رواية جثة الخرابة الفصل الأول بقلم محمود الأمين
القصة للكبار فقط +21 وحدثت بالفعل
هو ايه المغري في طفلة صغيرة؟
سؤال مقزز انا عارف، ولكن السؤال ده هو اتسأله المجرم في التحقيقات، السؤال اللي اجابته كانت في منتهى القسوة ولو كان بايدي كنت اعدمت المجرم ده في ميدان عام
في يوم واحنا قاعدين في القسم بيدخل علينا ظابط زميل لينا اسمه شاهين.. وكان بيقول ان بنته الصغيرة مختفيه من الصبح وتليفونها مقفول وانها كانت في درس والمفروض انها رجعت البيت من ساعتين.. بنته كان اسمها سلمى وبتدرس في المرحلة الاعدادية، طبعاً عملنا المحضر وبدأت رحلة البحث عن الطفلة الصغيرة.. ولكن بعد 48 ساعة يوصل بلاغ من واحد ساكن قريب من المكان اللي كان فيه الدرس اللي بتاخده البنت وكان بلاغه جثة مرمية في خرابة وشكلها صعب.. اتحركنا على مكان البلاغ ولما وصلنا هناك كانت الصدمة عشان الجثة دي تبقي جثة سلمى، ويبدأ التحقيق في واحدة من الجرايم الحقيقية والصعبة اللي عدت علينا طول فتره الخدمة
..
#جثة_الخرابة
#الجزء_الأول
لما وصلنا مكان البلاغ.. كانت الجثة محطوطه في شوال، وواضح طبعاً ان اللي بلغ طلعها من الشوال بشكل جزئي عشان يشوف ايه اللي جواه.. منظر البنت كان صعب جداً، في كذا جرح في وشها وفي جسمها.. ولكن مفيش اي طعنات سكين ولا اي جروح نافذة في جسمها.. وللاسف اتاكدت ان هي سلمى من الصوره اللي كانت معانا واللي والدها عرضها علينا
وعلى جنب كان واقف الشخص اللي بلغ، كان اسمه سليم قربت منه وسألته
_ هو ايه اللي حصل بالظبط؟!
= انا متعود اعدي من هنا كل يوم، عشان مفيش غير الطريق ده يا اما طريق تاني بس طويل شوية وكله عربيات، وانا بصراحه بحب امشي من المكان ده عشان مختصر وبيوصلني بيتي بسرعة
وانا معدي شميت ريحه مش حلوه جايه من ناحيه الخرابة، والخرابة كان مكان المفروض هيتفتح مشروع ولكن الكلام اللي على الورق غير الكلام اللي في الواقع، المكان فضل مهمل فترة لحد ما الناس بدأت ترمي في الزباله بتاعتها وتحول للخرابه زي ما حضرتك شايف.. لما شميت الريحه قربت ووقتها لمحت الشوال ولما فتحته شوفت اللي جواه وبلغت على طول
_ طيب هل ده حصل قبل كده؟.. انا عارف انك هتستغرب السؤال بس انا لسه منقول المنطقه دي جديد، وعشان كده بسالك بما انك من اهلها
= بص حضرتك هي المنطقه فيها قطاع طرق كتير وعشان كده من اذان العشا مفيش حد بيخرج من بيته غير الناس اللي معاها شغل يعني، اما الاطفال فبيكونوا نايمين في الوقت ده
...
وبعد شوية وصل رجاله الطب الشرعي والمعمل الجنائي للمكان وبدأ فحص الجثة ومسرح الجريمة، واللي من النظرة الاولى اتكلم دكتور الطب الشرعي وقال ده مش مسرح الجريمة، الجريمة تمت في مكان تاني والقاتل رماها هنا
ومع الفحص المبدئي للجثة اتكلم وقال
_ شوف يا باشا مفيش اي جرح من الجروح اللي موجوده على جسم الجثة يؤدي للموت.. كلها جروح سطحية، وربنا يستر من اللي انا شاكك فيه
= هو حضرتك شاكك في ايه يا دكتور؟
_ شاكك ان البنت تعرضت لاعتداء، وهو ده اللي تسبب في الوفاه بس ان شاء الله لا، وهيطلع ده مجرد استنتاج بس.. بس ان شاء الله بعد التشريح هوفي حضرتك بتقرير
...
