رواية حرم الاسود الفصل الرابع والثلاثون بقلم بتول ابو الليل
فتحت عيوني بصدمه جان مخلي المسدس براسه وعيونه مركزه عليه رجعت عليه واني اصرخ
_لااااا مسسسسلم نززززله
مسلم : لاتروحين تحجين اريانا احلفج بابوي والله مالي ذنب بشي تركتهم بس همه سووها اموت روحي ولا اخلي امي تموت بسببي
_نزل المسدس ماحجي شيء نزله.
مسلم : اخذ ثار ابوي اوعدج بهل شيء مراح اسكت عنهم بس انطيني فرصه بس هل مره
خليت ايدي علئ حلكي ابجي ليش هيج يصير بيه دخيلك ياربي تعبت والله شسوي هسه شلوون اتصرف.
نزل المسدس واجه عليه سحبني لحضنه يبوس براسي ويهدي بيه
مسلم : اشش كافي اني اسف والله اسف صدكيني عفت هل شغل من زمان وروح ابوي عفته بس همه موو بسهوله تكدر تتخلص منهم.
_ليش هيج مسلم ليشش دمرت حياتك وحياتنه انتَ دمرررتنه خربت كلشي .
مسلم : اصلح كلشي صدكيني اصلحه مراح اسكت عنهم ابد
_شراح نستفاد مااات ابوووي وراح من ورا شغلك هذااا .
مسلم : اخذ حك ابوي والله اطلع حگه من عيونهم
_وخرر عنييي وخر اني موو اختك ولا اعرفك من اليوم تبتعد عن حياتي من باجر راجعه لتيمور احسن منك تيمووور ع اقل ماضم شيء عليه حجالي كلشي بوضوح انتَ جذذذبت عليه سووويتني لعبه بين اديييك.
مسلم : اريانا اسمعيني.
عفته ورحت الابني شلته ودخلت للبيت دموعي تنزل بسرعه جانت امي بالغرفه مالتها وعفاف هم ومحد سمع كلامنه
صعدت لغرفتي بسرعه ابجي واشهك خليت ابني بالكاروك وكعدت علئ السرير.
شنوو ستفادينه من هذا الشغل دمر حياتنه ومستقبلنه اخذ ابونه ويتمنه حرمنه من احن شخص علينه.
هذا شغل الحرام عمره مادام ولا راح يكون خير ابد لعبو بالحرام
دمرو حياة الشباب بالمخدرات ورب العالمين عاقبنه بهل اشياء نستاهل الي يصير بينه احنه من الاول ماعرفنه نمشي صح.
اباوع لتيم نام مسحت دموعي وكمت واني عيوني مورمه اباوع لنفسي بالمرايه وين وصلتي روحج اريانا خربتي كلشي حياتج انكلبت فوك تحت
شهل حياة الي عايشه اني بيها اهلي زواجي كلشي غلط بغلط ماكوو شيء صح بحياتي
اندك باب غرفتي مسحت دموعي حيل وكلت تفضل دخلت امي شافت تيم فرحت وراحت عليه بوسته من راسه
جميله : شلون اقتنع؟
_راح ارجع اله
جميله : شنووو شلون
_هوه ابو ابني مهما يصير ماكدر ابعده عنه غلطت مره ماريد اغلط مرتين اله حق يكون يمه واني ماكدر افارقه لهذا راح ارجع وياه وابني زواجي من جديد.
جميله : هوه هذا الصح ارجعي لبيتج ورجلج وعوفي هل تصرفات الطايشه استقريلج مكان واحد ولاتخلين الحجي ياخذج ويرجعج.
_شقصدج
جميله : اليان هيه واخوانها موو صلح يمكن تحجي وياج وتقنعج بالسفر دير بالج تسمعين منهاا قسم بالله اذا رجعتي بعد حته اني اتبره منج سمعت اخوانها طاردينها ليش لان تصرفت بكيفها واحنه غير نحبج وماحجينه ولا منوو يقبل بنته تسوي هيج سوايه
_يمه
جميله : اششش اني امج وادره مصلحتج انتِ هسه هم صرتي ام فكري بتيم لوو عافج وماتعرفين بيه وين رايح شراح يصير بيج احنه هم هيج مكانج الوحيد هسه بيت رجلج شما يصير بينكم لادخلون طرف 3 بينكم تحلون الموضوع بينكم ماينحل احنه اهلكم موجودين نشوفلكم حل ماتصرفون بكيفكم.
