رواية تحت ظل السعف الفصل الخامس والثلاثون بقلم ميار
ابوي الشال يا هالناس
مو شايل شخص عادي
والله لو يصح تبديل
ابدله وشرط بأولادي
وجعكم ماكل الدلال
وجعكم ماكل افادي
ـــــــــــــــــ♕ـــــــــــــــــ
رباب:: انصدمنا كلنه من صار بوجهه عمي جاسم
ابوي وگف حتى ما عرف شتصرف وعمي حضن ابوي
ويضرب على جفته وابوي على وكفته كوه رفع ايده
وسلم ورحاب ركضت گبل على ابوها حضنته تبجي
وهو مسح على جتفها وگاللها
جاسم:: اشش يلا يابه عليش تبجين
محمد:: جاسم شجابك وين جنت ما تگولي
ما خلينه ديره تعتب علينه ولدك لا ليلهم ليل
ولا نهارهم نهار ثلث اشهر يفترون يردون ولو
شي يطمنهم عليك.
-هو انزعج وزمخ بابوب
جاسم:: اوووه محمد مو وكتها هسه شني اظل
واكف بالباب ما نطببنه تره حتى عشه ما متعشي.
رباب:: ظلو ابوي واخوتي واحد يدحك بوجه الثاني
ويا ما راح يدخل يلا انتبهنه لمره واكفه وره وهاي
صدمه ثانيه صد ابوي عليه وگال
محمد:: جاسم هااي منوو
-سكتت والتفت عليها ، وباقي الموجودين التفتوا وياه. اللحظه محد حچى، الصدمة بوجعونا كلنه .
وظلينا ندحك باستغراب، وهي واگفة ورا عمي جاسم، حاطة إيدها على طرف عبايتها وملامحها تبين المستحاه والخجل.
دار على ابوي وگاله
جاسم:: شبيكم؟ ليش هيج ادحگون؟
جاسم:: شبيكم؟ ليش هيج ادحگون؟
-دحكت عليه رحاب وبعدين رجعت عينها على المره، وأبوي عگد حواجبه مستغرب.
محمد:: جاسم... هاي منو؟
-التفتلها عمي جاسم وابتسم ابتسامة خفيفة، وكأنه مستوعب سبب صدمتنه.
جاسم:: لا تخافون، مو سالفة. هاي رفيچة دربي بهل الغربة كلها.
رباب:: ظلينا ساكتين ندحك يكمل حچيه، وحتى أخوتي مصدومين وصارت عيونهم كلها عليه وهو عمي ولا عبالك گاللهم
جاسم:: بعدين أحچيلكم كلشي بالتفصيل، هسه خلونه نفوت للبيت بالاول. تعبان من السفر وجوعان، وأنتم عندكم جثير أسئلة أعرف
رباب:: طببه ابوي والمره امي تلكتها تسالمت
وياها وطببتها للاستقبال وحسين وكف يحاجي
رحاب اسمعه يكوللها.
حسين:: اصبري هسه خلي نفتهم ابوي هو
گال اكولج لا تحجين لاهلج هسه خلي نفتهم
منو هاي وين جان واندز على الولد وامج هي
مريضه
رحاب:: بس شفت حسين ابوي ولا اهتملي
حسين:: وما اخاف البنات يسمعنه ولا جان
عرفت شگول هسه عليش مهتمتله اني اهتم
الج ولعيونج والشفايفج ولكل شي بيج من فدووه لهلوجه الگمر.
