رواية سراج السادة الفصل السابع والأربعون بقلم غسق ادريس
﴿وَإِذَا مَرِضْتُ فَهُوَ يَشْفِينِ﴾
الحمدلله
الحمدلله
الحمدلله
سبحان الله
سبحان الله
سبحان الله
الله اكبر
الله اكبر
الله اكبر
لاحول ولاقوة الابا الله العلي العظيم
لاحول ولاقوة الابالله العلي العظيم
لاحول ولاقوة الابالله العلي العظيم
استغفرالله العظيم واتوب اليه
استغفرالله العظيم واتوب اليه
استغفرالله العظيم واتوب اليه
اللهم صلِّ على محمد وآل محمد
خلونا ويا السادة
🤍
لبنان
✈️.
..............
علم على الكاع ياحيدر
يابويه ومنك اتعذر
شتفيد اعذار ياحامي الجار
الك تاريخ ظل يشهد..... يا ليث الغاب
على الشتدات تتودد
........
ترجف الموت من تحتدد
يصل الصيف ..... يمينك سيف
غليظه ارقاب يتقصد
تدوس الموت تتعمدد .... يابو الحملات ... الك صولات
تهز الكون من تشدد
......
ختم كلامه بضربه خفيفه على صدره
عيونه متمركزه على انهمار ندف الثلج الي تسقط من السماء
حجيت
_انتبه لا تبرد سيد
مال برأسه للخلف
هز رأسه ب اي ...رفع كتفه الي جان ساند بيه جسمه على الحايط
تراجع بخطواته عيونه ما زالت تراقب تساقط الثلوج
تمشيت ب ايدي صينيه الخشب بيها كوبين جاي مهيل
حجيت واني انزل الصينيه على الطاوله
_:: اخد الجاي قبل ما يبرد
أخذت كوبي وتراجعت كاعده على القنفه
اجه ب اتجاه ب الطاوله اخذ كوب الجاي وكعد على القنفه
ارتشف رشفه من الجاي
ابتسم نص خد
ابتسمت واني أشوف خده ينحفر بعمق بمكان الغمازه
رفع عيونه
جان صاحب عيون زرقاء حاده ورموش سوداء وحواجب كثيفه
حجه بصوته الخشن والرجولي
_:: عاشت ايدج علويه
ابتسمت ساكته
التفتت عيوني على الحديقه
ثنينه ساكتين متعمقين ب الهدوء والسكينه الي تحاوطنا
المكان الي كاعدين بيه اشبه ب مكان معزول عن العالم
الصاله جبيره
مفروشه ب فراش شتوي لون ابيضّ واحمر
الطاوله وسط الصاله محاوطه ب الاريكات الخشبيه
المدفئة الكبيره بوسط الجدار على جانبيها
مقلمه الخشب
باب زجاجي شفاف كبير مفتوح على الحديقه وسط الصاله
الباب مغلق نكدر نشوف كلشي
الثلج ينزل ب الحديقه
الحيونات مختبئه تدفي نفسها
واني واخوي السيد معن كاعدين مثل كل مره نتأمل المكان بهدوء
التفتنا ثنينه على صوت قفل الباب وهوا يفتح
صارت عيونه ثنينه عليه
ابتسمت اباوع
لابس اسود ب اسود على جانب ايده جنطته والمعطف الأبيض
ابتسم ببشاشه
حجه
_عدن :: السلام عليكم
ردينه السلام اني ومعن
اجه ب اتجاهنا
نزل الجنطه والمعطف على القنفه وكعد يفرك ب ايديه
حجيت واني اكوم من مكاني
_نبراس :: خليني اجيبلك كوب جاي ويانا
هز رأسه ب اي متشكر
مشيت ب اتجاه المطبخ
جانت اكو طاوله صغيره بزاويه المطبخ عليها مبخره مشتغله
صوت المسجل مشتغل
على سوره البقره
أخذت كوب وكعدت اصب الجاي
من كملت أخذت الكوب وطلعت
شفتهم يحجون ومندمجين ب السوالف
مشيت ب اتجاه عدن قدمت اله كوب الجاي
اخذه وحجه ب ابتسامه
_عدن :: متشكر علويه
_نبراس :: تدلل سيدنا
رجعت كعدت بمكاني
اسمع الهم ولحواراتهم
عدن جان يحجي عن آخر عمليه اجراها وشكد جانت نسبه خطوره العمليه والحمدلله عدت على خير ونجحت
شاركتهم ب الحديث
كلنا نحجي على الشغل واهم المواقف الي صادفتنا
أعرفكم وواضحلكم قبل لا نكمل كلام ونسترسل ب الأحداث
اني نبراس وعدن و معن اخوان وثلاثتنا اطباء
ف راح تتعلمون على كعدتنا وحدثينا ب العمل لان كلنا نشترك بنقطه معينه
الي هيا
المريض ....
