رواية فصلية ولكن الفصل التاسع عشر 19 بقلم سوزان ليث

كله هاي المشاكل عدت الا بيوم اجه خالد وجهه مايتفسر وميحجي ويه اي شخص والعصبيه مالته بحيث فات للبيت حتى بدون ميسلم وراح للغرفه طبك الباب كل قوته ظلينا كلنا خايفين روحله فخالتي راحتله للغرفه وظلت فتره بالغرفه وياه وطلعت خالتي هم وجهه ميتفسر وبسرعه راحت لغرفتها وسدت الباب عليها  

ظلينا هيج لحد ماجه حسين وكلي بالقرار الي ماخذي على خالد لو يسويه لو يتنازل لاخو عن الشيخه  

ظليت بحاله صدمه ماعرف شحجي ظليت افكر معقوله خالد يسويها   لا مستحيل ميسويها بس ذكرت كلامه من كلي ماكدر اعوف شيخه لاخويه لان يعرفه مو كدها 

وعرفت علي مقترح على العشيره هذا القرار وطلع حقده على خالد من خلاه يطلك سماح ويزوج ساره هسه طلع

خالد: الفتره الراحت واني ماشفت الراحه ابد من مشكله لمشكله وطلايب كامت فوك راسي تركع واي شي يصير يجيبون طاري زواجي من حياة هذا الي يكلي طلكها وهذا الي يكلي زوج عليها واكسرها جنت ماقبل جيبون طاري هذا الموضوع ويايه ابد لان جنت اصير اعصاب بس وكلشي صورت واخويه ابن امي وابويه يلزمني من ايدي التوجعني ويبدي يحفر جوايه حتى اوكع كله علمود ياخذ الشيخه مني جنت طالع خابرني عمي ابو سالم كلي ريدك تجي انت وخوتك مجمعين بديواني اليوم العصر وفعلا العصر بدلت رحنا اني وحميد وحسين لبيت ابو سالم شفت الشيوخ كلها مجمعين والعمام  وكعدنا وصار الحجي وجعن المواضيع القديمه وانت طالع عن شورنا وانت شيخ عشيره اذا ممحترم العشيره شون صير شيخه اكو ناس تحجي عليه وناس دافع عليه لحد ما عمي ابو سالم كلي شوف شيخ هذا مو حجي بس هذا الكلام حجي الغلابيه ياما تطلك هالفصليه وترجع شيخ خالد مثل كبل لو تنزل عليها بمره حتى ليظلون يكلون ماشي على شورها اني كبيت عليهم وانتو متخافون الله مدكول الله يطلعها  بيكم ودكول ليش ميصير براسنا خير اذا الله ديشوفنا منرحم تريدوا يرحمنا 

نزلت عليهم حدره وظليت العن ساعه الي صرت بيها شيخ عليهم  مديت ايدي على عكالي انزعه جان يجي ابو سالم يلزم ايدي لا ياشيخ هاي ممرجيه منك انت الجبير العاقل هيج سوي عجل شخلينا للجهال اني الكول انت الناس تاخذ شورتك بجبيره وبصغيره هيج سوي  كلتله عمي طلاك ماطلك البنيه مالها ذب ومن يوم كلتولي طلبنا فصليه اني شكلت وباوعت على اخوتي 3 كاعدين مو كتلكم اني الماقبلها على غيري ياخذ فصليه اجي اني اخذ وياعمي البنيه ماقصرت ويايه وكفت ويايه بازمتي وماسمعت منها غير كلمه الحلو وهي لابيها ولا عليها صارت بهاي سالفه  كلي زين ياشيخ  زوج ونزل عليها مره حتى ناس لتاكل راسك بهاي سالفه وحتى يشوفك انت تمشي بشور العشيره 

عمي هسه انتو عفتو المشاكل مال العشيره كلها وجلبتو بزواجي من حرمتي  دخل نحل ازمه الماي المكطوعه عالكياعين خل نحل سالفه ذوله شباب الي عبرو ال30 وماعده شغله ياكل منها 

اخذني عمي على صفحه شوف شيخ هذا الحجي كله اني وياك بي بس ياعمي ترى اخوك هو الي يحرك جواك هو الي كللهم للربع اذا ماقبل ينطي شيخه كلوله يزوج هو اول وتالي ميقبل يزوج اني هذا الحجي اجاني مثل الخنجر بكلبي ولك علي اني الي جنت اداريك ولك صرتلك اب وره ماراح ابويه هيج جزاتي ولك اني جنت اداري عليك من سوي مشكله حتى ابوي لايكتلك هيج سوي 

