رواية دموع خرساء الفصل الأول 1 بقلم ورود الخالدي

مقدمة:

بطل روايتنا هو شاب عراقي من عائلة ريفية معروفة ولها شأن..شهم طيب شجاع لايتأخر عن تقديم يد العون لاي شخص يصادفه يجمعه القدر بفتاة خرساء..حسناء طيبة تعاني من مشكلة نفسية تسببت في فقدانها للنطق ماهي الاحداث الدرامية التي ستجمع بين البطلين هذا ماستعرفوه من خلال احداث الرواية..محتوى الرواية جديد وغير مطروق ..ويعالج موضوع حساس جدا واثر نفسي كبير فالبطلة خرساء ولغة التفاهم بينها وبين البطل صعبة..فيها شرح وجداني رائع اتمنى ان تروق لكم 

#دموع_خرساء

#البارت الأول 

ماجد::::

بوية ترة دولبتني وخذانه الليل خلني اجيبلك عربانه اوصلك لابو التحليل!

ولك شني دولبتك..شايلني على علباك انته!!

مو الليل اخذنا وهالتشوف الدنيا تصب  والسياره وكفتها بعيد خلني احطك بعربانه حتى تحلل ونرد على وكت!!

شني مكرم انه وتحطني بعربانه مال معوقين سد حلكك..شمالني اصعد بعربانه؟ ..شو جنك جاي وياي على عمه عيونك!!!🤭🤭

بويه احطك على راسي بس هم روحك اخذنه الليل هسه يخلص السرة مال الوادم ومانلحك ناخذ التحليل للطبيب شني نبات هنا الليلة؟؟

ابوي يمشي على كيفه وابو التحليل بعد شارعين عن الطبيب الدنيا تمطر..ونمشي بسد القمريات مال المحلات  وبطلاع روحي يله جزينا هالشارعين سوينا التحاليل وردينا..للطبيب شافهن وكام يحجي ويه ابوي:

حجي..ترة نسبه الدهون والكولسترول صاعده عندك واذا تضل تاكل مالح ودهنيات وتدخن موبعيدة تصير عندك ذبحه..

على بختك دكتور تره انه مابيه شي بس اهلي يلحون عليه هيج اجيت افحص واروح!!

انت موكتلي عندك ضيق نفس ..وتعرك هواية ومرات يصير عندك الم يم كلبك؟؟

اي مو..دوم هيج نوبات يوجعني سدري؟؟

وهاي اعراض تصلب الشرايين تحاليك كدامي..ولازم تلتزم بالعلاج ومتاكل لادهن ولا ملح هواي.. وتقلل التدخين قدر الامكان

الله ارحم الراحمين دكتور وكلمن يموت بيومه..

التفت علية...وكام يسولف وياي وكلي دير بالك ع الوالد وخلي يلتزم بالعلاج واهم من العلاج نوعية الاكل كتبتله علاج مؤقت لمدة اسبوعين ويرجع عليه

طلعنا من الطبيب همزين الدنيا صفنت شويه علما وصلنا للسيارة اول ماصعدنا للسيارة ابوي كال:

ماتكلي..شني هذا الطبيب ابو صماخ الخذتني اله!!

شبي بويه شعلينه بصماخه قابل راح اناسبه؟؟

شلون شعلينه بصماخة..كلما كبر صماخ المطي تزومل..بالزايد؟؟🤗🤗🤗

هاي فوكما ينصحك سويته مطي؟؟

ولك هو هذا فهم علم..وخذتني اله...الدهن والملح شعليهن بكلبي!!؟

شلون شعليهن يابويه..وانت تتريك دهن حر...والضهر تغط الزوري  بالملح وتكرطة؟؟

طاحظ المدارس العلمتك.. عود انت مخلص كليه يبعد شيبي ولك الدهن الحر شعليه خلصنا عمرنا ناكل دهن حر شو حريشي مابينه!!

