش هيچ سويتي بيه؟ ليش خليتيني اكسر گلبه بإيدي ، يمه نار نار بگلبي
.. صرخت بوسط حضنها، ودموعي تغسل وجهي
يمه هذا نافع، نافع روحي متعلگه بيه.
شلون هيچ حاچيته؟ شلون كسرت بخاطره واني احبه
يمه دا أموت... والله دا أموت .
ضربت على صدري، واختنگت من البچي:
شلون اطلع من البيت واشوفه مكسور وشلون انام واني اعرف انه هسه بره دا يبچي مثل الطفل.
أمي باست راسي وهي تبچي وياي .
سميعه ـ يمه بنيتي مو بإيدج مو بإيدج مغصوبه خطيتج بركبة أبوچ كافي أمي ليش تعذبين روحچ ورويحته ومو نصيبه أنتِ شلج دخل
نور ـ عظيت ايدي علمود ما اصيح:
نصيبه؟ يمه يا نصيب تحجين عنه وأني البارحه أحجي وياه وفرحانه وكلما اغمض عيني اشوفه هو واگف گدامي، ورافع راسه ويگول "هاي نور مالتي" بناتي ونور شسوتله كسرته بإيدها .
يمه راح أموت... اذا مو اليوم، باجر.
سميعه ـ أسم الله عليج أمي أنتِ كافي ماما كافي راح تموتين .
نور ـ ماما لاتعوفيني أبقي يمي بس تروحين أموت وراج حابه أبقى نايمه بحضنج بلكي اصبر روحي وتطفى نار گلبي ، ليش هيج صار ليش بابا هيج سوه اني شنو ذنبي بالماضي مالته
ضليت اعاتب ماما وهي تسكت بيه بس داخلي ما يسكت وعيونه كبالي ما فاركتني لحظه شون اعيش من دونه ورسائله وحبه واهتمامه وتفاصيل حُبنـا..
__________
لميعه ..
ـ ضلينا كاعدين ننتظرهم وطولوا وأمي واكفه وعينها عالباب ودخل مشعان لوحده ونافع مو وياه
الحچيه عطايات ـ نافع وين
مشعان ـ ليش ينطي درب طگ السياره وطلع ما لحگت بي .
ـ شصار حاجاها وغثته مو ، گسرت گلبه بنت صبيح
ـ أي حجوا ، هاي هي ماكو نصيب والبنيه مبينه مغصوبه
ـ مالي شغل بيها أنه عليه بنافع شون تخلي يروح لوحده خاف يسوق سرعه شلون تخلي وتجيني شسوي بيك .
ـ شسويله يمه صغير هو ، هسه أخابره وأشوفه وين
لميعه ـ دخل الاستقبال تعبان وللعصر نافع ما بين وأمي ما حطت لگمه بلحكها ويتصلون عليه يحصل بس ما يرفع خط غوربت الدنيا ونافع ماكو لليل رجعوا وهو ماهو، يمه وين راح
الحجيه عطايات ـ المن راجعين ، جيبولي أخوكم وأبوكم وينه
ناجح ـ راح على غافر يسأله والله حبوبه ما خلينا واحد من جماعته ما سألناه ورحنه لكوفي محد شايفه هو يرجع قابل وين يروح خلوا اليوم يجوز يريد يبقى لوحده .
لميعه ـ دخلوا وأجه مشعان نفس الحجي وضلينا عايشين بقلق لليل داز رساله لناجح كاتبله ما اجي اليوم
الحجيه عطايات ـ چا وين يضل يمن يبات! أنه هالسالفه گلبي ما مطمن منها..شو خابروا خل يرد البيت قحط نسوان زعلان عليها طبها حريشي خلته شايط عليها الله يدري شگالتله وخلته يهچ .
مشعان ـ يمه دبسج عاد عوفي البنيه بحالها وهو يرجع دام دز رساله ما بي شيء خلوا اليوم على راحته وباجر أكسر العصا على أظهره أذا يضل مسربت.
لميعه ـ دخل وبعدها محد جاب طاريه بس أمي ضلت تلوب عليه وتحجي على نور ما سگتت حتى حربيه ابنها ما حجت بگدها أكتفت ماكو نصيب وهاي هي ..
