رواية حرم الاسود الفصل التاسع والعشرون بقلم بتول ابو الليل
حسبالي حبك صدك
وعيونك تحبني
ثاريني مثل الورد
بس اذبل تذبني ..!
.➛ ✿✿ ✿✿ ✿✿ ✿✿ ➛.
بقه مصدوم مني باوع الاوراق بايدي ورجع باوعلي يريد تفسير يريد يعرف ليش هيج اتصرف
اني احس روحي ميته كل جسمي يرجف ودموعي تنزل بصمت.
تيمور : تريدين اطلكج؟
هزيت راسي بأي واني امسح بدموعي وتنزل غيرهن.
تيمور : وكلامج وعدج الي مو ع اساس نبقه سويه تهتمين بيه واني بهل حاله هيج بكل هل بساطه مايهمج وضعي تعوفيني واني مريض
_ماريدك تتأذه اكثر هل شيء احسن الي والك وانتَ قبل كتلي اطلكج.
تيمور : اني يمج راحتي يمج علاجي اريانا باوعيلي احجيلي مهددينج بشي مخوفينج احجيلي يروحي لاتخافين من شيء ولاتهتمين خليني اتعذب بس لاتعذبيني بيج انتِ تدرين نقطه ضعفي لاتحطميني اكثر مما اني متحطم هسه كولي شنوو الخلاج هيج تفكرين احنه حلينه كلشي سويه وتفاهمنه وصار كلشي تمام شتغير هسه كـولي.
_محد مهددني اني اريد اطلك بأراتي ماريد ابقه وياك بعد خلص كلشي انتهه بينه عوفني بحالي تعبت خلص.
بلع ريكه بتوتر وهوه يتنفس بسرعه فتح قميصه من كدام اختنك صار وجهه احمرر دم اني واكفه من بعيد اباوعله وكلبي ينزف احسه.
تيمور : اذا طلكتج يكتلونج حته اذا تكرهيني ولا تريدين تبقين يمي عادي روحي بس لانطلك تبقين مرتي اذا يعرفون بيج طلكتي مني راح يستغلونج راح يأذونج انتِ ماتعرفين شنوو ماشفتي شصارر وياج.
خليت ايدي علئ حلكي واني ابجي درت وجهي عنه ممحتمله هل كلام ابد بعد كلشي حجيته وتصرفته خايف عليه خايف اتأذه او يصيرلي شيء.
تيمور : اريانا لادرين وجهج باوعيلي احجيها تردين تطلكين لوو مجبوره بهل كلام اذا ماترديني ليش تبجين ليش مقهوره فهميني لاتخليني اتخبل.
عضيت شفتي بقهر مسحت عيوني بسرعه ودرت وجهي اباوعله
_اذا تذكر مره كتلك اني وياك مستحيل نكون سويه ومستحيل يجي يوم واحبك وليوم اني اثبتت كلامي ماحبك تيمور كرهتني بعيشتي وعذبتني هواي نطلك اعوفك واعوف الكل مابقه دقيقه هنا بعد تعبت من كلشي خلصت طاقتي ماكدر اتحمل بعد عوفني بحالي الله يخليك.
عيونه تفتر داخل عيوني دمعن عيونه بلع ريكه بغصه ودنك راسه ميريدني اشوفه ضعيف اعرفه عنده قوه بس يمي يضعف كلش هز راسه وهوه يبتسم بقهر رجع رفع راسه باوعلي عيونه صارن حمر دم تحسه يحبس دموعه.