انه اسوق..واهيس ابوي عطب كلبي يعاند وما يعرف شني السالفه

بويه شني السالفه شني تغشم روحك هاي انت التفتهم والناس تمشي بشورك هيج تحجي!!

اهووووه راح يخلصها عليه..انته وانته؟؟

بويه خصم الحجي بعد ماتاكل لادهن ولامالح ..هو شني الكلب..غير مشكل بشرايين والشرايين مثل الصوندات الزغار وانت تحشي بيهن دهن وملح..شلون ماينسدن؟؟

والله ما ادري بس انت لاتسويهه رطينه على امك ..تره تريدلها...سالفه تسولف بيها؟؟

ها تخاف من الحجية خاف تكلك كبرت؟؟

شني كبرت ولك انه الحديد الويه..

كفو..كفو ابو راشد؟؟

الدنيا تصب حسبالك ضامة المطر من سنين..ابوي  ورث جكارة..وكام يتصفن..بس ابوي ماجان هيج يعاند بس هالسنين الاخيره بين بيه الكبر والتعب..وره ما استشهد اخوي راشد كلش تغير طبعه...راشد استشهد بتحرير الموصل..من يومها وابوي كام يتعب شويه شويه صدك جان يلوي الحديد بس وسفه الوكت مايخلي البشر على حاله..الدنيا ليل والمطر يصب وسكته كلت خلي اونسه..كمت اغني:

بين عليه الكبر والحيل راح الحيل..

بالغربة راح العمر ومساهر ويه الليل

لاهلي ولاصحبتي..ضليت انه بغربتي

حكي من اصب دمعتي واصرخ واصيح الويل 

التفتت لكيت ابوي مخلي جماغة على عيونه بساع وكفت السيارة ..وكتله:

شالسالفة بويه عود ردت اونسك انه..

كمل بويه كمل حسك حنين يوجر بالكلب..مثل حس المرحوم..اوف يابويه ياراشد اخذت حيلي كله

لا بويه لا اكمل ولاشي..عود ردت اونسك انه..

سكتت كلت هسه انه وكتها اغني مو خوش طلعة مني ابوي كلبه مغيم ..على راشد ولا جن صاله ٣سنين من استشهد حسبالك اليوم جاية جنازته..اي حقه كلب والد..وحتى بزره الماجد ماكو حتى تسليه.. عرسنا سوه انه خلفت وهو. مالحك يخلف..

خلص التبليط وصلنا للسبيس ومناك نطب ع الكاع مالتنا شني المطر الليلة ماله نيه يوكف شو الدنيا نهدت فرد هده ...همزين ماعدنا زرع جا خاس بهالمطر القوي..بعده طريق السبيس ما خلصان واشوف سواده واكفه بنص الدرب شني هاي بهالليل شو جنها مره..مشيت بسيارتي اي والله هاي مره شعدها طالعة بهالمطر..صارت كبال السياره ابوي شافهة بالضوه كال:

انه ابوك ياراشد شني هالمره الواكفه بنص الدرب..

شمدريني بويه خلنا نوكفلها خاف معتازة شي..

وكفت فتحت الجامه تدنيت مبينه مره متوسطه بالعمر بيضة حمرة ماشايفها بعربنا كتله:

ها..خويه خو ماكو شي؟؟

هي ادنت يمنه؟؟

مروتكم عيني لحكو علينه بيتنا وكع على روسنا ..وبناتي جوة وحدهن واهلنا بعاد اني عود رايحتلهم بس المطر اخذني..

صعدي خويه صعدي ..

فتحت الها الباب..وصعدت:

خويه وينه بيتكم شو ماشايفج بعربنا. 

احنا كاعدين ابيت حجي سلمان القديم..اني وبناتي اني ارملة ابنه...صار ٣شهور من كعدنا هنا؟؟

ابوي كلها

مني حجي سلمان..بس لا بيت حجي سلمان ابو صلال؟؟

اي حجي هو..

عمي شكعدكم بي البيت طايح وكله حياية وعكارب..

