رواية فصلية بديلة ( شموخ ) الجزء الثاني الفصل الأول 1بقلم ام ملكوت

وها انا في كل لحظاتي سأبقى معك ولن أترك يدك مهما حدث... 

في بعض الأحيان نختلف...

يحدث زعل 

لكن أقسم  بمن أنزل القرآن الكريم  أنني اعشقك... 

ولا أتخيل الحياة من دونك  ...

ولا أتخيل الليل من دون وجودك  أو سماع صوتك 

فأنا لن اتخلى عنك لا أتخيل كيف تكون حياتي من دون وجودك معي.!!

لو كانت عوائق الحياة ب جمعهن في حياتنا.. 

لن اتخلى عنك حتى لو كان على حساب حزني لن اضيعك من يدي فانت لي 

وأنا اريدك إن تكون بقربي رغم الظروف والتعب سأخذ كل الحزن منك ولن اجعلك تشكو من الحياة 

لا اريد شيء من هذه الحياة سوى وجودك معي 

دمت لي آخر نفس___

.

.

:- اندك الباب وصحت تفضل دخل شهم للغرفه هوه وعمي وخوانه ومحمد ابنه باركولي وانطوني واجب وطلعوا وبقه يمي شهم يمسد على خد شموخ تالي تمدد يمي ومرتضى بيده اخذته

لحضني وبقيت ابوس بي وعينه على شموخ قربهه يمه شهم وباسهه بخدهه جان مايفتهم وبس صافن عليهه لزمتهم شموخ على يميني ومرتضى على يساري ولميتهم لحضني وابوهم يمهم ونمنه للصبح..

_بويه انه انشاءلله الاسبوع الجاي ارجع لأمريكا لان العطله رح تخلص 

_خير انشاءالله ويمته ناوي ترجع تزورنه جان الوضع متازم بالحدود وبقيت بعيد عن اهلك ٣ سنوات هسه ماكو حجه بعد

_افاا بويه انه ماتحجج بالعكس ماتدري شكد جنت مشتاقلكم وودي اجي ازوركم وحتى هسه لو بيدي ابقى يمكم فتره ومارجع بهل سرعه

_جا اذا انت هيج تحس انقل جامعتك هنا واستقر يم ابوك وخوانك وصير انت السند الهم

_ماكدر بويه انه حياتي بدت هناك واستقرت ماكدر اخرب كلشي وارجع لنقطه الصفر

_واحنه شنو ذنبنه هذا جزاتي بيوم خليتك تطلع للخارج وكلت وليدي بس هو بقالي خلي يتهنى ويسوي اليريده تالي ما تالي تفضل الغربه على العيشه يمي ووياي

_بس شنو محمد بس شنو انه فقدت عيني الاولى ماتحمل افقد عيني الثانيه اخوك راح من ايدي والحمدلله ربي عوضني عنه تصور اذا صار بيك شي بهيج قاره وبلد مابي امان والحراميه والمرضى النفسيين مالينه راح اكدر اعيش راح انام وانه مرتاح البال وابني جبيري بالغربه 

_وياك حق بويه بس صعب علي افهمني ماكدر ارجع حياتي هناك تعودت على عيشتي وحتى ضمنت وظيفتي هناك

_استغفر الله ربي لم يا بويه انته الجبير اريدك يمي وحدر عيني لمن اغمض عيني بالكبر اكون مرتاح انت موجود وراح تسندهم وتكون الهم ابو بعدي ،،،

انه وياك والك الحريه حاليا تعيش وين ماتريد وتسوين شنو تريد بس لا تكلي استقر هناك ومارجع بعد لا تفكر حتى تعوف خوانك بلا سند من بعدي انه اكلك روح وعيش حياتك بس اوعدني لمن يطم

ضهري التراب انت تصير ضهرهم خليني انام وماخاف الموت ياخذني غفله ويضلون جهالي يتامى ومحد بحالهم خليني اكول عندي ابني الجبير هو ابوهم يصير من بعدي.

_عمرك طويل انشاءلله وحاضر بويه حقك على راسي انه مافكرت بهاي الطريقه وفكرت بس بنفسي وعيشتي ومن دون ماتوصي انه عند حسن

ظنك مستحيل اعوف خالتي وخواني بدون سند لو لا سمح الله صار وياك شي نام وانت مرتاح ان وين مارحت وشكدما طولت راح ابقى سندهم ويلكوني يمهم يمته مايحتاجوني

_الله يرضى عليك يابني ريحت كلبي الله يريحك ويهدي كلبك 

_بعد روحي ابونه الغالي 

انتهى النقاش بالتراضي راح يبقى عايش بالخارج محمد ويمارس دوامه ووظيفته بس مايستقر هناك او يتزوج شال هل فكره من باله وحلف لابوه حتى

لو حب وحده بالخارج يجيبهه وياه ويتزوجهه هنا ومايعيش بره لو صار بشهم شيةلا سمح الله ربي يديمه خيمه فوك راسنه ويحفضه لجهاله شمعه بيتي وخيمتهه هذا سندنه وونيسنه ..

مرت الايام والشهور وولدت حلى وجابتلنه احلى #جنان شكره وتشبه امها بالضبط والفصعون مرتضى لازمهه بوس كل شوي وانه اكلهه بعد مرتضى اختارهه ماحجيت انه شي ههه ..

وبعدها بكم شهر بس من ولادتهه طلعت حامل وفاجات الكل بهل خبر الصراحه امي وخواتي لاموهه لانهه مانطت مجال لنفسهه وحبلت وبنتهه

بعدها توه ياله ٣ شهور عمرهه بس نعمه كريم وانشاءلله احنه وياهه وتمر هل فتره المتعبه بالنسبه الهه ..

ومرت شهور حملهه بتعب مثلما توقعنه صرت اخذ عنهه جنان يم شموخ انومهه وبس بوقت الرضاعه تجي ترضعهه وتروح ترتاح لان حملهه ضعيف

وشغل البيت ابد ماتنوشه لحدما كملت هل اشهر وولدت ابنها وسموه احسان وطالع يشبه ابوه نسخه منه ..بحيث لمن اصفهم هو وجنان اشوف ساجد

وحلى وهمه صغار وطبعا ساجد مكيف ابنه طلع عليه كلما واحد لزمه وكله يشبهك يبرز عضلاته الهم ويكول ..

_جا غير على ابوه زلمه خشن جا شتردين يطلع على امه مثلا اشكر ومايع ..

من يحجي هيج نضل نضحك ونكول فعلا الولد حلاته يطلع على ابوه شلون هسه وليدي مرتضى طالع نسخه ابوه وخاصه لمن كبر كم سنه وبرزت

ملامحه صار نسخه شهم الثانيه وحتى بالتصرفات صرت احسه مسترجل زياده من صغره ومايحب احد غير جنانه لازم ايدهه نهاركله ويفتر وياهه حتى من ينام يضل لازم ايدهه متعلق بيهه من

الصغر رغم خفت من تعلقه الزايد بيهه من ان الدنيا تلعب عليهم الا اني من جهه ثانيه افرح واكول اخذ بنت اخيتي وكلبهه على كلبي .. 

اما شموخ وما ادراك ما شموخ هاي البنيه شغلت بالي واحوالي من هي بعمر ال٣ سنين ولحدما كبرت صرت احسهه تختلف عن باقي البنات رغم عمرها بس ٣ سنوات الا انها فطنه وعدها لسان

ومن اباوعلهه احسهه اكبر من عمرهه تزعل وتدلع ولمن مرتضى ياخذ منهه حلوياتهه وينطيهه لجنان تكتف اديهه معصبه وتضل ساكته بالاول كلت يجوز تزعل وتسكت بس لا جانت تضل ساكته منا ليجي

ابوهه هي تشوفه وهي الدموع تجري تضل على خدهه تروحله تركض وتشكيله على مرتضى رغم انه مرات من اشوفه هيج ارزله واحجي وياه مايعيدهه بس هي بعمرهه ماشكت الي وكأنها خلقت وعدهه بس سند واحد وهو ابوهه ..

البعمرها زين اذا عرفو يفرقون بين ابوهم وغيره وهيه لا بابا وبابا متعلقه روحهه بي وكلما يجي تركض لحضنه .. ومرت فتره تريده بس الهه وشهم مكيف عليهه يضل مكابلهه وكاعد ونضل نلعب

عليهه اجي بحضنه وهي تعصب وتصرخ وتبعد بيه عن ابوهه واحنه نضحك عليهه جانت مميزه من الصغر ولحد كبرهه رغم مادخلت روضه او حضانه بس جانت ذكيه وتلكفهه عل طاير جنت حيل

فرحانه بيهه وفخوره واحمد ربي واشكره على شهم لان نعمه الاب والزوج والابن .. وارتاحيت وحسيت تعوضت سنيني عند اهلي لمن اشوف دلال شهم لبنته يلي ماشفت منه ولا شبعت منه من

ناحيه ابوي .. والحنيه والدلال التمنيته وماصارلي نالته بنتي وهل شي احسه عوضني .. وهيج كبرت شموخ بين حنيه امهه ودلال ابوهه وعركاتهه ويه اخوهه وصار عندي سلام بعد كم سنه من بعد

اصرار شهم بان نجيب اخ لمرتضى وسميناه سلام لان طول حملي بي ماحسيت بتعب وبالعكس جنت احس براحه ودائما نايمه ومرتاح بالي وانه حامل بي عكس حملي باطفالي القبله .. وهيج صار عدنه

بيوم وليله بسبب تجلط مفاجئ بالاوعيه الدمويه جان يوم مثل الكابوس بالنسبه النه انه وكل اهل بيته .. بيومهه حسيت ابوي يلي راح مو عمي لان من بدايه هو صارلي اب وشفت الحنيه الماشفتهه

من ابوي انفجعنه كلنه بهل خبر ومالحكنه نكمل حزنه عليه قبل اربعينه باسبوع توفت عمتي من القهر عليه وشهم والولد تدمروا تماما بحيث صرت من اباوع لشهم احسه كبر اضعاف عمره وحتى

حودب ضهره عليهم خطيه مرت هل شهرين عليه مثل الكابوس القاتل مايدري عليمن يحزن على ابوه الكبر تحت جناحه لو على امه التربى بحضنهه وجانت شريكته بالسالفه والضحكه ..

