رواية حرم الاسود الفصل الثالث والثلاثون بقلم بتول ابو الليل
تيمور ; انتِ طالق ..
ماخليته يكمل كلامه خليت ايدي علئ حلكه واني ابجي وكلبي يدك بسرررعه ماريد نطلق اذا طلكني راح ياخذه مني يحرمني منه عاد هسه حته اذا صارت محكمه اكلهم امه وتزاعلنه واريده واخلي يكون الحق وياي موو وياه.
_لأ تيمور لاا
عيونه صارت تفتر داخل عيوني احسه يعاتبني بنظراته سحب ايدي من حلكه ودار وجهه عني.
_الله يخليك لاتسوي هيج لاتحرمني من ابني ابوس ايدك لاتاخذه مِڼـّي.
كعدت علئ ركبي واني ابجي لزمت ايده وهوه داير وجهه عني ابجي واتوسله حالتي تكسر الگلب.
سحب ايده مني بسرعه وصار يباوعلي بغضب.
تيمور : كومي اطلعي برا
_اريد ابني انطيني ابني واني اطلع وماخليك تشوفني بعدد
تيمور : هههه تدرين تضحكيني بهذا الكلام كل هل مده عندج وبعدج مصره تاخذينه وتبعدينه عني انتِ من ياطينه مصنوعه.
جنان : شديصير هنا.
آيلا : اريانا؟ هاي انتِ شجابج
جنان : واضحه جايه تتوسل ابني يرجع الهاا بس تاخرتي خطب وقريباً راح يتزوج.
انصدمت صدمة عمري من كالت هيج فتحت عيوني بصدمه احس تجمدت باوعت لتيمور واني عيوني كلهاا دموع.
يعني خطب نساني كرهني حقه شما يسوي اني بيدي خربت حياتي استاهل الي يصير بيه.
باوعت الايده لابس حلقه يعني كلامهم كله صّـْح.
تيمور : آيلا وصليها للباب
_ماطلع اذا مااااخذ ابنيييي رجعلييي ابنييي رجعولياااااااه.
جنان : هم الج عين وتحجين كل هل مده خافيته عنه ماخفتي الله ماكلتي حرام طفل يبتعد عن ابوه بس هايي سوالف اليان هيه العلمتج علئ كل هاي الامور.
عافنه تيمور وجان يريد يصعد فوك ركضت وراه واني دموعي تنزل بحركه لزمته من ايده واني ابجي.
_تيمور الله يخليك رجعلياه اني اسفه اعرف غلطت والله اسفه تكدر تشوفه شوكت متريد ابنك انتَ حقك بس لاتبعده عنيي وتحرمني منه.
تيمور : دوختيني واني مالي خلك تندلين الباب موو هذاااك اطلعي وبعد لاترجعين لأن كلامي ماغيره ولايصير ثنين كتلج مايرجع يعني مايرجع شتردين سوي مايهمني اشتكي سويها محاكم اني حاضر بكلشي.
احس روحي اختنكت كلش بلعت ريكي واني دايخه ولعبانه نفسي راحت روحي مني من الحركه والخوف والوضع الصرت بيه
وكعت علئ الارض كدامه واني احس كل جسمي تشنج باوعلي بصدمه
دنك بسرعه شالني خلاني بحضنه يضرب علئ وجهي اجت امه وآيلا يركضن اني افتح واغمض احس لسااني ثكل وعيوني غوشن.
تيمور : ارياناااا شبيج فتحي عيونج اششش باوعيلي فتحي عيووونج فتحيهمم
آيلا : شصااار شبيها اتصل بالاسعاف خليها تجي
تيمور : لا لاتسوين شيء هسه بس ترتاح تحجي هبط ضغطها اعتقد روحي سويلها عصير بسرعه
هزت راسها بأي شالني بين اديه تحس مثل الريشه مددني علئ القنفه وكعد يمي.
جنان : جذابه تريدنه بس ننطيها ابنها بس والله تحلم خاف هيه تغشك بسوالفها اني لااا اذا ماخليتها تتحسر عليه انيي موو امك.
تيمور ; كاااافي ماكوو داعي لهل حجي اني اتصرف ابني هذا موو ابنكم محد يدخل بيه غيري.
رفعت عيونها بملل مراضيه علئ كلامه دار وجهه يباوعلي سحب نفس قووي وخله ايده علئ جبيني.
