رواية فصلية ولكن الفصل الثالث عشر بقلم سوزان ليث
صارت ساعه بالتسعه جنا كاعدين كلنا دنسولف ونحجي ودك تليفون خالتي وجان خالد وخالتي سمعته ها يمه اي لعد ظل لاتجي غير جو حبيب وسدته اني ظليت احوص ندارت عليه خالتي
خالة: اليوم خالد يبقى بغداد
حياة: ليش هو بغداد
خالة: اي يكول الولد رايدين يرحون لبغداد يغيرون جو ورايح وياهم
حياة: شوكت يرجع ساعه بتسعه
خالة: لايمه حيبقى بغداد يم واحد من اصدقائه
حياة: اني كلش ضجت يعني شنو رايح لبغداد ويبات هناك وبالجذب مخابرني ولا حتى دزلي مسج كمت افور ورحت لغرفتي ظليت بس ادردم ويه نفسي واحس نفسي حنفجر
خالد : التقيت ويه جماعتي وطخت بالنا نروح لبغداد وصدك طلعنا لبغداد وصلنا العصر تغدينا وطلعنا على ولد صديقنا كاعد وحده بغداد اهله بالعماره رحنا يمه سوالف وضحك محسيت عالوقت شلت تليفون كلت خلي اكوللهم اني بغداد فتحت خابرت امي كلتلها وراها كلت اخابر حياة بس الولد ظلو يسولفون والتهيت وياهم وهذا سلام كوم روح جيب بنات النا على اساس يونسنا اني طبعا كلش استحرم من هاي سوالف كمت احجي عليهم بس جماعتي كالو شعليك انت احنا ريدهن كمت طلعت بطرمه كلت خل اخابر حياة دكيت عليها هي جاوبتني
الو
حمدلله عالسلامه شونها بغداد
زينه سلم عليج
ليش مكلت حتروح لبغداد
والله موبالي بس الولد فجاة طلعت براسهم بغداد
وين انت هسه
يم ولد صاحبي
وشدسوي يمه
شون ويه تحقيق ماتج
حياة: داحجي وياه وسمعت صوت بنيه يمه وفجاة راح
هاي منيه الحجت
طبعا سكت وحجه .. وحدة
حياة: اعرف وحده منيه هاي
خالد: شلج علاقه انتي بويه روحي نامي يله
حياة: ماروح الا دكلي انت وين وشدسوي
خالد: ولج داكلج يم صديقي شبيج
حياة: وليش هاي البنيه يمكم
خالد: لا مو بس هاي اكو اثنين جوه
حياة: ظليت ساكته مصدومه حتى محاول يجذبني ويكلي متوهمه ..
خالد: بعد رايده تعرفين شي
حياة: لا ماريد روح يمهن وسديت التليفون بوجهه
خالد: رجعت يم الولد وكلسع وحده جايه لازكه بيه وصايح عليهن يوخرن ظلينا كاعدين نسولف ونضحك بس بالي يم حياة ونوب كلسع اذكر بارحه شون جانت نايمه يمي واني اشم وابوس بيها اشتاقيتلها كلش
حياة: وره مسديت التليفون واني اللوب ماعرف اريد انفجر من العصبيه ودمعه بطارف عيني بس واحد يكلي شبيج ابجي وكلسع اكول هسه كاعد يسوي هسه اكيد نايم ويه وحده وافكار كومه يربي ليش هيج معقوله كلامه الي بارحه كذب مددت عالجربايه بس اني احس نفسي صايره نار بحيث كمت طلعت بجامه خفيفه لبستها احتريت ورحت انام ظليت اتكلب وافكر واتخيل خالد شديسوي وكلسع الزم تليفوني اريد اخابره واتراجع نمت وحسيت على صلاه الفجر كمت اتوضيت وصليت بعدني عالسجاده نفتحت الباب وفات خالد اني ظليت صافنه عليه
خالد: صباح الخير
حياة: ظليت ساكته ماعرف اجاوبه لو لا لان ضايجه منه نداريت وعفته كملت دعائي وتسبيح وكمت هو جان دينزع ملابسه
خالد: متحملت ابقى بغداد لان اشتاقيت لحياة كلش عفت جماعتي ورجعت وصلت الفجر للبيت فتت لكيت امي دصلي سلمت عليها وفتت لحياة لكيتها دصلي بس ظلت متفاجئه بيه من شافتني