_انشالله
جميله : الناس تحجي علينه وعليج تصير هسه بعدها ناس تعازينه تروح وترجع وماتدري بسالفتج صدكيني اذا عرفو راح تصير سيرتج علئ كل لسان وانتِ تعرفين عماتج شلوون يطشن الاخبار
_هوه باجر راح ارجعله بس يمه هوه ميريدني ماخذني بس علمود تيم وحته خاطب طلع
جميله : ادري بيه من خطب
_ليش ماحجيتليلي
جميله : شحجيلج انتم تطلكتو كل ضني بعد هاهيه مابينكم شيء.
دنكت راسي بقهر وهزيت راسي بأي كعدت يمي امي خلت ايدها علئ كتفي وكالت.
جميله : شما يصير تبقين ام ابنه واكيد مراح يقصر وياج معليج بمرته ولاتدخلين بينهم ابدد عليج بابنج وبس
_ماكدر اشوفه ويه وحده ثانيه
جميله : جا شلون عفتي اذا تردينه
_انجبرت اروح جنت اريده يرتاح يخلص من كل هل مشاكل.
جميله : انتِ دمرتي حياتج وحياته بيدج وانتِ الي تكدرين تصلحين كلشي وترجعين الماي لمجاري خلي ترجع علاقتكم شما يكون راضي عنج كل ماتكونين مرتاحه وتتخلصين من كلشي واني امج موجوده الي يتعبج ويضوجج تجين تحجيلي اني موو لغير شخص افهم منج واعرف شلوون انصحج.
هزيت راسي بأي سحبتني لحضنها حضنتها واني مقهوره شويه حسيت بالراحه من حجت وياي امي وطمنتني لازم اسوي مثل ماتكول
لازم ارجع علاقتي بتيمور اخلي يسامحني علئ كلشي صار بينه خلص اني مكتوبلي اعيش وياه.
بقت شويه يمي وراحت تمددت علئ فراشي واني دايخه وافكر بكلشي صار وياي غفيت بدون ماحس.
كعدت الصبح علئ صوت جهازي يتصل شفت رقم يتصل علئ الواتساب فتحت خط جان تيمور.
تيمور : ساعه واكون يمكم جهزي تيم
_تمام
تيمور : شبيج
_شبيه
تيمور : شو كوه تحجين
_مريضه شويه
تيمور : احسلج يلا جاي
سحبت نفس بقوه شمرت الجهاز وكمت لتيم كعدته واخذته بدلتله وجهزت الجنط مالتنه نزلت جوه كلت لماما تخابر علئ اخواني يجون حته تيمور يكعد وياهم ويصير الحجي كدامهم.
رحت ساعدت عفاف بالريوك امي خابرت علئ اخواني الكبار.
كعدنه تريكنه سويه شويه وصلو اخواني بيوتهم موو بعيده كعدو ويانه وبقينه نسوالف كلام عادي
شويه وصل تيمور راحو كعدو كلهم بالاستقبال. بقيت اني وامي وعفاف كاعدين بالصاله.
اسمعهم يحجون علينه وعلئ تيم وتيمور يجاوبهم
مرتي واريدها هيه وابني الفات مات واني ماعندي شيء وياها نتزاعل ونتراضه عادي.
اثبتلي انوو حيل غلطت بحقه رغم أساتي اله واذيتي هسه مانطه بيه كدام اخواني وماحجه عليه بشي موزين ضم كلشي بگلبه .
وافقو اخواني برجعتي لتيمور طلع اخوي الجبير خالد وكالي
خالد : يلا خويه حضري روحج ترجعين ويه رجلج.
هزيت راسي بأي اني مجهزه كلشي صعدت لغرفتي لبست جبه وشال ونزلت رحت علئ امي وعفاف سلمت عليهم.
جميله : بنيتي ماوصيج بعد لاتهتمين لأي شخص عليج بابنج وزوجج.
_انشالله
عفاف : حبيبتي الله يكتبلج الخير بحياتج
_فدوة لكلبج.
شلت تيم وطلعت ويه اخوي خالد من البيت جان تيمور واكف يم السياره يدخن لابس طقم رسمي كله اسود باسود طلع يخبل من طلعنه ابتسم اجاني بسرعه اخذ مني تيم وباسه بخدوده.
