رواية نورة الفصل الثاني
صرخت مااريدهم يذبحوني
دخل بابا لزمني من ايدي
وكومني وهو يقره ايات قرانيه عليه
دخلت لغرفة حتى يعقدولي واني ارجف
بس ابوي من يقره علي ارتاح
شفت داوود كاعد ومدنگ راسه
ابوي كال
-اكعدي بنتي وسد الباب
-يابه هذا ابن عمتج وراح يصير زوجج
ليش خايفة منه
تره مو كل البشر سوه
رحمن شكل وداوود شكل
رفع راسا داوود وگال
-والله يابنت خالي اخليج بنص عيوني
واداريج واخاف الله بيج ان شاءالله
هزيت راسي بالموافقة
ابوي باسني من راسي
وصاح ع الشهود اخوي واخوه
وعقد انه وطلع ابوي كال اكعدوا سوه
وسد الباب وراح
بقيت بس اني وياه
كلش خايفه بوكتها
كال
-احلام ليش خايفه مني
سكتت مجاوبت
-احجي احلام ليش خايفه مني
-خاف تذبحني مثل ريحانة
-ليش هيج دكولين
تره اني غير عن رحمن
اني الحمد الله رجال صايم مصلي واخاف الله
وفوك كل هذا احبج من صغرج
من ترحين وتردين للمدرسة انه
اباوعلج واتمناج الي ...
اتدنه يميه ولزم ايدي
-ان شاءالله ماتشوفين غير الشي الزين مني
مااريدج تخافين مني انه رجلج صرت
من سمعت كلامه شويه ارتاحيت بس بعدها الخوفه بيه ومنظر ريحانة وهي مذبوحة ميروح من بالي
-ها احلام رضيتي بيه
هزيت راسي اي
ضل يسولف وياي
لحد مادخل ابوي
شافنه نسولف واني الخوفه رايحه مني
طبت عمتي وراه
وكامت تهوس وتبوس بينا
والله يسعدكم ويهدي سركم
والله يااحلام
تره داود زلمة حووك وماتلكين مثله
بقوا يمنا بيت عمتي ساعه وره الخطبه
وراحوا
وابوي لزمني نصايح وسوالف
واني كله اي واي يابه
استسلمت للامر الواقع وبديت اقنع روحي داوود زين مو مثل رحمن...
وره كم يوم استلمت التتيجه وطلعت ناجحه
كلش فرحت لان نجحت ودرجات زينه
جنت اتمنى اكمل دراسه
بس اعرف مراح يقبلون
ضميت شهادتي الي بدال ماافرح بيها
حزنت لان راح اترك المدرسه
عمتي وداوود سمعوا بيه ناجحة
اجو للبيت
وعمتي جايبة علبة جكليت وطشته عليه
وباركتلي داوود هم
-الف مبروك احلام
جان يباوعلي ويتبسم
عاد عمتي كالت نگوم احنه ابقوا وحدكم
من كامت كال
-ادري بيج مقهوره لان راح اتركين الدراسه
واتمنى اخليج تكملين بس انتي اشوفين
احنه بالعرب وعدنه زحمه البت تروح وترد كل ساع
بناتنه كلهن يتعلمن قرايه وكتابه ويكعدن بعد
-جنت اتمنى اكمل لان احب المدرسه
بس ع كولتك احنه بديرة عرب وهاي عاداتنا هيج
الحمد لله ع كل حال
-هسه انه اجيت اكلج هذا الاسبوع نتزوج انتي شني رايج
-بكيفك
جنت خايفه بكلبي
بس عقلي يكلي خوش ولد ومشفت منه شي موزين
جاوب هو بسرعه
-ليش خايفه
فتحت عيوني عليه متعجبه شلون عرف شكلت
-تره مبين الخوف عليج
بس والله اني عكس ما تحسين
وواعدج راح اكون الج الامان الوحيد الي بحياتج
شوفي ابوج شكد يحبج ويخاف عليج
وروح الحسين اني اكثر
من صغرج وانه مخيل عليج واتمنى تصيرين الي
ولا تفكرين اأذيج يوم لو هالكد
واشر باصبعه لو علكدوت مااذيج
ااذي روحي وماااذيج
واداريج واحبج واحترمج..