تيمور : اي ادري ماتحبيني ولا يوم حبيتيني بس ثقي بالله راح تتندمين علئ هذا الكلام راح تكولين ياريت ماحجيت هل كلام ولا عفته وهوه محتاجني بهيج وقت صعب
سوايتج هاي حفرتي گلبي بيها لو تمر الف سنه مراح انسه السويتي بيه هسه كلامج وجرحج الي اقوه من صوابي هسه باضعاف
انطيني الاوراق اوقعلج عليهن وروحي منا ماريد اشوف وجهج بعد انتِ اكثر وحده انانيه وماتعرفين بالحب والمشاعر اصلاً حرام احب هيج وحده مثلج
اني الكلب لأن حبيتج ودمرت روحي عليج شستفادين من حبي هذا كرهه اهلي الي و ابوي الراح وضعي هسه خليتني عاجز اريانا دمرتيني بكل معنه الكلمه ورايحه بكل بساطه ولاكانو صاير شيء ابد
احسن شيء تسوينه تروحين ومتخليلج اثر هنا ابد
كلامه دمرني اكثر بقيت مدنكه راسي ودموعي تنزل عشره عشره مد ايده سحب الورقه مني بقوه فزيت وباوعتله بصدمه
تيمور : قلم؟
بقيت صافنه بوجهه عيوني تمطر دموع عضيت شفتي بقهر حايره شسوي احس روحي انتهيت اريده وماريده حيرت وحتاريت اذا ابقه وياه ادمر اكثر واذا رحت راح اموت من ضميري وحساسي بالذنب.
تيمور : يااااشرطيييي
انفتح الباب دخل الجندي للغرفه مستغرب سحب نفس تيمور بقوه وكال
تيمور : لو سمحت قلم اريد
طلع قلم من جيبه وانطاه اله اخذه منه وقع علئ الاوراق بحركه تحسه راح يشكك الورقه من كد القهر.
رجع القلم للشرطي وباوعلي مدلي الورقه بعيون كلهاا عتب وقهر صرت ماباوع لعيونه ادنك راسي
تيمور : صرتي حره روحي وين ماتردين انتِ طالق طالق طالق ..
رفعت راسي اباوعله بغصه نزلت دموعي بسرعه شهكت بنص دموعي اريد اكون قويه ماكدر اريد اسيطر علئ نفسي ماكدر دموعي ترست وجهي تحس شخص جابرني اسوي هيج موو اني الي ختاريت هل شي بنفسي استاهل كلشي يصير بيه اني الوصلت روحي لهل مرحله.
هزيت راسي بأي اخذت الورقه من ايده وقعت عليها كدامه صار يعض بشفته السفليه وهوه يباوع الايدي تحسه يكتم بغضبه ودموعه عيونه تلمع بيهن الدمعه صارن دم وجهه احمررر قابض ايده بقوه ويهز بيها.
كملت توقيع وباوعتله اخر مره اشوفه بعد لهنا وتخلص قصتي وياك تيمور راح اعوفك تخليت عنك باكثر وقت محتاجني بيه اريد احضنه وابجي بس ماكدر.
الجندي طلع من الغرفه تقدمت نحوه واني اشهك مثل الطفل الصغير وجسمي كله يرجف ابتسم بهدوء يريد يحسسني بالذنب وعود هوه ممهتم.
تيمور : يلا روحي صرتي حره عيشي حياتج مثل ماتحبين شكو واكفه هنا عندي ناس تهتم بيه غيرج مامحتاجج بحياتي بعد صرتي طليقتي من اليوم.
الغصه بلعومي واشهك دنكه عليه حضنته بكل قوتي واني اشهك وابجي بصوت مسموع
_تيمووور لاتكرهني فدوة اني اسفه والله اسفه
ماسوه اي ردت فعل ولا حته ضمني اله بس صافن ابتعدت عنه شويه اباوع لعيونه حمرر دم ابتسم بقهر وكال.
تيمور : انتهيتي بالنسبه الي والله انتهيتي اليوم روحي اريانا اطلعي برا ماريد اشوفج بعد ابتعدي عن حياتي كلياً
ماعرف شحجي حقه شما يكول عني ابتعدت عنه واني امسح بدموعي هزيت راسي بأي عفته وطلعت بسرعه
طلعت من الغرفه انهاريت بدموعي كعدت علئ كرسي ماكدر اوكف علئ رجليه والله ماكدر كل جسمي يرجف.
خليت ايدي علئ وجهي واني اشهك ودموعي مثل النار تنزل علئ خدي.
جنت قريبه علئ الغرفه مال الحجز اسمع صوت تيمور يتألم يصيح ااااخخخخ كمت واني خايفه ارجع اشوفه لوو مارجع رجعت للغرفه
اريد ادخل ماخلاني الجندي منعني من الدخول بعد
شرطي : ممسموح دخلين بعد خلص الوقت اكو دكاتره تجي وتشوف وضعه
_سيدي بس اشوفه ليش هيج يصيح صار بي شيء
شرطي : احنه نشوف وضعه رجاء اطلعي.
