رواية هو لا يشبههم الفصل الرابع والثلاثون بقلم تبارك الوائلي
لم أتجاوز أي شيء ، كنت
أستيقظ وأنام ، حتى تساقْط مِني الوقت
والرغبة وتجاوزتني الأشياء و لم أتجاوزها 🔕
°°°
جمانه :- رديت على كواكب .
" هلو حبيبتي كواكب شلونج شخبارج ... الحمدلله بخير.... اي عزمتني.... يا جانت يمكم هيه وحمودي وشلونه حمودي ...؟ ها زين ترحون انتو ... اي شكو بيها ....
اني هم اروح ....والله كواكب نفس الوضع ايهم ساكت واني هم ساكته وانوب نور طلعت حاجيه لعيالها ومتخبلين من سامعين .... لا كواكب نور مو صغيره ....لا بس سبحان الله ابد نور مو عليه طالعه على طبع عمتها ساره بس مليكه نفس طبعي ... اي الحمدلله ان شاءلله يارب تهدي النفوس .. الله وياج حبيبتي سلميلي على امي وماكتيلي شخبار صالح وياج هم بعده زعلان يووو يصالح خلص عمره يزعل الله يعينج عليه ....؟اي اعرف امي من يومها اصف ويا صالح وفرح مو من هسه ونوب زادو جهال صالح ادافع الهم .... ادري خيه والله ادري الله يعينج عليهم الله وياج حبيبتي ...
نهيت المكالمه ويه كواكب .
ملك : ها ست جمانه تحجين بعد لو اخذ الموبايل .
جمانه : اوكفي ولج هسه يجي عمج ولتهي ويا
اصبري هسه انطي الج خلي ادك عليه واكله على عرس ابن سوسن علمود نحضر نفسنه .
:- ياله ماما عليج الله استعجلي .
:- أي بنتي صبري .
دزيت رسائل رد عليه من اول دكه .
" هلو حبيبي .
أيهم
" هلو جنه .
" اكلك عزمتني سوسن على عرس ابنها سلام شتكول انروح .
"بكيفج حبيبتي اذا عاجبج روحي .
" ها زين ردت اتكد علمود احضر نفسي .
" ميحتاج شتحضرين انتِ كيك وحليب وميحتاج تتعبين وداعت عيونج .
" حبيبي انت عيونك الحلوة .
" اموووووت عليج جنه .
" حبيبي اني هم اموت عليك والله .
" يله عمري من اجي نحجي يمي علي واكف منتضر .
" الله وياك .
ملك : ها ماما ماكملتي مراسله .
:- اي كملت هاج مو تعرفين عمج ميقبل ادك عليه من يطلع وازم بس راسله هاج اخذي راح اروح
اسوي عشه وحضره .
:- اي اي دجيبي خلي العب بي .
جمانه :-
كملت العشه وبالي يم نور شلون احلها وياها وشلون متجي عليه والله راح اشتاق الها ياربي اهديها هي وعمها
مرت الايام و كل معتاد اني كل اسبوع اروح البيت اهلي اطلع ويه صلاة العصر و ارجع بالليل بس قبل لا اروح على اهلي امر يم عمتي ام بسام اشوفها اني والجهال خطيه ساكنه وحدها بالبيت وبالليل تقفل بابها وتروح تبات ابيت عمي ابو حسان لان نفس الفرع ومرات يم اهلي
أول منطب الها اشوفها اشلون تفرح من تشوفني خطيه والله مرات ينكسر كلبي عليها بس مابيدي شي اسوي الها مرات من تريد شي ادز الها طارق وامير يشوفها شمحتاجه يجيبون اله و يكملولها احتياجاتها كلها ، ومرات اني اروح وياهم وبعدين اطلع اروح على اهلي ساعه ساعتين و ارجع للبيت ويجي ايهم حبيبي اسويله عشه ويكد يسالني
واني احجيله من رحت وشسويت وهوه يحجي وين راح مرات احس ايهم مو بس حبيب وزوج لا صديق لان لازم يعرف تفاصيل يومي و شسويت واني هم ما ارتاح اله اساله على دوامه وهو يحجيلي حتى واجباته العسكريه اذا طلع صبيتله جاي ويجيت كعدت كال .
أيهم : جنه باجر يمكن اروح للكليه اجيب الصوره كملت مالت حفله التخرج .
جمانه : ها طلعت .
:- اي طلعت لان نشرو بلكروب .
:- هااا ...
:- ها لتباوعين هيج بعدني نفس وعدي الج مسحت الكروب كله و بعد ماعندي شي وياهم كملنه الحمدلله والشكر .
:- متأكد مسحته أيهممممم ؟
:- شبيج عمري طبي وتاكدي بنفسج .
:- لا ميحتاج .
:- بكيفج .
