رواية هو لا يشبههم الفصل السادس والثلاثون بقلم تبارك الوائلي
"يا نجْمتي قَدْ ضعت في لَيْل الهوى
عُودي إِلي لكيْ أُواصل رِحلتي".✨
جمانه :- فزيت على صوت المبايل يدك باوعت أيهم
فتحت خط اجاني صوته يسال علينه شكلتو واسويتي ومنو اجه ومنو راح هذا طبعه دوم بعدها سدا ومرت الساعات وصل بالسلامه ارتاح بعدها طلعو يفترون و فتح كامره يشوفني اجواء الثلوج
و روزه يمي ضايجه وكلساع تكله جيبيلي وياك هدايه حجينه ويا شويه وسدها.
كعدت صافنه وافر براسي صدك البيت ميسوه
اي شي بدون ايهم حبيبي ربي يحفظه اليه ويخلي خيمه علينه حيل متعلقه بي اني والله ما اتحمل غياب لدرجه اذا يتاخر بره شويه راسا ادك عليه واساله اشوكت يجي بس هسه مجبوره اسكت لان اكول خطيه يتعب بالدوام ومحتاج يطلع يتونس ويغير جو سكتت وبداخلي الف اشتياق اله ومن غير اني افقد الامان بعدم وجوده بالبيت صوته بالبيت يخليني اامن وانام واني مرتاحه مر اليوم عادي
اجه الليل ومن التعب نمت وما حسيت على نفسي غير
نايمه وفزيت من الحلم باوعت طالع الصبح عبالك بالطيف شفت ابويه حبيبي الله يرحمه وهوه لابس ملابس ابيض ومبتسم يسالني اشلونها نور بنتج
كتله الحمدلله بخير شويه وراح واني اصيح وراه اوكف وين رايح كال لا اريد اروح بس ردت اسال على نور
وكعدت من الحلم بعد ما تذكر شي كمت رحت بين التنضيف والطبخ واقرايه روزه فكدت اليوم نور مادكت عليه دكيت هواي وماردت ضل بالي عليها دكيت على عمتها كالت .
" هاي نور تتعشه وعايفه مبايلها بالغرفه .
سلمت واطمأنيت عليها و حجيتلها الحلم وسديته
ومثل كل يوم عشه وتعلوله اقرايه ويا الجهال وقفلت الابواب وكل واحد نام بفراشه راسلت ايهم دزيت .
" هلو حبيبي شلونك .
" هلو يروحي انتِ شلونج اخبارج .
" الحمدلله مشتاقتلك والله والبيت حيل مو حلو بدونك .
" الللللله لج شتاقيتي اليه واخرين تره هواي نسوان هنه يكولن الازواجهن اله انتِ ماسويتيها ابد .
" ياااا عززز ايهم مو هيج والله ، بس كلي ليش هيج دوم عقلك شاطح اني مو قدي هيج اشبيك .
" هااا والله عرفت ما وراج هيج انتِ بس النعوصه مالتج شككتني .
ضحك بصوت عليه كتله .
" اني ايهم هيج روح ولا ادك عليك بعد لان اكلك مشتاقتلك تفكيرك ياخذك بعيد .
" واني هم وعيونج مشتاقلج موت جنه حبيبتي انتِ طبعاً تشتاقيلي لو تفرين كل الدنيا ماراح تلكين واحد يحبج بكدي ولا مثلي مدللج .
ضحكت عليه وكتله .
" صح مدللني بس مراح تلكه وحده تحبك بكدي ومدللتك .
" اي والله اعترف واشهدلج بهل شي .
" همزين تعترف بنفسك ، ياله ماريد اعطلك اخذ راحتك .
" يله حبيبتي روحي اجوي الولد تصبح على خير .
" وانت بالف خير
بقيت اتكلب بالفراش ماحسيت اشلون نمت فزيت على صوت مبايلي يدك شلته ام عباس تتصل باوعت الساعه 2وعشره دقايق بالليل كلبي لعب ليش بهل وقت متصله عليه ام عباس اكيد نور بيها شي ياربي والله اخاف افتح خط عليها اخاف طفله نور بيها شي لو نور صاير الها شي بس نور بعد 7ايام تدخل بشهرها معقولة حلم ابويه تحقق وصار شي بنور وابويه حس واجه ينبهني
لا لا مابيه ماكو هيج شي ان شاءلله يارب خير
نزلن ادموعي اول مافتحت خط دقيقه وكل هل الافكار مرت عليه .