حياة: مجنت متوقعه حيرجع اصلا رحت مددت عالجربايه هو دخل يغسل وراها طلع لبست تراك واجه مدد وندار عليه
خالد:شبيج كالبه وجهج
حياة: لازم كملت سهرتك وياهن وجيت
خالد: ههههه اي كملت.. تعالي هنا شون سدين تليفون واني داحجي وياج
حياة: باوعت عليه واني اريد اكوم اخنكه والله .. مجان عاجبني احجي
خالد: ها بويه جا زين لعد واني هم مهتميت كملت سهرتي عادي
حياة: اني هنا فرت دفرت الغطه وكمت لابست دشداشتي وطلعت من الغرفه لان كارهته كلش
خالد: ظليت صافن عليها هاي شبيها غارت عبالها جنت اتونس وياهن
كمت وراها لكيتها كاعده بالهول رحت كعدت بصفها هي الا شويه وتكوم تخنكني
.. شبيج يولي
حياة: مابيه معاجبني اظل وياك بالغرفه
خالد: يولي احجي عدل لاكوم الج
حياة: شتريد مني عفتلك الغرفه وطلعت شكو لاحكني
خالد: اريد اعرف شبيج
حياة: مابيه كون الله ياخذني واخلص من هالعيشه
خالد: بويه كمتي تدعين على نفسج لازم السالفه جايده
حياة: باوعت عليه واني عيوني تجدح وهو بكل برود يجاوب عفته وداكوم لازم ايدي
خالد: تعال وين رايحه كعدي دافتهم شبيج
حياة: اني متحملت رستا عيوني دمعت (لحد يكلي شبيج واني ضايجه بسرعه ابجي شكد اكره هاي الحاله البيه)
خالد: شبيج حياة احجي شنو الي مضوجج
حياة: مابيه
خالد: يولي ضجتي لان سمعتي صوت بنيه احجي
حياة: ظليت ساكته حتى ماباع عليه حتى ليشوف عيوني مدمعه
خالد: حياة هذا سلام هو جابهن عباله يونسنا بس قسم بالله ماطخيت وحده
حياة: يعني معجبتك ولا حده منهن
خالد: مننه هنا حتى يعجبني ولج اني مايعجبني الرخيصات
حياة: ماي بارد ونزل على كلبي يمه ارتاحيت .. باوعت عليه .. لعد ليش بقيت بغداد
خالد:ولج احنا وصلنا العصر بين متغدينا ورحنا لبيت الولد صارت ليل الولد كالو خل نظل باجر نرجع وشفتيني اني يمج لج عفتهم وطلعت وحدي علمودج
حياة: علمودي
خالد: اي علمودج عرفتج ضجتي من سمعتي صوت يمي واعرف دماغج حيصورلج شغلات
حياة: ابتسمت اله
خالد: مخبله شكلج يله كومي خل نام مظل شي ونكعد ورانه هوسه
حياة. هزيت راسي وكمت رحنا للغرفه مددت عالجربايه وهو مدد فجاة سئلني
خالد: حياة
حياة: نعم
خالد: ليش ضجتي من سمعتي صوت بنيه يمي
حياة: ظليت ساكته ياربي شكله غرت عليك
خالد: احجي والله دمرتيني بسكوتج هذا
حياة: ماعرف بس ضجت
خالد: يعني غرتي عليه
حياة: شتغديت بغداد
خالد: باوعت عليه.. فريتي سالفه 180 درجه ماشي بويه ماريد بس ترى وصلتلي الاجابه
حياة: بتسمتله كتله حنام
خالد: ماشي
حياة : كعدت صبح وجان اليوم حنه حسين وايه والبيت هوسه كلش
جانت حنه الولد بره بشارع واكيد الاكل جان كله تركيب بس مخلونا منركب جابو طباخ هو صار مسؤول عالاكل
اني وامل وساره قررنا روح للصالون جان خالد ماكو دكيت عليه داكله مجاوب دزيتله مسج 💬 حروح ويه البنات للصالون
جاوب💬 ماشي بويه لاتتاخرين ومن تخلصين دكيلي اجيكم
رحنا للصالون فتنا جانت ام الصالون تعرف ساره لان دايما تجيها ساره كعدت سوتلها تسريحه عماره مو تسريحه فوك راسها وخلتلها مكياج وساره دكلها طوخي طوخي بعد بحيث ساره حلوه بدون مكياج بس وره مخلت المكياج طلعت تخوف حتى اني وامل كنالها خففي منه ترى كلش هواي بس هي مقبلت كالت هو بسنه حسنه عدنا عرس