:- زين اشوكت تاخذ هويه المحاما .
:- وين بعد مو هسه حبي متطلع بساع ادعيلي ، ان شاء لله استلمها و امارس المحاما وره ما اطلع تقاعد.
:- الله شكد حلو ايهم تستلم قضايه كله ارامل ومطلقات وانت محترف أبو صدر الحنون ماريدك تقصر وياهن.
ضحك بصوت من كل كلبه وكال.
أيهم : هههههههه انعل بليسج صدك ضحكتيني والج ليش هيج ماخذه نضره عني لان مرح واشاقه والله العظيم مالي علاقه بااي وحده يشهد ربي عليه وداعت روزه الي عندي اعز من روحي ماعندي شي بس اني هيج طبعي اشاقه وعندي انتِ مكفيتني
وموفيتني تارسه عيوني جنه انتِ عشقي معقوله ادور غيرج اله نعميت بعيوني وماشوف كون .
:- لا اسم الله على عيونك حبيبي والله العظيم اعرف بيك واثقه منك بس النسوان ماواثقه بيهن واخاف عليك من ضعيفات النفوس.
:- لا امني محد. تاخذني منج لان كلبي مقفول بقفل ومشمور مفتاحه بحر .
:- صدك هيج تحبني ايهم .
:- واكثر متصورين .
:- لا اني اكثر .
:- لا حبيبتي اني اكثر .
:- الله اليعلم بالكلوب شوف اني كاتبه على رقمك النفس مالي .
:- بعد انتِ جنه أيهم كلشي اتوقع منج ، وشوفي اني شكاتب دكي عليه داشوفج .
اني هم مكان باطل راسا دكيت كال .
:- شوفي ؟
باوعت مكتوب حبيبه عمري .
ضحكت وكتله
:- غير اني طبعاً تكتب هيج .
:- شلون ما اكتب على نبضي وروحي انتِ تستاهلين كلشي .
ابتسمت بحب ورضه وكتله برجاء .
:- ايهم اسمعني فدوه .
:- بله متكملين لان اعرف شراح تكولين جمانه ديري بالج تستغلين حبي الج على الغلط .
:- اني ايهم استغل حبك .
نزلن دموعي بدون سابق آنذار باوعي واستغفر
وكال .
:- لج بابا شكو تبجين اني شكلت هسه .
:- بس اني مو ستغلاليه ايهم نور بنتي و والله مشتاقه الها هواي صار شهرين ماشايفتها صح غلطت عقل طفله سامحها الخاطري .
:- انتِ تعرفين خاطرج عندي بس مو على حساب كرامتي جمانه بنتج غلطت وخليها تتحمل غلطها راح اطب انام نعست ورايه دوام .
باوعت وراه وهو طب جوه ضايج ، ياربي ايهم قافل اشلون بي كمت طفيت البلازمه والاضويه ورحت يم الجهال لكيت طارق وامير وروزه يلعبون بالمبايلات بس مليكه متحبه هوايه تحب تباوع على زي الوان اتابع مسلسلات هنديه ومن يخلص مسلسها تصير
بـ 12 اطفي وتنام كلتلهم .
:- يله ماما راح اروح انام نعست اذا تردون شي دكو الباب وماريد صوت .
عفتهم ورحت بالغرفه لكيته يحجي بالمبايل ويا ابن عمه عفته كمل باوع عليه اجيت نمت بحضنه ياربي اشكد احس بالامان بحضنه اتمنى العمر كله ما انحرم منه كتله .
:- ايهم لتزعل والله مو قصدي ازعلك .
أيهم : جمانه انتِ حقج نور بنتج خابريها خلي تجيج من اني بالدوام وشوفيها .
فرحت بداخلي هل انسان صعب اوصفه يعني ضغط على نفسه وافق على طبه نور كتله بفرح .
:- ان شاءلله .
نمت من التفكير وثاني يوم دكيت على نور وكلتلها تجي بالاول ماقبلت فوك ماهيه غلطانه هيه تصير
ام الراهي رزلتها بطريقه مؤدبه بعدين كالت .
نور
" ماما اني ماريد اشوف عمي ايهم .
" ليش والج تعالي واعتذري منه وتعرفي كلش زين انتِ كلبه طيب .
نور
" الله كريم ماما .
ثاني يوم اجتي نور وجان ايهم خفر بايت بالدوام كلنه فرحنه بجيتها كعدت تحجيلي و بشرتني طالع بيها بنوته وفرحت الها وكعد طارق يلومها واني احجي عليها هيه غلطانه وكلنالها الصبح من يجي عمج راضي وفضي السالفه كالت .
نور
" اي ماما أن شاء الله راضي هيه ساعه شيطانيه صارت .
ثاني يوم اجه الصبح ايهم بوجها طب يريد ينام كعدت نور كلتلها .
