رواية فصلية بديلة الفصل الثالث والثلاثون 33 بقلم ام ملكوت

.

.

حلى_ 

صار العصر واجه جدو دخل و سلم على الشيخ واولاده ودز علي ابن باقر يكلي يردونج.

ودعت البنات وسماء وطلعت بره لكيت الشيخ وجدو يسولفون وساجد وشهم يمهم ..

مشيت وسلمت على جدو تالي ودعت الشيخ وشهم ورفعت عيني على ساجد واشوف عيونه حمر وضااايج ..خليت وصعدت للسياره ورجعنه للبيت ..

دخلت لبيت جدو وسلمت عل كل وكعدو يسالوني عن الحياة هناك وشلون عايشه سماء وشلون يعاملونهه وحجيتلهم عن طيبتهم واهتمامهم بينه وغيرها....

ام سماء: يمه حلى ماكلتي لسماء يمته ترجع

حلى: اي يمه سالتهه وكالت الطفل بعده صغير واذا ارجع هسه بالي يضل يمه ..قررت ان بعد ٣ اشهر ترجع وهذا قرارهه النهائي..

الجده: اي يمه صدك ابنهه صغير بعده وحرام تعوفه بهيج عمر وترجع بعده ماشابع منهه ولا شابعه منهه..

ام سماء: اي يمه امري لله ننتضر ونشوف تاليتهه...

حلى_ خلصنه سوالف وكمت سبحت وبدلت وطلعت اسوي عشه ويه خالاتي كمل العده وتعشينه وكلمن راح لغرفته 

واني وخواتي وامي وخالاتي بقينه بالصاله الصغيره نسولف ..هنه يسولفن وانه بالي يم الملعون ..

شلون سالفه هاي علكني بامل وخلاني لا كلي يمته يتقدملي ولا اكدر اشوفه ولا اعوفه..

                    

.......................

//بيت الشيخ محمود//

شهم_ ودعنه جد سماء ودخلنه للبيت بقيت بالديوان يم ابوي واخواني منا لصار العشه دخلنه للصاله نتعشه واشوف سماء تحجي وتضحك ويه البنات وسعيده ..

ضجت حيل ..

ضنيت انهه سعيده لان بعد كم يوم تعوف طفلهه وتعوفني وترجع لاهلهه ..حطو الاكل وتعشينه واني حتى اللكمه اغص بيهه من قهري على وليدي ..

اكلتلي لكمتين وكمت غسلت ورحت يم ابني ..اخذته من الكاروك خليته على الجربايه ونمت بصفه وبقيت امسد على بطنه واباوعله لحدما اخذتني النومه.. 

كعدت على شي يتحرك يم الطفل فكيت عيوني واشوف....

       

                   ....................

سماء_

صبينه عشه وتعشينه واني عيني كل شوي تروح باتجاهه اشوفه ضايج ومطبك حواجبه اكله لكمتين واستاذن وراح ..ماعرف شبي هذا الزلمه يوميه وجه اله ..

يوو هسه انه شكو بي خليني مرتاحه اليوم احس الضغط انزاح عني ارتاحيت لمن قررت

ابقى يم وليدي بعد ٣ اشهر صح مايكفن ومايهون علي اعوفه هنا واروح بس شسوي مجبوره ..

كملنه عشه واخذنه الماعين غسلناهم ورتبنه البيت ورجعو كلمن لغرفته ينام ..واني والبنات بقينه نسولف شويه علساس بس اخذتنه السوالف ومرت ساعتين..

سماء_

خليت ورحت للغرفه احس روحي تعبانه حيل دخلت واشوف شهم حاضن الطفل ونايم بصفه بقيت صافنه شويه اتامل شكلهم .. شحلاتهم الله يحفضهم لبعض يارب ..بس جا هسه شلون ارضع الطفل ..

تقربت شويه شويه ونمت بصف الطفل وطلعت صدري ورضعته وهوه نايم بس غطيت صدري وبقيت اباوع للطفل وامسد على راسه ..رفعت عيني وشفت شهم كاعد ويباوعلنه..

_اسفه لان كعدتك بس الطفل جاع..

شهم: لا عادي ..اكلج عادي يبقى نايم هنا لو يختنك

سماء: لا عادي بس للاحتياط راح اجيبله الكركوت الارضي وانومه بي..

شهم: وينه هوه

سماء: هناك بالكنتور هسه اخلص واجيبه

شهم: لا خليج كايم انه ..

كمت وعبرت من فوك رجليهه رحت طلعت الكركوت وعدلته وجبته خليته على الجربايه..

_من تخلصين نومي بي..

سماء: انشالله.. خله ورجع صعد عل جربايه ونام بمكانه خله ايده جوه راسه وبقه يباوعلنه واني كتلني الاحراج لان طالع صدري شويه من يم الطفل..

بقه شويه وكملت ورفعت عيني شفته نايم .. كمت على حيلي قربت الكركوت ورتبته وخليت الطفل بي وغطيته وطفيت الضوه العالي خليت الكلوب الشمسي مالت النشره ونمت بصف وليدي للصبح ...

#في الصباح...

شهم_

كعدت الصبح على عطر طيب فتحت عيوني ولكيت سماء كاعد تبدل للطفل وتخليله بودره مالت اطفال وتحاجي وتضحكله.. شيصير لو تبقى يمه للابد ويكبر بين اديهه ..

