رواية فصلية بديلة ( شموخ ) الجزء الثاني الفصل الثالث 3 بقلم ام ملكوت

:- مرت الضهريه عادي بس الوضع تازم وصار حضر تجوال وتاجلت روحتي للمستشفى كلش انقهرت وشبه فقدت الامل لان كلت اهلي ماعتقد باقين هواي هنا وهسه راجعين للبصره وعايفيني ..

وانطاه العنوان وعاده اكثر من مره عليه ياله فهمه هذاك وكتبه بالتفصيل منطقتهم بعيده عن الشوارع العامه وضايعه .. فتره تقريب الساعه ووصل الطلب اتصلوا عليه وكلوله بالباب ابو الدلفري طلع جابه ورجع

فرشت السفره عبير وكلمن اخذ طلبه فتحه وبقه ياكل انطه العلاكه لامه واشر علي وكاللهه وهو منزل عينه..

_هذا الطلب مالتهه انطيهه الهه..

انغثيت من تصرفه رغم مابي شي ومن احترامه او خجله ماكال اسمي بس اضوج لمن شخص يحجي عني ومايذكر اسمي المهم تجاهلت هل شي ويني

هسه انه وين هل سوالف افكر بباجر بس كون الكه اهلي او الكاهم مخلين رقمه او عنوانهم عند المستشفى والشرطه .. 

كملنه اكل وانه ماكلت هواي رجعته نصه للثلاجه وكمت غسلت ورجعت للصاله لكيت البنات كاعدات يلعبن دومنه "دومينو" صاحتلي اسراء واجيت

_شموخه انتي وياي فريق تعرفين تلعبيهه لو لا

_لا ماعرف اعفيني عن هل لعبه لا اخسرج

_لا ولج بسيطه شوفي شلون نلعب انه وعبير تالي نسوي فريق تمام

_تمام ..

بقيت اباوعلهن شلون يلعبن ويوصلن النقاط المتساويه سوه ويحسبن ماعرفت شيحسبن وفهيت وكالت بان..

_هاي كاعد تحسب النقاط شوفي هنه كل رقم موجود منه ٧ متوزعات عل صايات اذا عندج ثنين ونازلات سته معناهه عند المقابيل واحد تكدرين

تغيرين الصاي وتحطين رقم تحسبينه ويكون ماموجود عند المقابيل مثلا نازله كل صايات ال٥ وبيدج ثنين هاي سبعه معناهه المقابيل ماعنده صاي بي ٥ 

_هااا هيج يعني الحساب يصير

_اي حبي هسه عرفتي شلون تنلعب

_اي عرفت شكرا عمري

_العفو ولو مو من مصلحتي اعلمج لان خصمي انتي بس ميخالف لازم نلعب بعدل ومايكون اكو غش صحيح

_ههه اي صحيح..

ضحكت خفيف لاول مره من اجيتلهم لهسه انتبهو علي كلهم وابتسموا على ضحكتي نزلت راسي بفشله وبقيت اباوعلهن لحدما انتهت اللعبه بفوز اسراء صفكت فرحانه وكالت..

_يله هسه انه وياج شموخه لا تفشليني خليني اشمخ بيج

_ههه حاضر

_يله هاي سبعه الج وسبعه الي انه وياج فريق لازم نتناقش قبل مانلعب الصايات تمام 

_تمام..

لعبت انه وياهه بفريق ضد فريق عبير وبان وخالتي تشجعنه وراهب يشجع عبير وبان كملنه اللعبه وصارت كلش حماسيه عبالهم راح اخسرهه بس

مايدرون بيه شموخ الكفهه عل طاير .. نزلت اخر صاي عندي وصحت بات وصرخت اسراء طورشت اذني وصارت تاشر على عبير وبان وتضحك تالي حجت ويه راهب ..

_عود انت واكف تساعدهن جا شكد فاهين

_هيه مال لواته غير انتي تعرفين تحسبين اسرع من عدنه 

_وشمالكم انتو ماتعرفون تحسبون خطيه

_تعالي بان كومي خل اصير ويه عبير واشوف شلون تفوزن علي هل مره 

_تحمس الاخر تحمس

_تحمست وهسه احمسج حمس

_هههه يله شموخه بعد اختج خلي نحمس..

ابتسمت وهزيت راسي ب اي خبطوا الصايات ووزعوهن وبدت اللعبه انه حضك يانصيب اجيب واحط وبالاخر نفوز مدري شلون وجان نحمس راهب ونفوز عليه وعدنه الكيم مره ثانيه بس هل

مره شد حيله وتحلف الا يفوز وفعلا فاز علينه ماحس الا طفر على امه وباسهه وهو يضحك ضحكنه على شكله عبالك اخذ الكاس وكام من اللعبه لمن انتبه علي وتحمحم بفشله نزلت عيوني

عنه وكالن البنات خل ننهي اللعبه تعبنه .. رجعنه الصايات بالجنطه وودتهن بان للغرفه هنه والطبله وبقينه كاعدين واسراء تكلب بالانستا دخلت على بيج ملابس بيت تراكات ودشاديش وكالت راح

تطلبلهه لان صار هواي مامشتريه عاد طلبت كم قطعه بس كلولهه السوك معزل مامفتح احد منا لبعد اسبوع هيج من يهدا الوضع .. حجزتهن وطلعت من البيج بقت تكلب بالفيديوهات وسالتني..

_هم تتابعين مسلسل معين 

_ شتحبن بالكوري بس اريد افهم انتي وبان مخبوصات بيهم

_حلوين قصصهم وهمه هم حلوين

_همه مال حلوين فعلا بس مو بحلاة ابن الملحه العراقي ..

اشرت على راهب كبالهه وحجت باوعتله واجت عيني بعينه كبل شتت نضري عنه ورجعت اباوع بالنقاال ورجعت كملت كلامهه..

_انه اتابع تركي 

_شعاجبج بالتركي اشو بس ممثليهم حلوين

_ولج هوه الدنيا كلهه تتابع المسلسلات علمود الممثلين ان جان تركي او كوري او مصري مدام الممثلين حلوين هاي هيه صار المسلسل حلو بعد

_ههه اي والله صدكتي ..

دخلت على مسلسلهه التركي اسمه • مطلوب حب عاجل• ضحكت وكتلهه..

_هاي انتي تدورين حب عاجل

_ههه لا والله احب قصص الحب بس ماريد احب ولا انحب ويع 

_مثلييي والله اكره ماكره قصص الحب والزواج

_والله انه ناويه ابقى بدون زواج

_احسلج وانه متضامنه وياج نو حب نو عرس 

_هههه والله ابقى ببيت اهلي معززه ومكرمه مكابله امي وكاعده شلي بسوالف الحب والزواج

_اي والله اهلي اولى بيه من الرجال الغريب

_هل تزوجن خواتي شستفادن من وره الجهال بطلن من وظايفهن وكعدن يربن جهالهن ويخدم عيالهن وحدتهن جنهه..

_سحيله ان الضروك

_اي والله وين دريتي هاي حجايتي ولج

_لان هاي حجايتي همين صديقتي كلما يجي امتحان صعب تضل تصيح زوجوني ماريد امتحن وانه اكلهه تزوحي وضلي تسحسحي وجهالج يسحون وراج وحالتج حاله مثل سحيله ان الضروك

_هههه سبحانك ربي احس كاعده كبال نفسي قبل كم سنه تدرين انه هم جان عندي صديقتين نفس صديقتج وهسه تزوجت وانسحلت ذيج السحله 

_ههه خطيه والله

_هسه احنه ماكلنه لحد تزوج بس غير كون زوجهه زين ومعدل ويساعدهه بيتهه وجهالهه ويشجعهه بوظيفتهه مو تصير للتربيه والخدمه وبالشهر مره تشوف الطلعه والناس 

_على كولتج اكو بيهن اذا تزوجن وصار عدهن جهال هاي هيه بعد تشوفينهه الهدوم تسحسح والخشم تسحب بي وماملحكه والشعر سيمه مال ماعين والوجه عبالك مريضه نفسيه وكليوم طالعتلهه عله ومريضه والكانونه ماتنشال من ايدهه واليشوفهن ..

