رواية سراج السادة الفصل السادس والأربعون بقلم غسق ادريس
اللهمَ لكَ الحمدُ حتى تُرضى
و لكَ الحمدُ إذا رضيت
و لكَ الحمدُ بعد الرضا
الحمدلله
الحمدلله
الحمدلله
سبحان الله
سبحان الله
سبحان الله
الله اكبر
الله اكبر
الله اكبر
لاحول ولاقوة الابا الله العلي العظيم
لاحول ولاقوة الابالله العلي العظيم
لاحول ولاقوة الابالله العلي العظيم
استغفرالله العظيم واتوب اليه
استغفرالله العظيم واتوب اليه
استغفرالله العظيم واتوب اليه
اللهم صلِّ على محمد وآل محمد
تعليق وتصويت بين الفقرات نريد نوصل لأكثر عدد من التصويتات
المصممات لاتقصرون 🤍.
وبلشو انطو علم للبنات الروايه راح تنختم ماتبقى غير القليل 🥹
🚫🚫
قبل كلشي اي تعليق سلبي ينحظر من الروايه لان اني مامجبوره اتحمل كلام سلبي على التأخير او غيره كلكم تعرفون ضروفي ف أتمنى تحترمون هل ظروف
وشكراً 🤍
خلونا ويا السادة
" ملاك "
من أصعب الحظات الي عشتها ومرت علي ببيت السيد هيا لحظه وفاة فاطمه الزهراء
كلشي جان محفور براسي منظرها من رفعو المكينه عن راسها وشفت رأسها مهشم بس شفايفها نجت من المكينه عيونها الحلوة اختفت من قوة الضربه
التفت بحسره وحزن على قدس
جانت نايمه على الجربايه وجهه اصفر شاحب
شفايفها متفطره والضعف سالب عافيتها عظام الترقوه بارزه
هزيت راسي بحزن عيوني كلهن دموع
نزلت راسي على حسين أهز بيه من شفته بعده يكعد
_ملاك :: اش اش ماما
رجع غمض عيونه نايم
خفت لا يكعد ويبجي وتجعد قدس
جانت تعبانه وماتنام اتونست من شفتها غمضت عيونها خفت لا يصير بيها شي من السهر والبجي
صفنت راجعه للحظه الي استقبلت قدس خبر وفاة بنتها
جانت واكفه ب الصاله تفتر بتوتره وخوف
كل شوي تفز تباوع للكامره منتظره جيتهم
اني والعلويات وحده تباوع بوجه الثانيه كلنا نبجي نخاف شلون نصارحها محد بينا شجاعه وتكدر تواجهه ب الحقيقه
الموجودات كلنا نعرف فاطمه ماتت بنفس ألحظه الي طاحت عليها المكينه
عيوني ماوكفت دموع كل ما احاول اشجع نفسي من البجي حتى لا قدس تحس بس اني ما أتحمل ارجع ابجي
وكفت قدس بنص الصاله تضرب على رجليها وتصرخ
_قدس :: ليش تأخرو ليششش
_لباب :: ولج يمه قدس لا هيج تسوين
_قدس :: علويه بنتي وينن فاطمه وين ليش تأخرو ياربي خاف بيها شي ... فدوه علويه اتصلي عليهم شوفيهم وين ليش تأخرو
دنكت العلويه لباب راسها ساكته
فزت قدس تباوع للكامره صرخت من شافت عمتي جهاد نازله من السياره
ركضت قدس تريد تطلع
منعنها البنات تطلع برا
وكفت اباوع الها حتى مابيه حيل امنعها بكد ما حيلي مهدود على فاطمه
دخلت عمتي وخلفها ايليا ثنينهم عيونهم مورمه وتعبانين
ركضت قدس على عمتي
صاحت تباوع لعمتي الدموع بعيونها
_قدس :: عمه وين فاطمه ليش ماجبتيها وياج اني جنت مأمنه عليها لان انتِ وياها شلون تجين وهيّا مو وياج
نزلن دموع عمتي تباوع لقدس
أخذت إيدين قدس حجت
_جهاد :: فاطمه بنتج ب أمانه الي احسن مني ومنج
_قدس :: منو؟
غمضت عمتي عيونها بس الدموع تطيح من عيونها
فتحت عيونها وحجت
_جهاد :: ب أمانه الله واهل البيت
_قدس :: عمه شنو قصدج
_جهاد :: فاطمه بنتج طير ب الجنه
رجعت قدس للخلف ايدها على أذنها تصرخ
_قدس :: ويننننها شبيهااا ليش ماتحجون
_جهاد :: بنتج ماتت
وكفت قدس للحظات صافنه على عمتي
طاحت ب الأرض تضحك ب هستيريه وتبجي
هزت راسها ب لا تصرخ
دقايق وفقدت الوعي
ركضنا اني والبنات عليها
صاحت العلويه لباب تباوع لعمتي
_لباب :: شلون هيججج تحجين وياها جهاد ليش مانطيتيها مجال
_جهاد :: خليها عمه خليها تعيش حزن بنتها وتستوعب مايصير تبقى ب امل رجعه بنتها هيج راح تدخل بحاله صدمه
بلش العزاء على روح العلويه الصغيره فاطمه غضنفر اصغر علويه ببيت الساده
جانت نسمه هادئه دخلت لحياتنا بهدوء وطلعت بهدوء
بيوم غضنفر جاب نعش فاطمه للبيت
جان شايلها ب ايده مغطين جسمها كله بلحاف ابيضّ
قدس بنص الصاله تبجي وادك على وجهه
وكفت قدس بصدمه تباوع لجثه فاطمه ب ابتسامه عاضه على شفتها
مشت لغضنفر ترجف
وكفت كدام غضنفر خلت ايدها على حلكها وحجت
_قدس :: هاي بنتي فاطمه
التفتت علينا مبتسمه
_قدس :: بنات هاي فاطمه راحت بفستان رجعت مجفنه
لطمت قدس على خدودها تصرخ
مد غضنفر ايده يبعد الحاف عن وجهه صاحت قدس خاله ايدها على ايد غضنفر مانعته
_قدس :: لا لا فدوه والله ما أتحمل
جنت واكفه بضهر قدس ابجي
حجه غضنفر عيونه مورمه من البجي وصوته مبحوح كوا تطلع الكلمه من حلكه
_غضنفر :: عيون فاطمه راحن قدس
_قدس :: هااا ؟
بعد الحاف عن وجهه فاطمه
للحظات وتحول المكان لصريخ
جانو لافين جزء قليل من راس فاطمه هيا أصلا راسها صغير
جمجمتها كلها مختفيه ماضال من وجهه بس شفايفها
أخذت قدس فاطمه من حضن غضنفر وكعدت بيها بً الأرض
تبوس بشفايفها
_قدس :: ولج يمه فاطمههه لاتكسرين حيلي هيج والله حيلي ينهد والله لو رحتي بعيده عني حيلي يروح ولج يمه اني عايشه علمودج
دارت علينا قدس تتوسل النا
_قدس :: ليش ماتحاجيني فاطمه ليش بنتي ساكته فدوه احجن وياها لا هيج تحرك كلب أمها
حضنت فاطمه لصدرها صرخت
_قدس :: ولج فاطمه يمه يتمتيني أنا ما اتيتمت من مات ابوي لا اناااا صرت يتيمه بروحتج عنيي
نزل غضنفر يأخذ فاطمه من حضن قدس ماقبلت قدس تنطيها
ضلت تصرخ مانعه غضنفر
_قدس :: لاااااا غضنفر لااا وين مآخذ بنتي
حاولنا نبعد قدس عن فاطمه رافضه تسلمها