دكيت عليها بالبوگه من أمي ما حصلتها قافله موبايلها خنت حيلي هساع گلبي مجمر بالنار على نافع شحالها سوده عليه ما تمنيت اشوفن هاليوم وينكسر خاطركم
الثاني يوم للمغرب ونافع ما بين علينا ومشعان عينه عالباب، ما غمضت وكل دگة باب يفز ويگوم ويخابرون عليه جهازه مغلق.
"دخيلك يا علي وين جانتلنا هل السالفه هاي"
طلعوا وردوا ونافع ماهو لا أثر، لا خبر، لا حس
وامي تخبلت كامت تحچي على مشعان وعلى أبوي
من الصبح دز على باقر وگبع ومشه للقريه ما متعلم إذا مو فراشه ومجانه"
واني ضالة بين أمي وبين مشعان أمي نار وتصيح، ومشعان نار وساكت ، وأني بالنص گاعدة، گلبي مقسوم نصين: نص يريد يركض يدور على نافع،
ونص يريد يصيح لنور تفتح موبايلها وتطمني عليها
لا حس ولا خبر منها هم وأثنينهم ضاعوا بنفس الليلة..
واحد تايه بالطريق، ووحدة تايهة بدمعتها .
وللصبح أنه وأمي ما نمنا ومشعان ويه طگة البريج شغل سيارته هو ناجح وطلعوا يدورون عليه ، نايمه وأمي ندهتي بعوجيتها ها يمه تردين شيء .
الحجيه عطايات ـ شريد ييمه شريد.. غير چية نافع ورجعته للبيت؟ أخافن عليه لا سوى شي بروحه من ورى مكصوفة العمر وگلبي ما مطمن، الولد راسه حار ودمه فاير.
لميعه ـ لا أستهدي بالرحمن إن شاء الله ماكو إلا خير
تفائلي يمه
ـ ماكو بس نوره تگدر ترجعه هي اللي هجته من ديرته وهي اللي ترجعه
حربيه ـ عمه لا تعاينين عليَّ.. مالي شغل لا أروح ولا أصل بيتهم من ساعة رحنا لهم وتفاشلنا وكسروا كلب ابني حلفت ما أدخل بيتهم بعد
الحجيه عطايات ـ چا أدز منو؟ مو أولدج گلبج ما يوجعج عليه، ولدج تايه بالشارع وأنتِ تحچين عِند؟
حربيه ـ ليش أنا نايمة الليل؟ شلون ياعمه بس شسوي
گلبي محروگ عليه أكثر منچ شطالع بإيدي وما سويته
الحجية عطايات ـ گومي يا لميعة لبسي عبايتج، وأخذي زهور وياج، وخلي حليم يوصلجن روحي حاچيها خلي نور تخابره بس هي اللي تگدر ترجعه هي مفتاحه الوحيد وباب رجعته يمها
لميعه ـ أنه يمه
الحجيه عطايات ـ أي أنتي چا شبيچ
حربيه ـ روحي فدوه لعينج لميعه
لميعه ـ أي هزيت رأسي وگمت غسلت وجهي بالمي البارد ودورت على عبايتي بين الغراض وإيدي ترجف
صحت "زهور" ومشينا ورجلي ما شايلتني بس مجبورة لخاطر نافع
حليم وصلنا لبابهم وزهور دگت الباب دگة ثگيلة
وأنا گلبي يدگ ويه كل دگة ، يدگ خوف وقهر
ما أريد أدخل بيتهم والله ما أريد بس شسوي لأمي حكمت عليّ
وأشوف "صباح" عگب هالسنين المضت
شلون وافقت وأجيت على عمى عيوني يالله عاد وإذا أجيت شو الگلب مات المن ضالة أتكبكب وأخافن منه
لا يشوفني .
حليم ـ دگي الباب قوي شبيج
زهور ـ مو دگيت الجرس والباب كسرته يمكن نايمين
لميعه ـ تدگ ودگة الباب بعدها ترن بذاني ورجلي لازگة بالگاع ما تريد تعبر العتبة وأنفتح الباب طلع "صباح" واگف گدامي
سنين.. سنين ما شفته نفس العيون بس تعبانه، نفس الوقفة بس ظهره محني وأول ما شافني عيونه وسعت، وبعدين ضاگت مثل واحد شاف طيف وما صدگ.