تيمور : ااااااخخ بووووويه اااااخخخ.
خليت ايدي علئ الباب دموعي تنزل مثل النار سامحني تيمور سامحني اني السبب بدمارك اني الحقيره الوصلتك لهل حاله الله يخليك سامحني.
طلعت من المكان رحت لغرفة الضابط كاعده اليان وياه كامت من شافت حالتي
حالتي لاتوصف عيوني مثل الدم والدموع تارسه وجهي اجتني بسرعه حضنتني بقوه حضنتها واني ابجي بصوت مسموع واشهك
_اليااان دمرته انيي ليوم أذيت تيمور حيييل اني حقيره ولج مايستاهل هل شيء مني والله ميستاهل.
اليان : اشش خلص تعالي خلينه نطلع
سحبتني من ايدي طلعنه من المركز كعدت بالسياره واني اشهك دخلت اليان للسياره لزمت ايدي وكالت
اليان : كافي خلص الصار احسن الج والهه اذا تبقون سويه راح تبقه حياتج بخطر وهوه مراح يرتاح ابد عاد هسه هوه يهتم لنفسه ومستقبله وانتِ تبتعدين عن حياته وتصير حياتج بأمان
_وحبي اله وخوووفي عليه ولج احس روحييي تحترك من اشوف عيوووونه يعاتبني ولج رغم كلشي ماضوجني يخاف عليه يكلي يأذونج اليان شسوي بروحي هسه ولج راح اموت والله راح امووووت.
اليان : اششش كافي حبيبتي اهدي يعرفج تحبي وتردين مصلحته
_يامصلحه انييي عفته بوقت صعب عفته مريض محتاجني هووواي انييي حقيره انانيه فكرت بس بنفسي مافكرت بيه ابد شراح يحس هسه شراح يكوول عني ولج طلعت واسمع صراخه من الوجع وكدامي يكابر مايطلع ألم كدامي مايخليني اشوفه يتوجع اااااااخ يييمه اني شسووويت بروحي
صرت اضرب بروحي وابجي انهاريت بكل معنه الكلمه حضنتني اليان وهيه تبجي علئ حالتي.
اليان : كافي اهدي شجاج ولج كااافي راح تموتين لوو اعرف ممخليج مسويه هيج اذا تحبينه ابقي وياه لاتعوفينه اروح وحدي
_بعديش اني طلكت منه خلص انتهه كلشي بينه انتهه كلشيي اليان
لزمت وجهي بثنين اديها مسحت دموعي وركزت بعيوني وكالت
اليان : لازم تكونين قويه تحملي الصار صح وانتِ مغلطانه ابد صدكيني هل تصرف صح هوه من عفتي راح يشوف حياته ميبقه طول عمره يلاحقونه المجرمين راح يرتاح من هل امور كلياً
هزيت راسي بأي واني ابجي ابتعدت عني رجعت لمكانها ساقت السياره
خليت راسي علئ الجام واني محتطمه شعوري لايوصف ابدد.
....
رهف : بابا فدوة روح شوفه ليش ماطلع من الغرفه لحد هسه
رحيم : عوفي بابا خلي يرتاح الصار وياه مو شويه
رهف : حسبي الله ونعم الوكيل عليها ليش هيج سوت باخوي بشنوو قصر وياها جان يحبها هواي ويدللهه
رحيم : يحبها هوه بس موو هيه واذا صار الحب من طرف واحد ماينجح ابد صار هل موقف وياي قبل
وهسه انعاد الزمن وصار ويه ابني اني هم صرت موقف صعب امج واخوي ابن امي بنفس بالفراش لگيتهم
رهف : ليش هيج يصير ويانه لأن نحب من صدك لان فقره
رحيم : بنيتي مو كل مره مره ولا كل حب حب البعض يشوفون الحب تسليه وتضيعه وقت والبعض لاا يقدسون هل شيء وينطون كل مشاعرهم واهتمامهم حته يرضون الحبيب
رهف : اخوي انظلم هواي جان صادق وحبها من گلبه بس هيه ماقدرت هل شيء
رحيم : مانحكم عليها من تصرف هيه اعتبرت اخوج خاين لان جاب اليان لبيتها رادت تعاقبه بس ماعرفت شلون تصرفت هل تصرف الطايح حضه ودمرت روحهه وزوجهاا.