ابو سالم: شيخ خالد خل نحل هاي سالفه عاد وحتى نسد حلوكهم واذا فتحو حلكهم بعد اني الي اوكف بوجههم وياعمي اذا عالمره الي حتزوجها فخل تجي الحجيه تختار وحده من بناتي واني الممنون 

خالد: عمي اشرف بيك وبنسبك بس ياعمي انه اذا سويت هيج حيشوفوني ضعيف وامشي بشورهم ذيج المره كتولي هاي سالفه وسديتها قبل لتكملوها هسه تردون تعيدوها 

ابوسالم : محد يكدر يفتح حلكه همه اصلا هسه متاكدين انت محتقبل تزوج وعبالهم حتعوف الجمل بما حمل وانت تعرف اخوك ماهو كد هاي المسؤوليه وتعرفه شوره ورائيه مو بيده ياهو اليجي  يكله سالفه يسويها  ففكر هسه وردلي الخبر واني هسه اكللهم يفكر ويرد الخبر

خالد: الله كريم .. سلمت وطلعت للبيت اسوق واني افكر بالي حجوا مجان اكدر اعوف حياة ولا اكد ازوج عليه لان اثنينهن معناها واحد عدي طلعت للبيت واني لو احد يكلي شبيك يمكن اموته خلاص جنت مطايق احد وجنت احس نفسي عاجز ماعرف شسوي فتت للبيت حتى ماكدرت اباع على حياة فتت للغرفه وظليت بيها لحد مدخلت عليه امي وحجيتلها الصار 

خالة: امده بطني الي حملت بواحد يحفر وره اخو ولك هذا مو تربيتي تربيه عماتك لك يمه عوفلهم كلشي يطبهم مرض وخل علي يغركهم ميعرفون خيري الا لما يجربون غيري 

خالد: يمه وناس الي بركبتي كليلي شسوي بيها 

خالة: والله يايمه ماعرف شكلك اول مره وره ممات ابوك تمنيته موجود جان شاف ابنه شديسوي باخو 

خالد: يمه لاتحجين لحياة ماريدها ضوج

خالة: لايمه شحجي جا اكللها لو يطلكج لو يزوج عليج  خليها بلا ماتعرف وينحرك كلبها 

حياة: لما اجه حسين جان ضايج ورستا سئلنا خالد اجه كناله اي جوه 

سئلته صار كلي 

حسين: والله سالفه ماتبشر بخير كل كاب عليه 

حياة: ليش 

حسين: والله هواي مشاكل وكل سالفه يكلوله انت متاخذ شورنا بكيفك تصرف

امل: غير هو شيخ وشيخ بكيفه يصرف 

حسين : عقلهم بس يردون شي حتى يوكعون خالد بي حتى بعد ميكوم 

امل: وشنو صار على شنونحلت 

حياة: حسين ظل متردد يكولها بس من كال لو يطلك حياة لو يزوج عليها اني هنا ظليت بس صافنه على حسين ماعرف صار بيه فجاة حسيت دنيا ظلمه صارت داير مدايري بقيت بحال ذهول حتى ماعرفت شحجى وراها حسين بس حسيت امل دكلي 

امل: حياة شبيج عزه لتخوفيني 

حياة: ظليت ساكته وامل كعدتني عالكرسي وجابتلي ماي شربتني 

حسين شنو جان رد خالد 

اني هنا انتظر جواب حسين بس اني اعرف بالحالتين اني حموت اذا عافني واذا زوج عليه يمكن اذا طلكني اهون عليه من انه يزوج ويجيب مره غيري اله 

حسين: ماقبل وظل يحجي ويصيح بس بعدين ابو سالم اخذه على صفحه مدري شحجى وياه وخالد وراها طلع وابو سالم كلنا شيخ خالد يفكرويردنا جوابه 

حياة: جوابه زاد حيرتي اكثر مجان عندي جرأة ادخل اسئل خالد يمكن جنت اخاف من جوابه 

ظليت كاعده بالاخير كلت لازم اعرف بعد حموت يمكن بعد شويه من الخوف والقلق 

دخلت للغرفه لكيت كاعد عالكرسي ويدخن ولازم راسه طبعا حتى مشال راسه عليه رحت كعد يمه 

حياة: خالد شبيك عصبي 

خالد: مابيه شي 

حياة: خالد 

خالد: عيونه 

حياة: طلكني اذا هذا الشي يحل المشكله طلكني وريح بالك من هاي مشاكل كلها 

خالد: ولج شدكولين انتي كتلج لاتفتحين هذا الموضوع مره ثانيه ولج متعرفين انه شكد احبج ولج اليوم الي ماشوفج بي ولج معناه موتي 

