رواية لبوة الحياة الفصل الثامن عشر بقلم ساره العبيدي
🤦🏼♀️🤦🏼♀️
أجت ام أسيد ياسمين فتحت الباب
اني بلمطبخ اجت عليه
كمت حتى أسلم عليها لزمتني من شعري وتصيح وتغلط
ام أسيد: ام سحوره شبسرعه ما سحرتي تردين تأخذي مني وتطلعين والله لو تموتين ماخليج تسوين لبالج اني ربيت وللكح...... ه صفيت نجوم السماء اقربلك
جوري: اوي شعري عوفي عليش جايه عليه روحي احجي ويه ابنج بيبي لحكيني ياسمين صيحي لبيبي اخ شعري
ام أسيد: اي طبعاً تصيحين لبيبي هيه سيده مالتكم
اجت بيبي بس تريد. تخلصني من ايدها الظالمه ولا عبالك جبيره بالعمر قوتها مال شباب احسن مني
فكتني من ايدها هيه تغلط وتصيح عليه
كبل اخذت جهاز خابرت اسيد وسمع صوتها واجه بسرعه دقايق وهو يمنا
أسيد: ماما شنو جابك اهنا شعندج
ام أسيد: شنو جابني لازم تريد اسكت وأنت تريد تعوفني اني وابوك وماعدنا لا ونيس ويانا ولا سند تخيل ابوك تخربط بالليل منو موجود ويا ماتكول امي مريه جبيره وين تروح لو ام سحوره عمة عينك
أسيد: يمه ماله داعي هذا الحجي وجوري مادخلها اني اريد اطلع اريد ارتاح انتي مو امي ماتردين أرتاح كافي تعبت من المشاكل باجر يصير عندي طفل شلون ابقه يوم اهنا ويوم اهنا مو حاله ولا عيشه
من يوم محالج دخل بجوري اني اقرر وهيه تنفذ بس ويلا اوصلج لبيتنا
ام أسيد: رايحه ما الؤمك سحور عمت عينك بس والله العظيم ماخليج ترتاحين ياجوري
عافتنا وطلعت واني من الخوف كعدت بلكاع الطم وابجي شفتي بيبي كتلج عمري ماراح أرتاح ويه هاي عائله كل ماشوف يوم حلو وانطي نفسي فرصه ثاني يوم اتندم واشوف الويل شسوي كوليلي شسوي اطلك واخلص
بيبيتي: صلي على النبي ترا كل امهات هيج تسوي من تشوف ابنها يبعد عنها عادي بنتي عبري لا توكفين على كلمه
ياسمين: اي صحيح كلام بيبي انسى أسيد خوش ولد وزين وياج ماعليج بأمه
بيبيتي: يلا ياسمين فوتي اختج جوه
طبيت جوه تمددت اجه اسيد ماقبلت احجي ولا أرد تعبت عافني وطلع الحمدلله مالح عليه
العصر اجت ام زياد اتفقوا شوكت العرس لازم نكمل جهاز ياسمين واني قلبي نار عليها لان على نياتها خطيه عاد احنا شلون حظ حلو عدنا
مرت الأيام واحنا مشغولين نجهز بعرس ياسمين بيبيتي خطيه ماخلت شيء ماشترت وجابت لها اشكال والوان ...
أسيد ما أجه بعد بس يتصل يطمئن ويروح مشغول هم بالبيت راح نكعد بي
تحدد عرس ياسمين الاسبوع هذا بس ينزل زياد من دوام
اشتروا غرفة الاخشاب كملوها واحنا مابقه عدنا غير نطلع نختار بدلات وفستان لي وبطني صارت واضحه 🤦🏼♀️ شلبس هسه حيره
رحنا للصالون حفت لي ولياسمين لان اول مره تحف طلعت تخبل ما شاءالله حجزنا عدها مكياج هم
ومرينا لسوك فدمره طلعه وحده واسيد هو ودنا لان ماقبل اطلع الا وهو وياي
ضوجني كل ما اختار فستان لا هذا كشف هذا ضيق هذا قصير
عفته طلعت حتئ من المحل تعبت كعدت باب المحل
لحكني شافني هيج كاعده كام يصيح
أسيد:هاي شنو شعندج هيج كاعده.فصحتيني بعد ما اطلع وياج ممنوع بعد تكولين سوك هسه الناس شتكول جايه جدي
هو يحجي واني ضايجة والله تعبت شبي مايحس وهاي فطيره ياسمين تضحك علية
جوري: هاي شبيكم واحد يرزل وحده صيح ان شاءلله تحبلون بتؤام حتى تحسون بيه عفتهم ورحت امشي
هو لحكني خله إيده بيدي
أسيد: فدوه لحبيبي ليضوج
يحجي ويغمز لياسمين مو صوجكم صوج يطلع وياكم بعد توبه انت استاذ أسيد مو عاجبك الدنيا مليانه بنات روح منو لازمك الله وياك
أسيد: أحد يبدل الذهب بالفضه شنو ضيعت عقلي لو خبل اني
ياسمين: ممكن تكملون لمكاونه بالبيت وخلي نختار بدلات ترا اني عروس حرام عليكم
جوري: يمه اختي حبيبتي يروحلج لبالي فدوه هسه اختار الج احلى بدله
أسيد:منو لبالج اكيد اني اكو غيري تكرهي
جوري: لا مو أنت امشي خطيه ياسمين راح تبجي خلي نكمل محتاجتهم
طبينا على محل يخبل لحد هسه اذكر بدلات شلون جانت نظيفه ومرتبه وتعجب اختارت بدله للحنه وفستان حلو نازك بي شذر على صدر طويل وفتحه بنص من اسفل كلش حبيته بس بطني منعتني 🤦🏼♀️🤦🏼♀️🤦🏼♀️
وبدله عرس اخذنا واسيد اختار لي فستان حوامل حلو مرتب عجبني ذوقه اول مره.يعجبني شيء يسوي ههههههههه....