هاي قسمتنا حجي السالفه طويلة هسه بناتي وحدهن كتلهن المطر والبرد

وانتي وين رايحه؟؟

جنت رايحة لبيت حماي ابو زهرة يم الجسر..اكيد تعرفه

بويه شيوصلج للجسر بهالمطر..

غمزت لابوي ابوي بساع استلم..كلها:

امشينا عمي امشينا نطلع بناتج..بالاول وتالي..نروح البيت ابو زهرة..

بكيفك حجي

مشيت بالسياره لبيت ابو سلمان بس ما كدرت اوصل جوه  بعد اكو مسافه طويلة لبيت ابو سلمان لان الشارع صاير روبه من الطين وكلت السيارة تطمس بس ادنه زايد...المره كاعده بالوره بس خطيه ناكعه واطك سن بس من البرد..كلت لابوي

بويه ضل هنا يم المره لاتنزل سدرك مو تمام انه اروح اجيب..البنات وارد.

.والتفتت عليها:

خويه لا تنزلين انه اجيبهن؛

خاله مو هنه ميعرفن احد....ويمكن يخافن منك وميجن وياك..خلي اروح وياك!

شني هنه زغار كلش..

لا اثنين عمرهن ١٢سنه والجبيرة عمرها١٩

ابوي كلها

يخافن شني..ذني حديثات كلهن عرايس.. ..بويه روح جيبهن وخلي تلفونك بجيبك عود اذا ما قبلن يجن دك عليه وامهن تحاجيهن..منا..بس دير بالك النشمي

اي بويه ..

نزلت امشي على كيفي والكاع زلكة يمكن ربع ساعة يله وصلت لبيت ابو سلمان..صدك البيت واكع..والمطر طاب جوه..يمكن نص متر ماي بالحوش ادنيت وصحت:

يالله..بويه يالله..وينجن اخواتي..

ماطلعن..فتت يم الباب المهدم وصحت

خويه خلن شي على روسجن جاي اطلعجن بعدني احجي طلعتلي بنيه.. ما شفتها زين بس اسمع صوتها:

منو انت وينها ماما..

خويه طلعن هنا امجن ودتني..

لا منطلع ماما متقبل..

خويه هي ودتني عليجن..ها..حتى كالت عدي ٣بنات والحوش طاح علينا

لعد هي وين؟؟

ضلت بالسيارة خويه طلعن رحمه لاهلجن..خلي اخذجن يمها..

اي هسه خلي اصيح غصون وغاده

وبعد ما سمعت حسها.وره شويه شغلت ضوه تلفوني وكفت جوه سكف مهدم على ساعة يوكع على راسي باوعت اجن اثنين بنات  يتشابهن ناعمات جنهن لعابات..وحده منهن كالت:

عمو غاده متقبل تطلع نجرجر بيها متقبل تطلع..

طلعن اوكفن هناك انه اجيبها..

لا متجي وياك متقبل..

هي اختجن الجبيره.

اي..

فوتي كليلها تخلي شي  على راسها انه افوت احجي وياها و اطلعها..

بس هي متلبس حجاب؟؟

اهوووشهالورطة..يكولن ماتلبس حجاب وامهن تكول عمرها ١٩سنه شلون افوت جوه ماترهم..زين والمطر يدك على روس البنيات 

ادنيت صيحت..

خويه طلعي رحمه للكعبه مو كتلنا المطر والبرد والطين.

.بس  ماترد

اكثر من مره صحت وحده من البنات كالت:

عمو مترد عليك مو اختي متحجي!!

ماتحجي شني؟؟

اي متحجي بس تسمع..

شني خرسه..

اي ماما تكول عليها خرسه..

استغفر الله هاي شلون سالفه عوجة..طلعت خرسه وانه صار ساعة اصيح..لزمتهن من اديهن طلعتهن وكفتهن بسد النخلات من المطر ورجعت كلت امري لله اذا خرسه شبيدي اجرها كوه واجيبها واحتمال مو خرسه وبس يجوز خبلة هم لو عدها نقص كلشي يصير..

