رواية ليتني واجهتك الجزء الثاني الفصل الثالث عشر
سدره اتكول
°°
راح التهي بروحي الناس ميفيدون
ماخسران والله الملتهي بروحه
بيهم ما يغزر اتعب الهم ليش
وآدم ماصخه ومتحب الملوحه
من اكماطي جبل ماهازني الكاروك
اموت وما اصير يوم مرجوحه
°°
شنو الي غاثكم من جيتي لتخافون
جبت طيبه كلب ما جايب اطروحه
واذا عن الطعن طعناتكم بريش
هذا انه اليدلي اللجمه بجروحه
سدره
اتخبلت من شفتهم يبجون كمت اصرخ بدون وعي نزل مختار يركض
مختار؛؛ اش صاير عمر كاعد اتصل بي ماكو
ابو سدره؛؛: الارهابيه اخذو تلعفر وبل الايمن همه هسا واخوك هناك يداوم ونتصل بي ماكو
اتخبلنا بس اندك على عمر ونبجي عبالك مات هذيجه الليله البيت انقلب عزه
كل اشويه نتصل بعمر وماكو مايرد اخر مره انتصل على موبايلو انقفل
ابو سدره؛: اش صار جاوب
سدره؛؛ بابا موبايل عمر انغلق
امي من سمعت هيجي كامت تضرب على راسها وتصرخ
ام سدره؛: رااح اخوكم مات ابني
سدره؛ماما الله يخليج لاتسوين هيجي كولي يالله
وكعت امي اغمي عليها ركضنا عليها انكعد بيها اشويه وكدرنا انكعدها ضلينا هذاك اليوم بس نبجي وندعي ربي يرجع عمر سالم حتى ويلادي كعدو على صوتنا
ماري؛؛ ماما يعني خالو ما يرجع بعد
سدره؛؛ لا ماما راح يرجع ان شاء الله
فاروق ؛؛ عمه
سدره؛؛ ها روح عمه
فاروق؛؛ خايف على بابا اذا بابا مات اموت بعدو اني
سدره؛: لايعمري لاحبيبي مايموت بابا
فرح ؛؛ يعني راح يرجع بابا
سدره؛؛ اي راح يرجع ان شاء الله بابا بطل
حضنتهم وبوستهم جانو حيييل خايفين على ابوهم وهو منو بينا ماخايف صهيب كل اشويه يتصل بيا اش صار من عمر ماكو خبر اخر شي اتصل كالي
صهيب؛: سدره اماني مسكها الوجع
سدره؛: انكردنا اش راح اتسوي طك ماي الراس
صهيب؛؛ اي طك وكاعده تبجي واتصرخ وين اخذها بهذا الليل
سدره؛: صهيب اسمعني زين انت راح اتولدها
صهيب؛: اش دا تحجين انتي
اني من هينا خايفه على عمر ومن هينا اماني الي هي اكثر من اختي جسمي كام يرجف وكمت اصيح على صهيب
سدره؛: ااااانت راح اتسويها صهيب لعد على شنووو دكتور
صهيب؛؛ سدره هاي اماني
سدره؛: اذا ماولدت هسا راح يموت الطفل لو نخسر اماني
صهيب؛؛ يالااا يالاا سدي اروح عليها
سدره؛: طمني صهيب
صهيب
جانو الوضع ابد مو زين وفجأة طلعو ناس من الجزيره مال تلعفر واتقدمو على تلعفر
اماني جانت ب شهرها وحييل اتخاف
صهيب؛؛ اماني لاتضلين جبانه مو زين
اماني؛: صهيب شنو هذوله ومنو
صهيب؛؛ هذوله نفسهم الي جانو يزرعون العبوات ويكتلون الشرطه والجيش
اماني؛: صهيب يعني راح انموت
صهيب؛؛ كولي يالله حبيبي شبيج
بس ترجف وخايفه وجنت خايف عليها لا من الخوف اتروح تولد
ماسكتني ماتقبل اتعوفني
صهيب؛: حبيبتي خلي اطلع اشوف امي وابويا خطيه
اماني ؛: اخاف لاتعوفني
صهيب؛؛ امشي انروح سوى
اماني؛؛ لا لا اخاف اطلع
صهيب؛: شلون يعني اماني لو تجين لو اتعوفني اطلع
اماني؛: لاروح بس لاتتاخر وجيب لولا يمي
صهيب؛؛ماشي
جبت لؤي من تختو وخليتو يمها وكمت رحت اشوف امي وابويا لكيتهم كاعدين على السجاده يدعون توني واكف احجي معاهم وسمعت اماني اتحرب (اتصرخ)
ركضت اشوفها شبيها وامي وابويا لحكوني
اماني؛: صهيييبب الحكني دا اجيب
صهيب؛: اماني اتحملي وين اخذج حتى مستشفى ماكو
اماني؛: ماكدر صهيب يااالله مادا اتحمللللل
ام صهيب؛؛ ياحبيبتي امونه كولي يالله
شفتها طاك ماي الراس شلون وين اخذها اني صح دكتور وممكن اكدر اسويها بس هاي مرتي وكلبي يوجعني عليها لهذا زحمه اتصلت ب سدره شنو اسوي وامي اتهدي بيها