:- كومي ماما ، روحي رضي عمج قبل لا ينام .
نور : ماما اني ماكدرت احجي كدام طارق أخاف
يرزلني بس تره عيالي محلفيني بالقران ماحجي
ويا عمي واخاف من الحلفان اني وكلت هسه بس
احجي يبقه طارق يحجي ويلوم بيه لان حجيت .
جمانه : ولجججج ليش هيج تسوين انتِ كبرتي السالفه ورحتي وحجيتي لعيالج وفوك كل هذا يدخلين تره همه مالهم اي حق انتِ بتنه تعاركتين وتتراضين شعليهم همه .
نور : ماكدر يمه والله محلفيني .
:- خوش لعد اني اعرف اشلون اتصرف وياهم .
:- ماما فدوه ماريد يعرف عمو وتصير مشكله اني ماكدر اعوف عباس احبه ماما وهوه يحبني ويحترمني مالي علاقه باهله .
:- بس هيج غلط شنو تخليهم يدخلون بااهلج .
:- ميخالف عباس وعدني يراضي عمي ايهم وابو.
:- والله عمج ابو عباس الحاله زعلان هوه شعلي شايف عمج بالسوك ومامسلم عليه شعليه هوه بسوالف العوائل .
:- ميخالف ماما هسه راح اروح وان شاء الله الجيه الجايه اراضي عمو .
خابرت حماها شويه و سلمت عليه وراحت اجاه حماه الصغير يوكف باللباب ميطب علينه راحت و قفلت الباب وراها رجعتت طبيت بالغرفه لكيت ايهم نايم وغاط بنوم ، كلت الحمدلله محس علينه ، راح اكله جتي نور ولكتك نايم واني كلتلها تعبان عوفي شسوي مضطره اجذب جذبه بيضه ماريد يزعل
العصر كعد ايهم وكت الغده اجه غسل ونشف وجها وكال .
:- ها شلونها نور اخبارها ويا عيالها .
:- الحمدلله بخير حبيبي رادت تجي تعتذر منك وتراضيك بس انت جنت نايم .
:- اي والله جمانه حيل تعبت البارحه بالليل جنت طالع واجب ومانمت .
:- الله يساعدك ، نور تكول الحمدلله زينه .
:- الحمدلله من زينه ومرتاحه يمهم شريد قابل احنه .
:- اي والله .
صفنت ويه نفسي ، ايهم زعلان منها ويسال عليها وعلى خبارها وهيه متريد تراضي ياربي لتخليني محتاره بينهم وحلها انت من عندك
ثاني راح يوم ايهم وجاب الصوره مالت التخرج مالته حيل حلوه اتفقنه انعلكها بالاستقبال كال .
:- ان شاءلله اجيب صديقي يسويها بالدريل ماريد بسمار اني بالحايط .
اجه طارق فرحان بعمه وكال .
طارق : الف مبروك محامينه ، بطل انت عمو ايد اتقاتل الوطن وايد ادافع عن الناس .
ضحك أيهم وكال .
:- والله عليك سوالف طارق .
طارق: اي شغلتين بان واحد .
:- لا حبيبي ماشتغل هسه اله اطلع تقاعد بعد تفيدني اشتغل بيها قضايه ارهاب واجرام ومخدرات ابقى نفس اختصاص شغلي .
:- ان شاءلله عمو .
:- حبيبي طارق .
كاعدين نسولف ونضحك ودك موبايل ايهم كتله منو اشرلي كال طيبه رد عليها شويه وطفر صاح بصوت مفزوع .
أيهم : لا لله اله الله ،صدك اشلون الله يرحمه ، أي اي جايج اشلون لعد خويه ما اجيج .
قفله وكام على السريع يريد يلبس كتله .
جمانه : خير ايهم شكو ؟
:- زوج طيبه توفه .
:- يااا .... الله يرحمه خطيه هو من زمان مريض .
:- كومي بدلي نراح .
:- أي أي بس خلي ادك على فرح اشوفها اتروح ويانه هيه وعمتي خطيه منو ياخذها .
:- كملي جمانه بساع .
رحت عالسريع كملت لبسنه وطلعنه وراحت عمتي وفرح ويانه ورحنه على طيبه حالتها حاله معفناها ولا لحضه رحنه وياها للدفنه ودفنا زوجها ورجعنه وبقت عمتي وطارق يم طيبه ثاني يوم رحنه اني وايهم وفرح ومليكه وروزه للفاتحه لكيت زينه وساره والكل هناك سلمنه وعزيناهم ايهم راح بالقاعه يم الزلم وكل عمام ايهم اجوي للفاتحه علمود يعزون ايهم حتى شيخهم العام اجه وعيال طيبه متفاجين من الناس الي جايه تعزي ايهم بحيث كلساع جايات سائلات طيبه منو ذول ومتفاجأين من العالم الاجتهم
رجعنه للبيت طيبه دكت تحجي الايهم وتكله .
