رواية فصلية بديلة الفصل الثاني والثلاثون 32 بقلم ام ملكوت

سماء_

تغدينه وكملنه واني رحت للغرفه بدلت وكعدت ارضع الطفل وصافنه بالفراغ..

شويه ودك الباب وبلا وعي كلت تفضل ودخل هوه..

                     ................   

شهم_ 

بعدما خلصو غده شربو جاي وكلهم طشو الزلم بقى بس عمامي وابن خوالي لان جايين ويه نسوانهم وعائلهم ..

كاعدين نسولف واحس اشتاقيت لوليدي استاذنت كلت اروح اطمن عليه وارجع ..

دخلت كتلهم سوولي طريق ورحت للغرفه دكيت الباب وكالت تفضل ..

بعد عناء وتفكير طويل قبل ايام قررت اني مالمسهه بعد لاني اخذت غايتي منهه وجابتلي طفل ماكو داعي ارجع اتقربلهه ..

بس من اخذت هل قرار لحد الان تصير وياي هيج صدف تخليني اشتهيهه واوشك ان اتراجع عن قراري ..

بنت الضالين عكبيش تغطيتي عكب ما شعلتي جدي..

سماء: بتوتر..تفضل 

شهم: اا اجيت اشوف مرتضى 

سماء: اي بس شويه .. خليت والتفتت وضميت صدري ومسحت حلك الطفل وانطيته اله ..

اخذه وصار يبوس ويشم بي..

شهم_

افييش يا عطرهه صارلي شكد مامتقربلهه وشام عطر جسمهه وهسه بالبوكه اشمهه لان لازك العطر بالطفل ..

رفعت عيني واشوفهه تباوعلنه ومبتسمه ..

بست الطفل ورجعته لحضنهه وكتلهه..

_ديربالج عليه نور عيوني هذا

سماء: انشالله ..

اتقرب مني حيل لمن خله الطفل بحضني حسيت انفاسنه اختلطت ولمن رفع راسه وحط عيني بعينه حتى يوصيني عليه حسيت مافاصلنه شي حتى الطفل ..

صفنت لحضه ورجعت نزلت راسي وهوه كام طلع بره ..

شكو ياربي ليش صرت احس هيج لمن يقرب مني ..

ياربي لا تعلقني بما يحزنني ولا تغلقني بما ليس لي ..

ربي فدوه لا تخليني احبه او احن عليه لا تخليني اتعلق بي واتعود على وجوده بحياتي ..

شهم_ 

طلعت بره غسلت وجهي ورجعت للديوان منا للعشه وهم كذلك تعشينه وكملنه وكلهه طشت لبيوتهه رجع البيت فرغ كل الاقارب راحوا وكلش تعبنه ..

خلينه ودخلنه انه وابوي واخواني للصاله كعدنه كلمن ومرته والبنات هم يمنه بقينه نسولف ونكرز حب..

بس لاحضت انهه مو هنا..

_بهمس..خويه سمر وين سماء وابني

سمر: خويه نايمين خطيه اليوم كلش تعبت والطفل هم تعب عفتهم نامو من مساع..

شهم: هاا ماشي..

بقينه نسولف ونضحك تالي صارت ب١٠ وكلمن راح لغرفته ..

كمت اني رحت للغرفه شفتهه نايمه دخلت بوست ابني على كيف وشفتهه مكشفه غطيتهه وطلعت ..

صعدت لغرفتي فوك ..

بدلت وغسلت وتمددت على الجربايه..

مانمت هناك اليوم لان ماريد افقد السيطره على نفسي واسويلهه شي خليني هنا ابركلي..

خليت ونمت..

#بعد مرور اسبوع ..

سماء_كعدت الصبح كمت سبحت وبدلت واجيت رضعت الطفل وخلصت تالي غسلتله وبدلتله وعطرته واخذته وطلعت بره للصاله لكيت الشيخ والشيخه كاعدين واخوان شهم همين لان صادف يوم جمعه..

_صباح الخير

الكل: صباح النور..

الشيخ: هلا هلا بزلمتهم هلا بشيخهم تعاي جيبي يمي بويه تعاي..

سماء_

اخذته وانطيته للشيخ وصار يلعبه ويشمه واني رحت يم البنات بالمطبخ صبحت عليهن وشفتهم ضايجات..

_ها شبيجن حبي اشو ضايجات

سحر: يعني والله حرام تجيبين اختج هنا وتعودينه عليهه تالي ترجعينهه لبيتكم..

سماء: ههههه جا شبيدي عليجن هيه جان المفروض شهر وترجع بس لخاطرجن بقيتهه اسبوعين ثانيه..

حلى: والله تصدكن حتى انه ماودي ارجع ..اريد اعيش وياكم..

سمر: يروحي والله تعودنه عليج وحسبناج اختنه بس شنسوي لاختج ماتريدنه نتهنى..

حلى : اي والله خبيثه

سماء: يا يا هههه شبيجن ولجن افتريتن علي شبيدي اني غير البنيه عدهه مدرسه ومنا وهيج سادس لازم تلتزم بعد..