جمانه
" ها ام عباس خير .
" ها عيني ام طارق حبيت ابشرج نور ولدت واحنه باالمستشفى هسه صارت عدها ولاده مبكره .
يمه احس كلبي طار من مكانه كلتلها .
" وهيه شلونها صحته فدوه ام عباس كليلي .
" الحمدلله هيه زين .
" زين اشلون مو بعد الها اسبوع تدخل بشهرها .
" ماكدر احجي وياج اريد اروح يمها هسه .
سدته واني صافنه اشلون جابت وخاف اكو شي رجعت دكيت عليها مترد عليه كمت ورحت كعدت بالصاله بارده كمت علكت الصوبه واني ايدي مانزلت من المبايل ادك وتخلص الدكه ومحد يرد عليه بقيت صافنه بقلق اني هسه شسوي وايهم ماموجود والجهال نايمه بقيت ابجي محتاره شنو اكدر اسوي
احس نفسي تهت استمريت ادك وماكو صارت الساعه 3ونص ياله ردت عليه اجاني صوت ابو عباس .
" ها ام طارق اني نازل بالحسابات وانتِ تتصلين ومارديت عليج لان اريد احط رصيد بالمبايل مالت ام عباس .
" هااا بس لو راد عليه ضل بالي مافهمت اي شي
من ام عباس غير بس ولدت .
" اي والله الحمدلله هيه زينه والطفله زينه بالخدج .
" الحمدلله يارب الف مبروك .
" الله يبارك بيج بس اكمل المحاسبه واصعد انطي
احجي وياهم .
" ان شاءلله .
سديته شويه ارتاحيت بس بقيت الوب كعدت اسبح وبقيت اتصل لل 4 ونص ردت عليه ام عباس اول ماكلتلها اشلون صارت كالت .
ام عباس
" انتِ وين عبالي اجيتي علينه ليش لسه ماجيتي
جمانه
" حجيت فشلانه ، اشلون اجي وايهم بسليمانيه والجهال نايمه محد يمهم ماكد اجي هسه .
" يااا اجتي اختي جابت الملابس هيه وابنها .
" اي لو كايله اليه جانت مرت عليه واجيت وياها .
" والله مادري اني .
كعدت تحجيلي اشلون ماخذه نور للمستشفى واشلون متاذيه نور والطفله فاتحه العقد بايدها وماذيه نور بس الحمدلله اثنينهن بخير غصه صارت عندي من ولدت واني مو يمها كلتلها بعتاب .
" ليش مادكيتي عليه من اخذتيها للمستشفى مو لازم اني اول العام تتصلين بيه وتبلغيني لو لا .
ردت
"والله ارتبكت حيل وماعرف شنو اسوي ولا
أعرف اذا جانت ولاده ولا وجع عادي رحت اركض بيها ودخلتها للمستشفى الملكي دكتورتها وداد الشجيري اجتي بنص الليل علينه .
" هااا خطيه الحمدلله على كل حال والف مبروك .
" تسلمين حبيبتي .
" زين جيبو نور عليه للبيت اهتم بيها واداريها بين متكوم بالسلامه.
" لا مو ميقبل عمها يكول اني فرحان بحفيدتي واريدهن يمي .
" بس نور محتاجه اهتمام هسه وانتِ مريضه متكدرين عليها .
" شسوي لعد .
سكتت مردت بعد كلتلها.
" انطيني نور احجي وياها .
ردت عليه بصوت تعبان حبيبتي كلتلها.
" الف الحمدلله على السلامة حبيبتي
نور
" تسلمين ماما .
" نور حبيبتي تعالي يمي اهتم بيج واداريج .
نور
" ميقبلون ماما .
" ليش بنتي .
" فدوه ماما لتحجين وتصير مشكله خليني يمهم وانتِ تعالي شوفيني .
" بس هيج ماراح اطمان عليج .
نور
" ميخالف ماما الخاطري فدوه ماما مشيها.
سكتت بعد شريد اكول كلتلها.
" اشوكت تطلعون .
" يمكن فد ساعه اكثر ونطلع .
" خوش لعد ، الف الحمدلله والشكر يارب شلونج هسه .