وراها امل سوتلها سشوار ورفعتها عالي واطراف لفته بس مخلت مكياج كالت ابويه ميقبل خاف اترزل بس اني كتله بالبيت اخليلج خفيف وراها حسيت بالم بطني وظهري قوي وراها عرفت جتني فشتريت من ام الصالون ذيج الشغله وخليت
اما اني سوتلي شعري سشوار واني شعري مدرج طلع حلو كلش ومكياج كتلها خفيف عندي صوره بتليفون كتلها مثل هاي اريد كلتلي هي شخله بس جاره عينها ايلينر ومركبه رموش كتلها اي اريد مثلها سوتلي مثلها وخليت حمره ماروني طلعت كلش حلوه خفيف وحلو صار مكياجي بس سارة ظلت دكلي لو انتي خاله بالبيت مو احسن بس امل كلتلي كلش حلو خابرت خالد يجينا كلي ماكدر حدز علي ياخذكم
شويه واجه علي طبعا من ركبنا تفاجئ بساره كلها شمسويه بنفسج شتعلو اهلج
سارة: ليش شبيه
علي : ولج جنيه طالعه نزلي شال على وجهج لابتلي بيج
حياة: ظل طريق كله يرزل بيها خرب واني وامل ليوره كاعدين كلسع امل ضاربتني بعكسها موتونا ضحك طريق كله رجعنا جان الشارع مالتنا عباره عن كراسي ديحضرون لحنه الولد دخل علي سياره بالكراج والا شويه يدخلها للمطبخ نزلنا ركض دخلنا
طبعا خالتي جانت بالمطبخ شافتني كلتلي يمه شخاله بس حمره ضحكت كتلها خاله خفيف كلتلي بس لايكلج مطلعج تخبلين بعدين من شافت ساره كالت يمه شبلاج شمسويه بوجهج بس ساره ظلت دكلها غير عرس وعافتها وراحت بعدين كلتلنا روحن بدلن من وكت رحت اني للغرفه ابدل رحت طلعت فستاني ماروني طويل وردنا للعكس واصله من الصدر رقم 7
فصاله نفس هذا تقريبا بس ماروني ومابي جاكه
لبسته وابست حذائي ورحت للمرايه اعدل بنفس وفتحت شعري لان جنت شادته ورشيت عطر وظليت اباع عالمرايه وكلش معجبه بنفسي شويه ودخلت امل
امل: هلا يابه شلون طالعه تموتين
حياة: والله لايكلي الفستان
امل: والله يجنن عليج موكتلج من شفته عد ابو المحل كتلج يلوكلج
حياة: اي باللبس احلا وخاصه مكياج وشعر يصير احلا
امل: دخليلي مكياج يله حتى ناخذ صور
حياة: ماشي تعالي كعدي وظليت اخليلها مكياج
امل: حياة عمو علي سمعته يكول لساره مسحي الخريط المسويته بوجهج لو متنزلين جوه
حياة: لا صدك اي هو ضاج من شافها
امل: اذا هي خلص قلم الحمره كلها بشفتها
حياة: ههههه اي هي وجهه بدون مكياج كلش حلو والله بس المكياج ظلمها
يله كملت باعي حلو
امل: اشو مممم مممم اي حلو والله
حياة: هسه تجي ام احمد دكول شنو هالجمال عيني
امل: لا عفيه لتخجليني ههههههه
حياة: انجبي انتي تخجلين اشك بهذا الشي
يله تعالي خلي ناخذ صور
وظلينا ناخذ صور بكل الاتجاهات وكل الحركات سويناها
بعد سمعنا هلاهل فطلعنا الهول فاتحيه عالاستقبال لان بيناتهن باب فجانت خالات خالد وعماته كاعدين فتنا خالاته ظلن يتغزلن بيه وكلسع وحده دكلي وينه الشيخ خل يجي يشوف
وراها كام ضيوف يجون شويه شويه لحد مصار الهول والاستقبال مليان واغاني وركص وبنات عمه لخالد يردحن ردح وامل وياهن وكلسع جارتني اهز شويه وارجع اوكف ومن تشتعل اغنيه حلوة انزل للساحه اركص وراها الكعب دمرني كلت اروح ابدله البس غير هذا رحت للغرفه تفاجئت بخالد كاعد يبدل
