رواية صراع الشيوخ الفصل الخامس والعشرون بقلم ليال القمر
زيد ببچي : مات مات
ارجوان بخوف وترقب: منو و
زيد: ابو امير الشيخ شهاب
ارجوان انسطرت وبعد متعرف شنو تسوي باوعتلة وهو يبچي وحالة يكسر الخاطر
زيد بهستيريا: چان مثل ابوي ارجوان چان يحبنه انه ورفجاني هواي ومايوم فرق بينه كلنه چنه مثل ولده
ارجوان دموعهة نزلت وحچت بصوت طفولي مقهور: ابو امير نفسة الي نقذني من كرم
زيد ماحچة وهو يبچي وارجوان گعدت بصفه وهي دموعهة تسيل وتفكر بامير حالة شلون هسة وفقد الاب صعب انقهرت وحست كانما ابوهة الراح مو شيخ عشيرة وحطت نفسهة بمكان امير وهي حزينه ومتعرف شتسوي
الا ء وهي تطلع من باب المطبخ: ايااا معزاية وينچ تعاي ساعدينه
ارجوان وزيد ماحچو بس يبچون والاء لطمت عله صدرهة: عززززة بعينكم شمالكم عبالك چنكم گاعدين بفاتحة
ارجوان بصوت مخنوگ: عمه عوفينه بلييز
الاء بقلق: فلك صابچ ولكم شمالكم
ارجوان بدموع: ابو امير مات
الاء باستغراب: منهووو
ارجوان: ام امير الشيخة الاجتي زوجهة مات
الاء لطمت عله وجهة: صخام بوجهي شيخ عشيرة..... مات عزززة سودة بوجهي لويش ماتحچيتي
ارجوان ببكاء: الله يعينه لامير شون حالة هسة وابو مااات
زيد وهو يشهك: كااافي سكتي لويش تعصرين گلبي اكثر علي وعلة حسن
ارجوان ببكاء: شلون عرفت
زيد بدموع وعيونه كتلة ملتهبة: حسن متصل بيه ويگلي امير مصدوم علة ابو حته وهو گوة يتحچة وصوته مفرفح حقة عمه ومثل ابو
ارجوان وهي تمسح دموعهة باديهة: كاافي لتأذيني بكلامك زيد
الاء ببچي : يمه الله يعينچ يا شيخه اكيد گليبهة محروگ علة زلمتهة وابو ولدهة
ارجوان كامت من الارض ودخلت جوة بالبيت وتبچي الكل باوعلهة وابوهة قلق: شبيچ باباتي شصاير
ارجوان : بابا شيخ شهاب مات
الكل انصدم: انا لله وانا اليه راجعون
ابو احمد غمض عيونه وبقهر: الله يرحمه ويصبر عائلته
العم كريم: شنهووووو مات لا حول ولا قوه الا بالله العلي العظيم
العم صگر حچة بحزن: لازم نروح للفاتحه ما يصير هاذة ابو الوگفات الحلوة شلون مانروحله
العم كريم بحزن: اي والله كلهة تعرف شيمته وغيرته عله هلة الله يرحمة
النسوان انقهرن عله ام امير وهنة اصلن حبنهة من اول ما اجتهن
هيفاء مرت العم صگر بحزن: خطية الله يساعدهة للشيخة شلون حالهة وزلمتهة رايح
ندى مرت العم كريم: ما يصير لازم نقوم بالواجب ونروحلهة
النسوان: اي والله
************
شهم بصراخ هستيري وهو فوگ صدر ابو: بوووووويه لويش رحت وتركتني بوووووووية انه شهم گووووم بوية لخاطري ولخاطر اخوتي
سجاد يصرخ ويبچي: ولك گوم بوية انه ولدك گووووم لا تتركنه
امير واگف وميحچي اي شي ويشوف اخوته الخمسه متگطعين علة ابو وهو ماتحرك واگف ويباوع وصامد
مهدي وهو يضرب امير بصدرة وامير ماتزحزح: ولك ابووووي راح يندفن جوة التراب خلي يرجع
امير باوع علة اخو وماسوة شي نزل راسة وهو يتذكر الصار من الصبح
دخل امير عله ابو وهو يحچي: هاا بوية رايدني
ابو امير باوعله بحب وتعب شديد : تعال بوية رايدك بچلمه
گعد امير يم فراش ابو: تحچة بوية امرني وانه خادم
الشيخ شهاب بتعب: الله يرضه عليك وليدي انه تعبان
امير بقلق: سمالله عليك بوية ماتشوف شر اخذك للمشفة