صباح ـ هلا بيكم ، خير صاير شي؟
زهور ـ هلا خالي لا بس أجينا على نور، عمتي أجت تشوفها وتسلم عليها قبل لا ترجع للقريه.
صباح ـ أي كل الهلا.. اتفضلوا، اتفضلوا.
لميعه ـ لزگت بصف زهور ودخلنا أنه وياها وهو مشه گدامنا مستعجل، وفتح باب الاستقبال وهو يلتفت.
ـ اتفضلوا ، لما أكعدها، نايمة.
ـ دخلت الاستقبال ورجلي تتعثر گعدت على طرف التخم وأخذت نفس يمتى تجي؟ ونفض هالسالفة وأحاجيها وأمشي، نفسي ضاگ عليّ، والگاع تدور بيه.
زهور ـ ها عمه بشري شخبار گلبج؟
ـ تتقشمرين شو سكتي ما ناقصتج، وين صارت نور؟ ضلينا گاعدين ننتظرها، وفجأة سمعت صوت "سميعة" أختي صارلي عمر ما شايفتها،وسمعتها تحاچي من ورا الباب
سميعه ـ لميعة! وشجابها؟ منو وياها
صباح ـ زهور وحليم وياهن جايات على نور، كعديها خالتها جاية عليها تشوفها قبل لا تروح للقريه.
سميعه ـ خير إن شاء الله..
لميعه ـ أني شجابني على هالمواقف؟
ضليت أكرظ بروحي، وأعلس بطارف عبايتي وسمعت صوت الباب انفتح ودخلت علينا "نور"سلابات الهدم وذابه روحها، والوجه مطعون قهر، والعيون كاظهن الحزن كأنهن بحر ناشف جنها ما نايمة الليل..
خنت حيلي أول ما شفتها يا يمه شصاير بيج؟
گمت عليها بسرعة ، خذيتها بحضني.. بس حضنها بارد ثلج حتى السلام ما بادلتني، حتى حضني ما ردته، كأني أحضن طيف، مو بنية من لحم ودم
نور ماما بيج شي؟ احچي ويايه، جاوبتني وهي منزلة راسها للگاع وصوتها واهن مثل الوحدة المريضة بمرض خبيث اسم الله الرحمٰن
نور ـ لا خاله ما بيه شيء لايضل بالج
لميعه ـ ما حجت بي عيونها گالت ألف شي
گالت گلبي ميت، گالت تعبانة من الدنيا كلها.
زهور ـ نور جايين عليج بطلب ومستعجلين وأمي وحبوبة ينتظرنا على نار
نور ـ گولن.. أني حاضرة.
لميعه ـ بلعت غصتي عليها وحچيتها گطع، نريد منج
تخابرين على نافع بلكي تكدرين ترجعينه، أمي گالت.. محد يرجعه للبيت غير نور".
نور ـ قافلة موبايلي بس أحاول، ميخالف
والله أحاول.
لميعه ـ مدت إيدها على موبايلها المطفي، وإيدها ترجف ، نور حبيبتي لا تقهرين روحج وتخلين بالي عندج، كافي عليه نافع وهمه.. ديري بالج على نفسج، وجاوبيني عود أريد أحچي وياج
نور ـ إن شاء الله خالة.
لميعه ـ يله حبيبتي أحنه لازم نمشي.. تأخرنا.
يله زهور، گومي.
زهور ـ لا تنسين نور خابري بلكي تكدرين تحچين وياه.
ولو هو قافل موبايله، مدري حبوبه دزتنا عليج، وگالت "بس نور تجيبه".
نور ـ أن شاء الله .