شكرت الدكتور ووقفت مع نفسي خمس دقايق بفكر في كلامه، مين المجنون اللي ممكن يعمل كده في طفلة صغيرة؟
ده لو كلام الدكتور صح هتبقى كارثة، ومش عارف شاهين هيستحملها ازاي؟!.. وبعد ما خلصوا اتنقلت الجثة للمشرحة ورجعنا على المكتب.. في الوقت ده الرائد اشرف كان في مأمورية ولسه راجع.. قعدت واتكلمت معاه وفهمته كل اللي حصل، اشرف كان مصدوم هو كمان ومش عارف يرد ولكن للاسف شاهين كان لازم يعرف، اتصلت بيه وبلغته انه لازم يجي على القسم حالا
وبعد اقل من ساعه كان وصل.. كان عارف انه في حاجة وشه مخطوف ومرعوب منه انه يسمع خبر ممكن يخلص عليه
اتحركت معاه وقولتله اننا لازم نروح مشوار
ومشي معايا من غير ما يتكلم ولا كلمة لحد ما وصلنا للمشرحة، رجليه تقلت كان بيترعش والدكتور بيفتح التلاجه وبيعرض عليه الجثة اللي اول ما شافها حضنها وفضل يعيط وبعدها وقع واغمى عليه.. اتنقل طبعاً للمستشفى وكان عنده صدمه عصبيه حاده
الله يكون في عونه، ويصبره على فراق بنته
رجعت على مكتبي بعد ما اطمنت عليه في المستشفى وطلبت من الرائد اشرف انه عاوز تحريات عن المقدم شاهين صابر، اكيد اللي عمل كده في بنته كان غرضه الانتقام منه هو، بنته لسه طفله صغيره واكيد ملهاش عداوات
واتحرك الرائد اشرف عشان يعمل التحريات مع رجاله البحث الجنائي ونعرف مين المشتبه فيهم؟
بعد 72 ساعة ظهر تقرير الطب الشرعي واللي كنت بتمني يطلع عكس كلام الدكتور اثناء فحص الجثة الظاهري في الخرابة، فتحت التقرير وللاسف كلام دكتور الطب الشرعي تطابق مع التقرير
التقرير كان بيقول ان سبب الوفاة هو اعتداء (ج) وتسبب في نزيف حاد ادي الي الوفاة.. كنت قرفان ومش مصدق ان في بني ادم ممكن يعمل كده.. بني آدم ايه ده خنزير
...
قفلت التقرير وانا حاسس بخنقة طلعت سيجارة في التانية وانا اعصابي بتتحرق والصداع هيفرتك دماغي، وفي اللحظة دي دخل عليا الرائد اشرف وفي ايده التحريات اللي طلبتها منه وكان على وشه ملامح صدمة وزعر اول مرة اشوفهم على اشرف وسألته
_في ايه؟
=ده ملف التحريات اللي حضرتك طلبته
...
اخدت منه الملف وانا قلقان وبدأت اقرأ
وبعد ما خلصت فهمت ليه الرائد اشرف مصدوم بالشكل ده.. المقدم شاهين عنده عداوه مع شخص اسمه سيد ابو الدهب وده شخص كان متهم قضيه سلاح كبيرة واثناء مداهمه المكان اللي فيه سيد، المقدم شاهين قتل ابنه عاصم
وده اللي خلى سيد ابو الدهب عاوز ينتقم من المقدم شاهين وحصل وهدده في المحكمة انه هينتقم منه في اعز ما يملك
الشخص التاني وده كان واحد مشتبه فيه بس ولكن الاسباب اللي في التحريات متخلهوش متهم وهو الاستاذ حسين المدرس اللي كان بيدي سلمى واصحابها الدرس، وعلى حسب التحريات الشخص ده سمعته في المدرسه مش كويسة وقبل كده اتحول للتحقيق عشان في طالبه اشتكت انه بيحاول يقرب منها ولكن الشكوى طلعت كيدية وكل البنات اللي بتاخد عنده شهدوا معاه وقالوا عليه بني ادم محترم.. واكيد المقدم شاهين ميعرفش المعلومات دي
المشكله في الشخص التالت وده اللي خلى الرائد اشرف مصدوم، والشخص ده يبقى اخو المقدم شاهين.. واسمه صبحي
صبحي مريض نفسي وكان محجوز في المستشفى فتره كبيرة واللي دخله المستشفى اصلا هو المقدم شاهين، والمشكله في السبب
صبحي حاول يعتدي على بنت عنده في المدرسه لانه كان مدرس وقتها.. وكانت فضيحة كبيرة اوي.. ووقتها النيابة حولت صبحي للجنه نفسيه ولا اقرت انه مش طبيعي.. ولكن اللي نفع المقدم شاهين في الموضوع ده انه صبحي فعلا اخوه ولكن مش من نفس الام وده اللي خلى المقدم شاهين يتبري منه بعد دخوله المستشفى
....
قفلت الملف وانا مش متخيل ان اخ عمل كده في بنت اخوه وكنت بتمنى ان اللي يكون عملها واحد من الاتنين التانيين ولكن في اللحظه دي بيوصل بلاغ من واحد ساكن قريب من الخرابة والشخص ده بيقول في البلاغ انه كان مأجر اوضه عنده لواحد غريب عن المنطقة وان النهارده المفروض كانت نهاية الايجار ولما راح وفتح الاوضة لقي في اثار دم على الارض وعشان كده ابلغ الشرطة.. اتحركنا على العنوان واول ما وصلت قبلت الراجل وسالته عن اسم المستاجر والصدمه لما قال على اسم الشخص عشان ده يبقى..
