رواية قيود العوف الفصل الثاني والاربعون 42 بقلم ريتا

-عوف: تمت المُهمة 

گال الكلمة وأخذ تلفونة ثواني بعدهة سدة وخلاه بجيبة باوعت بوجه قاسم ورجع باوعلي ..

-قاسم: شنو شبيك خوية ؟ 

-مصطفىٰ: أگلك يمكن من الصدمة والزهرة 

-عوف: يا صدمة ليش شصاير ؟

-مصطفىٰ: وعلي صحيح من الصدمة صار يخربط !!

ضرب قاسم علىٰ رجلة وگال بحرگة ..

-قاسم: الوضع فيطي 

-عوف: دكااافي هتلية هواي سولفتوا 

گال قاسم بذهول وصدمة وهو يباوع أله ..

-قاسم: عود صدگ ترىٰ الدنيا راح تنگلب علىٰ روسنااااا !!

گعد علىٰ القنفة براحة رجع ظهرة عليها وأبتسم ونظرة يتنقل بيناتنة ..

-مصطفىٰ: لالا اكو لويصة صايرة هنا انعل ابووي سووادييين الصابتكم شصاااير وعلي گلبي لعببب منكم اثنينكم ناصبين عليه ؟؟؟

-قاسم: انچب ماتشوفني حالي من حالك واصلة عندي للستارر شنااصب راسك صفح

حطيت عيني بعينة مرتاح عكس شكلة قبل شوية وعكس تصرفاتة صار عندي شك ميلت راسي وحچيت ..

-مصطفىٰ: والزهرة مسويلك دالغة مااااتحچييي يمعووووووود 

-عوف: منتظركم تسكتون حتى أغرد انفتگتوا دكاااافي قنادر بحلوگكم 

مسحت وجهي وگعدت توجهت نظراتة بيناتنة وچان يضحك سودني وضعة أريد اعرف شلون أتغير هيچ شصااار أردف قاسم وگال بحيرة ..

-قاسم: هااااك أستلم والله سودني والحسين ضرب عندة فيوز 

-عوف: أعتذر منكم شباب بس چان لازم تأدون دوركم بشكل صحيح ..

-مصطفىٰ: هاااي شنو ؟

قدم نفسة عدل ظهرة شبك أيديه ببعضها وگال ..

-عوف: الصار چان جزء من المُهمة 

-مصطفىٰ: شنيييي ؟؟

-عوف: اي والله 

-قاسم: خو ماكو شيء والمعلومات والوثائق والأدلة المختومة مو كلها طلعت و وصلت ألهم ؟

-عوف: ماكو شيء اتسرب وكلها محسوبة هاي 

طبگت حواجبي وباوعت أله بغموض وحچيت ..

-مصطفىٰ: زين شلون ما اتسرب شيء والبنية أخذت كل شيء من غرفتك وانطتة إلهم ورجعت وبأيدهة أمها يعني سلمت واستلمت و وضعك قبل شوية يشرح هذا الشيء ويأكدة ؟

                                            

              

                    

-عوف: چنت علىٰ يقين تام أنُ حامد راح يوصل لجُمان بعد ما صارت أمها بين أيديه لأن اجاني وحاول يضغط عليه بكل وسيلة وما اهتميت أله وهو المكسب الوحيد الي بأيديه تجاهي هي أم جُمان لا يگدر يأذيها ولا يگدر يرجعهة بنفس الوقت بس يگدر يراهن بيها 

-قاسم: ااااي ؟

-عوف: من وگفت گبالي وشفتهة بهاي الحالة فاقدة وكل بالها يم أمها تأكدت أكثر راح يتواصل وياها ويضغط عليها حتىٰ يحقق مُبتغاه تلفونها رابطة من زمان علىٰ الحاسبة من سالفة نور الدين ويوصل الي كل شيء ربطتة لأن چنت أعرف راح أحتاجة بيوم .. فعلاً أتواصل وياها بطريقة قذرة حاول يستفزها ويضغط عليها بصور لأمها وبعدها فيديوهات وهو يعذب بيها ويتصل بيها ويساومها والي مثل وضع جُمان بهيچ حالة ماراح يگدر يفكر حتىٰ 

-مصطفىٰ: بس چانت تگدر تنطيك خبر ؟

-عوف: حطيت أحتمالين واشتغلت عليَهن اثنينهن

-قاسم: كمل سيادتك عيوني ؟؟؟..

