رواية هو لا يشبههم الفصل الثاني والثلاثون بقلم تبارك الوائلي
واهَس ليل جَرحي شگد سوالف بي
عليَّ كل ذكرىٰ مَرت تنحسب لچمة .
أبو هدى : الحمدلله علكنه سوره ياسين يم راسه وصعد اوكسجينه وبقيت يم ابويه للصبح ورجعت للبيت بعد ما شفت وضعه نفسه متغير رجع وياي صالح كال
:- ابدل وارجع الج .
:- خوش لعد بس اتريك علمود اجيب روزه بلكي يفتحون ايدها طبيت للبيت سبحت وبدلت ملابسي وريكت روزه وطارق واجه ايهم من الدوام طب سبح وبدل و اجه صالح ورحنه ويا اني وايهم
اني احس نفسي ميته تعب ومنايمه بالليل من غير التفكير الي احسب الدقايق و اكول خاف توكف الاجهزه شكد صعب على الانسان يشوف قطعه من روحه كدامه تصارع بانفاسها الاخيره و ينتضر دقايق موته وميعرف باي دقيقه او ثانيه يترك العالم
راح ايهم اخذ روزه لدكتور واني اخذت طارق
شلت اله خيوط عمليته الحمدالله عمليته نجحت بس الخيوط اذنه حيل التهينه بابويه ومارحنه شلنهاهن بوكتهم ، كملت و رحت لحكت أيهم لصفحه الكسور لكيته طالع وراجع .
:- ها ايهم بشر .
:- ماكو حبيبتي لسه الكسر مالاحم كال عوفوها
بعد اسبوع .
:- الله كريم .
:- ها طارق ابني شلت الخيوط .
:- اي عمو الحمدلله .
:- الحمدلله ديربالك على نفسك ، ها ترجعين للبيت لو لا .
:- ايهم ماكدر عفيه خلي اروح يم ابويه .
:- شوفي عيونج جمانه رايحات منمتي البارحه ابد
امشي نرجع ارتاحي ساعه عاد .
:- لا ماكدر والله .
:- يله ابقي براحتج .
رحت للانعاش شفته على نومته حبيبي وكواكب يمه خطيه مافاركته ابد تبدل ملابسه وترجع كل هل ايام هيه ملازمتها لليل ونهار يمه وتنام بالغرفه يمه هيه وصالح اباوع واكول بكلبي
' ليش هيج صالح خليت شوفت كواكب غصه بكلب ابويه وماشافها ابد معقوله هسه ابويه يسمعنه مادري صرت احجي يم اذانه واهمسله يابه تسمعني فدوه كوم ماكدر اني بللياك والله اضيع ، كوم يروحي انتِ يابه هاي كواكب تسمعها فدوه بس اذا تسمعني سوي حركه بايدك خليني اعرف انت تسمع واني اباوع
عليه بكل امل بس ابويه منتهي لا حرك اصبع ولا ايد ابد واني دموعي تصب
" يابه محد بالدنيا حنين عليه بكدك انت محد حبني مثلك فدوه لتعوفني كمت وبوسته وطلعت بعد ماكدر اوكف على حيلي من التعب أيهم واكف
يمي كال .
ايهم : يله اوديج للبيت ارتاحي وروزه اوديها يم مليكه .
:- أي يله .
رجعت للبيت مالي واهس لا اطبخ ولا انضف ابد وايهم هم مقدر وضعي وميحجي ابد عود بليل من ارجع مليكه تكنس وتمسح وتلملم ، البيت كله عفته وماسالت عن شي بس تغديت وبدلت وكلت الايهم .
:- يله ايهم .
:- نامي اشويه .
:- لا لا مانام خلي اروح اشوف امي اكيد شايله
هم ابويه شفتها البارحه من اخذناها شصار بيها.
:- ماشي عمري امشي .
رحت البيت اهلي وصلنه وحسيت الدنيا تفتر بيه
من الي شفته كلبي نمرد من شفت بنت اخويه تنضف بالبيت وتحضر حسيت نفسي الكاع افترت بيه وكأنما يجهزون البيت للفاتحه سكتت خفت احجيها بيني وبين نفسي .
ام صالح: ها يمه اشلونج .
جمانه : اشلوني يمه .
ام صالح: اليوم الدكاتره مطمن على ابوج ابد مو . .
:- لا لا لتحجين هيج فدوه ان شاءلله ماكو شي
اجت بنت صالح سلمت وكالت .
:- ها عمه جيتي .
:- أي حبيبتي.
:- ها زين اني نضفت البيت وعدلته .
:- اي عفيه .
كمت جاي اطلع وصاحت أمي .
:- ها وين رايحه .
:- راح اروح الابويه اشوفه .
:- ابنج فتحي خيوط العمليه مالته اي .
:- اي الصبح فتحتهن خطيه حيل وجعنه لان متأخرين عليهن .
ام صالح : وروزه مافتحو ايدها .
جمانه : لا لان بعد ماطاب كسر ايدها .
:- الله كريم ان شاء لله خير .
:- أن شاء الله يله راح اروح يمه .
:- روحي يمه الله وياج .
طلعت تايها احس روحي لايبه مااعرف وين اروح
ولا وين اجي رحت للمستشفى لكيت الباب ساديه
جيت كلتلهم .
جمانه : ليش صالح سادين الباب .
صالح : ميقبلون انطب شنسويلهم .
:- زين ليش احنه مو كل يوم نطب يمه .
