رواية هو لا يشبههم الفصل السابع والثلاثون بقلم تبارك الوائلي
هلا بالجان مرسوم بخيالي
هلا بليمشي ويضل اعلى بالي
لو عندي غالي بجيتك انساه
واجيت أنتَ بوكت ماعندي غالي
هله يلتارس عيوني وخيالي
هلا بحيلي وبعد حيلي
ضوه عيوني وسهر ليلي
جمانه : فتت للحمام واشوف الصدمه نزل عليه الدم مو طبيعي وصار مغص عندي حيل قوي استمر الألم والوجع لحد ما حسيت وكع شي مثل قطعه شكيت
بي هذا الطفل دكيت على فرح حجيتبها راساً اجتي اخذتني للدكتوره ومن عرفت واكع الطفل احس نفسي فقدت شي نقهرت هوايه الدكتوره كالت .
سكتت مكدرت احجي شي بعد وطلعت اجر بنفسي وجان وجع كلبي اكبر من وجعي رجعت للبيت ايهم ميعرف بالي صار ولا يعرف رحت للدكتوره لان بعده بالدوام دك عليه .
sos185so
مهم
أيهم
" ها جنه شلونكم .
جمانه
" هااا. الحمدلله .
حجيت بتعب وقهر راسا حس عليه وكال .
" اشبي صوتج ؟
" مابي شي رجعت انت .
" اي يله راح اوصل اجيت جنه اكو شي مو .
" لا لا بس تعال .
" اي والله طلعت من المركز اخذت زمنيه واجيت
بقه بالي عليج .
رجع للبيت واول مطب شاف وجهي احمر دم ووضح القهر بوجهي عرف بالسالفه تقدم عليه وكف كبالي وكال بصوت مبحوح كوه حجتها .
أيهم: احجي شبيج ولج وكفتي كلبي .
جمانه: وكع الطفل .
كلتها وبجيت هو انصدم وهمس .
:- لالالالا لا جمانه لتكوليها .
باوعت عليه وصارت دموعي مثل الشلال وبجيت من كل كلبي اجه ضمني بحضنه وصار يسوي بروحه وبيه .
:- والله مامقسوم النه صدكي شفتي مرتين تحللين وميطلع التحليل وبعدين وكع .
:- اني صوجي ايهم والله اني كتلته .
:- لا لتحجين هيج انتِ شمدريج غير حللتي وماكو كافي بجي ماريد بعد بجي ونامي ورتاحي يله حبيبتي .
بقى شويه سكتني وطبيت اتمددت بفراشي حجه وياي شويه وكال .
أيهم : راح اروح للمركز ما اكدر اتأخر اكثر .
:- الله وياك .
طلع وسمعته يصيح .
:- تعال طارق جيب عشه من بره الامك .
:- اي عمو صار .
رح بس لاحضت شكد جانت عيونه مدمعه بس ما راد يبين كدامي شي اني اعرفه كلش زين من ينقهر .
توني نمت و اجتي روزه كالت مقهوره.
روزه: ها ماما بعد ماكو الطفل .
:- كافي روزه حبيبتي ان شاءلله يرزقنه بغيره وتلعبين ويا .
روز : اي ماما أن شاء الله.
مليكه : والله ماما ضجت جنت اكول يجي واسويله ممه ومن تطلعين يبقه يمي .
نقهرت حيل كتلهم .
:- كافي ماما راسي صدع حبيبتي روحي شوفي طارق وين صار علمود اتعشه واخذ العلاج .
ملك : اي ماما راح اخابره هسه .
خابرته وكللها بالطريق وصل وتعشيت اني والجهال واخذت علاجي ومددت وطارق قفل الباب وكعدو كل واحد بغرفته على مبايله دك ايهم .
أيهم
" ها عيني اشلون صرتي .
"
الحمدلله .
" الحمدلله والشكر حبيبتي هذا امتحان من ربج .