" والله ورفعت راسي كدام اعيالي انت واكف يومين بالفاتحه وهاي الناس الي جايتك شنو منين .
ايهم .
" شلون لعد ميجون طيبه تره اخوج عنده هواي معارف وكلهم الي اجوني اني مواصلهم .
طيبه
" والله وعفيه عليك انت رفعت راسنه خويه .
أيهم
" هسه عوفينه من هل حجي انتِ شراح تسوين فهميني .
طيبه
" راح ابقه للسبعه ابيتي والبنات يمي كلهن وامي
هم موجوده بعدها راح اجمع غراضي و ارجع اعيش يم امي قابل شسوي .
أيهم
" اي احسن هم ونس ويه امج ليش بعد تروح تبات بيت خوالج تبقون بعد تباتون سوه وحده تواسي الثانيه وهم شتحتاجون اني موجود و احنه هم نجيكم ومن قصر وياكم .
طيبه
" والله ماعرف شكلك يا خويه ربي يحفضكم ويخليك .
" طارق وين .
" هذا خطيه يمنه كاعد يمي .
" كليله عمك راح يتصل عليك يله باي .
" الله وياك .
دك ايهم عليه شويه ورد طارق .
أيهم
"ها بابا طارق .
طارق
" ها عمو محتاج شي .
" لا ابني بس لتطلع بالشارع وابقه يم بيبيتك وعماتك زين حبيبي .
" اي عمو صار .
" عفيه ابني اشوكت تجون .
طارق
" ان شاء الله عكب باجر لكينه سياره اشيلهم
و ارجع وياهم .
أيهم
" عفيه عليك يله ابني سلمنه .
" الله يسلمك عمو .
جمانه
:- مسكينه طيبه استمر زواجها 8 سنوات وكل شي ماحصلت حتى طفل ماخلفت جان شال كبرته حبيبتي ربنه ماقسم اله خفله قابل اشبيدنه عليها
راح تكعد يم امها وتسكت شسوي قابل .
أيهم : اي والله مسكينه مشافت شي .
جمانه :-
وبعد كم يوم اجتي طيبه هيه وساره وعمتي بس
زينه راجعه البيتها بكربلاء ساره اجتي وياهم دكت عليه وكالت .
ساره
" عفيه جمانه تكدرين تجين ساعدينه بتعزيل البيت.
جمانه
" اي ليش لا هسه اجي .
سديته منها واخذت البنات ورحت وياهم نضفت البيت وعزلته كله ورجعت العصر وساره راحت البيتها وبقت طيبه وعمتي سوه بالبيت لاحضت عمتي حيل فرحت من اجتي طيبه وعاشت يمها
رجعت تعبانه طبينه سبحنه اني والجهال وكعدت احضر العشه اجه ايهم كال .
أيهم : ها ست جمانه عايفتني ولا سالتي اكلت شربت لا ، شكو احتركت الدنيا علمود طيبه عفتيني .
جمانه : هلو حبيبي شلونك والله شتاقيتلك .
حجه مستهزء .
:- والله ؟ ولج رجعت للبيت الضهر ولا ينطب بدونكم
ابتسمت وحضنته صاح على روز .
:- والج روزه تعالي اشلون تعوفين ابوج وترحين .
:- بابا اني ليش غير ماما اخذتنه ورحنه ساعدنه عماتي .
شال روزه يبوس بيها ويدغدغها وهيه تضحك فرحانه ،
كعدنه تعشينه سوه كملنه وكلمن راح بفراشه .
ومرت الايام
وصار السابع مال زوج طيبه رحت طبخت الطيبه وسويت السابع مالت زوجها وكمت كل خميس اسويله ثواب خمس جمع اطبخهن ابيتي واوديهن الها وابقه اتعشه يمهم وادز موري يودي البيت خالته صينيه والبيت جده والبيت ابو حسان صرت كل خميس اروح على طيبه وعمتي ومن اكمل الها الثواب اغسل المواعين واطلع اروح امر على اهلي اشوفهم ساعه و ارجع رحت طبيت الاهلي ولزمتني كواكب كالت .
كواكب :- عيني ست جوجو من وره ثواب طيبه كمنه منشوفج .
جمانه : لا والله مو دااجي عليكم وره العشه شسوي كواكب خطيه متكدر وهيه ادزلي كل اربعاء المسواك باايد امير واطبخه الها الخميس .
كواكب : خطيه الله ميضيع تعبج ويجعله بميزان حسناتج .
:- امين يارب العالمين .