:- ميخالف مو يكولون الاوكسجين نازل حيل وميتحمل نفس يمه روحي جمانه ماله داعي وكفتج بالباب روحي رجعي البيتج.
:- لا عفيه خليني هنا .
:- لا روحي محد يخلو يطب اليوم .
:- زين بس اشوفه واطلع .
:- ماشي هسه احجيلج ويه الدكتور .
شويه وسمحلنه الطبيب و رحت طبيت شفته نفس نومته ولا متحرك ولا ابد ، حبيبي ماتعبت من النوم كوم يروحي انتَ باوعت شعره طولان بهاي الـ ٧ ايام ابويه شعره بسرعه يطول وسرح حيل بوسته من وجها ومن ايده وصورته وهو نايم وخليت ايدي على ايده وصورتها وشميت ريحه شعره حبيبي لسه ريحه شعره بخشمي مانساها ابد ولا ريحه جسمه تروح من بالي
اجه الممرض كال .
" يله اختي طلعي .
:- اي طلعت .
بعدها طلعت وشفت صالح وكال .
صالح : لتجين بعد جمانه بارده اليوم حيل هاي موجه برد قوية مو تجين وتجيبين جهالج بالليل
لان ميخلون احد يطب بعد .
:- لا اجي شلون ما اجي .
رجعنه للبيت اني وايهم وسويت الهم عشه سريع بعدها سويت جاي صبيت وسمعت صوت المطر
مطرت قوي شرب جاي وكام لبس يريد يروح للمستشفى كتله .
:- ايهم اوكف اروح وياك .
أيهم : وين جمانه متشوفين تمطر وميخلوج اطبين راح اروح اني وطارق روحي حبيبتي نامي ورتاحي والصبح اوديج .
:- ليش ايهم عفيه خلي اجي .
:- لا حبيبتي تمطر والله اخاف عليج .
راحو ورحت غسلت المواعين وباوعت الساعه
بـ ٧ ونص احس نفسي انتهيت من التعب كلت للجهال.
:- ماما مليكه اني بعد ماكدر فتح عيوني راح اروح انام وانتِ وامير وروزه باوعو مسلسلكم ومن يخلص طفو ونامو.
:- اي ماما روحي .
رحت ومددت واني عقلي مبطل يفكر بحاله ابويه باوعت على الساعه ٨ اله ثلث غفيت ماكو دقائق
و اجت مليكه ٨ وخمسه كعدتني .
ملك : ماما عمو ايهم يدك عليج .
: شكو شو جيبي المبايل .
رديت عليه.
:- ها ايهم ابويه بي شي .
حجيت مخترعه كال .
:- لا ماكو شي حبيبتي تعالي عليه شوفي شويه
تعب .
:- صدك تحجي .
:- اي عمري تعالي ما بي شي .
:- متأكد ما بي شي .
:- جمانه اجاج طارق تعالي ويا بسرعه .
:- أي أي اجي .
كمت اركض مااعرف اشلون البس الجبه والشال والجهال لبست قماصلهم لان برد مو طبيعي شهر ٢ برد مو طبيعي اجه طارق وقفلت البيت ورحت
طلعنه وكتله .
:- ها طارق اشبي جدك .
:- مابي شي يمه شبيج .
يحجي بس طارق اعيونه دم .
:- لعد شكو شبيك انت .
:- ماكو شي .
وصلنه المستشفى وكال .
:- فوتي يمه .
رحت اركض واول مادخلت للممر شفت كواكب وفرح يصيحن مات ابويه اني شفتهن و بعد ماشالتني رجليها ابد دفعت باب الغرفه وفتت
لكيت ابويه محولي لسديه ثانيه ومغطي وجها
وعمي ابو هدى وابن عمتي واكفين يشيلون الاجهزه الي برجلي اني شفته و اني تهسترت وكمت اصيح والطم بس اريد اشوفه ماقبل عمي اشوفه بس فتحت الجرجف بصعوبة وحضنته حيل وبوسته
وصرت اعاتبه ليش عافني وراح شويه واخذو وطلعو للمجمده وكعت بالكاع اجه ايهم كادني وطلعني
ركضت لزمت السديه وهيه تمشي للمجمدات وكلهم وياي لازميها ونبجي طلعنه بره الردهات ونزل المطر مو طبيعي علينه عبالك يريد يسبح ابويه قبل التغسيل عافوو بالثلاجات واحنه كلنه كاعدين نبجي يمه معفنا اخر شي كملو الاجرائات و رجعنه يم امي
للبيت والناس والعالم والبيت خبصه بتت يم اهلي
وردت اروح للدفنه وحلفت ايهم .
:- بروح امك اروح ويا ابويه ماريد اعوفه وحده فدوه اعرف عمامي مياخذون نسوان .
:- صار عمري بس اهدءي اني اخذج مالج دخل بيهم.
وصدك لبست ورحت ويا ايهم بالسياره فرح اجرت سياره واجت هيا وابنها وسوسن اجت ويا زوجها ويانه ويانه وصلنه والطريق صار عبالك دقائق ابويه ركض ركض للكبرر خفرو الاكبر و دقايق مو اكثر
طولت دفنت ابويه .