الشيخ شهاب بتعب: لا بوية فات الفوت ولازم اتحچة انه مريض من زمان بس ماگلت ليكم حته ماتقلقون وانه رحت اتعالج بس الدكتور گال ماكو امل عندي مهلة اسبوعين مو اكثر واموتن وانه هاي ساعاتي الاخيرة
امير بصدمة وبقلق وقهر : بووية شلون ماتگلي شلووون
ابو امير وهو گوة يتنفس : خليني اكمل چلامي بوية
امير اومئلة براسه والشيخ يكمل: انه سلمتك المشيخة بعدي وكل امور العشيرة بدينك بوية ديربالك عله اخوانك ماريدهم يحسون بفگدي رايدك تكون السند ليهم انته قدوتهم بعد اخوك مجتبى الله يرحمة
امير يحاول يحبس دموعه وحچة بخنگة: الله يرحمة، خلص بوية لاتعب نفسك
ابو امير تعب كلش وگوة يحچي: بوية ماريدك تنهار بموتي رايدك عامود تسند اخوتك وديربالك عله امك وصيتي تهتم لاخوتك وامك وتديربالك عله نفسك وليدي رايدك تكون عايلة وتزوج وتجيبلك ولد يشيل اسمك واذا اول ولد جبته سمي " مجتبى " علة اسم اخوك المرحوم الله يرضة عليك بوية
امير وگعت دموعه : لا تشيل هم بوية انه الذيب موحيالله انشالله امشي بوصايتك
الشيخ حچة وبصوت ضعيف كلش گوة ينسمع : الله يبارك.... بيك... يال... الذيب.... اشهد ان لا اله الاالله واشهد ان محمدا رسول واشهد ان عليا ولي الله..
امير لگة ابو ساكن وميتحرك باوعله وباس راسه وغطه وجهة بالغطه وخله ادي عله عيونة وگام يبچي ويشهگ: بوووية لاتتركني بووية ابو مجتبى گوووم لا تتركني وتترك اخوتي وامي والديوان گوووم بوية فدوة اروحلك منو الي غيرك اخوي مجتبى تركني وراح وانت هم ، لا تروح البيت مايسوة بدونك گوم يبو الطول الحلو گووووم
گام يبچي بهستيريا وبعدين هدئ نفسة واخوتة سمعوا صوته ودخلوا وضلو ينحبون ويبچون
رجع امير من ذاكرته وحضن اخو مهدي : عيب تبچي انت رجال وابوي وصاني بيكم ومايريد بس دعائكم
مهدي وهو يحضنه ويبچي: ولك منيلك هالگلب الگاسي خوووية ابوي الي چان مثل رفيجك وماتبچي علي
امير من داخلة متقطع واكثر واحد متدمر بين اخوته ويشعر بالضياع والوحدة وهموم الدنيا صارت علة اكتافه بس كله عكسة من الخارج واگف وصامد گدامهم علمود اخوته واهلة ويلتزم بوصية ابو
راح امير هو واخوته غسلو وتوجهوا بي للنجف وزوروا ودفنوا هناك
وهنا ينتهي دور شهاب لتبتدأ قصة الشيخ امير الذيب
ارجوان وهي تلبس فستان اسود شرعي بسيط وخلت الشال الاسود فوگ راسهة ولبست حذاء مقفل لونه اسود باوعت شكلهة بالمرايه ورضت بنفسهة
طلعت ولگت احلام شايلة ابنهة وتنزل جوة
احلام: صخام الصخمني شلابسة انتي عززة چا هاذة منظر وحدة رايحه لفاتحه
ارجوان: ليش محلو
كواكب: امشي مايفيد وياچ الحچي
مشت ارجوان ونزلت لگت امهة لابسة عباية خليجية: ها مامه نروح لو ننتظرهم يكملون
ام احمد: لا امشي نروح هذني شكلهن راح يتأخرن كولش
مشت ارجوان وية امهة ودخلت بسيارة احمد: هلاوو احمد
احمد : هلة شنو هاللبس الي لابسته امشن لبسن عبي
ام احمد: احمد تسوق انت وساكت مالك دخل بينه يعني اني من يمته البس عباية متگلي
احمد فر بايدة بقله حيلة وبدة يسوق السيارة
ام احمد: اي ارجوان من تدخلين شنو تگولين لام امير
ارجوان: عادي اگوللهة كاي فاتحة Im sorry about your husband