ونكدر نكول من هل لحضه تفرقت الصفوف وتطشرت العائله بدال ما جنه عائله وحده هسه انقسمنه ٤ عوائل .. بعدما مرت الاربعينيه تنصب باقر وصار هو الشيخ بدال عمي لان هو الجبير

وبس دارت سنويتهم قسمو البيت وراد شعلان يبيعه بس ماقبل باقر بقه هو عايش بي وانطه فلوس حصه كل واحد بينه رغم شهم اصر وعاش وياه بنفس البيت كم سنه بس تالي هو كذلك انطانه

حصتنه وطلعنه للبصره لان ابوي توفى وامي بقت كاعده وحدهه مالهه احد وعلى رغم من ان التوفى ابوي مازعلت وانقهرت 

بكثر مانقهرت على عمي رغم

 ابوي العشت وياه سنين بس بعمري ماحسيته موجود وعمي

 يلي ماعشت وياه بس هل كم 

سنه،،،،،

الا ان مواقفه وياي تعدت مواقف الاب لبنته دائما جان يحن علي ويسال عني وعن جهالي ويغمرنه بحبه وحنيته يمكن اكثر من شهم حتى لهذت السبب صارت روحته خساره جبيره بالنسبه الي اكثر من روحه ابوي .. 

توفه وبقت امي بحالهه فاضطرينه نستقر بالبصره قريب على بيت اهلي حتى اداري امي لانهه جبيره بالعمر واخوي الجبير تزوج وطلع عاش ببيت مرته

صار كعيدي يعني وترك امي وخواني وبعدها انقطعت تقريبا عن بيت جدي خاصه لمن توفوا أجدادي.. ايقنت ان الاب والام همه اساس العائله ومن دونه يتطشر الضنى ...

اما #ساجد وحلى فاستقروا بابو الخصيب قريب على شغل ساجد والشي الوحيد البقى يجمع الاخوه هوه المزرعه يلي ماقبل باقر تنباع واليطلع

من المحصول يوزعه على كل عائلنه بينه .. صار شهم وباقر بعدما تقاعدوا يرحون يعتنون بيهه صايره بابو الخصيب قريبه علينه بس بعيده عن

باقر وشعلان وهيج صاروا يجون كل فتره يجيكون الامور وشهم صار مسؤؤل عليهه ويروحلهه دائما وساجد ماحب هل شغله ماشترك وياهم فقط حصته القليله ينطونهه اله كل شهر ..

وهيج مرت حياتنه وكلمن استقر ببيته والتفت لحياتي ومرات لمن نلتم على الريوك ياخذله شهم صفنه وتدمع عيونه وتصير حمره اعرف البداخله واحس بي مو هينه الشخص يفقد ابوه وامه بنفس

الشهر وخاصه الام جان دائما يكعد يتريك وياهه من جان بالابتدائيه ولحدما كبر وتوفت وخاصه شهم جان حيل متعلق بامه مو نفس باقي اخوته المتعلقين بابوهم اكثر شي ..

شهم بهل فتره تغيرت احواله صار يكبر بسرعه ويتعب بسرعه انهد حيله بخلاف امه وابوه ورغم هل شي مايوم حسسنه بالملل وجان لمن يكعد ويانه يخلي باله وكلبه يمنه يحاول مايبين ضعيفه

وقهره النه بس احنه نحس بي ونعرف اليصير بداخله واسال رب العالمين ان يصبر كلبه ويقوي ويحفضله صحته وعافيته ويديمه سند النه كل العمر .. 

وهيج مرت سنوات حياتنه ومن بعد ١٥ سنه راح يصير القلم بيد بنتي فخر عائلتنه وفخر ابوها #شموخ...

.

.

" انا #شموخ ومن اسمي قد اشتق في جوفي الرهبان والقوه والفخر

دائما ما ارى البعض يقيس القوه بحبس الدموع او وقاحه الاسلوب

ولكن ؟؟ بالنسبه لي ان ابكي هذا يجعل قلبي يتصلب ويقوى اكثر واما الوقاحه فلم تكن ابدا مقياسا للشجاعه ووالقوه

وليس كل سليط لسان وعالي الصوت يكون قوي فالكلاب تعلو اصواتها لتخيفنا وعندما نهاجمها تركض هاربه خوفا منا

ف #شموخ لم يكن مجرد اسم قد اعطاني اياه والدي بل هو ايضا كل صفاتي وغنيمتي "

.

.

_ولج انه تكولين علي بنت شوارع انه

_اي لو ما بت شوارع ماتلزمين كتابي وتشمريه  بالحاويه بحجه الشقه

_ماشي دتعاي خلي اعلمج بنت الشوارع شتسوي اليوم الا اشمرج وره كتابج بالحاويه

_شحدج حتى امرعدج غير

_خل نشوف ياهي التمرعد الثانيه دتعاي اشووو

:- مثل كل يوم دراسي معتاد لازمه القلم والدفتر واحل بالمسائل ومندمجه رفعت راسي على اثر صوت الطالبات العالي طليت عليهن واشوفهن

وحده كامشه بشعر الثانيه ويتصارخن بقيت صافنه واباوعلهن حالي حال البنات وهنه وحده تاكل بالثانيه مدري شيحسن من يسون نفسهن فرجه للبنات هزيت ايدي ووحده منهن شافتني واجت علي تلعلع وتصيح علي..

_هي انتي شكو تهزين بايدج ماعاجبج امشي ولي بره 

_اولا اسلوبج عدلي ثانيا لا ماعاجبني لانجن بنات شطول الوحده وشكبرهه تتعاركن مثل الجهال وتصيرن فرجه لباقي الطالبات مو شي حلو والصراحه ماعرف شتحسن لمن تخربن صوره الطالبه بهيج تصرفات

_شنو عيني شنو والله ماكو فرجه غيرج امشي ولي من خلقتي بره عايزني انه وحده رخيصه تجي تمسلت براسي

_يمته ماتصير مدرسه الخلفج عود طرديني وثانيا اذا انه رخيصه انتي شكد سعرج

بقت مصدومه وتتنفس بغضب رفعت ايدهه واجت علي تريد تضربني عود لزمتهه وعصرتهه بقوه واجت صديقتهه سحبتهه مني واخذتهه على جهه

رغم البرود الضاهر على ملامحي دمي صار يغلي وجسمي يرجف اتعصب بهيج مواقف وهدوئي يصير سلاحي حتى مارتكب بيهه جريمه 

ولو جايه وعايله بيه الا اسويهه ماسحه وانضف بيهه الصف وانه بنت ابوي بقت واكفه سانده نفسهه على الحايط وتهز برجلهه وتباوعلي تهز راسهه بوعيد 

تجاهلتهه وكملت الواجب شويه ورن الجرس وسمعت ان انتهى الدوام والبنات ماصدكو وانه كذلك بس ماكالو ولا عرفت ليش ولا همني اسال اصلا اهم شي ارجع للبيت من وقت كمت لميت كتبي 

ورفعت راسي واشوف البنات قسم تطلع كذلتهه من الحجاب وقسم تخلي مرطب وكحل وقسم تعدل بملابسهه وتكشف جزء وتخلي جزء كلهه هاي السوالف وهنه بس ١٦ سنه عمرهن

والمشكله ماعرفت ليش يسون هيج هنه راجعات للبيت شكو بعد الحمره والتعديل وهل سوالف وقتهه جنت على نياتي وبعمري ماتطرقت لها اشياء ولا اعرف عن سوالف الصحبه والسوالف المو زينه رغم هواي

اشوفهن واسمعهن بس ما يوم تدخلت او حاولت اسال واستفسر عن سببهن لان يكفي اني اعرف هل شي غلط وتربيت على اساس ان دائما الشي غلط يبقى غلط حتى لو تكونت اله اسباب واستفسارات وعلى هل نهج اني مشيت ..

خليت جنطتي على كتفي وطلعت من الصف وكفني صوت الرعد قبل لا اطلع للساحه طليت من الشباك واشوفهه كاعد تمطر الضاهر لهذا السبب طلعونه من وقت والمشكله ناسيه شمسيتي ماجايبتهه ..

بقيت واكفه بباب الساحه محتاره وانتظر صديقتي تطلع كلت بلكي جايبه شمسيتهه بس خاب ظني وبردت اطرافي لمن مرت نص ساعه وفرغت المدرسه وهي ماكو ترددت اطلع بره بس 

انجبرت لمن الحارس دخل للمدرسه ترواد لذهني مخيلات سيئه منه مشيت بسرعه وطلعت بالشارع انتظر احد يجيلي ضليت واكفه والمطر يهل علي والبرد ماخذ اطرافي وعيوني تتلفت يمين يسار

ماكو بشر كلهه داخله لبيوتهه وبس صوت الرعد المرعب يتخلخل لاذني حسيت بحركه شخص جاي من وراي التفتت بسرعه وشفته نفسه الحارس اجه باتجاهي رجعت خطوات ليوره وهو وكف بمكانه وحجه..

_ها عمو ليش واكفه هنا وين بيتكم 

_عمو متانيه السايق كال هسه اجيلج

_تعالي دخلي للمدرسه على مايجي

_لا لا هوه اصلا بيتنه هنا قريب راح اروح اتمشه اله

_ليش دخلي جو...