تيمور : ها ولك مامشتاق الابوك تعاال.
شيل بيه يبوس بخدوده بقيت اباوعلهم واني فرحانه كلش انو تيمور يحب تيم.
خالد : يلا خويه اصعدي ومثل ماوصيانج.
_انشالله
سلم تيمور علئ اخوي وصعد اني هم صعدت شغل السياره وساق باوعلي بهدوء دنكت راسي بتوتر.
تيمور : خلصت مابقه شيء.
_شقصدك
تيمور : سالفتي وياج خلصت
_تيمور
تيمور : نعم
_اني اسفه
تيمور : علئ يا وحده منهم اسفه هنه هوواي.
_علئ كلشي.
تيمور : تأخرتي هووواي.
سكتت حقه يضوج بس والله ارجع مكاني بحياتك واخليك تسامحني علئ كلشي انسيت الصار واعوضك عن كلشي.
وصلنه للبيت نزل هوه وفتح الباب اخذ مني تيم ودخل
سحبت الجنط ودخلت وراه جان الكل كاعد بالصاله يسوالفون كامت جنان واجت علئ تيمور تاخذ منه تيم.
جنان : هلا هلا بحفيدي الحلوو يمه فدووة
اخذته امه من تيمور تبوس بيه شافتني كلبت وجهه تكرهني كلش ومطيقني ابد.
آيلا : اهلاً وسهلاً
_شلونكم.
جنان : جنه بخير
قصي : تعال ولك فصعون.
تيمور : ولك لاتغلط علئ ابني ترا اشك وصلتين.
قصي : شلون ابن جنه فصمه
تيمور : شوفه اذا ماخليته يسحلك
قصي : منا لحد مايكبر اني شايب
تيمور : حته لو شايب اخلي يكسر اعضامك
ساهر : يسويله اعاده تدوير ههههههه
تيمور : ههههه بالضبط.
آيلا : غرفتكم فوك تعالي وياي.
هزيت راسي بأي سحبت الجنطه مالتي وآيلا شالت جنطه تيم صعدت للغرفه مخلين غرفه اليان الي اني وتيم
دخلت للغرفه جان مشتري سرير لتيم وجربايه الي ومخلي العاب وسيارات بالون الازرك شوكت لحك يسوي كل هذا لبارحه اني يمهم.
آيلا : لبارحه خلص اليل كله يجهز بغرفه تيم
_اممم اي انصدمت شبسرعه سواها.
آيلا : هههه متعرفين تيمور انتَ كلشي عنده يخلص بدقايق
_ايي صح.
آيلا : راح تكون غرفتكم سويه بما انو انتِ وياه موو كلش علاقتكم هسه تبقين ويه ابنج وغرفته راح تكون لمرته الجديده .
_صدوك آيلا اريد اسالج سؤال
آيلا : أي كولي
_تيمور منوو خطب اعرفها اني؟
آيلا : لا وحده غريبه وياه بالشغل اعتقد اسمها اسيل بكدج تصير وهم تشبهج هههه.
_هاا اي تمام
آيلا : والله لوو مامسويه هيج تصرف جان عشتي احلا عيشه ويه تيمور حباب كلش جان بقيتي بس انتِ بحياته ومحد شاركتج بيه.
دنكت راسي وسكتت ماعرف شنوو اجاوب الي يحجي وياي بهيج موضوع غلطت اي غلطت بروحتي هاي ودمرت حياتي كلهاا.
آيلا : المهم الصار صار وخلص واني ماعرف الصار بينكم رتبي غرفتكم علئ ذوقج بعد نازله اشوف اسينا شنوو حضرت النه علئ الغده واساعدها تمام
هزيت راسي بأي عافتني وطلعت من الغرفه سحبت الجنط وسطرت الملابس
جايب كنتور خاص لتيم مشتريله ملابس اغراض كومه مادري شوكت جاب كل هذاا
رتبت كلشي شويه ودخل تيمور للغرفه شايل تيم نايم درت وجهي اباوعله خلاه بالسرير مالته وغطاه اني بالكنتور اعلك ملابس
_ها نام
تيمور : عوفي كلشي واطلعي خلي يرتاح بنومته.
_شنو؟
تيمور : اكلج اطلعي خلي ينام براحته وطفي الاضويه عليه.
_تمام بس اخلص الملابس
تيمور : ملابسه القديمه اشمريهن اشتريتله جديد واكو طقم تلكينه معلك تلبسينه اله ليوم بالحفله.