_قدس :: لاتاخذوننن بنتتتي لااا غضنفرررر فاطمه بنتي وين ماخذهاااااا
_لباب :: يمه قدس كافي فدوه
سحب غضنفر فاطمه من حضن قدس
صرخت قدس ب اعلى صوتها
اخذ غضنفر فاطمه وطلع من البيت
ركضت قدس خلف غضنفر سحبته من أكتافه
_قدس :: ويننن رايح غضنفر شلون يهون عليك تدفن بنتك شلون
دنك غضنفر رأسه وحجه
_غضنفر :: مايهون علي أنا رايح ادفن قطعه من روحي
سحبنا قدس من غضنفر كعدت بنص الحوش تصرخ حاولنا نسكتها ماكدرنا
جانت تصرخ من كل كلبها
ركضت ام قدس والبنات على قدس تكومها
التفتت قدس على أمها الدموع بعيونها حيلها رايح
باوعت آلامها وحجت
_قدس :: شلون هان عليج تبتعدين عن بناتج احنا 5 بنات شلون هان عليج وكدرتي تتحملين فراقنا اني بس فاطمه ماجاي أتحمل تروح مني انتِ شلون ؟
سكتت ام قدس تباوع لبنتها صافنه
مدهوشه ومصدومه من كلامها
دخلنا قدس للصاله وهيّا على صرخه وحده
_قدس :: خليهم ياخذوني ويا فاطمه خليهم يدفنوني بصفها ولكممم طفله ماتتحملللل الظلمه والوحشه
هاي الصرخات والكلمات ماتطلع من راسنا
كل الموجودين جانو شاهدين على لحظات الحزن والانكسار الي عاشتها قدس
كل ماباوع الابني حسين كلبي ينغزني
ابني مانور الدنيا غير من ايام قليله وما أتحمل اشوفه بعيد عني شلون وقدس فارقت حضن أمها ؟
بلشت ايام الحزن والعزاء على فاطمه كل ساعه يتجدد الحزن على قدس وترجع لنقطه الصفر والحزن
بعد مرور ايام على وفاة فاطمه جانت عمتي وغضنفر واني كاعدين ب المطبخ
حجت عمتي موجهه كلامها لغضنفر
_جهاد :: شنو جاي يصير بينك وبين قدس
جان غضنفر مكتف ايده على الطاوله عيونه على الطاوله
هز رأسه بنفي وحجه
_غضنفر :: ماكو شي
_جهاد :: ليش هل برود بينكم ؟
ضحك غضنفر وحجه
_غضنفر :: مفروض نفرح لان بتنا ماتت ؟
_جهاد :: فاهم قصدي كلش زين غضنفر
ضرب غضنفر ايديه على الطاوله بقوة وصاح
_غضنفر :: لشنو تردين توصلين جهاد ؟
_جهاد :: ليش مبتعد عن قدس ليش ماجاي تشاركون بحزنكم !!
مسح غضنفر على وجهه
حجه
_غضنفر :: غلطها جان
_جهاد :: غلطها بشنو ؟
_غضنفر :: هيا السبب جهاد
فتحت عمتي عيونها ب اندهاش من كلام غضنفر
حجه مكمل كلامه
_غضنفر :: ليش ماسمعت الكلام ليش ماتركتها عند السيد ب المصلى ليش صعدتها للغرفه وحدها !!!
تغيرت نضرات عمتي للعصبيه وغضنفر جان فاتح عيونه معصب عيونه حمر العرق براسه طالع من حركه كلبه
صاح
_غضنفر :: اهملتتتت فاطمههه بسببهاااا ماتت بسببها أنا فقدت بنتي
وكفت عمتي تباوع لغضنفر بعصبيه ضربت على الطاوله وصاحت
_جهاد :: حرام عليك هيج تحجي هذا وانت سيدد انت اكثر واحد لازم تكون فاهم قضيه القدر واختياره شلون تلومها على قدر الله
سكت غضنفر مخنزر يهز برجليه
حجه
_غضنفر :: بنتي راحت بسببها
صاحت عمتي بغضنفر
_جهاد :: غضنفر كافي لا تلوم قدس على قدر فاطمه
هز غضنفر رأسه عيونه كلهن دموع
باوع لعمتي وحجه الغصه بصوته
_غضنفر :: جهاد أنا فقدت وصله من روحي .... شوفي
طلع من جيبه تراجي صغار بيهن شذره لفراشه
باوع لعمتي وحجه الدموع بعيونه
_غضنفر :: فرحاننن اريد ارجع للبيت واشوف التراجي ب أذن فاطمه
ضحك وحجه يباوع لتراجي
_غضنفر :: تالي ارجع للبيت بيدي نعش بنتي !!!
مسحت دموعي الي طاحن ايدي على وجهي اشهك مامتحمله الي جاي اسمعه
رفعت راسي على صوت قدس
شفتها واكفه بباب المطبخ
بوجهه الشاحب وشفايفها البيض
عيونها تتدور ب المكان
لابسه الشال على نص شعرها فاتحه عيونها بصدمه بدون ماتباوع لاحد
حجت تهز راسها
_قدس :: اريد اروح الأهلي
هز غضنفر رأسه ب اي وحجه
_غضنفر :: روحي
طلعت قدس من المطبخ راجعه للغرفه
باوعت عمتي لغضنفر بذبول وصدمه من كلامه
حجت
_جهاد :: لا غضنفر !!!
_غضنفر :: كافي جهاد احسن الها والي
حجاها وكام من مكانه طالع من المطبخ بقت عمتي ب المطبخ صافنه
باوعت لعمتي وحجيت
_ملاك :: عمه شلون إذا راحت قدس
صفنت عمتي للحظات
حجت
_جهاد :: خليها تروح حتى ترتاح عند أهلها يمكن البعد يريحها
طلعت عمتي من المطبخ واني بقيت كاعده بمكاني
رفعت راسي على دخله شاهيناز للمطبخ
جان وجههه اصفر كوا فاتحه عيونها
باوعتلي وحجت بتعب
_شاهيناز :: شصاير شبيها عمتي
_ملاك :: قدس راح تروح لبيت اهلها
_شاهيناز :: ليش !!
رفعت أكتافي بحيره
باوعت لشاهيناز وحجيت
_ملاك :: ليش هيج تعبانه انتِ
_شاهيناز :: كلبي محروك على فاطمه
_ملاك :: الله يرحمها راحت لدار حقها .... شاهيناز لاتعبين نفسج لاتنسين انتِ حامل
هزت راسها ب اي ساكته
خلت راسها على الطاوله مغمضه عيونها
من حزن وتعب الأيام الي عشناها نسيت أشاركم خبر حمل شاهيناز
من أسبوع عرفنا ب شاهيناز حامل
اول مره فرحتنا تكون ناقصه
رغم هذا الخبر ممكن يبث الفرح بقلب الكل وخاصةً الأم والأب إلى انو جادح وشاهيناز جانو حزينين وماتأثرو ب الخبر
أتذكر شاهيناز من عرفت بنفسها حامل جانت تبجي بحزن
حجت
_شاهيناز :: جنت أتمنى هاي ألحظه بس ماتوقعت راح أحصلها بوسط حزني وحزن الكل
مسحت على وجهي بتعب
شفت عاتكه تدخل للمطبخ
كعدت على الكرسي كدام الطاوله
_عاتكه :: قدس حاضنه ملابس فاطمه وتبجي
رفعت شاهيناز راسها تبجي
حجت
_شاهيناز :: الله يساعد كلبها
_ملاك :: صعبه بنات صعبه الابن عزيز
هزت عاتكه راسها ب اي
توها تريد تحجي وسمعنا صوت صريخ سهام وبجي قدس
ركضت اني والبنات خارج المطبخ نشوف الي جاي يصير
شفنا قدس طايحه ب الأرض ب ايدها ملابس فاطمه بنتها
سهام كدامها تصيح
العلويات كلهن موجودات حتى غضنفر !!!