عفته قبل لا يكمل كلامه ومشيت بسرعه وانه حاضنه جنطني عن المطر امشي واتلفت عليه خاف يلحكني بس الحمدلله بقه بمكانه وماجه وراي بقيت امشي مسافه عن المدرسه واباوع

عل سيارات بلكي المح السايق جايني من وقت بس ماشفته ولا اندل بيتنه وين واخيرا من بعد ساعه مشي بالشوارع مرت علي مثل الكابوس

شفت اخوي مرتضى جاي بسياره ويه جماعته انصدم من شافني ونزل من السياره جاي باتجاهي بسرعه لزمني حيل من زندي وحجه من بين سنونه..

_هاي شسوين هنا شطلعج من المدرسه بنص الدوام ولج

_همه طلعونه من وقت مادري وين اروح سايق ماجه والمدرسه فرغت بقه بس الحارس وخفت منه وطلعت امشي بلكي اشوف السايق قابل تريدني ابقى يمه 

_وهاي من يمته انتي بالشارع

_مادري صارلي فتره مو طويله 

_خلاص امشي كدامي وانه اعلمج حسابج بالبيت بسيطه ..

عاف ايدي ودار وراي بقيت امشي وهو يدفع بيه خفيف كلما بطأت مشيتي طلع روحي لحدما وكف تكسي ركبنه بي واحنه مبللين ورجعنه للبيت مسافه الطريق

وصلنه ونزلنه رجع لزم ايدي حيل ودخلنه لاكتني امي وشمرني عليهه وعاط بصوت عالي..

_هاج يمه شوفي بنتج وين جانت وشتسوي بالشوارع تفتر من مساع

_يا يمه شصاير ولك ليش تمشي بالشارع شكو احجيلي

_ساليهه والله شنو طلعونه من وقت وانجبرت تطلع بالشارع تفتر لان السايق ما اجالهه..

لطمت امي على صدرهه والتفتت علي وسالتني بقلق..

_ولج يمه شموخ شسوين طلعتي بالشوارع ليش مابقيتي بالمدرسه ليش ماوكفتي بالباب على مايجيج السايق لو خاطفينج هسه وين اولي بزماني ماتكليلي 

_يمه خفت ومنا الحارس شكله مو راحه بقيت اتاني صديقتي الاجي وياهه بس ماكو طالعه قبلي لكيتهه ولوما الحارس لح علي جان بقيت بالباب انتظر السايق لان كالي ادخل للمدرسه وكتله بيتي قريب وطلعت امشي بالشارع 

_اووف ياراسي شسوي بضيمكم انه اليشوفكم يكول عشره ماجنكم هل ٣ جهال عندي امشي دخلي يله سبحي وبدلي ملابسج ولا تعيدينهه بعد والله يجيرنه من ابوج لو سمع ..

هزيت راسي ب اي واشوف مرتضى بعده واكف ويسمعلنه وقابض ايده وعاكد حواجبه مخنزر ماعاجبه لان امي ماسوتلي شي الخبيث .. 

عفتهم ودخلت لغرفتي لاكاني سلام اخوي الصغير اجه يركض علي وانه طاكه روحي من هل وضع النخليت بي اجه حضني وكال..

_ها شموخه ماجبتيلي شي وياج من المدرسه

_لا ماجبت مو اليوم جنت بالمدرسه انت ليش ماشتريت لروحك

_اشتريت وجبتلج وياي عصير هسه اجيبه الج انتي شنو جبتيلي ..

باوعتله بقهر انكسر خاطري عليه خطيه رغم عمره بس ١٠ سنوات بس حنين علي دائما يجيبلي وياه شي من الحانوت مالتهم لحدما صرت انه هم

اجيبله واليوم حانوتنه معزل ومن وره الصار نسيت اشتريله شي من المحل القريب من المدرسه ..

كون الكاه موجود وما ماخذه مرتضى الخبيث دائما ياخذ مني حلوياتي وشغلاتي وينطيهن لجنان بنت خاله حلى

عود هوه مشتريهن الهه ماتدري بي يبوكهن مني والله مال هسه افضحه كدامهه بس اكول خطيه ومافشله واكشف جذبه عاد هيه الروح والريه من اول مافتحت عيني عل دنيا وامي تصيح جنان لمرتضى محجوزه لحدما صارو شباب وواحد حب الثاني ..

مدري شعاجبهم بالحب حب زعاطيط هذا باجر يدخل جامعه ويشوف البنات وينسى ام جنان مو بس جنان.. واخيرا لكيت الاندومي مخليته بين ملابسي حتى لا يبوكه مرتضى

اخذته ونطيته لسلام فرح بي هواي خطيه اخذت العصير وهو راح لامي تسويله الاندومي .. رجعت لغرفتي ذبيت ملابسي ودخلت للحمام سبحت ونشفت وطلعت لبست

تراك طويل لان استاذ مرتضى مايقبل البس شي قصير وضيك يكلي عيب ولازم احترم عبالك كاعده ويه غربه مو ويه بابا واخواني .. نشفت شعري ومشطته وطلعت

اساعد ماما بصب الغده جانت الساعه ب١١ ونص دخلت شفتهه تصب ومبين عليهه القلق والضوجه رحت حضنتهه وبستهه بخدهه وكتلهه بصوت مخنوك..

_ماما .. امي .. حبيبتي انه اسفه والله خفت وقتهه من عنده مو انتي دائما تحذريني من الولد ومن الحارس خصوصا انه بس اخذت حذري لا اكثر

_ادري يمه وانه ماضايجه منج بالعكس خايفه عليج وماكله همج فكره ان بقيتي وحدج بالمدرسه

بالخوف وبالمطر وافتريتي الشوارع بالاخر كاعد تخلي كلبي ينمرد عليج لو هسه اخوج ماشافج جان ضعتي من ايدي لا سمح الله وتخبلت

_لا اسم الله عليج ماصار شي هاي انه كبالج مو انتي تكولين دائما الحافظ الله والمكتوب عل جبين لابد تشوفه العين هاي انه ربي حفضني ورجعني الج سالمه وبعدين انه شموخ التكسر خشوم محد يتجرأ ياذيني

_اي والله يا يمه والنعم منج و الحمدلله ربي رجعج سالمه النه حبيبتي ابوج على جيه روحي فرشي واخذي الاكل خاف يحجي ابوج وياج بعدين ويرزلج لا تضوجين ولو هوه مايرزلج انتي عزيزه كلبه 

_هههه لا ماضوج منكم اني حتى مرتضى شايفه شلون يخبث وياي هم ماضوج منه اكول اخوي وخطيه

_يبعد حيلي حيلج اخوج يحبج بس مايعرف شلون يبين حبه الج لهذا السبب يسوي هيج 

_اي ادري بي بس ماما يشلع البطن بتصرفاته صدك اكرهه مرات من ياخذ شغلاتي لجنان

_اي انه وياج بهذا الشي بس انتي تعرفينه ماياخذ شي تحبي هسه انتي كليلي اكو يوم شغله تحبينهه اخذهه وانطاهه الهه 

_لا بس الماحتاجهن

_جا شنو بعد يا امي واذا على حلوياتج انه بعدين الوي اذانه واتوبه من هل سالفه واي شي ياخذه منج انه انطيج بداله اضعاف

_هههه لا عوفي خطيه ماعنده فلوس يشتريلهه هوه خلي ياخذ من مالاتي عندي هواي انه حلويات انتو مامقصرين وياي

_اروحلج فدوا شموختي بنيتي الحنينه

_اي احسن من ابنج هذا 

_ولج لسانج لا يسمعج شيفك ياختي عنكم تالي

_هههه تمام سكتت ماحجي عليه بعد خل اروح افرش السفره

_روحي يمه روحي ..

عفتهه ورحت للكاونتر اخذت السفره وديتهه للصاله فرشتهه ورجعت انكل صحون الاكل بقه بس الخبز واندك الباب فتحه مرتضى ودخل بابا سلم عليه

ورحتله اركض ترد روحي لمن اشوف طلته علي ويومي مايكتمل بدون شوفه ملامح وجهه المتعبه رحت حضنته حيل وباس راسي ابتعدت وكال وهو يمشي بيه للمطبخ ..

_شلونهه حنايه ابوهه

_بخير اذا ابوهه بخير

_يبعد ابوج وشموخاته

_هههه يمعود لا تسمعك سمائنه شيفكك تالي من ام الغيره

_هههه اي والله

ضحكنه واجه صوت امي لمن دخلنه يمهه التفتت علينه وهي مخوزره وبيدهه خاشوكه الاكل تاشر بيهه بمعنى التهديد وتكول ..

_تحجون علي جنتو ها ولكم 

_لا حشاج ام مرتضى شلون احجي عليج وانتي سمانه وارضنه 

_اي اي صدكتكم انتو الزوج ولا ارتاحلكم

_شمسوين يابه عقال احنه الاب وبنته

_هوه خوفك من العاقل

_قصدج من الفقير

_نفس الشي شنو يعني

_هههه شلونج يبعد بيتي وسمائي

_نحمد الله بخير ويه جهالك شالين حالي

_ميخالف تحمليهم انتي الخير والبركه وكلنه نروحلج فدوا 

_نتحمل جا شنسوي الحمدلله على كل حال

وبي سنون شكلهه ام الغيره عاضته رغم كبار بالعمر بس احس روحهم خضره والحب مالي كلوبهم .. طلعت اخذت جنطته وملابس الدوام فتشتهن وكالعاده لكيت بالبنطرون الف يبوو رغم اهلي مامقصرين علي بشي بس لمن الكه الف لو حتى ربع بالملابس اكيف عبالك لاكيه كنز .. 

بسته وخليته على جبيني واخذت ملابسه للغساله دخل هو سبح وانه رحت شفت غرفتهم بارده فتحت الهيتر ورشيتهه معطر وطلعت وسديت الباب حتى تدفه .. 

رحت للصاله لكيتهه كلهه كاعده عل سفره بقيت واكفه منتظره بابا يطلع سمعته سد باب الحمام ورحتله اخذت الخاوليه الصغيره وبقيت انشف بشعره لان دائما يبقي رطب ماينشف زين الا انه انشفه .. 

