رواية قاتل مجهول الفصل الثاني بقلم محمود الأمين
#قاتل_مجهول
#الجزء_التاني
الجثة اللي على الارض، جثة مشوهه ولكن هو نفس جسم عطية اللي جالى المكتب، كان لابس لبس فرد امن وواضح ان دماغه كانت بتنزف دم.. بس السؤال اللي جه في بالي ليه اللي قتله شوه الجثه؟
لقيت في جيبه المحفظه بتاعته ولما طلعتها وفتحتها لقيت فيها البطاقه الشخصيه اللي بتثبت انه عطية.. وبكده وبنسبه كبيرة مش عطية اللي قتل مراته وعياله، وفي حد اكيد كان عاوز يخلص من عطيه وعيلته عشان سبب معين
بس ايه السبب ده؟.. اكيد هيبان مع التحريات والتحقيقات، بعد شوية وصل وكيل النيابة ورجاله المعمل الجنائي والطب الشرعي ولكن اللي لاحظته ان الدكتور المسؤول عن فحص الجثه مش هو نفس الدكتور اللي كان معانا لما عيله عطيه اتقتلت
قربت من الدكتور وسلمت عليه، وعرفت انه الدكتور هشام اللي كان معانا في الجريمة اللي فاتت، حصلت معاه ظروف عائليه واخد اجازه، وان الدكتور وليد، هو اللي موجود دلوقتي واللي هيفحص جثة عطية
قربت من وكيل النيابه اللي كان واقف وقولتله
_ ده عطيه اللي حكيت لحضرتك عنه، هو ده اللي جالي المكتب وقال انه قتل مراته وعياله والتحريات اثبتت ان مراته وعياله كانوا عايشين في وقتها.. تغيير القبر اللي بعتنا لي وطلع مفيهوش جثث لسه مدفونة
= خلي بالك وده مجرد احساس يعني، اللي حصل من الراجل ده وجيته عندك القسم هي اللي هتحل القضيه كلها، الراجل ده كان جاي لغرض تاني، أصله اديني عقلك ايه اللي يخلي راجل زي ده يجي يعترف على جريمه محصلتش اصلا وبعدها الجريمه تحصل فعلاً، ولما تيجي تدور عليه عشان تفهم ده حصل ازاي تلاقيه هو كمان اتقتل
_ انا مش فاهم سيادتك تقصد ايه؟!
= هيبان في التحقيقات، الصبر بس
...
خلصت كلام مع وكيل النيابة وكنت حاسس انه بيلمح لحاجه بس انا اللي مش فاهم.. وفي الوقت ده اتكلم الدكتور وليد دكتور الطب الشرعي وقال
_ الوفاه حدثت نتيجه ضرب باله حاده اسفل الراس ودي تسببت في نزيف داخلي حد وده اللي سبب الوفاه.. وبعدها القاتل شوه وجه المجني عليه، ومش اي تشويه دي ماده كاويه
واضح ان اللي عمل كده كان عاوز يخفي ملامح المجني عليه خالص
وعموما اكيد هشرح الجثه وهيكون عندك تقرير في اقرب وقت، اه وبالمناسبه الدكتور هشام قبل ما ينزل اجازه كان سلمني تقرير الطب الشرعي الخاص بست وطفلين وطلب مني ابعتهم للنيابة وهيكونوا عند حضرتك في اقرب وقت
= تمام يا دكتور وفي انتظار التقرير
...
خلصنا كلام معاه دكتور الطب الشرعي واتنقلت الجثه للمشرحه عشان تتشرح.. واول ما رجعت المكتب طلبت من الرائد معتز عمل تحريات عن عطيه وعيلته كلها عاوز اعرف كل حاجه عنه المعارف والاصدقاء والعدوات وكل حاجة
وقعدت على مكتبي وانا باخد نفسي بالعافية.. ومن التعب محسيتش بنفسي ونمت على المكتب ولكن صحيت على صوت الرائد معتز وهو ماسك في ايده سكينه في حافظه بلاستيك، وبيقول ان واحد من الجيران اسمه صفوت لقي السلاح ده مدفون قدام العمارة، والسلاح كان عليه دم ناشف، مسك السلاح بمنديل وحطه في كيس وجابوا لحد هنا وسلمه وتقريبا ده السلاح اللي اتقتلت بيه عيله عطية
وطلبت من الرائد معتز ان السلاح ده يروح للمعمل الجنائي عشان تترفع من عليه البصمات ونعرف البصمات اللي عليه بصمات مين؟!