حجت سهام بعصبيه
_سهام :: شكد يحترك كلبي من اشوفج تبجين على فاطمه ومآخذه دور الأم الحزينه وانتِ السبب بموتها
صاحت قدس تحضن بملابس فاطمه لصدرها بقوه
_قدس :: لالالا اني مو السببب
_سهام :: لا انتِ السبب العلويه لباب حذرتج من المكينه وحذرتج تنومين بنتج ب الغرفه بس انتِ مهمله لدرجه مافكرتي بسلبيات التحذير
عيون السيد غضنفر على قدس مثبتها بعصبيه كل ماتحجي سهام يصك على ايده
باوعت قدس على غضنفر
فتحت عيونها وحجت تأشر ب ايديها
_قدس :: لا غضنفر لا لاتصدك بكلامهما اني ماجنت منتبهه وفاطمه فاطمه جانت نايمه حتى ما مر هواي وقت من خليتها وحدها جنت ناويه اصعد الها ماجنتتتت ناويه اتركها وحدها
دار غضنفر وجهه ومشه طالع من البيت
سحبت العلويه لباب سهام من أذنها مرجعتها للغرفه
دخلت عمتي خلفها ب ايدها شحاطه السيد
باوعت لقدس حالها يكسر الخاطر ركضت عليها اني والبنات
باوعتلنا وحجت الدموع بعيونها
_قدس :: معقوله اني السبب ؟
_عاتكه :: لأ لاتهتمين لكلام سهام هيا خبيثه من قبل تعرفيها زين
_شاهيناز :: مستحيل قدس انتِ تحبين فاطمه شلون تصيرين السبب بوفاتها
هزت قدس راسها ب اي
وكفت ومشت تدخل لغرفتها
لحكتها اني والبنات خاف لاتسوي شي بنفسها
باوعت الها مشت لفراش فاطمه جانت حاطه فستان فاطمه الي ماتت بيه جان كله دم خالته على الفراش
كعدت كدام الفراش تمسح على الملابس
ضحكت وحجت الدموع بعيونها
_قدس :: مستحيل اني اقتل بنتي هاي عزيزه كلبي شلون اقتلها
مسحت على الفستان بهدوء حجت تهز برأسها
_قدس :: دللول دللول يا يمه فطومه
ضربت على رجليها وحجت
_قدس :: كبالي ومددتي طولج يا روحي انتِ
التفتت علينا وحجت
_قدس :: زين ليش الله رزقني ياها وهوا راح ياخذها مني ؟
دنكت راسي اني والبنات مانعرف شنو نجاوبها او ب الأحرى نعرف بس كلامنا ماراح يقنعها
حجت ايدها على صدرها
_قدس :: در صدري عليها
خليت ايدي على وجهي ابجي
سمعتها تحجي
_قدس :: جنت منتظرتها تنطق كلمه ماما
ضربت على وجهه بقوه روحها رايحه
صرخت تغرمش بوجهه ركضنا عليها اني والبنات نهديها
وهيّا ماوكفت صريخ ولطم
_قدس :: يمهه فاطمه راح تعيشين أمج ب اه والحسره راح اخلص عمري متحسره عليج وعلى ضحكتج .... ماتنامين إذا ما اناغيج شلوننن هسه نمتي هل نومه بدوني
لزمتني من أكتافي تبجي
أخذت ايدي تبوسها
_قدس :: ملاك فدوه بس فهميني شلون هاي الفتره كلها مارادت أمها مارادت ترضع من صدري .... زين لو رادت مثلا مثلا شلون يعني الله راح يمنعها تجيني مو اني أمها ؟
استغفرت ربي
ماعرف شحاجيها حتى لساني نربط من القهر
ضربت على عيونها تصرخ
_قدس :: ظلممم هذااا ظلم لاتكلولي قدر ليش فاطمه ليش بنتي ليش
طاحت بحضني غايبه عن الوعي ترجف
جنت خايفه عليها لايصير بيها شي لو تجيها جلطه ماعفتها اني والبنات طول اليل وياها
ثاني يوم كعدت مصره تروح لبيت اهلها حجيت وياها اني والبنات نقنعها غضنفر ماجان واعي بكلامه بس هيا جانت معانده
فعلاً الضهر السيد معراج والسيد جادح أخذوها لبيت اهلها والعلويه لباب وياها جان عدنا امل تقتنع وترجع بس لا العلويه لباب رجعت هيا والساده وقدس مو وياهم ،،،،،،
" قس "
طول عمري ماحزنت على احد بكد حزني على فاطمه الزهراء لحد هاي ألحظه مامصدكه فاطمه ماتت !!!
فاطمه الزهراء بنت اختي ماتت !!
شلون ويمتى وليش
اني البارحه جنت اسولف ويا أمها وهيّا تهمش ب الكامره
من سمعنا الخبر انطلقنا كلنا للنجف لان الفاتحه صارت عند بيت السيد عبد الروؤف
اول مادخلت للبيت جانت عيوني تركض قبل رجلي جنت ادور على قدس اختي اريد اعرف شصار ب اختي اريد اعرف اختي عايشه بعدها لو ماتت بعد بنتها
دخلت لصاله شفت اختي قدس كاعده بنص الصاله صافنه ب الفراغ بس دموعها يصبن
شهكت وركضت عليها
فزت من مكانها من شافتني حاولت تكوم من مكانها ماكدرت حيلها ما عانها
ركضت عليها اني شمرت روحي بحضنها ابجي
كانت تصرخ وادك على وجهه تبعدني عن حضنها تريد تحجي وبيتي
_قدس :: قس قسسس فاطمه ماتت ولج بنتي ماتت
هاي الأيام ماراح أنساها وراح تبقى عمري كله محفوره بداخلي شلون اختي ما اتهنت ببنتها فاطمه
مرت ايام وفاه فاطمه مثل السم البطيء كلبي يخنكني كل ماذكرها واتذكر سوالفها وضحكها ما أتحمل فكره خلص فاطمه ماتت هاي الفكره تجرحني
طلعت من الغرفه بعد ما قدس نامت الساعه جانت ب 5
توا الفجر بدى يطلع مشيت اكعد ب الحديقه المكان الوحيد الي تعوت اهرب اله
كعدت على محجر الحديقه صافنه خليت راسي بحضن رجلي ابجي
شهكت اطلع كل البجي الجنت كاتمته كدام قدس جنت اشجع نفسي كدامها حتى لا تضعف اكثر على الأقل واحد صلب يشاركها حزنها !!