كملت وابتعدت باس راسي وخله ايده على كتفي ومشينه للصاله كعدنه وبقينه نتغده والنفس مرتاحه لحدما عكرهه مرتضى وحجه لابوي الصار الصبح بينت الضوجه على ملامحه

_احسن حتى ماتعيديهه وتفترين بالشوارع الله اعلم شصار بيج لو ماشفتج انه 

_اصبر وشوف الا اكله جنت تفتر ويه جماعتك يم المدارس 

_انجبي لج منو كال يم المدارس يعني اذا مرينه من يمهه معناهه رايحين علمود البنات

_هااا شوف انه ماحجيت تره انت كلتهه بلسانك الا اكوله رايح علمود البنات والا انه ليش اكول لابوي واقهره خطيه خوب اروح اكول لجنان وخلاص

_حتى املص رقبتج

_لا فدوا خفت

_شموووخ

_ننننن ..

عيبت بوجهه وهز راسه بوعيد مايخوفني ادري مايسويلي شي بوجود بابا ولا حتى بغيابه .. كملنه اكل وكمت نكلت الصحون للمطبخ لحدما كملت رحت جبت المكناسه وكنست المتطشر من الاكل

ورشيتهه معطر جو رحت للمطبخ كلت اغسل ماعين خطيه امي تتعب ويانه وانه علي بس الماعين عاد اغسلهن بسرعه واروح انام لان كلش تعبانه ماعبالك نص دوام داومت.. 

غسلتهن بسرعه وشطفتهن ورتبتهن بمكانهن مسحت المطبخ ورحت لغرفتي دخلت واجت امي وراي كالت ابوج يريد يحجي وياج .. مدري ليش خفت ولزمت كلبي عبالك اول مره يحجي وياي ..

حضرت نفسي للرزاله مدام على انفراد شي اكيد رزاله مو نصيحه هل مره سديت باب غرفتي ورحت وراهه دخلت للغرفه وهيه طلعت اشرلي اجي يمه ورحت كعدت عل شيزلونه كباله لزم كتفي وكال..

_بابا شموخ شصاير وياج اليوم ليش طلعوكم من وقت

_بابا مطرت الدنيا حيل وطلعونه من وقت وانه ناسيه الشمسيه بقيت منتظره صديقتي رفا ننتظر السايق او تتصل عليه من رقم المديره ويجيلنه بس ماطلعت كلت اكيد اجه عليهه شخص من اهلهه وراحت وياه 

_وشنو مشكله الحارس خو ماسوالج شي او حجه وياج 

_لا بس خفت منه لمن بقينه وحدنه بالمدرسه ومن طلعت بالشارع اجه وراي كال دخلي تاني السايق جوه لان كاعد تمطر علي وانه بدون شمسيه

فخليت وطلعت من المدرسه متحججه ان بيتنه قريب بقيت امشي بالشارع واتلفت بلكي يجي السايق بس ماجه وضعت بالطريق ولكاني مرتضى بس هذا الصار والله

_اي اصدكج بس يا بابا ليش ماتصلتي على احد من عدنه يجي ياخذج جان اتصلتي من رقم الحارس علي او على مرتضى 

_مو ماحافظه رقم واحد منكم 

_ليش بابا انتي ويه سايق ترحين لازم تحفضين عل اقل رقمي خاف كلشي يصير وياج بالطريق امج مو توصيج دائما على هذا الشي..

_توصيني اكثر من مره بس بابا ارقامكم صعبه ماتنحفظ كلهه

_ميخالف بنيتي كعدي وحفظيهن رقمين رقمين هل مره صار هل شي وطلعتي وانه ماردت احاسبج وافشلج كدام خوانج وامج لهذا السبب صحتلج

احجي وياج بحدنه ماريد هل مشكله تتكرر مره ثانيه تحفضين رقمي او رقم اخوج مرتضى واذا ماكدرتي ثنينهن بس واحد منهن وكتبي بدفتر ملاحظاتج للاحتياط اخاف تنسينه بيوم تمام بابا

_اي بابا واسفه لان ضوجتكم وقلقتكم علي ماعيدهه بعد وعد 

_هاذهو مدام شموخ كالت وعد راح اتطمن منا ورايح مو

_اي بابا تطمن ماخلف وعدي لابن الشيخ انه 

_اغديلج فدوا انه يبعد ابوج 

_اسم الله عليك باباتي مدامك ما اكلت شي بالغده اسويلك الكيكه التحبهه من ايدي شتكول

_التردينه بنيتي خير ومدت ايده

_هههه من عيني..

كمت بست راسه وطلعت للمطبخ لكيت امي تعجن اجيت طلعت الطحين والبيض والحليب وكعدت عل ميز وامي تراقبني عرفتني اسوي كيك مثل كل مره .. 

بقيت اخلط المواد وسالتني..

_خو ماضجتي من كلام ابوج

_لا ماضوج انه منكم حبيبتي امي واصلا هل مره نصيحه مو رزاله ههه

_اي الحمدلله انه كلت هسه يرزلهه مدام صاحهه يحجي وياهه بحدهم وتروح تطنكر عليه

_انشاءلله امي ماتنعاد بعد 

_اي ماما حبيبتي ..

مر الوقت وكملت خلط المواد خليت العجين بالقالب وقبلهه جان الفرن يحمه جبتهه وخليتهه بالفرن وامي تراقب يمي حتى لا انجوي .. وقتته ورحت لغرفتي 

جبت كتاب الاحياء باجر عدنه امتحان شهري وانه ضاله اسخت .. خليته عل ميز هوه ودفتر الملاحظات وقلم ومساحه جبت الهيتر شغلته وخليته يم رجلي وكعدت ادرس وكل شوي اشوف الكيكه كملت كم ورقه 

واستوت الكيكه طلعتهه وفرغتهه بصينيه لحدما تبرد شويه تالي كصكصتهه قطع خليتهن بصحن جبير سويت عصير واخذته لبابا دكيت باب غرفتهم طلعت امي انطيتهه الصينيه ورجعت اخذ لاخواني

وديته الهم بالصاله واخذت الي بصحن ونضفت المطبخ اخذت كتابي ورجعت للغرفه مالتي ادرس لحدما مرت الضهريه كلهه وصار المغرب مالحكت انام لان يفوتني اليوم شفتهه صارت ب٦ ونص طبكت الصفحه وكمت اخذت نقالي وطلعت بره لكيت بابا طالع من العصر 

لمزرعته وامي تخبز بره ومرتضى يلزملهه القبق اليوم دوره صرنه كل يوم واحد يلزمه يوم انه ويوم هوه وماكال لا اصلا يكيف يحب يشوف امي لمن تخبز ابن امه بعد هذا .. 

رحت مسيت عليهم واخذت خبزه حاره رجعت دخلت للبيت وتوجهت للصاله كعدت وبقيت اكلب بالتيك توك لحدما خلصت امي خبز ودخلت اجه بابا من بره توضو وامي كالت..

حجيت هيج وماحس الا اجالي صوت بابا فزز كل حواسي رفعت راسي وشفته خازرني وكال..

_ولج شموخ شنو هل حجي مو صرتي جبيره وعاقله ليش تخليني اعصب عليج

_اسفه بابا 

_على شنو اسفه

_ها

_يعني ماتدرين بشنو غلطتي شفايده الاسف جا لج بابا حرام لا تعيدين هل كلام بعد عن الصلاة ماطايره وتتعاجزين حرام يابويه الله ورسوله وصو بالصلاة بوقتهه منو احنه ونكول ماطايره الصلاة

_حاضر بابا ماعيدهه بعد والله

_عفيه بنيتي يله كومي هسه توضي حتى تجين تصلين وياي راح اتانيج

كمت من يمهم وانه خانكتني العبره جنت مستهينه بالصلاة ماعرف قيمتهه ولا اعرف الخشوع بيهه جانت بالنسبه الي شي مفروض وغصب عني اسوي ماجنت حاسه بلذتهه ..

بقيت اتوضه ودموعي تنزل وحدهه لو امي تكتلني مانهضم بكثر مانهضم لمن بابا يزمخ بوجهي .. كملت وضوء جريت نفس نشفت وجهي واديه ورحت لبست محرم الصلاة واجيت يم بابا ابتسم وباسني براسي

ومسح على كتفي يطيب خاطري وفعلا عل حركه طيبت خاطري ابتسمت ووكفنه نصلي كلنه سويه حتى سلام ماما علمته من وهو بعمر ال٨ سنوات حتى يلتزم بيهه اما انه فما كدرت التزم بصلاتي 

رغم امي حاولت تعلمني وانه بعمر ال١٠ سنوات وتحمست الهه بس تالي لمن جابولي ايباد وراهه بسنتين صرت التهي بي وماصلي واجذب على ماما لمن تسالني و اكلهه صليت 

ماجنت اعرف ان هل شي حرام ورغم عرفت بس ماعرف شبيه ماكاعد الحك اصلي من ارجع من المدرسه او قبل لا اروح وصارن يتكدسن علي وبقيت فتره اعاني من هذا الشي

لحدما صرت ماصليهه اصلا بس المغرب لمن امي تكلي كومي صلي اكوم وياهه بالكوه .. كملت صلاتي وكمت اخذت نقالي وردت اروح لغرفتي وكال بابا..

_باباتي شموخه كومي ساعدي امج حبيبتي تعبت هيه اليوم خطيه 

_اي بابا حاضر هوه انه اساعدهه كل مره بس مادريت بيهه راحت تسوي

_اي بابا حبيبتي ..

خليت نقالي عل طبله ورحت للمطبخ بقيت اساعدهه بالصب وبالزلاطه لان ماتخليني اوصل يم النار تكلي اخاف عليج .. هناك وخطر ببالي وسالتهه..