رهف : ماتوقع هيج هيه من الاول متحب اخوي وتصرفاتها صارت كلش موو حلوه ع كلشي تزعل وتريد بس تعوفه يمكن لان معنده فلوس.
رحيم : والله يابويه مادري.
طلع اخوي من الغرفه عيونه حمر دم وجهه صاير احمر باوعلنه بهدوء وطلع من البيت
رحيم : رايح اشوفه
هزيت راسي بأي عافني وطلع ورا اخوي يشوفه.
ماعرف ليش هيج يصير ويانه كل وحده ياخذونها لازم تخونهم ويه اقرب الناس الهم ..
...
اليان : اخذت اريانا للمركز حته تطلع من تيمور بقيت كاعده ويه الضابط.
_سيدي الكلام الحجيته بعصبيه صدكني اخوي صح يشرب كحول بس بوقت عصبيه او مشاكل
الضابط : كلتي يتعاطه مخدرات
_أي هوه يشرب يعني
الضابط : تدرين شكد عقوبت هل شيء 3 سنوات سجن.
_لا لا سيدي فدوه اروحلك والله العظيم هوه موو دائماً يشرب بس كتلك من يضوج واني متنازله
الضابط : بابا احنه بشغل موو لعب هل امور ماينلعب بيها
_اعرف والله اعرف بس هوه مايشرب سيدي اني مستعده ادفع كل فلوس الكفاله
الضابط : وكلي المحامي وخلي هوه يدافعله عن القضيه
_تمام.
اخذت جهازي واتصلت علئ المحامي وطلبت منه يستلم هل قضيه ويطلع تيمور من السجن حته لوو يبقه بس موو 3 سنوات هواي عليه
اريانا تاخرت هواي يمه بقت تقريباً ساعه كامله بقيت اني كاعده بغرفة الضابط شويه ودخلت
وضعها يكسر الگلب عيونها منفخه ودموعها عشره عشره تكول شخص كاتلها.
اخذتها وطلعنه من المركز لازم اخليها تكون قويه السويته صح وماغلطانه بشي لازم تفكر بنفسها وتعوف الكل.
اخذتها ورجعنه للبيت حته نجهز جنطنه وناخذ جوازات السفر.
دخلنه للبيت تلاكت وياي جنان تريد تسالني عن تيمور
جنان : رحتو لتيمور موو شلونه زين راح تتنازلين عنه
_وكلت محامي وهوه راح يستلم القضيه
جنان : يعني شنوو مايطلع ليوم
_لا مايطلع لازم ندفع كفاله والمحامي يطلعه
بقت ساكته عفتها وصعدت لغرفتي واريانا هم راحت لغرفة تيمور جهزت جنطتي وخليت كلشي يلزمني
اخذت كل الذهب مالتي وفلوسي واوراق الحصه هناك اكدر اشغل فلوسي بكل سهوله وادير شغلي الخاص بيه حصتي كلش جبيره نص املاك بابا باسمي.
كملت كلشي اخذت ملابس ودخلت سبحت وبدلت ملابسي جهزت نفسي وطلعت رحت لغرفة تيمور جانت اريانا كاعده علئ السرير وصافنه والجنطه والملابس ع سرير.
_هاا شنوو بعدج ممخلصه
اريانا : اليان ماكدر تعبانه والله خلينه لباجر
_لٱ ليوم باجر اربعين بابا لازم هسه نطلع حته نصبح بالنجف ازور بابا ونطلع للمطار ماعدنه وقت ابد.
اريانا : وتيمور شلون ميزور ابوه؟
_استغفرلله انتِ شبيج من شوكت انتِ هيج عاطفيه بسبب تصرفات تيمور وشغله بابا مات اصلاً حته ميحقله يزوره وشغله ثانيه هوه مريض هسه حته لوو جان مامسجون ميروح فأ رتاحي ويلا كومي.