_حفله ياحفله ؟
تيمور : ليوم عيد ميلادي وسوولي حفله.
_عيد ميلادك
تيمور : أي
_ءءأ مجنت اعرف كل عام وانتَ بخير
تيمور ; موو ضروري تعرفين اصلاً
دنكت راسي ضايجه حته عيد ميلاده ماعرفه عافني وطلع من الغرفه.
كملت تسطير الملابس شفت الملابس الي مشتريهن لتيم نسخه عن ملابسه هوه كلش حلوات ابتسمت واني اباوعلهم لازم اهدي شيء بس شنوو اشتريله حته ماعرف شنوو يحب وشنوو يكرهه خلصت حياتنه نتعارك وبمشاكل ماتعرفنه علئ بعض ابد.
طفيت الاضويه ونزلت جوه رحت للمطبخ جانت آيلا تجهز بالاكل هيه واسينا.
_اممم آيلا ممكن تجين شويه
آيلا : هسه حبيبي
هزيت راسي بأي بقيت منتظرتها غسلت ايدها واجت عليه
آيلا : ها
_صدوك ليوم عيد ميلاد تيمور
آيلا : لعد متعرفين شنوو
_لأ والله
آيلا : ليوم عيد ميلاده وراح نحتفل بيه هنا بالبيت جنه ناوين نسوي برا بس تيمور ماقبل كال نسويها عائليه مانعزم هوواي عالم.
_هاا زين شنوو راح تاخذوله هدايه
آيلا : ميصير احجيلج عن هديتنه تخرب المفاجاه كلهاا ههه
_انصحيني شنوو اشتريله اني.
آيلا : ماعرف والله انتِ تعرفينه شنوو يحب وشنوو يكرهه اخذيله اكثرر شغله تعجبه
_ماعرف شنوو يحب
آيلا ; هاي شنوو غير زوجج شنوو متعرفين
_ناسيه شنوو يحب ويكرهه وحايره هسه شنوو اخذله.
آيلا : اني اكول تتصالحين وياه بهاي اليله وتراضينه علئ طريقتج احسسن هديه تكون متاكده راح تعجبه.
_شلون يعني
آيلا : يعني تجهزيله ليله حلووه شموع وكذا وتراضينه علئ طريقتج.
_ءء ءء لا موو حلووه احس موقتها حيل
آيلا : بعد بكيفج العليه كتلج اني رايحه اكمل الغده.
عافتني وراحت بلعت ريكي بتوتر ماكدر اسوي هيج تصرف بعده ضايج مني ماريد افشل روحي كدامه اكيد راح يرفضني.
طلعت من المطبخ جان كاعد بالصاله مخلي لابتوب بحضنه ويطكط بيه.
شسوي تيمور والله حاسه بالذنب اعرف روحي ظلمتك هواي وانتَ متستاهل بس صدكني متندمه علئ كلشي .
رجعت ساعدت آيلا بالغده نقلنه الاكل علئ الطاوله كعد الكل علئ السفره جنت اريد اكعد فجأه كالت ام تيمور.
جنان : هاا شكوو
_هاا
جنان : مكانج موو هنا بالمطبخ يلا
احس روحي تجمدت فشلتني كدام اخوان تيمور والكل كاعد ويباوع شمر الخاشوكه تيمور وباوع الامه وكال.
تيمور : شوكت نخلص من هل سيره احنه
جنان : انتَ موو كلت ماتكعد وياااانه شتغيررر هسه صرت حنين عليها اني ادري بيك ادري بسوالفك كله بس حجي.
تيمور : استغفرالله ياربي لازم تسممون الواحد بالاكل لازززم.
جنان : اذا تكعد وتاكل ويانه احلف علئ الاكل ماخلي بحلكي ابدد
ساهر : يوم شبيج صدك جذب
جنان : لاتدخلون كل السوته وتردون مني اتقبلها يمكن انتم تنسون بس اني لااا مستحيل سكتت برجعتها كله علمود حفيدي ولا والله ماخليها توصل للباب بس بعدد شسووي بعمك وابني الي ماياخذ رأيي.
عفتهم ورجعت للمطبخ الغصه كاتلتني كتل ماريد يتعاركون علئ طاوله الاكل خلص اكعد وحدي احسن شيء.