_ههههه اي والله والتشوفهن تصيح التوبه ماتزوج بعد

_ههه والله شني هاي هيج هوه داخله حرب خو ماحرب لا ومن يزعل امير زمانه وجهه يصير يذري ومغموته عليمن ياهو يستاهل البس واكشخ ادرس واتوظف وراتبي بيدي واطلع ويه اهلي واسافر

وياهم ضاله كاعده مكابله هل جهال ووجهج يذري منو يفيدج تكضين عمرج كله بالتعب والمرض علمود تربايتهم لحدما يكبرون

وكلمن يروح بحال سبيله ياله تنتبهين على روحج عكبيش بعد عكب ماكبرتي وعجزتي يبوو كلما احجي هيج اتعقد اكثر من الزواج 

_صدكتي والله حتى انه عقدتيني فوك ما انه متعقده من الزواج 

_هههه احسلج خيه

_انتي بصراويه مو

_اي ليش

_لهجتج جنوبيه تخبل 

_نفس اللهجه شنو الفرق

_لا احنه خابطين بين الانباري وبين البغدادي بالكلمات الاساسيه 

_اي بس مامبين هسه انه افتهم عليج من تحجين واكو بعضهم بالبصره يحجون نفسكم لعد وافادي وليجاي اكو هواي كلمات بايكيهه منكم

_ هاي شنو

_والله 

_بعد ماعرف مازايره المحافظات الجنوبيه حتى اعرف شيحجون

_اي مثلما كتلج لهجتهم ماتختلف كلش

_يله كلنه العرب هههه

_ههه على كولتج..

كملنه سوالف لحدما صارت ب١١ كلمن راح لغرفته ورجعنه احنه للغرفه تمددنه ورجعنه نباوع للمسلسل عجبني خوش مسلسل كملت الحلقه

وطفينه النقال وناموا كلهم وعيوني سهرانه وروحي تفرفح على اهلي مادري اذا باجر اكدر اوصللهم او لا فكرت بشيء خطر بس ممكن يوديني لاهلي توكلت على ربي ونمت كوه صابني ارق .. 

للصبح كعدتني عبير ب٧ كمت بسرعه وانه مغمضه وراسي يوجعني يريد ينفجر دخلت للحمام غسلت ولبست ملابس الطلعه الجنت لابستهن بيوم

الانفجار .. لفيت حجابي وطلعت لكيت خالتي بالغرفه شافتني واجت لزمت كتفي تمسد عليه وكالت..

_خالتي حبيبتي اذا رحنه ومالكينه خبر عن اهلج لا تنقهرين وتضوجين ماشي مثلما كتلج من جبتج هنا كلهه ايام ويهدا الوضع وكلمن يرجع لاهله ماشي

_ماشي خاله انشاءلله الكاهم

_انشاءلله بنيتي يله نتوكل 

_اي ..

طلعنه انه وياهه وعبير وراهب راح ويانه نوصله لجامعته صعدنه بالسياره وعبير ساقت السياره مسافه وصلت للجامعه ونزل راهب وتحركت السياره فتره الطريق وصلنه للمستشفى صفت

السياره ونزلنه دخلنه للمستشفى وانه روحي ملهوفه تدور بين الناس عن واحد من اهلي رحنه للاستعلامات وانطيتهم اسمي الكامل واسم بابا ماكو شخص سال عني بهل اسم ولا احد داخل ..

كالو اكو اشخاص ضايعه هويتهم ماعرفو منو همه وين اهلهم ومكانهم خلينه ورحنه لصاله الطوارئ وبقيت ادور واحد واحد وادعي كون مالكه ابوي بيناتهم على حالتهم المزريه ماكو شخص صاحي

كلهم بيهم حروق ومتمددين ورايحه روحهم شاغت روحي وكوه كملت مالحكيت بابا ولا مرتضى الحمدلله وطلعنه انه وخالتي للمستشفيات القريبه دورنه وهم كذلك ماكو رحنه لمركز الشرطه

ولكيناهم موقفين كلشي عن بحث وغيرهه لان شبكه المعلومات ماتشتغل عدهم مدري مركزيش هذا خلينه وطلعنه ماضل كدامي بس هل حل الفكرت بي امس ..

دخلنه بين النسوان وتركت ايد خالتي بدون ماتحس ومشيت بغير طريقهه ابتعدت عن المركز وبقيت اركض مسافه طويله شفت سياره تكسي

جايه مافكرت باي شي حبي واشتياقي لاهلي عمى عيوني اشرت للتكسي وركبت وكتله ياخذني للكراج باوعلي بعيون خبيثه بس تجاهلته اعتمدت

على ثقتي بنفسي العمت علي ضنيت ان اكدر امنعه اذا حاول يخطفني او يسويلي شي بس خاب ضني لمن تحركت السياره مسافه طويله ودخل بيع

لمنطقه صحراء مابيهه بشر وقله البيوت بيهه اتلفتت منا ومنا وباوعتله وسالته بقوه عكس الرجفه الجتاحت كلبي..

_وين احنه عمو مو كتلك اخذني للكراج

_اي بعد عمج هنا هسه تلكين كراج بي هواي سيارات وكلهه من التعجبج بس اصبريلي شويه

_لا ماريد وكف السياره هنا لو رجعني ماريد اروح للكراج بطلت 

_يمكن انتي ماتعرفين هل شي بس اليصعد بهل تكسي مايكدر بعد ينزل منه الا وهو بين اديه ميت او حي

_شنوو نزلني كتلكككك نزلننيي يا بن الحرام نزلنييي والا الم العالم عليك هسه نزلنييي..

بقه يضحك باستهزاء ويمشي بالسياره حيل باوعت بالانحاء مالكيت شي اضربه بي رفعت راسي وشفت صارت مجموعه بلوك مسطره وحده فوك

الثانيه ماهمني حياتي بكثر ماهمني الراح يسوي بيه بهل لحضه هجمت عليه لزمت الستيرن ولفيته على جهه البلوك ماحس الا انضربنه بي وطارت

السياره فوك البلوك وتكلبت بيه غوشت عيوني وحيلي انهد رجلي ماصرت احس بيهه ورقبتي وجسمي صار من كل مكان يون علي من الوجع .....

___________

_في مكان اخر_

:- فزيت من نومي بشهكه وصحت باسم بنيتي كلبي نغزني وحسيت صاير بيهه شي باوعت لشهم النايم عل سديه وداخل غيبوبه مايدري بروحي التمرمرت وحدها

بقيت الوب وين اروح بهل ضهريه وين انطي وجهي .. بنتي وين لكوها الشرطه لو لا صفنت بزماني وتذكرت الصار قبل اكثر من اسبوع...

بعد حادث الانفجار الصار ضيعت بنيتي وحيدتي من ايدي بيومهه تخبلت وبقيت ادور عليهه بين الناس عفت مرتضى وسلام وشهم واختي حلى

وروحي فرفحت على شموخ بقيت ادور لحدما اخذني لازدحام يم الانفجار واشوف الناس المتكومه ومتطشر لحمهه لطمت على كصتي

وتهسترت ضنيت بنيتي وياهم ضنيت شموخ راحت من ايدي بقيت اصرخ لشهم وصوتي ضاع بين اصوات صريخ العالم بقيت امشي واصيح

باسم شموخ.. شخص لزم ايدي والتفتت شفته شهم اخذني لحضنه من شافني ابجي واحجي مثل المخبله وخرت وكتله..

_شهم بنيتي ضاعت شموخ راحت من ايدي ضاعت بين الناس شموخ راح تموت الحكلي دخيلك بنيتي راحت من ايدي ..

انه حجيت هيج وهو ماصار حاله احسن من حالي لزم كلبه وبقه لازم ايدي ويمشي مثل التايه يدورهه طلعني من بين الناس وداني داخلي

الضريح يم حلى وساجد وجهالنه وراح هو يدور عليهه بقيت منتظره على نار وماحس الا صار انفجار من نفس الجهه الراح بيهه يدور لزمت كلبي وصرخت باسمه طلعت ولزموني حلى وساجد

وبقيت اتحارب وياهم اريد اوصل لحبيب روحي ودنيتي كلهه فلتت ايدي منهم ورحت اركض الناس تشرد من المكان وانه اركض وادخل للمكان صار

صوت اسعافات واطفاء وشرطه ملهه التمت وانه عيوني تدور بين الناس عن شهم صرخت باسمه مرتين وواحد من المتصاوبين رفع ايده ولكيته شهم اي هذا شهم حبيبي اعرفه من خاتم ايده

رحتله اركض واشوف الدم والسواد تارس راسه وايده اخذته بين اديه لمن شفت الشرطه تفارق بين الناس وتطلعهم من المكان سحبته من صدره وشافني شرطي اجه شاله عني ووداه لسياره

الاسعاف ورحت وياه بعدما اشرت لساجد من بعيد واجو ورانه هوه وحلى والجهال .. ركبت يمه وهمه خلوله اوكسجين لان انملت رئته دخان ويضمدون بايده المحتركه وصلونه لمكان نقلو بي كل الجرحى

عباره عن مستشفى صغيره حيل حتى ادوات مابيهه وطلعت عياده مال مضمدين دخلوه لصاله نوموه عل سديه وبقوا يلفون بجرحه علكوله مغذي

وانه روحي انمردت شفت حلى اجتني من بعيد بس وصلت يمي ذبيت حيلي عليهه بجيت على بنيتي وشمعه بيتي وماحسيت على شي الا فتره

فتحت عيوني على اثر بزه ابره بايدي شفتهم كاعد يخلولي مغذي وحلى يمي تمسد على راسي التفتت عليهه وسالتهه بروح ذايبه..