رجعنه و سوو الفاتحه يومين وخلصت وكلمن راح البيته بس عمي ابو هدى ماعاف اهلي ابد كل يوم يجي هوه وزوجته واني هم كل يوم اروح عليهم
اجه الاربعين واخذنه كلمن حاجه وياه الفواكه والكليجه والحلاوه والحلويات ماخلينه شي ماوزعنا بالمقبره ورجعنه والبيت اهلي ابويه سوده عليه عاف فراغ جبير و بيت اهلي خله من صوت ابويه للابد
خله بيت اهلي من صوت ابويه وحنيته علينه
وصرت ومن اروح على اهلي اتخيله من كاعد على الكرسي بالباب ويبتسم من يشوفني ويهلي بيه
صرت اشوف طيفه بكل زاويه بالبيت اطب اصلي بالاستقبال اتخيله كاعد ومبتسم وحاط جهاز الصغط يقيس ضغطه اخخخ موت ابويه سوت لجمه بكلبي لسه ماطفت
مر على وفاة ابوية 10 أيام تقريبا وخابرونه عيال نور كالو
" توفه ابن نور علي .
تخبلت من سمعت اخذت أيهم ورحنه لان نور متخربط وناقليها للمستشفى لكيتها تبجي وحالتها حاله
الطفل عمره شهر وتوفه لان اجه سبيعي ومكامل فجأه توفه كلها اجت للمستشفى ايهم وصالح وزوجته وخواتي وعمي ابو هدى وزوحته وهدى خطيه اجوي الخاطري .
نصدمت بتصرف عمه نور وهيه واكفه تلومها لان توفه الطفل تكلها .
:- كله بسببج انتِ موتي الولد ليش تبجين من رحتي للفاتحه مالت جدج وانتِ بعدج نفسه ليش هيج خليتي الطفل يتوفه ليش .
متحملت اسكت و كلتلها .
:- عيني ام عباس اذكري ربج الموت حق علينه و الطفل طير من الجنه.
سكتتت وحست على غلطها بعد مردت من فشلتها رحت سكتتت نور الي تكسر الخاطر .
:- يا روح امج لتبجين حبيبتي عمتج حقها مقهوره على حفيدها عذريها .
اخخخ بس لو تبطل هاي المعتقدات المتخلفه اني بخير احجي بكلبي لان العالم كاعده وماريد اسوي مشكله
سووو فاتحه يومين لطفل وبنوله قبر احنه عد اهلي وعمامي الطفل ميصير اله قبر لازم يتيه قبر بعمر انفاس بس بعد كلماً وطبعه
عمتها حاربتها بحيث حتى من تكعد تبجي نور على
ابنها تكلله ،
:- اني تعبت عليه وسهرت بالمستشفى مو انتِ .
شفت نور زادت بالبجي كمت كللتله .
جمانه : كومي ماما نور تعالي ويايه للبيت .
نور : وعباس ماما .
اجه عباس سمعنه و ماقبل تجي وياي عرف اني زعلت من كلام امه كال .
عباس : لا خاله عوفيها النور عفيه احنه بيا حال
هسه خلينه واحد يهون على الثاني .
:- ابني امك متسكت واني ماريد بنتي تتاذه .
عباس : معليج انتِ اني احجي ويا اني بس عوفي نور لتاخذيها .
شفت نور موافقه كلام زوجها ومتريد تعوفه كلتله .
:- بكيفج حبيبتي رايحه اني ما تحمل بعد كلام عمتج.
اعتذر مني زوجها وكال .
:- خاله عذريها والله العضيم امي تعلقت حيل بالطفل .
:- الله يعوضكم ان شاء لله بس ميصير هيج تحجي .
:- الله كريم خاله .
عفتهم رجعت للبيت وحدي لان ايهم مناك وراح الشغله بس شنو بداخلي نار مشتعله اجه ايهم وشافني وماكدرت اضم عليه حجيتله السالفه كال .
أيهم : عوفيهم بعد ولا ترحين عليهم ابد خل يولون .
وصدك زعلنه من تصرفهم والي زعلني اكثر من عرفت كايله النور بعد منريد تخلفين هسه اله وره سنه وجايبه حب مانع النور خابرتني تحجيلي وتبجي كلتلها .
جمانه
" ماما نور ممنوع تاخذين الحب بنتي بعدج صغيره عمرج 19 سنه .
نور
" لعد شسوي ماما غير هم هيج يردون .
جمانه
" مو زين بنتي حب المانع بهيج عمر يسبب مشاكل عندج .
مرت الايام وكامت عمتها تنطيها الحبه ونور ذبها بالسنك بس بنفس الوقت ماخذه حتايطها نور لان تخاف من المشاكل رغم هيه تريد طفل خابرتها كلتلها .
" بنتي اخلي عمج يحجي وياهم .
نور
" لا ماما فدوه ما اريد تصير مشاكل اني قابله هم ارتاح وبعدني صغيره .
" بكيفج حبيبتي .
هاي الكلمه جنت قبل اتمنه احد يكوله اليه من اهلي بتخاذ اي قرار يخص حياتي بس ماسمعته ابد همه
جانو يقررون بمكاني لحد ما حطمو حياتي ماردت اعيد الماضي ويا جهالي ابد ردت اكون السند الهم بكل قرار ياخذو حتى اذا كان ميعجبني بس المهم
هم مقتنعين بي وطبعا اكيد اوكف وياهم بقراراتهم
الصح بقت نور وماحملت ومرات الايام
كاعده انضف وندك الباب اجت سوسن ومن شفتها حيل نقهرت سوسن بت عمي ابو حسان الي ربت ويانه وجانت بمثابة اخت النه وأكثر من اخت اجت قبل لتطلع الاربعين مالت ابويه لابسه ثوب الوان صدك نهضمت بداخلي حيل معقوله سوسن ماكدرت تلبس الاسواد للاربعين نقهرت من كل كلبي وداخلي احترك حرك هاجت عندي الحساسيه من الحركه والقهر وجهي انطعن احمر وصارت نغزات بكلبي رحت للدكتور كال.