بوسط حديثنا واندماجنا
توقفنا عن الكلام ملتفتين على صوت بجي رهف بنت معن
دخلت تبجي ايدها على عيونها
ركضت على ابوها محتميه بسده تشكي اله
حاول معن يفهم شبيها وليش تبجي ماكو مافهمنا منها غير البجي
غمضت عيوني فأهمه السبب
من سمعت صوت العلويه جاي من الخارج تصيح بعصبيه وحديه قاصده رهف بكلامهما
دخلت للصاله وبدخلتها وكفنا اني واخواني
ضربت العكازه ب الارض بقوه
السبحه السوده ملتفه على ايدها لاصابعها
خواتم الياقوت الخضره متوزعه ب اصابعها
عيونها الخضر يجدحن ب المكان مركزه نضرها على رهف الي ضمت وجهه بجسد ابوها
صاحت
_عالية :: دكتور معن يمتى مقرر تعلم بنتك الأدب !!!
مشّه معن مبتعد عن رهف للعلويه
وكف كدام العلويه اخذ راسها باسه وحجه
_معن :: عذريني علويه إذا بدر غلط من بنتي بس هيا تربيتج شلون تغلط !!
مشه عدن يبوس راس العلويه واني خلفه
أخذنا من رضاها ومشيناها تكعد على القنفه
كعدت على القنفه تباوع لرهف الي بقت بمكانها منزله راسها للارض دموعها تنزل بهدوء
حجت العلويه تباوعلها
_عاليه :: ولج انتِ ماتوبين ؟
قوست رهف حلكها بزعل تبجي
عكد معن حواجبه ب استغراب وعصبيه مصطنعه يباوع لرهف
_معن :: علويه رهف !!! ...
رفعت رهف راسها بخوف صبعها بحلكها
حجت
_رهف :: ها بابا
_معن :: شنو غلطج ألي زعل امي منج ؟
نزلت راسها بدون ماتحجي شي
حجت امي
_عاليه :: اني أجاوبك .... رهف مستمره تحجي لبناني ومفضله الهجه البنانيه على العراقيه !!!
ابتسمت اباوع لرهف شلون غطت وجهه تبجي وامي تباوعلها بعصبيه زعلانه منها
رفع معن حواجبه فاهم الموضوع
مو غريب صار روتين يومي ب النسبه النا
كل مره امي تزعل من رهف لان تحجي لبناني وماتحجي عراقي
وامي كلش تستعز ب اصلها وبلهجتها العراقيه رغم احنا تاركين العراق من سنوات !!
صاحت رهف بزعل وعصبيه
_رهف :: ماحب العراق
فتحت امي عيونها بصدمه
باوعت لضرغام وصرخت بزعل
_عاليه :: معن !!!!
مشه معن لرهف عاكد حواجبه
رهف من شافت ابوها
غطت وجهه تبجي بزعل
كعد معن كدام رهف
سحب ايدها من وجهه يريد يحجي وياها ماقبلت عاندت تحجي واكتفت ب البجي والنحيب
مشه عدن الها اخذها بحضنه وحملها من الارض
حجه وياها بهمس ب أذنها بدون مانسمع شي
بعدت ايدها عن وجهه تباوعله
العيون محمره من الدموع
حجه عدن
_عدن :: ليش رهوفه شلون تكرهين العراق وانتِ دمج وأصلج عراقي !!!
