رواية دموع خرساء الفصل الثاني 2 بقلم ورود الخالدي

ماجد::

السيارة تمشي والدنيا بعدها تصب ما اكدر امشي سرعة..كلشي يصير..والدرب سبيس مو تبليط صارت كعدتها كبال المراية بس شلت عيني صارت كبالي..عيونها شني هاي من عيون..كل عين جنها بحر..ازرك ..شذر وكبار مكحلات وحدهن هيج من الله والنوب هي ترفه وبيضه جنها.. العافيه ولافه الجرجف الابيض عليها بس طالع شعرها من كدام اي مبينه ماتعرف تتلفلف ومن حجي امها واخواتها عرفتهمن مو من منطقتنا حجيهن مثل حجي اهل الحلة لو بغداد..مدري ليش انكسر خاطري عليها..اويلي ربي الك بيها رادة خلقت هالجمال..الياخذ الروح..بس شالفايدة خرسه..انه شايف هواي خرسان صح ينكسر خاطري عليهم بس هالبت ..كلش تأذيت من شفتها..يعني هيج اهيس هي مو بس خرسه..صدة عينها شايلة قهر بس الله يدري بيه ..اي عيونها مثل الباجيات من زمان..وضامات...حزن بكد الدنيا..خرة بالوعد ..هسه انه عايز قهر فوك قهر الدنيا..هي ما منتبها عليه تباوع ع الجامة مال السياره ..وصلنا للبيت انه وكفت فتحت الباب لابوي حته اخذ ايده سوه روحة كلش بعدني مالازم ايده كلي:

ميل..ميل شني ماد ايدك الي شمالني ما اكدر انزل انه..!!؟؟,🤭🤭

بكلبي ضحكت..ولا يكعد راحة الحجي..غير انه الدرب كله اكود بيه من الطبيب للتحليل ويمشي هديه بدية دولبني وطيح حظي منا لما رجعته هسه صار بيه حيل وكام يتفيك كدام المرة وبناتها

بكيفك بويه..

دميل..ميل عن دربي خلني انزل ..

وخرت عن الباب هو نزل لف عباته وكالي:

فك الهن الباب خلهن يجن للديوانيه..

هو مشه جدامنه وانه فتحت الباب نزلت المرة ونزلن البنيات وهي حارت بالجرجف وبالقفص تالي امها خذت القفص منها وكالتلها:

على كيفج ماما..لتوكعين ونزلتها..مشيت كدامهن فتحت الديوانيه..وصلنا المرة كالت:

بعد خالتك...بناتي مطينات وفراشكم..يدمر!

فوتن خويه

لا خلي يغسلن 

خوية كتلجن البرد فوتن جوة..

لا خاله بس يغسلن رجليهن عدكم حمام لو بوري برة

اي..تعالن

وصلتنهن للتواليتات البرة وفتت جوه امي تلكت ابوي

شني السالفه..هذا الوكت كله يم الطبيب...خاف مريتو على عمتك..اي ادري بيه ابوك بس يروح للولاية لازم يمر ع المسعدة اخيته..

ابوي كلها:

يواشج..يواشج ..لا مرينه باحد ولاشي

هااا..جا وين جنتو من ٣ طلعتو

اي..يابت الحلال شني ..الطبيب مبسط على حسابي غير العالم كبلنا حاجزة ولازمة سره ويه صيحة وذان المغرب ياله لحكنا السره..

اي وشكالك الطبيب!!

همه الطببة مال هالوكت بيهم حظ..بيهم دبان ..!!!وابنج عاف الدكاترة كلها اخذني على واحد صماخة جنه صماخ ثور لافهم ولاعلم!!

بويه انت تعاند لاثور ولامطي..الزلمة كالك كلبك تعبان لاتاكل دهن وملح ولا تشرب جكاير هواي..

يااااا..كلبه تعبان ..صخام الصخمج رفيعة..