تيمور : موو مثلي مستحيل تكونين مثلي
ماعرفت شنوو قصده فتحت عيونه اباوعله بتعب شال ايده بسرعه عني وكام من يمي اجت آيلا شايله عصير كعدت يمي تشرب بيه
آيلا : يمعودين كولو يالله انتم اهله لهذا الطفل اذا تبقون علئ هل وضعيه شلوون راح يعيش حياته لاتفكرون بنفسكم ومشاكلكم فكرو بيه هوه.
جنان : انتِ لاتدخلين هيه غلطانه شتردين منه نصفك الهاا علئ السوته خفت طفل سنه كامله ماحجت النه عنه ولو ما مات ابوها واجت لهنا جان ماعرفنه بيه طول العمر.
آيلا : والله ماعرف شصايرر بينهم بس كلشي صاار ماضي لاتخلون الكرهه والحقد يخرب حياة الطفل.
تيمور : اخر مره اكلكم لاتدخلون بشي مايخصكم ابني واني ادره مصلحته بعد امه عنه هذا احسن شيء اله اذا بقه وياها راح يدمر.
جنان : ايي حفيدي يبقه عدنه
آيلا : حرام تبعدونه عنهاا هيه بعدها لحد هسه مرته لان من صاير الطلاق هيه حامل يعتبر باطل يعني يحق الهاا تكون وياه.
جنان : انتِ شتردين بالضبط يرجعها لبيتي بالعباس ابو فاضل غير اكلب البيت كلاب فوك سوايتها وفضيحتنه نرجعها فووك الغلط مالهاا احنه الييي نجيبهااا منوو هيييه بت منوو ونزل روحنه عليها انييي من الاول ماردتها بسس تيموور شسويله ولدي الي ماكدرت عليهم ياخذون علئ حب هوه هذا حبهم خلي يستفادون هوواي من هل حب.
دار وجهه تيمور يباوعلي احسه يكلي شوفي وين وصلتينه نظراته تحجي اكثرر من حلكه غمضت عيوني بقهر نزلت دموعي بصمت كمت كعدت بصعوبه كوه اسحب نفس راسي احسه مقسوم نصين يريد ينفجر خليت ايدي علئ راسي ودنكت ابجي فجأه كال تيمور
تيمور : اريانا راح تبقه هنا بشرط.
رفعت راسي مصدومه شديحجي قبل شويه طردني ليش هسه يكول تبقه باوعتله واني مصدومه.
جنان : انتَ تخبببببلت شنووو تبقه هنااااا ولك نسيييت السوته بيك عااافتك وانتَ عاجز ماهتمت لوضعك ضمت ابنك عنك خلتك مضحكه للعالم كله وترجعها بكل هل بساااطه.
تيمور : راح تكون مجرد مربيه الابني لاكثر لاهيه مرتي ولا اني زوجها بعده ابني صغير وماكدر احرمه منهاا شما يصير بينه ماصير مثلها ومثل حقدها وانانيتها خليها وياه.
باوعتله واني دموعي تنزل بسرعه فرحت رغم حزني وتعبي ميهمني أي شيء المهم اكون ويه ابني بس مَآعِرَفتّ شنوو الشرط الي يريده منيي.
جنان : ابقه خليها تضحك عليك انتَ اذا بعدك تريدها شكوو ورطت بنت الناس وياك ليش رحت خطبت
تيمور ; ترا كلت الكم ماريدها وحبيبتي راح اخذها ويصير العرس وهيه تكون المنظمه لهذا العرس اوك اريانا؟
اختنكت كلش من حجه هل كلام لحد هسه ممصدكه بيه خاطب ماكدر ارفض أي شيء يكوله هزيت راسي بأي.
تيمور : راح تبقين هنا بشروط اذا وافقتي عليهن تجيبين اغراضج وتكعدين ماترضين تروحين تشوفين حياتج بدون ابنج.
_شنوو؟
تيمور : اول شرط اليان تقطعين كل صلتج بيها ثاني شرط شنوو اريد اني شما يكون تنفذينه ثالث شرط تشتغلين حالج حال اسينا تنظيف شغل تعتبرين مربيه بعد موو وحده من البيت لا اكلج ويانه ولا حته شربج.
بقيت صافنه بوجهه شهل حقاره الشايلها ليش هيج يسوي بيه.
