رواية فصلية بديلة الفصل الخامس والعشرون 25 بقلم ام ملكوت

شهم_

بقيت كاعد ومعصب من جدهه وافكر..شبسرعه حجتلهم عن السويته بيهه وليش حجته 

معقوله بعدهه مامسامحتني على ضلمي الهه رغم معاملتي الطيبه والاهتمام يلي انطيته الهه بالاشهر الماضيه ..

وبعدين شله غرض جدهه ويحجي هيج هوه اختارهه هيه وانطاهه فصليه رغم جان يعرف بحياة الفصليه شنو وهسه جاي يتحنن عليهه ويسوي روحه يحبهه..

بقيت افكر شويه وشفت الدكتوره دخلت للغرفه ورحنه دخلنه وراهه وشفت سماء تتلوه من الالم وتحجي للدكتوره انهه متاذيه 

بس الفاجاني اني ماشفت الخوف المتعود عليه باوعتلي بكل برود ودارت وجهه عني وغمضت ..

ماعرف ليش بس تاذيت من نضرتهه البارده حسيت بنار سكنت قلبي ماردتهه تباوعلي بهيج نضره

ماريدهه تطلع من حياتي تعودت عليهه تعودت على القوه يلي اشوفهه بعيونهه تعودت على وجودهه بحياتي وبيتي وويه اهلي مو بس اهلي اعتقد حتى اني صرت ......

لا لا ماريد انجرف بمشاعري اني انطيت وعد لنفسي ان اذا رادت ترجع لاهلهه انطيهه حريتهه و اخليهه ترجع لبيتهه واهلهه ..

ماريد اتعلق بشي زائل من حياتي ماريد احب شي مو الي صح جسدهه الي والطفل الي وحياتهه الي بس قلبهه ماجان الي روحهه ماجانت تهواني ولا تريدني هاي اذا ماجانت تكرهني ..

شفتهه نامت خليت وطلعت رحت لغرفه الاطفال وصرت اباوع لابني مرتضى من بعيد واشوفه شلون يتحرك ..

بقيت صافن عليه واحس روحي رجعت مثل الطفل لا هم لا غم لا تفكير لا قلب مكسور ماكو اي شي يثقل كاحلي ..

ارتاحيت بمجرد النضر اله من بعيد شحال اذا نومته بحضني او لعبته شحال اذا نطق وكالي بالمستقبل بابا..

لمن اجو اولادي ماجنت حاس بمعنى الطفل ولذه لقاءه وحضنه بس هسه بعدما فقدت ابني حسيت بقيمته وقيمت الطفل بقلبي وهذا الطفل احس روحي صارت بروحه واذا صار بي شي لا سمح الله ماتحمل اموت من قهري عليه ...

شهم: ها خويه جيت اشوف وليدي مرتضى اشتاقيتله 

_سميته مرتضى 

_ اي خويه على اسم ابني الغالي النحرمت من شوفته تانيته يوم بعد يوم وشهر بعد شهر حتى اكحل عيني بشوفته وينترس البيت بذكر اسمه ويحيي ذكرى وليدي الله يرحمه..

_الله يرحمه ..الله يحفضلك ابنك ويحميه ويتربى بعزك ودلالك انشالله

_تسلم خويه الله يخليك

_ اكول خويه قبل شوي خابرت ابنك البذات محمد

وكتله اجالك اخ

_اي والله فد مشتاقله وحاس بالوحده من دونه شلونه صارلي اسبوع مامخابره اكول عنده امتحانات

_زين الحمدلله كاعد يمتحن وكلي اباركلك واسلم عليك ..كال مايكدر ينزل للعراق لان مضاهرات وحضر تجوال هناك واليطلع بعد مايرجع كتله ابقى لحدما يصفى الجو وتعاال ..

_ تصدك من انتقل للخارج ولهسه اني بالي يمه واخاف عليه من الهوى دائما اخابره واكله لا يطلع وياهم ولا يختلط ويكلي اي بس ابني واعرفه مايسكت عن الغلط 

اليوم اذا مر ومامخابره احس بخوف عليه وكأن شي ضايع مني وخاصه بعدما فقدت اخوه صرت اوهوس ومانام الا اخابره وهوه خطيه متحملني ويكلي بويه امتحانات ماكدر اسولف هواي ويتشتت عقلي..

واكله ميخالف خلص وتعال ماراح اخابرك هواي ..وصرت اخابره كل اسبوع مره ..