فتت جوه رجعت طلعت تليفوني ضلمة هندس والكهرباء طافيه همزين تليفوني بجيب قمصلتي ماتبلل..شغلت الضوه مره ثانيه البيت من كدام طايح بس الغرفة الجوه مابيها شي بس الماي طابلها يعني صايره هوره من ماي المطر اي بيت قديم وناصي ..واكيد يغرك بهيج مطر...بس فتت شفتها من بعيد ادور بالكاع مدري شدور بيدها جداحة مشغله لايت ومدنكة مدري شلابسه بجامه وفوكها بلوز مدري تراك..مدري شلابسه بس مو دشداشه شافتني فتت وكفت ادنيت كتلها:

خويه اخواتج..بره كتلهن..المطر..و....

بعدني مامكمل..احس كلبي وكع مني من شفت وجهها..اويلي ع الكعبه شني صدك جذب..هاي بنيه صدك لو رسم دخيلك..يبو فاضل ..شني هالعيون..شلون تصد بيهن عليه بلاجكتورات مو عيون وزرك مثل الشذر..والرموش شاكه الخدود..والحللك حسبالك فصمة مال مشمش....اديهه مبللات مدرس شجانت ادور..وشعرها شايلة نصه ومخلية نص بس مو شعر حسبالك بريسم..ومصطر..والوجه حسبالك ماعون كيمر من امه..ابوي استلك...شكد شايف نسوان حلوات ةبس هيج خلقة بعمري ماشفت..والنوب..عافتني ورجعت دنكت ادور..انه صافن تدودهت..بعد لا اخذ ولا اطي..النوب الرجلين مثل صمون المصلحة ومبطبطات بالماي..واللشه مربربه استغفر الله عود هاي اني الخير..الخوش ادمي..روحي راحت..ومخي احسه..صار شوربه بعد مايجمع من الصفنه انتبهت على روحي..حاجيته:

خويه شدورين بالماي ماتكليلي..خطية اخواتج شبعن مطر..

كامت اشرتلي بايده هيج..لمت اصابعه عود اصبر..

يربي شدور فلوسها ذهبها بالماي. 

خويه ادور وياج شمضيعة وحتى لو مضيعه شي..خلي اخذج للسيارة..انتي واخواتج وانه ارد ادوره الج..بس تعالي..

التفتت جابتلي قفص من هذه الحديد..مال البلابل واشرتلي عليه..

شني الضايع منج ..شني هذا القفص؟؟

ورجعت تأشرلي عليه:

شني شبيه القفص..مال البلابل؟؟

ما افتهم شتريد تكلي اخير شي كتلها

شني ادورين علي طير ضايع بهالمطر::

هزتلي راسها يعني اي..

باوعت داير مادايري ماكو شي بس الماي وخطية غراضهم كلها غاطة بالماي هسه وين الكاه الطير كتلها:

خويه امشي وياي..وانه ارجع ادوره الج..

ما قبلت تهز براسها عود لا..

امري لله انه هم كمت ادور وياها..دورت ماكو بالكاع رفعت الضوه شفته لابد ع النقطه مال الكهرباء بس هم ناكع مايكدر يطير كمشته..وجبته..يمها:

هو هذا الدورين عليه..

تبسمت..اشتعلو..عمامي..موشفه ..ضيم..اي وعلي هو هذا الضيم مال الله

خلته بالقفص..وسدت باب القفص..

ردت اخذه منها شو خلت ايدها عليه ماقبلت اخذه..كتله:

يله خويه خلنا..نطلع..التفتت..شني قابل اخذها هيج لاهلي لابسه بجامه وفوكاها ..بلوز مدري فانيلة..شلون اطلعها هيج..كتلها:

خويه وين عباتج..

هزت راسها..

شني ماعندج عباه..

اشرتلي براسها..يعني اي..