رباب:: ضحكنه خنك وريناج من يمها تغمهم
كملنا صينتهم واخذها حسين وظلينه بالمطبخ
ننتظر يكملون ربع ساعة وجابو الصينيه و ودو الجاي واحنه ركضنه نتصنت يم الباب واني ورحاب
نتهامس تالي ندستنه ريتاج سكتتنه امرنه لله
ريتاج:: واكفه اريد اسمع وهذن جنهن ذبان فوك
راسي ندستهن سكتن توه مديت راسي واسمع
ابوي گال
محمد:: ام وسام اخذ خطارج خلي ترتاح
امنه:: اي تأمر تفضلي خيتي
ريتاج:: شهكت حاطه ايدي على حلگي من
سمعت لهجتها
-تسلمي
ريتاج:: ركضنه من باب الكليدور للحوش بين ما يطلعن صديت عليهن كتلهن.. ولجن يمكن سوريه
رحاب:: عزززا بعينا ولج منين جابها هاي انوب
رباب:: اصبرن خلي نفتهم امشن نتصنت
ريتاج:: هزيت راسي وركضت وكفنا نتصنت ونسمع
ابوي يحجي بعصبيه گاله
محمد:: صدك تحجي جاسمم هااي المرره منو
وين جنت ما تگولي تلعبون علينه انت وحاكم
هو البارحه رجع وانت اليوم متفقين علينه
لو وراكم شي
جاسم:: اشش محمد لا ترفع صوتك علي
لا تنسى اني اخوكالجبير وبعدين شدعوه
وسام:: هسه غير نفتهم عمي وين جنت
جاسم:: هسه اسولفلكم
محمد:: سولف
جاسم:: اتنفقنا اني وحاكم نروح لبغداد
والله مناك طلعنا لحدود سوريا وتركيا
محمد:: اي وبعدين
جاسم:: ماكو بعدين اني طلعت سفره تعبت
من المشاكل وفاة امي أذاني فـ رحت لتركيا
حسين:: وهاي منو عمي رفيجه دربك
جاسم:: هاي مرتي ساره تعرف عليها بالحدود
محمد:: شنوووووو
ريتاج:: بعدنه ما مستوعبين الصدمه جفلنا
من صيحت ابوي وانوب الباب يندك سكرو تكسر غميت الباب وطبينه للبيت من طلع
وسام فتح الباب رفعت عيني ادحك من الشباك
الهول واكفين الولد يسولفون ودخلهم وسام
وكفو يم باب الكليدور واسمعهم يحجون
فرات:: شسالف يا خوي منو يمكم
وسام:: هههههههه فوت شوف الصدمه
جهاد:: صدمتيش شبيك مصخن
عماد:: اكلك خطاركم ويا حظي اريد اشوف مرتي
ريتاج:: خرب حظي هذا وين والدنيا وين
اسمع وسام يغلط عليه وگاللهم
وسام:: فوتو فوتو لا اجرم بي هسه
ريتاج:: طبو وتوه اريد ارجع صاحتنه امي اووه
ولا يخلونه نفتهم مشيت يمهن واني كل فكري يمهم.
وسام:: رجعت عمي خليتنه كلنه بصدمه لا وطلع
مزوج سوريه صدك جذب دزيت رساله للولد وجو
وصدمته بچفه وصدمة ولده بچفه ثانيه خطيه تلگو
يحبون بيده وراسه رفعت عيني على جهاد وكف باب
الاستقبال وبيده الجگاره وعاگد الحاجب صاح بي
عمي
جاسم:: شنو ما تسلم يبن احمد
ضحك جهاد بستهزاء وگال
جهاد: هههه هاا خال وين جنت خاتل
جاسم:: خاتل شنو شو ما تعرف تحجي انت
جهاد:: يعني هيج الصدف تخلي حاكم يرجع
البارحه وانت اليوم جاسم سوالفك مو عليه
فرات:: جهاااد احترم لو شيصير يبقى ابونا وخالك
خلي نفتهم
-دحك عمي بوجوه الولد ولا عبالك مسوي شي
جاسم:: يابه شبيكم عليّ؟ عبالك مسوي مصيبة.