مرت الايام
وصار يوم الاربعين وراحت طيبه يم اختها بكربلاء
وسوو هناك الثواب وزارت قبر زوجها ومرت الايام وصارت طيبه تجينه كل فتره تبقه للعصر وتروح بس ساره وزينه لسه همه وايهم ميتحاجون .
وبيوم اجتي نور خطار شافت ايهم هو سكت محجه شي هيه راسا دمعت عينها وراحت عليه بوسته وراضته وهو هم سامحها ومفشلها الحمدلله ياربي من تراضت نور وايهم وكامت تجي يمي تبقه اسبوع ترتاح علمود حملها حيل صعب ، طبت نور بشهر السادس وحيل خايفه عليها ياربي تكوم بالسلامه
بعد فتره سمعنه طيبه كامت تطلع وتفتر بالسوك
بكل وقت وصار منو يجي أو يخابر ينتقدها
جمانه: يا عيني ليش تضوج معليك بيها .
أيهم : جمانه شلون معليه بيها تنحسب عليه عوفني خل اخابرها اشوفها .
دك عليها أيهم ردت وهو هم جاوب باعصاب .
" لج طيبه اشلون طالعه وحتى عده مالازمه على زوجج مو عيب تره انت مو صغيره حتى أكبر مني .
طيبه
" ليش هيج تحجي ايهم مو عيب عليك تدخل شعليك انت بيه مالك دخل اطلع اطب ومالزم عده شعليك انت ، .
أيهم
" استغفر الله العظيم شحجي وياج انتِ وحده حرامات المعاتب بيها .
طيبه
" اي اذا تريد عادي تبره مني ولتجيني اصلا ، .
أيهم :
" والله العظيم عمرج ماحسبتيني اخوج ابد بس وكت مصلحتج بس شكلج بعد المهم ، شوفي طيبه والله اذا شوفج طالعه بالشارع لو متصرفه تصرف غلط اله اكسر رجلج واخليج كاعده بالبيت .
طيبه
" يااا صدك متستحي عيب عليك هيج انت هواي تجاوزت .
طبك المبايل معصب منها كتله .
جمانه : على كيفك حبيبي اشبيك مو تعرف بسوالف طيبه انت .
:- كافي جمانه هاي وحده متستحي والله العضيم.
:- عوفها حبيبي معليك بعد انت هيه تعرف مصلحتها .
مرت الايام و صار ايهم ميحجي ويا طيبه وماجتي بعد علينه ابد وايهم منعني اروح عليها بس من اروح على الاهلي امر على عمتي من الباب اسلم و اروح لاهلي وبعد فتره سمعنه طيبه طالعه الها ورمه بصدرها وشايلتها بعمليه و كعدت قنعت ايهم وقبل اروح عليها واخذت الجهال ورحت عليها تحمدت بالسلامه الها
بعد فتره سمعنه طالع الزرع مالتها وطلع مرض خبيث عدها ولازم اتشيل صدره ، نقهرنه حيل عليها و كعدنه اني وجهالي نبجي عليها مهما صار تبقى عشره عمر اني وياها وتبقى عمه اطفالي
عرف ايهم بيها ونقهر عليها اتصل عليها وحجه وياها
وكللها .
" خويه لتخافين صيري سبعه وهذا امر ربج متخوف العمليه اني وياج بكل خطوه اي شي تحتاجي اني وياج وما اعوفج .
طيبه
" تسلم متقصر اعرفك كلبك جبير وكد كلمتك .
مرت الايام
وكلنه منتضرين يوم عمليه طيبه طارق حبيبي يبجي عليها كلهم جهالي يبجون عليها نور سمعت
تخبلت عليها و اجتي شافتها وسلمت عليها قبل العمليه رتبنه وضعنه حتى نروح ويا طيبه للعمليه
و تفاجات بيوم من كالت طيبه .
طيبه : جمانه اريد اكلج شغله بس مستحيه منج .
جمانه : لا حبيبتي كولي اشبيج .
طيبه : جمانه ماريد ايهم ولا طارق بعمليتي يحضرون عفيه .
:- ليش طيبه .
:- فدوه لتكليلهم باجر عمليتي مو ساره وزينه يحضرن وميردن يشوفن ايهم .
:- زين افتهمت أيهم لان ميحجن ويا زينه وساره
، زين طارق ابني ليش متردي .
:- جمانه تذكرين قبل شهر انت اكيد تعرفين من خابرت طارق من اجه واحد خطبني وهوه ماقبل وتعارك ويايه وكف بطريق نصيبي لهذا السبب
ماريده يجي وزعلانه عليه حيل .
جمانه : بس طيبه طارق اجاج وسلم عليج وحليتوها .
طيبه : اي بس بعدني زعلانه وحتى ايهم ماريده .
:- هاي هيه براحتج مراح ماكول الهم .
:- اي عفيه .