-عوف: هنا سحبت تسجيل المُكالمات أخذت التسجيل وصعدت أخذت كل الملفات والمعلومات الي تخص المُهمة غيرت كل شيء طلعت حاسبة ما أستخدمها ألي فترة سحبت كل الي چان بيها فرغتها وضفت بيها معلومات غلط رسمت مُخطط مايمد للي مخطط اله بصلة وتركتة 

-قاسم: والختم ؟

-عوف: مزور .. كل الأوراق والختومات الي عليها چانت مزورة تركت الجنطة وقسم من الأوراق بداخلها تركت المُكان فوضىٰ حتىٰ مايصير أكو شك أو أنتباه بعدهة سحبت الملفات وأخذت كل شيء يخص المُهمة وعفت الباب مفتوح وفتحت الباب الخلفي للبيت وطلعت .

-مصطفىٰ: ايااااابه !!

-عوف: ولأن هذا الموضوع ماينحچي بيه علىٰ التلفون خابرتة وگلت اله جايك سيدي خليتة علىٰ علم وأمنت كل شيء يم سيادة العميد ورجعت بهاي الأثناء دخلت شفتها گاعدة منتظرتني بـس قبلها انا چنت مطلع علىٰ المحادثة الي دارت بيناتهم عرفتها منتظرتني بس الي صدمني طلبها 

-قاسم: ليش شنو طلبت منك ؟

-عوف: رادت نستلة نمبر وان بـ٤ وربع الفجر 

-مصطفىٰ: شنو هلطلب العفطي 

-عوف: حتىٰ أطلع فترة طويلة وتبقىٰ تدور عليهن 

-مصطفىٰ: وهنا انتَ طلعت تجيب إلها النستلة ؟

-عوف: لأن أعرف بدافع شنو طلبها 

-قاسم: رغم كل هذا چان عندها حل وهو أنُ تبلغنا بدل الصار 

-عوف: گلت الك انا حطيت أحتمالين الأول تبلغني وچنت متمنيها أمنية ماتحط سچينة بظهري وتخليني علىٰ علم بس للأسف هاي چانت خيبتي وصدمتي من طلبت طلبها ولبيته إلها ومع هذا كله رجعت وچنت أتمنىٰ لأخر لحظة ماتسويها وخابت ظنوني أكثر من شفتها طالعة وانا راجع خليت الحماية تتبعها وتكون بظهرها وأمنت ألها المُكان الي تواجدت بيه ..

            

              

                    

-مصطفىٰ: دخت وعلي راسي راح يطگ ولك شني هاااي !!

-عوف: بـس أكو شيء حيرني 

-قاسم: وألي هو ؟

-عوف: لا ماخذة المُخطط ولا ماخذة الحاسبة فقط الملفات 

-مصطفىٰ: هسة مال نگول ما أنتبهت الهن هاي واگفة 

-عوف: هي رفضت تاخذهن بالمُكالمات الموجودة عندي نكرت وجودهن 

-قاسم: شلون گدرت تقنعة ؟

-عوف: ما اقتنع بالبداية وأصر عليها وضغط بشكل مُبالغ بس أصرت ماتاخذهن بس قنعتة بالملفات المختومة بهيچ حالة مايحتاج ألهن بعد 

-مصطفىٰ: لأن مارادت تنطي كل شيء فكرت أحتمال تكون الحاسبة والمخطط يفيدنك

شغل جگارتة أخذ نفس منها زفرة وگال ..

-عوف: هسة هاي مو مهم بالحالتين عاكسها عليهم انا

-مصطفىٰ: غير فلك أسود أنتَ يبعد راسي 

-قاسم: انا هم عندي سؤال محيرني وضعك و وضعنا قبل شوية وردة الفعل شنو موقعها ؟ 

ضحك وگال ..

-عوف: وضعي و وضعكم هذا كله چان جزء من الخطة .. 