_انتَ من عقلك تحجيييي انييي مووو خدامه عندددك سمعت مستحيييل اذل نفسي الكم مستحيييل وابني اخذه منك حته لووو بالقووه.
تيمور : اوك روحي سوي الي تردينه بس اذكرج مرجعج هنااا تملين وتعبين وتجين برجليج وتكولين تيمور موافقه علئ كل شرط حجيته.
_عمري ماشفت انسان احقر منك ماتغيرت انتَ نفسك الانسان العرفته الاناني الظالم الي ميهتم لأي بشرر نفسك تيمووور ماتغيرررت ابددد.
_اناني وظالم بس موو خاين ولا اغدر بشر واطعنه بظهره ماعوف الاحبهم باشد اوقاتهم ماتخله عنهم انتِ مالج حق اصلاً تحجين بعد الصااار انيي هسه ماريد افضح كلشي ماريد اخجلج اكثرر كدام امي وآيلا خليلج شووويه كرامه بعد واطلعي برااا يلاااا بسرررعه.
_راح تتندم علئ كلشي سويته بحقي.
تيمور ; ايي اووك
عافني وراح علئ تيم شاله وصعد بيه فوك بقيت واكفه مكاني واباوع وراه بغضب شسويلك تيموور شلوون اخليك تتنازل وتنطيني ابني دخيلك ياربي.
درت وجهي اباوعلهم جنان تباوعلي بغضب بس آيلا لا مبينه زعلانه عليه عفتهم وطلعت من البيت.
جانت امي واليان كاعدين بالحديقه منتظريني من طلعت كامت اليان واجت نحوي.
اليان ; هاا شصاار.
_مايقبل ينطي رايحه اشتكي عليه
جميله : ولج يمه شتشتكين ابو ابنج هذا
_ميهمني يمه يريدني اكون خدامه جوه ايده يريد يتحكم بيه ويخلي الكل يضحك عليه يريد ينتقم منييي عن طررريق ابنيييي شسوووي فهمووني شسوووي هسسه
اليان : اني اعرف شلوون نخلي يتنازل امشينه نروح لعمي هوه يكدر يتحكم بيه.
_منوو منهم.
اليان : عمي الجبير براهيم نروح عليه ونحجيله كل السالفه وهوه اكيد راح يساعدنه.
_ميكدر والله تيمور مايهمه أي شخص هوه يقرر بكيفه امه ماتأثر بيه ولا حته يهتم الهاا تردين عمه يقنعه؟
اليان : والله يقنعه عميي واعرفه
_تمام خلينه نروحله.
اليان : يلا.
جميله : والله مادري شكول الجن كله من ورا سوالفجن وطلعاتجن استلمن شصاار بينه اني ماكدر اروح واشوف الرجال لازمه عده راجعه للبيت اخذي اريانا وروحن عود خابرني.
اليان : تمام يلا اريانا.
درت وجهي اباوع الامي حضنتها واني ميته قهر حضنتني وهمستلي بهدوء.
جميله : يرجعلج والله اني اعرفه تيمور يحبج مايحرمج منه بس بعده ضايج.
ابتعدت عنهاا بقيت ساكته متعرف شصاار بينه وشلوون حاقد عليه هسه تيمور ويريد بس يذلني.
عفتها ورحت ويه اليان لبيت عمهااا طول الطريق صافنه واتذكر كلام امه وكلام تيمور
صدك خاطب راح يتزوج يكرهني يريد يذلني احسه يتحارب وياي هسه.
اني بيدي وصلت روحي لهنا شيصير لوو باقيه وياه وماسامعه كلام اليان شيصير لوو داريته واهتميت بيه وكبرر ابنه بيناتنه.
وصلنه لبيت عم اليان نزلنه سويه دكينه الجرس فتحته جنتهم مرت ابنهم الجبير سلمنه ودخلنه.
رسل : كل الهلا حبيبتي تفضلوو.
اليان : عموو موجود
رسل ; أي موجود يصلي.
اليان : كوليله اليان هنا وتريدك.
رسل : ايي هسه تفضلوو اكعدو
كعدنه سويه بقيت افرك باصابعي بتوتر شويه ونزلت شذر من فوك شافتني انصدمت بقت فاتحه عيونها.
شذر : اليان اريانا؟
اليان : شلونج شذر
شذر : الحمدالله شجابكم شكوو صايرر شيء
اليان : جايين علئ عمي عدنه موضوع وياه انتِ شعجب هنا موو بيت رجلج
شذر : ابني شويه مريض وزوجي مسافر واجيت هنا يم اهلي.