_بنيتي وين حلى وين شموخ لكيتوهه جبتوهه مو 

_لا يروحي بس هسه نلكاهه همه الناس الجانو هناك كلهم اخذوهم الشرطه والاسعافات هسه احاجي ساجد يروح يدور عليهه بالمستشفيات والمراكز انتي بس اهدي لا يصير بيج شي وين انطي وجهي بعد

_اريد بنيتي حلى جيبولي بنيتي 

_نجيبهه يروحي بس اهدي غمضي عيونج نامي حتى تهدين مدام انطوج ابره مهدئ وانشالله بس تكعدين نروح ندور عليهه ومنا رجلج نسيتي حالته تردين يكعد ومايلكه بته ومرته يمه ..

شهكت وغصيت بعبرتي وصرت ابجي بحيره مادري التهي بضياع شموخ بنيتي لو جروح حبيب روحي وابوهه .. بقت حلى تهدي بيه فتره وماحسيت على نفسي الا دخلت بنوم عميق .. 

هناك وكعدت على اثر هوه فتحت عيوني وشفت هواي ناس جايبين بصاله الطوارئ لان المستشفيات مامكفيه جا شكد جرحى وموتى ياربي دخيلك كون بنتي عايشه 

ومابيهه شي دخيلك .. اجت اخذتني حلى هيه ومرتضى وجهالنه البقيه يم ساجد كاعدين رحت لمكان شهم وشفته بعده نايم وكال ساجد..

_ الدكاتره والمضمدين ملتهين بالناس الجرحى مايكدرون يجون يفحصونه.. 

سمعت هيج وتخبلت رحت شفت دكتور واكف يفحص بواحد منهم وتوسلت بي يجي يفحص شهم ويشوفه ليش لهسه ماكعد .. اجه وياي بعدما

خلص فحص الناس وشاف شهم وسال من يمته هوه هيج وكناله صارلي من الصبح لهسه بليل فحص راسه ورفع راسه مثل المصدوم وكال للممرضين الواكفين بعيد ..

_سياره اسعاف بسرعه المريض صاير عنده نزيف داخلي اخذوه للمستشفى وحولوه جراحه دماغ بسرعه..

هو كال هيج لو انخبصنه وانه ماعرفت شصار زلزال نزل على كلبي هل كلام رحت لزمت ايد شهم وانه احاول اصحي بي تمنيته يكعد او يحرك بس

اصبع ايده دليل على صحته بس عبث الدكتور لزم ساجد ورزله لان ماجه بلغ عنه لمن ماكعد وره ساعه وكله ان الممرض فحصه وكال عادي راح

جاب الممرض وذيج الرزاله المعدله وكتب بي كشف وانه رحت وره شهم لمن اخذوه للمستشفى الجبيره القريبه بسياره الاسعاف ولحكته ليم غرفه العمليات ومادري شصار هناك بعد.. 

دخلوه لغرفه العمليات وبقيت انتظر على نار وابجي وادعي ربي ينجيه ويردلي زوجي وبنتي يارب بحق هذا الشهر محرم الحرام وبحق اولاد سبط نبيك المصطفى عليهم افضل الصلاة والسلام

ردلي زوجي وبنتي سالمين وبصحتهم وعافيتهم يارب دخيلك يارب مالي غيرك انت تعرف البيهم ومكانهم لا تحرمني منهم وردلياهم سالمين ربي لا

تكسر كلبي بيهم ربي دخيلك ساعدنه وطلعنه من هل شده دخيلك يارب..اجه ساجد وحلى والجهال بقوا ينتظرون وياي وبعد فتره مو قصيره طلع الدكتور وكال ..

_نجحت العمليه رغم واجهتنه مشاكل واضطرابات بالاعصاب بس الحمدلله ربي نجاه بس راح نخلي لغرفه العنايه المشدده نراقب وضعه منا لباجر خاف تصير مضاعفات ..

_الحمدلله يارب الحمدلله شكرا دكتور شكرا الك 

_العفو واجبي ..

طلعوا لغرفه العنايه وبقينه ننتظر ماقبلوا نبقى كلنه سويه بالمستشفى عاد اخذهم ساجد واجرلهم غرفه بفندق قريب ورجع يمي كلي اروح ارتاح بالفندق بس ماقبلت شلون يهون علي اعوف شهم بهل حال

وبنيتي ضايعه واروح ارتاح .. بقيت بالمستشفى وساجد مل ساعتين اكثر يروح يطمن على حلى والجهال ويرجع يمي لثاني يوم الصبح وعيوني

ماضاكت النوم والهنى .. مرت الصبحيه والضهريه وماكو ماكعد شهم حجينه للدكتور واجه فحصه ومرد روحي لمن كال..

_للاسف المريض دخل غيبوبه مؤقته جان هل شي متوقع حدوثه بنسبه %50 بس لا تخافون لان هاي الغيبوبه علاجيه للدماغ وراح تكون مؤقته يعني بيا ساعه يفتح عيونه انشاءلله ويصحى بس حاولوا تحجون وياه بشي يحفزه حتى يكعد لان يحس بيكم..

خليت ايدي على حلكي ورحت كعدت عل كرسي يمه خليت جبيني على معصم ايده وفاضت روحي بدموعهه بقيت ابجي بهضم وبس صوت شهكاتي تنسمع ..لحدما خلصت دموعي رفعت راسي باوعت لساجد وكتله..

_خويه ساجد بنيتي فدوا جيبلياهه ترى خلص كلبي والله ماتحمل بعد يصير شي ببنيتي دورهه وجيبهه الي خويه اريد بنيتي منك

_انشاءلله خويه انشاءلله راح اطلع من هسه ادور عليهه بالمستشفيات والمراكز انتي بس خلي إيمانج بالله جبير وانشاءلله نلكاهه صبري خويه شده وتزول انشاءلله 

_انشاءلله تزول ويرجعولي بنيتي وشهم انشاءلله..

ربت على كتفي خفيف وراح يدور على شموخ رجعت جبيني على معصم ايد شهم وبقيت صافنه بزماني وكأني عايشه بحلم لا كابوس وبأي لحضه افتح عيوني والكه زوجي وبنيتي وعائلتي كلهم يمي ...

ومر الاسبوع واكثر وهذا حالي انه اروح للفندق اسبح وابدل وارجع للمستشفى واليوم روحي صارت تلوب على بنيتي كلبي يكلي صاير وياهه شي نزلت دموعي جمره على خدي رفعت راسي

ودعيت ربي يحميلي بنتي ويردهه الي وين ما جانت وصارت رفعت باطن ايد شهم وشميتهه حيل وشهكت مهضومه ماعرف لحضه خيال لو حقيقه بس حسيت بيده تحركت او رجفت خفيف فزيت

ورحت صحت الدكتور اجه فحصه وكال بعده ما صحى من الغيبوبه وهاي رجفه طبيعيه بخلايا الجسم تصير .. خاب املي يلي انزرع للحضه بكلبي

ورجعت كعدت فتره ورجع ساجد ومرمر كلبي لمن كال ان ماكو خبر عنهه ولا بمكان ولا الهه اثر وهذا حاله كل يوم يروح يسال عنهه ويكلوله بعده الجهاز عطلان ومر شهر على الحادثه وبيوم.....

_في مكان اخر_

شموخ_

غوشت عيوني وحيلي انهد رجلي ماصرت احس بيهه ورقبتي وجسمي صار من كل مكان يون علي من الوجع فتره وضحتلي الرؤيه وشفته هل كل* مدمه ونص جسمه طالع من السياره تحسبت عليه

و كوه سحبت روحي يم الباب وحاولت افتحه حيلي ماكاعد يعيني واخيرا بعد عناء وايدي تكصكصت من الكزاز كدرت افتح الباب الامامي سحبت جسمي وطلعت من السياره زحوف ابتعدت

عن السياره وحاولت اكوم وامشي على رجلي اعصابي كلهه ترجف والدم تارس ايدي وراسي .. التفتت واشوف السياره نايمه على وجهه ومخسفه مشيت مسافه طويله وضعت بالصحراء وصلت

بيوت قريبه بس خفت ادك باب احد بيهم واستمريت امشي بالشوارع المابيهه بشر بسبب حضر التجوال والخوف مرد كلبي والزاد الطين بلى

صار رعيد قوي وانه اتلبد جوه السقايف تذكرت اهلي وخنكتني العبره تندمت عل ساعه العفت بيهه ايد امي وايد خالتي كله من وره عنادي لو

لازمه روحي وضاله بيت الناس لحدما ارجع لاهلي جان ارتاحيت وين موليه للبصره بهل وضع ومن كل عقلي اكدر اوصل لميسان بامان ..