حياة: ماكدر اشوفك ويه مره غيري ماكدر حتى اسمع كلمه متزوج مو عاد اشوف مرتك والله اموت اموت .. طبعا احجي وياه واني ابجي 

خالد: ظليت اباع على حياة شعرفها بهاي سالفه .. حياة ليش هيج تحجين منو كلج حزوج ولج مخبله انتي عدي تسوين كل البنات 

حياة: حسين كلي على لازم يصير واني اعرف انت محتكدر تعوف الشيخه علمودي  قاطعني 

خالد: ولا اكدر اعوفج 

حياة: بس لازم تعرف بيوم الي تزوج اني مابقى هنا 

خالد: حياة هيج تتخلين عني 

حياة: لا اني متمسكه بيك لاخر لحظه بس لو تزوجت واني هنا حموت الف موته واني اعرف انت حتنام يمها اموت الف موته من اشوفك تحجي وياها اموت الف موته من اشوفها مهتمه بيك ماكدر والله صعبه عندي اموت ولا هذا العذاب 

خالد: اسم الله عليج ياعمري لتحجين هيج متعرفين هذا الحجي شيسوي بيه ولج اني ماكدر اعوفج والله ماكدر لج انتي تسوين عندي كل بنات ماكو وحده تملى عيني مثلج هذا كلبي يدك بس الج 

حياة: زين شحسوي كلي حتعوف كلشي علمودي ويكلون عليك عاف كلشي علمود مره 

خالد: ظليت ساكت .. لاظلين تفكرين بهاي سالفه اني احلها بطريقتي 

حياة: خالد ترى هاي مشكلتي مثل ماهي مشكلتك وماكو احد حيضرر غيري فلازم دكلي شحسوي 

خالد: ولج انت بالكوه جيبين وجع راس لنفسج 

حياة: والله وجع راس يجيني اذا زوجت غير بوكتها اموتك بيدي 

خالد: ههه وانه مخبل اجيبلي بلوه ثانيه على كلبي 

حياة: يعني اني بالوه 

خالد: ولج انتي احلا بالوه الله بلاني بيها 

حياة: احبه وماكدر بدونه احبه لدرجه مستعده انطي روحي حتى يعيش مستعده اضحي بكلشي علموده  جنت متاكد ميعوفني ولا يزوج عليه بس بنفس الوكت كمت احس بذنب لان كل هذا بسببي جان يريد يرضيني وثبت زواجنا جنت احس بذنب واني اشوفه مهموم وجكاره مفاركته 

العشيره عدهم كياعين كلش هواي فخالد مشغل بيها عمال وفلاحين كومه وكلها تشتغل بخير هاي الكياعين اذا عاف شيخه خالد كل ذوله ناس يطردوهم  عناد بخالد فخالد من هو صغير شتغل ويه ابوه وابو جان شيخ قبله فخالد عاش بين ذوله الفلاليح وناس يعرفهم واحد واحد ودايما يحب يساعدهم ابوه علمه على هذا الشي  من يوم الي زوجت خالد ماشفت احد اجه لبيته ورد احد خالد يحب يساعدهم وماعده مخصص رواتب لعوائل الي ابوهم شهيد والي كبار بالعمر والي ايتام وو ناس هواي كل هاي مخصصه من فلوس العشيره 

ماعده كل فتره العشيره تتكفل بزواج شاب خالد مجان بس ياخذ من صندوك العشيره بس جان ينطي من جيبه لان خالد متمكن الحمدلله وحتى وره ممات ابوه ولزم شغل بداله جان كل شهر يكعد اخوته ينطيهم ارباح هذا الشهر حتى البنات مع العلم هواي من الناس مينطون ورث للبنيه على اساس هي عدها رجال والفلوس تروح لرجلها وهاي خرافات عد بعض الناس بس خالد يخاف الله وجان يمشي بالحق 

خلال هاي الايام واني جنت تعبانه كلش ومالي واهس بكلشي واحس نفسي عايشه بقلق ماعده الاحلام الي احلم بيها بخالد مزوج عليه ولو ديبوس ببنيه وكوابيس تخليني افز من نومي واشوف خالد نايم يمي احضنه كل قوتي وانام 

جنت كاعده بغرفتي اصفط الهدوم دكت الباب دخلت خالتي عليه وكلتلي 

خالة: ها دتشتغلين عبالي نايمه 

حياة: اي والله عندي هدوم داصفط بيهن .. باوعت على خالتي وجها مو طبيعي مثل الواحد الي يريد يحجي ومستحي ..