ام احمد: امدة حظي الحمدلله من سألتچ چان فضحتينه بله اكو وحد تگول لوحدة اني اسفه عله خسارة زوجچ
ارجوان: اي لعد شگول مو من چنه نروح فواتح بالخارج هيچ نحچي
ام احمد: بالخارج مو هنا
ارجوان: لعد شگول
ام احمد: تبوسيهة وتگوليلهة عظم الله اجرچ والبقية بحياتچ
ارجوان: اي اوكي مو مشكله
وصلوا لبيت امير ونزلو من السيارة ودخل احمد للديوان وارجوان وامهة للبيت
ارجوان وامهة: السلام عليكم
الكل: وعليكم السلام
ام احمد توجهت لام امير: عظم الله اجرچ حجية والبقية بحياتچ
ام امير ببچي: اجرنا واجركم
ارجوان حظنتهة: عظم الله اجرچ خالة
ام امير: اجرنا واجركم
گعدن بالارض يم ام امير والنسوان صافنات عليهن لان لبسهن راقية ومبينات كشاخات
₤₤₤₤₤₤₤₤₤₤₤₤
احمد وهو يسلم عله امير: عظم الله اجركم الله يصبركم
امير ابتسم ابتسامه بسيطه گوة رسمهة: اجرنا واجركم
حسن بحزن وصوت مبحوح : هلة احمد شخبارك
احمد بحزن: الحمدلله انت شلونك
حسن بابتسامه حزينه: الحمدلله عله كل حال
گعد احمد علة الكرسي الموجود برة لان ميكفي الديوان بعد من الناس
عادل : الله بالخير
الكل : الله بالخير
عادل عزة امير وعائلته وگعد بصف احمد
زيد دخل ودموعه بعينه وعيونه حمرة: الله بالخير
هم عزة امير وحسن وعائلته وگعد بصف عادل واحمد
اجه واحد شايل دلة وفناجين صبلهم وشرب احمد وكمل وهز الفنجان وانتقل لزيد وعادل وهم هزوا الفنجان
دخلوا عائلة ارجوان واحد ورة اللاخ وعمام امير يستقبلوهم وامير صامد وملامحة كولش جدية واخوته مبين الحزن والفراق عله ملامحهم
زيد وهو يهمس للي بصفه: خوية شلون الشيخ مات
شاب : والله ياخوي يگلون چان مريض وهو ضام مرضه عن الكل باخر ساعاته عرفوا بي
زيد اومئلة براسة: چا شصير من المرحوم
الشاب: انه ابن ابن ابن عم ابو للشيخ وابوي شيخ عيلتي اما شيخ شهاب فهو چبير عشيرتنه والريس الجبير
زيد: اها يعني گرايب
الشاب: اي خوية وانت شصير منه
زيد بحزن: انه رفيج ابنه وابن اخو
الشاب: باين كلش تحبه للشيخ
زيد بقهر وتنهيدة حارة : اي والله كلش احبة مثل ابوي
الشاب : ماعرفتنه ابن منهو انت
زيد: انه ابن الشيخ صگر
الشاب: ياهلة يعني انت ابن شيوخ
زيد: اي اب عن جد احنه شيوخ
الشاب: والنعم منكم وانه قثم ابن الشيخ منعم
زيد وهو يصافحه : تشرفت بيك خوية
قثم ابتسم بحزن: ماكو مثل الشيخ شهاب چنت دايما اتمنه اكون مثله عله شهامته واخلاقه وتعاملة وية ديرته
زيد: الله يرحمه بس منهو حيكون شيخ العشيرة الجبير
قثم: اكيد ابنه امير لان هو من چان عمره ٢٠ سنه چان ياخذة اهو ومجتبى المرحوم ويا للديوان حته يتعلمون
زيد: الله يعينه لامير موت ابو مو شوي
قثم: اي والله بس مهما يصير بي مايهزة ريح رجال والنعم منه اذكر موت اخو حرگ دمه و اخذ ثارة من الشيخ سليمان
زيد: والله انه ماكنت رفيجه بهذاك الوكت
قثم: چا شلون تعرفتوا
زيد: هو وحسن الي ودوني للمشفه لان سويت حادث وية اخو كرم
قثم: اها چا هيچ
زيد: وبعدين ودوني للمشفة وتعافيت ورة يومين صوبوني وامير وحسن چانوا طول الوكت يراقبوني من سويت الحادث ليهسة وساعدوني للمرة الثانية بيومهة
قثم: ومنا قوت علاقتكم صح