عليمن صخام يمه..كضي رجلج..وديري بالج على اكله..هاااا..مثل ما كتلج لاملح ولادهن..وجكارة وحدة باليوم..

ابوي التفتلي؛

انلصم انته..

والتفت على امي..

ماعليج منه..هذا يمسلت وحده..

امي ادنت يمه.. وكالتله

شني يمسلت وحك ضلع الزهرة البتول بعد ماشفت لادهن ولا ملح..اي انه..عرفتها ..جكارتك اربعه وعشرين ساعة تفتل..بس هين يبو راشد ..هاي سهلة

التفت عليه ابوي..

هسه..فخت..يماجد..ارتاحيت من سودنتها عليه..

وتذكرت المرة والبنات بالديوانية...

بويه هسه مو وكتها..المرة وبناتها كتلهن البرد بره تدري بيها ناكعات

انا ابوك ..ياراشد لعنة الله ع الشيطان نسيتهن كله من وراك انت وامك..

امي كالت

هاي يامرة؟؟

مرة لاكتنا بالدرب خطية حوشها طاح من المطر..

ياااا..صدك تحجي..وين لاكتكم عود؟؟

خايبة شمالج.. شني وين لاكتكم نسوان كاعدات ابيت سلمان العتيج؟؟

بيت سلمان..؟؟محد بيه من زمان ومني يكعد بيه شو خرابة..

بعد هنه جانن كاعدات بيه..خطية مانعرف شني سالفتهن بعدنا..

جاشني ماكو وياهن زلمة..؟؟

المرة ارمله وحدها وعدها بنيات حديثات..

يااا..اسم.الله..وحدهن..خل اطلعلهن

اي ..ام راشد شوفيلهن هديمات منج..لو من مرت حامد..

مرت حامد نايمة من زمان..

كعديها..

لا ما اكعدها..انه ما صدكت انطمرت هيه والملايجة الوياهة..وراسي فاخ من الهرملة والصيه..

انه اطلعلهن من هدومي الاوليات ..انه ما البسهن..قابل البس ملون..انه..بعد خلهن ياخذنهن

خوش..

هنه جم وحده..

اربعة المرة وبناتها..

دخيلك ربي..اربع نسوان وحدهن..شلون دنيا هاي

وراحت امي..فاتت جوة وطلعت شكبان هدوم لا فته بوصلة ومشت للديوانيه....اخذتلها شويه وردت

اكلك ابو راشد شو جنهن مو من ديرتنا..هيج حلوات وناعمات..خو هاي البت الجبيرة..ما تتراوه..

اي خطية خرسه..

يااا..واكول ما حاجتني من اطيتها الدشداشه خطية..

وره شويه هم راحت وردت كالت:

ابو راشد يردنك..المرة تريد تحجي وياك هنه بدلن وشعلتلهن الصوبه الجبيره..اروح انه اسويلهن لكمه ..شتكول؟؟

اي عفيه النشميه الدنيا تمطر من زمان ويمكن مامتعشيات..خربيتي كتلهن الجوع والبرد!

وراحت امي تسوي عشه..وانه وابوي رحنه يمهن..ابوي كعد كبالهن وانه ضليت واكف يم الباب دشداشتي مبلله شويه بس القمصله نزعتها بالهول..كبل ما اجي يمهن سمعت ابوي يكلي:

بويه بدل هدومك..وبوجهك على بيت ابو زهرة كله الجماعة يمنه..وهاي وهاي السالفة حتى الزلمة يصير عنده علم..و

بعده ابوي ما مكمل المرة كالت:

لحظة حجي..لتدزه للولد ولا شي..ابو زهره تره...ميهمه وين الله حاطنه واصلا يدري البيت ساعة الساعة يوكع على روسنا..ليش هو مشاف المطر مفكر مكال مرت اخويه شصار مصار عليها وهي كاعده بهالخرابة

ميخالف بويه ..هذا..عم بناتج والاصول يدري انتن وين بايتات..؟؟

حجي..بس خلي احجيلك وانت احكم

تفضلي..بويه

حجي اني ارمله..رحيم..ابن حجي سلمان اكيد انت تعرفة للحجي الله يرحمه..