_اكول ماما 

_كولي يمه

_البارحه سمعت صديقتي تحجي وتكول ان اختهه راحت فصليه ومشلوع كلبهه كلساع يكتلونهه انتي من اخذج بابا فصليه هم مد ايده عليج

_لا ماما بس جان يعصب علي لو نسيت اغسل ملابسه او اسويله اكل بس مامد ايده علي 

_جا ليش عفتي مرتضى ورحتي لبيت جدج 

_لان جنت ضايجه منه بوقتهه وكلت اروح ارتاح يمهم فد شهر وهم مشتاقلهم جنت

_هاا يعني مو كلهه تاذي الفصليات ويكتلوهم

_لا امي مو كلهه اكو بعضهم مايخافون الله يسوونهه خدامه ويمسحون بكرامتهه الارض

_هاي شنو والله لو انه منهن الا اشرد شنو ماعندي كرامه وابقى عد واحد ياذيني

_اسم الله يمه لا تفاولين على نفسج هيج وانسي هاي السوالف لا تخليهه ببالج حاليا التهي بدراستج وبس اهم شي للبنيه هيه شهادتهه

_اي بس هسه احنه كبرنه وبابا كاعد يبقى يمنه الصبح والعصر يطلع لمزرعته تكدرين تقدمين على وظيفه 

_بعد راحت يا ماما والبدن تعب وماعتقد يقبلون بهيج عمر

_هاا يعني اذا جبيره بالعمر مايقبلونهم

_اي ماما يفوت قطارهم بعد

_هممم..

كملنه العشه صبينه وتعشينه ردت اغسل ماعين وماقبلت امي خلتني اروح اكمل دراسه عاد عفتهن ورحت لغرفتي لزمت الاحياء ودك دراسه لحدما قصص ماي هوبس 

طفيت وكمت ماستوعب شفتهه صارت ب١١ بليل طبكت الصفحه وتمددت بجربايتي وقتت المنبه ب٥ الفجر ونمت..

- كعدت الصبح على صوت المنبه كمت غسلت وجهي وفرجت سنوني اجه بالي صلاة الفجر رجعت توضيت ووكفت اصلي تالي كعدت اقره بقيه الماده المالحكت امس ادرسهه

صارت ب٧ كمت بدلت ولميت كتبي حسب الجدول وطلعت لكيت امي مسويتلي لفات مثل كل مره انه وخواني صبحت عليهم واخذت لفاتي ودك هورن السايق ردت اطلع وصاحني بابا كال اطلع وياج ماعرفت ليش

استغربت اول مره يطلع وياي وصلنه يم السياره وطلب مني دفتر وقلم عرفني ماكتبت رقمه عندي ولا حفظته كتبلي الرقم وخله الدفتر

بجنطتي انطاني مصرف وركبت بسياره حجه ويه السايق ووصاه ياخذ رقم المديره او الحارس حتى لمن يخلص الدوام يتصلون عليه مثل بقيه السواق

كله حاضر وسلم عليه وحرك السياره مسافه الطريق وصلنه للمدرسه نزلت ودخلت للساحه لكيتهم مصطفين وكفت واجت يمي صديقتي رفا وكالت..

_شلونج ولج صدك تره امس اجه علي بابا قبل لا يخلص الدوام بشوي ورحت وياه كلولي اليوم ان خلص من وقت دوامكم البارحه وفكرت بيج شلون رجعتي

_صار بيه فيلم بس الحمدلله عدت على خير ورجعت ويه مرتضى اخوي

_اخوج الصاك اجه عليج حرامات ماشفته 

_تادبي ولج شنو اخوج الصاك

_اي جا حرام الجذب اخيج صكوك وجنه بريطاني يمه فدوا

_ثكلي ولج رفا عيب تصيرين خفيفه

_اوكي اوكي ضلي انتي هيج ولج حلات المراهقه بهاي السوالف اذا ماتحبين وتنحبين بهيج عمر شلفايده 

_لا والله يعني كل شخص يمر بالمراهقه لازم يحب ويصاحب اووع شتحسون 

_والله انتي الاوع شكد معقده

_هسه سكتي يله عوفينه من سوالف العوع كولي شنو سويتي بالاحياء اليوم تمتحنون غير

_اي جا وحد عنكم احنه نمتحن قبلكم يعني ننحبس لحدما تكملون انتو بخت

_همزين حتى اراجع زين 

_لا ولج تنسين بس تراجعين

_لا ماراجع كلشي بس اختبر نفسي بعدني اتذكر الدرسته لو لا

_اي تمام يله خل نسكت اجت المديره..

سكتنه والتفتنه وكفنه عدل وسوو طقوس الاصطفاف والمديره القت محاضرتهه عل نضافه والمستوى الدراسي كالعاده ..خلصت ولزمنه سره ندخل وحده وره الثانيه على شكل قطار وطبعا لجنه التفتيش مالت الاضافر بالباب 

واكفه منو التعبر عليهه تصف على صفحه شافنهه اليوم خميس عبالهن ماكو تفتيش اكلنهه بخاشوكه همزين ماعندي سوالف الاضافر والالوان ملتزمه بكلشي .. 

طبينه للصف انه وكم وحده و قسم غايبات وقسم موكفينهن بره لان مخالفات من دخلت بصف الثالث ولهسه وانه لعبانه نفسي من هل صف والشعبه

لان افترقت عن صديقتي وهم شعبه مستواهن بالحضيض ملتهيات بالمكياج والاضافر ويتنافسن على ضيق الصدريه وكلمن سنتين ضاله بهل صف ويصيحن الثالث صعب وهو اسهل منه ماكو 

اعترف ان التاريخ والكيمياء صعبات بس الباقي زينات حتى بالاسئله مالتهن بس هنه مايدرسن وتحضيرهن اليومي يثبت هل شي .. المهم كعدت اراجع لحدما اجت المدرسه اخذنه درس رياضيات وكله الصف نام يجبرن الواحد ينعس .. 

واخيرا خلص الدرس واجت ام الاحياء دخلت وهيه صارت هوسه قسم تدور اوراق وقسم تدور قلم جاف وقسم تراجع اليشوفهن هسه مايكول قبل شوي يسولفن ويتمضحكن وطاكات الدنيا بطراك ..

طلعت ورقه من دفتري وشفت سماهر التعاركت وياهه امس كاعد تحجي ويه البنات تدور ورقه مديت ايدي وانطيتهه وحده باوعتلي وكلبت عيونهه وكالت من وره خشمهه ..

_ماريد خليهه الج..

هزيت راسي مامهتمه خليتهه الي وكعدت ضربت المدرسه على السبوره وصار هدوء وبس صوت الهمس بالصف وزعت الاسئله وهيه تكول..

_وزعت الاسئله بعد اي كلمه اعتبرهه غش يله كافي..

بقيت صافنه بالورقه رغم الخوف اليشتاح كلب كل طالبه بهيج لحضه الا اني مطمئنه مايهمني اذا اخذت درجه ناصيه وعندي ثقه ان الحافضته اكتبه وان هل امتحان ماراح يوكف عليه مستقبلي

وهذا تفكيري يلي سهل علي المواد كل فتره دراستي لان التوتر والخوف والتهلوس اكبر اسباب الرسوب بالامتحان رغم دراسه الطالب لهذا السبب

ابتعدت مل البعد عن التفكير بأن هل شي مصيري ولازم اجيب درجه عاليه وهيج صرت اجيب الدرجه العاليه بدون ماتعب راسي بالتفكير ..

انطتني المدرسه الاسئله وابتسمت بوجهي رديتلهه الابتسامه كتبت اسمي عل ورقه وبديت اقره بالاسئله لفت انتباهي صوت بنيه من الموجودات وهيه تكول للمدرسه ماعدهه ورقه رفعت راسي

وشفتهه سماهر غلست وبقيت اكتب رغم المدرسه سالت منو عدهه ورقه زايده بس غلست مو هيه ماتريد مني ورقه خلاص .. رجعت باوعتلهه وشفتهه تاشرلي على ورقه بتردد غلست

سويت نفسي مو فاهمه حتى تتادب ماترد اليقدملهه حاجه غلست وبقيت احل كامت وحده من البنات وانطتهه ورقه اخذتهه نتر من ايدهه عجيب هل بنيه ماتتوب من عجرفتهه وغرورهه عبالك بس هيه

حلوه بالصف وهي الاميره واحنه الخدم هسه لو شاطره نكول وياهه حق تنغر بمستواها اشو كلشي ماكو غرور من فراغ .. 

هزيت راسي باسف وره فتره كملت اول طالبتين تالي انه كمت انطيت الورقه للمدرسه وكالت وهيه تكلب بيهه..

_ها شموخه ماما جاوبتي زين لو لا

_اي ست جاوبت الاكدر عليه 

_يعني عندج اغلاط

_لا بس سؤالين نسيتهم وكتبت بس الاتذكره منهم

_تمام المره الجايه اريدج تجاوبين عليهن كلهن

_انشاءلله ست احاول

_يله روحي طلعي 

_حاضر ست..

عفتهه وطلعت من الصف رحت للحانوت شفت ماعدهم شي يشبع ونص الحلويات مخلصه اخذت جبس وعصير ورحت كعدت عل مصطبه وبقيت اكل 

واباوع للبنات امهات صف اول متوسط وهنه يلعبن مربع بالساحه اندمجت وياهن وتمنيت العب وياهن بس اكول لا انه جبيره مالعب بالعاب زعطوطيه ..

شفت البنيه نفسهه يمكن اسمهه سماهر مادري اذا صحيح لوولا المهم توجهت الي بخطوات سريعه باوعتلهه باستغراب وكفت كبالي وكالت وهيه متخصره..