اسمع تيمور يحجي ويه امه بس هيه متخبله ماترضه بوجودي ابد.
كعدت علئ الكرسي واني ميته من القهر جانت اسينا تتغده
اسينا : اصبلج اكل
_لا حبيبتي ماريد اكلي انتِ الف عافيه
اسينا : الله يعافيج.
دنكت راسي باوع الاظافري واعض بشفتي حييل مقهوره احس جمره بگلبي .
بقو يتغدون شويه ودخل تيمور للمطبخ شافني كاعده سحبني من ايدي وصعد بيه فوك انصدمت شبيه شديسووي
دخلني لغرفه تيم وسد الباب باوعلي بهدوء سحب نفس وكال.
تيمور : باوعيلي اليوم حفله ماريدج تجين ابد ولاحته طلعين من الغرفه لأن راح يجون اصدقائي وخطيبتي وماريد أي مشكله ابدد لأن مالي خلك ابدد وامي اول ماتشوفج لازم تشمرلها حجايه خليج كاعده هنا مفهوم.
اختنكت بعبرتي حته تيمور ميريدني اكون وياهم واني الغبيه افكرر شنوو اهديه دنكت راسي وهزيته بأي.
تيمور : تجهزين تيم وتنطينه الامي
_تمام
بقه واكف يباوعلي سحب نفس قوي عافني وطلع من الغرفه اختنكت كلش ونزلت دموعي بصمت.
كعدت بالغرفه واني مختنكه كلش واحس الدنيا اضلمت بوجهي.
تيمور الجان يموت علئ لحظه مني صاار هسه ميهمه وضعي ابد ولايهتم لدموعي.
بقيت كاعده بالغرفه كعد تيم سويتله ممه شربته وطلعت اله حلويات خليته ياكل بقيت كاعده وياه الاعب بيه.
....
اليان : بقيت عد بيت عموو مارحت ويه اريانا احس روحي هواي دخلت بحياتهم وتيمور حيل كارهني وميردني ادخل بينهم ابتعدت عن السالفه.
رجعت ثاني يوم لبيت خالتي دكيت الباب طلعتلي خالتي ام اريانا.
_شلونج خاله
جميله : هلا يمه تفضلي ادخلي
_اريانا رجعت
جميله : اي رجعت ويه تيمور
_ويه تيمور؟
جميله : أي لبارحه متصالحين ورجعت ليوم وياه
_هاا كلش زين لعد الحمدالله خليهم يرجعون سويه.
جميله : اي والله تفضلي ادخلي ليش واكفه
_لا خاله رايحه عندي شغل غير مره اجيكم
جميله : براحتج يمه.
عفتها ورجعت استحيت ادخل لان اريانا مموجوده حرت وين اروح وشسوي احس روحي وحيده مكطوعه من شجره.
صعدت تكسي وبقيت اصفن وين اروح هسه اتصل جهازي جان آرون
_الوو
آرون : صباح الخير
_صباح النور.
آرون : شلوونج
_زينه انتَ شلونك
آرون : الحمدالله وين ماوين
_اممم والله ماعرف اريد اروح أجر شقه
آرون : شقه ليش
_لان متزاعله ويه اخواني او
آرون : هاا اي افتهمتج صدك شنوو قررتي موضوع الشغل
_اي اوك بس لازم نسافر لتركيا ارجع الاسهم واستلم الفلوس واشاركك بالشغل.
آرون : اي عادي شوكت ماتردين نسافر
_اصبرلي هل كم يوم ارتب اموري واشوفلي شقه وبعدين اسافر.
آرون : ماشي هسه شعندج
_ماعندي شيء
آرون : عازمج علئ كهوه تجين
_اممم اريد اشوفلي شقه
آرون : نروح سويه
_تمام دزيلي العنوان
آرون : انتِ اوكفي علئ صفحه واني اجيج
_ماشي
سديت الخط وكلت للسايق يوكف السياره دزيت رساله لارون علئ مكاني ماطول ربع ساعه وصلني صعدت وياه رحنه ندورلي علئ شقه.
...
بقيت كاعده ويه تيم اتصل جهازي شلته جانت اليان بلعت ريكي بخوف تيمور منعني اتواصل وياها شسوي هسه فتحت خط عليها.
_الوو
اليان : هاا اريانا صدوك رجعتي لتيمور ليوم اجيت عليكم وكلتلي خالتي رجعتي.