-مصطفىٰ: من خررب حظييي أدري شطلعت هااااي 

-عوف: بيوم الي طلعت لبغداد ولگفت نور الدين وأتأكدت شكوكي وعلاقتة بحامد جريتة من أذنة وحطيتة جوة أيدي و بدون مايحس عليه حامد خليتة يشتغل يمه ويشتغل يمي يزودني بالمعلومات

-مصطفىٰ: عاااالو بيييك يالمنك تجيي العيييييلة

-قاسم: شبيييك تصهل حيوان 

-عوف: الله يطيح حظكم 

-مصطفىٰ: عوفك من هذا الزمال كمل بعد أخوك ليش لعبتها علينا احنة هم ؟

-عوف: لأن چنت احتاج ردة فعل حقيقية خالية من كل تصنع واتفاقيات حتىٰ هذا التسجيل يوصل لحامد ويقنعة ومايشك بالي بين أيديه غير حقيقيات ويستخدمهن بداعي تسريب معلومات سرية و هنا أكون ضربت عصفورين بحجر واحد وينتهي أخر جزء من المُهمة بدون خسائر .

صفنت بيه لثواني بعدها صوفرت بوجهة مذهول وحچيت .. 

-مصطفىٰ: أرفع الك القبعة سيادة الرائد لاعبهااا لعببب معدددل لدرجة عبرت عليناا وحق الحسين !! 

-قاسم: انا بعدني قيد الصدمة ولهسة أفكر بالعقوبة الراح نبلعهة وبأرواح الناس وعلي ومستعد انطي ردة فعل ثانية 

-عوف: أحيانًا تضطر فـ لازم تتحايل 

-مصطفىٰ: حتى علىٰ الأقرب الك ؟؟

-عوف: نعم حبيبي 

-مصطفىٰ: يعني هسة انا وقاسم صرنة مضحكة 

-قاسم: يااااا وسفة عييييب والزهرة

            

              

                    

-مصطفىٰ: شوووف هاي ضريبة الثقة أخوي 

-عوف: ميخااالف ياااسفلة لخاطر العراق

-مصطفىٰ: لك يسسستاهل العررراق 

-قاسم: اويلييي بعد روحي العرااااق يااااكلنيييي

نهضت ربتت علىٰ كتفة وحچيت بفخرر ..

-مصطفىٰ: يااابعد راسي أبو العوف ذيييب أخوووي ذييب والحسن العسكري ولو صرنة مضحكة وعبرتها عليناا بدوالغك بس يله شنسوي هذا تاليتة اليصاحب مثلك 

-عوف: عينااي

-قاسم: يعني هسة نگول سلملي للجماعة ؟

رفع التلفون وگال ..

-عوف: منتظر بـس أتصال واحد ويشيل عني حمل و تعب أشهر ..

-مصطفىٰ: يله يا الله 

مرت ساعة تقريباً بقينة نتناقش بين المُهمة والخطوات السرية الأخيرة ألي مشتغلها من ورانة طبعاً أتصل تلفونة رفعة ضحك وگااال ..

-عوف: ششششيييل .

******

گاعدة وعيوني تتنقل بين خالة أمل وبين جُمان الي محتارة وتاكل بنفسها من فعلتها بعد الموقف الي صار محد حچة كلمة زيادة منهم رغد والحجية اثنينهن أختفن وبعد ماشفتهن ..

نهضت وگعدت گدام كُرسي خالة أمل وگالت بعبرة مخنوگة ..

-جُمان: يوم ليش متحچين وياي حاچيني زين اي كلمة بس حاچيني !!

-أمل: شحاچيج ؟ ولج جُمان أول مرة أحس روحي عالة بسببج

-جُمان: مو بيدي محد يفهمني والله محد يحس بيه يوووم

-أمل: وتسوين هاي السواية جُمان ؟

-جُمان: مابقىٰ عندي عقل ولا فكر أنتهيت كل تفكيري صار بيج مادري شدتحسونها أنانية غباء بس حقيييي حقييي يوم شلون أتركج بين أيديهم وانتِ بهاي الحااالة شلون 

-أمل: طبنيييييي مرررض عوفينيي ولج عوفيني بس لا تصخمين وجهي گدام الناااااس الله موجود هو يحميني منهم والي كاتبة عليه يصير بس مو تفوتين لبيت العالم وتسرقينهم ولج جُماااان هااااي نتيجة الامااانة والثقة وياچ

غطت وجهة بأيديها وصارت تبچي 

-جُمان: عز عليه فعلي والله عز بس مابيدي حيلة تعبَت وانهضمت سيف وأنمد علىٰ رگبتي وضعج يوم مو سهلة عليه أتركج هيچ

-أمل: واني ماراضية علىٰ سوايتج لو تاركتني أموت واتعفن ولا تخونين ثقة الناس بيج وتغدرينهم وانتِ بنص بيتهم مايأمنون بالنحلة من تفوت واحنة أمنوا بينه يافشلتيييي يااافشلتي بسسس

-منار: كافي خاالة مو زين عليج تنفعلين زيادة 

-أمل: تعالي خالي منار اخذيني أغسل أريد اذب مي علىٰ روحي أريد أبرد گلبي 

            

              

                    

-جُمان: يوم اني اخذج 

-أمل: لا .. تعالي منار 

باوعت الي وعيونها انملت دموع اتنهدت ونهضت أخذت خالة غسلت إلها وبدلت ملابسها عگدت حواجبي بأستغراب من لاحظت جسمها بيه أثر ضرب وطگعات ..

