رواية فصلية بديلة الفصل الرابع والعشرون 24 بقلم ام ملكوت

ساجد_

حلى اسم على مسمى هيه حلوه وجنهه حلاوه واسمهه حلى ياربي وصوتهه وادبهه غير

ماشالت عينهه وخلتهه بعين احد من عدنه وتحجي ويه امهه بنعومه وصوتهه ماينسمع كوه كد ماناعم ..

شفتهه رفعت راسهه تتاكد اذا احد يباوعلهه لو لا خليت ونزلت عيوني وسويت نفسي اكلب بالاكل ..

خلت ونزلت عينهه وبقت تاكل طبيعي حسيتهه جوعانه خطيه ..

خلصنه عشه واني عشاي صار

بس جمالهه ماكلت عدل من وراهه خلينه ولمينه السفره ودخلنه جوه لصاله الانتضار بقينه فد ساعه وطلعت الممرضه من الغرفه وكالت تكدرون تدخلون لان كعدت..خلينه ودخلنه كلنه الي يكول عرس عدنه ..

                .....................

سماء_ 

تعذبت حيل بالولاده حاولت الدكتوره تولدني باي طريقه بس مافاد لان ماعندي ولاده ماجنت اضن ان عنادي على الشغل راح يعذبني هيج 

بقيت اصرخ وابجي لحدما بهت صوتي وصار مايطلع ..تذكرت بلحضتهه كلشي اذاني وكل ايامي ولياليي السوده بدايه زواجنه

اجه بالي مقاطع عني واني ابجي بحركه بالحمام او بحضن هدى ومقاطع واكفه بيهه بالمرايه واني عريانه واشوف الزراك البجسمي نتيجه تعذيبه الي

بهذا الوقت اجتلي شكو ذكرى حزينه ومؤلمه وزاد البجي مالتي صرت اعاتب واكول ليش صار بيه هيج ليش تدمرت حياتي وصرت متعلقه بامل صغير ينجيني من عذابي 

مثل الغركان بالماي ومجلب بعود ثقاب متامل ان ينجي من الغرك..بقيت ابجي شويه وكالت الدكتوره راح تسويلي عمليه قيصريه

بوقتهه ما همني شي ولا خفت من بعد شريط الذكريات هذا الدنيا بهتت بعيني وصرت اقرفهه تمنيت العمليه تخلصني من عذابي وتموتني تمنيت الموت بهذي اللحضه مو شلون ماجان..

خلت واخذوني لغرفه العمليات وجهزوني وخلو البنج بخشمي وصارت الرؤيه ضبابيه صرت ماحس بشي اخذني نوم عميق وعالم ابيض واشوف بستان جبير حيل  ..

دخلت ولكيت امي وخواتي وبيت جدي كلهم واكفين ومنتضرين جيتي ورشا اجتي كالت اشتاقيتلج وسامحيني وامي تكلي يمه كومي رجعي لحضني 

تقوي حتى ترجعين سماء يلي روحهه وحياتهه صافيه وكان شخص بداخلي وكال لا ترحين بس رجلي اخذتني لحضن امي....

خليت وحضنت امي واشم بريحتهه ..فتحت عيوني ولكيت نفسي بعدني بالمستشفى شافتني الممرضه واجتلي تسال عن وضعي وبشنو احس شويه وطلعت ودخلو واشوف امي واختي من بيناتهم ..

تصنمت ماعرفت هذا حلم لو حقيقه بس اعرف ان حقيقه زين شنو جابهم وشلون وليش اجت امي واختي كضنني وكامن يبجن .

.لمن حضنتني امي وشميت ريحتهه عرفت اني مو بحلم وان امي حاضنتني هسه ويمي نزلت دموعي شلال وبادلت امي الحضنه وكمنه نبجي سويه بحركه ..

ام سماء: يمه بنيتي شلونج يبعد روحي اشتاقيت لريحتج يمه حتى صدري رجع حن ودر عليج يمه شلون مر حملج وتعبج واني مو يمج بنيتي ..

سماء: بجي..يمه اشتاقيتلج يمه خليني بحضنج لا تعوفيني بعد يمه لا تخليني اروح بعد عفيه خليني العمر كله عايشه وياج وبحضنج لحدما اموت ماريد اعوفج بعد وابتعد عنج يمه..