اليان : هاا ايي زين
شذر : شلونج اريانا
_الحمدالله انتِ شلونج
شذر : زينه
تباوعلي صفح كارهتني بشكل موو طبيعي واني هم ماطيقها شويه ودخل علينه عم اليان وياه ابنه زيد كمنه ثنينه سلمنه عليهم كعدو مقابيلنه.
زيد : ليووم منين طالعه الشمس اليان جايتنه
اليان : هههه ليش حرام اجي علئ بيت عمي.
زيد : لا اكيد موو حرام كل الهلا بيج شوكت ماتجين.
براهيم : كولي بويه امر خدمه
_عموو الموضوع يخصني اني وتيمور.
باوعلي بستغراب شذر تغيرت ملامحها ودنكت راسها زيد رجع راسه علئ القنفه يباوع النه بتركيز.
براهيم : أي شبيه تيمور
_اني وياه صارت بينه مشاكل وانجبرت اعوفه واسافر ومن سافرت عرفت بنفسي حامل ولدت الطفل واني هناك مكدرت ارجع ولا احجي لتيمور من توفه ابوي رجعت وعرف تيمور بالطفل واخذه مني وهسه مانعني حته من شوفته.
براهيم : شلوون يعني طفل صاار وانولد وابوه مايدري بشي؟
_عموو والله العظيم ماكدرت احجي جنه مطلقين وهوه مسجون يعني صعب الموضوع حيل عليه.
براهيم : والله ياعمي مادري شكلج بس انتِ غلطتي يوم ضميتي هل موضوع عنه كل الناس تعرف تيمور شنوو وشلون يفكرر موو أي بشر يلعب وياه.
_كلشي ماريد من عنده بس يرجعلي ابني
براهيم : كلتي تطلكتو؟
اليان : لحد الأن بعدها مرته لأن صاار طلاقهم وهيه حامل يعتبر باطل.
براهيم : تمشين ورا رأي عمج وتخلين الموضوع بيدي لوو تمشين برايج انتِ
_لأ عمو وراك انتَ
براهيم : تكومين هسه وياي نروح عليه نكعد اني وياج وتيمور احنه الـ 3 سويه واسمع الحجي منكم ثنينكم حته ماحكم علئ واحد بيكم بدون مافهم كل السالفه وانشالله نوصل لحل مناسب.
_تمام
اليان : اني راح ابقه عد بيت عموو روحي انتِ اريانا.
اشرتلي بعيونها انو اروح ادري بيهم ميخلونها تدخل ومتريد تتفشل كدام عمهاا هزيت راسي بأي كمت اني وعم اليان طلعنه من البيت رجعنه علئ بيت تيمور.
طول الطريق خايفه وگلبي يوجعني شراح يصير شلوون راح تنحل ويه تيمور اني غلطت بس ماستاهل كل هل شي منه.
وصلنه لبيتهم دخلنه الحرس مافتحو حلكم بشي دخلنه للبيت جانت دنيا المغرب ساعه بـ 6 تقريباً
الكل كاعد بالصاله قصي شايل تيم ويبوس بيه ويلاعبه من دخلنه انصدمو تيمور مموجود وياهم
ساهر : عمي؟ كل الهلا تفضل
_سلام عليكم
الكل : وعليكم السلام
اني مافتحت حلكي بحرف بس ساكته راح عمهم كعد علئ القنفه اني بقيت واكفه فجأه كال
ابراهيم : اكعدي بويه
هزيت راسي بأي كعدت اباوع الابني واتحسر مديت ايدي لقصي طلبت منه ينطياه استحه من عمه انطانياه ماصدكت لزمته
ضميته لصدري ابجي وابوس براسه وعيونه احس روحي عطشانه عليه
شويه ونزل تيمور من فوك يخابر ويضحك من شافنه اختفت ابتسامته وسد الخط بسرعه واجه علينه.
تيمور : منوو سمح الكم تنطوه الهااا؟
براهيم : هذا سلامك
تيمور : لعفو عمي ماشفتك
براهيم : جايك علئ هذا الموضوع واريدكم ثنينكم علئ انفراد.