حلى: يااالله شلون هم اعوفجن وهم سادس ..

سماء: هههه بعد لازم تدرسين وتعوفين السوالف واللهو حتى تجيبين معدل بلكي تطلعين معلمه مدرسه مال انكليزي شي..

سمر: اي حبيبتي اهم شي دراستج بالوقت الحاضر اما علينه فنكدر نتخابر ونسولف يوميه ماشي..

حلى: اوكيي ماشي..

سماء: يله عدلي حلكج وكومي حضري ملابسج لان خابر جدو الشيخ وكال العصر يجي ياخذج..

حلى: يله رايحه ..

طلعت من المطبخ وفزيت لكن شفت ساجد باب المطبخ واكف وعيونه حمر ومعصب مدري شبي ..

خليت ورحت للغرفه دخلت وماحس الا دخل وراي وقفل الباب..

_بخوف..شش شنو ليش قفلت الباب

ساجد: لا تخافين ماسويلج شي بس عندي كم كلمه وياج

حلى: ماريد ..افتح الباب واطلع لا يجي احد 

ساجد_ تقربت ولزمت ايدهه لان راح تبقى ترفض تسمعني ..

حلى: شكاعد تسوي اطلع بره

ساجد: اشش خليني احجي  واطلع وعد

حلى: ماشي احجي بسرعه

ساجد: حلى من اليوم يلي شفتج بي عجبتيني ضنيت ان عجبني شكلج فقط بس مع مرور الوقت صارت عيوني تراقبج وتدور عليج لا اراديا وصرت احس بمشاعر الحب بقلبي الج تكبر وتزيد يوم عن يوم  ولحد هذاك اليوم بالمطبخ لمن شفتج بلا حجاب وعصبت عليج جانت من غيرتي عليج ولاني اتخبل اذا احد خله عينه عليج ..

حلى رغم اني ملجوم قلبي وجنت احب وحده وخانتني وعدمت عندي الثقه باي بنيه ..

بس لمن شفتج وحبيتج رجع قلبي يرفرف ويطير بسما حبج ومساع من عرفت انج راح ترجعين روحي شبت نار بيهه وكلت لازم اعترفلج واحجيلج يلي بقلبي واتمنى تتقبلين حبي الج وتكونين مبادلتني نفس الشعور..

واني شاريج ورايدج على سنه الله  ورسوله مو ضحك يا بنت الناس..

حلى: ماعرف انه بهاي السوالف بس الاعرفه اني ..

اني انعجبت بيك من وقت مو بعيد.. 

واذا على الزواج فالقرار مو بيدي تعذرني القرار بيد اهلي..

ساجد: يعني انتي موافقه اتقدملج

حلى: بخجل..هاا لا اي

ساجد: فهاوي اي لو لا

حلى: ااا اي 

ساجد: زين اكدر اخذ بوسه..

حلى: هااا لا لا مستحيل شسالفه ..

ساجد: هههههاي لا تخافين اشاقه وياج ولج مو اني يلي اسوي شي ببنيه مو حلالي حتى لو جنت احبهه وتحبني..

حلى: الحمدلله..

ساجد: هههه يله اني طالع ..محتاجه شي اجيبلج قبل لا ترحين..

حلى: لا سلامتك..

ساجد_ فديت روحهه شكد بريئه ..خليت وطلعت ولاكتني سماء..

سماء: ها خويه محتاج شي

ساجد: بتوتر.. لا بس ردت اشوف ابن اخوي مالكيته..

سماء: هاا بالصاله يم الشيخ..

ساجد: هاا ماشي خلي اروح اكله لعد ..

خليت ورحت للصاله ..

افف لو متاخر شويه جان دخلت علينه وفهمتنه غلط..

حلى_ طلع مني وسمعت صوت سماء تحجي ويا بالباب خليت ودخلت للحمام ..

سمعتهه دخلت بالغرفه وطلعت..

سماء: هاي انت هم هنا 

حلى: ليش منو غيري موجود

سماء: ساجد توه صادفته طلع من الغرفه ماشفتي

حلى: لا خيه جنت بالحمام ..سمعت احد فتح الباب مساع بس عبالي انتي..

سماء: هااا اوك ..جهزتي ملابسج

حلى: لا بعدني

سماء: تعالي خلي نجهزهم سويه..

بقينه نرتب بالملابس وخلصنه وكالت ..

حلى: حبيبتي سماء انتي هم راح ترجعين بعد كم يوم..

سماء: وين ارجع..

حلى: لاهلي تعيشين وياهم..

سماء_ من حملت طفلي بحضني لحد الان واني ناسيه هذا الموضوع طار من بالي لازم ارجع بعد كم يوم لمن يصير عمر مرتضى شهرين ..

بس بعده صغير شلون اعوفه هسه ..

_بيني وبينج خيه الولد بعده صغير واخاف عليه اتركه هسه انتي من ترجعين كولي لاهلي ان قررت..........

الفصل الثالث والثلاثون من هنا