بقيت ابجي بحيره مادري شسوي ووين اروح واخيرا بعدما دكني المطر خوش دكه شفت سيارات جايه من بعيد رغم خوفي بس توكلت على ربي وكلت يارب اجعلني من ودائعك التي لا تضيع ولا

يمسها شر الا باذنك واحميني .. شديت قبضه ايدي ورحت اركض عليهن وكفتهن كبال وحده منهن وبقيت ااشر بايدي لزم بريك لمن وصل يمي

فتح الباب ونزل اجه علي بسرعه تراجعت خطواتي لمن شفته كبالي رجف جسمي ونطقت باسمه وبعدها ماحسيت على شي روحي ذابت وحاوط السواد عالمي ...

____________

:- للُقياكَ ڪــــــــــــــانَ لي املٌ 

ومن لُقياكَ بات الامل مفقوداً

ڪُنتُ اطيل حين القي مقالتي

في حينها تهوئ أن تُـــفاتحني

تࢪجو بـأن ،

تُحدد لي موعداً مَحــــــــدوداً 

أدࢪڪتُ أن هذهِ بدايتــــــــــنا

فڪيفَ النهاية، مـــــــتـــــــأكد

بأنـني ســــأُرَد مـــــــࢪدوداً

.

.

:- كملت ريوك وانه واكف وطلعت لكراج بيتنه لزمت جنطتي خليتهه بالصندوق وركبت الدراجه الناريه حاولت اشغله بس ماشتغلت جيكت البانزين وطلعت فارغه ومامنتبه عليهه ضربت التاير برجلي بعصبيه

وبحيره شفت عبير وامي وشموخ طلعن من البيت .. عفت الدراجه اخذت جنطتي من الصندوق ورحتلهن طلبت من عبير توصلني لان تاخرت عل جامعه ركبت بسيارتهه بالصدر ووره امي وشموخ وطلعنه 

مسافه الطريق وصلت للجامعه ودعتهم ونزلت توجهت لساحه الكليه ولاكاني المسلبح اوس وجماعتنه صاح علي بصوت عالي من بعيد ورحتله ..

_هاا رهبانووو

_هاا لك قشمر شلونك 

_لاااه

_ششكو ولك

_طالع اكشخ مني اليوم

_الله يطيح حضك عبالي نسيت اخلاقك بالبيت..

طكوهه ضحكه جماعتنه وحك راسه اوس باحراج اجيت يمه خليت ايدي على كتفه غمزتله وهمست..

_شلونهه سهمك 

_مرمره كلبي هاي

_ههه بعدهه مامنطيتك عين

_ولك خل تنطيني نظره منهه ياله تنطينياهه هسه هيه

_الله يساعدك خويه شكلك راح توكع زايد بيهه

_اي والله اكول خو ما تفتر وراهه انت

_لااا يولي منين جبت هل حجي هسه انه عفت الدنيا كلهه اروح افتر وره اليحبهه صديقي واساسا انه حتى ماشايفهه

_اي عبالي شفتهه مكرشه عليك وسحبتهه

_شمكرشه علي ماتكلي

_جا ماتدري انت

_شنو 

_لا ماكو شي خليك هيج ماتدري احسن

_دحجي لا تصير ناقص شكو

_لا هيج سالفه ماتهمك خاف اكولهه وتجلب براسك نوب واطلع انه الخسران

_على سهمك

_شمدريك

_لان شفتك تغير لونك دحجي خويه اخوك كفو ماتلعب عليه افكاره 

_اي سمعتهه مره هيه وصديقاتهه يتناقشن علينه وجان تكلهن ان بس راهب يسوه راس القسم كله والبقيه فاشلين

_اهوو عبالي مدري شكو شنو الجديد مثلا

_على كولتك اذا انت اخذت حبيبتي بالسادس وخليتهه تحبك بقت على هاي

_اللهم اني بريئ لا حبيت حبيباتك ولا حاولت اخذهن منك وهنه ينجذبن الي من الله

_ لا من عبدالله 

_ههه هسه عوفنه من هل موضوع شلطشت شنو اول محاضره عدنه

_اي ماكتلك

_شكو نوب يول

_اليوم يجينه العقيد^^^ يشرف على تدريبنه

_اها يعني جاي اليوم يشرف علينه وانتو واكفين هنا مثل الطرامه دمشوا خل ندخل نحضر نفسنه لان نترزل كدام خلق الله تالي

_اي يله هوه احنه جنه متانين رئيس قسمنه عشتو يجي وهل اجيت خوش جيه 

_شقصدك ولك

_جاي بسياره اختك ماتستحي

_يمعود هوه انه طالب جامعي شتترجى مني مثلا يصير عندي سياره منين اجيبهه من شيب الخلفوك

_هم صدك انه لو ما شيب الخلفني جا ماصار عندي سياره عل عموم يله ماضل شي انشاءلله كلهه جم سنه وتصير ملياردير ومحد بحالك

_انشاءلله ياخوي يله ندخل يمعودين تاخرنه

_اي يله نروح 

رحنه دخلنه لغرفه التدريب جهزنه شغلاتنه لبسنه زي التدريب مالتنه وحضرنه مسرح الجريمه المزيف للاختبار واجه الاستاذ هو والعقيد ضربنه الهم تحيه وبدينه بالمحاضره وره كم ساعه مرت

مثل رمش العين كثر ما هل ماده والاختصاص احبه ماحس عل وقت لمن ادخل بتفاصيله .. انطانه ماده امتحانيه لبعد يومين وطلعوا الاستاذ والعقيد بعدما انطانه محاضره بالانضباط وواجب

بيتي بهاي القضيه لمينه اوراقنه وملاحضاتنه نزعنه الزي غسلنه نفسنه من الدم الاصطناعي وطلعنه بالساحه نفتر ردت اخذ نقالي من جيبي ومالكيته دورت عليه بجنطه الضهر ماكو دخلت

للقاعه الجنت بيهه دورت هم مالكيته كلت خاف طايح منا منا اتصلت عليه من اوس هناك وردت علي عبير صوتهه مخنوك ويرجف ..

_الو 

_الو ها عبير نقالي يمج طلع

_اي هذا انت راهب همزين اتصلت الحكلي يمعود البنيه ضاعت مني

_شنو شصاير يابنيه ضاعت

_شموخ ضاعت بالازدحام من ايد امي وماندري هسه هيه ضايعه مخطوفه رايحه لمكان مانعرف رحنه لمركز الشرطه سوو بيهه نداء بس ماقبلوا

يكتبون بيهه قضيه فقدان او خطف الا بعد ٢٤ ساعه وهسه احنه كاعد ندور بالشوارع القريبه بلكي نلكاهه وماكو هاي صار ساعه

_شسالفه وين راحت يعني ووين كاعد تدورين انتي هسه

_كاعد ادور قريب المستشفى 

_تمام ابقي دوري هناك وانه طالع ادور عليهه بالشوارع العامه القريبه عليكم خاف رايحه لمكان

_تمام يله وانطيني خبر لو لكيتهه

_تمام يله باي

_اوك باي..

سديت الاتصال منهه واوس يراقب جان من خلصت مكالمه كبل حجه..

_تريد نروح بسيارتي

_جايبهه

_اي هل صافه بره وحمزه هم خلي يجي ويانه ندورهه كلنه سويه نلكاهه اسرع

_تمام يله امشي

_بس كلي منو من خواتك الضايعه

_مو من خواتي

_لعد شنو

_امشي هسه بالطريق اسولفلك 

_تمام ..

طلعنه بره ولاكانه حمزه كلناله محتاجينه وماكال لا ركبنه سيارتين وصديق حمزه همين اجه ويانه بسيارته .. صرنه ٣ سيارات طلعت من الجامعه ..

وبالطريق حجيت لاوس عن قصتهه وتعاطف وياهه وهز راسه باسف وانه سيطر على افكاري شكلهه وصوتهه وبقيت اتسائل 

وين راحت وشلون ضاعت ما معقوله الشخص يضيع مرتين وبنفس الطريقه حسيت ان السالفه بيهه ان ..تطشرنه كل سياره بجهه

ندور عليهه مع ان مايعرفون شكلهه بس انطيتهم اسمهه واذا شافو بنيه وحيده بالشارع يسالونهه اذا هي شموخ ويردولنه خبر اذا لكوهه..