جهاد:: مو جنك مسوي مصيبة، انت مختفي صار اشهر وترجع فجأة، لا خبر لا اتصال، وتريدنه نستقبلك طبيعي خالي لا انت غبي ولا اگبالك اغبياء
لا تظل تجيبها مناي وتلطشها مناك لو ما وراك شي
انت وحاكم ما نهزمتو وهسه جايين سولف احسلك
جاسم:: شبيكم هيج كبرين السالفة؟ ما مسوي شي أني. طلعت سافرت حالي حال الناس ، وهناك ارتاحيت من والهم، ورب العالمين رزقني ببنت الحلال وتزوجتها. وهسه رجعت لديرتي وناسي.
شنو تريدوني أسوي؟ أترك مرتي وولدي وبيتي وأظل بالغربة حتى ترتاحون؟ لا والله، تخسون. هاي البيوت ملكي، وحقي ما أتنازل عنه.
-حجاها ودار على جهاد وگاله
جاسم:: وخليها ببالك زين... إنت بالذات جهاد. لا تتجاوز حدودك وياي، لأن إذا حطيتك براسي أكسر ظهرك ما أتردد. وحقي وحق أخوتي راح آخذه، حتى لو أطلعه من بين عيون أبوك.
عمر:: هههههه، لا لا دقيقة بس! شنو هالفلم الهندي؟ شنو سافرت؟ شنو تزوجت؟ شنو أملاك؟ شتحجي إنت؟
يعني صارلك أربع أشهر مختفي، عايفنه ندور عليك ودمنا يحترق من وراك، وشايفين الويل والخوف كاتلنه وما ندري عايش لو ميت، وهسه داخل بكل برود تكول: "والله تزوجت وسافرت وجيت أريد أملاكي"؟
هاي السالفة بنظرك عادية لو شنو؟ ما فكرت بينه ولو للحظة شصار بينا وإحنا ندور عليك؟ ما نهمك شكد تعبنا وشكد انكسر خاطرنا ما همك بس الفلوس صدك تحجي يابه.
جاسم:: اهوووو سالفة الما تخلص واحدكم بكد البغل ويدور حنان اني لو ما يهمني ما جان رجعت
بس اني ادري عايف وراي زلم وجهال ويلا عاد
كافيي تره تعبان
وسام:: ظلو الولد يدحكون عليه يحيرون شيحجون بس واحدهم يكسر الخاطر
لا يكدرون يحجون هذا ابوهم اول وتالي
وهو كعد يدحك عليهم بس والله الخوف بعيونه
الي مرد گلبي عماد يدحك على ابوه وشلون ما مهتم وكف يمه وگال.
عماد:: يابه وامي
-دحك عليه ما عرف شيگول مسح وجهه يبين نفسه انه ما متهتم وگال.
جاسم:: وشبيها امك
-عض عماد على شفته وهو يدحك على أبوه، وبعدين گالو بكل بهدوء:
عماد:: يابه... لو درت أمي شراح يصير بيها؟
-ارتخت ملامح عمي واختفت العصبية من وجهه وصد على عماد وگاله
جاسم:: لهذا السبب ما جنت أتصل بيها.
عمر:: شنو يعني؟
جاسم:: لأن أعرفها.
فرات:: وتعرف شنو؟
-تنهد وگال
جاسم:: أعرف إذا درت إني متزوج عليها... راح تنكسر نسرين ما تتحمل تحبني جثير
عمر:: هههههههه وهيج جزاتها على حبها تروح تتزوج عليها، وهسه جاي تتحسر عليها؟
-أشر بإيده عمر وهو يهز راسه مصدك هذا ابوه وتفاجئ عمي من گاله
عمر:: ما تشبع من النسوان إنت.
جاسم:: عمر!
-صاح بيه بعصبية وخلاه يسكت بس عيونه نصبغ احمر دم من العصبيه
جاسم:: احترم نفسك، أني أبوك.
عمر:: والأب يسوي هيج بولده وأمهم؟
جاسم:: وبعدين الشرع محلل أربعة، وهذا حقي.
فرات:: يابه...