نور
" زينه والله ماما .
جمانه
" لج ماما والله خفت عليج .
" ماكو شي كلشي تمام .
حمدت ربي وسديته و كمت صليت ودعيت وسبحت وشكرت ربي الف مره من طلعت نور سالمه هيه وبنتها حبيبتي باوعت صارت بـ 6ونص دكيت عليهم كالو دخنله قبل اشويه للبيت حجيت شويه وسديته طفيت الصوبه باوعت الجهال نايمين وميدرون بلي صار كله كعدت روزه عدها امتحانه نصف السنه ودوامها صباحي كعدته صحت وبدلتلها وكلتلها
على نور طارت من الفرح حبيبتي روزه صارت خاله ههه ضحكنه اني وياها شويه وسمعت صوت هورن .
جمانه : يله اجاج ابو الخط روحي بسرعه .
روز : ماما عفيه تعالي اخذيني بس اكمل الامتحان اريد اروح اشوف نور وفوفه .
:- صار من عيوني .
رحت وطبكت الباب وراها وكعدت اسوي ريوك
والملم شويه
و ايهم دك عليه كال .
" عمري روح اوصل قريب عليج اني .
" هلا بيك حبيبي.
مرت ساعه تقريبا و اجه الجهال نايمه حضني وكال .
:- مشتاقلج جنه .
:- حبيبي واني هم مشتاقه الك ايهم خلي ابشرك نور ولدت .
تفاجاة وشبه الي خايف كال .
:- لا اشلون مو بعد وكت .
:- اي بعد اسبوع بس الحمدلله كامت بالسلامه هيه وفوفه وهسه همه بالبيت .
:- الف الحمدلله على سلامتها حبيبتي واخيراً ايهم صرت جد .
:- ها جنه بلشنه من الصبح مو اكوملج اشوفج الجدو .
ضحت وكتله
/:- شلون جد يا ررربي .
احجي واضحك وهو مبتسم وخازرني وكال .
:- اني شكلت جنننننه .
:- اي شنو شكو يعني جد جد اربعيني جاد .
حجيتها ميته من الضحك كال .
:- وانتِ احله بيبي مرت بحياتي ، حبيبتي بعدج مادخلتي الاربعين وصرتي بيبي .
ضحكنه سوه وتشاقينه كال .
:- ان شاءلله دوم الضحكه يارب متفاركنه ابد ونفرح بكل اطفالنه ولو همه كبرو ولسه انكول عنهم اطفال .
حضني وكال .
:- بيبي جنه جدو محتاج حنان وبردان محتاج منج ادفيني .
:- يااا ايهم لازم اكعد الجهال و اروح اجيب روزه اخذها ويايه اريد اروح اشوف نور متلهفه عليها وعلى بنتها حيل .
:- والله انتِ متلهفه على بنتج واني متلهف عليج ومشتاق تعالي هسه بس افهمج وشوفج شجبت الج اشلون اتراك تخيلتج لابسته يموت لونه عسلي .
:- كول والله .
:- اي وعيونج بس عوضيني ونطيني حق التراك
حجاها بضحك وووووووو رحنه بعالمنه
بعد فتره من الزمن كال .
:- جنه راح اسبح و انام لان تعبان حيل .
:- براحتك حبيبي واني راح اكمل واكعد الجهال و اروح النور .
:- مو تنسين روزه جنه اخذيها وياج .
:- اي اكيد حبيبي .
رحت كعدتهم وكلهم فرحو من سمعو بنور ولدت طارق وامير فرحانين صارو خوال ومليكه تضحك على ضحكتهم وكالت .
ملك : اني هم صرت خاله .
صحت بيهم .
جمانه:- يله فضوني بدلوو ، يله مليكه كملي .
ملك.: اااااي ماااما.
جمانه : صوتكم عمكم نايم بنتي .
رحت اني ومليكه للمدرسه على روزا وماقبلت المعلمه كالت بعد مخلصان وقت الامتحان روزه عدها فنيه تتاخر كتله الطارق .
جمانه : ماما انت انتضرها بس اتكمل جيبها عود .
طارق : صار ماما .
رحت اني ومليكه البيت اعيال نور طبيت وطشيت الجكليت عليها لكيت زوجه خالهم يمهم سلمت وباركت ورحت كعدت يم نور حبيبتي وجها صاير اصفر ، بستها هيه والطفله وكلتلها.