-منار: خالة شنو هذا أثر الضرب ؟

تلبكت وبلعت ريگ بتوتر وگالت ..

-أمل: ماكو شيء خاالة 

-منار: ضربوج ؟

-أمل: عدت يمة عدت الله الي يجازي فدوه لا تجيبين طاري وتحچين الموضوع راح يبعد عيني 

شگد انهضمت وحسيت گلبي انمرد كملت إلها وأخذتها للغرفة شفت جُمان لازمة الجنطة ودتجمع بالملابس ..

-منار: شدتسوين ؟

رفعت راسها وگالت ..

-جُمان: داجمع بالملابس 

-أمل: أحسن خلي نرجع لبيتنا والله مانستحي لهسة باقين ببيتهم بعد الي صار..

-منار: خالة شنو هلحچي !! بعدين هذا البيت بس لقاسم وبالنسبة لرغد والحجية أساسًا راح يرجعون لبيتهم وعوف بيتة فوگ معروف بعد شدتحچوون !!

-أمل: جمعي كل أغراضنا جُمان 

-منار: بس فهموني وين ؟ وين ترحون 

-أمل: نرجع لبغداد لبيتنا بعد وين 

أخذت نفس ورفعت راسي حچيت بتردد بس مجبورة ..

-منار: خالة يا بيت مابقالكم اي بيت ببغداد 

-أمل: شتسولفين خالة ؟ صح إيجار بس يعتبر بيتنا صارلنا سنين عايشين بيه كل شيء يخصنا هناك

أردفت جُمان بحيرة ودموع وگالت بتلبك ..

جُمان: ماما ... بيتنا احترگ 

لطمت خالة أمل علىٰ صدرها وگالت بشهگة ..

-أمل: يمةةة شدتحجيييين

-منار: هذا ألي صار خالة 

-أمل: ولچن شلوووون احترررررگ شنو نسسيتن الكهرباء لو الغاز لو شنووو !!!

-جُمان: ولا شيء من هذا .. نفسهم العصابة حرگوا بيتنا وتركوا بيه تهديد وهذاا قبل ماتنخطفين 

-أمل: يمةة صخااام وجهج ياا أمل وين نروح وين نووولي لعددد

گعدت گبالهم وحچيت ..

-منار: وين ترحون وتعوفوني خالة ؟ فدوه تدرون مالي غيركم إنتوا أهلي والي بقالي لا تكسرون بيه إنتوا هم

-أمل: ولج يمة ليش اني اگدر اعوفج والله كل تفكيري بيج بس مالي وجه يمة مااالي وجه حچاية ماگدر احچي بوجه الحجية ياصخام وجهي ولج يمة الصار مو شوية ولا هين هاي حرمة بيت 

اتنهدت وحچت جُمان بصوت هزيل ضعيف ..

-جُمان: اني ما أنكر الي سويتة غلط ومُمكن مينغفر أله بس يوم انتِ بسبب شغلهم صرتي بأيديهم شنو ذنبنا احنة بالي صار بس فهميني شنو ذنبي اتهدد بيج ويحترگ گلبي عليج صرت بموقف ما أتمناه لعدوي بسببهم

            

              

                    

أردفت خالة أمل بعصبية وعدم رضا وگالت ..

-أمل: لاا مو بسببهم ولج هذول فخر فخرنا وعزتنا تدرين الي مثلهم شگد ضحوا لخاطر تعيش الناس بأمان أكثرهم راحت أطفالهم ونسائهم وامهاتهم وابهاتهم وأول مثال أبوج شلون صار شهيد ؟ مو لخاطر الوطن ضحىٰ بنفسة .. 