سديت من سدره ورجعت على اماني
صهيب؛؛ اماني حبيبي سامحيني راح اسويها اني
اماني؛؛ ميخالف بس المهم انقذ بنتي الله يخليك لاتعوفها اتموت صههههيب
قويت كلبي وفحصتها وجان كلشي تمام لان خفت لابس وجع وماتكدر اتجيب طبيعي
ام صهيب؛؛ صهيب راح تكدر اتسويها
صهيب؛؛ اتوكلت على رب العالمين
اماني؛: سويها ميخالف الخاطر الله صهيب مابعد اتحمل
سميت بسم الله وبديت اعلم امي شنو اتسوي واني بديت اولدها جانت ولادتها صعبه
اماني؛: رااححح اموووت
صهيب؛؛ امانني راح تكتلين بنتنا ساعديني الله يخليج حياتي
مر وقت جثير يالا كدرت اطلع الطفله بس من طلعتها جانت مختنكه ومابجت
اماني؛؛ شبيها بنتي صهيب شبيها ليش مابجت
رفعت رجليها وراسها جوى وضربت على ظهرها واماني تبجي واتريد تعرف شنو شبيها
اماني؛؛ صهيبببب بنتي ماتت دخليك ربي لا بعد كل التعب اتروح مني ربي سدره ماما فدوه اتنفسي
بديت احاول واحسب الوقت وبعد محاولات جثير بجت من فرحتي بس امي اخذتها سجدت لله على سلامة بنتي ومرتي
اماني؛؛ عايشه بنتي عاشت
صهيب؛؛ اي حبيبتي عايشه
اماني؛؛الحمدالله ياربي شكرا يالله
كملت اماني
صهيب؛: بقت شغله بسيطه واتحملي
اماني؛؛ ههه هان كل الوجع من سمعتها تيجي
كلشي خلص تمام كمت غسلت وجيت على اماني حضنتها وبستها
اماني
شنو اوصف الي صار هذاك اليوم جان ابد موقليل معركه فوك راسنا والناس جاين ماعرف من وين
ومسكني وجع جانت لامستشفى ولانكدر نطلع اصلا
خطيه صهيب هو الي جيبني جنت اعرف مو سهله علىَ لان اني مرتو يمكن انتو اتشوفنا نحنا الاطباء كلبنا قوي وميت بس على الناس القريب علينا جدا صعبه وابد مو سهله
من شفت بنتي ماتبجي اسودت الدنيا بعيوني بس من سمعتها بجت احس روحي ردت كمل صهيب وجا حضني وباسني وجاب بنتي خلاها يمي اشتم ريحتها
اماني؛؛ سميتج سدره سميتج على الي اعز من اختي وصديقتي ربي يحفظج النا يابنتي ويجعل ايامج كلها خير وحظج يكون احسن من حض خالتج
ام صهيب؛: الحمدالله على سلامتح بنتي امونه
اماني؛؛ الله يسلمج عمه شكرا تعبتكم شكرا حبيبي لكه
صهيب؛؛حياتي انتي المهم انتي زينه
اماني؛؛زينه عمري ربي لايحرمني منكم وين لولا
صهيب؛: يم ابويا
كامت تبجي اخذتها عمتي لان ماجان عندي طاقه ارضعها كبل عمتي انطتها ممه
خطيه صهيب هو اهتم بملابسي ونظافتي عمتي رادت بس ماقبل ورتب فراشي وشكلي مغذي ونمت من التعب
سدره
ضل بالي حيييل يم اماني وكل اشويه جنت اتصل ب صهيب مايجاوب
ماكلت كدام امها جانت عدنا خطيه يضل بالها عليها
بعد صلاة الفجر دا اصلي ودك موبابلي خلصت وركضت على الموبايل رجعت دكيت على صهيب
سدره؛؛ الو صهيب بشرني
صهيب؛؛ الحمدالله جابت وضعهم زينه
سدره؛؛الف الحمدالله وعلى خير ماجاكم اخويا تترب بعزكم
صهيب؛: الله يسلمج ويخليج سدوره
سدره؛؛ وين اماني
صهيب؛؛ نايمه والله تعبت بلكي نكدر نعبر عليكم الوضع مو زين يمنا
سدره؛: يالله الله يفرجها
صهيب؛: عمر ماعرفتو شي عنو
سدره؛: لاوالله صهيب الى حد الان ماعرفنا شي
حجيت اشويه مع صهيب وسديت وكعدت اسبح وادعي دك الموبايل شفتو لكيت رقم علي دا يدك عليه اني من اتزوج حضرتو من كل البرامج ومسحت رقمو بس ضليت حافظتو
اترددت اجاوبو ضل يدك وفصل رجع دك مره ثانيه
جاوبتو
سدره؛؛ الوو
علي؛؛ شلونج سدره
سدره؛؛ منو
علي؛؛ حبيبج تعرفين صوتي كلش زين
سدره؛: احم شبيك
علي؛: عمر وين
سدره؛؛ مانعرف شي عنو
علي؛: ضل بالي يمو هيثم كالي يداوم بل الايمن