رجعنا للبيت جبنا عشه من بره لان تعبنا من الفر السوك بعد وأنتم اعرف بي 😁
الاربعاء يوم حنت احلئ اخت وحبيبه بدنيا اجوي خوالي وخالاتي نكلب البيت هوسه والكل فرحان لها
اخذتها لصالون مكيجتها مكياج بسيط وخفيف وتسريحه بسيطه كلش طلعت كمر حياتي ربي يسعدها قريت معوذات عليها واية الكرسي
ورجعنا للبيت والكل استقبلها هلاهل وجكليت وهوسات وصارت كلش حلوه وشغلوا اغاني وصار يردحون بعدين اجت ام زياد وزياد خله حنه لياسمين وركصوا شويه وهو مانزل عينه عنها
اليوم كان متعب كلش بنسبه لي الحمل تعبني ولا عبالك بعدني جاهل معرف ليش بس مالي خلك ونوم وبسرعه اتعب حتى لو أمشي شئ بسيط اتعب واكعد
ثاني يوم العرس الكل بقه بايت يم بيت جدي مخبوصه كل وحده بنفسها
كعدنا متأخرين من تعب البارحه وام صالون تربدنا بوكت يادوب حضرت اغراض ياسمين تحتاجه بصالون
رحت شويت لها كم قطعة كبد وكباب خطيه جوع هسه
شي خليتها تاكله وباقي سويته لفات خليته بجنطه مالتي لان اعرف راح نتأخر بصالون وهيه تبقه بلا غده خطيه عروس واخت العروس ههههههه قصص عراقيه واقعيه اخذنا أسيد هم لصالون لان زوجته مايصير ويه غيره تطلع الشك يصعد برأسه وصلنا ورجع
وهو بس يوصي لا تخلين هواي ولا ولا عفته ونزلت
استلمت ام صالون ياسمين كعدت تمكيج بيها وسوت تسريحه طلعت بسم الله ماشاءالله حتى ام صالون كالت بعدها صغيره تخبل هنيال ماخذها
ورا ماكملتها انطيتها لفه تاكلها خطيه ماقبلت تاخذها عيب تاكل بصالون والله اختي بطرانه ههههههه وراج زياد عيوني والعشاء لل10
استلمتني اني كتلها طلعيني غير وحده عناد
كملنا لبست بدله وخابرت أسيد يجي يأخذنا
هو أجه
أسيد:شنو هاي اني شنو كتلج شنو حجيت تريد تموتيني هو انتي لو اختج العروس فهميني
جوري: شبيك واذا هسه خلي تصعد لبنيه عود احجي براحتك والله يالله
صعدت ياسمين وهو كعد يغرد
أسيد: بس فهميني اني شنو حجيت شنو كلت الج ليش هيج تحبين تعاندين
جوري: أسيد ترا ماله داعي هالتصرف وصوت عالي عرس اختي واذا هيج سويت واني بعرسي ما كان من نفسي مكياج والبدله تمام
أسيد: اذا هيج شورانا نعيد اليوم العرس
يحجي ويغمز وصلنا البيت قريت معوذات واية الكرسي على ياسمين وخليه قران صغير بيدها ونزلتها وكلها تصلي على النبي
سوينا الكعده بلاستقبال
اجت بيبيتي سلمت عليها وكامت تبجي
بيبيتي: شمعة بيتي انتي ايدي ورجلي عيوني اشوف بيهم سامحيني يمه خاف بيوم ضوجتج غثيتج واي شي تحتاجي امج اني وبس سياج بينا بس صيحي دقيقه اني يمج
بوستها ولبستها خاتم هديه.ونسوان خوالي حيات يباوعن ويعوجن حلكهم مرض يطمكم كون
اجت الزفه وزياد صدك طالع هيبه وشخصيه شلون اثنين يخبلون وطلعنا بزفه واكيد اني ويه أسيد
كمل العرس ورجعنا للبيت بس أسيد مارجعني لبيت جدي
جوري: أسيد وين رايحين هذا مو طريقنا
أسيد: اني سمعت تردين زواج على واهسج هسه انتي تحبيني فلازم نعيد ليلة زواج لو بس على ناس وناس حرام
جوري: شوكت كتلك أحبك اني من يمك تحجي بكيفك