كعدت يمهم شويه و صافنه معقوله هيج كلبها شايل على ايهم صدك كلام ايهم من كال عمرهن ماحبني ابد ويشوفني ابن ضره امهن وماراح يتقبلتي ابد جملها شافن اخوهن مات وزوجتج وربيت ولده وكرهني بالزايد ، ايييي يا أيهم طلع كلامك كله صحيح الحقد يعمي الكلب ، معقوله اكو هيج ناس تفكر استغفرالله ربي واتوب اليك الله يشافيها رجعت للبيت و اجوي بالليل ايهم وطارق سالواني
لان هم يعرفون باجر موعد العمليه كتله .
:- لا خطيه اجلوها بعد مو هسه .
ماردتهم ينقهرون من كلامها وهيه اشلون تفكر سكت
وهم صدكو بس اخ ايهم شقنعه راح اتصل عليها
وسالها واسمعها تكله .
" اي اجلوها بعد مو هسه .
اني ساكته اشلون عليها افكار طيبه و لا تغيرت بعد كل الي مر بحياتها الله يهديها كعدت الصبح وراح ايهم للدوام ودكيت على طبيبه وكلبي عليها .
" ها طيبه شلونج .
:- الحمدلله .
" رحتي للمستشفى .
" لا بعد. نص ساعه واطلع .
" الله يوكفلج صيري سبعه طيبه واقري المعوذات قبل العمليه .
" ان شاءلله تسلمين على السؤال .
سديته منها وكعدت بجيت من كل كلبي يارب شافيها خطيه مالها احد ، رحت طبخت وكملت وبالي يمها كملت دكيت وردت عليه ساره .
" ها بشري شلونها طيبه .
ساره
" رجعنه للبيت لان ماقبلو اله احد. قريب عليها يوقع على عمليتها وماقبلو بتوقيعنه احنه .
جمانه
" يااا ورجعتن من صدك تحجن انتِ
" اي شنسوي لعد. خالي ابو حسان ماقبل يجي يكول هاي مسوليه وماكدر .
" يااا والج ليش كل هل عناد عدجن بس كليلي ليش مادكيتن على ايهم اخوها جان وقع وسوت العمليه معقوله هيج كلوبجن حجر والج هذا مرض يركض بجسمها ماخفتي على اختج.
" اني ليش جمانه شعليه هيه ماقبلت .
سمعت طيبه تكلها
طيبه
" اي انتِ كتيلي ماداريج ولا اجي اذا اجه ايهم .
جمانه " ياااعززز بعيونج على هل صلافه شنو انتن صدك متستحن وقفلت المبايل واني ارجف وابجي معقوله هيج يفكرن ياربي سترك من هل الناس القايسه كلوبها اجه ايهم تغدينه اني والجهال ولزمت المبايل اكلب وشفت طيبه منزله منشور بالحاله مالت الواتساب وكاتبه
( منين اتجيب اخ الي ماعدها احد ويتيمه وماعده اخ تبقى ضايعه ، )
وحاطه صوره بسام صدك نار شتعلت بكلبي راسا دكيت عليها وحجيت بعصبية .
" طيبه مو عيب هيج تنشرين ليش مو كلنه وكفنه وياج وانتِ ماردتي احد وكلتي لتخليهم يجون .
انفعلت وحجيت بصوت مسموع ، سمعني ايهم
اجه متفاجا كال .
:- شكو اشبيج تصيحين .
جمانه :-
مرديت عليه بس بقيت احجي ويه طيبه افتهم من كلامي وعصب حيل سحب المبايل من ايدي وكال .
أيهم : هاااا ... هيج طيبه يعني اليوم عمليتج وماكلتي النه وماجلتها لان محد موقع الج مو ليش مو اخوج موجود ليش هيج تسوين ليش تفرقن انتن فهمني ليششششش .
اجه صوته ساره واضح اخذت منها المبايل وكالت بكل جساره .
ساره
" انت مو اخونه زين لتكول اخوجن احنه منريدك
يا اخي منريدك شنو لزكه انت .
اباوع ايهم مصدوم من كلامها رجعت طيبه تحجي
طيبه
" لا ايهم هيه ماقبلت تكول اني وايهم منتحاجه تره ماجي عليج واداريج وانت تعرف ....
قاطع كلامها ايهم وكال .
أيهم
" كافي كافي طيبه ررررررحمه الابوج كافي ماررررريد اسمع شي ماكلج غير اني سويت كل هذا ومتاكد انتن متحبني بس الخاطر ابويه حتى بكبره خاف يكول ماوكفت الاختك روحييي الله يشافيج
بس هم ارجع واكلج اني موجود اذا حتاجيتي توقيعي .
سدا بوجهن واني كعدت ابجي مقهوره كال بصوت مبحوح واضح القهر بي.
:- كافي جمانه ماله داعي البجي مو كتلج قبل واعيدها هسه خواتي عمرهن ماحبني .