ضلينه نجوب الشوارع و ندور بالساعتين كامله ومالهه اثر ايقنت ان الحوم بالشوارع بشكل عشوائي مايرهم ولا بي نتيجه..

صفنت افكر بيهه لحضات واخذت نقال اوس اتصلت على رقمي وردت عبير علي..

_الو 

_ها عبير اكلج شفتوا كاميرات المراقبه بالمستشفى 

_لا مايقبلون كاعد نقنع بيهم وحتى رحت للمركز وبلكي هسه ينطونه رخصه ويفتحون الكاميرات 

_تمام ابقي حاولي وياهم وبس يقبلون اتصلي علي قبل ما تفتحون الكاميرات 

_تمام 

_تمام يله باي

_باي ..

سديت الاتصال وكلت لاوس يتوجه على مناطق البناء الفارغه من البشر واحنه نتوجه اله اتصلت عبير ..

_الو ها 

_ها راهب انطونه رخصه وراح يفتحون الكاميرات 

_تمام شوفيلياهه هيه طلعت من المستشفى لو احد طلعهه 

_لحضه ابقى وياي عل خط خل اشوف

_تمام

_ياا هاي هيه عافت امي وطلعت تركض

_من يا اتجاه طلعت 

_باتجاه السيطره 

_تمام هسه روحي للسيطره انطي خبر الهم وخلي يفتحون كاميراتهم 

_لحضه لحضه هاي ركبت بتكسي وراحت

_شنوو

_ اي والله هل ركبت بتكسي صفره وطلعت

_خلي يسوولج زوم على رقم السياره وردي الي

_تمام لحضه ... الرقم ما واضح كلش بس اكدر اعرفه من هيئتهم

_ردي التكدرين عليه 

_تمام سجل يمك .. ^^^^^ KO4

_تمام هاذهو بعد انتو رجعوا للبيت انه هنا راح ابقى ادورهه

_تمام ردلنه خبر لمن تلكاهه

_انشاءلله..

سديت الاتصال واوس حجه..

_هذا رقم سياره التكسي 

_اي 

_ادخل على جهه الاتصال اكتب عمي ناصر اتصل عليه خل اكله يطلعلي موقع التكسي 

_تمام ..

سويت مثلما كلي اتصلت عليه حجه وياه تالي دزيتله رقم التكسي برساله نصيه وكال فد نص ساعه ويطلع الموقع سديت الاتصال وستمرينه ندور الشوارع وانه بالي يمهه

احس كلبي فور نار كلما ادخل بشارع والكاه فارغ لو اشوف بنيه من بعيد ويفز كلبي بامل تكون هيه ويخيب ظني بقيت افكر بيهه واتذكر لمن كالت اختي انهه انفقدت حسيت وحده من اهلي فقدتهه رغم

مابقت عدنه بس كم يوم بس صارت جزء من عائلتنه وكلنه انه واهلي على نفس الرأي لان بينه طبع النعاشره ولو يوم واحد نعرف البي ومابي

وعلى صفاء نيته نحبه ونستعز بي وشموخ من حلاوه اسلوبهه واحترامهه ويانه وخجلهه عرفنه انهه خوش بنيه ومؤدبه وخلوقه تدخل للكلب بدون استئذان ..

رد علينه عم اوس وانطانه عنوان التكسي وطبعا اوس خبره على هاي القضيه وراح يطلع دوريه هو وضباطه يدورون عليهه بمكان التكسي الحالي لان طلع موكفهه بمكان مهجور 

وهل شي تقريبا اثبت النه انها مخطوفه لان الطريق السلكه جان من المستشفى للمكان هذا ماوكف بسيطره او بكراج لهذا يشتبه بي خاطفهه بنسبه 90% ..

خبرت الشباب الطلعوا وياي وكلنه تجمعنه وتوجهنه لهل موقع وبعدنه باول الطريق وماحس الا صارت كبال السياره بنيه لزم اوس بريك بسرعه ونزلنه 

رحت عليهه اركض بس هل مره ماضنيت انهه شموخ كلبي وعقلي راد يجذبني ويكلي شموخ مو هيج شكلهه هاي مو هيه .. اباوعلهه الدم مغطيهه

من كل انحاء جسمهه رفعت راسهه وضرب لايت السياره بوجهه وفعلا طلعت هيه تقدمت عليهه كالت اسمي وذابت روحهه طايحه بالكاع تخبلت من شفت حالتهه والف سالفه اجت براسي

عن سبب حالتهه هاي صرت مثل المخبل نزلت عليهه اخذتهه بين اديه وبقيت اضرب بوجهه خفيف حتى تصحى بس عبث شلتهه ودخلتهه للسياره وطرنه بيهه للمستشفى وبقينه فتره طويله لان باخر الدنيا احنه

خفت عليهه كلش حالتهه تبجي الصخر التفتت اباوعلهه واحس كلبي انمرد عليهه من اسمعهه تون وتنده لابوهه .. كلت لاوس يوكف السياره ونزلت صعدت وره يمهه خليت راسهه بحضني واخذت

بطل الماي غسلت وجهه من الدم واديهه وانه احاول اخليهه تصحى فتحت عيونهه خفيف وحجت بصوت مبحوح قربت اذني يمهه وسمعتهه تهلوس و تتوسل بيه..

_عوفني ماريد اروح وياك وديني للكراج اريد اهلي اريد اروح لبابا

_حاضر اوديج لاهلج بس انتي ابقي مصحصحه وياي لا تغمضين شموخ

_شتريد مني ليش جايبني هنا

_وين جايبج

_بالصحراء ليش جبتني 

_لا رايحين للبيت مو انتي تردين ترحين لاهلج

_بس انت كلت ماوديج لاهلج راح تجين وياي

_انه راهب مو هذاك خلاص شموخ انتي يمي لا تخافين محد راح ياذيج

_انت مو متت شجابني يمك مو كلبت السياره وموتك 

_استغفرالله ربي لك اوس سوق بسرعه البنيه راح تتخبل احسهه مو بعقلهه كاعد تهلوس 

_عادي خويه من الصدمه وتلكاهم مخدرينهه النذاله وكاعد تهلوس هسه بس نوصل انشاءلله ينطونهه مهدئ وتنام

_تمام خويه تمام

رجعت عيوني عليهه واشوفهه صافنه بيه هناك وكالت..

_انت منو 

_انه راهب شبيج شموخ لا تخوفيني عليج انه راهب ابن خاله وفاء 

_انت راهب

_اي انه راهب وانتي يمي ماكو شي ياذيج بعد انتي هسه بامان

_راهب اذاني 

_منو الاذاج وداعتج ماخلي يصبح عليه صبح

_موته انه موته كلبت السياره بينه وموته صرت مجرمه

_لا ماموتي احد انتي مو مجرمه

_لا شفته وجهه كله دم انت انت ماشفت سنونه

_شبيهن

_يخوفن جنهن مال وحش 

_ولج شموخ شبيج لا تعلين كلبي اصحي فدوا اروحلج لا تتخبلين علي تالي

_اي هو مخبل اي جنه هذا جيرانه القديم سنونه سود ويفتر علينه يخوف بيه وانه جنت ابجي واروح لماما 

_اريد ماما اريد بابا وديني الهم 

_اوديج والله بس خل يهدئ الوضع اطلعهم الج وين ماجانوا 

_بابا جان يحبني هواااي

_اي ادري بي

_وين تدري انت جنت عايش ويانه

_لا بس حسيت هيج

_زين تدري ماما جانت تغار مني 

_ليش

_لان بابا يدللني وهي لا

_لا ماكو ام تغار من بتهه

_اي اعرف بس تدري شنو

_مره صار زعل بيني وبين ماما وبابا راضاهه تعرف شلون

_ههه شلون 

_دخلت للمطبخ وشفته حاضنهه ورافعهه يحجي وياهه وهي اووو 

_هههه شبيهه

_خجوله بعد حيلي وجهه صاير ريانه 

_اااخ بويه كلبي 

_شبي هم صار ريانه

_هههه استغفرالله ربي لك خويه اوس شسالفه ماكو مستشفى قريبه

_ماضل شي ونوصل ابقى احجي وياهه انت لا تخليهه تنام

_تمام..