برطمت بزعل
حجت بحديه
_رهف :: ماحب العراق لان انطردنا منه
لحظات من الهدوء مرت ب المكان
نضرات الصدمه بعيون امي
عكد معن حواجبه ب استغراب
حجه يباوع لبنته
_معن:: شنو هل حجي هذا رهف منو طردنا !!!
_رهف :: شهله كالت
هزيت راسي بقله حيله من سمعت ب اسم شهله
وكفت امي على حيلها بعصبيه
ضربت عكازتها ب الارض وصاحت بصوت واحد مسموع !!
_عاليه :: شهله !!!
اكتفيت ب السكوت منتظره المصيبه الي راح تصير بنزله شهله
اعرفها اختي الصغيره اعرف إلسانها والكره الي شايلتها على اهلنا ب العراق !!!
نزلت شهله تتمشه على الدرج تباوع الامي
ماجانت مستغربه على الأغلب جانت تتسمع للحديث
وكفت على آخر بايه ب الدرج باوع الامي وحجت
_شهله :: ها علويه ؟
ركزت امي عيونها شهله بعصبيه
بينما اكتفت شهله تباوع الامي بهدوء بعيونها الزرق
بوبوء عينها يتحرك ب المكان بدون ثبات
شهله مولوده ليله القدر صاحب شعر ابيضّ على اشقر
بشره بيضاء ناصعه مثل القمر
رموشها بلون شعرها وحواجبها كذالك
صاحت امي بعصبيه
_عاليه :: يمتى ناويه تسدين سيره العراق !!!
_شهله :: من تقتنعين نرجع للعراق !!
_عاليه ::حتى من طلعنا من العراق جان عمرج 10 سنوات شنو هذا البغض التارس كلبج انتِ !!
عكدت شهله حواجبها بعصبيه
حجت
_شهله :: مابغض العراق اني ابغض بيت عبد الروؤف بس
صاح معن بعصبيه
_معن :: شهله !!!
_شهله :: ليش تردوني اسكت عن الواقع السيد عبد الروؤف وبنته جهاد هما السببب بطلعتنا من العراق هاي !!
رخت امي من سمعت اسم عبد الروؤف وجهاد
سكتت صافنه ب الفراغ
على الأغلب زارتها ذكرى من عدهم رجعتها للماضي
حجه عدن يهدء النفوس
_عدن :: اذكرو الله يا جماعه .... وشهوله مايصير كل مره ترجعين تفتحين دفاتر الماضي ... الماضي للماضي والمستقبل النا سواء حصلنا منهم أذيه او لا يبقون اهلنا والدم ماينكر اصله
نزلت شهله راسها بهدوء ساكته
رجعت امي كعدت بمكانها هم ساكته
عم الصمت ب المكان للحظات قبل لا تحجي رهف
_رهف :: عمو ليش طلعنا من العراق
_عدن :: مو مهم ليش المهم احنا سوا وعايشين بخير وسلامه مايهم وين عايشين ب العراق ابو ب لبنان يكفي احنا ببيت واحد .... وعلويه رهف اريدج تحجين عراقي كل مره مثل ما حالياً جاي تحجين عراقي مفهوم !!
هزت رهف راسها ب اي ساكته
التفت عدن على شهله
حجه
_عدن :: وانتِ شهله اكتفي بتجاهلج لذكريات الماضي
سكتت شهله واكتفت ب السكوت
انتبهت معن صافن ورايح بغير عالم
عرفت الي جاي يدور بباله
مستحيل معن ينسى الماضي وجرحه الي رافقه السنين هاي كلها
العراق ......!!!
بيت السيد عبد الروؤف ...!!
جهاد .....!!
والكثير من ذكريات الماضي الي مرافقتنا كلنا حاملين جرح من الماضي جان سبب بس عائله عبد الروؤف .