:- الف الحمدلله على سلامتكم حبايبي اوي فدوه فوفه ناعمه حيل وتخبل حبيبتي .
نور : أي ماما ماعرف ليش هيج ناعمه.
:- عادي بنتي لان جايه قبل وقتها المهم صحتها زينه.
بقينه يم نور صار المغرب ردنه نطلع اجتي بتهم وزوجها ردنه نطلع وأم عباس مقبلت كالت ابقو تعشو جايبين ثواب علمود سلامه نور وبتها والوجه الله كلتلها .
:- تسلمين حبيبتي ماكدر لان الجهال بالبيت
سلمت وطلعنه ورجعت للبيت دك ايهم .
أيهم
" ها يروحي وين انتِ .
" رجعت هسه للبيت .
" هاا خوش اشلونها نور وبتها .
" الحمدلله بخير
" الحمد لله يعني زينه.
" اي ، ايهم لو شوف فوفه تخبل وناعمه حيل تنكرط .
" فدوه ربي يحفظها .
" امين يارب العالمين .
" يله عمري جايج .
" هله بيك حبيبي راح احضر العشه .
سديته ورحت صليت وسويت العشه واجه ايهم وكعدنه كلنه على السفره ناكل سوه وايهم يحجيلنه على الثلوج وشلون برد مو طبيعي بسليمانيه والجهال فرحانه امير وروزه دوخو كلساع سائلي .
:- ليش ماجبت ملابس بابا .
:- روزه حبيبتي رحت اتونس واشوف اجواء الثلج ماشتريت اي ملابس الاي احد بس جبت الكم الحلويات والكرزات .
باوع عليه و غمزلي واني ضحكت اله لان هوه يخاف لتعرف روزه بالتراك الي جابه اليه وما كال ال روزه لان لو تدري جان زعلت حيل تغار مني على ابوها حيل وايهم مرات يضحك علينه وعلى غيره روزه عليه ، حبيبتي طالعه نفس طبعي اني هيج جنت اغار واحب ابويه الله يرحمه ويجعل مثواه الجنه يارب اشكد استفقده بحياتي
دعيت بكلبي ربي لتحرم روزه من محبت ابوها وصرت اشتاق الكل حياتي الي عشتها ويا ابويه بسبب روزه من كد تعلقه باابوها اكثر مني مر اليوم
و كعدت الصبح سويت ريوك تريكنه سوه لان ايهم مجاز بالبيت اليوم كلمنه ورحت طبخت ونضفت
اذن كمنه صلينه كلنه الحمدلله جهالي كلهم ملتزمين بالصلاه خصا مليكه صلاة و تقره قران كل جمعه
و كل رمضان تختمه طلعت عليه بهواي شغلات ملك حاليا عمرها 16 سنه و طارق 18 ونور 20 وامير 14 وروز 9 سنوات
كملنه الغده وراحت مليكه تغسل المواعين حضرنه وبدلنه جيت كتله الايهم.
:- حبيبي راح اروح النور اشوفها واخلي مليكه يمها اليوم تبات .
:- براحتج عوفيها .
رحنه البيت نور وفرحت نور من شافتنه حيل
كعدنه يمها ولكيت جايبين قطن لافين فوفه بي علمود تكمل لان ناعمه حيل ويخافون لا تتحسس بشرتها صار بيها ابو صفار حبيبتي جابو شمعه وعافوها يم راسها شافوها خامله خافو واخذوها
للدكتور سوولها تحليل طلع عدها نسبه مرتفعة
أبو صفار انطوها علاج ، رجعو من الدكتور طمأنيت عليها و عفت مليكه يم نور ورجعت للبيت
وروزه حبيبتي ضاجت لان بقيت مليكه سكتتها بالكوه اجه ايهم يسالني على نور .
أيهم : ها جنه رحتي شلونها نور .
:- الحمدلله بخير وفوفه حلوه حيل واتنحب .
شاف روزه ضايجه سالني جيتله علمود مليكه اجه عافها بحضنه وكعد يحجي وياها
أيهم : بابا ليش ضايج حبيبتي باجر تجي مليكه لضوجين .
سكتت وبلكوه نامت روزه اجه كال .
:- ها جنه كل هل وقت يم جهالج وعايفتني مشتاق الج والله .