:- صاير عندج خفقان هذا حب لتشنجات القلب اخذي كل يوم حبه لان ضغطج مرتفع و دكات كلبج سريعه .
ونطاني حب للتحسس هم
بقيت كل نهاري مانشفت دموعي على ابويه ايهم يجي من الدوام بس يشوف اعيوني حمر ومقهوره نقهر عليه و صار يتعامل ويايه كأنما بنته و حتى ميصخرني على حاجه بالبيت ومن يشوفني ساكته يبقه حاضني ويمسد على شعري ماكدر اكول طلعت من ازمتي لان حزني على ابويه عمر ماراح يخلص فتره و رجعت احجي وياهم بالبيت مثل قبل بس الضحكه راحت كمت من اضحك احس غصه بزردومي وبيني وبين نفسي اكول هسه يكول ابويه نستني وضحكت وكل شي اسوي بحياتي اكول لو.
ابويه موجود جان فرحلي وصرت اتحسس من كل شي مثل طفله يتيمه مالها احس نفسي نكسرت كسرت عمري .
أيهم : جمانتي حبيبتي اني ابوج وسندج ليش هيج تسوين بيه ليش هيج طفيتي جمانتي .
بجيت بحضنه وذبيت كل همي فعلن ايهم جان سند اليه والجهالي بعد الله سبحانه تعالى بس مستحيل يصير اب اليه مرات من يزعني اكول بكلبي ابوبه مايوم زعلني منه ولا غثني محد يلحك مكان ابويه
ومشت ايامي بحزنها وذكريات ابويه الي متخلص واقل موقف يذكرني بي بحياتي اذا مرات اشوف
حب أيهم الـ روزه وحركاته وسوالفه وياها اذكرني من جنت ادلع على ابويه الله يرحمه برحمته ويجعل مثواه الجنه يارب
مرت الايام والاشهر وعبرت سنه
كاعده صافنه وضايجه اشتاقيت النور بنتي
تذكرت من عيالها ماخلوه تجي حتى بالاربعين
مالت جدها ولا خلوها تلبس اسواد عليه
دك مبايلي نور صدك الكلوب سواجي رديت كالت بلهفه .
نور
" ماما تدرين عمتي كالت اكطعي الحب اريد تخلفين .
جمانه
" صدك الحمدلله بنتي ربي يعوضج .
فرحت على فرحتها وصدك 3 اشهر وصارت نور حامل فرحت الها من كل كلبي وبعد فتره راجعت للدكتوره كالت الها لازم عمليه ربط تربطين علمود يثبت الطفل بس مو هسه من يكمل الجنين 3 أشهر
ياله يسوولها العمليه ، وبعد كم يوم صارت فاتحه عد اعيالها توفه زوج خالته العباس ورحنه للفاتحه
اني و ايهم راح يم الزلم وشايفه عمها ومسلم عليه واني هم رحت وسلمت عليهم صار سنه ما طلبه
بيت عيال نور صار ، راح عباس حجه ويا خاله جان مختار منطقة وصديق ايهم و طلب يراضيهم وصدك خال عباس خابر ايهم و ابو عباس وراضاهم وتراضينه بس مستحيل ترجع علاقتي بام عباس مثل قبل بعد ماجانت صديقه اليه لان حيل تعبت نور بتصرفاتها متسلطه حيل وتغار وتحب تحكم بيتها وزوجها وابنها الي مسكتني ومصبرني عباس زوج نور حيل خلوق ومأداب ولا عبالك ابنهم حيل يحب نور ويحترمها عيبه الوحيد اهله يتحكمون بي
كل هذا و نور تحبه حيل ومتعلقه بي واني هذا الي مسكتني حب نور العباس وتفاهمهم سوه كلت اهم شي زوجها يحبها ويحترمها حتى اذا عمتها مو زينة
وياها المهم زوجها
فتره رادو يطلعون وحد بس مقبلنه لان نور بعدها صغيره وماقبل تعزل وحدها اخاف عليها حتى من الجيران اذا تعزل وكتلها .
:- لا ماما لتفكرين بالعزله لا اني اقبل ولا عمج انتِ بعدج صغيره تعودي على طبع عمتج يجي يوم تتغير مايبقه شي على حاله رغم تصرفاتها بس تحبج وحريصه عليج وكريمه وياج ماكو واحد كامل بنتي .
:- أي ماما اني هم أخاف وحدي بس تعبت من الحجي .
:- ميخالف اتحملي .
:- أن شاء الله ماما .
الحمداله احس نور تقبلت الواقع و حفظت عمتها وصارت تسايرها على كلشي ومرتاحه .
اتصلت بيه عمتها وكالت .
" عيني ام طارق عمليه الربط النور بعد يومين و اريدج ويانه .
" صار بعيني شلون لعد ما اجي .