محمد:: كافييي عوفو ما يفيد وياه الحجي
شوف جاسم ضاملك بگلبي حجي بس الله
يعلم بي بس على هونك يا خوي الايام جايه واول شي من هل لحظه بيتي يتعذرك اخذ
مرتك وطلع من بيتي
وسام:: تفاجئنا من ابوي طرده وعمي جاسم
يريد ينفجر جيه وسحب ابوي من ياخته وكلنه
وگفنا بوجهه بس ابوي ما قبل ندخل والله اني
لو بيده اكطعه دفعه ابوي بقوه من صدره
محمد:: دير بالك إيدك ترفعها عليّ اليوم سكتت لخاطر ولدك، غير مرّة ما يكف بوجهي عبد بشر... يلاااا.
- زمخ بي بصوت عالي ومختنك من القهر، وعينه ما فارگت عين جاسم لحظة، وكلنا واگفين بيناتهم
وجاسم ظل يفتر بمكانه ورفع عينه على ابوي وگال
جاسم:: هيج تعامل أخوك؟
-گالها و يدحك على ابوي وكأنّه منتظر منه يتراجع أو يلين، بس ابوي واول مره ما هزّه الحچي.
دحك عليه و ضحكة بقهر، ضحكة واحد انكسر من الداخل وما بقى عنده ثقه بأخو ابد وفاجئه من گاله.
محمد:: ما عندي غير أخ واحد... والله أخذه.
وسام:: ادحك على عمي عيونه رادت تطلع من كد
ما فتحه ويهز براسه وطلع ويصيح على مرته خطيه
طلع تركض ولابسه عبايه حتى ما تعرف تمشي بيها
سحبها وطلع وابوي اشر للولد يرحون وراه طلعو
وجهاد هم ترخص وطلع عرف ابوي وضعه ما يسمح يحجي عافنه وراح لغرفه واحنه ظلينه محترگين قهر علـ ولد.
**
مهى:: وره العشه كاعده ويا أمي، طلعوا الولد وهي ظلت تحچي على عمر، تريد تزوجه گبل عماد بس هو ما يرضه. أني ظليت ساكتة، خاف ترجع السالفة عليّ، وهي تحچي وتحچي وتحچي لحد ما ارتاحت وسكتت.
لزمت ملزمتي وكعدت يمها أقره، وأمي تمددت حتى تنام. للساعة عشرة وهي بس تتگلب بمكانها، وضعها يكسر الخاطر. من راح أبوي ولهل اليوم وهي عايشة صراع نفسي، حتى البيت ما تكعد بي براحتها.
نزلت عيني على الملزمة أحاول أركز، وفجأة أني وأمي انتفضنا من ضربة قوية على الباب. شهكت مصدومة وگمت بسرعة، وعيوني اتجهت للباب.
انفتح الباب بقوة... وتجمدت بمكاني أبوي داخل.
ركضت گبل عليه، ما مصدكة أبوي رجع. بس من وصلتله سحب راسي حبة وخّرني عنه، وظلت عينه معلگه على أمي وين يلا أمي استوعبت وجوده.
شهكت شهكة قوية، وچن روحها رجعتلها بعد غياب طويل، وگامت من مكانها تركض عليه. تشبك بيه بقوة و تبوس بجتفه وصدره، وصوت بجيها يفطر الگلب بجي إنسانة تعبت من الانتظار بجي أربع أشهر كاملة.
أخوتي واگفين يدحگوت، وجوههم مگلوبه و الوجع بعيونهم. كلهم منتظرين منه شي... أي ردة فعل، أي لهفة، أي اشتياق يبرد نار هالفراك.
بس أبوي...
جان بارد.
بارد بصورة صدمتني أكثر من رجعته.
أمي مچلبه بيه وتبچي بحرگة، وهو حاطها بحضنه ويضرب على جتفها بخفة، كأن يريد يهدي طفل يبچي مو زوجة صار اشهر تعيش على أمل رجعته.
لا كلمة تواسيها
لا حتى ذاك الاشتياق اللي چنه ننتظره نشوفه بعيونه.