هزت راسها بأي رحت ساعدتها بالجنطه خليت ملابسها بيها وجواز السفر طلعنه ثنينه من البيت
جانو اخواني كاعدين بالصاله وياهم المحامي يتفاهمون وياه علمود قضيه تيمور
ساهر : وين؟
_مسافرين
قصي : وين مسافرين وليش ماتحجون
_ماكو داعي نحجي هسه عرفتو يلا اريانا
اريانا : حاولو تساعدون تيمور
ساهر : وانتِ هم رايحه وياها شنوو؟
هزت راسها بأي بقو صافنين ماعرفو شنوو السالفه لزمت ايد اريانا وطلعنه من البيت خليت الجنط مالتنه بسيارتي وصعدنه سقت متوجهه للنجف الاشرف.
طول الطريق ضايجين ولا وحده منه فتحت حلكها بحرف
اتذكر كلشي صار ويايه بهل 3 اشهر الفاتن من اول مارجعت لحد هاي الحظه اني خلصتها مشاكل وعذاب
مابقه شيء ماصار وياي كلش تعبت ودمرت نفسيتي
جنت مرتاحه هناك ادرس وممهتمه لشي بابا موجود بحياتي يخابرني يسال عني يهتم بيه خليته مات زعلان
علئ انسان اصلاً ماحبني ولا فكر بيه اصلاً ولاهتم لمشاعري ابد.
يمكن اكون غلطت بمشاعري اتجاهه الصار هوه الصح يمكن تكون هاي بدايه لحياتي الجديده الي راح اعيشها بوحدي
بدون اهل بدون قيود ماهتم لأي شخص بعد اعيش مثل ماريد واحب.
اباوع الاريانا صافنه بفراغ حاسه بوجعها تحب تيمور هواي وتخاف عليه
تركته بهيج وضع حاسه بالذنب لان خلته مّرَيَـضّ وراح تسافر
بس هذا احسن شيء الها واله هوه اذا بقو علئ هاي الرنه مراح يرتاحون بحياتهم ابد راح يخلصونها مشاكل وخوف ورعب من المجرمين
خلي هوه يعيش حياته وهيه تهتم لنفسها وحياتها تبتعد عن الخطر وعن الكل.
نبدأ اني وياها من الصفر منهتم لأي شخص بعد راح اكون سند الها وهيه سند الي
شهاداتنه عدنه وفلوسنه نكدر نشتغل ونكون نفسنه وشغلنه الخاص ممحتاجين احد بعد.
سقت هوواي بالطريق وكفت علئ مطعم نزلنه نغسل اريانا لعبت نفسها وصارت تتقيئ.
_هاي لان مماكله وبس تبجين تعاي اشربي شيء اكلي
اريانا : ماريد كلشي ماريد خلينه نروح يلا
_مايصير هسه بس تصعدين بالسياره ترجع تلعب نفسج عاد اكلي شيء حته تصيرين زينه
اريانا : والله ماشتهي.
_لخاطري شويه
بالكوه قنعها وخليتها تشرب عصير وجبت الها اكل اكلت شويه وابتعدت ماكملت اكل بالكوه تاكل
اني هم اكلت ورحت دفعت الحساب وطلعنه من المطعم رجعت اسوق
بعد سياقه كلش طويله من بغداد للنجف وصلنه تقريباً بـ 11 بليل لان طلعنه المغرب مناك.
خلينه الجنط وكلشي بالسياره ونزلنه نزور الامام
دخلنه للحمامات توضينه ورحنه للحضره نزور المكان من بعيد يفتح النفس انطونه بالتفتيش جوادر صلاه دخلنه بيهن.
دخلنه لحضرة الامام علي ابن ابي طالب(ع) بست باب الدخول ودخلنه للصحن
زرنه لزمت الشباك وبسته حاسه بخنكه بداخلي خوف وتوتر من الجاي
دعيت الله يوفقني بحياتي واتخطا كلشي صار وياي وابدي حياتي بهدوء وبدون مشاكل.
اخذت تربه ورحت اصلي واريانا كذالك صليت ركعتين الزياره وكعدت اقرا قرآن
حسيت براحه مو طبيعيه دخلت لصدري اباوع الاريانا تباوع للحضره وتبجي
هواي بجت وتأذت لوو اعرف هيج راح تدمر مجان اخذتها وياي جان خليتها ويه تيمور احسها حيل تحبه وصعبه عليها تفارقه
بقينه كاعدين بالحضره كعدت يم اريانا حضنتها من كتافها اريدها شويه تهدئ وتبطل بجي
_خلص كافي شكد تبجين
اريانا : مادري ماكدر اسكت حاسه بالذنب
_علئ شنوو شمسويه انتِ ترا مغلطانه
اريانا : اليان تتوقعين راح يسامحني تيمور
_هوه اصلاً وين راح يشوفج خلص ليوم راح نروح لمكان محد يعرفه ومنشوف أي واحد منهم بعد.