" قدس "
_دللول ي الولد يبني دللول
جنت من تبجي الوليلك دللول
اه يبني وحياتي وشمعه البيت
اجو كل الولد بس انت ما اجيت
شلون اصبر على فراكك يمدلول ؟؟
دلول ي الولد يبني دللول
رفعت راسي على صوت ينده ب اسمي
فتحت عيوني بثقل
جفوني مورمه من البجي والسهر
شفت قس واكفه بباب الغرفه عيونها علي
تباوعلي بخوف وحزن
توا تريد تدخل للغرفه وصحت بيها
_قدس :: لااا طلعي طلعي
_قس :: قدس خليني اجي يمج
_قدس :: ما اريد احددد عوفونيييي
تراجعت بخطواتها تباوعلي بحزن وقله حيله
كمت من مكاني سديت الباب بوجهه ورجعت كعدت بمكاني
خليت راسي بحضني وسكنت المكان
جنت منتظره ارجع اشوفها كدامي
منتظره تجيني
بقيت بمكاني منتظرتها
انتظرت هواي بس ماكو ماجت !؟
رفعت راسي اباوع للمكان
فارغ مالها اثر
اتلفتت بكل زوايه الغرفه
الغرفه فارغه؟
رجعت راسي بحضني
حتى الدموع صارت ثكيله على جفوني
ماكدر ابجي واطلع الحركه الي بداخلي
اجاني صوت ضحكات
ضحك مملوء ب الشماته والاستهزاء
صكيت على سنوني بعصبيه
رفعت راسي عيوني عليهم
دخلو للغرفه يركضون
مجموعه من الأقزام عارين الجسم
ملامحهم لكبار
بس اجسامهم لاطفال
يركضون ب الغرفه ويتصارخون بضحك
خليت ايدي على أذني من أصوات ضحكهم
ماريد اسمعهم ماريد تعبت منهم
وكف واحد منهم كدامي خله ايده على أذنه يضحك
جنت ساكته وما مهتمه لوجودهم
تعودت عليهم كل يوم يجون يزعجوني بضحكهم واستهزائهم ويمشون
حتى من جانت فاطمه عايشه جنت أشوفهم
قبل جنت اخاف على فاطمه منهم
بس هسه فاطمه ما موجوده
اخاف على منو منهم ؟
ركض واحد منهم على ملابس فاطمه
جنت مجمعتهم بزاويه الغرفه على فراشي
كل ما انام أفرشهم بصفي حتى اشم عطر فاطمه
فزيت من مكاني من شفته
ركض على الملابس يخربط بيهن
ركضت اصرخ وابعده عن الملابس
من شافوني خايفه على ملابس فاطمه تجمعو كلهم على الملابس يحاولون يزعجوني بيهم
خليت الملابس على صدري
وكعدت اصرخ بلعو صوتي
على صوت صريخي دخلت قس ونضال يركضن
حضنتني قس من ضهري تبجي وياي واني على صرخه وحده ما متحمله الي جاي يصير بيه
رفعت راسي وصرخت
_قدس :: ولكمممممم أريال بنيتي حاجولي الموت عليها ليش اخذها مني ليشش
حجيتها وطحت بحضن قس مغمي علي
أيامي جانت كلها تمشي مثل بعضها
بحسره فاطمه وبحسره صوتها وبحسره ريحتها
اخلص اليوم بدون نوم ضهري على الحايط وعيوني على باب الغرفه عندي امل واحد يدخل للغرفه بيده فاطمه
منتظره صوت بنتي وضحكتها عيونها الملونه
ماجنت ادري الفراك يهد الحيل هيج
كل ماشوف روحي ب المرايه اكول معقوله فاطمه جانت السبب بعيشتي وصحتي
بذاك اليوم المشوؤم الساعه ب 12 بليل جنت بين النايمه والصاحيه