_اممم ماعرف احب ماما لانهه ربتني واحب بابا لانه يدللني 

_حب مصلحه يعني 

_لااا شسالفه حب فطري هذا بس كاعد اكلك ليش يعني

_هاا تدرين انه ابوي هم جان يحبني 

_صدك 

_اي ابوي جان يفضلني على خواتي لان وحيد 

_ليش هو الوحيد ينحب ويتدلل عود ليش مثلا ها

_ههه بعد من الله جاي على حشف ونشف مو انتو هيج تكولون اهل الجنوب

_ايي يابن الغربيه هيج نكول احنه اهل الشركيه

_ولج انتي غير من البصره منين اجالج شركيه بعد

_وين ادري وبعدين تدري انه ماما من البصره وبابا من ميسان 

_هههه منو تحبين اكثر البصره لو ميسان

_انه عايشه بالبصره حاليا بس احب ميسان اكثر

_شتحبين بيهه

_من نروح لبيت عمو باقر نشوف الزرع والصخول والخرفان اكو صخله صغيرونه شكد حلوه تشبه احسان احب الريف

_منو احسان

_ابن عمو ساجد هذا فد واحدد عفطيي

_عهههه ليش شبي

_يحب البنات شبي بعد

_ همه كلهم الشباب هيج عمر يحبون البنات

_بس انت ماتحب البنات

_ منو كال ماحبهن

_ليش جا انت تحبهن

_احب بس امهات خدود حمره 

_عااا يعني كلما تشوف خدود حمره تاكلهن

_هههه لا مو كلهن بس خدودج الحلوات بنظري

_ياذني

_شنو هنه

_خدودي 

_ليش ياذنج 

_دائما يفضحني اريد اذبهن ماتاخذهن انت

_ههه شلي بيهن هنه عليج احله انه اخذهن اصير قوطيه معجون 

_هههه اااخ راسيي

_اسم الله على راسج كافي لا تضحكين ولج اشتهرنه وحزام الحمزه

_اششش اششش..

اباوعلهه بقت مخليه اصبعهه على حلكهه وتكول اشش حتى لا تضحك مثل السكرانه واخيرا وصلنه للمستشفى شفتهه شويه صحصحت نزل اوس جابلهه كرسي متحرك 

نزلتهه كعدتهه بي ودخلناهه للطوارئ اجولنه الشرطه عبالهم احنه مسوين بيهه شي فحصوهه وكالوا مسويه حادث سياره لزمت كلبي وباوعت لحالهه جانت الضلمه ساتره هواي من جروحهه ..

نايمه وصافنه بالفراغ والف هم براسهه رجعت للدكتوره وكتلهه انها انخطفت ولكيناهه بعد ٤ ساعات بهاي حالتهه متجرحه وتهلوس .. 

انطوهه مهدئات وكتبتلهه تحويل للطب العدلي حتى ياخذولهه فحص احنه دخلنه تحقيق اخذونه الشرطه على صفحه وطلبو اقوالنه كلنه اتصلت على عبير وامي وشهدن ان ضاعت واحنه رحنه

ندورهه وبطلاع الروح لمن اتصلوا بالمستشفى وطلبوا تسجيل الكاميرات واخذوا سجل المكالمات بيني وبين عبير ياله فكوا ياختنه بس بقينه تحت المراقبه

منا لتطلع نتائج الطب العدلي ويشوفوهه اذا مغتصبهه احد او لا وتشهد شموخ علينه.. طلعنه بالصاله وانه روحي تلوب بقيت ادعي ربي ان مايكون بيهه

شي ومايطلع صاير وياهه يلي فكرنه بي .. هناك وطلعوهه بالسديه رحت يمهه والتفتت علي ساكته رفعت ايدهه تصيحني ورحت يمهه وكالت بصوت مخنوك تريد تبجي ..

_راهب وديني لبابا طلعني منا فدوا

_حاضر هسه احاجي الدكتوره واطلعج تمام..

هزت راسهه ب اي ونزلت دمعتهه وجهه اصفر والدم ماخذ طريقه من راسهه لرقبتهه .. ودوهه لغرفه المضمده وكعدت تنضف بجروحهه .. 

طلعت نتائج الاشعه مابيهه كسور بس رضوض خفيفه بالجمجمه ورجلهه بيهه فسخ خفيف.. تالي طلعت نتيجه الطب العدلي والف الحمدلله طلعت مابيهه شي محد واصللهه .. فركت وجهي وزفرت براحه

حسيت توه مشه الدم براسي كعدت عل كرسي مقابيلهه بغرفه الطوارئ وهي نايمه على اثر المسكن .. غمضت عيوني ورجعت راسي عل حايط صاحني اوس من وره البرده وطلعتله ..

_ها خويه شلون صارت البنيه

_كالت الدكتوره ماكو شي خطير ويه الوقت تتعالج والحمدلله نتيجه الفحص الطبي سلبيه محد متقربلهه 

_اي الحمدلله على سلامتهه 

_الله يسلمك بعد خويه انتو بس تنطي اقوالهه البنيه روحوا الشباب اكيد تعبوا وماقصروا اليوم وياي وكفتكم مانساهه الكم وانشاءلله اردهه بالافراح 

_لا شتحجي انت راهب غير اخونه انت اذا ماوكفنالك المن نوكف

_ماتقصرون والنعم منكم

_الله ينعم عليك انه هنا راح ابقى اذا تحتاج شي صيحني

_لا بعد راح نطلع فد ساعه على مايخلص المغذي وتكعد نطلع

_تمام انتظركم انه حتى ارجعكم بسيارتي اهلك اتصلت عليهم

_لا وين اتصل نقالي يمهم بعد انت تعرف

_اي صدك والله راح من بالي انطيك نقالي تتصل عليهم وتطمنهم اكيد هسه كاعدين على نار وخايفين عليهه

_تمام انطيني ..

اخذت النقال واتصلت على رقمي وردت عبير بسرعه ..

_الو

_ها عبير انه راهب تطمنوا ولا تخافين لكيتهه شموخ بس خطيه متاذايه صاير وياهه حادث سياره و الحمدلله مابيهه شي خطير هسه فد ساعه على ما تخلص المغذي وتنطي افادتهه للشرطه اخذهه ونرجع للبيت

_يااا سوده علي شصاير وياهه شلون سوت حادث ووين

_بعدين ياخويه من نرجع للبيت تسولفلكم الصار وياهه لان انه بنفسي ماعرف من لكيتهه جانت حالتهه حاله وبسرعه اغمى عليهه وعرفت من الدكاتره ان صاير وياهه حادث سياره لان ابو التكسي خاطفهه

_ياا صخام بوجهي لك خطيه والله ربي يشفيهه ويكومهه بسلامه بس كون مامسوي بينه شي النذل 

_لا الحمدلله مامسويلهه شي لان كدرت تصرف وتشرد منه هيه بعد سباعيه ماينخاف عليهه 

_اي الحمدلله طمنتني بعد احنه راح نبقى ننتظركم ديربالكم بالطريق من ترجعون 

_ تمام انشاءلله خل اروح يمهه يله اشوفهه خاف تكعد

_تمام يله بيباي 

_باي الله وياج..

سديت الاتصال ورجعت النقال لاوس ورحت تشكرت من جماعتي وكالو ان الشرطه منعتهم من الروحه وبقوا تحت المراقبه لحدما تكعد شموخ وياخذون اقوالهه ..

رجعت يمهه وبقيت صافن بحالهه وافكر ياترى شصار وياهه ووصلهه لهل حاله شنو من موقف وخوف شافته حتى دخلت بصدمه

وبقت تهلوس رغم مالكوا بجسمهه اي اثر للمخدر .. تنهدت وفزيت لمن فتحت عيوني وصارت تون كمت بسرعه عليهه وحجيت وياهه..

_هاا شموخ بشنو حاسه شنو الياذيج

_راسي ياذيني

_اي هسه اجيب الدكتوره تنطيج مسكن ويروح الالم..

هزت راسهه ب اي ورحت سالت الدكتوره واجت وياي فحصت راسهه وكتبتلهه مسكن ابر رحت بسرعه جبتهم ورجعت لكيت الشرطه يمهه كاعد يحققون وياهه وياخذون افادتهه دخلت بسرعه وحجيت ويه الشرطي الواكف على جهه ..

_العفو منك سيدي بس البنيه توهه كعدت وراسهه ياذيهه مايصير بعدين تحققون وياهه

_مابيهه شي انشاءلله غير العافيه راح نسألهه كم سؤال وهاي هيه

_تمام سيدي اكدر ادخل يمهه مو

_اي ادخل بس لحضه شتصير منهه انت

_قرايبهه

_من اي ناحيه

_ابن خالتهه

_همم تمام يله فوت

دخلت يمهه وجان ضابط كاعد عل كرسي يسالهه وهي تجاوبه بكل ثبات وثقه تفاجات بيهه شلون ماخايفه من الشرطه وشلون اختفت الصدمه منهه بلمح البصر ماشاءالله بقيت صافن عليهه وهي

تحجي وتوصف الصار بس بتقطع كل شوي تسكت وتلزم راسهه وترجع تحجي كوه عبالك تهلوس ماكدر امنعهم واطلعهم وهمه يحققون وياهه ولا همه يحسون ويشوفون حالتهه ويرجعون بغير يوم.. بي رغم كلشي احس اليوم تعرفت على شخصيتهه وشفت جانبين حقيقيين منهه ثقتهه وثباتهه ودفاعهه عن نفسهه بهيج موقف وطريقه

كلامهه بالسياره وطريقه كلامهه هسه تختلف تماما وبالحالتين تجبر الشخص يحبهه ويصير عنده فضول يتعرف عليهه اكثر ويكتشف هواي جوانب من حياتهه وشخصيتهه ...