اريانا : حته اهلي ماودعتهم امي ابوي راح ينقهرون عليه
_اول منوصل هناك اخليج تتصلين عليهم وتكوليلهم بكلشي
هزت راسها بأي وسكتت اخذنه شويه وكمنه طلعنه من الصحن رجعنه للسياره مالتي صعدنه بيها.
_نروح هسه نزور لو تخافين
اريانا : ساعه بـ 12 وين رايحين بنص المكابر اني تعبانه ولعبانه نفسي خلينه نروح لفندق نام بيه والصبح نجي نزور
_ماينطونه فندق لان بس بنات هنا
اريانا : لعد شلون هسه
_نرجع نام داخل الحضره احسن شيء
اريانا : شيرجعنه بعد ماحجيتي من الاول
_نسيت والله يلا انزلي خلينه نرجع
نزلنه من السياره رجعنه للحضره بالطريق اريانا لعبت نفسها حيل وداخت لزمتني من ايدي وهيه ترجف
اريانا : اليان راسي احس الارض دور بيه
_اخذج لدكتوره تشوفج.
اريانا : مادري احس روحي ..
بعدها ممكمله كلامها تخربطت وكعت علئ الارض تخبلت من وكعت بقيت اصرخ وابجي لتمت علينه العالم
شالوها واخذوها الاقرب عياده موجوده رحت وياها اني وكل جسمي يرجف من الخوف والرعب
علكولها مغدي وانطوها ابر بقيت كاعده يمهاا واني خايفه دخلت الدكتوره للغرفه
الدكتوره : الحمدالله ع سلامتها
_الله يسلمج دكتوره شبيها ليش هيج حالتها.
الدكتوره : هابط عدها الضغط وهل امور تصير ويه كل مره حامل.
_حامل ؟
الدكتوره : اي حبيبتي حامل بدايه حملها
بقيت فاتحه حلكي دخيلك ياربي منين طلعت هل سالفه هسه حامل من اخوي وليوم طلكو اني شسويت شراح يصير بيها من تعرف بالموضوع
لازم ماحجي شيء هسه خلينه نسافر وهناك احجيلها اذا حجيت الهاا ترجع ويخرب كلشي مراح تستفاد شيء من روحتهاا.
بقيت ساكته وحايره شلون اتصرف ورا ساعه كعدت من النوم باوعتلي وهيه تعبانه
اريانا : شصار اني وين
_دختي وكعتي وجبتج للعياده
اريانا : شبيه
_هابط عندج الضغط
هزت راسها بأي وسكتت خلص المغذي اجت الدكتوره شالته طلعنه من العياده صارت ساعه بـ 1 ونص بليل.
اخذتها كعدتها بمطعم اشتريت الهاا عصير ولفه اريدها شويه تتغذه
ماقبت تاكل بالكوه جبرتها تاكل اريدها تغذي ابن اخوي ماريد يصيرله شيء بسببي
كعدنه سويه بمطعم ع شارع هوه موو مطعم وانما محل يبيع لفات كص ومشروبات
_مشتهيه شيء
اريانا : لا
_تمام هسه كومي نرتاح بالصحن ونام شويه حته الصبح نروح للمكبره نزور ونطلع
هزت راسها بأي كملنه اكل ورجعنه للصحن تمددنه داخل الحضره خليت راس اريانا بحضني وبقيت امسح علئ راسها.
نامت هيه بسرعه لان تعبانه احس صارت مسؤليتي اهتم بيها واداريها.
خليت راسي علئ الحايط اني وهم نمت كعدت ساعه بـ 5 الفجر اريانا نايمه
كعدتها من النوم وطلعنه من الصحن رحنه للحمامات غسلنه توضينه صلينه وطلعنه للمكبره
وهل شيء كله وحدنه نفتر وهاي اول مره اسوي هيج خطوه صعبه لوحدي.