اي شلون ما اعرفة غير اهل ديره وحده احنا..

والنعم منكم..حجي اني جنت عايشة ابغداد قبل وفاة المرحوم..تعرف هو توفه بحادث ...

اي سمعت ..وكلنا رحنه للفاتحة..ولو انه ماشايفه رحيم رحمة الله على روحة صار سنين

جنا عايشين ابغداد...مأجرين بيت والرجال يوم يشتغل عماله يوم ماكو شغل بس الله ساترهة وماشيه من توفه  بالحادث حتى تعويض..محد نطانه لان السايق الي ضربه..محد عرفة ضربه وانهزم بوكتها...وابو زهره..وكف ويانه بس بايام الفاتحة بعد مشفنا..وبوكتها تمرمرت شفت المحد شافه من العوز حتى اخواتي ملن ..الى متى نضل عايشات على العالم واخواتي ماخذات غرب....يعني الرجال الغريب ..مو مثل الاهل ..والكرابة اخواتي سون اليكدرن عليه يساعدني بسكوت..بس شهر شهرين تلاثةالحمل زاد وابو الايجار شمر غراضنا بالشارع وصرنا فرجه للعالم..اخير شي كلت ماكو غيرها اجي لهنا يم عم بناتي بلكي يكول دمي ولحمي ويصير النا سند؟؟

اني كتلها:

خويه انتي اخوانج طيبين؟؟

لا اخويه الجبير متوفي ..من زمان..والزغير..يشتغل باربيل خابرته مره مرتين كلي اني هم ظروفي كولش تعبانه..ويادوب عايش اني وجهالي..وما اكدر اساعد..حجي هالوكت كولمن يكول يانفسي وعظم بني ادم ثكيل ..وانت تعرف بعد

هي تحجي واني عيني راحت على بتها الجبيرة.ولا جنها يم الناس ملتهيه بالقفص..ههه..امي شلبستها..دشداشه قديفة نيلي..امي كصيرة ومو سمينه ..وهي لشه ومربربه وجنها ناكة..والادين..زبد والدشداشة ضابه على زنودها.. لان زغيرة عليها..كوه مطببتها..بجسمها. وشيلة امي لافتها هيج شلون ماجان على ركبتها وشعرها نصه طالع..اشتعلووو..هسه انه شبيه مخلي بالي يمها..افه والله ..انه..مو فويسد ولا نفسي دنيه لو نفسي دنيه شو النسوان ضاله..ليش مادورت نسوان صارلي سنه من طلكت..زينب..ليش مافكرت ادورلي مرة..بحلال ..بحرام..ابد مامفكر بالنسوان شلع صح اذا شفت مره حلوة ..اباوع مره مرتين بس هيج بس بعيوني وتروح بوكتها..وسمعت  ابوي يحجي ويه امها:

الحاصل اجيتهن لهنا لابو زهرة؟؟

اي حجي!!

اي وليش كعدجن هنا..شني ماكو بيوت..شو بيته جبير وياخذ ثلث عوايل

حجي..من اجينا كعدنا يمهم تعرف هو عنده خمس بنات وولد واحد زغير..اول فتره تحملونه تقريبا اسبوعين..واحلفلك بالله ورسوله لا اني ولا بناتي طلع من عدنا اي غلط..بس مرته قسمه الله يغفر الها شدت ويه بناتي حتى تضربهن..كدامي

شني تضربهن هي هيونطة جا..عمهن وين..من هالحجي..

الجان هذا الحايط يحجي ..هو حجه ابد ميدخل ويكول اني اجي تعبان لاتتشكن يمي..واني روحي طلعت ما اتحمل احد يأذي بناتي

 وجرت وحده من البنات التوم..شالت شعرها..