سدره؛؛ ماعرف علي اندك علىَ وماكو واخر شي غلقو والمشكله حتى تلفزيون ماضل حتى نشوف اش صاير قنوات الموصل انكطعت
علي؛؛ اي صحيح وكف البث ادعولو ان شاء الله ماكو شي بس هسا هو ب معركه مو مال يحجي بالموبايل
سدره؛؛ يارب يكون كلامك صحيح ويرجعنا كلوبنا نار
علي؛: ان شاء الله سدره اهل الايمن دا يطلعون يجون علينا حضرو اغراضكم وهم شي فلوس ومسمسكات لان راح نزح احتمال
سدره؛؛؛ان شاء الله بابا هم كال حضرنا
علي؛؛ الويلاد خمه خايفين
سدره؛: مايفتهمون بس يشوفنا نبجي على خالهم ويخافون
علي؛؛ ان شاء الله ماكو شي
حجى اشويه معايا وبعدها اني نهيت المكالمه معا ضلينا يومين حالتنا حال وماشايفين النوم وبس نبجي على عمر
بعد يومين الصبح كل الزلم واكف بره جاني طارق يركض
طارق؛؛ سدره سدره اماني جت
سدره؛؛: صحيح الله عليك
طارق؛؛ اي والله جت هي وصهيب وعمها وعمتها راحت لهلها
فتت اركض جبت حجاب وعبايه وطلعت على بيت اهل اماني ابوها ومعتز واخوتها الباقين واكفين بره دا ادك الباب
ابو اماني؛؛ فوتي بابا اختج جوى
فتت اركض على اماني دخلت لكيت يحضرون ريوك شفت اماني وكمت ابجي
سدره؛؛ ياروحي امونه الحمدالله على سلامتج
اماني؛؛ يعمري الله يسلمج لاتبجين
سدره؛؛ شلون كلبي والله ضل بالي يمج
اماني؛؛ الحمدالله وضعي زين وشوفي سدره الاصغيره اشكد حلوه
سدره؛: يعمري يعمري شنو هذا الجمال مشاء الله ربي يحفظها اخذتها بحضني شميت عطرها ابد مايجي من كلبي ابوس طفل جاي لدنيا جديد حتى ويلادي جنت ابوسهم من ايدهم سلمت على اهل صهيب
سدره؛؛ اشو صهيب ماكو
اماني؛؛ خطيه مانام صارلو يومين
بل استقبال متمدد هو وعمي
رحت فتحت الباب لكيت امخلي ايدو على عيونو ويشخر من التعب كن مشو جثير من تلعفر الي جانب الايسر تعب موت
بطرف الحجاب مالي اسوي على خشمو ويكوم يحك خشمو وارجع اسوي مره ثانيه بزعتو هههه اخر شي صحى
صهيب؛؛خرب بنصج اي والله عبالي ذبان ماتخلين واحد ينام انتي
سدره؛: ههههه كوم عليش اتنام
صهيب؛؛ ولي تعبان من المشي والله
سدره؛: دكوم صاير دكتور نسائي
صهيب؛: يمكن راح اتخصص بهذا المجال
سدره؛؛ ههههه لازم عجبتك الشغله
صهيب؛؛هههه شلونج
سدره!؛ الحمدالله كوم بره نكعد لاابوك يكعد
صهيب؛: يالا كمت
كام صهيب وطلعنا لصاله خلو الريوك وصيحو الويلاد وابو اماني وكعدت اتريكت معاهم
مشت الثلاث ايام وعمر ماكو اختفى كعدين الكل بل استقبال بيت اهل اماني واهل صهيب وبيت عمي ابو هيثم والبيت مليان
وامي منهاره تبجي وابويا فدمره رايحين بيها
كل اشويه تخربط امي
مختار والويلاد واكفين بره كالو الموصل كلها سقطت والجيش ماضل احد بالموصل صارت بيد الجماعه الارهابيه
انهارينا كمنا نبجي اعصابنا تعبت
ابوهثيم؛؛ يالاااا نحنا مالازم انضل بالموصل لازم نطلع منها
ابو سدره؛؛ اني ماعوف مكاني اذا ماابني يرجعلي
ابو هيثم؛ يااخويا كول يالله بلكي ابنك طلع حالو حال هذا الجيش الي طلع
ابو سدره؛؛ هو حافظ ارقمنا يكدر يتصل بينا لو عايش بس ابني بي شي
ابو صهيب؛؛ كول يالله ابو عمر اشجالك انت رجال
ام سدره؛؛ دخليلك ربي شبيها المصايب تنزل على راسنا مثل المطر انخلص من شغله ونكع ب شغله لطفك ربي لطفك ورحمتك رجعلي ابني يارب
ابو اماني؛؛ هذا امتحان واختبار من رب العالمين
اسراء انهارت فدمره اعصابها كلها ترجف وتبجي ماتقبل حتى الماي تشربو
سدره؛: كااافي اتسوين هيجي بروحج عمر مثل مارجلج اخويا
اسراء؛؛ عمر بي شي اكيد بي شي ليش موبايلو مغلق الموصل سقطت سدره سقطت تعرفين يعني شنو