رفعت راسي من سمعت صوت تحمحم
التفتت على مكان الصوت شفت السيد معراج واكف بباب المطبخ بيده كوبين حليب حارات يطلع منهن البخار
مأخله عينه بعيني
تقدم بخطواته مبتعد عني
نزل كوب حليب على المحجر الي كاعدين عليه وابتعد كاعد على المحجر بس بعيد عني
شرب من الحليب وحجه
_معراج :: الحليب يحتوي على فيتامين B 12 وهذا الفيتامين يساعد الجهاز العصبي نقص هذا الفيتامين من الجسم ممكن يسبب ضعف تركيز وتقلب مزاج واكتأب وهااا اي فيتامين B6 يحتوي على السيروتونين والدوبامين وهذن يساعدن بتظيم المزاج
حجاها وشرب من الحليب
جنت صافنه عليه
هم تعبانه وهم مابيه حيل
هزيت راسي مكتفيه بكلامه
شربت الحليب
رفعت حواجبي ب اندهاش
باوعت لكاسه الحليب مستلذه بطعمه
بس ماحجيت شي اكتفيت ب السكوت
حجه عيونه على الحشيش
_معراج :: مو من العيب مشاركه الحزن مع الآخرين
عوجت حلكي من كال مع الآخرين شلون اني ويا المثقف
كمل كلامه
_معراج :: الحزن خريزه طبيعيه ب داخل الكل ..حتى الحيونات تحزن .... الحزن مو عيب العيب نكتم الحزن
انحسرت وحجيت
_قس :: ما اعرف ابجي كدام قدس ماريد ازيد همها
_معراج :: مو من الصواب ماتبجين كدامها لان هيا بهاي ألحظه تحتاج تشاركيها حزنها حتى حزنج ب النسبه الها هوا حزنها
حجيت
_قس :: صعبه فكرة الموت مستحيل تتقبلها
_معرج :: ب الواقع لا
التفتت عليه كاعده حواجبي ب استغراب
حجيت
_قس :: يعني تكدر تتقبل فكره تفقد شخص عزيز عليك ؟
_معراج :: لا بس أنا مؤمن ب كلام الله
بسم الله تعالى*
﴿أَيْنَمَا تَكُونُوا يُدْرِككُّمُ الْمَوْتُ وَلَوْ كُنتُمْ فِي بُرُوجٍ مُّشَيَّدَةٍ
وقوله تعالى
﴿قُلْ إِنَّ الْمَوْتَ الَّذِي تَفِرُّونَ مِنْهُ فَإِنَّهُ مُلَاقِيكُمْ﴾
وقوله
* ﴿إِنَّكَ مَيِّتٌ وَإِنَّهُمْ مَيِّتُونَ﴾
صدق الله العلي العظيم
_معراج :: فكره الموت مو هيا الصعبه الصعبه انو نكمل عمرنا بدون هذا الشخص وب الانتظار
عكدت حواجبي وحجيت
_قس :: انتظار ؟
_معراج :: اي الميت ينتظرنا واحنا ننتظره احنا هنا بدار فانيه غضنفر رام غضنفر راح يرجعون يلتقون ببنتهم مره ثانيه هاي الدنيا أنا فقدت والدي وهسه منتظر اليوم الي راح التحق بيه واشوفه
هزيت راسي اتحسرت وحجيت
_قس :: الدنيا سوالفها تعبانه
حجيتها وشربت الحليب مامركزه بكلامي
انتبهت على السيد معراج فز من كلمتي التفت يباوعلي عاجل حواجبه ب استغراب
صفنت بوجهه احاول افهم الغلط بكلامي وين
فتحت عيوني بصدمه من استوعبت هاي الكلمه حاجيتها اله ب الفيس
شركت ب الحليب أكح
كمت من مكاني اهفي على وجهي
مشيت اطلع من المطبخ
حجيت بدون ماباوعله
_قس :: شكراً على الحليب
طلعت من المطبخ خليت كلاص الحليب على الطاوله غسلت وجهي وطلعت اركض من المطبخ
بقيت ادم على وجهي بخجل معقوله عرفني !!!!
عيب عيب شيكول عليه هسه ياعلي دخيلك
دخلت للغرفه نمت بمكاني واني بعدني بفشلني وخجلي يارب شلون
ثاني يوم جان موعد رجعتنا لبيتنا
عمي محمد أصر نرجع للبيت ماتقبل كعدتنا بيت السيد كل هل ايام
رجعنا لبيتنا بعد ما آمنت العلويات على قدس
رجعت واني بالي عنده اختي شلون راح اتركها وحدها
بس ما مرت ايام إلى وقدس جايه لبيت عمي !!!
ماعرفنا السبب هيا جايه لان متعاركه ويا غضنفر لو رادت تهرب من المكان الماتت بيه فاطمه
على طول رجعتها جانت كاعده بغرفتتنا ماتطلع من الغرفه
اتحولت قدس لانسانه ثانيه انسآنه شرسه وهجموميه
تخاف من الضوه دوم ضوه الغرفه مطفي
انتبهت عليها بلشت تهذي وتحجي ويا نفسها
كل ما امر من الغرفه اسمع صوتها تحجي ويا نفسها
جانت تكرر عباره
_قدس :: لا تضحكون لاتضحكونننن ليش قتلتو بنتتتيييي ليشششش عوفونييييي ابتعدو عني
من اسمعها تصرخ ادخل للغرفه اشوفها كاعده وحدها بزاويه الغرفه تباوع للفراغ وتصرخ
بلشت اخاف عليها لاترجع لحالتها السابقه
استغربت على طول فتره وجودها عدنا غضنفر ما اتصل ولا سأل عليها
عرفت سبب جيه قدس هيا زعلتها ويا غضنفر
جنت كاعده اني ونضال وإبتهال ب الصاله لابسات الأسود كلنا تعبانات ومكتأبات
دخل علينا علي ابن باسم يصرخ
_علي :: بيبي.... كولي ريحه
حجت نضال
_نضال :: ريحه
_علي :: أمج وكيحه
ضحك علي يباوعلنا
كمل كلامه
_علي :: كولي ورده
_قس :: ورده
_علي :: تاكلين زواع العبده
سكتت نضال تباوع لعلي
_نضال :: ولجنننننن راح يجلطني هذاااا
حجتها بنفاذ صبر
رجعنا على كعدتنا ساكتات
جان بالي كله عند قدس ماعاجبني وضعها بس شبيدي عليها كل ماحاول أتقرب الها وأشاركها تصدني
" ملاك "
من الكل بلش يستوعب وفاة فاطمه وخلص احنا فقدناها للابد
الحزن بلش يتجسد بداخلنا ماصرنا نظهر الحزن
الكل رجع يكمل حياته بس الكل حزين الكل فرحته ناقصه من اكول وفاة فاطمه أثرت على الكل ف فعلاً اني قاصده هل كلام
الكل متأثر حتى المحسنات
من يوم قدس رجعت لبيت اهلها ماشفنا غضنفر رغم هوا دوم موجود ب النجف بس ماجان يجي لبيت السيد
بس بيوم من الأيام جنت نازله الدرج بيدي حسين
شفت غضنفر كاعد الصاله على القنفه هوا والسيد وعمتي
جانو يتفقون يرجعون قدس
حجه غضنفر ب استعجال
_غضنفر :: جهاد ما اريد نتأخر اكثر يلا
_جهاد :: اي ماعندي شي بس اصعد اشوف عمتي وين