:- حبيبي روزه ضايجه لان وحدها وجنت يمها وكلت اله تنام ياله اجي بفراشي .
:- ها نامت هسه .
:- اي الحمدلله .
:- اي وهسه اجه دور ابو روزه تنيمي.
:- ايهم اشبيك حبيبي تعبانه والله من البيت النور وهاي هسه كملت كدامك .
:- واني هم الي نصيب بيج مو كله الهم مو صح عمري .
اجه حضني وتجرء بحركاته بس كتله ايهم سكتني وماخلاني اكمل ووووو و
كعدت الصبح حسيت عليه يلعب بشعري فتحت عيني ابتسم وكال.
:- صباح الخير .
:- صباح النور حبيبي .
:- احلى شي واحد يصبح بهل وجه الحلو .
ضحكت و كمت سويت ريوك تريكنه وسويت الغده ونضفت وتغدينه مشه روتيتي عادي كملت وكتله .
:- راح اروح على نور اشوفها واجيب مليكه ويايه .
:- جنه احسبي حساب بس اليوم متروحين بعد مو كل يوم تروحين النور ميصير تره .
:- يا حبيبي غير والده جديد ولازم اروح عليها ميخالف عمري اعيالها لو قابلين وجايه يمنه مو احسن .
:- اكيد احسن اقلها كدام عيني بس عيالها ماقبلو .
أيهم : دروحي هسه والله كريم .
سكتت ورحت اني وروزه عليهم وبقيت كاعده ساعه يمها اطمأنيت عليها وفوفه حبيبتي اشويه متحسنه من ابو صفار بعدها ودعتهم و رجعنه للبيت .
روزه فرحانه كلتلها.
:- ها تضحكين البارحه مبوزه روزه عليج مليكه .
ملك : حبيبت اختها طبعاً تحس بفراغ بدوني .
كعدت شويه احجي ويه البنات وبداخلي فرحانه الحنيتهم على بعض بعدها رحت سويت العشه واجه ايهم طب صله واجه مبتسم شاف روزه راح عليها .
أيهم : ها زوزه .
روز : هلو بابا حبيبي .
أيهم : حبيبت ابوها زوزه تعالي نطيني بوسه.
كامت روزه يم ابوها تدلع عليه وتسوي حركاته المعتاده رحت سويت العشه وحسيت نفسي حيل تعبانه ومالي خلك كلش بحيث امشي خطوة ادوخ اجه أيهم انتبه عليه اجه خايف كال .
أيهم : ها يروحي اشبيج .
جمانه: مادري والله ايهم تعبانه شو وماعرف شبيه .
:- اي طبعاً صار 3ايام تطلعين كل يوم وترجعين تشتغلين شلون متعبين .
كعدت على الكرسي ولازمه راسي جابلي ماي شربت بعدها ارتاحيت وشويه صرت احسن
مرت كم يوم
واني نفس وضعي اتعب حيل ومالي خلك شي
لاحضت هاي كم يوم غايبه عليه الشهريه بس كلت عادي هيه مرات تتاخر بس شو هل مره طولت
كلت خلص ما منها مهرب شكيت بنفسي رحت حللت كالو ماكو حمل جنت اتمنى اطلع حامل بس خاب ضني رجعت للبيت لكيت أيهم جاي اني جنت منطيته خبر استقبلني بلهفه كال .
أيهم : ها حبيبي بشري .
:- ماكو ايهم مادري اخاف مثل العام هم غابت وطلع كيس عندي والله صرت اخاف .
:- ميخالف حبيبتي لتستعجلين انتضري كم يوم ورجعي حللي بلكي اكو حمل .
:- ان شاءلله حبيبي .
مرت كم يوم وهم رحت حللت وماكو حمل وصار 45 يوم غايبه كلت اروح لدكتوره احسن اكيد كيس صاير عندي اجه طارق كال .
طارق : ماما اريد منج طلب .
جمانه : كول حبيبي .
طارق : اريد اسوين باجر االخميس ثواب البيبيتي فدوه ماما .
:- صار طارق حبيبي من عيوني اسويلك شتريد انت .
:- بكيفج انتِ اروح باجر واسوك الج شتحتاجين.
:- بعيني تدلل .
:- شراح اسوين ماما اريد اعزم على ثوابها بيت جدو وخالاتي هم .