واگف بهدوء غريب، وملامحه ما بيها شي يبين شگد مشتاگلنه أو حتى إذا مشتاكلنه أصلًا.
عبالك مو صار أربع أشهر عايفنه.
عبالك مو أكو ناس اشهر شافت الويل والخوف عليه ادحك على مشاعره عبالك البارحة طالع من البيت وهسه رجع.
بس عليش نستغرب؟
هذا أبوي.
عمره ما عرف يبين مشاعره، وحتى بأكبر المواقف يظل واگف بنفس البرود اللي يحير كل اللي حواليه.
مهى:: ظلت أمي ، تبچي وتشهگ، وهو ساكت.
بس يضرب على جتفها وچنه مستعجل تخلص دموعها مو يسمعها وامي رفعت راسها اله
عسى ولعل تلگه فد كلمه او مشاعر اطمنها بس العكس صار هي عيونها عليه وهو عيونه على البيت كأن يتأكد إن كل شي بمكانه.هنا حسيت الغصة بصدر أخوتي.مو لأن أبوي رجع...لأنهم چانوا متوقعين شي ثاني.متوقعين رجال يرجع مشتاگ لأهله.متوقعين واحد يضم ضناه ، يسأل عليهم، يفرح بوجودهم .بس اللي شافنا ابوي نفسه.نفس البرود.... ظلينا واحد يدحك بوجه الثاني وين
يلا انتبهت اكو مره واگفه وگبل لا تسأله امي
ابوي سحبها وگال
جاسم:: تعاي نسرين احاجيح
مهى:: ما خلاها حتى ترد سحبها وطب للغرفه
واحنه ظلينه على وگفتنا بالهول وعيني على اخوتي
اريد يحجون يفهموني من هاي مسح وجهه فرات
واعرف هاي الحركه معناها يهدي روحه حتى بس
لا يصيح دحك عليه وگال
فرات:: مهى اخذي مرت ابوج لغرفة جديتي
مهى:: فتحت عيوني ما مستوعبه كلامه وهو
يخوزر بيه وعاط بي عمر جفلني
عمر:: شبيجج مهىى
مهى:: اي اي تفضلي حبيبتي تعاي حتى ترتاحين
سارة:: إي والله يسلموا تعبانة كتير
مهى:: فتحت حلگي عليها يمه هاي لبنانيه سوريه
دحكت على اخوتي ثلاثتهم خزروني واني ركض سحبتها وطببتها لغرفة جديتي طبت ادحك بالغرفه
وگبل ذبت العبايه وتحجي عليها لان ما تعرف تلبسها
ساره:: أنا وين والعباية وين؟ بهدلتني والله، بس ما بنكر إنو دفّتني من البرد، الجو عنكم هون بارد كتير.
مهى:: الله ذب عليه كل الثوال صافنه بلهجته
وين لگاها ابوي ردت اطلع احسن ما افشل روحي
جتني الضحكه ما مصدكه بس هي صاحتني
ساره:: حبيبتي، تعي لعندي شوي إذا بتقدري، بدي منك طلب صغير
مهى:: اني؟
ساره:: ليش في غيرك هون
مهى:: هاا لا گولي محتاجه شي
-مددت رجليها على جرباية جديتي ودحكت عليه وگالت
سارة:: تأبريني، بس الشنطة تبعي اللي فيها تيابي ضلت بالسيارة، خلي خيّك ينزلها لو سمحتي. والله تعبانة كتير من السفر وبدي نام.