كلمت عمتي من مكانها جانت لابسه عبأتها والمعاصم والنقاب تريد تطلع
صعدت الدرج تصيح العلويه لباب جنت واكفه مافاهمه شي اباوعلهم ب استغراب
التفتت على نزله عمتي والعلويه جهاد يردن ينزلن الدرج
صارت خلفهن سهام تصيح وتحجي بغيض
_سهام :: يعني ليش هل تعب اريد اعرف شنو الفايده من اتعبون نفسكم وياها من البدايه كتلكم قدس مسودنه مو صاحيه هاي هيا السبب بموتت بنتها تردون ترجعوها حتى تعيد نفس الغلط
جانت سهام تحجي تحجي والكل ساكت عمتي واكفه على بايه الدرج تباوع لسهام
رجعت عمتي صعدت لسهام
جانت عمتي اطول من سهام
سهام جانت توصل لصدر عمتي
باوعت عمتي لسهام بتركيز
بخفه ايدها وسرعته دفعت سهام من الدرج ورجعت سحبتها من ياخه ملابسها جانت سهام شبه طايحه من الدرج بس عمتي متمسكه بيها
حجت عمتي تباوع لسهام الي كانت تصرخ وتتوسل ب عمتي والموجودين تخاف لا تطيح
_جهاد :: إذا هسه اني بعدت ايدي عنج راح تطيحين على راسج تتوقعين اني والموجدين راح نهتم ؟؟
حجت سهام بخوف
_سهام :: جهاد راح اموتتتت شبيج
_جهاد :: كلامي جان سؤال الج بس مو مشكله اني راح أجاوبج
ابتسمت عمتي وحجت ببرود
_جهاد :: محد راح يهتم لان كلنا نعرف هذا قدرج وانتِ موكل الج تموتين بهل لحظه وبهذا المكان وعلى ايدي اني
حجتها عمتي واختفت ابتسامتها خازره سهام
فعلاً محد من الموجودين انطه اهتمام لسهام حتى السيد وغضنفر ثنينهم نزلو روسهم ساكتين
رجعت عمتي كملت كلامها
_جهاد :: حابه اثبتلج كلامي ؟
صرخت سهام تتوسل لعمتي دموعها بعيونها
_سهام :: لألا جهاد لا بروح عون والله ماعيدها بعدددد راح أصير خرسه بس كافيييي راح اطيح
حجت عمتي
_جهاد :: إذا سمعت الج كلمه ثانيه على قدس تعرفين العقاب
_سهام :: اي اي خلص هاي هيه
سحبتها عمتي من ملابسها مرجعتها لمكانها عدلت عمتي ملابس سهام الي جانت تبجي ب انهيار وخوف
حجت عمتي
_جهاد :: لاتخافين هذا مجرد درس بسيط الج
حجتها عمتي ونزلت الدرج اباوع العلويه لباب ما مهتمه بسهام لان تعبت نفسها وياها حيل وماكو نتيجه
طلعو الساده وعمتي والعلويه يرجعون قدس جان هذا احلى خبر اسمعه طول هل مده لان السيد غضنفر قرر يرجع قدس لحضنه ويشاركها وتشاركه بحزنها
عرفت قدس هواي متأذيه طول هل مده وجانت جارحه نفسها وجانت ناويه تقتل نفسها وتأذي روحها والسيد غضنفر لحك عليها على آخر ساعه
كل هاي الأحداث راح تشاركم قدس بيها حتى تعيشون وياها كل لحظات الحزن والرعب الي عاشتها
بلشت الأيام تمشي بسرعه
حتى ماعرف شلون مر اشهر على وفاه فاطمه الزهراء !!!
الكل رجع لحياته الطبيعيه حتى قدس رغم تعبها رجعت وكفت على حيلها بس جان اكو غصه وحزن بداخلها وبداخل الك
" مهره "
الفتره هاي مو احسن فتره بحياتي بس ب النسبه الي افضل من عيشتي سابقاً
كبر ابني حسوني شوي صرت اخذه وياي للحوزه
اي صح رجعت ادرس ب حوزه السادة
اني وراجحه نروح سوا ونرجع سوا
علاقتي صارت قويه ببيت ساده عبد الروؤف
السيد عبد الروؤف صار يعتبرني وحده من حفيداته
مرات يوكف برا الحوزه ينتظرني اطلع حتى يوصلني للبيت
آخر مره شفت اهلي ومسلم بيوم طلاقي منه بس
عرفت مسلم ب السجن وأهلي خافو من السادة وسحبو نفسهم
بس لهاي ألحظه يراودني شعور ب الخوف وعدم الاطمأنان
اخاف بيوم افتح الباب واشوف اخوي محمد كدامي
اخاف بيوم اطلع واشوف واحد من عمامي كدامي
حتى امي صرت اخاف يجي يوم والتقي بيها
صار همي الوحيد هوا حسن
كل يوم يمر بحياتي انهار واتعب كل ماذكر الحظات والأيام الي عشتها ويا اهلي ومسلم انقهر على أيامي الضاعت وياهم بس وقت أتذكر حسن أحمد الله انو طلعت منهم بشي إيجابي وحيد وهوا ابني
سمعت صوت بجي حسن جاي من الصاله
سديت الدوش مغمضه عيوني لا يدخل الشامبو بعيوني
صحت
_مهره :: راجحهههه شوفي حسن شبي
استمر صوت بجي حسن
فتحت الدوش اغسل شعري بسرعه حتى اطلع لحسن
سديت الدوش لفيت المنشفه على شعري
لبست الروب ومشيت اطلع من الحمام
سمعت صوت حسن خف من البجي وسكت
فتحت باب الحمام توني اطلع واصيح ب راجحه وسمعت صوت السيد عبد الروؤف جاي من برا
رجعت للحمام بسرعه اركز ب الصوت
اي هذا صوت السيد عبد الروؤف وصوت العلويه جهاد يسكتون ب حسن ويضحكون ويا
كعدت ب الحمام اسمع الهم
بقيت واكفه ب الحمام منتظره راجحه لو أمها يجني لان ماكدر اطلع هيج
فعلاً اقل العشر دقايق اجت راجحه
فتحت الها باب الحمام
باوعتلي وحجت
_راجحه :: كملتي ... السيد والعلويه برا يردون يحجون وياج
_مهره :: اي بس روحي شوفيلي ملابس وعبايه
هزت راسها ب اي ومشت تجيب ملابس
اني جنت لابسه ملابس بس ما اكدر اطلع بيهن كدام السيد وبدون شال صعبه
اجت راجحه بيدها الملابس والعبايه لبستهن لفيت الشال على شعري وهوا يكطر مي
طلعت من الحمام اعدل بملابسي
دخلت للصاله
سلمت على السيد بست العلويه وكعدت
حسن جان بحضن السيد ساكت يتمضحك السيد يلعب ويا
رفع السيد رأسه ب ابتسامه
باوعلي وحجه
_عبد الروؤف :: شلونج بنيتي مهره
هزيت راسي ب اي مبتسمه ب امتنان لسؤاله
_مهره :: الحمدلله سيد بخير اني وحسوني كلش مرتاحين خاله راجحه ما مقصره ويانا
ابتسمت ام راجحه وحجت
_ام راجحه :: مهوره مثل بنتي راجحه تعودت عليها هيا وحسوني