وصدك مرت اليومين و رحت وياهم والحمدالله
سوت العمليه وجبتها يمي بقت اسبوع اداري بيها
و ما اخليها تتحرك خلص الأسبوع واجه زوجها اخذها وكال بعد اجيبه يمكم كل اسبوع علمود ترتاح لان الدكتوره منعت الشغل والثكل عليها
ومرت ايام
نور كل اسبوع يمي واسبوع يم اعيالها والحمدالله مرتاحه وياهم بعد ماتعبونه ياله تعلمو واحد على طبع الثاني على كولت ايهم يكول البنيه تحتاج سنه كامله حتى تتعود على طبع زوجها وعيالها
عدت الايام والكل فرح الحمل نور اهلي واخواتي
حتى وعماتها وبيبيتها ام بسام
عدت الايام وكلشي رجع الطبيعته تصالحت اني وفرح قبل ليموت ابويه واحلى مفاجأه صارت من دكت عليه فرح وكالت راح ارجع الابو ادم صدك فرحت الها من كل كلبي مهما كان يبقه ابو جهالها
بقت مطلقه منه سنتين ورجعت اله بشروط بعد متخبز ابد ولازم هو يهتم بيها وبيته ويشيل مسؤاليه والحمدالله رجعت اله وعقدت سيد من جديد وكلنه فرحنه الها بس تمنيت ابويه اللچه يرحمه موجود ويشوفها راجعه البيتها
عدت الايام
واكفه اسحب شهيق وزفير باجمل مكان وانقى جو وكفت اباوع من البلكونه الي طل على الطبيعه واني اشوف كدامي الأجواء الجنت احلم اشوفها ومشايفتها بواقع غير الأفلام اباوع وكدامي المنضر مينوصف جماله الخلاب جبال دهوك العاليه
الي تنشاف من بلكونه الفندق التفتت للغرفة اباوع ايهم نايم هو و روزه حاضنها واني صافنه عليهم حبيبي ربي ميحرمني منك ومن حنيتك عليه دكيت على نور ردت عليه .
نور
" هلو ماما .
جمانه
" هلو حبيبتي شلونج .
نور
" الحمدلله زينين .
" اخوتج شلونهم .
" الحمدلله ماما والله كلنه بخير اتونسي انتِ وعمو ايهم لتشيلين هم اني يم اخواني باقيه لحد ماتجون .
" عفيه حبيبتي ان شاءلله يومين ونرجع للبيت .
" ان شاءلله ماما .
" شلون النونو مالتج .
" الحمدلله بخير .
" الحمدلله حبيبتي لتفترين ابد ولتعبين نفسج خلي مليكه وطارق يساعدوج.
" لا والله ماما مليكه تنضف واني بس اسوي الاكل
وماعدنه شي الحمدلله اخوتي نايمين من يكعدون اخليهم يتصلون عليج .
" اي زين من يردون يشترون انطيهم لو خلصت الفلوس اليمج .
" لا ماما ماخلصت الحمدلله .
" يله حبيبتي ديري بالج على نفسج واخوانج .
" الله وياج ماما .
كملت اتصال و سديت البرده ورحت كعدت ايهم وروزه .
:- يله حبيبي كعد صارت بـ 8 راح يطلع الكروب .
ابتسم وكال .
:- حبيبتي عوفيني ولج تعبان والله ضهري يوجعني من وراج .
:- اني ليش انت متكعد راحه تريد شهر عسل هسه
بعد ما صارلنه 10 سنين متزوجين .
ضحك وكال .
:- اني صوجي كلت اونسج واعوضج شنو ماستحق تعوضيني وتعيشيني شبابي .
:- لا طبعاً تستحق حبيبي يله راح ابدل الروزه وانت كوم اغسل وبدل .
:- ماشي شويه وكايم.
رحت بدلت اني وروزه وهو غسل وبدل ونزلنه
نتريك وطلعنه بسياره الكروب وتعرفنه على ناس حيل طيبين بيت ابو يوسف واخته معلمه وبنته صادقت روزه وتلعب وياها وتبادنه الارقام اني وام يوسف هم من سكنت العامريه و ايهم لكه صديقه جاي ويا زوجته وراح سلم عليه وبعدها صرنه سوه نفتر ونستكشف الطبيعه وصدك تونسنه بس وحده
بالكروب مو راحه جايه هيه وامها وبنته مطلقه
الطريق كله هيه تباوع على ايهم ياربي وين ماروح ماخلص من النسوان اخر شي من شافت ايهم كاعد هوه وابو يوسف بكرسي واني وام يوسف بكرسي ومندمجين بالسوالف كام ابو يوسف ماعرف وين
راح اجتي صعدت و كعدت بصف ايهم بكل صلافه
هو نصدم و بقه يباوع عليه اني خزرته رغم تعرفه
يكون زوجي بس هيه متكعد راحه رجع ابو يوسف باوع عليها هيه تجاهلته صاحته امها وفشلتها كدام
الركاب كالت الها .
:- تعالي يمي اكعدي وين اخذتي مكان الرجال .
هيه رغم صلفه بس فشلت وكامت ليوره بصف
امه اني متحملت مديت ايدي و كرصت ايهم من جتفه لان هو كاعد باللكرسي الكدامي اندار باوع عليه ضحك ورجع دزلي رسالة
" ولج ليش هيج اني شعليه هيه اجتي كعدت
خطيه قابل اطردها .
دزيت
" ايهم شلون بيك يعني اهج.
" يابه اني ما اكدر اكسر خاطر الحلوات .
" سهله من نوصل للفندق يصير خير .
" اي عيني وشتسوين باله ست جمانه .
" اموتك .