تيمور : مابينه أي كلام عمي هيه بنفسها نهت كلشي ليششش جايبتك هسه ومدخلتك بالنص هيه غلطااانه ومالهااا أي حق بيه هذا ابني انييي ابنييييي ولوو تنطبك السماء علئ الارض مانطي.
براهيم : ابنك اي وياك بس اسمع مني شوف شنوو رايد منك.
تيمور : عمي رحمه لوالديك لاتدخل بهاي السالفه انتَ عزيز عليه واحترمك واحبك ماريد اضوجك بحجايه خليني اني احل هل موضوع.
براهيم : يعني ماتقدرني؟ جايك ومتعني ماتسمع كلامي
تيمور : استغفرالله ياربي انتَ علئ راسي عمي تفضل ندخل بالاستقبال نحجي
هز راسه بأي باوعلي تيمور بغضب يتنفس بقوه هز راسه بأسف عليه مشه كدامنه فتح الاستقبال لعمه
شلت تيم ورحت وراهم دخل عمه واني وراه وصلت لتيمور باوعت لعيونه حمرر دم همس بصوت خافذ.
تيمور : اتعبج والله اتعبج مثل ماتعبتيني.
مجاوبته عفته ورحت كعدت علئ التخم سد الباب وكعد مقابيل عمه
براهيم : احجيلي السالفه انتَ ليش قررتو تطلكون وليش ماحجتلك علئ الطفل
تيمور : هذا السؤال وجهه الهاا موو الي اسالها ليش طلبت الطلاق وليش سافرت وليشش ضمت الطفل عنييي كولهااا خليها تجاووبك
براهيم : اريانا بويه اني مثل ابوج لاتخافين ولاتتوترين خلونه نحل هل موضوع بتفاهم لأن هل سالفه بيها طفل مرتبط الصار الهاا حل خيراً علئ خيراً ماصارلها تطلكون رسمي والطفل يبقه بينكم.
تيمور : يبقه يمي هيه مالهاا حق بيه خلص وقتها اخذته سنه كامله عدها.
براهيم : تيمور بويه انطينه مجال نحجي خلينه نفهم السالفه.
_عمو اني ماعندي مشكله ويه تيمور ماتفاهمنه من اول زواجنه احنه ممتفاهمين وبعد الصار كدامكم علاقتنه حيل تضررت وصارت امور اني صعب عليه احجيها يعني حيل انضغط عليه مكدرت اكمل بهل زواج اني الي طلبت الطلاق منه واقسم بالقران ماجنت ادري حامل ابد سافرت وصلت لهناك يلا عرفت وبوقتها جان تيمور بالسجن ماكدرت احجيله ومن طلع مكدرت اتواصل وياه ومن رجعنه هسه عرف وحارمني منه اني غلطانه ماكلت ماغلطت لاا غلطت واعتذر علئ كل تصرف سويته بس برأيك صح ياخذ ابني ويحرمني منه وميخليني حته اشوفه.
تيمور : الصح تبعدينه عني وماتحجين موو؟
براهيم : والله ياعمي مادري شنوو احجيلكم انتم زوج وزوجه واني واسطه خيرر بينكم انشالله تردون الطفل بيناتكم ترجعون سويه تكعدون اقل شيء شهر سويه تشوفون نفسكم اذا كدرتو تتفاهمون خيراً علئ خيراً ماكدرتو تطلكون وتحلون الموضوع بالمحكمه هيه تقرر ويه منوو تخلي الحضانه.
تيمور : هيه ماترضه ترجع اني كلتها ارجعي اكعدي ويه ابنج وماقبلت.
_جذب والله محجالي هيج جان يكلي اريدج ..
براهيم : ارجعي بويه وتعوذو من الشيطان هل امور ماوراها بس الخراب حرام هل طفل الحلوو تدخلونه بمشاكلكم انتم موو صغار عيب تصرفون هيج.
_عموو هوه خاطب ويريد يتزوج اني مالي مكان بحياته بعدد.
براهيم : انتِ ام ابنه الج كل المكانه بحياته حته لوو تزوج شنوو ماصايره الزم تاخذ 2 و 3 الشرع محللهه هل شيء.
_ماكدر اتقبل هل شيء.
ضحك عمه اني ماعرف لـيش هيج حجيت فشلت روحي ابين نفسي احبه خرب يومج اريانا اباوع لتيمور يباوعلي بتركيز من درت وجهي اباوعله شتت نظره عنيي.