ام سماء: ماعوفج بنيتي ماخليج ترحين من ايدي بعد يمه هنا اضمج هنا بصدري ماخلي احد ياخذج من اديه بعد..

حلى: بجي..يمااا خليني احضنهه كافي 

سماء: بابتسامه فرح ..تعاي يروحي تعاي احضنج يبعد طوايفي ولج اشتاقيتلجن واشتاقيت اكعد واضحك وياجن اشتاقيت ازعلج وتبجين وارجع اراضيج حبيبتي..

حلى: ميخالف زعليني وبجيني وحتى لا تراضيني بعد بس اريدج ترجعين تعيشين ويانه ماريد بيتنه من دونج تعالي رجعي لو اخذيني خليني يمج ..

تدرين كليوميه بليل اكعد ادور عليج بالبيت ومالكاج واضل ابجي للصبح خليني يمج سماء ماريد ابقه بالبيت وانتي مو بي..

سماء: خلاص يروحي لا تبجين ماراح ابتعد عنكم بعد حبيبتي ..اشو خليني اباوعلج زين ..كافي لا تبجين تصيرين مو حلوه تره..

حلى: ههه مو بيدي

سماء: يله كافي ولج لا تقهريني اكثر ترى يصير بيه شي نوب..

حلى: لا يله راح اسكت مابجي بعد ..

سماء: عفيه شطوره

سمر: الحمدلله على سلامتج حبيبتي الف مبروك يتربى بعزكم انشالله

سماء: الله يسلمج حبيبتي ويبارك بيج ..

ساجد: الحمدلله على سلامتج خويه

سماء: الله يسلمك خويه

شهم: بتردد..الحمدلله على سلامتج سماء

سماء_ 

ماعرف شصار بيه من كال اسمي احس ضجت من اسمي لان نطقه رغم باشهر حملي عاملني بلطف

بس خله بروحي جرح ماعتقد يطيب بعد.. 

جاوبته واني ضايجه ودرت وجهي على امي بعدهه..

_الله يسلمك

ام سماء: يمه سماء جوعانه عطشانه تردين شي..

شهم: لا خالتي الدكتوره كالت ماننطيه شي قصص ماي هوبس  منا لسبع ساعات ياله نكدر ننطيهه ماي وتاكل فقط سوائل شوربه وغيرهه ..

ام سماء: هاا ماشي لعد يمه سماء ارتاحي مبين عليج تعبانه ..

سماء: يمه احس بدت نغزات ببطني 

شهم: اي هسه رايح اصيح للدكتوره تنطيج مسكن..

سماء_

خله وطلع وساجد وسمر همين طلعو كعدو بره وبقو بس امي واختي وجدي وخالي..

ابو رائد: الحمدلله على سلامتج جدو شلونج شلون عايشه حياتج بيتهم..

رائد: الحمدلله على سلامتج خالي 

سماء: الله يسلمكم..والله جدو الحمدلله اهله خوش ناس ومعتبريني بنتهم وعاملوني بحنيه من اول مادخلت لبيتهم لحد الان ..

الكل: الحمدلله

ام سماء: يمه ورجلج شلونه وياج

سماء_

سالتني وبقيت ساكته ماعرفت شنو ارد عليهه فقط كتلهه..

_من سمع بحملي ليهسه يعاملني بلطف الحمدلله..

ام سماء: وقبل حملج

سماء_ 

التمت علي جروحي من سالتني هل سؤال اجت بالي الليالي السود 

ماتحملت نزلت دمعتي هزيت براسي "لا" وحضنت امي وانفجرت بالبجي وهيه صارت تبجي وياي على حالي..

_بجي..يمه عذبني وضربني اذاني وخلاني انام واني دمعتي بعيني يمه صرت احس روحي جثه تمشي بدون روح بدون ضحكه بدون شي ..

يمه انشلع قلبي بال٣ اشهر الاولى العشتهه ويا يمه لو تشوفين حالي وقتهه تبجين علي ولج يمه الغريبه لمن شافت حالتي بجت علي يمه..