-جُمان: اوووووووف 

-أمل: لعد بسببهم شنو همة الي گالوا إلهم تعالوا أخذوها ؟ ولج يمة هذول عصابات ماكو عندهم مخافة الله هذول شغلتهم هاي يهددون العالم بأحبابها وبأعز ناسها علمود مصالحهم بس الشهم وأبن الأصل مايخضع ألهم لأن لو خضع مابقىٰ أمن وراح البلد وراحت أرواح الناس هدر انتِ تفكرين بعاطفتج بس همة يفكرون بعقلهم وگلوبهم ميتة بسبب شغلهم والي مروا بيه والي شافوه يفكرون ألف فكرة ويتخذون ألف قرار وخطوتهم بحذرر يمة بحذر

-جُمان: يوم كاااافي كاااااااافي والله أحس نفسي مختنگة لتزيدينهااا عليييه فدووة اروحلج كاااافي

-أمل: هسة يلة حسيتي مافكرتي زين ؟؟

مسح علىٰ گلبها وهي تشهگ وگالت ..

-جُمان: ياااارب ..

-أمل: ليش مابلغتيهم بالي صار ويااااج لعد ليش ؟؟

-جُمان: خفتتت خفتتت يوم ماعرفت أفكر بوقتهة ماگدرت أفكر كل كلامة دار بعقلي ماعرفت اخطي خطوة من عندي أنحصر تفكيري بكلامة وتهديداتة صار ضغط عليه ماعرفت شسوووي غير الي يريدة 

-أمل: تبريرج غبي وانا ماراضية علىٰ سوايتج جُمان ماراضية أبد يااررريت عايفتني ميتة وطابني مرض ولا حاطتني بهيج موقف صعبب اااااخ 

-منار: خالة نامي عفية انتِ تعبانة كافي أتعبين نفسج أكثر 

-أمل: شلون تاخذ عيني نوم وإنا أتمنى الگاع تنشگ وتبلعني طلعني ولچن أعتذر منهم اسَولف وياهم أبرر الهم موقف بنتي وفعلتهاا بيهم

-منار: خالة مو هسة فدوه خلي شوية النفوس تهدأ 

-أمل: ياضيم گلبييي ولچ شگد صلفييين باااقين بيييتهم !!

-جُمان: أوف ياربي دخيييلك أوف 

باوعت لجُمان الي حاطة ايديها علىٰ راسها ودموعها تنزل علىٰ خدها دخت واحتاريت بين كلامها وموقفها الي ماگدر ألومها بيه وبينهم وبين موقفهم !

سحبت نفسي وفتت للغرفة صرت ألوب وأفكر بيه وين راح من أتذكر شكل قاسم وعَوف فرفحت أتصل عليه ميجاوبني ماكو .. لا گدرت أرجع أنام ولا گدرت أهدأ اباوع علىٰ ألباب ومنتظرة ينفتح بأي لحظة وأشوفة گلبي مفرفح عليه 

بقيت هواية گاعدة أنتظرة تعبت عيوني صارت تغفىٰ من وحدها لأن أساسًا منمت غير ساعتين تمددت علىٰ الچرباية وبدت عيوني تغفىٰ شوية شوية من النعاس 

            

              

                    

فزيت علىٰ حركة وبزة برگبتي ضايقتني فكرت شنو دودة صاعدة وجاي تگرص بيه مديت أيدي بأنزعاج لرگبتي أتلمس راس طامس برگبتي فتحت عيوني وطفرت بسرعة وصحت وعلىٰ طفرتي فز رفع راسة وگال بأستغراب .

-قاسم: منار شبيج ؟

بقيت أحك برگبتي واباوع اله حچيت ..

-منار: شنو هاااي شواربك ليش يبززن قااسم

ضحك بثقل رجع نزل راسة وگال وهو يضحك ..

-قاسم: هي هاي سالفتج 

-منار: غير شوارب عبالك أبر !!

-قاسم: متوهمة مايبززن انتِ ترفة 

أنتبهت لوضعنة يعني چان منومني بحضنة ومستغل نومتي ارتبكت وحچيت ..

-منار: ءءء اا .. شسمة هو يمتى ؟

-قاسم: شني ؟

-منار: من يمتىٰ اجيت وليش مستغل الوضع هيچ يعني اذا اني نايمة تحط شواربك برگبتي 

-قاسم: غير انتِ مرتي بعد روحي مامستغل شيء بعدين وين أنام بالصالة غير انتِ نايمة هنا 

-منار: نام جوة 

-قاسم: صار 

-منار: يعني تنام جوة ؟

-قاسم: اي علىٰ الجايات 

گالها ونام علىٰ بطنة ودار وجهة فرفحت وحچيت ..