شوف حجي هاي خمس خياطات براس بتي..من الضرب مرته هي وبناتها يغارن من بناتي الله شاهد وهاي ضربه..بالحافة مال السنك شكت راس بنتي وسكتت كلت اتحمل وين انطي وجهي وتحملت شهرين بعد بس هم شافن نجوم الظهر..خطية بنتي الجبيرة يغافلني والكاهن مزوركاتها وعضاتهن وكرصاتهن بزنودها  بس هي متكدر تحجي..بس دموعها يجرن اكلب جسمها واظل افرفح..والله اليهود ميسون سوايتهن..بالاخير طكت روحي كتلة....رحيم اله حصة بالكاع..وابيت ابو القديم انطينا كم فلس ندبر حالنا ونطلع منكم..كلي رحيم مال اله شي ورثه باعة كله..على بيت دغفل..بتراب الفلوس..وحتى بيت الحجي باعة وانه رحت ذبيت دم كلبي ورديت اشتريت كاع ابوي وبيته من بيت دغفل وطلعلي اوراق مال مبايعات ..طلع رحيم فعلا بايع كولشي وممخلي اله لاورث ولا شي..من كمت احاسبه ضاج من عدنا وطردنا وكال تره اني مكعدجن يمي صدقه من عندي..شنو هو رحيم هم محسوب عليه اخو خلص عمره سايب ابغداد..وتالي اخذله وحده مناك..مانعرف كرعة ابوها من يا ..اصل وكام يغلط على اهلي ويفشر على اخواتي..طلعت اني وابناتي كعدنا كبال بيته نهار كامل..بعدين اجه جاب كيه وحمل غراضنه وجابنه لهذا البيت بيت الحجي القديم وكال شوفن تضلن هنا..ضلن تردن تمشن البغداد امشن بعد احسن..انه ما الي علاقة..كعدت..اني وبناتي ٣,ايام لكمه ماكو بالبيت رحت للسيد مال الجامع سولفتله كلي هذا ماعنده لاغيرة ولا شرف روحي بابا كعدي..بالبيت..وكام يدزلنا كل شهر ١٥٠

الف..يكول السادة مخصصتهن للعوائل الفقرة وكلت الحمد لله عايشين بيهن..رغم بناتي رجعتهن للدوام هنه بالسادس كلت خطية تروح عليهن المدرسه بعدهن زغاروالبنيه الجبيرة شوفه عينك تكسر الما بكلبه رحم ..لا..وفوكاها يوميه اخذهن بيدي للمدرسه وارجعهن اخاف عليهن ..وابو زهره يشوفني ويلاكيني..ولامرة وكفني وكلي شعدجن وشماعدجن..مان علينا لان مكعدنا بهاي الخرابة العتيكة....ولا لحظة فكر وكال هاي مرة وحدها وياها بنات..مدري احد يسطي عليهن ويكسر وجوهن..مدري..احد..يضحك عليهن ويستغل عوزهن وحاجتهن..

استغفر الله العظيم..شبيها..الوادم..شني..صايرة دايرة واحد يتيه عرضة وشرفه ومخلي الناس تتصدق عليه هذا شكد دوني وناقص غيرة وشرف..

رحمه الله والديك هاي انت حجيت حجاية الحق..

هي تحجي وانه كلبي يفور احس حجيها سجاجين تكطع بكلبي..شني هاي اكو..واحد..براسه عقل يتيه مره حمرة بيضة وياها بنيات وحدهن..شني ماكو بكصته..كطرة مستحة ماكو براسه غيره..تميت اصعد سيارتي واروحله لحوشه ابيس بيه منا لما كلبي يفوخ..خطيه تكول بناتي شبعن ضيم ودك يمهم..وهاي الجبيرة يضربنها ماتكدر تحجي بس دموعها تصب..وتلكاها مزوركة..خطية صعبه البشر يتأذه وما يكدر يحجي يعني مثل الجاهل باول عمره  يتمرض ويتأذه ومايكدر يحجي ومحد يعرف شبي مابي..اووف قهر..شلون قهر يملخ الروح..ورد ابوي يحجي وياها