ضهري على حايط الغرفه
عيوني تغمض وتفتح
باب الغرفه ينفتح وينسد بخفه بس من تعبي مابيه احجي لو اكوم أشوف منو موجود برا
بقيت على كعدتي كل ماريد أغفى افز من صوت الباب
آخر شي انتهيت كلش ماتحملت غمضت عيوني رايحه بنومتي
جنت تعبانه ومن يومين مانايمه كبل غفيت بتعب ماحاسه بروحي
رحت لغير عالم ولا حسيت ب الدنيا بعد
مافتحت عيوني غير من حسيت شي يمشي على ايدي
كل ماهشه يرجع يمشي
فتحت عيوني واني على كعدتي
صارت عيوني على ايدي
حسيت بهيئه شخص كاعد كدامي مدنك على ايدي يلحس بيها
ماجنت مستوعبه الموضوع والي جاي أشوفه
غير من رفع عيونه بعيوني
هنا حسيت روحي طلعت من جسمي واني أشوف منضر وجهه كدامي
جان وجه لرجل صاحب لحيه طويله وحده من عيونه مخلوعه
والعين الثانيه عليها اثر حرك جبير مالي الوجه
منضره مقرف ويخوفففف بشكل
باوعلي ب ابتسامه فاتح حلكه
طفر بوجهي ماد لسانه
كمزت من مكاني اصرخ
توقعت الي جاي أشوفه حلم او من مخيلتي
بس من صار فوكي يطلع ب السانه يريد يخلي بحلكي صرت اصرخ بعلو صوتي اريد واحد يجيني يخلصني
انفتح باب الغرفه بنفس الساعه نضال وقس وحده بيدها نعال والثانيه مفاتيح الجنان
باوعت حولي محد موجود اختفى
اجن ثنينهن يركضن ب اتجاهي نضال رافعه الكتاب تقره سور
وقس كعدت يمي تحاول تسيطر عليه
كمت من مكاني ايدي على كلبي ارجف بخوف
باوعت حولي ابجي اشرتلهن على ايدي واني ابجي
_قدس :: ايدييي جاننن يلحس ب ايدي
_نضال :: ولججج شنو بس لا جريدي
_قدس :: لااااا لااااا واحد رجاللللل رجالللللل
حجيتها اصرخ ايدي على اذني كل ماذكر الموقف انهار من الخوف والبجي منين هذا منين طلع اول مره أشوفه
أخذتني قس من ايدي هيا ونضال يغسلن الي
نضال واحنا ننزل الدرج رفعت مفاتيح الجنان وحجت ب استيعاب
_نضال :: يااا شوف الحض جايبه مفاتيح الجنان عبالي قرأن
البيت جان هدوء كلها نايمه انتبهت على الساعه ب 2 بليل
أخذني للحمام يغسلن الي
واني واكفه كدام المغسله جان المرايه كدامي عاكسه الخلفي
واني اغسل من رفعت راسي
اتصنمت بمكاني من شفته نفسه صاعد على السقف منزل راسه ليجوا
ابتسم بوجهي واجه يركض ب اتجاهي
صرخت بعلو صوتي منهاره
ماحسيت بشي بعد
فتحت عيوني يوم ثاني بفراشي البنات نايمات يمي
اباوع حولي مامستوعبه اني وين وشنو صار
من تذكرت الي صار البارحه كومت نفسي بمكاني خايفه لايرجع مره ثانيه كلهم يهونون بس هذا لا لا
من يومها بلش يضهر الي حتى واني وسط اهلي
صرت اخاف اباوع لغير جهه اخاف أشوفه ورا الباب ... ب انعكاس المرايه ...خلف عمي ... يمشي على الحايط ...جوا الدرج ....ب الضلام
برا البيت ...