-منار: ليش هيج بطلت تحبني 

دار وجهة وگال ..

-قاسم: أنا يمتىٰ ؟؟

-منار: لا سولفت وياية لا گلتلي شلونچ ولا تريد تشوفني داير وجهك عني ونايم ليش قاسم ليش !!

-قاسم: الله ياخذني 

-منار: وين ياخذك ؟

-قاسم: يمه 

-منار: اي أشوىٰ يم الله ولا يم غيرة 

أشوف جسمة يهتز وهو داير وجهة عني نهضت نزلت من الچرباية درت علىٰ جهتة گعدت بالگاع وصار وجهة گبالي وحچيت ..

-منار: ليش تضحك ؟؟

-قاسم: وچ يابه أريد أنام تعبان هلكان طايح حظ حظيي

-منار: مو اگلك بطلت تحبني بـس ميخاااالف الله يشووووفك قاااسم 

اتنهد وخر الفرشة عنة ونهض مسح وجهة وگال ..

-قاسم: يله گعدت حبيبتي عيوني گلبي أموت بيج والزهرة حَتىٰ شواربي تحبج تموت علىٰ ربج 

-منار: اي وبعد 

-قاسم: شنو بعد 

-منار: شسمة يعني شگد تحبني ؟؟

-قاسم: بگد السما بگد الماي بگد الحصو والرمل بگد تمسلت مصطفىٰ 

            

              

                    

-منار: مصطفىٰ شعلييه ؟؟

-قاسم: ها مو مصطفىٰ هواي يمسلت

-منار: يله يله معلينا بس هلگد تحبني ؟

-قاسم: لا بعد هواي بس هسة تعبان خليني انام ومن اگعد اراويج شگد 

-منار: هاي تاليتهة ؟؟

-قاسم: أميرة روحي مناري هاي الهرمونات الشهرية ؟

-منار: لا 

حچيتهة وبچيت وهو فعلاً چان الوضع هيچ بس اني گلبي محروگ بسبب ألي صار أخذ وجهي صار بين أيديه وگال بلهفة ..

-قاسم: ليش بعد حيلي ليش هلدموع ؟

أبتعد قليل سوىٰ مُكان وأشر الي عليه وگال ..

-قاسم: تعالي يمي

ماگلت شيء صعدت گعدت يمة غطاني بالشرشف واني گاعدة وحط عينة بعيني ..

-منار: شنو راح يصير ؟ معقولة راح تخسرون مهنتكم وتتعاقبون صدُگ ..

اخذ نفس وگال ..

-قاسم: ماراح يصير شيء بوية 

-منار: شلون يعني شلون ما راح يصير لعد والملفات والسالفة الي صارت ؟؟

-قاسم: ها اها مو هسة راح تاكلين ابو راسي وتطلعيلي شيب اله تعرفين 

حچيت بأنتفاضة ..

-منار: سولفلي فدوه سولفلي أفكر بيك گلبي يلوب عليك من طلعت وانتَ وضعك مفرفح وهسة وضعك أختلف ودتحچي وياية ببرود شنوو صاار

-قاسم: ولكككككم يااا نااااس ياعاااالم مرتي تفكر بيه

ضربتة علىٰ أيدة وحچيت ..

-منار: عفت كُل شيء ركزت علىٰ هاية !!

-أركز علىٰ أهدافي 

-احچيلي ريح گلبي فدوه والله الوب عليكم وعلىٰ جُمان الطرفين موقفهم صعب حرت ويامن اوگف اني 

-اوگفي وية روحچ 

-وتااالي ؟؟

-يله يابه 

بدة يسولف ألي عن الي صار بس المختصر أكيد وية كل كلمة يگولها أحس گلبي يطلع من صدري من الفرح دمعت عيوني وبچيت ..

-قاسم: اهووووو شنو طرگاااعتج انتِ عيونچ دموعها يشتغلن تلقائي 

-منار: مو فرررحااانة 

-قاسم: چا تبچين !!

مادري شنو وضعي من الفرحة والراحة الي صرت بيها مادري شلون جريتة وحضنتة بقىٰ ثواني وحسيت بأيدية تلتف عليه وگال ..

-قاسم: احضررنييي يالحسسيين 

حچيت واني بعدني حاضنتة ..

-شكوووو ؟

-ابوي ااحترررگ 

ابتعدت عنة بسُرعة وحچيت ..