هز السيد رأسه ب ابتسامه
_عبد الروؤف :: ام راجحه أنا أمنت مهره وابنها عندج لان اعرف بيج مره تخافين ربج ب الامانه
_ام راجحه :: مشكور سيد بس كتلك مهره وابنها مو أمانه عندي لا صارو بمعزه راجحه عندي
هز السيد رأسه ساكت
باوعلي السيد مبتسم بهدوء اخذ حسوني من حضنه انطاه للعلويه جهاد
انتبهت على العلويه من صار حسوني بحضنها ابتسمت بفرح تبوس بيه
شبك السيد ايديه
باوعلي بتركيز وحجه
_عبد الروؤف :: عندي موضوع وياج بنتي
هزيت راسي ب اي اسمع اله ماعرف ليش كلبي نغزني بخوف لا يطلع الموضوع على اهلي لو راجعين يطالبون بيه
حجه السيد
_عبد الروؤف :: بنتي مهره انتِ تعرفين معزتج عند بيت عبد الروؤف وأنا اعتبرج حفيده من حفيداتي
صفن ب الأرض محتار شلون يحجي
فركت ايدي عاضه على شفايفي بتوتر عيوني ادور ب المكان على الموجودين
كمل السيد كلامه
وكال
_عبد الروؤف :: انا اخاف عليج مثل ماخاف على حفيداتي انتِ وابنج دخلتو بحمايتي بس بنفس الوقت اهلج ماراح يبتعدون عنج بسهوله ولا راح يستسلمون حتى يرجعوج تحت رحمتهم
عرفت لشنو يريد يوصل السيد
دنكت راسي عيوني مدمعه
حجيت بغصه مكتومه
_مهره :: اهلي رجعو يطالبون بيه ؟
سمعت صوت زفير السيد
رفعت عيوني عليه
شفته يباوعلي بحزن
هز رأسه ب اي وحجه
_عبد الروؤف :: اي ولهذا السبب أنا خايف عليج منهم ماريدهم يأذوج مثل آخر مره اهلج مستحيل يقتنعون إذا مارجعتي وياهم
هزيت راسي ب اي ساكته
باوعت لسيد وابتسمت الدموع بعيوني
حجيت
_مهره :: موافقه اني سيد
عكد السيد حواجبه ب استغراب التفت على العلويه جهاد
ثنينهم جانو مستغربين من استسلامي للواقع
حجه السيد بحيره علامات الاستغراب كلها متجسده بملامحه
_عبد الروؤف :: بس انتِ شلون عرفتي الي راح احجي
_مهره :: لان هذا افضل حل
هز السيد رأسه ب اي مأكد الصلاح بقراري
_عبد الروؤف :: احسنتي بنتي اي اكيد هذا افضل حل
ضحك السيد يباوعلي
_عبد الروؤف :: توقعت ماراح تقتنعين بسهوله ... قرارج صائب عفيه بنتي
خليت ايدي على وجهي امسح بدموعي
وكفت اباوع الهم
حجيت بكل ثقه
_مهره :: هاي هيه سيد اني أشكرك ماقصرت وياي ولا ويا ابني تعبتك وياي بس ماجان عندي احد اكدر التجئ اله غيرك
عكد السيد حواجبه ب استغراب
حجه
_عبد الروؤف :: بنتي مهره
_مهره :: هاي هيه سيد اني مستعده ارجع لبغداد ما اريد اسبب الك احراج ومشاكل انت وعائلتك بسببي
رفعت العلويه جهاد حاجبها
خلت ايدها على كصتها تهز راسها
اباوع لسيد ملامحها تغيرت لليأس
حجت العلوية جهاد
_جهاد :: مهره انتِ شنو فهمتي من كلام السيد ؟
_مهره :: السيد جاي يطلب مني ارجع الأهلي ؟
رجعت العلويه جهاد ايدها على كصتها تهز بيها
حجه السيد
_عبد الروؤف :: بابا مو هيج أنا أقصد
_مهره :: سيد ماله داعي تكمل اني متفهمه موقفك ماريد أخليك بموقف محرج واخلي نفسي اني مأخذه ابني وراجعه لبغداد
حجيتها وانطيتهم ضهري ادخل جوا
حجه السيد
_عبد الروؤف :: يابنتي اسمعيني
_مهره :: سيد اني...،
قبل لا اكمل كلامي سمعت صوت العلويه جهاد صاحت
التفتت عليها بخوف شفتها خازرتني اشرتلي ارجع اكعد بمكاني
وحجت
_جهاد :: رجعي كعدي بمكانج وافهمي
رجعت كعدت بمكاني بكل هدوء
حجه السيد مبتسم يضيع صيحه العلويه
_عبد الروؤف :: بنتي أنا مستحيل اطلب منج ترجعين لبيت اهلج أنا أنطيت كلمه وكلمتي ماتصير ثنين مستحيل ترجعين لمكان حصلتي الاذى منه
مسحت ادموعي اباوع لسيد
حجيت ب استغراب
_مهره :: وكلامك سيد
حجه السيد بجزع
_عيد الروؤف :: بنتي أنا اريد اعقد الج على حفيدي مفرقد
لحظات من الصدمه وعدم الاستيعاب
التفتت على راجحه وامها شفتهن مبتسمات بفرح
رجعت التفتت على السيد جان مبتسم منتظر جوابي
هزيت راسي بنفي
باوعت لسيد وحجيت لرفض
_مهره :: لألا سيد مستحيل !!!
_عبد الروؤف :: ليش بنتي ليش ماتردين مفرقد عندي غيره
التفتت العلويه جهاد على السيد فاتحه حلكها بصدمه
ترمش بوجهه
رجعت باوعت لسيد
_مهره :: لا سيد ما اقصد هيج
_عبد الروؤف :: إذن ليش رافضه !!
دنكت راسي افرك ب ايدي
حجيت بتوتر
_مهره :: سيد اني ما اريد اجبر نفسي على احد وبعدين اني كارههه موضوع الزواج وما اكدر اضحي مره ثانيه
حجه السيد
_عبد الروؤف :: بس مفرقد مو اي واحد ... مفرقد حفيدي وأنا لو ما اعرف بيه وواثق بحفيدي أنا ما أفكر اهدي الج
رجعت العلويه جهاد التفتت على مفرقد بصدمه من كلامه
رجع السيد حجه
_عبد الروؤف :: وجودج بينا حمايه الج والابنج و اريد اوضح نقطه معينه
رفعت راسي اسمع لسيد كمل كلامه ب ابتسامه
_عبد الروؤف :: مفرقد هوا الي طلبج مني مو أنا طلبت منه ...سيد مفرقد طالبج على سنه الله ورسوله
باوعت للعلويه جهاد
باوعتلي ب ابتسامه تأكدلي الموضوع
نزلت راسي اباوع الأيدي
جنت شابكتهن بتوتر وخجل ما اعرف شلون أتصرف بهاي ألحظه
حجت العلوية جهاد
_جهاد :: مهره هذا حبل إنقاذ الج احنا نريد نأمن عليج انتِ وابنج
جنت أفرك ايدي واهز رجلي بتوتر
حجه السيد
_عبد الروؤف :: اجتني اخبار اخوج محمد جاي يتردد بجيته لنجف
رفعت راسي بخوف من سمعت اسم اخوي محمد
حجت العلوية
_جهاد :: لهذا احنا جاي نسارع ب الموضوع مانريد اخوج يغافلنا....