خالد: جنت مشغول كلش بحنه حسين بحيث رجعت من الشارع للحمام سبحت وطلعت ابدل لان تاخرت والناس كلها بره تفاجئت بحياة دخلت للغرفه بس حياة طالعه لعابه ونوب لابسه ماروني شتعلو اهلها نفر نفر ظليت صافن عليها
حياة: هلو شونك
خالد: هلا بيج
حياة: شو هسه دتبدل عبالي بره انت
خالد: واني اباع عليها .. اي مو بين مكملت شغلي واجيت
حياة: تريد اساعدك بشي
خالد: تقربت عليها .. اي
حياة: ظليت منتظره يكلي شمحتاج بس هذا تقرب مني وظل يباع عليه ونظراته هاي اعرفها
.. اي شمحتاج
خالد: محتاجج
حياة: ظليت اباع عليه بس رموشي ترمش
خالد: خليت ايدي على خصرها وجريتها عليه
حياة: شبيك
خالد: تردين اشوف هالجمال كله كبالي وماسوي شي
حياة: بتسمت يعني طالعه حلوه
خالد: تموتين . تقربت على خدها بستها بس مكدرت ابوسها من شفتها لدمرني بحمرتها .. ولج شكو خاله هاي بشفتج
حياة: ههههه لعد شون
خالد: مدكولين خالد شون حياخذ شفتي
حياة: اني كلبي يدك سريع وفرحانه بقربي يمه كلش اصلا نسيت الحنه والهوسه الي بره . ظليت بس مبتسمه
خالد: نزلت على ركبتها ابوس بيها ونزلت على فتحت صدرها ظليت ابوس بيها
حياة: خالد كافي حتتاخر .. بس هو احسه بغير عالم حتى ميسمعني
فجاة دخلت امل وهي دكول حياة اريد حم ...... وسكتت
اني وخالد طفرنا عن بعضنا وخالد ندار سوه نفسه يلبس اليشماغ وتعطر وطلع
امل: اني جنت داكل كيك وكلت اروح على حياة اخذ حمره لان راحت من اكلت تفاجئت بالي شفته ظليت مصدومه ظليت واكف بين ماابويه طلع
حياة هذا الشفته صدك لو داتخيل
حياة: ظليت فشلانه منها ماعرف شحجي اكتفيت بس مبتسمه
امل: هههههه خرب نوب ظليت مصدومه بالمنظر مشهد تركي هذا
حياة: ههههه ولي ولي كافي
خالد: جنت فاقد على حياة وفجاة دخلت امل علينا اني محبيت امل شوفنا بهذا المنظر مهما يكون عيب
كملت وطلعت بس لوما تدخل امل علينا اني يمكن جان اخذتها لحياة
طلعت لبره عالم كومه ظليت اسلم وراها ظلو الولد يدكون ويركصون
حياة: رجعنا طلعنا بره ظلينا نركص اني وامل وكلش فرحانين لحسين وايه اجتي عليه هدى صير مرت بت خاله خالد دكلي انتي هنا تهزين وشيخ بره كالب الحنه كلب
كتلها خالد ديركص كلتلي ولج كالبها روحي شوفي جرتني امل كالت تعالي نصعد بسطح نشوفهم صعدنا للسطح اني وامل وبنات خالته لخالد وكفنا وره البلوجكتر ( ضوه كلش قوي انارته ) وكفنا وراها بعد محد يكدر يشوفنا
ويمه شفت خالد لازم مسدسه ويركص بي اويلي شون جمال وشخصيه ونب شايل مسدسه بتك ايد ويهز بي وهو لابس دشداشه نيلي ويشماغ شاده وجانو شاعلين اغنيه شالو شالو
اني يمه متت عليه بت خالته كلتلي يمه شيخ شون شخصيه ولج حياة اني لو منج ماخلي يطلع احبسه بالبيت
امل: اي فديته لابويه يخبل .... لكم باعو عمو حسين شون يركص
حياة: ههههه خطيه ممصدك حيزوج
وراها نزلنا جوه وشويه وكالو وره العشه روح للعروسه نحنيها فخالتي كالت تعالي ويايه انتي مرت الشيخ فدخلت للغرفه طلعت جبه البسه لان ماكدر اطلع هيج وفلبستها ودالبس شالي لمن دخل خالد عليه