منين طلعو هذوله منين اجوي مو جنه عايشين
سدره؛؛ كاافي اسو دحكي على ويلادج خطيه يبجون عليج وخايفين على ابوهم
حضنت ويلادها وتبجي ماحس الا مختار وصهيب والويلاد ماسكين عمر ودخلو كلنا كمنا نصرخ ركضنا علىَ نحضنو ونبوس بي
معتز ؛؛؛ ابتعدو الخاطر الله متصاوب
دحكت على عمر رجلو متصاوب بيها
صهيب؛؛ سدره لازم انطلع الطلقه من رجل عمر قبل ماتاذي
دخلنا على غرفة الجوى ونحنا الحمدالله عدنا ادوات بس البنج ماعدنا
اني جنت مسويه صندوق مال اسعافات أولية بالبيت صغير مخليه كلشي بي
سدره؛؛ انسويها بدون بنج
اماني؛! سدره خلي نجازف خلي نطلعها لاتدخل اكثر واتاذي
صهيب؛؛ اذا حركنا اكثر ممكن اتاذي الطلقه على اقل اطلعها
اماني؛؛. اذا صار نزيف
سدره؛؛ ماراح يصير شي ان شاء الله
بدينا انسوي العمليه اني وصهيب واماني
سدره؛؛ عموري حبيبي لازم تحمل الوجع
هيثم؛: امسك ايدو
سدره!؛: ماراح تحمل راح يضغط على ايدك قوي
هثيم؛: مامشكله
هيثم مسك ايد عمر وخليت خاولي بحلكو وبدينا نشتغل عمر ضل يتحمل
وجه هيثم صار احمر دم اشكد ماعمر ضغط على ايدو دحكت على عمر اغمي علىَ طلعنا الطلقه وكفنا النزيف الحمدالله جانت الطلقه مو جوى كلش
اماني خلتلو مغذي وكملنا وطلعنا غسلنا وجينا
سدره؛: لازم نطلع من الموصل
ابو سدره؛: وين انروح
سدره؛؛ انروح لاربيل لدهوك
ابو سدره؛؛ يالا عجل كومو
طلعت فوك سحبت الجنطه مال سفر وخليت بيها كم غرض من ملابس حسوني وماري وملابسي وذهبي وذهب ماري والفلوس ماتركت شي ونزلت
هينا بدت ضو الشمس يطلع ونحنا نركض ركض قبل ماتطلع الشمس لازم انهزم عمر
الويلاد شالو عمر شيل وركبنا بالسيارة مددنا بسيارة مالتي من ورى ومختار يسوق واني كاعده يمو والباقين راحو ب سيارة بابا
طلعنا بالطريق خابرت علي
سدره؛: الو ها ابو حسوني شلونك
علي؛: هلا سدره طمنيني على عمر
سدره؛؛ عمر رجع الحمدالله بس متصاوب وطالعين لاربيل هسا نحنا بس على مود الويلاد اخذتهم نسيت اكولك
علي؛؛ مامشكله عيني انشوف شلون اتصير
سدره؛: ماراح تطلعون
علي؛:امبله هسا راح نطلع .....
جانت الدنيا مقلوبه وشفت الد... اعش بعيوني يخوفون حيييل متت خوف العالم خطيه كلها تمشي مشي ومنظر الاطفال جان هذاك اليوم الموصل كلشي بيها يبجي حتى حيطانها سماها وارضها
كدرنا نطلع بخير وسلامه من الموصل وصلنا سيطره اربيل واتكول يوم القيامه الناس مكلوبه قلب
نزلنا من السيارات جنه كلنا بوكتها طالعين عفنا كلشي ومشينا
رحت اشوف رجل عمر لكيتها تنزف كل هذا وعمر فاقد شفتو يون جيت خليت ايدي على كصتو لكيتها نار مصخن
مختار؛: شلونو
سدره؛: مو زين ابد لازم ندخل لاربيل
صهيب؛: مادا اتشوفين مادا يدخلون احد
سدره؛: انروح نحجي مع الضابط
ابو سدره؛: مايخلونا احد يدخل يكولون ماجانا امر ادخل النازحين لاقليم
سدره؛؛ هسا ليش هيجي ماكافي ضيم الله استغفرالله وانوب علينا هذوله
ابو اماني؛: ميخالف عمو سدره اصبري
سدره؛: اني اصبر بس عمر مالازم يضل هيجي بعدو فاقد راح يدخل بغيبوبه اذا ضل على هاي الحاله اني راح اروح احجي مع الضابط
معتز؛: يعني همه بين كل هاي الناس راح يكولولج صار
سدره؛؛ اني اخويا عسكري ولازم يخلونو شنو بكيفهم
هيثم؛؛ اذا مايجيهم قرار من كاك مسعود مايفتحون السيطره ترى هسا مره ولدت بل سياره ومادخلوها
سدره؛: مالي دخل لازم اروح
اصريت انروح اخذت بابا وصهيب معايا ودخلنا لضابط سلمت علىَ وبديتو احجيلو عن عمر بالبدايه رفض حاولنا كلنا بابا وصهيب بس ماقبل