_اي لبارحه عمج صالحنه ورجعت
اليان : الحمدالله المهم تكونون مرتاحين
_اي انتِ وين راح تبقين.
اليان : راح أجرلي شقه
_تعالي لهنا
اليان : وين اجي اخواني ميردوني
_راح احجيلج ويه تيمور اذا قبل تعالي
اليان : لاتعبين نفسج ولاتحجين اصلاً مراح يقبل هوه بنفسه مانعهم من دخولي للبيت
_وشلوون تبقين هيج بدون بيت وملجأ اني هسه احجي وياه واذا ماقبل روحي اكعدي بيتنه بغرفتي ولاتستحين ابدد اني احجي ويه ماما اعتبري بيتج.
اليان : تمام.
_يلا راح احجي وياه وبليل احاجيج
اليان : اوك
سديت الخط وبقيت صافنه لازم احجي ويه تيمور بخصوص اليان مهما يصير تبقه اختهم وحرام عليهم يخلونها وحيده ومالها ملجأ.
عفت تيم يلعب وطلعت من الغرفه اباوع لباب غرفة تيمور متردده اروحله واحجي وياه.
رحت عليه دكيت الباب بهدوء كال تفضل دخلت للغرفه جان نازع قميصه وبس بالبنطرون وطالع جسمه هستوه طالع من الحمام. فاتح الكنتور ويختار ملابس باوعلي رفع حاجب.
تيمور : خيرر
_اممم ممكن نحجي شويه.
تيمور : بخصوص شنوو؟
_اليان
تيمور : اطلعي اريد ابدل.
_تيمور الله يخليك اسمعني
تيمور : مالي خلكج كتلج اطلعي يلااا.
_ انتَ موو هيج تيمووور لاتخلي الحقد يعمي عيونك هاي اختك حررام عليك تسوي هيج بيها خليها ترجع للبيت انسه الصاار انتَ هم أذيتها.
تيمور : هههه انتِ مكاتلج ترجع للبيت كاتلج ماعندج دعم ماعندج وحده تلعب براسج ودرسج زين اعرف سوالفج اني.
_انتَ شدتحجييي
تيمور : شوفي فكره انو ترجع اليان للبيت هاي شيليها من بالج مستحيل اخليها ترجع وتخرب كلشي اليان موو اختي لاعرفها ولاتعرفني استغلت وضعي وضعج ولعبت بينه جوبي انتِ لوو شويه عندج عقل جان افتهمتي ليش خليتج تبتعدين عنهااا هسه.
_لاتحجي هيج هيه ماسوت شيء تصرفاتك انتَ وشغلك هوه الوصلنه لهل حاله انتَ الدمرتنه تيمور انتَ مووو هيييه.
باوعلي بغضب عيونه صارت بكصته سد باب الكنتور بقوه تحسه تفلش واجه نحوي بقيت واكفه واباوعله بتركيز لزمني من ايدي بقوه ركز بعيوني بغضب وكال.
تيمور : انتِ شنووو فهمينيييي من شنوووو مصنووووعه ولج انيييي علئ منووو سويت كل هذاااا انيي دمرت رووووحي عليييج دمرت عائلتي خسرت ابوي واختي وروحي ماخلييييت شيء ماسويته عليج وانتِ باقرب فرصه بعتيني تركتيني ورحتي اريانا خليتيني وحدي ماهتميتي لوضعي وهسه جايه وتكولين انتَ الدمرتنه انييي لوو انتِ اريانااا انيييي لوووو انتِ
ايدي احسها علئ شويه تنكسر يحجي ويعصرها حييل دمعن عيوني وماعرفت شنوو اجاوبه.
تيمور : هااا شوو سكتييي ماطلع صوووتج احجي طلعيني انييي الغلطاااان كووولي هذااا غلطك انييي غلطت مَـرّھٌ وحده وهيه يووم حبيتج ودمرت روحيي عليج ماتستاهلين أي شيء ولو ما ابني قسم بالله ماباوعلج ولاحته اخليج توصلين لهناااا.
نزلت دموعي بصمت حيل جرحني بكلامه دفعت ايده عني بقيت لازمه ايدي بوجع اباوعله
تيمور : اطلعيي من غرفتي ويدر بالج ترجعين بعد عليها اطلعيييي.
_عمري ماتخيلتك هيج.