اجه أيهم طب سمع حديثنه كال الطارق .
أيهم :- اي اعزمهم بابا شكو بيها .
طارق : اي والله عمو انت خابرهم.
أيهم : لا ابني انت خابرهم لان كبرت وصرت رجال وهاي بيبيتك انت اعزم خالك وزواج خالاتك .
طارق : اي عمو راح اسوي مندي ودجاج شوي ودولمه وحلاوه تمن وطرشي ولبن وخيرات الله .
:- ان شاءلله حبيبي.
فرح طارق شويه وطلع اجه أيهم وكف قريب مني وكال .
:- تدرين ليش كتله يعزمهم .
جمانه : ليش؟
:- علمود يحس بالمسوليه يحس كبر وصار رجال اكدر اعتمد عليه .
:- اي صح والله انت ماكو من تفكيرك ايهم .
:- اعجبج اني .
:- اي والله .
حجبتها وضحكنا ثنينه راح طارق جابلي المسواك وعزم الكل وفرحان حبيبي بالعزيمه وراح جاب بيبيته واجني اخواتي وزواجهم وحضرت السفره واني احس بعد ماكدر اوكف من الالم ضهري وبطني مغص يروح ويرجع حسيت الم قوي لا ارادي طلعت مني اااخخخ ، واكفه بالمطبخ احضر والبنات يمي فرح انتبهت وكالت .
فرح : اشبيج جمانه .
جمانه : مادري فرح مغص يروح ويرجع .
فرح : هذا كيس عندج اكيد .
:- ماعرف فدوه انطيني بروفين ابلع .
نطتني بلعت وصحت أمير .
:- تعال اموري روح للعطار الي براس الشارع جيبلي منه عشبه ال..؟. هسه تنزل و ارتاح لان مبين اعراض كيس قبل صار عندي و هيج دمرني .
فرح : روحي ارتاحي واني اصب بمكانج .
وصدك خطيه صبت فرح وشهد العشه وتعشينه كلنه سوه وضحكنه وتونسنه كملت العزيمه واني كوه مقاومه الألم راحت فرح وشهد و ازواجهن وامي بقت يمي باتت وطبيت للحمام اسبح لاحضت نزلت الشهريه كلت اي همزين هسه يخف الوجع مادام نزلت عليه ورحت نمت من نهار متعب حيل عليه وكعدت الصبح هم عندي الم قليل وتنزل كلش قليل راحت امي البيتهم .
أيهم : ها حبيبتي شلون صرتي .
:- حجزت يم الدكتوره راح اروح لان وجع مستمر داتأذه حيل .
:- روحي حبيبتي راح اخذج انتِ وامير و اروح مناك
و من تكملين دكي عليه اجيج .
:- ان شاءلله حبيبي ورحت واموري كاعد بره ينتضرني اجه سرايه طبيت كالت صعدي اسويلج سونار واتاكد صعدت وبدات تسال .
الدكتوره :- حبيبتي انتِ اخر طفل اشوكت جان الج.
جمانه :- دكتوره 2017 بنتي الصغيره .
الدكتوره:هاا جبيره ماشاء الله .
:- اي ماصار عندي بعد وراجعت بس دئماً يكولون مبايضج ضعاف واخذت علاج بس مافاد وسوه عندي العلاج كيس وتركته على الله اذا قاسملي يصير واذا لا الحمدلله.
الدكتوره:- وهسه شنو عندج .
شرحت الحاله للدكتوره وكلتلها.
:- شكيت كيس واخذت عشبه ال..؟ واخذت حب .؟ .
بعدني احجي وقطعت كلامي بصدمه من كالت .
الدكتوره : بس انتِ يا ماما حامل والحمل هسه مهدد بالاسقاط بسبب العشبه الي ماخذتها والعلاج الي ماخذتها .
اسمعها واني صافنه معقوله هل حلم الي تمنيته
صار شكد بايدي اني دمرته وحطمته معقوله ياربي دخيلك لا ، كلتلها.
؛- زين دكتوره اني مرتين حللت و ماطلع حمل عندي والله العظيم راح اتخبل شلون هسه حامل .