_انتي شنو حضرتج متكبره على شنو

_تحجين وياي

_لا ويه الحايط ليمج

_اي مو اكول هاي لغتكم ماعرفهه انه

_هه لا والله عود تقصف هيه ام عيون العمصه

_اي عيوني عمصه وانتي شبيج محترك كلبج

_اتقزز من هيج شكولات انه ترى متكبره مدري على ايش هسه لو جميله بيهه باب وجواب اشو جنج كوريه 

_نازل صيتهم الكوريين مادريتي ولا شتدرين انتي ملتهيه باضافرج والسوالف الطايح حضهه

_شنو قصدج عيني اشو كاعده تتبلين علي وانه لحد الان ساكتتلج واكول خطيه زعطوطه 

_اذا تدرين زعطوطه شكو باقيه بصف الزعاطيط بعدج ماترحين ويه البعمرج 

_والله بكيفي شخصيتي وانه حره بيهه

_شخصيتي وبكيفي وفتحت ملهى ببيتي

_تطنزين مو بسيطه انه الج عود عبالج تضمين الورقه عني واسكتلج هين اذا ماندمتج ماطلع سماهر..

_ها طلع صدك اسمج سماهر 

_شنو

_لا هيج مو حاولت اتذكر اسمج قبل شوي وكوه تذكرته لو ما المدرسه تصيحلج بي

_يسواج ويسوه اهلج فاهمه لو لا وعجرفتج هاي بطليهه..

ضحكت باستهزاء ودمي صار يفور حجت كلامهه عن اهلي ورادت تروح ماكلفت مني بس حركه وحده لمن اخذ ثاري اخذه بهداوه ماسوي هوسه واعلي صوتي لو اغلط ..

مديت رجلي كبالهه عثرت بيهه وطاحت على وجهه فوك الصلابيخ وبهل برد اليكرص بقت متمدده وتبجي وجهه ورجلهه وايدهه تزلغن

وصارن يصبن دم .. عفتهن ملتهيات بيهه وكملت عصيري ببرود اجت المدرسه تسالهه شصاير و

حجت وهي تاشر علي ..

_ست هاي شموخ طيحتني وتزلغت وانه مامسويتلهه شي 

_ليش ولج شموخ ليش تسوين هيج بزميلتج مو عيب كبار انتو شكم دوب نركض وراجن تعالن وياي للمكتب يله بدون حجي زايد

_اي ست صديقاتي شافنهه احجن مو هيه طيحتني..

باوعلي بحيره وباوعن للمدرسه وكاللهه..

_لا ست جنه واكفين وفجاتا طاحت سماهر ماشفت شموخ طيحتهه اصلا جانت كاعده بمكانهه وتاكل

_ولج سماهر تجذبين علي وتتهمين زميلتج بكل عين صلفه صدك ماتستحين انتي ومابقالج حيا امشي كدامي

ومن باجر ولي امرج يجيلي هاي صار اكثر من مره تجي شكوه عليج واكول لامج بس تغلس عل مره وصلت وياج تتهمين زميلتج حتى تتعاقب 

_ست والل...

_هشش ولا كلمه وراي بسرعه خلي المديره تتصرف وياج..

سحبتهه المدرسه من ايدهه وراحت فرغ المكان وكمت نكتت ملابسي من بقايا التراب وتمشيت بالساحه واباوع للبنات احس بعدني ماشبعت من طفولتي والوحده تموت بحكم اني البنيه الوحيده

لاهلي وخواني ولد وماكدر العب وياهم او اسولف رغم عندي جنان مرات تونسني بس الاخت تفرق عن بنت الخاله احس بالوحده حيل لان ماعندي

اخت وياي بالبيت ننام بنفس الغرفه ونلبس من نفس الملابس ونجي للمدرسه سويه كلهن هذن انحرمت من عدهن واتمنى يصير عندي اخت ودائما

الح على امي تجيبلنه بنوته صغيره بس ماتقبل تكول عندي انتو كافي نعمه كريم ماريد بعد .. جنت اضوج وانقهر لمن تكول هيج واحسهه

ماتحبني بس تالي اخلي عقلي براسي واكول مادخل تحبني لو لا يجوز تخاف من العمليه وهل ماتريد تجيب بعد .. فزيت من صفنتي على صوت

الجرس توجهت للصف وكلهه طلعت بالساحه لان فرصه دخلت لصفي لكيتهم بعدهم كم طالبه باقيه تمتحن بقيت واكفه قريب الباب واجتلي صديقتي رفا وكالت..

_ها ولج بشري جاوبتي لا

_اي يعني نص ونص 

_ياا ليش اكيد راجعتي ونسيتي هاا

_لا بس اخر كم ورقه قريتهن امس وانه مطفيه وطلعت ناسيتهن وانتي

_انه هم نص ونص الفراغات ماعرفتلهن وكم تعريف مدري منين جايبته من المريخ يمكن ماعرفتهم

_شنو من المريخ هوه لو بالكتاب لو بالدفتر مكتبته النه

_انه درست عل ملزمه والتعاريف الموجوده بيهن 

_يالغبره جا غير تدرسين بالدفتر بي تعاريف من شرح الكتاب مطلعتهن النه المدرسه

_دفتري مو كامل ونسيت اخذ دفتر البصفي 

_جان اخذتي دفتري 

_وين ادري خيه هسه عوفينه من الاحياء هوه اصلا كله اكرهه نوب شكبره مايخلص يمووي 

_ههه اي بس حلو احبه الاحياء انه

_يوو انه بس اخلص ثالث اروح ادبي لا احياء ولا كيمياء بس الرياضيات وهم مدري شلون راح ادبره

_هوه شبي الادبي غير الدرخيات 

_اي هوه انه هذا الاريده

_اي وانتي كلش درختي بعد امج حفظتي كلشي عل كلب

_هههه اي بعد نشوف وين تصفى اذا مادبرتهه ادخل سادس خارجي

_هههي نوب سادس وخارجي خوش تفكرين انتي والله

من وصفتي بغير شكل تخيلت روحي مثلما حجيتي هسه وتقززت خل اروح ادرس احسلي بطلت ماريد العرس امتحنوني ماريد العرس 

_هههههه خبله مو بكيفج..

ضحكت عليهه بقت تطك اصبع وتصيح امتحنوني ماريد العرس هزيت ايدي ودخلت للصف ورن الجرس اخذنه باقي الدروس وخلص الدوام

بس هم مطرت شويه اليوم وهمزين امي مخليه شمسيتي بالجنطه والا جان نسيتهه همين هذا النسيان مدري منين اجالي الناس من تمر بالمراهقه

يصير بوجهن حب شباب او تصير حلوه تصير عدهن انوثه انه لا اكضيهه سمن عبالك كاعد امر بفتره العجز مو المراهقه .. اجه السايق علي

مثل كل اسبوع ويوم خميس تحديدا تنخبص امي بعزيمه عمو ساجد ومرته خاله حلى رغم يكلولهه نجيب غدانه ويانه بس هيه ابد مستمره تطلع شكو بالثلاجه وتسوي تكول مايصير تضل السفره بس اكلهم .. 

سلمت عليهه وردت علي وهيه مخبوصه ابتسمت على حالهه ورحت لغرفتي اجالي سلام كالعاده شنو جبتيلي وياج فتحت جنطتي وطلعتله كيكه وعصير انطيتهه اله وهو طلعلي ايده ضام بيه شي ويريدني احزر شنو بيهه ..

_شنو جايب هل مره اشو مبين شي صغير

_حزري وافتح ايدي 

_هممم ككو

_لا

_نستله

_اي شلون احزر وانت ضامهه ماكدر احزر طلعهه يله 

_همم اوكي هل مره سماح بس تالي شغلي هاي الجمجمه شويه

_ايا نذل ولك منيلك هل حجي هذا

_ههه اسف 

_لا تعيدهه بعد عيب اكبر منك انه

_اوكي هاج هاي هديتج..

فتح ايده وطلعلي بيهه قلم حمره تفاجات وكتله..

_هاي شنو ولك سلام منين جبت هاي الحمره 

_هاذ ابو الحانوت جايب منهن وصاحبي اخذ لامه وانه اخذت وحده الج لان ماما ماتخلي منهه 

_خوش جا باجر هم اجيبلج منهه

_باجر جمعه هههه

_ياا صدك باجر عطله يله على عكبه

_عكبه سبت هم عطله

_جا شني هيه مال ككو بعد من اداوم اجيبلج

_هههه تمام حبيبي شكرا

_العفو يله رايح يم مرتضى انه انتي ارتاحي

_يبعد حيلي ماشي..

ودالي بوسه بالهوى وطلع رغم وحدتي وحاجتي للاخت بس لمن اشوف حنيه سلام تروح عني هل وحشه باوعت للحمره وضحكت على برائته .. كمت ضميتهه بالمجر

لان ماخلي مكياج انه اصلا بس اخذتهه حتى لا يزعل .. كمت سبحت وبدلت لبست دهداشه لان استحي من عمو ساجد وابنه البس تراك كدامهم مشطت شعري وطلعت يم امي اساعدهه

شويه واندك الباب طلع ابوي استقبلهم رحنه اني وامي سلمنه عليهم وابتعدت مديت ايدي اسلم على احسان راد يسلم وسحبت ايدي خليتهه على شعري

جان دائما يسوي بيه هل حركه لمن يجي بس هل مره رديتهه عليه رغم اصغر مني باكثر من سنه بس اطول مني ويبين اكبر همين ..هو الولد الوحيد يلي ماستحي منه او اخذ حذري لان مثل الاصدقاء انه وياه

من الطفوله بحكم ان بيت عمو ساجد دائما يزورونه ودائما تجيبهم وتجي خالتي حلى يزورونه صرنه أصدقاء انه وجهالهه وهيج فتح عيونه مرتضى على حب جنان اكثر مامفتحين عيونه ..

دخلنه للصاله ورحت انه اخذت الضيافه ورجعت قدمتهه الهم انطيت الببسي لكل واحد بيهم وصلت لاحسان اخذه وكال..