وفي الوقت ده عرفت ان الدكتور وليد بعت تقرير الطب الشرعي والمعمل الجنائي للنيابة، وزمان وكيل النيابه بيقراه دلوقتي
******
كنت قاعد في مكتبي لما وصل تقرير الطب الشرعي والمعمل الجنائي والبصمات اللي يخص جريمة قتل الست وعيالها
فتحت تقرير الطب الشرعي وكلام الدكتور هشام اللي قاله في التقرير المبدئي، هو هو المكتوب في تقرير الطب الشرعي اللي قدامي ولكن مع نقطه زيادة والنقطه دي ان القاتل كان مخدر الست وعيالها قبل القتل.. اثناء التشريح تضح ان في ماده مخدره في جسم المجني عليها وابنائها
فتحت تقرير المعمل الجنائي والبصمات وقبل ما افتحه عرفت من المباحث ان في واحد من الجيران سلم سلاح الجريمة للمباحث واتبعت للمعمل الجنائي عشان تترفع من عليه البصمات
ولكن لما فتحت التقرير لقيت ان البصمات اللي موجوده في مسرح الجريمة هي بصمات المجني عليهم وبصمات الزوج واللي هو عطيه، ممكن يكون هو اللي عملها وبرضو ممكن لا
اصل ده بيته واكيد بصماته هتكون موجوده فيه، واللي هيفصل في الموضوع ده هي البصمات الموجوده على سلاح الجريمة واللي بالفعل بعد حوالي اربع ساعات تطابقت البصمات الموجوده على سلاح الجريمه مع بصمات الزوج عطية.. وده اللي بلغته للمباحث وبكده عطيه هو اللي قتل عيلته.. ولكن السؤال مين اللي قتل عطية؟
*****
بعد مكالمه النيابة.. عرفنا ان عطيه هو اللي قتل عيلته.. واللي علينا دلوقتي نعرف مين اللي قتل عطيه؟.. وعشان كده مشينا في التحريات اللي ظهرت بعد 24 ساعه ودخل عليا الرائد معتز وفي ايده ملف التحريات واتكلم وقال
_ التحريات بتقول ان عطيه كان شغال فرد امن في مستشفى حكومي، وكان على خلاف دائم بدكتور اسمه الدكتور سعيد وده بسبب ان عطيه ساب مكانه في وقت الشغل من غير ما يستاذن وفي الوقت ده في اهل مريض دخلوا المستشفى والمريض ده كان اتوفى، واهل المريض وقتها اتخانقوا مع الدكتور سعيد والمفروض لو عطيه كان موجود على الباب كان هيمنعهم من الدخول او على الاقل كان هيحاول يتصرف
وبسبب تصرف عطيه في واحد من اهل المريض كان هيخلص على الدكتور سعيد يومها ولكن ده مش سبب للقتل طبعاً، ولكن اللي عنده سبب للقتل هو اخوه سليمان
سليمان كان عنده ابن اسمه سامح كان في الثانويه العامه وفي يوم حصلت مشاده بينه وبين عمه عطيه، وللاسف عطيه زقوا من على السلم والولد وقع على دماغه وحصله نزيف داخلي وتوفى، ولولا ان الجيران تدخلت كان سليمان هيخلص على اخوه
...
بعد ما خلص ملف التحريات واللي كان في معلومه انا عارفها كويس ان عطيه كان على خلاف مع مراته بسبب موضوع الشغل ودي حاجه احنا عارفينها.. قررنا استدعاء سليمان عشان يجي يتعرف على الجثه اللي في المشرحة اذا كانت جثه اخوه ولا لا؟
وفعلا جه سليمان عشان يتعرف على الجثه دردشت معاه اني عارف الخلاف اللي بينه وبين اخوه.. وانه قبل اي حاجه هيتعرف على الجثه وفعلا دخل المشرحة واترفعت الملايه من على الجثه وبعد ما دقق فيها خمس دقايق.. قال ان فعلاً دي جثه اخوه
والشهاده دي معناها ان الجريمه الاولى اتقفلت خلاص اصل اللي قتل الست وعيالها هو جوزها.. وجوزها نفسه اتقتل
...
رجعنا على المكتب عشان ندردش شويه مع سليمان، الا اكيد هيتم استدعائه من النيابة بعد ما نبعت التحريات اللي عملناها
ولسه كنت هبدأ كلام مع سليمان.. عشان يجي تليفون من دكتور الطب الشرعي واللي كان اسمه وليد رديت عليه واتكلم وقال
_في حاجة غريبة دلوقتي وانا مش فاهمها، ومستحيل تحصل
= حاجه ايه انا مش فاهم وضح؟!
_ احنا لما بنشرح جثه بنحط وقت تقريبي للوقت اللي اتقتلت فيه، وده اللي حصل لما عملنا تشريح لجثة الست وعيالها في الجريمة الاولى
وعرفت ان التقرير اللي راح النيابة والخاص بالبصمات بيثبت ان جوزها عطيه هو اللي قتلها وقتل عياله وده مستحيل
= ليه مستحيل ما تقول؟!
_ عشان لما جيت اقيم الوقت اللي اتقتل فيه عطيه.. لقيت انه اتقتل قبل ما الجريمه الاولى تحصل.. يعني عطيه اتقتل قبل ما مراته وعياله يتقتلوا.. يبقى ازاي هو القاتل؟
...
قفلت مع الدكتور وانا هتجنن.. اصل الكلام اللي بيقوله ده ملهوش الا معنى واحد ان عطيه لسه عايش لكن...