الدكتوره:- على كيفج حبيبتي ليش هيج مصدومه ان شاءلله ماكو شي انتِ تعبتي وصارت تقلصات الحمل عندج مثل وجع الكيس صح وتحليل يجوز الحمل صار بنهايه الشهر ومابين عندج بالتحليل وهسه اريد
منج تبقين 10ايام تنامين على ضهرج متتحركين ابد ابد وتاخذين المثبت وان شاءلله يبقه ونشوف بلكي يثبت وويا العلاج ينقطع القطرات الي تنزل عليج .
:- ان شاءلله .
الدكتوره :- زين انتِ ليش مافرحانه .
:- لا والله بالعكس دكتوره بس نصدمت من الموقف .
:- ان شاءلله مابيج غير العافيه .
:- تسلمين دكتوره .
طلعت مشاعري مخبوطه مدري فرحانه مدري خايفه مدري مصدومه لو مقهوره ماعرف ايهم يدك عليه كوه رديت .
" ها ايهم .
" ها عيني كملتي .
" اي خلصت .
" يله اطلعي منتضرج على الشارع .
" اي جيت .
طلعت واني ساكته شافني عقج حاجبه وكال .
أيهم :- ها خير شكالت الدكتوره .
جمانه : انطتني علاج .
:- اكو شي حبيبتي.
:- لا لا ماكو شي حبيبي .
رجعنه للبيت واني اضرب اخماس باسداس شافتني ملك تعبانه كالت .
ملك : ها ماما نامي حبيبتي اني اسوي العشه اليوم روحي حبيبتي ارتاحي .
مشيت تايها ماعرف شبيه ، راحت مليكه سوت العشه تعشو وكلمن راح بفراسه رحت بغرفتي واني ماعرف شنو شعوري احساس بين الفرح والحزن اخاف افقده
أخاف من كلشي ، رحت كعدت على الجربايه وهمست .
:- ايهم .
:- ها حبيبتي .
:- تدري من رحت شكالت الدكتوره اليوم .
:- شكالت يروحي .
:- اني حامل .
فز ممصدك .
:- شنو ؟؟؟
:- حامل اشبيك .
:- صدك والله .
:- اي والله .
:- الحمدلله والشكر حبيبتي الف حمد الك يارب .
اجه حضني وباسني وعيونه تلمع فرح ممصدك ماعرف شلون احجي بس كلت خلي اكوله كلشي يصير رجعت همست بحزن .
:- بس ايهم لتفرح هواي حبيبي .
انصدم بكلامي ومنتضرني احجي ، حجيتله كل شي وهوه صافن كملت وكال بقهر.
:- وهسه شلون جمانه شنسوي .
:- اكو امل انو اذا بقيت نايمه واخذ العلاج ممكن يبقه .
:- اي بسيطه هاي جنه نامي ولتتحركين ابد الاي شغله والاي سبب .
:- ان شاءلله حبيبي .
لاحضت شكد ايهم فرح بحملي يارب يتمم على خير يارب خابرت نور عرفت بحملي وحسيتها ضاجت وكالت .
" ماما صدك هسه اني وياج نخلف سوه يعني وكتها هسه عليج الله .
جمانه
" بنتي هذا رزق ربج حبيبتي منعترض على رزقه .
نور
" مو قصدي اسفه ان شاءلله ربي يتمم على خير عليج .
" ان شاءلله حبيبتي .
" ماما ماراح احجي الخالتي اخاف لا تنصابين بعين .
" والله عليج سوالف نور اي لتحجين اله نتاكد اذا يبقه .
" ان شاءلله ماما .
وبقيت نايمه على ضهري وكلهم فرحو بحملي حتى اهلي فرحو بحملي وبقيت ٥ايام على نومه ضهري ومليكه وروزه فرحانات ويحتارن شيجيبن من جربايه للطفل واني اباوع على فرحتهن وقررت اروح الغير دكتوره واتاكد اذا نفس الكلام رحت واصريت اعيد التحليل وسويت تحليل رقمي هذا اسرع تحليل حمل ويبين حتى اذا جان عمر الجنين أيام وسويته وطلع حمل بس صاير متاخر والهل سبب ماطلع قبل بالتحليل العادي مانطتني اي علاج للدكتوره
وكالت تبقين على علاجج نفسه والراحه وتنامين على ضهرج ورجعت هم ونمت على ضهري ومر كم يوم وبعده عندي الم اخر شي فزيت على الم قوي وحسيت نزل شي رحت للحمام ونصدمت من شفت .