-شنوووو يمتىٰ هلحچي صاار 

            

              

                    

-هسة توة 

-عووود صدگ !!

اتحمحم وگال ..

-لا اتشاقة شو بله رجعي حضنيني ماشبعت 

-كااافي لا تتسوفل 

-زين 

-بس اني دافكر بشغلة 

-شنو هيَ ؟

-ليش عوف أتأثر هلگد ؟ مادام هَـو حاسب حساب لكل شيء ومخطط أله وچان يعرف بكل خطوة ؟

-طبيعي يتأثر أنا وأتأثرت قبل ما أتأثر علىٰ الموقف تأثرت شلون گدرت تسويها بينة ؟ منار عوف لو ما ذكي چان بسبب فعلة جُمان هو هسة متعاقب ومتحاكم والمُهمة والناس البيها كلها بالرجلين تروح ..

-ماعرف بس حقهة مالها غير أمها بالأخير الدنيا كُلها انسدت بوجهة تعبت وتمرضت وفقدت السيطرة علىٰ كل شيء 

-بس وحق الي خلق الحق وسواه اليوم ماچان متعدي وأمها مو يمهة بس يله الحمدلله بالحالتين أكو ربح ماكو خسارة ..

-بس شگد ذكي وفطن وعقلة مُدبر هلعوف !!

-ماشايفة منة شيء 

ابتسَمت وحچيت بفرح وبدون أدارك ..

-يله الحمد لله أحس من الفرحة أريد أتقيء 

حطيت عيني بعينة طبگ حواجبة والضحكة حاصرها وجهة صار أحمر دار وجهة وفلتت منه ضحكة ..

-يعني أعرف تعبيري معوق بس شسوي هذا ألي طلع وياي 

-والله يابعد حيلي انا أگول سكتي أشرف ..

باوعت للساعة وشفتة نعسان وتعبان وبالگوة فاتح عيونة اتثاوبت اني هم من النعاس وگلت اله ..

-يله نااام 

-وانتِ ؟

-حناام جوة 

-يمتىٰ تعوفين سوالف الجهال هاي ؟ 

حكيت خشمي بأيدي وحچيت ..

-مو أستحي 

قلص عيونة وگال ..

-لا تتوترين يابه ترىٰ ما أسوي الج شيء نامي هنا شكو تنامين جوة 

-اممم 

-يله نامي

بلعت ريگ واني اباوع اله نمت ودحست روحي بنهاية الچرباية يعني لو أحاول أتحرك فـ للگاع گلبي يدگ سريع متوترة مادري شسالفة بس يله طبيعي لأن أول مرة أنام يمة غطيت راسي وحچيت ..

-مو أنام وتحاول تعبر الحدود مثل مساع 

-هههههههههههههه أشتعل أبيه بعد اليحتك بيج بس نامي 

ضحكت وحطيت راسي وحاولت أنام طبيعي اتدنيت شوية عن مُكاني وبعد مادريت بالدنيا طشت لو رشت لو حاول يتحارش بيه ويعبر الحدود واني نايمة اخ سلمتك بيد العباس إذا مسويها ...

            

              

                    

*******

باوعت للساعة بـ ٩ الصبح أمي حطت راسها شوية ونامت الا اني ماگدرت أغفىٰ ولا عيني تاخذ نوم كُل شيء يدگ بگلبي كلامهم كُلهم وأولهم كلامة ..

أعترف غلطت استعجلت بقراري رغم الي صار كله چان المفروض اگله وأعرف راح يلگالي حل بس ساعتهة ماگدرت أفكر تفكير طبيعي كل شيء غلبني

أريد أشوفة واحچي وياه أريد اگُله اني ماتعمدت أكسر بيك ولا أكسر كلبك اني اخر بشر يتمنىٰ يسويها بيك كل الطلع مـني چذب مو حقيقة لحظة غضب وتوتر وانفعال ماگدرت أسيطر علىٰ نفسي بيها ردت أجرحة بسبب الصار ..

رفعت راسي اخذت نفس وباوعت للجنطة .. أحتاجيت الحمام ترددت اطلع بس لشَوكت ابقىٰ هنا اول وتالي راح أعتذر عن الي سويتة وأطلع من بيتهم ..

نفخت بتوتر وفتحت الباب بتردد وطلعت غسلت وجهي وأيديه أستخدمت الحمام وطلعت جاي أرجع للغرفة وصار بوجهي چان طالع من غرفة رغد ..