-هزيت راسي وگتلها
مهى:: نامي اني هسه اكوللهم يجيبونها الج
درات راسي اطلع وصاحت
ساره:: مهى
-نعم
سارة:: بسألك، جاسم مو ناوي يجي ينام هون؟ السرير ما رح يوسعنا
مهى:: ياربي هاي شحجي وياها صديت عليها
وكلتلها
-نامي حبيبتي ابوي ينام بغرفته اليوم واني رايحه
انام وراي دوام تصبحين على خير گبل لا ترد
طلعت اخوتي ماكو كل واحد رايح لغرفته مدري
وينهم توه لزمت الموبايل دگن البنات مكالمه
جماعيه بس ريام ماكو ضايفاتها بس ما راده فتحت
وجفلت من عاطن بوجهي وتبارك خبصت الجو
وتسأل على مرت ابوي ضحكتني من گالت
تبارك:: يعني تحجي مثل باب الحاره
مروى:: انجبي خلي نفتهم
ريتاج:: ولج ما كالتلي تشگلي أسي بس من جانت
يمنه انطيتها مي گالتلي بتسلميلي يا أماره يعني
گمر مو مو
فاطمه:: انجبن عاد انطن مجال نحجي
مهى:: هههههههه غير يسألن على مرت عمهن السوريه والله ظليت فاتحه حلگي ما لحكت حتى
ابجي على رجعت ابوي مشاعري بعدها ما طالعه
صدمني ابوي ولجن ظليت مثل الثوله صافنه بيها
من تحجي واني.....
-مااا ظللل والله اليووم احرك البيت عليكمممم
مهى:: فزيت على صوت أمي العالي، وكعت الموبايل من إيدي وطلعت أركض، وأخوتي يتراكضون وگفنا بالهول من طلعت أمي من الغرفة ملخبطة، ملهوفة وراها أبوي، وهي تهدد وتحچي عليه بصوت عالي، أعصابها منتهيه وما تسيطر على نفسها من شافتنا واگفين، صاحت علينا بصوت كله قهر
نسرين:: تعالوا... تعالوا شوفوا شلون أبوكم!
لكم متزوج عليّ... ولكم حاير بالنسوان!
وگفت ادحك وهي فاتحة إيديها، دموعها تنزل والعصبية والوجع امبينه على ملامحها وكأنها تريد تفرغ كل اللي بگلبها دفعة وحدة تقرب عمر وسحبها لحضنه ويحاجيها
عمر:: اشش يمه محد يستاهل تأذين نفسج
عليه تزوج خلي يتزوج مو بحاله انتي عندج
ولد ارواحهم ترخصلج امشي يمه
جاسم:: ولكك سد حلكك
نسرين: مااالك شغل بولدي! لا تحچي وياه ولا ترفع صوتك عليه و إذا تريدها... اخذها وروح. بس بيتي؟ لا. بيتي ما يدخله غير الي حافظ كرامتي يلااا مااالك ظله بيتي اطلع اخذها واطلع
مهى:: امي نهارت دفعت عمر وراحت بتجاه المره
وسحبتها تريد اطلعها من البيت وصلت يم ابوي
وگبل لا تعبره شهكنه من ابوي سحب مرته من ايد
امي ودفعها بقوه الا وگعها بالكاع ركضنه كلنه على
امي وفرات سحبها گومها وهي دحك على ابوي بصدمه وجهه انصبغ احمر وهي تشوف ابوي شلون
يحجي عليها ويمسح على ايد مرته الثانيه من شاف
ايدها حمره لان امي لزمتها بقوه وهي بشرتها بيضه صد على امي بغضب ورفع ايده ويهدد ويغلط
جاسم:: هيي! انعل والديكم... سااره خط أحمر! محد يتكربلها محد يمد إيده عليها، تسمعون لو لا
واسمعو زين محد اله ظله بيتي يلا اخذو امكم ونگلعو من بيتي ما اريد اشوف واحد بيتكم البيت
بيتي يلاااا ولووو الا اشوفه يعتب عتبت باب بيتي
رجله اكسرها.