" دز سمايل يضحك وكاتب ، زوجج محبوب من النساء قابل هل شي بايدي .
" سهله أستاذ أيهم .
" دخلي اكمل .
" كمل عيني .
" عيوني بيج متكفيه والله متشوف غيرج .
سكتت وماراسلت لان ام يوسف صارت تحجي وياي وكالت .
:- شفتي شكد صلفه هاي العوبه بس تبصبص على الرياجيل ومحد معبرها.
:- اي والله صدك عوبه.
سكتت ومشت السياره وتناسيت السالفه وصدك تونست واني اشوف شلالات دهوك تخبل والاجواء الي عبالك عالم ثاني فترينه وتونسنه
خلص بسرعه الاسبوع و جمعت الجنط وستعدينه للعودة .
ايهم : جنه رايح اشتري الكم عصاير وحلويات
خاف جوع روزه بطريق الرجعه انتِ كملي الجنط .
:- ماشي حبيبي.
طلع هو وقفلت الباب ورا وكملت ولبست ولبست الروزه شويه و اجه بايده علاكه وكال .
:- ها كملتي .
:- اي بس اصلي العشه قبل لا نطلع .
صليت وهو هم راح يصلي كمل صلاته وكف يعدل شعره على المرايه روزه كاعده تلعب بالمبايل مالته اجيت عليه حضنته من ضهره وكتله .
:- ربي يحفظك اليه ايهم صدك تونست وفرحت
بهل سفره .
التفت حاوط خصري وكال .
:- ادللي حبيبتي شعندي غيرج اهم شي تونستي
ان شاء لله على صيف الجاي نطلع كلنه اني وانتِ والجهال .
:- ان شاء لله يارب ميحرمنه منك .
:- اموووت عليج يا احلى ماشفت بحياتي .
:- واني هم اموتتتتت عليك يا احلى عوض بحياتي .
حضني وباسن... همستله .
:- ايهم كافي روزه كاعده .
:- الله اكبر هسه اني واكف بامان الله انتِ اجيتي
حارشتي بيه .
:- صوجي اني اجي ادللك .
ضحك وكال .
:- يله عمري راح نتاخر ، صدك ماكتلج .
:- شنو ؟
يحجي وحاضني من ضهري كتله .
:- كول حبيبي شكو .
:- تدرين من صعدت بالمصعد اني وعلي صديقي
الي شفتي هو وزوحته .
:- اي تذكرت اشكد دمها جامد زوجته .
ضحك وكال .
:- اي والله صدك جنها جبار وتتكلب عاد لو حلوه
جان تستاهل .
:- ها يعني لو حلوه تستاهل .
:- اي طبعا ان الله جميل ويحب الجمال مو ما توالم علي ، المهم من صعدنه هو هم نزل اشتره الابنه ويايه شفت البنيه هاي الكعدت بصفي بالسياره
باوعت عليه وكالت انت وين نازل و منين انت ضحكت عليها وكلتلها من العراق العظيم كالت قصدي منين من بغداد كلتلها انتِ منين كالت اني
من الشعله .
:- ايييييي كمل كمل أستاذ .
:- لج دسمعي كلتلها هااا زين اني من الاعظميه كالت ها وسكتت .
:- وشمعنه انت ليش ماسالت علي صديقك .
:- ما اعرف والله ماسالته بس اني .
:- اي كمل .
:- اي بعد صعدنه وراحت بطريقها .
:- هاااااااااا هيج يعني زين ، وانتِ منين من الاعظمه لو من العامريه .
:- لا حبيبتي ميصير انطيها عنواني الصح جذبت عليها .
:- هاااا فهمت .
سكتت شويه وصحت .
:- ايهم وتالي وياااااااااك .
كام يضحك من كل كلبه وكال .
:- و روح امي هيه سالتني واني مالي دخل بيها اشبيج .
:- وليش تسالها انت على سكنها شعليك بيها توكف وتحجي وياها وذب ميانه .
أيهم :- اشبيج والله هيج من باب الفضول مو بس هيه فضوليه ، ولج ليش ضجتي هاي لان صريح وياج اني ومعتبرج صديقه اليه واجي احجي كل شي الج .
:- هااا صديقه اني .
:- واحلى واحن صديقه .
كعد يبوس صحت .
جمانه : كافي ايهم يله راح نتأخر .
أيهم : مو زعلتي لازم ارضيج .
:- لا لا والله مازعلت عمي بس انزل .
:- دمشي ولي فوكاها ماقابله وين لاكيه واحد يبوس بيج انتِ يله روزه بابا هاي امج متنطي عين .
يحجي بخباثه ويضحك صحت .
:- هااا ايهم اني مانعطي عين .
:- عمي اني اني ما انطي عين مو انتِ بس طلعي خلي اقفل الباب .
طلعنه ونزلنه من الفندق ورحنه صعدنه بالسياره الطريق نصور ، ابو يوسف و ايهم ويسولفون و يشاقون وعلي صديقه كاعد كبالهم
اني اباوع من الجامه وبداخلي الفرحه متنوصف
نص الطريق واجه أيهم كعد يمي وابو يوسف كعد يم زوجته ، حسيت نفسي نعست وعيوني كامت الحالها تنسد اخذ راسي ايهم وخلاه على جتفه وهمس يم اذني .
:- نامي حبيبتي اذا تعبتي .
وصدك ونمت على جتفه وروزه نايمه بحضنه وقبل لنوصل كعدت كال .