سدره؛: اذا مامصدكني تعال معايا وهاي هويتو هو ضابط واني هاي هم هويتي اني دكتوره
ونحنا لو مانعرف الامانه عندكم مانجي عليكم
حجينا معا وافق يجي شاف عمر ودحك علينا
الضابط... مامشكله نخابر الاسعاف تجي تاخذه بس محد يدخل معا
سدره... بس مانكدر نعوفو وحدو بما انو اكو اطباء معا ماتكدر تمنعنا ندخل لان انت تعرف الاطباء اي مكان يدخلون محد يمنعهم هذا الشي موجود بكل قانون الدول حتى القاضي الي عنده سلطه على افراد المجمتع والدوله يحترم الطبيب
ضابط؛؛ تمام شخص واحد يدخل والباقين ينتظر
سدره؛: ماشي بس هاي زوجتو واطفالو لازم يدخلون
ضابط؛؛ موافق
ماقبلت احد غيري يروح مع عمر وهم بابا كال روحي لان انتي تعرفين بوضوعو اكثر من عدنا
ضمدنا رجل عمر وركبت بالسياره واسو يمي هيا ويلادها
كل ظني هسا راح يفتحون الطريق ويدخلون اهلي
عفت ويلادي يم ماما
سدره؛؛ ماما الله يوفقج دير بالج على ويلادي
ام سدره؛؛ روحي امي الله يسهلكم
شغلت السياره ومشيت بيها عبرت سيطره اربيل وسحبت نفس الحمدالله طلعت بوجهي لمستشفى
واول من وصلت المستشفى طلبت المساعده ركضو عليه اخذو عمر وخلو على السديه ودخلو جوى لمستشفى
دخلو على العمليات وشرحت لطبيب شنو صار معا كعدت على كرسي ورجعت راسي ليورى شربت ماي وجريت نفس ارتاحيت
اشويه وطلع الدكتور حجيت معا وطمني على وضع عمر مستقر وخلو بالعنايه المركز لان نزف جثير
شفنا اني واسراء بعدو ماصحى اتصلت ب بابا وبشرتو على وضع عمر
بس الي قهرني بابا كالي رجعنا كلنا على بيوتنا بس عمج ضل ماقبل يرجع حييل انقهرت شلون يرجعون
ابو سدره؛؛ يابابا مايقبلون يدخلونا شنو انسوي رجعنا على بيوتنا وعفنها على رب العالمين
سدره؛؛ واني شلون ويلادي
ابو سدره؛؛ خلي عمر يصير زين وان شاء الله نكدر انجيبهم لو انتي تجين
سدره؛؛ ماشي بابا بس الله يخليكم ديرو بالكم عليهم
ابو سدره؛؛ ادللي حياتي
سديت من بابا ورحت اشتريت اكل ورجعت لان محد بينا ماكل
كدرنا ناكل اني واسو وطعمنا ويلاد عمر اشويه وعمر صحى دخلت اشوفه اتقدمت علىَ بستو
سدره؛؛ شلونك حبيبي
هز براسو وجان حييل ضايج
عمر؛؛ الموصل راحت
سدره؛؛ راح ترجع بزودكم وبزود الابطال
عمر؛؛ وين اهلي
سدره؛؛ الكراد ماخلونا ندخل ب سبب ماجا قرار من كاك مسعود النازحين يدخلون وحجينا مع الضابط كام دخلنابس اني وانت واسراء وويلادك
عمر؛؛؛ اشكرج حياتي سدوره
سدره؛؛ حبيبي انت اخويا المهم اتصير زين
عمر؛؛ وين ويلادي واسراء اريد اشوفهم
سدره؛؛ هسا راح اطلع وهمه يدخلون
بستو وطلعت كلت لاسراء ودخلت هي والويلاد ادحك عليهم من الشباك اسراء تبجي وويلاد عمر حاضنينو ويبجون على ابوهم عفتهم ورحت كعدت اتصلت بعلي
علي؛:هلا يابا
سدره؛؛ هلا بيك ها وين صرتو طلعتو
علي؛: بالناحيه النمرود
سدره؛؛ ليش
علي؛: رحنا لسيطرة اربيل ورجعونا انتي وينج
سدره؛؛ اني ب اربيل دخلونا اني وعمر ومرتو لان وضعو مو زين بس اهلي رجعو وعمي ابو هيثم بالسيطره ضال
علي؛: يالا المهم عمر خلص
سددره؛؛اي الحمدالله بس عفت ويلادي يم امي وخايفه لا ماكدر ارجع لموصل مايتحملوني بدوني ولااني
علي !؛لا ماكو شي ان شاء الله تكدرين تجين
ضلينا اربع ايام بل مستشفى وبعدها طلعونا ب هاي الفتره العرب كدرو يدخلون لاربيل
اشكد خابرت بابا واتصلت بي يكولي الوضع امان وعلي نفس شي يكول عليش اطلع
نفس اليوم الي دخلنا مستشفى حجزت بالفندق واخذت اسراء ويلاد عمر لفندق يرتاحون....