" ونعم بالله .
" اكلتي اخذتي علاج .
" اي .
" الحمدلله جنه حبيبتي لتبقين تفكرين ربج ماقسمه الج روحي ارتاحي ونامي .
"ان شاءلله .
سده ونور دكت حجت ويايه وعرفت انقهرت
بعدها دكت كواكب عرفت وكعدت تواسيني الوحيده الي كل الي بكلبي احجي الها لان احسه بس هيه تفهمني تحمدت بالسلامه اليه وغلقته كعدت افكر الحد مانمت وكعدت الصبح عندي مغص قويه شفت ايهم نايم يعني جاي الصبح ماحسيت عليه من طب
كعدت مليكه اجت تسألني .
ملك : ها ماما محتاجه شي.
جمانه : بس سويلي لفه علمود علاجي حبيبتي .
:- اي ماما .
سوت ريوك وكعدت نتريك اني وياها واخذت العلاج وراحت مليكه سوت ريوك الامير وروزه و راحو للمدرسه وبقت مليكه يمي حبيبتي معدله وياي وياي
مرت الايام
تحسنت وتعديت مرحله جانت مرحله حيل مؤلمه بالنسبه اليه الحمدلله عدت وايامي حلوه ويه أيهم
اكعد اطبخ وانضف وادرس الجهال رغم كبرو حبايبي ولسه اكول عنهم جهال فدوه العينهم طارق ربي يحفظه اليه صار رجال بطول عمه هوه صح مواليد ٢٠٠٧ بس ضخم الي يشوفه ميكول عنه ١٩سنه لا يكلوله شكلك تسعينات وهوه يضحك اموري لا شكله ناعم لسه وكصير طالع عليه اني حيل كصيره مادري بعد من يكبر يطول لو يبقى هيج مواليده ٢٠١٢ يعني عمره ١٤سنه يكولون الولد يتوقف طوله بل ٢٠ ان شاءلله يطول اموري هههه حبيبي هسه راح ثالث متوسط ومليكه مواليد ٢٠١٠ يعني دخلت بـ ١٦سنه مليكه بس كملت ابتدائي كعدت بالبيت وقفلت على المدرسه شكد حاولت وياها بس ابد تكعد تبجي متحبها اخر شي قنعتها تقدم خارجي وان شاءلله ترجع للمدرسه طالعه عليه بطبعها حيل
تشبهني عكس نور وروزه حبيبتي ٢٠١٧ يعني عمرها هسه ٩سنوات حيل ذكيه وشطوره وتحب الدراسه حيل عكس اخوتها الي تعبوني حيل وماحبو دراسه ابد. اشكد. حاول ايهم وياهم بس هم قافلين على الدراسه ماحبوها ابد طارق بس كمل ثالث متوسط وترك المدرسه واشتغل بشركه توصيل شغله على الحاسبه والحمداله طارق حيل حنين على اخوته هو اصر يجيب جهاز نور من ولدت ودائما يذكر اخوته بااي شي يلزمهن وفلوس شغله عندي ميلعب بيهن
ابد اني اجمعهن اله اقترح نروح للعمره اني ويا وفلوس عمرتي منه هديه اليه و حاليا ديفكر بالزواج رغم صغر سنه كال .
طارق : ماما اذا رجعنه من العمره اريد تبدين تجمعيلي حتى ازوج اريد اني اكون نفسي بنفسي وزواجي اني اتكفل بي من تعبي .
جمانه: ان شاءلله حبيبي بس ليش مستعجل انت .
طارق : لا ماما ماريد هسه بس اريد اني اكون نفسي
فد كم سنه حتى من اكلج خطبيلي أكون ممحتاج شي .
:- ان شاءلله حبيبي .
اجه أيهم جان يسبح سمع حديثنه ضحك وضرب طارق على جتفه وكال .