خالد: ها بويه وين الله وياج
حياة: حروح على ايه نحنيها
خالد: وانتي شكو وياهم
حياة: خالتي كلتلي تعالي ويانا
خالد: ديله نزعي جبتج وكعدي عاقله ماكو روحه وياهم
حياة: ليش ماروح
خالد: بويه بره كلها زلم وين طالعه
حياة. مو كالو حيدخلون سيارات جوه بالكراج ونصعد
خالد: ماكو روحه وخلص
حياة: خالد حباب والله انزل شالي على وجهي وماخلي اي شي يطلع مني
خالد: حياة لتخليني اعصب عليج كتلج ماكو روحه
حياة: طبعا كلش ضجت من خالد مخلاني اروح نزعت الجبه واني ادردم
خالد: كافي دردمين
حياة: يعني بس اني حروح شو الكل حيروح بس اني الزلم حتباع عليه
خالد: ولج ليش متحترمين نفسج وسكتين
حياة: نزعت الجبه وعدلت نفس وعفته وطلعت كتلها لخالتي خالد ميقبل اجي وياكم
خالتي كالت حروح احجي وياه كتلها لا لتحجين لان خالد من يكول لا بعد ميغير كلامه
وراها خالتي وخالاته وعماته راحو بس امل خطيه شافتني مرحت كالت اني هم ماروح علمودج نبقى نردح هنا
والله مقصرنا نسوان اصلا بدو يطلعون فخفت مظل بس كرايب ظلينا نركص وراها اجوي من بيت العروسه كالو حندخل العريس جوه فطلعت جبت شال لابسته وعبايه وكفت دخل حسين ظلن خالاته يركصون وياه وراها دخل خالد اول مدخل باع عليه عباله ملابسه شال وعبايه وهم شويه ركص ويه خالاته جرتني خالته وركصتني ويه خالد بس يمه اني كلش خجلت نوب هو لزم ايدي وظل يحركها واني بس مبتسمه
بس كلش تونست لحظه حسيت هاي حنتي واني داركص ويه خالد يعني هو ميعتبر ركص ركص بس مجرد لازم ايدي ومسوين شده ياورد ههههههه
بس كلش جنت فرحانه بعدين خالد جر امل ويانه وامل مقصرت بنص الدائره كامت تردح هههههههه وابوها كلسع خازرها يكلها ثكلي
وراها انتهت الحنه بعد متونسنا كلش ومن صدك لان حسين وايه كلش كلبهم طيب حنتهم جانت تخبل وماكو احد اجه للحنه ومتونس
وره الحنه كتلهم ابدل واجي نظف البيت لان باجر ملحك نظف صبح واصلا بيت وره الحنه كلش هوسه طبيت للغرفه اريد ابدل حتى اطلع الملم البيت رحت للكنتور داطلع هدوم البس فجاه دخل خالد عليه وقفل الباب
اني ظليت اباع عليه اول مره يقفل الباب علينا هذا شيريد يسوي ظليت ابلع بريكي واباع عليه
خالد: دخلت على حياة للغرفه شفتها فاتحه الكنتور لكيت نفسي اقفل الباب بس مجان ابد بفكري شي غير ماخلي حياة تطلع او احد يدخل علينا تقربت عليها كتله : شدسوي
حياة: اني من شفته قفل الباب وكلبي لعب ظليت اباع عليه واحس كلبي كمت اسمع دكاته بس ظليت مسويه نفس عود مهامني
.. اريد ابدل حتى اطلع نظف البيت
خالد: لا لتبدلين
حياة: ليش
خالد. تقربت عليها ولزمت ايدها .. بعدني مشبعت منج حتى تنزعين
حياة : ظليت اباع عليه اويلي على هاي عيونه اوووف تموت نوب رموشه خرب جنن ظليت اباع عليه ونوب اذكر شون جان يركص بره ظليت سرحانه بي
خالد: يمكن هذا اول مره احس حياة تريدني حتى محاولت تبتعد عني ولا سوي تقربت عليها واخذتها بحضني ظليت اشم بيها باوعت عليها كتلها يصير هسه اخربط هاي واشرت على شفتها بعيوني