طلعنا ورحنا لفندق بين ماعمر يرتاح ويصير زين اتصلت بهيثم والتقينا وخطيه هم بالفندق همه
طلعنا اندور على بيت لايجار وجانت ايجارات كلش غاليه
ضلينا اندور اخر شي لكينا بيوت اثنين بس اشويه بعيد عن الثاني صح جانت اجارتهم غاليه بس واحد مجبور
اجرنا البيوت ورحنا لسوك اني وهيثم اخذنا طباخات اثنين وفراش وتخت لعمر وماعونين وشغلات ضروري ورجعنا لبيت اني ونور ومرت هيثم نظفنا البيوت وخلينا الاغراض نور هي وزوجها سكنو بالطابق الثاني وبيت عمي جوى
ورتبنا بيت عمر هم واخذتهم من الفندق ورجعنا لبيت
ضليت ايام معاهم بعدها قررت ارجع ل ويلادي خطيه وعلي خابرني كال راح اخذهم عندي
اخذهم واني ماريد يضلون يم سلوى ودعت عمر واسراء وبيت عمي وعفت سيارتي يم عمر
عمر؛: حاولي اتجيبين اهلي وتطلعون لاتضلون بالموصل
سدره؛؛ ان شاء الله راح نجي
عمر؛؛ سدره
سدره؛؛ ها اخويا
عمر؛؛ لاتنطون ثقه لاحد ولاتختلطون مع احد حتى الناس الي جنتو تعرفهم لاتحجون شي كدامهم ديرو بالكم
سدره؛: اي صار
بوستهم وطلعت رجعت لموصل وصلت ومتت خوف شفت كدامي الدواعش كمت ارجف جان شكلهم يخوف حيييل شعرهم لحيتهم ملابسهم اضخام السلاح الي شايلينو ب يدهم يرعب اكبر واحد
وصلت منطقتنا ونزلت دكيت الباب طلعلي طارق كبل حضني كام يبوس بيا
طارق؛: سدوره الحمدالله على سلامتج
سدره؛؛ الله يسلمك حبيبي
طارق؛: شلون صار عمر
سدره!؛؛ زين الحمدالله
دخلت جوى وامي ميته خوف شلون جيت سلمت عليهم ويسالوني على عمر
طلعت فوك سبحت وبدلت ونزلت جوى كعدنا نتغده
سدره؛: بابا مانطلع من الموصل
ابو سدره؛: عليش نطلع يابا نكعد ب بيتنا ونسكت وين انروح وتبهدل
سدره؛: بس عمر اجر بيت ونكعد مع عمر
ابو سدره؛؛بنتي هذا بيتي وتعب العمر اطلع واعوفو لناس مايخافون الله اذا اتريدين انتي اخذ ويلاج وروحي لخوج
سدره؛؛اي اني اريد اطلع راح اشوف ابوهم اذا قبل اخذهم واروح
ابو سدره؛:خير ان شاء الله
كملت وطلعت فوك حجيت مع علي ماقبل كال اني ماكدر بدون ويلادي لحيت علىَ رفض واني هم من شفت هيجي شلت فكرة الروحه من بالي تمامآ وبليل محمد هو وميس جابو ويلادي ...
مرت ايام واسماء اختي هم طلعت وراحت لاربيل سكنت مع عمر بالبدايه صارو الدواعش يحجون ويكولون نحنا جينا حتى نطبق شرع رب العالمين وصارو يجبون دليل من القران
بس ماجنت مقتنعه ابد لو همه صدك يطبقون شرع رب العالمين ماقتلو الشرطه والجيش
بعض العالم صارت اتحبهم خصوصه من كالو خلي كل واحد عندو بالشرطه او الجيش يجي يسوي توبه ونطي ورقه محد يتعرضلو
اتصلت بعمر جانت الشبكه اكو ونت اكو بعد مامكطعو
بعد السلام كلت لعمر
سدره::عمر تعال ارجع
عمر؛: ليش حتى ارجع
سدره؛: الد.له الاس..مه يكولون خلي كل واحد بل جيش وشرطه يجي يسوي توبه ومحد يتعرضلك
عمر؛: اي وانتي صدكتي
سدره؛؛؛ احسن مو هناك ومتشرد
عمر؛؛ وظيفتي وتعب عمري والبعد كلها يروح على مود اجي اعيش تحت رحمه الدوله الا اسلاميه سدره حبيبتي اختي هاي جاين يصفون اسماء حتى يعرفون اشكم واحد منتسب
سدره؛: يعني انت هيجي رايك
عمر؛: هذا مو رايي هذا الي هو راح يصير وكولي كال اخويا بعدين اني ان شاء الله اصير زين وارجع لوظيفتي واخاف يصير مايصير انتو متبرين من عندي
سدره؛؛ ماشي
عمر؛: بس لو ابويا يطلع
سدره؛؛مايقبل حاولنا جثير معا يكول روحو واني اضل وحدي بالبيت
عمر؛: اخخ يا ابويا اشكد عنودي
سدره؛: اي والله
صار رمضان وهذا اول رمضان يمر علينا حزين وماكو لا اسماء ولاعمر بدو الد.. اعش يفجرون المساجد اتخبلنا بجينا ب يومها حييل فجرو جامع النبي يونس عليه السلام
العالم حييل انقهرت خصوصه من شفنا المصحف شلون تطايرت من فجرو الجامع
عرفنا واتاكدنا هذوله ناس جاين يحطمون الاسلام ماجاين ينشر شي عن الاسلام حشا الدين متبري منهم