مهى:: عشنا بصدمه وكف يدفع بينه والولد مدري
مصدومين مدري بان ابوي ما يكدرون يرفعون ايدهم عليه بس من فرات شافه هيج دفع وعاط بي
فرات:: وخررر احنه نطلع الله لا يعوزنه عليك
وعلى بيتك بس هينه يابه يجي يوم تحتاجنه
-صد عليه وصاح بينه
فرات:: امشووو يلا خلي هو ومرته
مهى:: سحبني عمر وفرات اخذ امي وعماد سحبه من ايده واحنه نمشي وراه واني اريد
اسيطر على دموعي ما اكدر طبينه لبيت فرات
وتلكتنه فاطمه خطيه نهبطت وكفت تسألنه
بينه بس ما كدرت احجي وخر فرات من امي
وكعد عمر يمها وعماد كعد يم رجليها يحاجونها
بس هي ولا يمهم صافنه بفراغ وايدها ترجف
قبل شويه جانت تبجي بس هسه لا شكد ما
انصدمت حتى دمعتها نشفت ظلينه بالساعه
مگابلينها وكاعدين وهي لفت راسها ونامت
ومدري صدك نامت لو مثلت علينه حتى نعوفها.
فاطمه:: من حجالي فرات على الي يسواها انصدمت خالي جاسم شجاه وهيج يتصرف
ويا عيال بيته خاصه حرمته شكد جانت صعبه
ومحد يرغبها بس هو لا يموت عليها ادحك عليهم
ضناها من نامت تمددو ثلاثتهم يمها ونامو...
وره الصدمة اللي مرت بيها عمتي نسرين، ظلت ثلاثة أيام لا نوم ولا أكل. إذا لحّوا عليها ، بالكوة تاكل لها چم لگمة حتى ترضيهم. ولدها والبنات ظلو حايرين بيها، اما مهى آني وفرات، واخوتها لحينه عليها وبالكوة رضت ترجع للدوام لأن ما بقى غير أسبوع على امتحانات نصف السنة.
كعدنا بالحديقة، و الدنيا مطر وهوى بارد يبرد الروح. مهى جانت تدرس وعلاوي يمها، وعمتي نسرين كاعدة ساكتة، صافنة بصفحة دحك على مطر وفجأة طبّوا الولد يتراكضون بالحديقة، واحد يدفع الثاني ويضحكون ، وصارت ضحكتهم تملّي البيت آني ومهى ضحكنا عليهم، من صاروا يمالخون على الحمام ويركضون وراه شويه و طلع عمر من الحمام متعصب، لأن الولد ما خلوه يسبح براحته. دار عليه وهز راسه وكال:
عمر:: عمي زلمتج ما ينحمل لا هو ولا أخوج.
فاطمه:: هههههههه تحملهم أخوتك شسوي.
عمر:: متحملهم عمي، أنوب جاني هذا الجلب معاذ يمشي ويصيح "نسيبي، نسيبي"، ساعة السوده ناسبناه. كل من وراج گضبنه من إيدنه التوجعنه.
-ضحكت عليه، وهو راح يم أمه يحجي عليهم
وبين ما كملت سويت الجاي وصبيته بالاستكانات، جو الولد التمّوا رفعت عيني على عمتي نسرين وشفتها ابد مو طبيعيه هل أيام، بس جانت بنظراتها غصة ما جبيره. شي مثگل عليها وضامه شي وره هالهدوء.
دنكت أصب الجاي، ومن رفعت راسـي لگيتها دحك بينا كلنا. سكتنا گلنه ، وهي چنها تريد تحچي بشي مهم. وما جاي تكدر صد علينه و گالت بهدوء:
نسرين:: أريد أروح لبيت محمد.
-استغربنا وفرات التفت عليها بسرعة.