ماصار يتركني وحدي بكل مره اشوفه اموت الف موته من خوفي
إلى ان اجه ذاك اليوم
الي دخلت اسبح بيه
سديت باب الحمام ودخلت اسبح بسرعه واطلع ماحب اطول اخاف لا أشوفه
وكفت جوا الدوش افرك شعري من الشامبو مغمضه عيوني لا يوصل الهن شامبو ويحركني
احس بصوت خطوات على الماي الي ب ارضيه الحمام
احاول اغلس واتناسى الموضوع ماكدر كل ما اسمع افز من مكاني
غسلت شعري حيلل من الشامبو ماكو يزيد ماينقص
معقوله اني جاي اسبح جوا شامبو مو ماي
سمعت صوت ضحكات جاي من حولي
ابتعدت عن الدوش مغمضه عيوني
احرك اريد المنشفه تجي ب ايدي
حسيت ب ايد صارت على جسمي من ورا نزلت بعمق
فتحت عيوني اصرخ بخوف
ناسيه الشامبو على وجهي وعيوني احتركت
من شفته وراي ماعت روحي
اريد بس اطلع من الحمام
ماهتميت من برا ولا اهتميت للعيب فتحت باب الحمام وطلعت من الحمام اصرخ
اشكر الله وقتها ماجان واحد برا بس نضال من سمعت صريخي طلعت من المطبخ
من شافت حالتي اجتني مصدومه تركض تريد تغطيني واني اصرخخ
حالتي صارت أسوء من قبل صرت مانام وخواتي اخليهن يحاوطني اخاف يجيني
بيوم من الأيام نمت بوسط خواتي الضهر حلفتهن محد تمشي عني من حسيت ب الأمان بوجودهن يلا غمضت
فزيت على ايد تمشي على وجهي فتحت عيوني صار بوجهي غضنفر
ماعرف من شفته شصار بيه حسيت روحي طلعت من مكانها
بحيث اول ماشفت وجهه وشميت ريحته بجيت وشهكت بحركه كلب اصرخ
أخذني بحضنه يمسح على ضهري واني ابجي
ضربته على ضهره بقوه اصرخ
_قدس :: شلون يهون عليكك شلون يهون تتركني هيج وتبتعد
_غضنفر :: منو كال هان عليه ب اليوم اموت الف موته من اذكرج
باوعت بعيونه
_قدس :: غضنفر تعبت اني
باوعلي عيونه مدمعه
هز راسه ب اي واخذني بحضنه يمسح علي ضهري واني اشكيله
جنت مقهوره والدنيا مسوده بعيوني
حسيت غضنفر وشوفته مثل الهوا دخل لرئه
بعدني عن حضنه باوع الوجهي وحجه بتركيز واهتمام
_غضنفر :: قدس أنا اريدج يمي
_قدس :: اني هم أريدك
ابتسم بعيوني بتعب
حجه
_غضنفر :. أنا بيج أشوف فاطمه والدنيا من مشيتي عني غابت عني الدنيا
_قدس :: راحت فاطمه نست أمها وراحت
_غضنفر :: لا فاطمه موجوده بمكان حلو وهيا منتظرتنا وهيا أصلاً جابتني الج
فتحت عيوني ب اندهاش مافاهمه قصده
حجيت بتعطش لطاري فاطمه
_قدس :: شنو يعني
_غضنفر :: فاطمه اجتني ب الحلم جانت بيد جدي
_قدس :: منوو
_غضنفر :: سيدنا الجبير مات من سنين اجاني بيده فاطمه هيا رادتني اجيج أنا أحتاجج قدس وانتِ تحتاجيني تعاي رجعي وياي لخاطر فاطمه
صفنت بوجهه متأثره بكلامه هزيت راسي ب اي باوعتله وحجيت
_قدس :: اي ارجع بس عندي شرط غضنفر
_غضنفر :: شنو ؟
_قدس :: اريد أتعالج من الي اني بيه اني قبل جنت رافضه لان خايفه بس هسه اني مصره أتعالج
" جهاد "
واكفه بين نارين وقرارين واحدهم أصعب من الثاني ب النسبه الي
القرار الاول اسد قضيه عون واسكت عنها
بس شلون واني حالفه اطلع حقه وماخلي دمه يروح هدر !!
والقرارالثاني عندي أصعب من القرار الاول
القرار الثاني أوافق أتزوج النقيب جزام
البعض راح يشوف الخيار الثاني ارحم من الخيار الاول
بس اني ماشوف هيج !!!
اني من ذاك اليوم الي اطلكت بيه من همام
نفسي ماصارت تتقبل اسمح الإنسان ثاني يدخل حياتي
صعبه ب النسبه الي أتقبل شخص ثاني بعد الجرح الي حصلته من التجربه الاوله
جنت كاعده ب الحديقه على المرجوحه
مشبكه ايدي واهز رجلي بتوتر
أعصابي كلش تالفه مامتحمله احد ولا طايقه الحياه
كل ماذكر الموضوع تتخربط أوضاعي
بنص كعدتي وصفنتي رن تلفوني شفت المتصل مزن
زفرت نفس ب انزعاج
بالي كلش مو صافي مزن كلش مو وقتج
رفضت الاتصال مابيه احجي وياها
رجعت اتصلت مره ثانيه
رفعت الخط وحجيت
_جهاد :: مزن كلش مو وقتج
_مزن :: عيني السلام عليكم اولاً
_جهاد :: عليكم السلام احجي مزن شنو رايده ؟
_مزن :: اريد اجي اشوفج عندي موضوع وياج
صحت بيها بعصبيه
_جهاد :: سلامات مزن شو يعني حجيت وياج شوي ب الحوزه رجعنا العلاقه مره ثانيه !!