براهيم : والله ياعمي حيرتوني انتم شتردون بالضبط.
_اني اريد ابني ماريد أي شيء.
براهيم : ارجعي لبيتج ورجلج وخلي ابنج بيناتكم ترا والله تتمرمرين اذا خليتي بعيد عليج كل فترا راح ينوخذ منج وتفرفح روحج وراه.
بقيت مدنكه راسي وحايره شلوون اتصرف ارجع لتيمور يريد يشرط عليه شروط يعذبني اكثرر مما اني متعذبه بس ابني شلوون.
اذا طلبت الطلاق راح ياخذه مني و يحرمني حته من شوفته رفعت راسي وكلت.
_راح ارجع
براهيم : عفيه بنيتي صيري معدله المره الحوك تتحمل رجلها توكف وياه موو من ادنا سالفه تعوفه وتسافر وين صايره هاي هذيج المره سويها وعدت المره الثانيه اني الي اوكف بطريقج.
تيمور : شهر واحد تبقه يمي اذا تفقنه كلش زين ماتفقنه اطلكها وكدامك الحجي يصير
براهيم : هاهيه.
باوعت لتيمور بقهر دار وجهه عني كام عمه وكال.
براهيم : يلا بويه اني عندي شغل وماكدر اتاخر عليه لخاطري تيمور بويه اذا الي خاطر يمك تعوف الزعل والعرك وتهتم بابنك ومرتك.
تيمور : انشالله
براهيم : وانتِ بعد بويه ماوصيج
هزيت راسي بأي عافنه وطلع من الاستقبال بقينه بس اني وياه وتيم يلعب علئ الطاوله بقه مركز بعيوني تقدم نحوي رجعت ليورا وصل يمي كلش ابتسم وكال.
تيمور ; جنت منتظر تسوين هيج حته يبدي العقاب ع اصوله.
_ليش تسوي هيج.
تيمور : يعجبني ارتاح من اسوي هيج.
_تكرهني؟
تيمور : من سنه كرهتج
_ماتكدر تكرهني اني اعرفك اعرف ليش هيج تصرف هسه كل هذا حته تحسسني بالغلط السويته اني اسفه تيمور اسفه غلطت بحقك وعفتك والله مارتاحيت لحظه ولا ..
تيمور : اششش ولاحرف اريانا لاتحجين ابد ولاتبرريلي كلشي ماريد اسمع منج انتِ انتهيتي بالنسبه الي ثقي بالله ماتهميني بعد الانسانه الضحيت بروحي واهلي عليها وماهتمت ماتت بعد راحت من بالي اصلاً اجت وحده غيرج الي تملي حياتي الي تعرف معنئ الحب والاهتمام.
دنكت راسي واني مقهوره هزيت راسي بأي وهمست.
_فرحتلك تستاهل بنيه تحبك وتهتم بيك.
تيمور : اكيد.
_لازم اروح واخذ تيم وياي وباجر تعال اخذني من اخواني لان ماكدر اتصرف بكيفي بعدد
تيمور ; شنوو رأيج اجيب وياي زفه
_نشوفها بمرتك الجديده.
تيمور : شرط اخليج انتِ جهزين غرفتنه.
_عادي
تيمور : ماشي.
_اكدر اخذه هسه
تيمور : ماكوو طلعه تردين تروحين روحي انتِ بس ابني لااا.
_تيمور اسوي الي تريده بعد بس سوي هل شيء لخاطر تيم كدام اخوالي واخواني.
تيمور : ماشي روحي الصبح اجيكم.
ابتسمت وهزيت راسي بأي درت وجهي اريد اروح لتيم لزم ايدي وسحبني عليه ارتدمت بصدره بقيت صافنه واباوعله همس بصوت هادئ.
تيمور : اذا لعبتي بذيلج اندمج والله.
_لاتخاف ماسوي شيء.
تيمور : دير بالج.
هزيت راسي بأي وسكتت سحبت ايدي عنه ورحت شلت تيم اجه علينه شاله مني باسه من خدوده وركبته يشمهااا يغمض عيونه حييل اتذكر شلوون جان يسوي هل حركه وياي ويكول ادمنت عطرج.
تيمور : بطل علئ ابوك.
مادري ليش ضحكت دنكت راسي باوعلي مراضي انطاني تيم بقوه اخذته واني اباوعله.
تيمور : يوصلكم الحارس.