أيهم : ها صح النوم راح ننزل نتريك يله .
:- لا ايهم ما اشتهي .
:- امشي ننزل جمانه اني جوعان .
:- أي هسه راح انزل وياك اني وروزه نخاف نبقه بالسياره وحدنه.
نزلنه ساعه ب 5 الفجر راح كعد يتريك واني اخذت
روزه للحمامات كملنه و رجعنه ركبنه بالسياره ومشت
وبعد طريق طويل وصلنه ودعنه بيت ابو يوسف وصديقه علي واجرنه تكسي البيتنه ورجعنه وصلنه بـ 8 الصبح للبيت كعدو الجهال فرحانين بينه تريكنه سوه وكملنه ورحنه نمنه من تعب الطريق
طلعت الغراض انطيت النور انطيهم فرحو بلحلويات والهدايه راحو يطلعون ونور يمهم فرحانه حبيبتي وياهم بعدها عقلها صغير متكبر نور رغم راح اصير ام
مر الوقت و كعدنه من النوم ساعه بـ 4 ودز ايهم صينيه مندي من بره تغدينه كلنه وصرنه نحجي
للجهال على السفره واشلون تونسنه وهمه متلهفين ويانه ، جبت كرزات وشغلات ويايه الاهلي والفرح
وشهد بالليل رحت الاهلي سلمت عليهم
ونطيتهم هداياتهم ورجعت
اجه زوج نور اخذها وراحو مشت حياتنه طبيعي
و نور حياتها ماشيه هيه وعباس رغم تدخلات عمتها بس يبقون خوش ناس اصل وفصل ونفسهم طيبه ويحبوها
مرت الايام و اجتي نور علينه خطار وكاعدين نحجي وكالت .
نور : يمه شفت عمه انهار بالسوك هيه وبنتها وسلمت عليه وبوستني بس ماسلمت على عمتي شكد ضجت منها حيل ضجت .
جمانه : ميخالف يمه أخاف منتبهت.
اغمزلها حتى اسكت عيب أيهم كاعد بكلبي اكول هاي اشبيها نور هرمونات الحمل صاعده عدها
ايهم انتبه عليها وعصب وكال .
أيهم : وليش عمو ضجتي هيه عمتج أم زوجج
مو حلو طبعها .
نور : لا ليش اشبيها المره عمو رجاً لتحجي عليها .
جمانه : يااا لج صدك تحجين انتِ نورررر .
نور : أي صدك احجي.
أيهم : عوفيها جمانه خلي تحجي باله .
نور : اي ماقبل احد يحجي على اعيالي رجاً اني اصلا مااحب عمه انهار مانسه الي سوته باامي ابد .
عصب أيهم وحيل ضاج من جرأت نور وصاح.
أيهم : لج انتِ صدك متستحين اشلون هيج تحجين على عمتج كدامي هسه اعيالج صارو اعزاز نسيتي سوالفهم والسوو بيج .
نور : لا منسيت و عفيه عمو ما اسمحلك .
جمانه : والج نورررررر اسكتي شجاج .
أيهم : نور غيبه لتصيرين خليني محترمج .
نور : عموووز لتجاوز واحترم اشويه .
اباوع نار شبت با ايهم كام شمر النفاضه عليها
اجتي بصفها صار عصبي وصار يصيح ويعيط وصاح بكل عصبيه .
أيهم : كافي لججججج انتِ تعلميني الاحترام .
نور : اي ماقبل تجاوز وتدخل عمووو .
متحمل أيهم كلامها كام وضربها راشدي كامت تبجي
اني راساً وكفت كدامه امنعه وصحت بقهر .
جمانه : لا لا ايهم عفيه عوفها .
أيهم : شفتي صلافت بنتج .
:- ميخالف زعطوطه عوفها متعرف تحجي حامل وتعبانه .
اريد اسكت نور ماكو نفتحت تبجي وتحجي
بحركه عبالك واحد دافعها .
نور : كالت عمتي كالت اصلاً هو عمكم شايف نفسه هواي وميتحاجه ومو خوش رجال .
جمانه : ولج بس اسكتي اسكتي .
أيهم : اي منو هذا الشايف روحه .
وكف يحجي بكل عصبيه عيونه نطن من مكانهن وهو يحجي صحت .
:- ايهم بداعتي عندك عوفها .
دفعته للغرفه واحجي .
:- بداعتي عوفه زعطوطه اني اعرف شغلي وياها والله اطيحلك حضها .
أيهم : لا لج اني ماعندي حض ويا كل الناس بقت عليها لج ، اني شايف نفسي على شنو شايف نفسي هذا طبعي من يومي ما غيرته ولا تكبرت على احد .
:- حبيبي انت تغار عمتها والله تغار .
عافني و راح كعد على الجربايه يستغفر ويدخن طبكت الباب وطلعت رحت النور لكيتها كاعده تبجي كلتلها.
:- ولج شجاج يمه بس كليلي ليش هيج تسوين بعمج ليش نور هاي جزات عمج عليكم .
نور : شنو ماما تعيرونه واذا تعب علينه وصرف محد كله يتزوجج ويتعب علينه اشكد كرهته اني شفتي اشلون ضربني الله لا ينطي كون .
جمانه : عززززااا العزاج بس ولج بسسسس .
صميت حلكها وهمست .
:- ولج نور منيلج هل حجي منو علمج ولج اني ماربيتج هيج ولا علمتج الصلافه والله .