_ايييه يوم النشرب ببسي عرسج

_وييع شمالني 

_ها ماتردين تعرسين

_لا شلي بالعرس 

_اي عبالي 

_شلي بالعرس ادرس وادخل جامعه واتوظف عود تالي الله كريم 

_هههه شني هاي جا كولي شيبتي منا لتتوظفين

_بعد احسن علمود ابقى يم بابا محد ياخذني ..

حجيت هيج وامي باوعتلي وكالت موجهه الكلام لخالتي حلى ..

_شوفي يا خيه بدال ماتكول ابقى يم امي اساعدهه بكبرتهه تكول ابقى يم بابا صدك ليكالوا البنيه بت ابوهه والولد ابن امه

_هههه خليهه تشبع حنان من ابوهه جا مثلنه عاش ومات ومافتهمنه منه شي وبقينه محرومين

_جا هوه انه شمصبرني عليهم غير هل شي ماخذه رجلي مني واكول ميخالف 

_ هههه اي والله خيه حالي مو احسن من حالج تصدكين رجلي حتى جاي العصر يكعد يشربه ويه بته ويعوفني 

_اي خيه بعد احنه فات قطارنه صرنه عجايز 

_ايي والله ياخيه ..

بقن وحده ترفع وحده تكبس وبابا وعمو ساجد ميتين ضحك عليهن ويبوسون براسنه انه وجنان راحت عيني على احسان وشفته صافن بيه توترت من نضراته رغم مابيهن عيب بس اضوج من

شخص يصفن بوجهي ويضل مبتسم .. اخذت جنان ورحت لغرفتي نسولف طلعت حلويات خليتهن بالصحون وكعدنه ناكل ونسولف شويه وكالت..

_احم شموخه شخبار مرتضى 

_زين شوفه عينج بس ليش تسالين عنه

_ها احم اكلج هوه صدك يحبني

_منين جبتي هل سوالف ولج مو عيب شنو يحبني نوب هاي

_وين ادري اشو هوه يجيبلي هدايا وحلويات دائما انه واحسان ومن كلت لصاحبتي كالت هذا يحبج بس يستحي يكلج 

_يا فلشهه ولج هاي مو خوش بنيه تولي لا تمشين وياهه شنو هل سوالف تعترفيله وماعرف ايش وين كاعدين باوربا ستري علينه احنه متربايين ماعدنه هل سوالف

اذا تحبينه خلي حبه بكلبج ولا تطلعينه لاي بشر ولا تحجين بي خلي اذا هوه يحبج ينتظرج لمن نكبرين ويخطبج من اهلج 

واذا مايحبج ترى اعترافج ماراح يخلي يحبج بالعكس الولد يكره البنيه التعترفله هيه بالاول وتذب روحهه عليه بحجه الاحبك ومتعلقه بيك ..

_وانتي شمدريج

_انه الادري كاعده بصف عشاك مو صف ثالث

_يعني هيج كولتج ماحجي لاحد حتى لامي

_لا امج تكدرين تحجيلهه كلشي بس احد منا ومنا لا حتى بنات خالاتي لا تحجيلهن 

_لا هذن شيفتهمن صغار بس بنات عمامنه من نجتمع دائما يسالني اذا احب شخص لو لا وانه اكلهن لا اخاف منهن

_اي عفيه لا تحجين تره بس تكولين يرحن يحجن لعمو باقر ويكتلج

_لا يمه ابد والله بعد ولا احجي لاحد اسوي مثلما كلتي وهاي هيه 

_اي عفيه شاطره

_احسج اكبر مني ب٤ سنين مو ٤ اشهر اشو تقتهمين بكلشي انتي

_لان اسمع واشوف واتعض واحفظ مشاكل غيري مثل الدرس ببالي

_هاا خوش جا انه هم راح اسوي مثلج اصير نفس هذا القرد بالنقال لا ارى لا اسمع لا اتكلم ههه

_هههه اي احسلج والله ..

:-بقينه نسولف تالي صاحولنه عل غده رحنه ناخذ الصحون من ماما وخالتي ونوديهن بالصاله لحدما كملنه كعدنه كلنه سويه نتغده وكالعاده عمو

مامخلي شي السمج والتمن والطرشي والمقبلات واللبن كلشي جايب مامخلي شي .. كملنه وشبعنه وكامو يغسلون وانه وجنان ومرتضى واحسان بقينه

نفرغ الصحون من الاكل ونخلي بالجدر ناوشني احسان الصحن ومد لسانه يعيب علي كلبت عيوني وكتله..

_بكيفي وجه الجدر جنك هذا الجدر مخسف ومحترك ههههه

_نننن تحشش هيه ام عيون

_مساع وحده حجت نفس حجايتك وانلطمت على وجهه تالي

_شكالت

_كالت عود تحشش هيه ام عيون عمصه

_انتي عيونج عمصه

_اي مو هيه عيونهه كبار فتشوفني عمصه بعيونهه ههه

_ خو ماسكتي الهه

_مو كتلك انلطمت بالكاع على وجهه

_عاشت ايدج بس هيه صدك حلوه

_علواه حتى ارزلهه شويه تالي اصاحبهه

_ويننككك عموووو تعااال شووف احس....

قبل لا اكمل صياح ركض علي سد حلكي بيده وبقيت اتلاوه وياه حتى اوخر ايده واصيح لعمو عليه وهو يكول بتوسل..

_اشاقه وياج وعلي اشاقه شبيج 

_ممممم

_ها اسف مانتبهت ..

بهتت ملامحه وصفن بعيوني تالي وخر ايده واعتذر ماخليت بالي وياه ورحت اركض بالساحه وهو اجه وراي يركض وصلت يم عمو وهو وكف باب الكلدور وياشرلي حتى ماحجيله عليه ابتسمت وحجيت ويه عمو ساجد..

_احم عمو تدري احسان شنو كال توه

_ها بعد عمج شكال هل سكط 

_اكله احسان احجي لو اسكت..

اشرلي لا وهز راسه بوعيد كلبت عيوني وحجيت ويه عمي..

_يكول انه من اكبر اصير مثل ابوي ساجد سبورتي ومعزب

_غصب عنه شحده مايصير معزب مثلي غير اتبرى منه والا شتكول ياخويه شهم

_اي جا شلون اخوي كريم حتى ويه النسوان 

_لاااه خويه تريد تسوي فتنه ويني وين النسوان انه ليش تجذب كدام مرتي علمود تعاركني وتخرب بيتنه هاا خويه

_حجيت الصدك انه

_اووو وين اولي اليوم ولك خويه ترى هاي المره مو مال شقه تصدك وعلي كفيني كيدهه هل ليله بروح ابوي 

_هههه لا جذب تره ساجد معدل وماعده هل سوالف خويه حلى تعرفينه انتي بعد

_اي اعرفه اعرفه بس ميخالف عينك على حلالك دوه مو هيج هوه يكول 

_هههه بعد خويه انه بريت ذمتي منك انت تصرف

_ وعلي انتو فتنه مانجيلكم بعد بطلنه 

_شحدك حتى افصم ضهرك لو ما طليت علي بيوم

_لا شلون غير اخيي انته وعلي يوميه اروح اسير على واحد منكم عشتو الصغير انه ولازم افركم واحد واحد ازوركم ومن اعزم احد بيكم ماتجون

_يمعود كاضينهه بالشغل انت شايف المزرعه شلون تطر ضهري وباقر وشعلان يجون كل اسبوع جم ساعه ينهلكون موش مثل قبل بعد كبرنه وراح حيلنه مابينه حيل عزايم وفره

وانت مترهي عايف الشغل علينه بس بسيطه بقالك جم سنه وتتقاعد ونسوكك سوك المط* هناك ونشوفك شلون يصيرلك حيل بعد تعزم وتروح عزايم

_اي والله كواكم الله بس كفوني شركم انه بس اتقاعد انشاءلله افتحلي مكتبه واكعد اطبع اوراق

_اي الصبح عل براد 

_ههههه ..

كملو سوالف ودخلنه جوه كملت لم الصحون ومسحت الارضيه ورحت انه وجنان غسلنه الماعين وسوالفنه عل مدرسه وغيرهه كملنه وطلعنه كعدنه يمهم 

ونسولف ونضحك ونكرز حب وكل شوي تناكر عمو ويه بابا علمود المزرعه هيه الشي الوحيد البقى ورثه من جدي بعد وفاته الله يرحمه وبابا يكله تجي تشتغل بيهه وهو يكله شموازيني .. 

احب سوالفهم لمن يجولنه فعلا البيت تصير بي فرحه وحتى عمو باقر رغم بعيد عنه بس كل فتره نلتم ببيته لان صحته تعبانه ومايكدر يجي هو فاحنه نروحله كلنه سويه ومرات كل واحد بحده احنه وبيت عمو شعلان .. 

ونبات عدهم مرات لان بيتهم مال بيت جدي وجبير وابنه جبير مزوجه وكاعد وياهم رغم عمر ابنه بس ٢١ سنه مدري شلون يزوجوهم بهيج عمر صغير ..

المهم صار المغرب صلينه وتعشينه ودعناهم وراحو لبيتهم .. دخلت لغرفتي بعدما غسلت ماعين ويه ماما لزمت نقالي وبقيت اباوع مسلسل لحدما نعست شفتهه الساعه ب١ بليل 

لفيت راسي وتمددت همزين عطلنه راحه نفسيه والله طفيت الضوه ونمت لثاني يوم الضهر كعدتني امي اتغده كمت سبحت وبدلت وطلعت تغدينه وغسلت الماعين ورحت للصاله يمهم وكال بابا موجه الكلام لامي...