ميخالف بويه اذا هو ناقص غيره وشرف ومايعرف الاصول احنه مانصير مثله..الاصول يوصله خبر انتن يمنه 

والتفت عليه

يله ابني النشمي..روح بساع لبيت ابو زهرة

حجي..الولد الله يسلمه شبع ويانه مطر وبرد شوف هدومه مبللله..والله ميستاهل ابو زهره ادز ابنك بهالمطر والبرد

جا انتي مو جنتي رايحتله للجسر..

اي جنت رايحتله لان ماعندي حل ثاني والله رايحتله وحسبه تاخذني وحسبه ترجعني ومتأكده بس ادك بابهم يطردني. 

افه يطردج.

اي ..والله..

روحي طلعت من كالت يطردني كلت لابوي. 

بويه خلهن الليلة يمنه معززرات مكرمات  وانه من الفجر ويه صيحة الوذان يم بيت ابو زهرة

خوش..

ابوي كلها..

بويه عشي بنياتج ودثريهن..ونامن والصبح الله كريم لاتفكرن ولاشي وهذا بيتجن..والخلا ..النا؟؟

والنعم منك حجي متقصر. 

وباجر انه وابني من الصبح يم ابو زهرة ونشوفلنا صوره حال ..ومايصير خاطرجن اله طيب. 

مشكور حجي..

وطلعنا من يمهن بس احس روحي شايغة هيج بودي امشي لهذا العار وادغمث راسه بالطين على عملته هاي..بس شسوي اول وتالي انه غريب..ومو من حقي..الوم واعاتب بس بالنهاية الغيره البكلبي ذبحتني ذبح ما اعول الصبح يصير واروح اشوف شني فلمه هذا..

كعدت بالصاله انه وابوي شافني دمي فاير كلي:

على هونك بويه ادري النار بكلبك وانه مثلك وازود..؟؟

بويه شفتها شتكول..راح اسودن وعلي؟؟

وليدي تصفه..باجر كلها تصفه..

وعلي باجر..راح اروحله هيج على شعر راسي..وروح راشد بس يحجي حجاية زايدة هيج ادغمثه بالخيس وانعل والدية..

مالنه حك نطكه..مو كلشي بالطك..هذا واحد لاغيره..ولاناموس واذا حجينا حجاية زايده يجوز يرتكب علينا؟؟

والحل شني..

بويه احنا نسوي العلينه نسولف ويا بهداي انشوفه اجه للدرب وتكفلهن ..هاي هيه ما اجه للدرب وكام يعنفص وشال ايده..احنا نتكفلهن جا شني قابل الدنيا تكاطعت؟؟

يعني شني نخليهن يمنه..؟؟

لا بويه نعدل حوشهن ونديرهن هناك ونوايك عليهن خاف يعتازن شي ..وبين يوم ويوم نوديلهن القاسمه الله

اي بويه ..هاي هيه

فتت الغرفتي..بدلت بس ماتعشيت كلشي ما اشتهي روحي لعبانه من الدنيا واهلها..شني هاي الدنيا العوجه اكو هيج عم متيه بنات اخو..وحدتهن تحل المصلوب عايفهن وحدهن لايدري عنهن جاعن لو عرن لو ابن حرام فات عليهن..ولعب بيهن..وهنه ابخرابة متطرفه لاهناك ولاهنيه..خليت راسي ع المخدة بس غمضت صارن عيونها كبالي كعدت على حيلي ...

استغفر الله دخيلك ربي..هسه انه شمالني كلبي واج عليهن..توني عرفتهن..كلهن ..بجفه..وهاي الماتحجي بس بعيونها بجفه ثانية