ماروح لاي مكان رجعني يلا لا افتحه الباب وانزل وتخسرني اني وطفل يلا
أسيد: لا تتخبلين عليه لا تحبيني مو بحاجه لحبج ما مشتاق عليج بس كملت البيت وكلت احنا طالعين طالعين خلي اؤديج تشوفين البيت حتى مايعجبج اغيره قبل مانسكن بي
جوري: خوش رزاله سكتت مو مشتاق والله يالله حبيباتك هواي طبعاً ماعندك مجال تشتاق
بعد خمس دقايق طريق مشاحنات وصلنا لبيت حلو صغير مرتب صاير مثل المشتمل
فتح الباب وطبينا بي غرفه وصاله واستقبال والمطبخ
كله مفروش جديد ونازك ونظيف يلمع
أسيد: تعاي اشوفج الاثاث سحبني من ايدي لغرفة النوم عجبتج الغرفه اي شي مايعجبج اغيره من باجر
جوري: لا كلش حلوه ومرتبه بس شوكت اشتريت وكملت انت مو كلت جاي ارمم وانظف بي
أسيد: عوفي البيت وترميم خلي نجرب الجربايه زينه تعاي اكعدي
جوري: ماكو داعي نجربها مبين زينه
أسيد:متعود ماتجين الا تشلعين قلبي
سحبني من ايدي كعدني على رجله نزعني الشال ايدي بيدي اخذ شفايفي كالعاده يلتهم مثل النار ما أمامه
عشنا احلى ليله بقينا للفجر مثل العرسان
سبحنا ونمنا اثنينا كعدت جوعانه كلششششش
وبطني توجعني معرف اكل معرف ادور على علاج
جوري: أسيد أسيد كوم لخاطر الله شكد تنام
أسيد: ولج شبيج شكو خير يعني شلون مانرتاح
ها عمي كعدنا شكو
جوري: ولك كوم بطني توجعني وجوعانه معرف شسوي
أسيد: صدك تحجين بيج شي
جوري: دكوم هسه جيبيلي اكل علاج وين اروح
رجعني لبيت جدي احسن كوم
أسيد: شنو نلعب لا والله تبقين اهنا وهسه اسويلج اكل ونخابر دكتوره نسالها شبيج
رقمه عد الحجيه هسه نحل الموضوع
راح جاب اكل ومخابر دكتوره منطته علاج تكوله مابيها شي لتهابات وتقلصات ومعرف شنو
من شفت الاكل وكعت عليه ماخليت شي وهو يضحك عليه
أسيد: توني توجعج بطنج هسه طابت مو عمي كولي جوعانه جيبلي اكل عليش تكولين بطني عبالج مسجونه ههههههه
جوري: شبيك قابل شنو اكلت ترا هذا طفل جوعان
كملت أكل وبقيت بالبيت وخابرت على بيبيتي وعلى ياسمين
عزمت ياسمين عندي على الغده وبيبيتي وجدي هم عزمتهم وياها
سويت كل اكلات يحبوها كعدت من 7الصبح انظف وبيت نظيف مايتعب
بعدين طبيت للمطبخ تبلت دجاج وعفته على جهه وخليت لحم على طباخ حتى اسوي قوزي ويستوي على راحته
سمج شوي أسيد راح يشوي ههههههه لازم يساعدني لعد شكو زوجي 🤔
اجوي كلهم بس زياد خطيه بدوام ملتحق وكلش حباب ويه ياسمين الله يسعدهم
كملنا غده نظفت مطبخ وياسمين ساعدتني بعدين راحوا
مرت الأيام هادئه اني بيتي كل اسبوع امر على بيبيتي انظف لها واسوي طبخات واخليها بلمجمده خطيه مابيها هيه
أسيد ماحجيلكم شكد فرحان بحياتي اخيرا جوري تقبلت وجودي بحياتها احس نفسي مالك الدنيا صرت ماصدك اكمل شغلي حتى ارجع للبيت
فتحنا الصبح المحل ومر اليوم طبيعي اني أرجع يوميه ب12 الا ربع قبل الصلاه الظهر حتى أصلي بيتي واتغده مع جوري اخاف اتأخر عليها هيه وحدها
سلمت على حسام وطلعت بسيارتي لكن دائما يحدث لنا مالا نتوقع حدوثه........