_سماء بويه حضروا نفسكم العصر نروح لبيت اخوي باقر اريد اشوفه لان حالته كسيفه كلش ومريض

_اي انشاءالله بس هوه شنو ماخذوه لدكتور ينطي علاج

_يكول ساجد اخذه هوه وابنه وكاللهم هاي تعب المزرعه كاعد يطلع عليه من طين ورطوبه وشتا كاعد تصعد على صدره وهو جبير وصحته تعبانه فرد مره

_اي صدك لهذا السبب اكلك البس جواريب ثخينه وجوبسله من تروح للمزرعه لا تشوف نفسك هسه صاحي ماتحس الا فجاتا وتمرضت استر على كلبي يمعود

_تخافين علي

_جا شلون شعدنه غيرك خيمتنه انت

_ربي يعيني واصيرلكم معين بهاي الدنيا 

_امين يارب العالمين..

ابتسموا لبعضهم واحنه كاعدين نتفرج عليهم رغم اكره شي اسمه حب وماعرف ايش بس لمن اشوف نضرات الحب بعيون بابا وماما وكلامهم سوه احس براحه وسعاده مو خياليه

ومايعرف هل سعاده بس لاهله واحد يحب الثاني ويتعاملون باحترام وحنيه.. ابتسمت برضى ورجعت اكلب بالنقال لحدما مرت ساعتين كالت امي نكوم نبدل ملابسنه طفيت النقال 

وكمت لغرفتي طلعتلي بنطرون وقميص طويل للركبه وحزام عل خصر لفيت حجابي وخليت مرطب لشفتي ومسكارا صفنت بعيوني وحسيتهه فعلا تشبه عيون الكوريين بس حادات وبارزات

كلش عاجباتني احسهن لايكات لملامح وجهي وهذا شي مايتعوض وهو قناعه النفس لمن يكون الشخص يحب روحه ومقتنع بشكله راح يضل بغنى

عن راي الاف البشريه .. رشيت عطر خفيف لبست برجلي اخذت جنطتي وطلعت خليت بيهه النقال وكلينكس والمرطب وبقيت

كاعده عل قنفه بالصاله شويه واجه سلام مبدل ومعطر وكاشخ ذيج الكشخه كعد يمي وبقينه نباوع سوه بالنقال اما مرتضى فياخذله ساعه يفير بس بشعره 

كملوا امي وابوي واجو ومرتضى بعده لحدما عاط بي ابوي ياله طلع وهوه يسد بازرار قميصه ضحكت عليه وطلعنه قفلنه البيت صعدنه بالسياره وطلعنه لبيت عمو باقر وصلنه نزلنه من السياره 

ودكينه الباب فتحه النه ابن عمو باقر سلمنه عليه ودخلنه سلمنه على مرت عمو هدى وعلى عمو وبقينه كاعدين شويه ودخلت جنتهم اكبر مني بسنه

وحامل خطيه سلمت علينه وضيفتنه وكعدت ومبين عليهه السهر والتعب الله اكبر عمرهه ١٧ سنه متزوجه وحامل ومنا تعليمهه والبيت صعبه تره ولو اشوه من اهلهه هيه لو باقيه عند اهلهه جان كتلهه

الضيم وانطوهه لانذل واحد .. صفنت بيهه وتذكرت قبل سنتين لمن جنه كاعدين هاي الكعده ببيت عمو باقر واجاله اتصال باعتباره هوه صار الشيخ بعد جدي الله يرحمه..

رد عليه وعكد حواجبه ونسمع بس ال اي.. تمام.. وتالي ..شنو صاير مافهمنه لحدما خلص مخابره وكال موجه الكلام لابوي..

_خويه شهم راح يجولي ناس عدهم طلابه ولازم نكعد وياهم اليوم 

_اي ليش لا نكعد بس شصاير مافهمت شسالفه

_يكول مشكله بين نسوان بس وصلت للزلم وصار بيهه دم 

_يا ستار شنو صار

_نسوان وحده تكره الثانيه وذابات تهمه على بت عمتهن ومنو اليجي يكلله انهه مو خوش بنيه وعدهه سوالف صحبه وشباب والعياذ بالله واصل الحجي لاخوانهه وابن عمهه وصايره قيامه عليهه والمشكله مو هنا

_اي

_المشكله لاكين بنقالهه حسابات ولد وارقام وهيه تحلف ماعدي شي اخذو منهه النقال وبقت محبوسه اسبوع تالي اجت لاخوهه صور عنهه مو زينه ومحادثات وهسه اخوهه يحوم عليهه مثل

ملك الموت يريد يذبحهه وابوه كوه لازمه عنهه نوب رايح مطلع موقع الولد من رقمه ورايح مكاومهم وداك بيته وصارت سالفه عشاير ويردوني اتدخل

_اووف اوفف نسوان كيدهن عظيم يحيرن الواحد مايدري الصدك من الجذب..

صار هدوء تالي كال محسن ابنه الجبير ..

_بويه النقال بعده موجود عدهم 

_مادري يابويه بس ماعتقد يجوز كسرو من شافو الحسابات والارقام

_تكدر تتصل على ابوهه وتكله يجيب النقال وياه لمن يجون هسه 

_ليش بويه

_عندي طريقه اعرف بيهه البرامج هاي يمته تنزلت ويمته صارت المحادثات

_صدك بويه

_اي بويه بس كللهم خلي يجيبونه حتى يطلع الحق على اصوله بدون تعب وحجي

_هاذهو راح اخابره جا واشوفه..

اتصل عليهم عمو باقر ورد عليه ابو البنيه وكاله ان النقال موجود على حطته ماممسوح منه شي كله يجيبه وياه واتفقوا بعد ساعه همه هنا على ما يلمون عمامهم .. سد الاتصال عمي وبقه يسولف بهاي السالفه وكال..

_اكو هواي هيج حالات تصير مرات كلمه وحده من مجموعه اشخاص تتثبت على شخص واحد تسوي الدم للركب واغلب الضحايا هنه مراهقات مايعرفن

شي تجي بنت الحرام تضحك عليهه وتخليهه تنحرف وتشوف هل سوالف حلوه وتسويهه وتالي تطيح بيهه وتصيح تعالو انقذوني وكلهه من وره هل نقالات المهجومه

_اي بس ياخويه البنيه المتربيه زين واهلهه متابعينهه مايصيرلهه مجال تغلط بس هذن تلكه امهاتهن هاملات بناتهن والاب ملتهي بروحه وضالات هنه لا حسيب ولا رقيب 

_اي ياخويه وهاي البنيه المشكله يتيمه كاعده ببيت عمهه وابوهه بالحشد ٢٠ يوم يبقى بالدوام وخوانهه كلمن متزوج وملتهي ويه مرته ومن صارت هل سالفه كلهم عرفو عدهم بنيه ولازم يديرون بالهم عليهه 

_اي شوف هاي التعم عل بنات وخاصه بعمر صغير 

_اي ياخويه ..بويه هدى كومي شوفي الديوان خاف بي شي منا منا وطلعي الكراسي خليهن اخاف يجون هواي ..

هزت راسهه ب اي مرت عمو وكامت وراحت امي وياهه وكمت انه وبنات عمو وياهه همين رغم ان علاقتنه مو قويه لانهن اصغر مني اصلا عمرهن بين

ال١٢ وال١٠ سنوات بس من اجيلهم يبقن كاعدات يمي وساكتات كمت دخلت وراهن للديوانيه وبقينه ننضف وتسولف امي ومرت عمو سوه ولفت انتباهي لمن كالتلهه..

_خيه بنات هل وكت ينخاف منهن تشوفينهه عمرهه ١٣ سنه وتدور حلوين وصاكين 

_اي والله خيه همزين انه عندي بس هل وحيده والحمدلله عيني عليهه نهاركله متربعتلهه وانصح بيهه 

_اي ياخيه هيه القله احسن والله انه هل ٣ بنات مادري عليمن ادير بالي اخر شي مليت كمت اخوف بيهن واهددهن ياله مشن عدل والتغلط بعد من فكر روحهه 

_هههه لا بنياتج عاقلات وكبار ماعدهن هل سوالف انشاءلله 

_بس كون يطلعن مني ويفكني من همهن ارتاح تصدكين ياخيه باخر فتره لمن انتقلت سويره لمدرسه مختلطه صرت اخاف عليهه ومانام مرتاحهقصص ماي هوبس 

كلت هاي لو تدخل كليه شلون اخر شي كلت يولن ازوجهن قبل لا يدخلن للكليه وعود هناك يم رجلهه تداوم كليات تضل هنا بس الضيم علي

_هههه فلشج وتزوجيهن خطيه 

_اي شبيج انتي هنه يردن رجوله اكبر برابيج بناتي

_هههه والله عليج سوالف يا هدى 

_هههه والله ياخيه ضيم همزين بس هل وحيده عندج لو عندج ثانيه جان شيب راسج 

_هل تلح علي تكلي جيبيلي اخت وانه اكلهه ماريد بعد توبه

_لا خيه ماريد ملتهيه بضيمهم حاليا والحمدلله هذول كافي لا تصيرون كلكم علي

_شهم هم يريد جاهل ها ادري بيهم مايشبعون همه

_هههه اي والله ياخيه هم يلح علي يكلي اريدلي اخت لشموخ كتله ضحكت علي وكتلي اريد اخ لمرتضى وجبت سلام بطلاع الروح تريدني هسه اتقشمر بحجه اخت لشموخ ابد خليهه هيج وحيده فريده احسن يبقى الدلال الهه

_هههه اي على كولتج شفايتلي هسه انه وحيده فريده عند اهلي ومدللة البيت اوو العب لعب

_ههههه اي ياخيه سبحان الله شوف انه عند اهلي الجبيره وراي ٤ خوات وصار عندي بس بنيه وحده 

_اي والله ياخيه هيه الام دائما تطلع عكس امهه يكولون

_اييه ياخيه اييه ..

كملن سوالف شغلت التدفئه مرت عمو وطلعنه وسدينه الباب مالت الديوانيه رحنه للمطبخ نحضر الضيافه وانه بقيت كاعده اكلب بنقالي واجه محسن ابن عمو باقر كعد يمي عل كرسي وكال...