زيد: بلي چانوا يبقون معاي بالمشفه وصرنه رفجان
قثم: الله يحفظكم
زيد: تسلم
عادل وهو يهمس لزيد: اگول ماكو اكل انه جوعان
زيد بهمس: طاحظك حاير بالاكل
عادل بهمس : چا اموتن من الجوع انه
زيد گام يفر بايدة بقله حيلة وتقرب من احمد وهمسله: چا شوكت تمشون
احمد: عمي الشيخ گال ربع ساعه ونطلع يعني فد خمس دقايق ونگوم
زيد: اها چا هچ انتو روحوا وانه وعادل نبقة وية رفجانه مايصير نتركهم
احمد: انه هم اضل وياكم همة اصحابي وانه ما اتركهم
راحوا عائلة ارجوان وبقوا احمد وعادل وزيد وية امير وحسن
&&&&&&&&
دخلن نسوان اهل ارجوان كلهن فرد جوگه
ايمان: يبووووووووووووو الله ياسعدچ ويصبرچ شيخة
ندى: يبوووووو عظم الله اجرچ
ارجوان اخترعت من صوت صراخهن وهمست لامهة: مامه ليش من يدخلن يصيحن
ام احمد: هي هيچ عاداتهم من يدخلن بفاتحه لازم يصيحن
ارجوان بخوف: بس يخوفن او ماي گاد
ام احمد: اي والله
الشيخة فرحت من شافت اهل ارجوان رغم حزنهة بس لان احترموهة واجوا عزوهة هي مكيفه
ندى مرت العم كريم: الله يصبرچ شيخه علة فراگ زلمتچ
ام امير تدگ عله رجلهة وتبچي: سوودة بوجهي راح ابو الطول الحلو يبووووووووووووووو
النسوان يدگن ويلطمن وام امير ملخت روحهة بالبچي هي ومها زوجه سجاد ابنهة
مها ببچي وهي تلطم عله وجهة: عمييييي وينك عمي اهئ اهئ اهئ وييييينك منهو عندنه غيرك
ارجوان ضلت مبهوته من تصرفاتهن المخبلة وام احمد مدنگه راسهة وضربت ارجوان بعكسهة: دنگي راسچ عيب
ارجوان دنگت: شنو العيب بالموضوع
ام احمد بضيق: بعد عاداتهم هيچ لو تدگين وتلطمين لو تنچبين وتسكتين وتدنگين راسچ
ارجوان: اوووف وين عايشين احنه
ام احمد: ولچ صوتچ
ارجوان نصت صوتهة : شوكت نرجع لان متت من الحر
ام احمد: گومي خلي نسلم ونطلع
گامن ارجوان وامهة وعزن ام امير وطلعن
ارجوان وهي تخلي ايدهة عله صدرهة وتجر النفس: يمه متت من الحر واخيرا دا اشتم هوة نقي
ام احمد: لعد ازدحام ونسوان هواي والدنية حارة شلون تردين الوضع لعد
ارجوان وهي تمشي وشافت كله زلم: مامي منو ذولة
ام احمد: امشي هذولة فاتحة الزلم
ارجوان: هوووواي اكو معقولة اكو هلگد زلم
ام احمد: هههه اي هاي عود مو كلهم دمشي ياله
وگفن ارجوان وامهة تكسي ورجعن للبيت
&&&&----------&&&
امير ماتحرك من مكانه لازم السرة ويسلم علة الناس
سجاد بتعب: خووية انه تعبت من الوگفه داخل اريح شوية
امير بجمود: هاي فاتحة ابوك مو مال تمشي اوگف شوية وتخلص الفاتحه
سجاد اومئ براسه وهو ميت من التعب
زيد يربت علة چتف امير: شمالك امير روح ريح وانه اوگف بدالك
امير باعتراض: لا خوية مشكور بس هاذي فاتحه ابوي ماگدر اتركهة
زيد وهو يقدمله مي: هاك اشرب وجهك شحاله من التعب
امير اخذ كاسة المي وشربهة: رحمة الله والديك
زيد ابتسمله بانكسار وهو يشوف صديقه يكابر عله حزنه وصامد لخاطر اخوته
احمد وعادل دنگوا روسهم ووگفوا وية الوگافه بصف حسن وامير
مرت الايام ومضت عله فاتحة الشيخ عشرين يوم
امير وهو يگعد عله سريرة بتعب وغمض عيونه ونزلت دمعه من عنده: شتاقيتلك بوية
تنهد بحرارة وشاف مسج من موبايلة فتحه وانصدم من المرسل امير بصدمة: ارجوان...
صراع الشيوخ