باليل جنت كاعده وضايجه من الوضع الي كاعدين انعيشو اريد اطلع بس ويلادي أتصلت ب علي
سدره؛:شلونك علي
علي؛: هلا وغلا شلونج عيني
سدره؛: زينه ومو زينه
علي؛؛ ليش يابا مو زينه شبيج
سدره؛؛ اريد اطلع من الموصل واخذ ويلادي
علي؛: سدره هاي حرب والله اعلم اشكد راح اتضل ياترى سنه سنتين عشر سنوات اني الاسبوع على مايمر روحي تطلع ياعيني
سدره؛؛ بس اني هم امهم من حقي
علي؛:اعذريني بهاي ماكدر
سدره؛؛هاي كم مره كتلك ورفضت
علي؛؛ مو من عادتج ماتفتهمين عليه دا اكولج ويلادي ماكدر بدونهم
سدره؛؛على اساس انت جثير تفتهم عليه وانت ليش ماتطلع
علي؛؛ اني ماعوف امي وابويا اكبار والبنات طلعو وحمودي يريد يطلع اني هم اعوفهم واطلع شلون صايره
سدره؛: وليش عمي وعمتي مايطلعون
علي؛؛ عمج اخخخ من عمج دمر حياتي ليش يسمع كلام مايقبل يعوف البيت يكول اني عايش على ذكريات اخوكم بهذا البيت
سدره؛؛ بابا هم نفس الشي مايقبل يعوف البيت
علي؛: بابا؟
سدره؛؛ اي بابا لعد شنو اكول
علي؛؛ انعل ابوها لبابا الي تطلع من حلكج
جتني الضحكه وعضيت شفتي حتى لايسمعني
علي؛: عليش تضحكين
سدره؛؛ ههههه هيجي والله
علي؛:دخيل ربج على هاي النزاكه خمه مثل الي عندي عباس ابو الشربت
يمه هو كال هيجي واني غصيت بالضحك
سدره؛؛ههههههههه والله اتموت عليها
علي؛؛ ههههه شنو شنو
جريت حسره وكتلو
سدره؛؛ كتلك والله اتموت عليها
علي؛؛ بس لاتحلفين الله اني حتى نفسي ماحبها
سدره؛: همم نفسو مايحبها
علي؛؛اني حبيت من طفولتي وحده ماتصير اثنين
سدره؛؛ اش كلت على مود الويلاد
علي؛؛ اي اي غيري الموضوع
سدره؛؛ عفيه دخليني اخذهم
علي؛؛سدره اني اكدر بدون ماري ام لسان لو حسوني الفقير كولي يالله مايصير شي ان شاء الله لاتضلين جبانه همه يكتلون بس الي يكف بوجهم
سدره؛؛ وعمر ليش ضربو
علي؛: مو عمر جان يلعب توكي معاهم ههههه غير جان واكف بوجهم
سدره؛؛ هههه اي خطيه والله حييل اتاذه مايقبل يجي يسوي توبه يكول جذب هاي تصفيه لاسماء
علي؛: يمعود الي كاتبو الله يصير اني سويت
سدره؛: ليش انت هم عليش
علي؛: شلون لعد مو اعلامي
سدره؛: ليش شبيهم الاعلامين
علي؛: هم يعتبر عندهم مرتد على كولتهم واسلمت لان الاعلامين ينشرون اخبار عليهم ويحجون ضدهم لهذا السبب عرفتي شلون
سدره؛؛ اي افتهمت زين مو خطر عليك اتضل بالموصل
علي؛؛ همه كالو مادام عندك كتاب مال توبه محد ياذيك ونشوف شلون اتصير
سدره؛؛ يعني ويلادي
علي؛: لا سدره ماكدر افتهمي بس اخذيها وعد مني اذا شفت خطر عليه راح اطلع وقبل ماطلع اطلعكم امن عليكم بس هسا ماكدر ويلادي
سدره؛؛ هاي هي براحتك
علي؛؛ يسلم راحتج يابا بعد راحتي
سدره؛؛ راح اروح اني
علي؛: سدره
سدره؛؛ همم
علي؛؛ ليش تريدين بس تنهزمين مني
سدره؛؛ بنت عمك اتفيدك احسن
علي؛: منو يكول
سدره؛؛ عشت مادام عشت بعد سدره وعدك كلو طلع جذب
علي؛: بس انتي تعرفين شنو الي صار
سدره؛؛ ابوك مات شي
علي؛؛ لا
سدره؛؛ انت شنو كتلي قبل اشويه عن القدر؟
علي؛: كتلج الي كاتبو الله هو يصير
سدره!؛ وهم لو ماكن عفتني وماكن تزوجت هم ابوك ماجان مات لان الي كاتبو الله يصير ياابو حسين
سمعتو جر حسره وسكت
سدره؛؛ اشوفك سكتت ماعندك جواب
علي؛؛ لان كلامج صحيح بس
سدره؛: الله يخليك اريد انام تعبانه
علي... سدره
سدره.. وياك
علي...سامعه حسين البصري شنو يكول
سدره... ماريد اسمعه
علي... يعني سامعتها
سدره... اممم
علي.... كوة، كوة جبرونا نتفارك كوة، كوة
وأنا وياها من المحبة صرنا إلهم أحلى غنوة
صار يغنيها واني ماتحملت صرت ابجي اسمعه ودموعي تنزل الي حد ماوصل
علي.... جنت أحبها وهي تحبني والعشك لايك علينا، والعشك لايك علينا
جانت تسميني حبيبي وأنا أسميها الحنينة، أنا أسميها الحنينة