أيهم : ها ابو الطوارق تريد تزوج حقك والله ابوك قبل تزوج بعمر صغير و حتى جان حيل ناعم بس هسه انتو ماشاء الله ولا مبين عليكم اللفينات جيلكم كلكم طوال وضخمين .
ضحك طارق وكال .
:- لا عمو مو هسه بس أكون نفسي فد كم سنه والله كريم .
أيهم : عمي ادلل غرفتك عليه هديه عرسك وشتريد بعد اني حاضرلك .
طارق : تسلم عمو حبيبي .
أيهم : ها وحتى القاعه عليه وزفتك كلها اني اشيلها الك .
طارق ' تسلم حبيبي عمو ماعرف شلون اتشكرك انت صرت أب النه وأكثر بحياتي مراح انكر معروفك .
لمعت عيون أيهم فرح وكال .
:- ادلل وليدي والله لااسويلك عرس ماصاير واخلي الكل تحجي بي .
:- ان شاءلله عمو كول وفعل انت .
جمانه :- حبيبي ايهم ربي يحفظك الهم ويخليك النه كلنه .
أيهم : شعندي غيركم اني حبيبتي .
مرت الساعات عادي ، كاعده ودك مبايلي كواكب مقهوره وتحجي.
جمانه
" ها خير كواكب شبيج .
كواكب
"هذا ابن اخوج تعبنه حيل انوب جاي بسالفه جديده يحب بنت اسامه ويريدها وهوه عطال بطال لا شغله ولا عمله ويريد يتزوج وانتِ تعرفين بت اسامه اشلونها هيه وهاجر مينحطن بالعب البنيه صلفه على امها و هيه هم مجلبه اله والبارحه اخوج خابر ابوها اسامه وصارت مشكله شكبرها وبلكوه انحلت .
جمانه " يبوووو ، هسه شودا ابنج عليهم منعرف طبعهم احنه مو حلو ومخربطين كلهم الاب والام والبنيه عيني امنعي هذا ابنج يريد يورطكم .
كواكب " ميفيد خيه بي الحجي اشسوه بينه كسر البيت علينه .
" الله يهدي منكول غيرها كلنه يطلع من السجن ادمي بس طلع ابو طبع ميبطل طبعه .
" اي والله يا جمانه بزعنه منه يله خيه اني دوختج ماريد اطول عليج مع السلامه .
سدته كواكب وكعدت افكر شلون ياربي ، اوف من هل الولد اشكد متعب اهله وابو خطيه صالح حيل نفسيته ادمرت دمار من وره ابنه صار انسان منطوي وميحجي ويا اي احد. حتى اذا نروح عليهم نلكا كاعد وحده بالغرفه ومعزول بسبب ابنه لان حس نفسه صدك مايكدرله ولا يكدر يسيطر عليه الله يكون بعونه حتى اخته تبارك خطبوه اثنين وسالو عن اهلي و من عرفو سوالف اخوها العالم نسحبو من الخطوبه والي عرفته بسبب مشاكل اخوه خافو يرتبطون بيها اقل خلاف يطلع هاد لو يتعارك وياهم
الي عرفته صالح مافكر يزوج ولده ابد لان همه يشتغلون عماله وشغلهم بس الهم ميساعدون ابوهم بمصرف البيت ولا عدهم مسئوليه ابد مادري انكول سبب دلال ابويه الله يرحمه الهم لو دلال امي لهم وحتى ابوهم هم دللهم ومانطو حق ومجال الكواكب تربيهم صح او تعلمهم رغم كواكب ابيت اهلها هيه العمه الجبيره وهيه ربت كل اولاد اخوتها احسن تربيه بس اولاد اخويه ما انطوها مجال بتربيتهم جانو دئما ينضرون اله نضره زوجه الاب وماعاملوها مثل الام ابد رغم اشكد. تعبت عليهم وربتهم بس هذا هم حضها المسكينه كواكب إلى الآن الله ماقسم الها تخلف تقبلت وكالت هذا امر الله وكعدت علمود تربي هل ايتام ورغم شكد. تعبت عليهم بس مافاد ابد واني حسيت من مات ابويه الله يرحمه انكلب بيت اهلي كله صار الصح غلط والغلط صح وكواكب عايشه هل معاناه وياهم وكل وكت نتخابر اني وياها تشكيلي منهم واني ما بايدي غير بس اهون عليها
كواكب انسانه طيبه وحنونه بس هذا نصيبها بعد وكل انسان وله نصيب بالدنيا ، بقيت كل اسبوع ازور اهلي و ازور فرح لان بصف اهلي فرح بعد ماطلقت من زوجها ورجعت تحسن حيل زوجها وصار ابو بيت ومسئول عن كل البيت وفرح هم اتفقت ويا وتعلمت عليه وصارت تاثث بيتها من جديد وترتبه واستقرت هيه وزوجه واطفالها وهسه ابنها ادم يريد يشتري سياره ولاغي فكره الزواج اله فرح فرحانه بابنها حيل وماشاءالله ولدها حيل على كلبها .