باوعت لحسن ب ايدها وحجت
_جهاد :: وانتِ فكري ب ابنج اكثر من نفسج ممكن ياخذو من حضنج ويأذون كلبج بيه
من سمعت كلامها فعلاً خفت واني اعرف اخوي محمد شنو يكدر يسوي اخوي محمد بدون ضمير ومشاعر
حجيت
_مهره :: بس شلون والسيد مفرقد
_جهاد :: لاتخافين على مشاعره هوا متونس على الموضوع
انتبهت على السيد كتم ضحكته مدنك رأسه
هزيت راسي ب اي ساكته
_مهره :: موافقه بس عندي شرط علويه
_جهاد :: وهو ؟
_مهره :: ما اريد عرس واريد اهلي حاظرين ب العقد
ابتسمت العلويه جهاد وحجت
_جهاد :: الج
ماتوقعت بيوم هيج راح يصير والزمن يرجعني لنقطه البدايه الي بلشت منها
جنت متوقعه صفحه السيد مفرقد انتهت وانسدت
بس الي صار غير كل متوقعاتي
طلعت من البيت بيدي حسن
شفت العلويه جهاد والسيد عبد الروؤف والسيد مفرقد والعلويات الكبار وأكفات برا منتظريني
دنكت راسي ومشيت خلف ام راجحه وراجحه
سلمت الكل رد السلام
اجت العلويه جهاد أخذت حسن من ايدي
أشر النا السيد نمشي
مشينا كلنا واني عازله نفسي عنهم مرتبكه وخجلانه من السيد مفرقد
جنت لابسه قفطان ابيضّ بيه عبايه من الرأس للعقد لان راح نعقد ب الامام علي
جنت اتلفتت ب المكان منتظره اشوف امي واخوي محمد لان حلفت ماسوي العقد إذا هما ماموجودين
وكفنا بمكان كلنا منتظريهم
على طول وكفتنا جنت منزله راسي مارفعته
سمعت صوت شخص مألوف
رفعت راسي شفته نفسه دلهب زوج عاتكه سلم علينا وأشر النا
التفتت اني والموجودين على المكان الي جان يقصده
شفت امي ومحمد اخوي وعمي قصي
جايين يمشون ب اتجاهنا خلفهم سالم لابس بدي اسود ضاب على جسمه وهوا معضل وايدي كلهن موشوم حتى ركبته موشومه لابس شفقه سوده
للحظات فز كلبي من شفتهم
شوق ... خوف ... اعتاب
كلهن تجمعن بيه لحظتها امي تباوعلي بغيض واخوي محمد بكره وحقد يريد يفترسني بنظراته
تسالمو الموجودين كلهم بس من بعيد الطرفين مزعوجين من بعض
جنت اباوع الامي منتظره منها ولو شوي ندم واشتياق بس هيا جانت مقابلتني بكره وبغض
خفت اتقرب الها اكثر وتفشلني كدام الموجودين اكتفيت اباوعلها من بعيد
جان عدهم علم بموضوع جيتهم بس استغربت ليش ساكتين وماحجو شي
اشر النا السيد نمشي
تونا جاي نمشي العلويات طلعن يمشن كدام انتبهت على دلهب دفع اخوي محمد من أكتافه
التفتت عليه محمد خازره بعصبيه
رفع دلهب حواجبه ب اندهاش
_سالم :: امشي يلا لك
تقدم سالم الي يلقبو ابو جاكوج دفع اخوي محمد من أكتافه خازره محمد من شاف سالم خاف ومشه ساكت
باوع دلهب الهم واكف بنص الطريق
باوع لمحمد واشر على سالم
_دلهب :: يعني هوا يخوف وأنا ماخوف !!
ابتسم سالم يباوع لدلهب
غمز لدلهب
فتحت عيوني مصدومه من شفته رفع عضلات صدره يباوع لدلهب
ضحك دلهب يهز رأسه
رجع غمز سالم وحجه
_دلهب :: جاي تغريني س..
اختفت ابتسامه دلهب من شاف السيد عبد الروؤف يباوعله بتحسف وخجل
دنكت رأسه يتحمحم بخجل
حجه دلهب منزل رأسه
_دلهب :: لا تفهمنا غلط سيد
سالم يدور وجهه ب المكان يضيع عيونه من السيد ومفرقد يباوعلهم كالب وجهه حسيته يكول معقوله أنا زوجت اختي لدلهب
هز السيد رأسه ومشه ساكت
التفت دلهب على سالم خازره
_دلهب :: صدك تحجي
_سالم :: انجب أنا شكو وين اكو زلمه ينعجب بصدر زلمه
سكت دلهب يفكر بكلام سالم
مشينه كلنا خلف السيد
جنت على طول الطريق متوتره رجلي كوا عايناتني امشي
وكفنا بمكان العقد امي واخوي محمد ساكتين طول فتره جيتهم اعتقد لان سالم خازرهم
انتبهت عليه كل ما محمد اخوي يريد يحجي يكرصه بخاصرته
اي هوا هذا سبب سكوت امي ومحمد
بدينا نعقد اني ومفرقد واني عيني ما كدرت ارفعها من الأرض واباوع بعيونه
بهذا اليوم صرت زوجه السيد مفرقد
كدام عيوني امي واخوي محمد وعمي قصي
ومحد بيهم حجه ولا كدر ينطق بكلمه
جانو ساكتين ومستسلمين للواقع
أخذت حسن ب ايدي
باوعت الامي وحجيت
_مهره :: ما ردت اعقد إلى وانتِ موجوده لان ب النهايه انتِ امي واخوي محمد مسؤلين عني والمشاكل ماراح اتغير هاي الحقيقه
ضحكت امي تهز ب ايديها
_جنان :: خوش مسوؤلين عنج ... مسوؤلين عنج وانتِ عايشه ببيت غير بيت اهلج وناس غير اهلج تحتمين ب الغربه من اهلج
حجت راجحه
_راجحه :: ممكن لان أهلها وحوش
التفتت الكل على راجحه مسكتها
حجه اخوي محمد
_محمد :: شوفي مهره انتِ هسه شاده حيلج بيهم مو
ابتسم وحجه بثقه
_محمد :: احنا هسه عند امير المؤمنين وداعة ابو الحسنين إذا ما احرك كلبج على ابنج شاربي مو علي
_جنان :: مايرفلي جفن لا عليج ولا على ابنج بعدد
صحت بحركه كلب اباوع الامي
_مهره :: إذا فكرتي تحركين كلبي ب ابني احرك كلبج على ابنج ومايرفلي جفن وما فكر بيوم هوا اخوي ولا انتِ امي !!!
صاحت امي بيه
واخوي محمد تقدم يريد يضربني
وكف مفرقد كدامي خالني بضهره وجهه على اخوي محمد
حجه
_مفرقد :: إيدك ماتوصلها
_محمد :: لو اكسر راسها هم ماتحجي مفهوم
_مفرقد :: من هذا اليوم انسى عندك أخت اسمها مهره الي بضهري حالياً زوجتي ومحد يكدر يأذيها بشعره
سحب سالم محمد من ياخته
_سالم :: سيد احنا اتفقنا محمد محد يأذي
ابتسم مكمل كلامه
_سالم :: غيري
سحب محمد عنا راجع بيه ركضت امي خلفهم تتوسل الهم يتركو
صاح السيد بيهم
_عبد الروؤف :: براااا الصحن مو هنا
_سالم :: ليش مانزوره الامام ؟
_دلهب :: لا حبيبي مو هسه
هز سالم رأسه ساكت
خليت ايدي على وجهي امسح بدموعي
تبقى حسره حنان اهلي بكلبي
حسيت ب ايد صارت على ايدي بعدت ايدي شفت مفرقد يباوعلي عيونه تتوزع على ملامح وجهي
اخذ ايدي ب ايده ماسكها بقوه
رجعت لبيت ام راجحه اتفقنا بعد يومين امشي لبيت السيد مفرقد
ومن هاي ألحظه بلشت حياتي ...