أخذوا افادتهه ووكفونه كبالهه خاف واحد من عدنه جان وياه وكلتلهم لا اجو يدورون علي هذول الشباب واخيرا فكوهم الشرطه جماعتي وراحو

لبيتهم واحنه كذلك بس خلص التحقيق صارت القضيه بيد الشرطه وهمه راح يحققون بالسالفه اخذوا رقمي علمود المحاكمه لان صارت قضيه

خطف ولازم يسوون استدعاء لشموخ ويحققون وياهه بسبب الحادث السوته بالخاطف اذا جان محاوله قتل او دفاع عن النفس طلعوا من يمنه وراحوا اخذت شموخ ورجعنه للبيت بسياره اوس ..

مسافه الطريق وصلنه للبيت ونزلنه سلمت على اوس وتشكرته ركب سيارته وراح دخلنه جوه احنه ولاكتني امي والبنات اخذوهه بالاحضان وصاروا يطمنون عليهه

وهيه مستحيه منهم على السوته .. دخلنه للصاله كعدتهه امي وكعدت كبالهه وضلت تسولف وياهه..

_خاله شموخ شلونج هسه بشنو حاسه

_تمام خاله بس شوي راسي ياذيني هسه اخذ مسكن ويروح الالم

_الحمدلله بنيتي بس كليلي بشنو فكرتي حتى تعوفيني وترحين بدون ماتحجين 

_مادري خاله اسفه كلش حسبت اني اكدر ارجع لميسان واشوف عمامي بس الصار عكس الردته مو بيدي اهلي طكت روحي عليهم وانه مادري شصار بيهم ووين همه وبس عمامي يكدرون يوصلوني بيهم

_جان كلتيلي يا خاله وهسه حضر تجوال ماكو دخله وطلعه من المحافظات ولو الوضع مستقر جان انه بنفسي اخذتج لعمامج بس ماشوفين مخليتج هنا يمي 

_عذريني خاله ماجان عبالي هيج الوضع ضنيت ان خلص حضر التجوال وتفكيري باهلي قادني وسويت هل شي 

_خلاص حبيبتي فاهمتج والله بس لا تعيدين هل شي بعد احسن الصار هسه لو متضرره اكثر شكول لاهلج لو اجو وعاتبوني وانتي امانه عندي والله ماسامح نفسي لو صاير بيج شي لا سمح الله 

_اسفه خاله حبيبتي ماتنعاد انشاءلله بعد

_انشاءالله يله خاله حبيبتي كومي سبحي وبدلي حتى تتعشين وتاخذين علاجج وتنامين تمام 

_تمام انشاءلله..

:- كامت شموخ راحت لغرفتهه وانه اخذت علاكه العلاج ورحت وراهه لغرفه البنات دكيت الباب ودخلت لكيتهه تريد تنزع الحجاب تحمحمت ودخلت ..

_احم هاي الادويه مالاتج تاخذينهن بعد الاكل هسه راح اكتبلج عليهم بقلم ماجك حتى تتذكرين اوقاتهن تمام 

_تمام

_وبعدين اي شي تحتاجينه او يصير ودي علي وحده من البنات يكلولي لا تغلسين على نفسج لو تاذيتي وتصير عندج مضاعفات 

_انشاءلله ..

طلعت الادويه واحد واحد وكتبت عليهم كم مره باليوم تاخذهن كملت ورجعتهن بالعلاكه وطلعت كبسول المسكن انطيتهه حبايه بايدهه وبطل ماي شربته وكتلهه..

_بالشفا انشاءلله 

_تسلم

_يله هاي الادويه مالتج ولا تنامين قبل ما تتعشين تمام

_تمام شكرا الك

_العفو يله رايح انه ..

هزت راسهه ب اي باوعت لعبير الصافنه علينه وكتلهه على نقالي انطتنياه وطلعت من الغرفه توجهت لغرفتي ذبيت ملابسي ودخلت للحمام سبحت ونشفت وطلعت بدلت ملابسي 

ونشفت شعري ومشطت ورحت للمطبخ لكيت اسراء تسوي عشا لشموخ كبده شوي ولبن وفواكه اجيت سويتلي لفه تصبيره للعشا لان بعد وقت ساعه ب٦ المغرب ..

اخذتلي كلاص لبن وطلعت للصاله كعدت وبقيت اكل يم امي وهيج مر اليوم المتعب ونمت وانه عقلي مشغول بتفاصيل كلامهه بالسياره اول مره اخذ راحتي ويه بنيه واسولف وياهه بهل طريقه

رغم جانت تهلوس ومامنتبهه شتحجي بس انه جنت صاحي واعرف كل كلمه حجيتهه الهه ..وكأن هذا الحادث صار حجه حتى افكر بيهه وتبدي تتخلخل بداخلي ...

.

.

:- فتحت عيوني على صوت العصافير المعتاد شفتهه الساعه ب٦ الصبح حيل صار من امس لليوم نايمه مر شريط كبال عيني باحداث البارحه واخذتلي صفنه بزماني لمن وعيت ولكيت نفسي بالمستشفى...

فتحت عيوني على اثر الم براسي لكيت راهب كبالي يحجي وياي والقلق مبين على وجهه سالني عن حالي وحجيتله راح يجيب الدكتور شويه ودخلوا علي الشرطه مانكر اني ماخفت 

بس مو من التحقيق لا وانما بسبب الفوبيا العندي من الزلم كلولي نريد ناخذ افادتج وتشجعت وحجيتلهم كلشي مره وحده حتى اخلص ويطلعون من يمي اجه راهب وباوعتله بتوسل بلكي ينهي

هل تحقيق ويطلعون من يمي بس مافهم علي .. واخيرا كمل التحقيق واخر شي جابوا الولد يلي شفتهم ويه راهب من نقذوني وكتلهم ان مالهم علاقه بيلي صار وياي وقعت على افادتي

وكالوا ان ممكن يدزون علي بالمحكمه لان راح يحققون اكثر ويشوفون اذا هاي جريمه خطف او قتل او بس دفاع عن النفس افترت السالفه علي نوب

لان سببت الحادث مالتنه .. كتلهم حاضر وراحوا من يمي اجه راهب باتجاهي وكتله يطلعنه من هل مكان راح شويه تالي رجع وكال..

_يله نروح راح ياخذنه صديقي الاجينه وياه

_لحضه راهب 

_ها كولي محتاجه شي 

_لا بس اريد اسالك شنو حجيت وياك بالسياره اتذكر بقيت اسولف بس ماعرف على شنو

_لا هيج سولفتي عن حياتج بيت اهلج وانه اصلا بقيت اسالج حتى لا تغفين وتدخلين غيبوبه تالي لا سمح الله

_خو ماحجيت شي غلط وياك

_لا ابد والله سوالف عاديه 

_هاا تمام شكرا الك لان افتريت الشوارع ودورت علي لو ما وصلت بهذيج اللحضه يجوز بقيت نايمه بالشوارع والله اعلم شجان صار بيه

_لا العفو اهم شي رجعتيلنه سالمه يمعوده ماتدرين شنو من افكار اجت براسنه لمن شفناج صعدتي بالتكسي واختفيتي بمنطقه مهجوره وخاصه من

شفت حالتج وقتهه تخبلت كلت هاي لا محاله مسوين بيهه شي بس عجبني انج صرتي قويه ودافعتي عن نفسج وماسمحتي لهل انذال يمسون حتى شعره من راسج

🍀

_الحمدلله ربي حماج وعداهه على خير بس اوعديني ماتسوين هيج بعد احنه مو كنالج ان الوضع من يهدئ ندور على اهلج انتي اكيد تعرفين محافضتكم وتعرفين منطقتكم شسمهه ونكدر بس ينفك الحضر ناخذج الهم

_صحيح اعترف هل مره الغلط مني رغم مو طايشه انه بالعاده وافكر زين بس بعد صارت لحضه غباء واخذت المقسوم منهه وانشاءلله ماتنعاد بعد توبه 

_وهذا الصحيح يله خلي نتوكل نرجع للبيت الكل منتظرج بالبيت وكلبهم على نار 

_والله مستحيه من خالتي ماعرف شلون راح اخلي عيني بعينهه

_لا امي بس خافت عليج و تعرف السبب لسوايتج فراح تعذرج ويمكن تعاتبج شويه بس ميخالف تمون عليج مو

_اي والله على راسي حتى لو ترزلني انه الغلطانه بالنهايه واستاهل الرزاله

_لا حشاج يله نمشي

_ يله ..