دخلنه للمكبره بـ 6 الفجر انقبض كلبي من شفت الكبور والمكان
بابا حبيبي انتَ نايم هنا شصار بحالك هسه تغيرت بعدك حلوو.
سالت الدفان علئ مكان ابوي لان ماعرفه وين دلاني عليه
رحنه اني واريانا عليه جانو مسويله قمريه وصوره للكبر نزلت دموعي بحركه من شفته
ركضت علئ الكبر بسرعه كعدت يمه واني دموعي تتسابق
_بابا حبيبي هاي اني بنتك اليان اجيتك اني اسفه خليتك تموت زعلان مني
هواي تعذبت بغايبك بابا محد بقالي جنت انتَ السند الوحيد الي ورحت
مافكرت بيه ماكلت بنتي راح تدمر وراي والله دمرت اني بدونك دمرت ليش ماخذتني يمكم اني منوو الي غيركم اكعددد حاجيني فدوووه اكعدددد.
شوف شصاار بيه وراك اكعد خليني احجيلك شسوه بيه اخوي
بجيت هوواي واحس انفتحت كل جروحي من شفت كبر ابوي اريانا واكفه يمي وتبجي لزمتني من كتافي وكومتني.
اريانا : كافي حبيبتي ادعيله لاتخلصيها بس بجي
_اريانا اني وحيده كل اهلي عافوني مالي احد غير بابا وراح وعافني.
اريانا : الله يرحمه ويعجل مثواه الجنه.
كمت من عنده اخذت مي ورد غسلت الكبر اغسل بيه ودموعي تتسابق خليت ورد علئ الكبر ورحت علئ امي.
كبرها هم قريب علئ كبر بابا هيج مسافه صغيره
كعدت يم الكبر بجيت هواي وحجيت الهاا كلشي صار وياي من رجعت لحد ماراح ارجع اسافر من جديد
احسها تسمعني واني احجيلها من زمان جنت بس اضوج لزم صورة امي واحجيلها كلشي صار وياي.
اريانا ; يلا اليان تاخرنه هسه يجون اعمامج واهلكم يزورون ابوج
هزيت راسي بأي بست الكبر مال امي ورحت ويه اريانا رجعنه للسياره
طلعنه من المكبره وتوجهنه لمطار النجف الاشرف.
اخذت الطريق كله ضايجه ومقهوره وحايره احجي الاريانا عن حملها لوو موو وقته
بعد سياقه ساعه تقريباً وصلنه المطار النجف
نزلنه جنطنه والسياره انطيتها لامن يرجعونها.
دخلنه للمطار انطينه جوازات السفر كلولنه ساعه وتطلع طيارتكم.
بقينه منتظرين الطياره رحت اشتريت كهوه وكعدت يم اريانا انطيتها كوب
_شلون صرتي
اريانا : احسن
_خما لعبانه نفسج
اريانا : لأ زينه
_مشتهيه شيء اجيبلج تاكلين
اريانا : لأ ماريد بس كهوه
_تمام
اخذت من ايدي الكهوه بقينه نشرب سويه فجأه كاالت
اريانا : هسه وين نروح
_عندي صديقه بالمانيا نبقه يمها كم يوم بعدين اجر النه شقه.
اريانا : ليش مانروح لخالتنه بتركيا
_ليال؟
اريانا : أي والله احسن مانبقه وحدنه بلد منعرف بشر بيه ونكول الهاا متكول احنه عدها وحده لوو تكول عادي اهلي ميخافون عليه
_تمام لعد خلينه نحجز لتركيا نغير البطاقه
كمت رحت علئ ابو الحسابات سجلت سفرتنه لتركيا كلام اريانا معقول نبقه يم خالتي أمن النه وهيه هسه حامل لازم تكون مرتاحه بالبيت وشخص يهتم بيها.
بقينه منتظرين شويه وصعدنه بالطياره كعدنه سويه لزمت ايد اريانا وكلت
_راح تبدا حياتنه الجديده من اليوم
اريانا : انشالله تكون بدايه خير خاليه من العذاب والقهر
_انشالله
قلعت الطياره مالتنه متوجهه الئ بلد ثاني مختلف جذرياً عن بدلنه وعيشتنه ...