" ملاك "
جنت واكفه ارتب نقابي
التفتت على عمتي جانت ترتب ب المكان حتى نطلع
حجيت واني نازله اخذ التربة من الأرض
_ملاك :: عمه السيد يجي علينا مو؟
حجت عمتي وهيّا ترتب برفرف الكتب
_جهاد :: اي
هزيت راسي ب اي ساكته
التفتت من حسيت بشخص دخل للحوزه
شفت ضل لعبايه مرأه دخلت
التفتت اباوع
شفتها مره تجي بكبر عمتي لابسه عبايتها الزينبيه وجفوف ب ايديها بس بدون نقاب
عيونها حادات حد
حواجبها سود ثخان صاحبه رموش طويله وكثيفه خشمها صغير وبشرتها بيضه ناصعه
باوعتلي ابتسمت وغمضت عيونها
رفعت حواجبي ب اندهاش هاي الحركه حركه عمتي جهاد ب السلام
جانت عمتي منطتنا ضهرها ترتب ب المكان مامنتبهه لوجودها
كتفت ايديها تباوع لعمتي مبتسمه ابتسامه نص خد
عيونها ثابته على عمتي
حجت عمتي
_جهاد :: ملاك تعاي رتبي المسابح قبل لايجي السيد
_ملاك :: عمه
التفتت عمتي عاكده حواجبها تباوعلي
انتبهت على المره الموجوده
فتحت عمتي عيونها
رافعه حواجبها بصدمه وهيّا تشوف الي واكفه خلفها
ابتسمت المره اتقدمت لعمتي
حجت
_:: اهلاً جهاد
وكفت عمتي كدامها خازرتها بعصبيه منزعجه من وجودها
حجت عمتي كاتمه عصبيتها
_جهاد :: شتسوين هنا !!
اختفت ابتسامتها فاتحه عيونها ب اندهاش وحزن مصطنع
_:: تطرديني جهاد !! .... هاي وانتِ من اهل الكرم والترحيب
أشرت عمتي على الباب
صاحت بعصبيه
_جهاد :: طلعي براا غير مرحب بيج هنا
حجتها عمتي ودارت منطتها ضهرها
التفتت علي المره
كلبت عيونها وحجت تأشر على عمتي
_:: هيا شوي زعلانه مني
رجعت التفتت على عمتي
حجت
_:: يلا ياعيني خلينا نتصالح دخل بينا الشيطان واتعوذنا منه
دارت عمتي عليها صاكه على سنونها
صاحت بوجهه
_جهاد :: كتلجججج طلعيييي
_:: صدككك تحجين زعلانه مني هاي السنين كلها ؟؟
خلت عمتي ايديها على راسها وصاحت بعصبيه
_جهاد :: ولج انتِ شكد صلفه
_:: صلفه بس ما أنسى العشره لاتنسين جهوده اني وياج عشره عمر مايصير تنكرين العشره بسهوله
فتحت عمتي عيونها بوجهه مصدومه من صلافتها واستمرارها بدور المسكينه
صاحت عمتي
_جهاد :: مزن انتِ خنتيني ويا زوجي !!!
فتحت عيوني ب اندهاش خليت ايدي على حلكي اباوع للمره الراكده معقوله هاي نفسها !!!
اباوع لمزن رفعت عيونها على حيطان المكان
عكدت حواجبها وحجت
_مزن :: هاي صابغين الحايط
صاحت عمتي بيها تأشر على الباب
_جهاد :: طلعي برااا مزن طلعي برا دام بعدني مسيطره على أعصابي
_مزن :: هاي شبيج جهاد تزعلين مني علمود رجال ؟
ابتسمت عمتي بوجهه ابتسامه مكتومه ب العصبيه
_جهاد :: لا شلون ازعل عليج مزن كلشي طبيعي صديقه عمري والي جنت اعتبرها اختي تدخل طرف ثالث بيني وزوجي وبكل بساطه جايتني تلوم بيه لان متعصبه عليها
كلبت مزن عيونها
وحجت
_مزن :: ليش ماتكولين هوا دخل بينا طرف ثالث ليش اني ؟
_جهاد :: تعرفين شنو ؟... اني الطرف الثالث بينكم يلا هسه برااااا ... لو تدرين ؟؟... ابقي انتِ هنا اني طالعه
مشت عمتي من كدامها تلبس بنقابها
نكلبت ملامح مزن للجد
اختفت ابتسامتها وعيونها بلشت تضهر عليهن الحديه
حجت
_مزن :: اني جايه اقدم الج المساعده
كملت عمتي تعدل بنقابها بدون ما تلتفت لمزن وتقدم الها اهتمام مشت تطلع من المكان
التفتت مزن على عمتي
حجت
_مزن :: اعرف منو قتل ابنج عون
وكفت عمتي بمكانها بدون ما تلتفت على مزن
كملت مزن كلامها
_مزن :: يعني مو القاتل نفسه بس اكدر انطيج حبل يساعدج توصلين للقاتل
انتبهت على عمتي تفتح بكف ايدها وتسده بعصبيه
حجت عمتي
_جهاد :: مزن صبري بلش ينفذ
ما اهتمت مزن لكلام عمتي
كملت كلامها
_مزن :: اني جايه اقدملج مساعده على طبق من ذهب جهاد
_جهاد :: ماريد اي مساعده مقدمه منج انتِ اكتفيت ب الي شفته منج
طلعت عمتي من المكان
باوعتلي مزن رفعت حواجبها بنفاذ صبر
حجت
_مزن :: ذاك يوم وهذا يوم وجهاد ماتغيرت بيوم .... صدك انتِ منو ما اعرفج ؟
_ملاك :: ملاك اني زوجه فقار
رفعت حواجبها وفتحت عيونها ب اندهاش
ابتسمت وحجت تباوعلي
_مزن :: خوش يعرف يختار سيد فقار
اكتفيت ب السكوت مارديت عليها
سمعت صوت عمتي تصيحني
لبست نقابي وركضت اطلع من الحوزه خلف عمتي
مشت خلفي مزن
شفت عمتي واكفه بباب الحوزه
انتبهت على السيد واكف من بعيد يحجي ويا واحد من الشيوخ
حجت مزن
_مزن :: تعرفين جهاد اني كلش من المعجبين بشخصيه السيد عبد الروؤف
أشرتلي عمتي نمشي ماتريد تسمع كلام مزن
كملت مزن كلامها
_مزن :: و ب التحديد شخصيته وهوا يخفي دلائل قضيه عون
وكفنا اني وعمتي ثنينه مصدومات من كلام مزن
التفتت عمتي على مزن
_جهاد :: مزن اختصري لا أتعبيني
بتسمت مزن تباوع لعمتي جهاد
جانت شخصيتها جادحه تشبه شخصية عمتي جهاد
حظورها جان ثكيل ب المكان
بحيث اني بقيت صافنه عليها ماعرف شلون ابعد عيوني
وكفت قريب عمتي جهاد حاولت تلمس عمتي
خزرتها عمتي مانعتها تتقرب الها
ابتسمت مزن والتفتت تباوع لمكان مجهول
التفتنا اني وعمتي على المكان
فتحت عيوني بصدمه واني أشوفها تأشر على السيد عبد الروؤف
حجت مزن وهيّا مبتسمه
بكل ثقه نطقت كلماتها
_مزن :: الدليل موجود كدامج جهاد لاتعبين نفسج