اكو شي صاير

خالة: لا يمه كل الخير بس ردت احجي وياج بسالفه 

حياة: اي خالة خير 

خالة: تعرفين بالمشاكل الي مرت على خالد هاي الفتره وهاي مشاكل دزيد مدتقل ومحد واكع بيها غير وليدي حتى كمت اخاف عليه من وره القلق والعصبيه الدايما عدها 

حياة: والله شبيدي عليه 

خالة: يمه خالد لا يكدر يعوفج ولا حيكدر يزوج غيرج ولا يكدر  يعوف شيخه ادري صعبه عليج تسمعين هذا الحجي 

بس اني حاسبتج مثل بنتي واغلا 

حياة: والله خاله اني هم احسبج امي  بس شنو الي اكدر اسويه 

خالة: حبيبه خالد مايسمع من احد غيرج  يعني اكول لو تقبلين يزوج وتفض هاي  المشاكل وانتي لا اول وحده رجلها يزوج عليها  ولا اخر وحده 

حياة: ظليت اباع على خالة هاي شدكول تريد اروح اكول لرجلي روح زوج شنو مخبله 

خالة: اكلج ترى خالد ادري بي ينطي شيخه بس صدكي يايمه وراها احنا الي نخسر خالد ويموت بحسرته 

حياة: لا اسم الله عليه والله اني كلتله طلكني بس هو مقبل خاله ماكدر اكله يزوج عليه والله ماكدر اكولها 

خالة: انت ماتعرفين خالد شون متعلق بيج بيوم الي يوديج لابوج شوفين يظل يلوب ميتحمل للعصر يروح يجيبج وكلسع شايل تليفون يخابرج ترديه يعوفج  جم مره جيتي كتيلي احجي ويه خالد كليله خل ابات يم ابويه وانه احجي وياه وهو مايقبل ولج شيخ خالد يكلي يمه ماكدر اغفى  وهي مو يمي ولج هذا الي نكول عليه كلبه حجاره 

بس هو اذا عرف بيج موافقه وانتي دكليله زوج انتي حشيلين من عده هم كلش جبير 

حياة: ظليت ساكته واحس نفسي مربطه يربي ليش هيج ديصير بيه يعني كل هذا علمود ورقه بالمحكمه صدك جذب ذوله ناس شبيهم 

جنت اني مغلسه على هذا الموضوع ويوميا اكول باجر خالد يحله باجر يحله بس خالد يوم عن يوم احسه متغير وحتى من احجي وياه احسه مو ويايه ابد وكل ماسئله  يتهرب مني 

لحد ماكمت اشوفه صدك حيموت من القهر هذا شون اذا عافلهم كلشي قررت قرار يجوز اظل اتندم عليه عمري كله يجوز ابقى الوم بنفسي كل العمري بس مجان اكدر اسوي غير هذا الشي من حبي لخالد مستعده اموت وهو يعيش قررت اكله يزوج لان اعرفه محيرضى اطلك بس بنفس الوقت محبقى وياه جنت مقرره بس يزوج ارجع لابويه لان ماكدر اشوفه يزوج كدام عيني وماعتقد اي مره تكدر شوف زوجها يزوج  شمهما تكون قويه تبقى تحس نفسها مكسوره دكوم تحس بيها نقص وحتى لو هي كامله مكمله 

انتظرته يرجع بالليل تعشى وفات للغرفه رحت وراها كتله خالد اريد احجي وياك 

خالد: احجي صاير شي 

حياة: خالد اذا اطلب منك طلب سويلياه 

خالد: انتي تامرين واني انفذ 

حياة: بتسمت واني كلبي ديتكطع واحس لساني ثكيل بالكوه اطلع الكلمه .. اريدك تزوج 

خالد: ظليت اباع على حياة مجنت متوقعه دكلي  زوج 

حياة: لا اني حكدر اعوفك ولانت حتكدر تعوفني ولاتكدر تعرف الناس العايلهم فماكو غير هذا الحل حتى تخلص من المشاكل وحتى اني اخلص من تفكير والقلق الي دمرني 

خالد: حياة اكو مره دكول لرجلها روح زوج 

حياة: ماريدك ظل حاير وماريد اخسرك فزوج خل نرتاح كلنا وكافي  عاد من يوم الي صرنا سوه واني مشفت يوم حلو 