اجه طارق وكال .
طارق : كافي ماما هاي دزيت رساله العماتي كلهن
وحتى حضرتهن وماله داعي بعد احجي وياهن وكتلهن الي ميريد يحن على عمي ماريده ابد .
أيهم : ليش ابني هيج تسوي .
طارق : لا عمو ابد ماقبل اي احد هيه يتصرف وياك
انت بمقام ابويه ، اني ماعندي بعد عمات كلهن ماتن وحتى بيت بيبي ماطبه بعد .
جمانه :-
مقبلت على تصرف طارق بس هو مو صغير ابني صار أطول مني كبر وكام يفرق بين الصح والخطاء ،
مرت الايام
مر سبوع و صار السبوع الثاني وسمعنه طيبه رايحه الهاجر زوجت اسامه ومقنعه اسامه يجي يوقع عله العمليه بعتباره ابن خالها ورايح اسامه وياهم موقع وسوت العمليه ايهم دك على صديقه يداوم
بلـ مستشفى وسال على طيبه وكله كملت العمليه وعمليتها زينه
طلب منه أيهم ، اذا تحتاج اي شي يخابره
صفنت عليه شنو من انسان هذا معقوله كل السونه بي و بعده يسال عليهن بحياتي ماشفت مثل كلبك ايهم ابد اني ساكته ومحجيت لان صدك. بداخلي مقهوره عليه
ومر كم يوم ودكت امي تسالني .
ام صالح
" اكلج يمه جمانه صح ايهم موصي صديقه بالمستشفى على طيبه .
" اي اشمدريج انتِ بهذا الحجي .
ام صالح
" مو دكيت . اسال عليها وتحمدتلها بسلامه وكالت جاي ولد يشتغل بالمستشفى وكايللها محتاجه شي تردين شي اخوج ابو دينا وصانه عليج .
جمانه
" اي يوم صح وصه عليها ،.
ام صالح
" زين يسوي والله يايمه مسكينه هاي .
جمانه
" اي الله يشافيها .
مر شهر ونص وعادت طيبه الزرع وطلع تحليلها نضيف الحمدلله والشكر بعد شهرين سمعت عمتي حيل مو زينه ومريضه واني ماحجي وياهن من على كلامهن على ايهم زعلت منهن اني وبعد ماتواصلت وياهن ابد
بقيت الوب على عمتي حيل رغم كل الي شفته يمهم بس احبها العمتي حيل دكيت على طارق جان طالع كتله .
" ماما روح المستشفى على بيبيتك مريضه حيل
موزينه .
" اي ماما صار هو سمعت وراح اروح عليها .
راح طارق واني كل اشويه ادك عليه اطمأن
طارق
" الحمدلله زينه ماما راح انطلعها .
" ها زين .
رحت وكفت على راس أيهم وكمت اروح يمنه واجي يسره مل من حركتي وكال .
:- خيررررر جمانه شبيج .
اجيت كعدت بصفه باوعتله بحزن وكتله
:- ايهم اريد اروح اشوف عمتي .
:- روحي عمري ما امنعج .
حضرت ولبست حتى اروح عليها و عرفت من اهلي هم متخربطه وماخذته ساره وطيبه لدكتورها بالجمله العصبيه ، خليتهم يجون ورحت بالليل وره العشه وشفتها جانت حيل تعبانه خطيه وطبت فرح وكواكب والجهال وكلنه يمها كاعدين لكيت زينه مسويه الها تشريب توكلها وهي ماقبلت تاكل كالت .
ام بسام: ماريد ماشتهي .
اخذته اني من ايد زينه وكعدت امرد الثريد واوكلها وكلتلها بابتسامه .
جمانه :ياله عمه يله اكلي بس هاي عفيه بسبعه .
كامت تضحك زينه وكالت .
زينه: ها يمه من ايد جمانه اكلتي مو واحنه متقبلين منه .
كامت تضحك وكلنه ضحكنه على ضحكتها فرح
كعدت اشاقيها وكالت الها .
فرح :- ها عمه اخاف تردين رجل كولي نزوجج لتستحين .
ضحكت فرحانه بلمتنه يمها وكلنه ضحكنه
طيبه وساره يباوعن عليه من جوه الجوه واني ولا باوعت عليهن ولا عبرتهن .
طب عمي ابو هدى وابو حسان هم كعدو يسولفون وياها تحجي بس حيل تعبانه ومنتهيه خطيه ،
شويه وطلعت اني وفرح وكواكب راحن البيتهن واني كتله الطارق .
:- ها طارق شبيك .
شفته يحوص كال .
طارق :- ماما راح ابقه متشوفين بيبيتي مجلبه بيه
خليني يمها .
:- ها زين لعد ابقه واني رايحه للبيت .