خويه دشداشه طويلة لو حجاب..اشرتلي بره 

وطلعت وياي شفتها تأشر على مكان الواكع منه السكف شفت بوفيه طايح عليها الحايط افتهمت تكلي هدومنا هنا ..هاك استلم قهر ثاني..هدومهن جوه الطابوك شلون اطلعهن..للصبح ما الحك ادني الجدم والطابوك هذا...فتت جوة مالكيت بالغرفة بس ميز عليه دواشك..ومخدات..دورت لكيت  بطاطين وجرجف ابيض ثخين اي هذا يفيد..كتلها :

هاج لفي روحج بيه اطيني هذا القفص....

اطتنيا لفت روحها ومدت ايدها..تريد القفص..

هاي شبيها..يمكن خبلة صدك..هسه شبي هذا القفص وكاتله روحها عليه حسبالك ابوها بيه..مو بلبل مهلس..

وبالف ياعلي يله طلعنا ووصلنا يم البنات خطيه هم يرجفن البرد كتلهن:

امشن وراي على كيفجن لاتوكعن..والزمن اختجن وحده منا ووحده منا..

مشيت وكل شويه التفت..هنه يمشن وراي وتعطلنا هم كوه وصلنا للسياره اول ما وصلت ابوي كالي:

بويه وين صرت شني موديك ..لمكة..انه ؟؟

بويه رحمة للكعبة انه بيا حال هسه ماتشوف الطين واصل لهامتي؟؟

صعدن البنيات بالوره يم امهن والجبيرة حايره بقفصها..امها خذته منها ومدت ايدها الها وصعدتها كعدن كلهن بالوره سيارتي فلاونزة ..من هاي الدبل قمارة..ومشيت..شويه..ابوي هم رد كلي:

شو تعطلت؟؟

اي غير البنيات مايعرفني كوه قنعتهن يجن وهاي البنيه الجبيرة ماتحجي ولكيتها ادور على هالطير..بالماي..وهم اخذتلي وكت ياله لكيته..

ابوي التفت عليه:

بويه ياطير..يادهر انه موديك على طيور لو تجيب البنات وتجي!!

بويه ماتقبل تطلع البت ماتحجي خرسه!!بس تأشر بديها..؟؟

خرسه..؟!..لا بروح الحسين!!

امها كالت:

اي حجي بنتي الجبيرة خرسه..وهذا البلبل مربيته من جان بعد توه طالع من البيضة توكله بديها ويطير ويحط على متونها تحبه للطير ومعتزة بيه:

خاله اعذريني والله حسبالي مو بس خرسه كلت هاي خبلة شبيها كاتله روحها على هالطير المهلس؟؟

ابوي رد:

اي بويه الربه يكتل..حتى لو طير..انه جنت مربي..حنجله زغيره..ومن حبوبتك الله يرحمها غافلتني وذبحتها...حتى الاكل كطعته..اسبوع؟؟

شني هاي؟؟

مثل ما اكلك النوب هيه خرسه يمكن متعلمة عليه..

شغلت ضوه السياره..ابوي كلهن

كتلجن البرد يبويه بس لا تتمرضن 

التفتت على ابوي بعدين عليهن وكلت

 من رخصتك بويه...خويه اليوم باتن يمنه انتي والبنات شوفه عينج الدنيا تصب وعود نخابر ابو زهره ونكله الجماعة بايتات يمنه يم الحجية..

يااا..ذكرتني موبايلي بالبوفيه والبوفيه صارت جوه الطابوك؟؟

ميخالف انه اوصلجن وارجع اروح لبيت ابو زهره اكله الجماعة عدنه؟؟

لا خاله لاتروح ولاشي..عود الصبح  الله كريم

ابوي كلها:

لا بويه مايصير هاي مو اصول..انتن حسبه عياله؟؟

حجي تره ابو زهره موبحالنه..

شني مو بحالجن غير عم البنيات هذا شلون حجي..

حجي الحجي هوايه انت متعرف شي..

كلت:

بويه خلنا نوصل للبيت والله كريم