هزيت راسي بأي عفته وطلعت من البيت جان الكل كاعد بالصاله بقو صافنين من اخذت تيم وطلعت.
..
رهف : شفت اليان شكد حبابه
آرون : هيه من زمان هيج
رهف : اني اكوول لوو تكون وياها
آرون : شقصدج؟
رهف : حبيبي اخويه ترا صارلك فترا كلشش طويله من طلقت أليڤ شوفها هيه تزوجت وشافت حياتها انتَ لـيش ماتفكر بنفسك هم وتقرر تزوج.
آرون : رهف احنه حاجين بهل موضوع.
رهف : شبيك ترا والله اليان كلش تناسبك اني اشوفها كلش حبابه انتَ تعرف عليها تقرب الهاا شوفها اذا خوش بنيه اخطبها والله حرام تروح منك.
آرون : انتَ تخبلتي مستحيل توافق بيه اني رجال مطلق هيه بنيه شابه شلون تردين مني اخطبها حته مافكر بهل شيء لأن اعرف جوابها كلش زين.
رهف : اذا تريد اني احجيلك وياها شتكول؟
آرون : لٱ عوفي هل موضوع اني اشوفلي طريقه واحجي وياها.
رهف : يعني شنوو موافق علئ كلامي تحبهاا هااا اعترف كوول تحبهااا مووو.
آرون : هيه قبل جانت تحبني
رهف : شنووو شووكت
آرون : قبل لاطلق أليڤ ورفضتها.
رهف : ياااا
آرون : هسه ماكدر ارجع عليها متردد وخايف من جوابها هسه تكول طلق يلا رجع عليه ماريد اصير موقف محرج.
رهف : انتَ تحبها؟
آرون : مامتاكد من مشاعري بس حيل ارتاحلها.
رهف : اممم لعد انطي لزواجكم وقت تعرفو اكثرر علئ بعض وخليها ترجع تحبك وتقدم الهاا.
آرون : الله كريم.
...
رجعت لبيتنه ساعه بـ 8 بليل وصلني حارس البيت مال تيمور فرحانه برجعت ابني ممصدكه.
ادري بروحي راح ارجع لقهري وضيمي ويه تيمور بس متقبله هل شيء لأن اعرفه يحبني يوم يومين شهر راح ينسه الصار ويرجعلي
نزلت من السياره واني ميته من التعب دخلت للبيت بدون مادك الباب ولاشي
جان اخوي مسلم كاعد بالحديقه واسمعه يخابر جان يكول.
مسلم : كتلتو ابوي شتردون بعد مني الفلوس ورجعتهن كااافي حلوو عنيييي كااافي
فتحت عيووني بصدمه يعني ابوي مات بسبب مسلم ..؟
رحت عليه واني افور من العصبيه شافني سد الخط ضربته راجدي قووي علئ وجهه صرخت بصوت عالي عليه
_حقيرررر نذل ولك بسببك ابووووونه مااااات شلووون تسوووي هيييج مسلم شلوووون ولك كتلك عووف هل شغل عووفه بسببك ماات ابووي والله لفضحك كدااام الكل والله اخلي الكل يعرف حقيقتك يااانذل.
مسلم : اشش اسكتي والله مادري بيهم والله مادري
_هسه رايحه احجي الاهلي علئ كلشي خليهم يعرفون حقيقتك عبالك اسكت اشتكي عليك وادخلك سجن بيدي انييي بيدي ادخلك والله ماسكت ابدد.
مسلم : اريانا اوكفي اهدي خلينه نحجي اوكفي كتلج
_وخرر ايدك عنييي وخر والله ماسكت ماريد افهم شيييي سكتت هووواي وتحملت هواي سنه كااامله عفتك ع امل تعوف هل شغل بس لااا مايفيد وياااك مسلم مايفيددد ابدددد.
مسلم : اريانا بس خليني اشرحلج اسكتي لاتسمع امي مريضه تموت والله عندي 2 اطفال اذا انسجنت يتبهذلون.
_ميهمني تيموور هم ابوو ابني همم جنت حامل بابنه وجان مصوب وتعباان وخليته ينسجن وهوه مامسوي شي انتَ المسؤل عن كل المصايب
عافته وجنت اريد ادخل للبيت صاح بصوت عالي وراي.
مسلم : اريااااااانا.
درت وجهي اباوعله فتحت عيوني بصدمه من المنظر ..