كمت عدلت حجابي بالحمامات واشوف وجهي شلون متجرح ومضمدينه صاير عباره عن لزكه جروح اباوع لاديه متشخطه وبيهه شك مخيطينه

وراسي لافين عليه شاش ابيض غمضت عيوني وتذكرت لحضه الحادث اجه على بالي بابا ونزلت دمعه مهضومه على خدي كلت حسبي الله ونعم

الوكيل مسحت دمعتي  ولبست حجابي وطلعت لاكاني راهب خلينه وطلعنه من المستشفى ركبت بالسياره وصديقه كال..

_الحمدلله على سلامتج خويه ماتشوفين شر انشاءالله 

_تسلم خويه الله يسلمك

_يله نتوكل ..

تحركت السياره ورجعنه للبيت منا وصلت ودخلت وانه متردده ومستحيه من خالتي بس هيه بعد عيني مازعلت مني واخذتني بالاحضان حضنتني وكالت..

_سوده علي خاله شصاير بحالج بنيتي منو مسوي بيج هيج الله لا ينطيهم الصحه انشاءلله 

_حادث خاله صار وانتهى والحمدلله طلعت منه سالمه 

قاطعنه كلام اسراء لمن خلت ايدهه على ضهري تمسد عليه بحنيه وتحجي..

_شلونج هسه حبيبتي خو مامتاذيه كلش

_لا عمري بس شويه راسي كالت الدكتوره بس اخذ مسكن يهدئ المه 

_الحمدلله على سلامتج بعد روحي يله دخلوا خلي البنيه ترتاح ..

_ماتصورين شكد خفت عليج كلت خلاص البنيه راحت من ايدي وكله من وراي انه الاخذتج وياي وضيعتج

_لا عمري انه العفت ايد خالتي ورحت انه الغلطانه واعتذر لان خوفتكم علي 

_يله المهم انج بخير وماصار عليج شي الباقي كله سهل اهم شي سلامتج

_يروحي انتي ..

دخلنه واستلمتني الخاله عتب ووياهه حق بكلشي حجته مدري شلون غلطت وسويت هل سوايه اخر شي تحمدتلي بالسلامه وباستني بجبيني تجبر خاطري ابتسمت واخذتني عبير للغرفه كعدت

شويه ودخل راهب حتى ينطيني العلاج وكف يحجي وياي وانه مركزه وياه تالي انتبهت على نفسي اني ماخذه راحتي ويا بالحجي عبالك شخص يقربني

حجيت ويه نفسي شمالني تخبلت اول تالي احجي ويه ولد غريب عني واخذ راحتي للحضه تراود صوت باذني لمن يكلي احب بس خدودج فتحت عيوني بصدمه شنو هذا الصار

شنو هل ذكرى الطفيفه المرت على اذني معقوله هو حجه هيج وياي لو مجرد حلم هذا تذكرته باوعتله وهو يوصفلي اوقات الادويه حاولت اتذكر بعد شنو حجه بس ماكو عبالك اختفت هذاك

الوقت من بالي اتذكر ان حجينه وسولفنه هواي بس ماكاعد تذكر التفاصيل .. كمل ووصاني انطي خبر لو صارت عندي مضاعفات هزيتله راسي ب اي وتشكرته وطلع من الغرفه تمددت واجت عبير يمي وكالت..

_عرفتي هسه يمته تاخذين دوج 

_ها اي باجر الصبح مو 

_هههه حقج خيه اخوي يجيب العين لروحه مالومج على صفنتج بي

_لااا والله ماصفنت بي بس جنت احاول اتذكر شنو هلوست بالسياره بطريقنه للمستشفى 

_عادي ولج شكو بيهه ليش توترتي شفايتلي وتصيرون عصافير حب ملينه من شوفه البلابل نريد نشوف حقيقيين 

_لا خيه اعفيني مستحيل اصير بلبل حب ويه شخص مكتفيه بنفسي ولو تحولت الاحوال يجوز انعجب بشخص بس مستحيل احبه وتوصل بيه للزواج منه

_ليش ولج اخويه شنو بي قصور وماتحبينه

_لا حشى مابي اي قصور بس انه هيج ماحب سوالف الحب والزواج وغيرها 

_هههه اي اعرف مو حجيتيلنه هذاك اليوم بس حبيت اتشاكس وياج مدامج توترتي

_بحال مشاكساتج هسه انه يا عبيره 

_حقج علي يله تمددي ارتاحي اسراء كاعد تسويلج عشه شويه وتكمل حتى تاكلين وتاخذين علاجج وتنامين 

_تمام 

تمددت شويه واجت اسراء جايبه صينيه العشا خلتهه عل ميز وكمت عدلت كعدتي وكعدت كبالي صارت تلف لقمات وتنطيني اكل شويه شويه لان

_ادري بيج ماتذكرين شنو تاخذين علاج ويمته انه اخيتج بهيج امور اساعد اخذي هاي الكبسولات وباجر الصبح تاخذين هذولي وتغيرين ضماداتج تمام

_تمام حبي شكرا

_العفو عيوني..

اخذت الدوا شربته وكمت غسلت حلكي ورجعت تمددت عل جربايه وخطيه اسراء فرشتلهه فراش بالكاع ونامت ماقبلت تنام يمي خاف تاذيني من تحوس 

ولا قبلت انام انه بالكاع عاد تغطيت ونمت للصبح ومثلما تعرفون لان نمت من وقت كعدت الصبح على صوت العصافير كمت من مكاني دخلت للحمام غسلت عيوني وسنوني وطلعت لفيت حجابي 

على راسي ورحت للصاله البيت اعرج من رجلي المورمه طلعت والبيت هدوء وبس صوت البلابل رحت يم القفص مالتهم وفعلا طلعن حلوات رغم ماحب الحيونات والطيور وخاصه طيور الحب من

وره اسمهن بس شكلهم كلش حلو بقيت صافنه عليهن واشوفهن شلون واحد ينظف بالثاني فززني من صفنتي صوت خشن جاي من وراي التفتت وشفته راهب باوعلي وكال..

_صباح الخير 

_صباح النور 

_شنو مانايمه 

_لا نمت بس كعدت شبعانه نوم 

_هاا تمام شلون صار راسج

_احسن من امس والمسكن موجود كلما ياذيني اشربلي حبايه

_تمام هاذهو الحمدلله على سلامتج 

_ربي يسلمك ااا تريد اسويلك ريوك مدامني كاعده

_لا مشكوره هسه تكعد اسراء تسويلنه ريوك مثل كل مره 

_ لا خل اسوي انه هل مره كأمتنان على اهتمامكم وخوفكم علي البارحه خليني اسويلكم شي بسيط على الاقل

_تمام اذا تكولين هيج براحتج التريدنه سوي

_اي 

_رايح انه ابدل ملابس الجامعه وانزل 

_تمام اخذ راحتك..

ابتسم وصفن لحضه بوجهي وتوجه لغرفته وانه رحت للثلاجه طلعت الطماطه والفلفل والكيمر والمربى والبيض خليت البيض بقوري بي ماي و

عل نار وكصكصت الطماطه وكليتهه بالطاوه وخليت الكيمرات بالصحون اجت اسراء وفززتني لمن كالت..

_شكاعديه تسوين ولج من الصبح 

_فززتيني ولج هيج اليدخل لا احم ولا دستور

_كلت اكو فاره بالمطبخ ماخذه عني الريوك خلي اداهمهه

_هههه فوكاتهه

_ههه اي 

_ماشي ماعيدهه بعد

_احسن هههه صباح الخير حبيبتي

_صباح النوم عمري 

_شلون صرتي 

_الحمدلله احسن 

_الحمدلله اي شكاعد تسويلنه ريوك بله

_طماطه كلي وبيض سلك واجبان هذا الاعرف اسوي ققط عذريني ههه

_عاشت ايدج والله بس لا تعيديهه انه هنا اسوي ريوك لا تقربين يم الطباخ وتحتركين لا سمح الله 

_شنو طفله انه 

_اي بعدج كلشي ماتعرفين والنار ماتعرف طفل لو جبير تاكل الاخضر واليابس 

_اي صحيح يله بس هل مره كلت ادللكم لان تعبتو امس واخذت نص طاقتكم كلت اعوضكم طاقه 

_تعبج راحه بس قابل شنريد احنه غير ان تتوبين وماتعيديهه بعد 

_انشاءلله تنذكر ماتنعاد 

_عفيه الشطوره 

_هههه..