لميعه ـ وطلعنا من البيت وصلنا ونافع ما راجع انه خليت زهور تحجيلهن ودخلت أدك عليها ما جاوبتني دزتلي رساله
نور ـ خاله أتصلت عليه يحصل بس ما يفتح خط دزيتله رساله ووصلته أن شاء الله يشوفها ويرجعلكم بالسلامه
ـ نور ليش الرفض أجه منج مو من أهلج حاجيني ماما
ـ خاله بعدين هسه تعبانه وأريد أنام عندي أمتحان بعد يومين ومنا اللي صار نفسيتي زفت وكل تركيز ماكو
ـ براحتج ، عفت موبايلي ورحت عليهن كعدت وأمي تباوعلي
الحجيه عطايات ـ ها حاجيتيها مخابرته ما عرفتي منها يمت يجي
ـ كالت دازتله رساله لان ما يفتح عليها خط
ـ حقها لو ما يفتح الخط هي شخلت بي غير لو يجي وتشوفه عيوني سلب عافيتي علمود نويره والله الا ازوجه ست البنات أذا ما خليتها تنسي نويره وأهل نويره ودگتهم الناقصه وياه چا بس هي تكسر گلبه
ـ يمه لاهيج تحجين أنتِ ما تدرين بحالها والله لوتشوفينها تكول ما ميته اليوم الا من عام الاول الوجه مطعون والحزن كاظ عيوناتها مردتلي گلبي صوتها واهن وحضنتها ثلج .
سگتت ودمعتها نزلت غصب
ـ چا شبيدي عليها مو هذا التريده هي وأهلها ليش علگته بيها وخلته متعلل وراها ، خل يرد البيت وتشوفه عيني عگبها ترهم ..
وأنتِ شفتي أختج سلمتي عليها
زهور ـ لا حبوبه ولا وصلت
حربيه ـ صدك والله يعني ما أجتي عليجن سلمت
زهور ـ لا أبد .
الحجيه عطايات ـ چا عليمن أجتي رگدت عليَّ وسلمت وأنتِ خيتها وأول مره تروحين بيتها هاي شمالها تضل غشيمه وگلبها اسود .
لميعه ـ ما حجيت شعليه منها ، الله يسعدها عن نفسي ما عندي شيء وياها وكلبي ما يشيل حقد على أحد أكثر من أهلي ظلموني هساع أتفداهم بروحي
وللظهر ودخل علينا نافع يمه هلا هلا كامت عليه حبوبته وتبوس بي هو مثل الصنم وبارد وصاح على صفا
نافع ـ صفا حضريلي ملابسي بالحمام
الحجيه عطايات ـ گومي ولج ، يمه وين جنت دايح بالشوارع علمود نويره تستاهل هيج تسوي بينا وبرويحتك يحبوبه .
لـو ندري "نوره" التردك للبيت.. من زمان رحنا لها
وخليناها تحاچيك حتى ترجع لبيتك
لميعه ـ ما حچى ساكت، وكعد على التخم وبلش يفرك راسه بإيده، وجهه ذابل، وعينه غايرة، والتعب ناهي عافيته
رحت جبتله حبة وجع راس أخذها مني بلا ما يباوع
وخله راسه على التخم وغمض عيونه ذابل ذبول
خنت حيلي عليك يا نافع .
أمي گربت عليّ وشمت ملابسه ولوت حلگها وهي مزعوجة منه وجهها تغير أول ما وصلتها الريحة ..
وهو گام للحمام يسبح خطوته ثگيلة، وظهره محني
الحجية عطايات ـ أبنج داح يا حربية.. وأشك واهجس بگلبي صارله يومين كاظ الحرام.. لأن شميت بيه ريحة ماهي ريحته الطيبة ريحة تلعب الروح مو ريحة أولدي
حربية ـ ريحتيش يعمه؟ وكعتي گلبي يا حرام تحچين عنه! ريحة نسوان؟
الحجية عطايات ـ إي والله ريحة نسوان.. يعاقب روحه علمود وحده عافته وكسرت گلبه خل يطلع من الحمام والي حجايتين وياه وما أمش للقريه گبل لا أفض سالفته ..
لميعه ـ حربيه سگتت وضلت تلوب ومشعان دخل يسأل البنات على نافع وحربيه ركضت كعدت يم أمي
حربيه ـ عمه دخيلج لاتجيبن لمشعان طاري وتگوليله على شگچ بنافع والله ما يلفي البيت يطرد باليله ما بيها ضو گمر وأنتِ بس شاكه بي وأبني واعرفه ما يسويها يجوز ما مغير ملابسه صارله يومين هامل نفسه وبي ريحة عرك وشميتي بي .