نوبات من اروح الاهلي امر عليها نروح لسوك
متشتري شي اذا مدك عليه وتاخذني وياها اني اختار الها حتى ملابس جهالها شهوده حبيبتي منعزله حيل عنه ومستقره هيه وزوجها واطفالها تجي الاهلي بين حين وحين وتمر على فرح لان بصف اهلي اني متجيني اله بالمناسبات او اكو شي ومرات تتصل عليه عكس فرح الي كل يوم دك عليه .
حسان وهدى بعدهم عصافير حب عايشين وحدهم مرات تتصل عليه هدى وننحمع يم امي ومرات تجي عليه البيتي هيه وحسان يتعللون ويرحون
عايشين مرتاحين بحياتهم رغم عمي دائما يزعجهم بسالفه الخلفه بس حسان قافل وميدير يتزوج ، لان يحب هدى وميريد جهال قابل بنصيبه وما ناقصه شي غير بس الطفل بيته جديد وسيارته ويداوم منتسب بالدفاع اسامه نسمع بس الشغلات الموزينه عنه وعن زوجته واطفاله ولسه كاعد ايجار ابيت ماكدر يشتري رغم هو هم منتسب بالدفاع مثل اخوته بس بسبب زوجته وهوه هم الله يسلمه مابطل سوالفه العوج ولا الشرب ما نكول غير الله يهدي على الصح مرات الوم نفسي واكول اني صوجي غلط مني بيوم اختاريت هاجر اله مسكين شكد عانه منها ، بعدين استغفر ربي واكول اني ليش هذا نصيبه من الدنيا الله يسعدهم ويهديهم على الصح. حمودي حبيبي عايش حياته مرتاح لان تزوج بنت خاله عن حب ومرتاح وسعيد ويا اولاده تخرجت زوجته من كليه طب التخدير بس ماكو تعين لسه ماشاء الله بيته حديث بناءه وسيارته وهوه هم مثل اخوته منتسب بالدفاع ربي يحفظه اليه اشكد حنون عليه مستحيل اذا يمر شهر وميدك يسال عليه وباجازته على طول يجيني هوه وزوجته ربي يسعدهم ،
بيت خالتي ام حميد ربي يحفظها من اروح الاهلي
دائما احجي وياها من مبايل كواكب واعرف اخبار ولدها كلهم مرتاحين ويا نسوانهم واولادهم ونسمع الطيب دائما عنهم ومن يصير عدهم شي اروح اني وايهم عليهم وهمه هم كل فتره يجون عليه ويتواصلون ويايه حيل يحبوني بيت خالتي ومرات يجون على امي يشوفوها يمرون عليه واني هم والله من صغري احس بيت خالتي مثل بيتي وعلاقتي حيل حيل طيبه وياهم ربي يحفظهم الخالتي حبيبتي ،
اما عمي ابو هدى هذا حبيبي من صغري احبه الوحيد من عمامي وجنت دائما القبه بعمي الجوزي ههههه لان اسمر طوخ وهوه يضحك على قصص ماي هوبس ضحكتي من ابوسه واشمه صدك اشتم بي ريحه ابويه الله يرحمه ماعافنه ابد من توفه ابويه حتى بالعيد يجي هوه يزورنه الي المفروض احنه نروح نزوره يجينه بين فتره وفتره يسال عن خبارنه اني حسيت اخذ دور الاب النه وراد بكل الطرق يحسسنه ويسد مكان ابويه ربي يحفظه ويطول بعمره يارب ويخلي مرتاح هوه وزوجته ولده ٣ البنات كلهن مزوجات ومستقرات وبيوتهن كلش قريبة عليه حاليا كمل بناء بيته ويفكر يزوج ابنه الجبير