توترت دگ گلبي بسُرعة باوعت اله راد يتعداني حسيت روحي أشتعلت نار وگفت گبالي وهمست ..

-لا عوف أنتظر 

وگف وهو يباوع بعيوني و نظراتة سلبت گلبي ..

-أسفة 

هز راسه وراد يمشي رجعت وگفتة وحچيت واني أكابر حتىٰ متنزل دمعتي ..

-عاتبني أجرحني بعتابك عيط اي شيء سوي بس لتسكت 

-شيفيد العتاب ؟

بللت شفتي وحچيت بعبرة ..

-أنتَ مو دائماً تگول اني حافظج حفظ 

-متوهم 

-لاا ممتوهم عوف باوعلي حط عينك بعيني شوفني نفسي متغيرت انتَ تعرفني حافظني أكثر مني وتعرف شنو امي بالنسبة الي اني مدابرر موقفي بس مالي غيرها بهلدنيا هي كل شيء بقالي ماگدرت أتحمل فكرة تروح مني أتمنىٰ يرجع الوقت بيه وما انحط بنفس هلموقف بس..

-بس فات الأوان مو ؟

اخذت نفس شگ صدري وسكتت رجع گال ..

-عوف: انطيتج حچاية لو يصير بيها دمي ما تصير أثنين ردتج تثقين بيه گلت الج موقفي صعب الاستعجال لا راح يفيدج ولا يفيدني وانا اعرف خصمي شنو بس انتِ اختاريتي تدوسين بنص گلبي 

نزلت دمعة مني ورجع گال ..

-بخيالي ما أثق وثقيت بيج .. شلون راح أرجع أثق بيج بعد!

غمضت عيوني حسيت كلامة مثل السهم وفات بنص گلبي طبگت شفايفي وحچيت بحزن ودموع تنزل علىٰ خدي ..

-والناس ؟ والأطفال كلهم صاروا بذمتي !

ميل راسة وطگ رگبتة نفخ وگال بقلة صبر ..

-هسة انتِ ليش تبچين لخاطر داحي الباب 

نزلت راسي وگلبي يعصرني عصر عصرت أيدي وحچيت..

-اني راجعة لبغداد 

گلت الكلمة ومارفعت راسي بعد وماسمعت اله صوت أستغربت رفعت نظري شفتة يباوع الي بجمود ومكتف أيديه ..

-تكسي لو قطار ؟

-شنو ؟

قرب نفسة حط وجهي بوجهي لفحتني انفاسة الحارة وگال وهو شاد علىٰ فكة ..

-الروحة لبغداد أنسيها بعد ماعندج شيء هناك 

-مو بكيفك مستحيل ابقىٰ بعد هنا 

-ليش يابه مانعجب؟

جاوبت بتلبك وتوتر ..

-تعرف شنو قصدي ماگدر أحط عيني بعين أحد اني الحجية وگلبي دياكلني ماعرف شلون أعتذر منها ماعرف شلون احچي وياها وبعد ماكو شيء يخليني موجودة هنا العرس وانتهىٰ وأمي ورجعت أريد أستقر ببيتي بعد ..

-سهلة هذا بيتج گدام بيتي روحي استقري بيه

بهت وجهي وباوعت أله ..

-شدتحچي 

اتنهد وگال ..

-روحة لبغداد ماكو وعناد ماتعاندين بعد جُمان تعبتيني تعبت وانا أهم بيج بنومتي وگعدتي ريحي گلبي وبطلي عناد 

-ليش عوف ؟ مو أذيتك مو هدمت ثقتك بيه مو طعنتك بظهرك ليش بعدك تريد تساعدني اتركني أعيش اذيتك وبعدني ماعرف تأثير الي سويتة عليك ماگدر اسأل شنو راح يصير الك بسببي 

چان يباوع الي بنظرات باردة طاافية باهتة أبد مو مثل النظرات الي متعودة عليهن حچيت بغصة ...

-مستحيل أقبل بهذا الشيء وأساسًا ماما ماراح تقبل بعد الي صار ماشفت وضعها وشلون تلوم نفسها تخجل تخطي خطوتين گدامكم بسبب السويتة و ...

بعدني جاي أحجي قاطعني بكلمة هزتني هز خلتني أفتح عيوني بثقل وأبلع ريگي بصدمة رمشت بعدم استعياب مكذبة الي سمعتة منه من أردف