لميعه ـ أمي سكتت وبلعت ريچها وغضت بصرها عن مشعان وعينها تگول لا تحچين، وگلبها يحترگ عليَّ
لميعه ـ مشعان أجه گعد وبلش يسأل
مشعان ـ ها وينه نافع وين چان دايح
الحجيه عطايات ـ على كيفك وياه توه رد
لميعه ـ وطلع نافع وشعره يكت ماي على گتوفه ووجهه طايح، عافنا كلنا وعينه بالأرض ودخل غرفته وسد الباب وراه بقوة.
مشعان هز راسه بقهر وضرب إيده على فخذه .
.. البيت سكت بس سكته ثگيلة
أمي تخفي عينها، وحربية كاتمة نفسها وأني بينهم بالنص وگلبي يغلي نار عليَّ وعلى نوره ..
______________
لينا ...
ـ واكفه أنتظر لبنى تحضرلي لفه عبالك طفله كل يوميه هالسالفه يله لبنى تأخرت هسه يجي ابو الخط يثولني بالهورن وسميعه تضل تحجي واني متحمله عليها انوم الجنطه برأسها .
لبنى ـ دصبرلي ، هاج واوكفي أنطيج مصرف وها فلوس ابو الخط تاخذيهن وياج لو على باجر لان بيهن نقص أنتظر جارتنا ام محمد تجيبلي .
ـ ليش ما أبويه يدفع كله أنتِ وراتب امي وينه لو بختها تشتري ذهب وتلبس هي وبنتها شفتي نور مشتريه كلادها جديده لابستها وأحنه قنادر مكطعه محد جايبلنا راتب أمي ما سلمنا عليه هذا اليوكع على مرت الاب
ـ امشي تأخرتي
ـ عفتها وطلعت ووصلنا بيت عمتي وطلعت صفا ها اليوم متحضره من وكت شعجب وركزت على وجهه يلمع والعطر فايح وين رايحه العرس شهل الخلقه شلاعبه بوجهج! أهلج ما شافوج من طلعتي
صفا ـ ماكو احد وملتهين طفرت عالسريع ، اكولج صارتلي شغله مستعجله حتى ما لحكت احجيلج عنها
ـ شُــنو هي؟
ـ أراس
ًـ شبي صخام
ـ لاتحچين عليه ما اقبل ، هسه أروح أشوفه واريدج تساعديني
ـ ما توبين أنتِ مو گتلج عوفيه تردين تبليني ما تخافين واحد من أخوانج يلكفج ويطين عيشتج
ـ صوتج ووجع فضحتينا وشسمويه يابه لاتصيرين مفتي برأسي عوفيني هسه تخربين عليه لحظات العمر
ـ من نكصف عمرج يا عمر صفا وستري علينا الله يستر عليج ووگت امتحانات التفتي على كتابتج .
ـ أهوو فضينا عاد ، شوفي هسه من نوصل المدرسة أني أنزل وياج بس ما ادخل المدرسه اغيب اليوم .
ـ لطمت على وجهي وين تولين يمصخمه الوجه ووكفت السياره ونزلنا وجريتها على صفحه وضغطت على لحم أيدها تعاي حاجيني وين توليين .
ـ أشوف أراس .. شبيج مو تعرفين بيه أحبه ويحبني بعد على شُـنو مستغربه
ـ لا والله ما مستغربه لان أنتِ ما تخافين ولا حاسبه حساب أحد تلعبين بكيفج ولا تفكرين بالعواقب وهسه جايتني كاشخه وتكوليلي اغيب شتصخمين بعمرج صفا
ـ اهوو دوخري أيدج شلعتي لحمي ، بعدين أحجيلج عود من تصير وگت الحله اجي وارجع وياج لاتخافين
ـ صدك تحجين ما تشاقين يعني
ـ عندي وگت اگعد أتشاقه وياج غير بطرانه ، أوكفي خل أشوفه وين صار.. كال يجي وتأخر
ـ رجعت لزمتها وانفض بيها صفا لاتتخبلين رجعي لعقلج لتتسويلنا سالفه الله عليج عوفي خيولي لو يحبج ما يجي من الباب مو يشوفج بالتختل .