كعدت ابجي والطم واحجي .
:- ليش ماما نور ليش هيج تسوين بيه ولج هذا
عمج نسيتي اشكد جنتي تحبي .
:- خلص كلشي انتهى ماما وهاي دكيت على رجلي راح يجيني و اروح البيتي وبعد بيتج ماطبه ابد
اله اذا عفتي رجلج .
:- شبيج نور ماما شغيرج فهميني ولج هذا عمج .
نور :- أي واذا شسوه هسه النه هو شو على كولت عمتي جهاز مثل البنات ماجهزتيني روحي شوفي عمتي كله ماركه جهزت بنتها اله انتو مدري شلون وحتى الكيك مالت عرسي تكول عمتي ولا طيب طعمه ومدري شلون جايبي.
جمانه : ولج سدي حلكج ليسمع صوتج المن
ترديني اعوف نور ولج ايهم اعوفه .
نور : اي عوفي وماريده بعد .
:- لا لا انتِ اكيد عقلج بي شي ابد ماصدك انتِ
نور بنتي ولج هاي عمتج شمسويه بيج معقوله هيج غاسله دماغج منه لا لا عقلي ميستوعب .
اجت ملك كالت .
ملك : ماما الباب اجه اخو عباس الصغير يكول خلي تطلع نور .
جمانه : يااا يمه عزه خابرتي رجلج .
نور : اي خابرته وكال بالشغل كتله دزلي اخوك ياخذني .
:- ليش ماما ليش هيج تسوين .
:- احسن وبعد ماطب بيتكم ابد .
:- يااا نورررررر لج نورررر .
عافتني وراحت نور واني كل حيلي يرجف وابجي طبيت للغرفه لكيت ايهم صاير نار يلبس ملابسه
سريع .
:- وين ايهم .
:- اريد اطلع اشم هوه اختنكت حيل ختنكت وهاي بتج بعد ماريد طبتها عليه حرامات الربه بيها بس عليمن تطلع على عماتها مايوم حبني وكالن اخويه .
:- ايهم غير تكلي وين رايح .
:- ماريد اكول الاحد عوفيني وخري جمانه من طريقي .
طلع وركع الباب ورا واني احس نفسي بحلم طابه شنو الصار وليش هيج نكلب لبيت مو جنه كاعدين مثل الملوك شنو الصار كعدت واني ابجي دكت مليكه على طارق كااتله.
ملك
" تعال شوف ماما طارق بسرعه .
جان طالع ويا صديقه رجع على السريع طب من الباب يدور عليه اني شفته ورحت حضنته بقوه وبجيت بجي من كلبي طلعته وبصوت عالي وجسمي كله يرجف اكثر شي احبه بحياتي وماكدر افرط بااحد بيهم هو ، ايهم وجهالي ماكدر افاركهم احس نفسي همه نفسي .
طارق : لا لا ام طارق والله انتِ قويه ليش هيج تسوين بروحج ماما حبيبتي والله كل شي ينحل حجتلي مليكه كلشي .
جمانه : ولك طارق شنو الي ينحل ولك اختك مغسول دماغها تكول شجبتولي وشسويتولي .
طارق : ميخالف يمه اني احجي وياها .
كعد يسكت بيه طارق وكام امير يكمز ويعارك روزه
وسوه هوسه راح طارق ضربه وامير وكع على الكاع وخله يكمز لازم ايده ويعيط ويبجي بصوت كمت ركضت اشوف شبي صياحه مو طبيعي اجيت لزمته عاط بصوت كتله .
:- والك ليش هيج طارق اشسويت الاخوك شوف ايده اشبيها .
طارق : مادري والله يمه شفتي احنه بيا حال وهو يكمز .
اريد اسكته ماكو يعيط ولازم ايده كتله .
:- طارق يمه امشي اخذه للمستشفى .
:- بيمن اخذه .
:- حتى لو بالدراجه مالتك اخاف ايده بيها شي .
اجه طارق شال امير الي فاحط من ايده اخذه وراح واني صافنه ليش كل هذا صار اليوم شكو شنو الي صار ياربي الطف بيه وبجهالي يارب مر وقت و دكيت عليه وميرد ضليت ادك لحد مرد طارق .
:- ها يمه وصلت .
:- والله بعدني يمه شبيج مو راح تموتين نفسج
.
:- مابي شي والله هسه اطببه اسويله اشعه واطلع .
ياربي عديها على خير ايهم هم اختفه و بالي يمه راسلته اسال عليه .
دزلي صور بين الحرمين بين الأمام الحسين والعباس ( عليهم السلام)
نقهرت عليه عرفته مقهور احسن مكان ألواحد يفرغ بي ضيمه هو هل بقعه الطاهره دزلي رسالة حيل
نقهرت من قريتها............
إلى هنا نختم بارت اليوم وياكم
بنات القصه شارفت على النهايه كم بارت وتودعون جمانه وقصه جمانه اكتبولي تعليقاتكم الحلوه وخلوني اعرف حبيتو القصه والسرد شلون جان
طبعا صعب عليه افاركم تعلمت عليكم لهذا السبب
مراح اعوفكم هههههه بعد قصه جمانه كم يوم ارتاح وارجع الكم بقصه جديده محضرتها الكم قصه هم حقيقية واقعيه بس هل مره شويه بيها احداث غريبه
والبطله هم راح تابع وياكم وهيه متابعه ومنتضره دورها