ابتسمت بوجها
احس مي بارد نزل ع كلبي كلامه
وكلش ارتاحيت
وردت روحي
-ايي هيج اريدج مرتاحه
هسه اكوم اني
وان شاء باجر تجيج امي تشتريلج الذهب والهدوم
وانتي شتردين بس كولي
عيوني الج
-تسلم عيونك
ابتسم وكام باسني من راسي
-الله يرضى عليج
طلع مبتسم وفرحان
واني امشي وراه هم مرتاحه
كلهم انتبهوا علينا
عمتي هلهلت بساع
-ربي يفرحكم اكثر واكثر والابتسامة ماتفارك وجوهم يارب
كال داوود
-يمةة خلص اتفقنا ع يوم الخميس عرسنا
وانتي باجر اخذي احلام واشتريلها الي يعجبها ذهب وملابس
-صلاوات ع محمد ربي يفرحكم
ويتمم ع خير ان شاءالله
-يله يمه نروح
قبل لا يطلع التفت علي
-احلام تعاي
-ها
فتح محفظته وطلع فلوس
وكال هاي اشتري بيها الي يعجبج هدية نجاحج
-شكرا
-الزمي لا تستحين
اخذتهم
-يله اروح مع السلامه
ضليت اعاين علي وهو يمشي
يمه فدوه رحتله
حسيت ع نفسي واني اكول فدوه رحتله
يااا اني هيج كلت
عود ليش
شنو حبيته
شبسرعه بدل الخوف الي بكلبي الى محبه
سبحان مغير الاحوال
ثاني يوم اجت عمتي اخذتني ورحنا لسوگ الحله الجبير
اشترتلي تراجي ام الشباك يسموهن
وكلادة سبحة
وملوي ع شكل حيه
ومحبس ابو الگبة وحلقة
واختلي ملابس هواي
الي يعجبني اشتري مابخلت علي بشي
ورجعت للبيت فرحانه
عمتي كصت قطع قماش لامي ولاخواتي
هيج جانت عاداتنا
ام العريس تجيب قماشات لام العروس واخواتها
فرحن خواتي بالقماشات
بالاخص خديجه كالت اخيطها لعرسج
بسع لبست عباتها واخذت القطع
وراحت للخياطه
تخيطهن للعرس
اني كابلت نيشاني وافتح بالجياس
فرحانه بيه هواي
بالليل اجه داوود
يتفق ويانا ع العرس
كال
-خوما محتاجه شي
نست شي امي مجابته كولي واني حاظر
-لا عمتي مقصرت كلشي الي اريده
جابته
-خير ان شاءالله
باجر روحي اشتري بدلت العرس
-اي ان شاءالله
صدك اخذتني عمتي
واشتريت بدله عرس
حلوه جرجيت جانت وبيها بلك وخرز
ثاني يوم الخميس اخذوني لجيرانه
تمكيج العرايس بالبيت
مكيجتني ولبست البدله
ورجعوني
بعد ساعتين اجت الزقه واخذوني
لبيتهم مشي لان جانوا قريبين علينا
احنه نمشي والناس تمشي ورانه
وتهلهل وتهوس
نسوان وزلم
بس وصلت البيتهم
كمت ارجف وارتبكت
شافني داوود تخربطت احوالي
لزمني وفوتني للبيت
-شبيج احلام الناس تباوع علينه
صيري قويه
-خايفه داوود
-اسكتي نتفاهم بعدين
عمتي جابت دجاجه
وذبحها حماي جوه رجلينا
وطبينا للبيت
كعدوني بالهول
شفته نفس المكان
الي شفت ريحانه مذبوحه بيه
يمه اتخابلها كمت واطك رجل برجل
عمتي لا حظت علي الخوف
كومتني لغرفتي
طبت امي يمي
واني اكولها
-يمه فدوه اخذيني وياج اني اخاف ابقى هنا خاف يذبحوني
-اسم الله استهدي بالرحمن بنيني
منو يذبحج تره داوود مايشرب وماعده هاي السوالف
-بس اني خايفه يمة
-دكولي يا الله واقري اية الكرسي
وتروح منج الخوفه
بس لا تفكرين بشي ومتخافين
ضلت امي يمي
لحد ماكالوا راح يزفون العريس
رادت طلع واني اكلها
-يمه خاف يذبحني لا تعوفيني
-ولج يمه اسم الله شجاج
عتت روحها مني
-الولد راح يطب للغرفه عوفيني
طلعت وسدت الباب
ضليت ارجف مثل السعفة من الخوف
لحد ما طب داوود شافني كاعده والخوف والتوتر مبين علي
تقرب مني
-شبيج ترجفين احلام
-عفيه لا تذبحني
-استغفر اللة شبيج بويه شنو اذبحج
اشفتيني مجرم
لا تخافين احنه شحجينه ذاك اليوم
مو كتلج أنه احبج وأأذي روحي ومااذيج
انتي مريتي هسه
شلون اذبحج
استغفر الله
الله يلعنك رحمن شسويت بينه
تقرب مني لزم ايدي وهي ترجف رجف
-بس اكعدي
كعدني وكعد بصفي
هسه شلون اقنعج
انه احبج وانه مو مثل اخوي
بويه تره ذاك سكير واني زلم صايم مصلي
بعد ليش خايفه مني
-اني اتخايل ريحانه شلون مذبوحه
واخاف
- استغر الله
كام بدل ملابسه
واني مستحيه درت وجهي
وهو لبس دشداشته
كال طالع وانتي بدلي
بس طلع طبت عمتي
-احلام يمه ليش خايفه
اني عمتج تدرين بيه احبج
وذاك رحمن الله بلاني بيه
بس داوود هو شمعت بيتي
ويخاف الله
وانه يمج
ضلت تحجي وياي هواي
ولبستني سيت نوم
وكالت راح يطب عليج داوود
لا تكشين بوجهه
تره ماله ذنب بالي صار
ولا تمنعينه منج عمه
موزين ع سمعتج
وهاي الوادم كلها متانيه ياخذج
لو مانعتي
تره الناس تحجي حجي موزين
فهمتي
ضلت تحجيلي حجي استحيت منه انوب خفت بالزايد
وطلعت
وطب داوود