ـ ترى ادري وهالجريده حافظتها ، يله أمشي أجه هذا هو شوفي شگد حلو، عليج الله شلونه ذوقي
ـ صفا رجعي الله عليج عوفي شكله مو راحه عينه مو عين حلال!
ـ كلشي ما بي هذا تفكيرج بالناس ، يله باي
ـ صفا صخام بوجهج ، الله عليج ولج صفا رجعيي
... چلبت بيها وجرت أيدها ومشت عليه بعد مسافه وفتحت الباب وصعدت سياره عاليه وراحت صفا ومشت السياره وضليت اني افر باذاني والله لو يدري بيج نافع كبل ذبح بس قبلها يذبحني وياج
اني شجايبني على هالسالفه شورطني لازم اشوفلها حل بس بالأول خل ترجع ومحد يحس عليها وننفضح
.. وهي وين ولت وياه معقوله خطفها ويضحك عليها ويشمرها فدمزبله لالا هي تسولف بي دائماً يحبها ،يا حب هذا بالتختل وعايفه دراستها ووگت أمتحانات خرب طيح الله حظچ يصفا ..
الله يعدي هاليوم على خير وما تصير مصيبه وتوكع برأسي لو هي مشت وياه وما فكرت لا بنفسها ولا بإهلها
دخلت المدرسه وبالي كله يمها حتى فكري طار من الامتحان والمدرسات سألن عليها سجلتها غياب وهي دايحه ويه هذا ما اعرف منين طلع إلها .
خلص الدوام وأني مية الف فكره أجتي أبالي متت من الخوف عليها دك الجرس ويه دگات گلبي عليها ومصيبه أذا ما رجعت مصيبه وكعت على رأسج يا لينا ..
طلعت المدرسه والسايق بعده ما جاي وعيني عالشارع انتظرها ولمحتها أجتي من الفرع خرب أجتي ركضت عليها الله يأخذج واخلص منج ومن سوالفج هاي سالفه تسوينه بيه وبعمرج أنتِ تردين تموتين لو خاطفج .
صفا ـ على كيفج أخذي نفس شبيج مو كتلج رحت وياه ولاتخافين هو ثقه وأمان طلعت وتونسنا وما خله شيء بنفسي .
ـ ما خله شيء بنفسج! ليش أنتِ شمحتاجته شو أهلج مدللينج وبعدين ما خفتي واحد من أخوانج لو عمامج شايفج وياه متفكرين أذا نلكفتي شيصير بيج نافع مو يذبحج .
ـ أهووو ترى راح تجي الامتحانات ونخلص وأضا محبوسه مثل الجلبه وما أشوفه بس هسه صارتلي فرصه
ـ ووين أخذج خوما اذاج أحجيلي صفا ترة گلبي راح يوكف من سوالفج .
ـ بعدين أحجيلج تعالي ابو الخط راح يجي اي سولفيلي منو سأل عني شأخذتوا اليوم وجاوبتي بالامتحان
ـ تحجي ولا مهتمه وأني كل بالي يمها وين راحت وياه وصفنت عليها هاي بليه سوده مو بنيه صركاعه على كولة سميعه .
صعدنا ويه أبو الخط وهي تمسح بخلقتها وأني صافنه عليها وعلى جرائتها ولكافتها ماكو هيج بنيه متخاف عدها كومه أخوان كل واحد يسوى راسها ما تفكر لا بيهم ولا بنفسها ...
طول الطريق هي تلغي وأني مصدومه على سالفة اليوم الصارت الهبطه بعدها بيه سوتلي سكر من الخوف ، لازم احاجيها ليش هي تاخذ بحجايتي ..
أحسن شيء أهددها بنافع بلكي تخاف منه وتتوب من سوالفها وتعوفه وتلتفت على أمتحاناتها ...
وصلنا البيتهم وقبل لاتنزل شفت نافع واكف يم الباب مثل الينتظرنا باوعتلها بخوف وهي بلعت ريگ ، نافع ينتظرچ .