تيمور : تعودي علئ هذاا الوضع لان تيمور القديم ماات.
هزيت راسي بأي واني ابجي عفته وطلعت من الغرفه رجعت لغرفه تيم تحطمت يالله تيمور صايرر حيل يكرهني وميطيقني.
شسوي هسه شلون راح اعيش وياه وهوه يعاملني بهل اسلوب.
_شفت ابوك شيسوي بيه اني ليش عفته ليش خليته وحده من هاي تصرفاته يجرحني وميحس ابدد يخليني اتحطم وعنده عادي كلشي انتَ السبب برجعتي اله لوو مانت مجنت راح ارجعله.
كعدت علئ السرير واني ضايجه حته من ابني ضجت
صار العصر كلهاا تجهز للحفله بس اني كاعده تكول غريبه.
اجت ام تيمور علئ تيم لگيتني بعدني ممجهزنه.
جنان : ليش لحد هسه مملبسته
_هسه البسه بعد وكت ترا هسه بـ 4
جنان : الناس كلها وصلت يلا بسرعه لبسي.
سحبت نفس بقوه وكمت طلعت ملابسه لبسته ومشطت شعره خليتله عطر اخذته مني ام تيمور وطلعت من الغرفه بقيت كاعده وحدي اتصلت باليان وكلت الهاا ماقبل تيمور كالت راح تأجر شقه ماتروح لبيتنه تستحي من اخوي مسلم.
اسمع صوت الاغاني جوه والاحتفال والناس متت من الجوع الصبح ماتريكت بس شربت جاي والغده انحرمت منه بسبب ام تيمور.
اخذت جبس من حلويات تيم واكلته بقيت اباوع من البلكون دخلت رجال ونسوان كله لبسها مختلف تكول عايشين بتركيا موو بالعراق.
والله وكت صار الاحتشام قليل بهل وكت الناس بحجت الثقافه صارت تتعاري.
ضجت كلش وماعرفت شسوي بقيت اروح وارجع بالغرفه مره اباوع لجهازي مره اكعد اباوع للساعه صارت بـ 7 بليل والاحتفال بعده مستمر واصوات العالم الموجوده.
كمت علئ حيلي واني ضايجه شنوو حابسه نفسي شبيه ترا مرته وحقي اكون وياه وكدام الكل لوو عيني ميريد يزعل ست الحسن
فتحت كنتوري طلعت فستان اسود طويل بيه فتحه صغيره من الرجل والردان تلالي.
رفعت شعري شسورته وبرمت الكذله مالتي خليت مكياج وعطر.
_انزل وشيصير خلي يصير منوو هوه ويمنعني.
فتحت الباب وطلعت اسمع اصواتهم واحس مغص يصير معدتي.
خليت ايدي علئ المحجز واني متوتره بلعت ريكي بخوف سحبت نفس قووي ونزلت جوه
جانت الحفله داخل البيت هوواي عالم جايه تيمور جان واكف ويه مجموعه من الرجال ويسوالف وياهم ويضحك من نزلت اختفت ابتسامته باوعتله بخوف ونزلت راسي.
نزلت جوه وياهم شافتني آيلا اجت يمي بسرعه كرصتني من ايدي وكالت
آيلا : ههههه ولج طلعتي متخافين
_ليش اخاف اني موو مرته.
آيلا : شوفي هذيج اسيل خطيبته
باوعت الهاا حلوه بس لبسها كلش موو حلوو لابسه فستان قصير وطالع كل جسمها منه مراجلي بس عليه تيمور جا مايمنعها مخليها براحتها.
_حلوه
آيلا : أي بس تتنعوص.
_اي واضح
جنان : شعندج نزلتيييي
_حالي حالكم ام حفيدج اني لوو ناسيه.
جنان : مصدكه روحج والله لوو ما ابني جان عرفت شسوي بيج
آيلا : عمه شبيج العالم تباوعلنه.
جنان : فوكاها كاشه ونازله مدري منوو ميت عليها.
_مثل ما انتو تكشخون وتلبسون اني هم
آيلا : تعاي وياي انتِ
سحبتني من ايدي واخذتني للمطبخ فلتت ايدي منهاا واني ضايجه
آيلا : انتِ شبيج تردين تسويلج عركه بنص الحفله متشوفون العالم تباوعلكم تردون تفضحونه.
_ماشفتي شلوون تعاملني.