9 تع

ام سماء: بجي..سوده علي يمه عذبج وضربج وانتي الترفه يلي بعمرج محد ضاربج وغالط وياج بكلمه ..

عسى جرحج والمج وعذابج بيه ولا بيج يروحي انتي ياقطعه من قلبي اسفه يمه ماجان لازم اضحي بيج واقبل ترحين فصليه ولج يمه عساني متت ولا صاير بيج يلي صار يمه..

سماء_

بقيت حاضنتهه وابجي واحس نغزات تزيد بطني واسمع جدي وخالي وحلى يبجون ويانه على حالتي اخر شي ماتحملت الالم..

_ااخ يمه بطني يمه لحكيني بطني تاذيني

ام سماء: اي يمه هسه بويه روح شوف الدكتوره وين صارت ..

ابو رائد: اي رايح ..طلعت ولكيت شهم واخواته بره واكفين واجه شهم بسرعه اتجاهي..

شهم: خير عمي صاير شي وياهه

ابو رائد: لا بس ضلت بطنهه تاذيهه وين الدكتوره

شهم: قبل شوي رحت وكالت بعد وكت هسه شويه وتجي تنطيهه المسكن

ابو رائد: هوه شنو بعد وكت وينهه بله انه احجي وياهه البنيه ماتت من الوجع ..

شهم: مايصير عمي بعدين تنطيهه

ابو رائد: اي بويه جا انت شيهمك متعود تشوفهه تتالم وتتعذب وتبقى مستمتع بمنضرهه هذا..

شهم_ 

نطت عيوني وفار دمي من حجه هيج ردت اتهجم عليه بس لزمني ساجد وفصلني عنه..

ساجد: صلو على محمد ياجماعه شبيكم منا الناس ومو وكت المشاكل..عمي الدكتوره بهاي الغرفه روح حاجيهه بلكي تقبل تنطيهه مسكن..

ابو رائد_ 

خليت وعفته ورحت للدكتوره احاجيهه..

_السلام عليكم دكتوره

لمياء: وعليكم السلام تفضل 

_دكتوره فدوه البنيه كاعد تتعذب من وره الم بطنهه انطيهه مسكن شي يخفف عليهه الالم

_حجي ماكدر انطيهه هسه نص ساعه ياله 

_بويه فدوه اروحلج تموت البنيه اذا تبقى بعد نص ساعه

_ماكدر حجي اذا انطيهه وصار عدهه عوارض انه اتحاسب

_على مسؤليتي ولا يهمج بس كومي انطيهه مسكن او شي غيره يخفف عليهه الالم

_ماشي بس على مسؤليتك

_اي دكتوره

_يله شويه واجي انطيهه

_شكرا دكتوره..

خليت وطلعت منهه واشوف شهم كاعده وطابك اديه ويباوعلي بعصبيه وناطه عروك ايده خليت ورحت للغرفه مايهمني شيسوي خلي يسوي..

ام سماء: ها بويه وين الدكتوره البنيه راح تموت

ابو رائد: بويه هسه تجي

سماء: جدو فدوه كلهه بسرعه بطني ماتحمل بعد..

ابو رائد: بنيتي تحملي شويه هيه المفروض بعد نص ساعه تنطيج ابره مسكن بس كتلهه على مسؤليتي وراح تنطيج هسه وحده..

ام سماء: نص ساعه الله واكبر ادري هذول الدكاتره مايحسون البنيه ميته وجع وهمه يتانون نص ساعه خاف ما ماتت بالعمليه يردون يموتوهه من الوجع..

لمياء: لا تخافين مايصير بيهه انشالله محد يريد يموتهه..

ام سماء: عذريني دكتوره بس بنيتي ماتحمل اشوفهه هيج متعذبه

لمياء: لا عادي ماصار شي متفهمتج..يله ماما سماء تبتي نومتج حتى يمشي المسكن بدمج ..

سماء: دكتوره متاذايه

لمياء: ميخالف بنيتي تحملي شويه ويروح الالم..

سماء_ 

من الالم ماكدرت احجي بعد بس هزيت براسي ..نعم.. والتفتت على امي لكيته هوه واخواته داخلين بالغرفه ويباوعلي بخزره نفس الاول ..

الفصل الخامس والعشرون من هنا