رواية فصلية بديلة الفصل الثلاثون 30 بقلم ام ملكوت

سماء_

بقيت اتامل بطفلي وهوه يرضع شويه وحجت امي..

ام سماء: يمه انه باجر لازم ارجع بنيتي ..

سماء : ها يمه ليش

_يمه خوانج بدت امتحاناتهم لازم اروح ماعدهم احد هناك

_ومنو يبقى يمي جا

_راح اخلي اختج حلى يمج فد شهر على ماتكومين على حيلج تالي اخذهه..

_ماشي يمه ..

نمنه وكعدنه الصبح امي حضرت نفسهه وودعتني ووصتني على نفسي وطفلي ورجعت لبيت جدي ومناك ترجع للبصره لبيتهه ..

بقت يمي حلى صارت تساعدني وتنطيني الطفل وتسبحني وغيرهه...

وانعاد الروتين مثل كل مره صار شهم من ينزل من دوامه يبقى نايم بغرفتي يم الطفل وحلى تنام بالارض يم الكنتور.. 

بالبدايه صرت اضوج واستحي من اختي

تالي تعودت على وجوده بالغرفه وشفته شي عادي..

مرت الايام واجه يوم الاربعين عدنه بالعادات من يعبر الطفل اربعين يوم نسوي عزيمه ونذبح اضحيه..

                     ..................

ساجد_

راحت ام سماء وره ٣ ايام من طلوعهه من المستشفى بس بقت اختهه حلى .. 

بقت عيني عليهه واراقبهه لا اراديا بالبدايه حسيتهه منحرجه من عدنه وتستحي بس مع مرور الايام حسيتهه صارت بنت من بنات 

هل بيت 

والكل اتفق على حبهه لانهه كلش محترمه ومؤدبه ومايوم سمعنه صوتهه اعتله بالبيت ..

صرت احسهه خوش بنيه ومو غشاشه 

نفس باقي البنات وخاصه انهه مبينه بريئه وفقيره مو يم سوالف الحب والولد ..

وبعدهه صغيره مامفاتحه عينهه على هل سوالف .. 

مرت الايام واني فضولي اتجاهه واعجابي بيهه يزيد يوم عن يوم..وصرت لمن اصفن ابقى افكر بيهه واحس اني حبيتهه

بس ارجع واقنع نفسي بالعكس واني معجب بيهه بس لانهه حلوه وباجر بس اشوف احلى منهه اتركهه ..

بقيت الهي نفسي بالشغل واحاول ماختلط وياهه الى ام اجه يوم حفله اربعين الطفل.. حضرنه الاضحيه وجهزنه الضيافه وعزمنه الاقارب 

وصار البيت هوسه من النسوان والجهال والزلم وكلهه مشغوله وملتهيه تحضر واني لزمت توصيل الضيافه والاكل ..

                    ...................

سماء_ 

كاعد ارضع بالطفل واجت الشيخه للغرفه وبيدهه صندوق ..

الشيخه: يمه سماء احنه عدنه بالعادات بيوم اربعين الطفل نسبحه ونبدله ونودي للديوان يم ابوه وجده

تشوفه الناس ويرجعونه كومي خلي نسبحه اني وياج وهسه تجي هدى ويانه ..

الشيخه: وهاي يمه هم ويه العادات رجلج جابلج فستان وتخم ذهب لازم تلبسينه اليوم وتبدلين وتتعطرين وتطلعين يم النسوان حبيبتي..

سماء_ 

تفاجات من كالت من رجلي بس راح الاستغراب بسرعه لان هيج العادات عدهم طلعت الاب يجيب هديه للام تلبسهه بحفله الاربعين..

اخذتهن منهه وخليتهن على الجربايه وكمت طلعت الطشت الصغير والليفه والصابونه والشامبو وباقي شغلات الطفل 

وكاسرتله ماي دافي بالطاسه واجت هدى بقت هيه والشيخه يسبحنه واني بس ارشلهن ماي تالي كالت الشيخه..