واللي جبرونا نتفارك وياهم إحنا شجنينا،
أنا بديرة وهي بديرة كلبي بحيرة وهي بحيرة
ويرجع يكول ب بارت ثاني من الاغنيه
علي... ضيعتج يافلانه مثل طفل مضيع امه
مثل طفل مضيع امه
يذكر ايامه بكربها
بشوك وبلهفه وتشمه
بشوك وبلهفه وتشمه
ماتحملت زدت بالبجي وطلعت شهكه مني
علي... سدره ياكلبي انتي الله عليج لاتبجين
سدره... شتريد شتريد مني راجع هسا انت عشت حياتك واني عشتها
علي... والله محد بينا الي عايش والله
سدره... لا علي انت عشت عشت واتخليت انت حتى ماوكفت معايا واني جاي اجيب ابني وهو ميت ب بطني صرخت كومه باسمك وماشفتك يمي
علي.... ماجان عندي عين اشوفج
سكتنا اثنينا بعدها كال
علي... ولاتكولين انت تزوجت وعشت والله كل نسوان الدنيا ماتعوضني عنج الحب والدلال الي شفته منج ماكدرت اشوفه بمره ثانيه
سدره... اي صح والدليل ماصدكت على الله سلوى تسوي فضحيه حتى تاخذها خلص كاافي اريد انام
علي... تعالي لاتروحين منو كالج عبير
سدره... اممم
علي... كالتلي شفتها.. سدره والله العظيم انتي ماجنتي تعرفين الوقف الي اني صرت بي سدره بكل عين وقحه يكولولي حسين وماري مو ويلادك
وانت مو رجال يعني اي شخص بالدنيا لو مو يحب مرتو لو يعبدها استغفرالله من يمس برجوليته ماراح يسكت
وفوكها يطعنون بيج كدامي وانتي الشريفه شلون اقبلها
لاتكولين ماصدكت تذكرين يوم عرسنا شلون اخذتج واني ضامج بحضني وخايف عليج وهي من اخذتها والله من كمت بصقت عليها ومشيت
سحبت نفس ومسحت دموعي
سدره.... لاتبرر مايهمني الموضوع
علي؛؛ والله افراكج ماجان سهل عندي
سدره؛؛ امبله سهل وحييل سهل من خليتها بحضنك من عشت معاها علاقه كامله ونسيت حب طفولتك
اختنكت بغصتي وصرت احجي بالكوه اطلع الكلمه
سدره:؛ شلون جا من كلبك فهمني شلون نسيت سدره نسيت حبها حنانها ماتذكرتني من شميتها من ضميتها زين كدرت اتصير معاها حنون مو جانت حنيتك بس لقزومتك نسيت سدره ياحبيبي
من كتلو ياحبيبي بعد ماتحمل كمت ابجي واسمعو هو هم يبجي
سدره؛: راح يجي يوم وانساك وعد عليه هذا مثل ماجيت وبست ايدك اتعوفها وسديت بابك بوجهي ومشيت وعفتني راح يجي يوم واسد بابي بوجهك وانساك كون على يقين ياعلي كون على يقين
ماتحملت سديت التلفون وابجي واشهك
رفعت ايدي ادحك على المحبس الي بيدي الي جابو علي ب ولادة ماري واكول اي ياعلي ضليت بس ذكرى ماتنسي طول العمر ايامي جانت حلوه معاك ليش هيجي اتغيرنا وكل واحد صار بينا يبتعد عن الثاني
شلت الغطا عني ونزلت جوى امشي وامسح بدموعي غطيت ويلادي زين ونزلت لحديقه اشتم اشويه هوى اختنكت
ها كاعده
انت اش دا اتسوي هينا
الي جابج جابني
ضميرك
سدره تعبت مليت ضميري موتني مادا اعرف انام اليل اني السبب بكلشي صار
مع الاسف هاي الحقيقه يامختار انت السبب بكلشي صار بينا وماكدر اجاملك بشي
ماحسيت غير صار انزال على بيتنا وداعش كلبو الدنيا ب بيتنا كمت ارجف اريد اركض فوك ويلادي
الداعشي ؛ وين المرتد عمر
سدره؛: ما ما نعرف
الداعشي ؛؛ من هينا ثلاث ايام اذا ماجا سلم نفسو البيت يصادر يالا حجي امشو
اني ارجف وميته من الخوف بس واحد منهم عرفتو من عيونو اي هو متاكده اني هو اعرفو مانسى مانسى صورتو ابد هذا الي دمر حياتي اني انتبهت علىَ اعرفو هذا صديق الطفوله شلون انسى شكلو جان ملثم بس عرفتو من عيونو
طلعو من البيت بدون تفتيش ومختار يحضن بيا ويهديني واني ابجي الى متى انضل تحت رحمه دا.. عش
بين صدمة دا.. عش وبين صدمة الشخص الي شفت عيونو
بكلبي دخيلك ربي يطلع توقيعي غلط دخيلك ربي حياتي انهجمت راس على عقل ماريد يطلع عايش لا سدره لاسدره كذبي حساسج عبدالله مات عبدالله صارلو سنوات ماكو من عندو اي خبر مات عبدالله ماراح يرجع لحيااتي من جديد مستحيل ابد ابد ..