خالد: اخذتها بحضني بست راسها والله حقج والله اني اسف 

حياة: بس ترى اذا زوجت مو تنساني ودكوم تحبها اكثر مني والله احركم اثنينكم 

خالد: حضنتها كل قوتي وظليت ابوس بيها واكللها احبج محد ياخذ مكانج ولا حكدر المس مره غيرج انسي هذا الموضوع 

حياة: بتعدت عنه واذا متزوج اني محبقى وياك وحطلب اطلك وداعت ابويه وتعرفني اذا احلف بابويه اسويها 

خالد: جريتها مره لخ لحضني ظليت حاضنها وماحجي شي  

ظليت ممقتنع بهذا الشي وظلت حياة تلح عليه كل يوم ونوب طبكت امي وياها وحتى حياة امتنعت مني وكامت متقبل اتقرب عليها الا ازوج حتى جانت متخليني احضنها ابوسه كلش تغيرت ويايه لحد مقررت ازوج حتى اخلص من ضغط حياة وامي الي وعمامي وخوتي  ومشاكل وطلايب كلها 

حياة: صح جنت اكله لخالد ازوج وازوج بس والله جنت ادمر واحس روحي تطلع من احجيها بس جان يرفض جنت افرح لان يرفض ظليت الح وهو يرفض حتى امتنعت منه ومكمت اقبل يتقرب عليه ظليت اكله تقبل يله تتقرب مني  وظل يرفض لحد مافديوم صدمني وكلي موافق يزوج هذا الخبر جان مثل واحد وكعني من مكان مرتفع كلش مجنت متخيله حيوافق جنت متاكده ميقبل مصورته ابد يقتنع ويقبل صح مبينت شي كدامه بس طبيت للغرفه وفتت لحمام وكعدت بالكاع ابجي واشهك واضرب على رجلي كل قوتي على وجهي بكل قوتي نهاريت كلش مجنت متوقعه مجرد موافقته هيج حسوي دمرتني تندمت لان كلتله تزوج جان بودي اطلع اكله لتزوج ماكدر والله اموت اذا اشوفك ويه غيري الله يخليك لتزوج 

مر هذا اليوم اني بس ساكته مصدومه حاولت انل بكل الطرق تواسيني وتحجي ويايه بس اني ظليت ماحجي شي بس بيومها فتت للغرفه ظليت اباع على نفسي بالمرايه واحجي ويه نفسي هاي سويت بنفسي ليش هيج خربت كلشي ليش وليش محسيت الا واحد حضني من وره شفته خالد حاضني ودافن راسه بركبتي ويشم بيه مثل طفل ولكه امه ظليت اباوع عليه بالمرايه وبكلبي اكول من يزوج هيج يسوي وياها لو بس الي يسوي هاي حركه 

خالد: قبلت لان شفت حياة بتعدت عني واني هذا الشي ماكدرله وافقت بس حتى ترجع حياة مثل قبل ويايه بس من حجيتها وكتلهم موافقه مبينت اي رد فعل حياة للموضوع مجرد تركت المكان ودخلت للغرفه وظلت يوم كله احسه مقهور وضايجه ومتريد تبين هذا الشي دخلت عليها للغرفه لكيتها تباع على نفسها بالمرايه واحسها بغير عالم جيت حضنتها ودفنت وجهي بركبتها جنت ميت عليها كتلها 

كليلي لتزوج واني مستعد ارجع بكلمتي ومازوج بس لاظلين ساكته هيج 

حياة: نداريت عليه كتله احساس غريب بس لازم اتعلم عليه 

خالد: محد حياخذ هذا واشرت على كلبي غيرج انتي كاعده ومتربعه بي 

حياة: بتسمتله وحضنته كلش قويه .. احبك 

خالد: اني اعشقج 

حياة: اخذت ايده ورحت عالجربايه وعشت وياه ليله يمكن عمري محنساها بين الي مشتاقه اله وبين الي كلبي يوجعني لان حيزوج 

مدري شون الله صبرني وماصار بيه شي واني اشوفه يجهزون لعرسه ويحضروله هو مجان يدخل بكلشي خال كلشي على خالتي وخالتي هي الي تشتري وجيب هي وحسين 

اخذو غرفه الفوك المتروكه الي جانت لام امل قبل فرشوها وجابو اثاث كله جديد امل جانت مقابله ابد لتصرفي ودايما دكلي حتتندمين لان قبلتي ودايما تجي تحضني ودكلي بس انتي مو بس مرت ابويه انتي اختي وصديقتي ماكو غيرج تجي وصير  بمكانج 

جنت افرح بكلامها لان اني مو بس اغار على خالد جنت اغار على امل وخالتي خاف تجي العروسه ويحبوها اكثر مني