:- ماشي يمه براحتج .
رحت للبيت طبيت بس الجهال شويه واجه ايهم كال .
:- ها حبيبتي اشلونها عمتج .
:- والله ايهم تعبانه حيل .
:- الله يشافيها شبيها مكالو .
:- والله فجاءه وكعت مسكينه ، مادري بعد بس كلام الدكتور ميبشر بخير .
:- الله يشافيه المسكينه .
رحنه كلمن بفراشه الجهال طبو بغرفتهم واحنه هم طبينه تمددنه باوع عليه وكال .
أيهم : صدك وين ابنج .
:- بقه يم بيبيته خطيه جلبت بي .
:- ها يعني يبات يمها شنو .
:- لا كال من تنام اجي .
:- خوش اني تعبان حيل ورايه كعده راح انام جنه وانتِ انتضري طارق وقفلي الباب .
:- صار حبيبي نام انت رحت كعدت بالصاله نامت روزه بقه امير ومليكه طلعو يمي .
امير : ماما .
؛- ها حبيبي .
أمير : اني باجر اغيب من المدرسه .
:- ليش ماما ؟
:- لان اريد اروح الصبح اشوف بيبي عفيه ماما
خلي اغيب ولتكولين العمو ايهم ولا طارق اني غبت .
باوعت عليه وهوه عيونه مدمعه كتله .
:- صار حبيبي نام هسه من وكت واني باجر اخليك تغيب وروح عليها شوفها .
راح نام وفرح حيل دكيت على طارق رد كال .
" ها ماما
"ها حبيبي اشونها بيبي .
" والله زينه هاي تسمعج كل ماريد اجي متقبل
مجلبه بيه حاضنتني وتبوسني.
" ياا خطيه لعد ابقه يمها ماما من تشوفها تنام تعال منتضرتك .
" اي ماما .
كعدت و بقيت خايفه حيل على عمتي ربي شافيها صارت بلـ 11ونص اجه طارق قفلت البوب .
:- ها ماما بشر .
:- والله هسه نامت وعفتها واجيت .
:- ها خطيه الله يشافيها .
:- امين يارب .
:- ابني لتسهر على المبايل .
:- اي ماما .
:- خلي اروح ادك على زينه .
:- يمه شفتي طيبه وساره عبالهن احجي وياهن
اني هم ابد ما حجيت وياهن بس ويا عمتي زينه عبالهن نسيت اسون ذاك اليوم .
:- ميخالف عوفهن ماما الله يجازي .
رحت دكيت طلعت بت زينه .
"ها حبيبتي بيبي اشلونها بيبي.
" نايمه عمه .
" ها خطيه .
" اي والله بس اني كاعده يمها ماماوخالاتي هم نامن وصني عليها لان راح اسهر .
" اي حبيبتي ديربالج عليها .
" عمه عفيه اريد احجي ويا مليكه انطينياها .
" اي حبيبتي هسه انطيج مليكه بس شوفي بيبي تتنفس .
" اي عمه تتنفس .
" ها الحمدلله هاج مليكه احجي وياها بس كل شويه اساليها تشوف بيبي .
ملك :- اي ماما صار .
:- راح روح انام نعست .
عفتها و رحت غفيت عشر دقايق اجتي مليكه دكت الباب وكعدتني كالت .
:- ماما تعالي .
:- خير شكو ولج
كلبي وجعني وجع مو طبيعي خفت حيل كالت .
:- ماما شفت طارق يلبس على السريع .
رحت اركض شفت طارق مبدل يريد يطلع سالته .
:- هاااا شكو .
:- ماما بيبي متخربطه وناقليها بالاسعاف هسه خالي دك عليه وراح اروح عليها للمستشفى .
:- هسه تروح ؟
؛- اي ماما اروح .
:- خوش لعد دك عليه اول متوصل عفيه .
طلع طارق و دكيت على بت اخويه سالتها .
" تبارك لعد وين كواكب دريتو عمتي تخربطت .
تبارك
" اي وابوبه وامي راحو وياها بالاسعاف ولحكوهم زينه وساره .
سديته و بقيت الوب دكيت على طارق انطاني رفض رجع دك رديت اجاني صوته تعبان ومبحوح كال .
" ماما تسمعيني .
" اي ماما اسمعك شلونها بيبي .
كال
" ماما توفت بيبي .
إلى هنا نختم بارت اليوم
طبعا بنات ماعرف شنو الخلل الصار بحيث نشرت البارت ونحذف كله ورجعت من جديد كتبته
المهم علقو وأنطوني ارائكم تعرفوني اموت على تعليقاتكم الي تخبل ولتنسون متابعه الحساب والتصويت تحياتي
عندي خبر الكم احتمال راح اتوقف بمحرم واغيب عليكم وارجعلكم بعد محرم