ابو حسان عايش هوه وزوجته وابنه وحده منعرف اخباره بس من ولده نسمع لان ااني وكل اهلي ماعدنه علاقه بي ابد من بعد وفاة ابويه والموقف الي سواها كطعنه كل علاقتنه بي حتى اذا نشوفه بالشارع منسلم عليه .
اما اولاد عمي ابو محمد الله يرحمه بس من يصير شي عدهم نتواصل وياهم وهمه هم يتواصلون ويانه انهار بقت نفس طبعها بقت منعزله بس هيه وزوجها واولادها ابنها تخرج من كليه الاعلام وتعين بشركه ويا ابو محاسب وبنتها تخرجت دكتوره اسنان هل سنه ، ومتجي علينه ابد اله بالمناسبات نشاوف واني هم ماروح عليه اله ادي واجب وبس حتى بالعيد. متجي علينه ولا روح عليه مجرد بالمبايل نتعاب دائما تكول ايهم من تزوج جمانه تغير علينه واني هم عفته على تفكيرها وبنفس الوقت خلصانه من شرها
ام دينا هم تقبلت زوجها وعايشه ويا وخلصت منها ومن شرها ، دينا مرات تتراضه ويا ايهم مرات تزعل واني ما ادخل بينهم ابد عايفتهم براحتهم اما حمواتي على طول يتواصل ايهم وياهن وياخابرهن وكامن يجن علينه خطار يشوفنه ويرحن وعلى كولت امي تكول ماعدهن احد غيركم طبعاً يتواصلن وياكم واني اكول مايصح اله الصحيح اشكد سون ويايه بس كله نسيته وبديت من جديد وياهن اذا مو الخاطرهن الخاطر اولادي يبقن عماتهم
كاعدين وملتمين كل احنه عيد .
جمانه :- فدوه ايهم مو دكيت عليهن كلهن اخواتك
بقت بس طيبه دك عليها وراضيها خطيه مالها احد .
أيهم : جمانه تره هيه زعلت الحالها .
:- ميخالف حبيبي طيبه مينعتب عليها .
كوه اقتنع ودك عليها وتراضو الحمدلله والشكر تبقه اخته بعد فتره كامت تجي علينه ومرات تبات يمنه وتروح واني هم كلما اروح الاهلي الكاها يم امي ونشاوف هناك
خابروني وكالو امي متخربطه ورحنه المستشفى
لكيتها تعبانه حيل وعرفنه امي مضروبه جلطتين بالدماغ سوده عليه واخذناها الدكتور مختص وانطاها علاج ولازم تبقى عليه وضل بالي يمها
صرت ادك عليها ٣مرات باليوم اسال واشوف حالتها
بس صارت تخربط بالكلام بسبب الجلطه
وكوه تحجي مرت الايام و...؟.
إلى هنا نختم بارت اليوم وياكم حبايبي لتنسون التصويت والتفاعل وتعليقاتكم الحلوه هذا البارت قصير ما قبل الاخيرررر كتبته حتى اصبركم