_هههه خلي خويه شباب هل وكت مايردون اهلهم يضغطون عليهم ويتشددون وبعدين ياخويه ربك هوه الحافظ لو باخر الدنيا مادام ربك فوك هوه يحمي ويحفضه والمكتوب عل جبين لابد تشوفه العين 

_ ونعم بالله هوه انه عايفه شضاغط علي هوه بس يوميه اريد اعرف اخباره بالنهايه اني ابوه واخاف عليه وهوه هناك وحده..

_ اي حقك الاب يبقى يخاف على اولاده حتى لو صارو زلم مشوربه بس خلي ايمانك بربك قوي وعلى كيفك وياه وهسه يله خويه تعال امشي لصاله الاستراحه ناملك كم ساعه ارتاح بيهه ..

_اي يله امشينه..

خلينه ورجعنه للغرفه شفت اهلهه كاعدين ومبين عليهم التعب خليت وكتلهم..

_ احم اخي رائد انتو رجعو للبيت اني وامهه هنا يمهه لا تخافون عليهه..

رائد: ها لا عادي ماعدنه شي 

_تسلم ماتقصر..

_يله بويه امشينه يله حلى امشي ويانه امج بس تبقى يمهه..

حلى: لا خالو خليني يمهه ماريد ارجع حباب والله اكعد يم امي واسكت ماطلع لمكان..

رائد: خالو مايصير امج تنشغل بيج لو باختج تعالي رجعي ويانه خواتج هناك وحدهم همين..

حلى: بحزن..خالو عفيه خليني

شهم: خلاص خويه خليهه يم امهه واختهه اني ادير بالي عليهه لا تخاف..

رائد: يله ماشي رايحين احنه يله بويه..مع السلامه

شهم: الله وياكم ..وانت خويه سجاد اخذ اختك وارجع للبيت انتو هم تعبتو..

ساجد: ماشي خويه يله سمر امشينه ..مع السلامه اي شي تحتاجه خابرني ..

شهم: انشالله ..الله وياكم..

راحو وطلعت اني اخذت كرسيين ورجعت للغرفه خليت واحد لام سماء وواحد لحلى تكعد عليه واني كعدت عل قنفه اليم الجربايه وغفيتلي شويه عليه ..

سماء_ 

بعدما انطتني الدكتوره مسكن شويه وخف الالم ونمت ماكعدت الا على صوت الاذان 

واشوف امي وحلى نايمات على الكراسي وهوه هم رافع راسه ونايم قريب مني ..

بقيت اني متمدده بالجربايه واسبح واحوقل مثل العاده جنت دائما اذا علي العذر الشرعي او ماكدر اصلي

ابقى كاعده واسوي الاذكار لان الاذكار والتسبيح هم عباده واكدر اعبد ربي بدون صلاة وبدون وضوء ..

بقيت اذاكر منا لغفيت وكعدت على صوت امي وهيه تحجي مدري ويامن

ضنيت اني بحلم ضنيت اني اذا فتحت عيني ماراح اشوفهه كدامي

بقيت مغمضه ومسويه نفسي نايمه ماريد اكعد ويختفي صوتهه من اذني ..

شويه وفتحت عيوني واني خايفه ماتكون يمي بس فتحت عيوني واشوفهه....

                     .................

شهم_ 

بعدما نمت كعدت الصبح على رن النقال وجان ابوي طلعت بره ورديت عليه..

_الو ها بويه صباح الخير

الشيخ: صباح الخير ابني شلون صارت مرتك

_الحمدلله بويه كاعد ينطونهه مسكن وتنام كلما تاذت وباجر انشالله كالت الدكتوره نكدر نطلعهه..

_ اي الحمدلله والشكر بويه خاف تحتاج فلوس شي خابرني لا تستحي مني انه ابوك..

_ تسلم بويه الله يحفضك النه بس مامحتاج والله امس اخذت من البيت من مدخراتي واجيت دفعتهن للعمليه..

_ اي اني كتلك ووصيتك ترى فلوسي اطلعهه علمودكم ومرجوعهه الكم بويه 

_ الله يحفضك الله يرزقك بويه ماتقصر ..انشالله من عيني اذا احتاج اكلك انطيني..

_هاذهو يله وليدي روح ريك بيت عمك عيب اكيد الجماعه جوعانين ..

_ اي انشالله بويه يله مع السلامه

_ الله وياك وليدي..