آيلا : حته لوو تبقه عمتج غلسي علئ كلامهاا هيه محترك كلبها علئ تيمور.
_واني شمسويه هسه بشنوو مأذيتها مليت ونزلت
بعدنه نحجي دخل تيمور للمطبخ شافته آيلا دنكت راسها وكالت
آيلا : اني طالعه.
طلعت من المطبخ درت وجهي عن تيمور اول ماطلعت آيلا اجه عليه لزمني من ايدي بقوه وركز بعيوني وكال.
تيمور : انيييي شنوو كتلج موو كتلج لاتنزلين تعانديني لوو شنووو مجاااي افهم
_عوف ايدي دتوجعني شبيك
تيمور : تعرفين الوجع الي احسه انيي لوو ماتعرفينه.
_ميهمني وضعك بعد روح لمرتك خليها تداوي جروحك بس بالاول علمها تحتشم موو مخليها بنص الزلم مصلخه.
تيمور : ههه مصلخه بس عدها مبدأ واخلاق تعرف الشرف تعرف المسؤليات تعرف شنوو الاهتمام والحب كلهن تعرفهن عكسج.
_اي زين روح عليها شجابك يمي اني موزينه ماعندي اخلاق ماعرف الاهتمام ليش واكف هنا عايف الحفله وكاعد بالمطبخ.
تيمور : تروحين هسه تصعدين للغرفه وتاخذين تيم وياج نعسان
_عرفت عن ابنك لوو هم تخجل بيه.
تيمور : اني موو مثلج احجي طك بطك ماضم شيء موو احجي كلام وثاني يوم احجي غيره.
_تدري عاجبني اكمل وياكم الحفله واتعرف علئ خطيبتك.
تيمور : يلا ليش لا اعرفج عليها امشينه.
سحبني من ايدي وطلعني من المطبخ اخذني علئ خطيبته جانت واكفه شافتنه تغيرت ملامحهاا.
تيمور : حبيبتي اسيل اعرفج ام ابني تيم.
اسيل : امم هلو شلونج
_الحمدالله
اسيل : شوكت تطلكون تيمور
تيمور : شهر واحد ونطلك
اسيل : اكيد؟
تيمور : اكيد حبيبي
اسيل : اي اوك والطفل شلون
تيمور : يبقه وياي
_منوو كال اخلي وياك اول مانطلك اخذ ابني واسافر.
باوعلي بنظرات غضب ركزت بعيونه بثقه عود يريد يحرك كلبي هيج يعني يلعب عليه بس شهر يريد ويطلكني وياخذ تيم مني
تيمور : نشوف ويه منوو يبقه.
كريم : مرحبا شباب
تيمور : اهلاً
_هلا
كريم : مرحبا اني كريم
مد ايده الي باوعله تيمور بغضب ابتسمت بهدوء وصافحته.
_كل الهلا
كريم : من اقارب تيمور لوو صديقه
_زوجته
كريمه : شنو؟
تيمور : اريانا اصعدي فوك
_ليش خلي اتعرف علئ اصدقائك.
اسيل : وليش حته تتعرفين تردين تضبطيلج واحد من هسه حته اول متطلكين تروحيله
_احترمي نفسج واحجي عدل
اسيل : محترمه نفسي كلش زين روحي علمي روحج الاحترام.
_ماعليج عتب مبينه من هذني الدايحات
اسيل : لج منوو الدايحه شوو متعرفين تحجيييين.
تيمور : اششش فضحتونه شبيكم
_ههههه شبيج صار وجهج احمر شحجيت هسه اني شايفه روحج بالمرايه منوو ضحك عليج وخلاج تطلعين بهل شكل.
اسيل : بنت ** اشك حلكج ترااا والله
_صمي حلكج واحترمي نفسج لاتخليني اسحلج هناااا
كريم : هوب هوب شبيكم يمعودات تعاركن نسوانك تيمور
تيمور : اريانا اصعدي فوووك
_ماصعد شتريد تسوي سوي ميهمني.
اسيل : انتِ تردين واحد يهينج يلا ترتاحين مووو.
_منوو يهيني انتِ ههههه والله ضحكتيني
اجت دفعتني من صدري رجعتني ليورا جان وكعت الكل انتبهه علينه وبقو يباوعون صعدت عندي العصبيه اني رجعت عليها بسرعه وضربتها راجدي قوي علئ وجهه رجعتها علئ تيمور ...