الشيخه: يمه كومي انتي سبحي وبدلي هم ياله احنه راح نكمل سبح الطفل وتبديله ولا يهمج حبيبتي..

سماء: هاا ماشي لعد رايحه اسبح اني..

خليت وكمت اخذت المنشفه وملابس داخليه ودخلت للحمام سبحت وطلعت نشفت شعري

وخليت مكياج حلو ومناسب وطلعت الفستان لبسته جان كلش حلو وراقي تالي لبست الذهب ولبست شالي وكملت..

والشيخه هم كملت تبديل الطفل وعطرته وانطتنيا خلينه وطلعنه بره نسلم على النسوان بالصاله..

لكيت عماته وخالاته جايات والحضر عرسنه والماحضره جان موجود سلمت وتعرفت عليهم وكعدنه ..

هنه يسولفن واني اسمعلهن والعب بالطفل..شويه وكالو راح يدخل شهم ياخذ الطفل ..

كلهه لبست شالاتهه وهوه دخل سلم عليهن وهوه واكف تالي اجه ناحيتي اخذ الطفل وعطره صطرني ..

شكو رجعت حملت منين احمل وهوه مامتقربلي ..

جا شمالني ردت روحي بعطره ..

اوو هوه عطر مايصير انعجب بالعطر مثلا.. بس طالع فد شي مايخاف من العين..

                       ..................

شهم_ 

بقيت كاعد بالديوان يم الخطاطير تالي اجه ابن اخوي الصغير وكلي كملو الطفل تعال اخذه كتله روح كلهم شهم راح يدخل خلهم يحطون حجاباتهم على راسهم..

كمت استاذنت ودخلت جوه للصاله واجت كبال عيني ..تفاجات بنزاكتهه ماتوقعت هيج الفستان راح يطلع حلو عليهه ...

سلمت على الموجودين ورحتلهه اخذت الطفل منهه واني عيني عليهه .. 

ياربي هاي المره نازكه بكلشي مكياجهه واسلوبهه ونضراتهه وحتى مسكتهه للطفل 

حسيت نفسي محضوض بيهه وتفكير سرح بيهه بس سرعان مارجعت نفسي لوعيهه..هاي شكاعد اخربط

لا تكولهه ولك شهم ديربالك تحبهه وانت تعرف نهايتك شنو وياهه ..

خلي اروح احسن..

اخذت الطفل بسته وشميته وطلعنه للديوان صارو كلهم يصلون على محمد وتباركلي بي تالي اخذه ساجد وصار يفره على الموجوده واحد واحد يبوسه ويحط ورقه بجيب ملابسه ..

كمل وجابه خلاه بحضن ابوي الشيخ ..

وصار يبوس وسشمشم بي ويكلي ..

الشيخ: بحزن..بويه هذا الطفل من ريحه مرتضى حفديي ..

احس رجع طفل كاعد اشم ريحه مرتضى بي وليدي..

الكل: الله يرحمه..

شهم_

حجه هيج واختنكت ماعرف شلون لزمت روحي وماطلعت وكدرت اسيطر على دمعتي من ان تنزل..

شويه وانطاني الطفل واخذته ودخلت للبيت وكال لساجد يجي وياي يجيب الغده ..

دخلت اني للصاله واني مختنك وانطيت الطفل لسماء ورجعت للديوان بدون مانطق كلمه وبدون ماباوعلهه ..

مو لاني تذكرت ابني ورجعت حقدت عليهه لا بس ماردتهه تشوف الحزن والضعف بعيوني ولا حتى امي ردتهه تشوفه..

سماء_ 

اخذ الطفل وبقينه ماعدين نسولف تالي حجيت ويه حلى الكاعده يمي جنهه عروس ولفتت انتباه النسوان عليهه..

_بهمس..حبيبتي حلى كومي ساعدي البنات بالمطبخ لا ياكلونج ..

حلى: هههه ماشي رايحه..

الفصل الواحد والثلاثون من هنا