_صباح الخير

سماء: صباح النور.. يله مرتضى وليدي بابا كعد روح يمه واني راح اروح اشتغل مو تعب بابي ..

اخذت الطفل وخليته على ايده وبقه يشمشم بريحته ويشهك افيييش .. قصص ماي هوبس 

كمت ردت اطلع وصاحني..

شهم: سماء

سماء: هاا محتاج شي

شهم: شنو قررتي بخصوص موعد روحتج لاهلج

سماء: ااا امس وصلت قراري بيد اختي وكتلهه تكلهم اني بعد ٣ اشهر ارجعلهم

شهم: هذا قرار نهائي

سماء: ااا اي نهائي..

شهم: ماشي شكرا الج

سماء: العفو..

خليت وطلعت للمطبخ وكالعاده مر الوقت بين الشغل والسوالف والاكل ومرت الايام على هذا الحال.. 

واني حبي لطفلي وحنيتي عليه تزيد يوم بعد يوم وصرت كلما المسهه افكر شلون راح اتركه واروح وهوه بهذي الرقه والترافه منو يعتني بي اذا رحت ..

بس اخير شي وكفت تفكير حتى لا يزيد الطين بله واتراجع عن قراري...

#بعد مرور شهر...

ساجد_

من بعد مارجعت حلى صرت كليوم اشتاقلهه اكثر واحن عليهه وكلما افتح الموضوع ويه ابوي ياجلني .

.بس اليوم قررت ادخله للديوان وماطلع الا وهوه رايح وياي نطلبهه .. 

كعدت الصبح ورحت لطيت ابوي وخواني بالديوان ..

صبحت عليهم ودخلت..

_بويه اجيتك اليوم بموضوع وكدام اخوتي اريد تستجيب لمطلبي 

الشيخ: كول بويه شتريد

ساجد: بويه انه صارلي شهر الح عليك بموضوع وانت تاجلني وماعرف شنو السبب واريد اليوم لو تكلي سبب تاجيلك لموضوع زواجي لو تخليني اروح بنفسي اطلب ايدهه..

شهم: اه ومنو هاي ولك تريد تخطبهه ليكون رجعنه

ساجد: لا خويه انه رايد اطلب ايد حلى اخت مرتك

الكل: حلى اخت سماء

ساجد: اي هيه

باقر: بس ياخوي البنيه من اخر مره شفتهه صغيره يعني طالبه بالمدرسه وماعتقد اهلهه يقبلون يزوجوهه..

الشيخ: حاجو كلوله لان اني تعبت منه ماكاعد يفهمني ..من جهه البنيه صغيره ومن جهه ماعرف اذا اهلهه مستعدين ينطون بنيه النه بعد..

ساجد: بويه البنيه عمرهه صار ١٨ سنه مو صغيره واذا على اهلهه اني وشهم نحاجي جدهه يروح يقنع ابوهه ..

شهم: واني وياك ياخوي بس واذا رفضنه

ساجد: لا مايرفضون 

باقر: خويه ساجد اذا راح الشيخ يجوز يرفضون ويفشلونه وحتى لو استحو منه وقبلوا راح يكون بالغصب واهلهه ماراضين عليهه ياخوي..

الشيخ : بالنسبه الي اعرف قرارهم زين لهذا السبب ماروح انه واطلبهه اذا تريد روح قنع اهلهه وخليهم يوافقون برضاتهم تالي ارجعلي واروح اطلبهه براسي..

ساجد: ماشي بويه راح احاول وياهم اني واردلك خبر ..

شعلان: خويه تريد اروح وياك

ساجد: اذا بيك حيل الرفض تعال

الشيخ: ههه يعرف نفسه راح ينرفض ورايح..

شعلان: ولا يهمك ياخوي يرخصلك كلشي..

ساجد: والنعم منك ضلعي..

 خلينه ورحنه اني وشعلان لبيت جد حلى دكينه الباب وطلع رائد فتح الباب واستقبلنه بالديوان هوه وابوه.. 

ابو رائد: يا هلا بالضيف ..الكهوه يابني

ساجد: لا حجي قبل لا نشرب كهوتك عندي يمك طلب ..

ابو رائد: تفضل يابني..

ساجد: حجي اني حفيدتكم حلى شفتهه وعجبتني ورايدهه على سنه الله ورسوله واجيت اني واخوي اليوم 

حتى نخليك واسطه بيني وبين اهلهه واريد تكعد وياهم وتقنعهم لان اعرف انهه بنضرهم صغيره ومايزوجونهه وينطونهه لفرد من عائلتنه..

ابو رائد: ولا يهمك وليدي عندي اني احاجي ابوهه بس ماضمنلك ان راح يوافق من اول مره 

يجوز راح يتعبك ويا لان بنته هاذي عزيزه اكثر من باقي خواتهه ..

ساجد: ميخالف ياحجي اتعب العمر كله بس المهم يوافق بالنهايه..

ابو رائد: اي انشالله خير ..تفضلوا هسه الكهوه..

ساجد_ شربنه الكهوه ورجعنه للبيت وكلت لابوي ان الحجي راح يحجي ويه ابو حلى ويقنعه وبقينه ننتظر رده ..

لجميع الفصول من هنا