فرات:: يمه وين ترحين هسه ما تشوفين المطر؟
نسرين:: ما يمهم يكف المطر ونروح. أكو أمور وسوالف لازم أحچيها، وأريد ريام وجهاد وأحمد وياهم. خوش تروحون تصيحونهم؟
فاطمه::، ظلينا واحد يدحك على الثاني أكو شي جبير يدور ببالها بس ما عرفنه
عمر:: خير يمه شالسالفة؟
نسرين؛: من نروح لبيت عمك تفتهمون
فاطمه:: ظلينه مثل الاطرش بالزفه الولد حتى الجاي عافو وهي عافتهم وطبت للاستقبال
اذان عصر صلينا وكفت انطي القمصله لفرات
وتفاجئنه من عمتي لبست عبايتها وطلعت وعمر
وفرات اثنينهم طلعو وراها بدون قماصل والجو
يهلج هلج برد يكص العظم صح وگف المطر بس
صار هواي مهى رادت تلحكها بس ما خليتها كعدنه
ننتظهرهم حتى نعرف شصار وشتريد تگول لخالي؟
ريام:: اليوم ما داومت بطني حيل توجعني وجاي
ينزل مي من عندي وعمتي كالت اكعدي لا تطلعين
غير لو يخلصن هل شهرين وين اني يلا عشرة ايام
يالسابع وره الغده خابرت مسره وجت يمي لان
جهاد ملتهي ويا الولد خاصه من وره جاسم ورجعته
شكد كرهته انوب فوك ما خطيه خلاها اشهر يدورون عليه من رجع طردهم وكعد مرته السوريه
وكلمة حق محد شاف منها شي بس يلا صار ثلاث
ايام من رحعت كعدنا اني ومسره نلف دولمه ونحش وهي تسولفلي على ميسون مكيفه بيها
لان حامل كملنا الدولمه وجن البنات يمنه سوتلنه
تبارك كيكه بس ذلتنه بيها تاكل وتحمد بيها لو ندري
هيج ما نريدها
تبارك:: والله عمي صوجكم طالبه وادرس وامتحانات واسوي كيك وين لاگينها
مروى:: عمي راح نقص بيها افتهمنه
تبارك:: اكلي اكلي راح تفتقدين اكلي بس تتزوجين
مسره:: هههههههه لج هي وين رايحه اهنانه
بسدكم انيالج مروى بسد اهلج اني هسه
ابقى اشتاق لميسون بس من وره زوجها متگدر تجي
تبارك:: خررب دحكو شلون تحجي
مسره:: اهوو دا احجي طبيعي
تبارك:: اوي عيني دا تحجي طبيعي عمي كولي
جاي احجي طبيعي دا شنو خليج مره خشنه
-هههههههه
ريام:: اني اعرف الخشونه للزلمه
-برمت ارداناتها واخذت كيكه وگالت
تبارك:: لا عيني احنه اهناي نحب حتى المره صلبه
شنو هلمياعه خليجن كربات هاي الدنيا تريد القوي
مروى:: الله اكبر تعلمن بناات من اختي الصلبه الشجاعه
ريام:: ضحكنا على ملامحها وتوها تريد ترد على
مروى كب جهاد من شافته ملتمين ندك وسلم
على مسره وصاحني كمت وراه خوفني امبين
عصبي وكفت يمه وهو گبل گال
جهاد:: ريام خالي محمد يريدج
ريام:: يمه شبي عمي
جهاد:: ما بي شي ريام شبيج مرت جاسم مدري
شبيها تريدج حتى تحجي سالفه المره شاخطه
بس شنسوي خالي محمد گال الا اجيبج واجي
ريام:: مو بطني توجعني
جهاد:: وگفت السياره بتب الحوش اخذج
بالسياره يلا يگلبي ينتظرونا عيب منهم نتاخر
ريام:: هز راسي وطبيت اخذت عبايتي وفهمت
البنات وطلعت صعدنا بالسياره وماكو بس لفها
لان قريب نزلنا ودخلنا جانو كاعدين بالمضيف
بس سادين باب الخارجي سلمت وكعدت بسد
عمتي امنه ونسرين كاعده على صفحه وجهه
شاحب شفايفها مزرگه وضعها يخوف صديت
على عمي احمد من گال
أحمد:: اي ام عمر سولفي هاي التمو الي ترديهم نسمعج
-رفعت راسها دحك بالوجوه وشفايفها ترجف
مسحت وجهه من الدموع وبدأت تحجي
انشگ گلبي ياريت ما حجت...........