حياة: بتسمتله وهزيت راسي اي .. هو مصدك اخذ شفتي بكل قوته وظل ماخذها واحس شفتي خدرت بس جنت بغير عالم وياه وراها وجنت احاول ابادله بس هو جان سريع واقوه مني بحيث مينطي مجال ابادله شمر شماغه عالميز وهو بعده مجلب بشفتيي وظل يرجع بيه عالجربايه لحد شفت نفسي نايمه وهو فوكايه وظل يبوس بيه وهو متلهف واني جنت رايدته واحس نفسي اني الي جنت متلهفه عليه
خالد: تقربت منها وجنت ابوسها واني كلي لهفه عليها واحس نفسي انتهيت بعد ماكدر اعوفها وهي جانت تبادلني نفس الشي لهذا جنت مثل الواحد ممصدك لان حسيته تريدني ظليت ابوس بيها بكل مكان لحد محسيتها خدرت وهي جانت كلش هادئه ويايه واحسها تريدني مثل مااني رايدها وبقوه ومجلبه بركبتي نزلت فستانها شويه من يم جتفها
حياة: بعد مجنت وياه بغير عالم واحس نفسي طايره وياة تذكرت هاي جايتني يربي شون نسيتها وهو جان ناويها عليه مجان اكدر اكمل كمت منه وهو ديحاول ينزعني الفستان بسرعه دفعته وكمت الرجال ظل صافن عليه الا شويه ويكوم يكتلني
خالد: شبيج
حياة: خالد ماكدر
خالد: ليش كليلي شبيج كل ماتقرب منج واكول هاهيه حياة تريدني تشردين مني فهميني لاتخليني اكفر بيج هسه
حياة: شفت خالد صار عصبي حتى كام يعيط عليه بس اني جنت مستحيه اكله هاي جايتني ماكدر فهمني اني ماريده .. خالد غير يوم نكمل
خالد: وكفت على حيلي ولزمت ايدها .. ولج انه لعبه عندج حتى دكليلي غير يوم
حياة: لا والله بس افهم ماكدر اليوم والله لازم انتظر جم يوم يله اكدر
خالد: وشنو سبب ليش تنتظرين .. بعدين طخت عندي كتلها مريضه
حياة: اي والله
خالد: عفت ايدها وجريتها حظنتها وبست راسها .. غير دكليلي ياعيني
حياة: شكد عصبي بس من يحس ظلمني يصير حنين عليه بشكل موطبيعي اخذني بحضنه وباس راسي وظل يمسح على ظهري
.. انت منطيتني مجال واصلا جنت ناسيه ذكرت وكمت بسرعه
خالد: بعد مشعلتي شيب الخلفوني كمتي
حياة: ظليت ساكته يمه الفشله
خالد: يله روحي بدلي كرصتها من خدها ورحت غسلت وطلعت بره
حياة: بدلت ورحت للحمام اغسل مكياج اباع نفسي بالمرايه ركبتي صايره حمره خرب شمسوي بيه رحت لفيت شالي طلعت لكيت البنات ينظفن وحده منهن كالتي كلنا شيخ خالد طب للغرفه بعد منشوف حياة اني ظليت مبتسمه
كملنا تنظيف ولان احنا هواي وزعنا شغل فخلصنا بسرعه وراها كعدنا بالمطبخ نسولف واني جنت جوعانه طلعت اكل حميته جان باقي من مال الحنه وكامن ياكلن ويايه البنات وضحك وسوالف وتفرجنا عالصور الاخذناها وكلسع وحده كايلتنا شفتو هاي الجاي لابسه هيج وظلينا نحجي ولا عبالك تعبانين بكامل نشاطنا جنا وراها جتي خالتي طشرتنا وكل واحد على فراشه ركض
دخلت للغرفه رحت بدلت ملابسي لابست بجامه بس خالد جان ماكو وراها رحت مددت ونمت من تعب وتكمز وركص ورجلي احسها تون عليه من الوجع نمت بسرعه حتى ملحكت افكر بشي
خالد: طلعت بره رحت يم الولد جابو نراكيل وجاي وظلينا سوالف وحجي لحد نص الليل وراها عفتهم ودخلت جوه رحت للغرفه شفت حياة نايمه ويمكن لويوكع يمها صاروخ متحس بدلت التراك وغسلت ونمت ........