_مزن :: يا قساوه كلبج جهوده
_جهاد :: مزن كلش مو وقتج صدكي أعصابي تالفه لا تخليني افرغ قهري بيج
حجت بهدوء
_مزن :: اعرف لهذا اريد اجي احجي وياج
مارديت عليها
بقيت ساكته اهز برجلي
رجعت حجت
_مزن :: جهاد اعرف ماطايقه وجودي بس خليني هل مره اشاركج حزنج واساعدج !!
مسحت على وجهي استغفر
حجيت
_جهاد :: تعاي اني ب البيت
_مزن :: جايه
سديت الاتصال منها اعرف غلط أتواصل ويا مزن وهيّا صاحبه موقف ماينسي وياي
بس اني احتاج شخص وياي
لأول مره احتاج شخص يفهمني شنو اسوي وشنو راح تكون نتيجه أفعالي
اقل الساعه ووصلت مزن
طلعت امي بوجهه صافنه بيها بصدمه
تباوعلي وتباوع المزن
حجت امي
_زهراء :: يااا ولج جهاد هاي مزن ؟
ابتسمت مزن بخجل تقدمت ب اتجاه امي تسلم عليها
حجت
_مزن :: اي علويه مزن شنو نسيتيني مو جنت بنتج الثانيه بعد جهاد ؟
صفنت امي بوجهي مصدومه مامستوعبه هاي مزن بعد هاي السنوات كلها
قوست حلكي اباوع الامي اخذت مزن بحضنها تسلم عليها
باوعتلي مزن وغمزت
همست
_مزن :: بعد عندي شعبيه هنا
_جهاد :: لا احنا خوش ناس نتعامل ب اصلنا ومانذكر الماضي
باوعتلي صفح ماعاجبها
اخذتها للحديقه قدمت الها الضيافه وكعدت
جنت فارشه على الحشيش لان البيت يخنكني ماتحمل كعدته
باوعتلي مزن
حجت
_مزن :: شبيج محتاره ؟
_جهاد :: شنو عندج انتِ ؟
_مزن :: انتِ احجي ب البدايه
_جهاد :: احجي انتِ
_مزن :: لا انتِ
_جهاد :: مزن لاتدوخيني ؟؟؟
تربعت معدله كعدتها
باوعتلي وحجت ب اهتمام
_مزن :: جهاد اكيد عرفتي اني وهمام اطلكنا؟
عكدت حواجبي ب استغراب
حجيت
_جهاد :: اي تستاهلون بس ليش مو جنتو مثل عصافير الحب
هزت ايدها ب انزعاج تتحسر
_مزن :: بعد اكتشفت همام مايستحقني
_جهاد :: لا الصراحه ثنينكم تستحقون بعض حتى لا تبلون الناس بيكم
باوعتلي بحزن مصطنع
_مزن :: شوي شوي على مشاعري
_جهاد :: هسه كملي شنو عندج
هزت راسها ب اي وحجت
_مزن :: جهاد همام مايعرف منو قاتل عون بس جان يعرف السيد عبد الروؤف يعرف منو قاتل عون ويعرفه ب الاسم وهااا قاتل عون عايش ب النجف وموجود وحتى عنده تواصل ويا السيد
صفنت على مزن ابلع بريكي
ليش بكل مره اعرف السيد يعرف بقاتل عون احس الدنيا تسود بعيوني وكلبي يريد يطلع من مكانه
حجيت
_جهاد :: شلون عنده تواصل ويا
_مزن :: اي قريب على السيد
خليت ايدي على راسي دايخه اشرت الها تسكت إذا إستمرت. يمكن انجلط بمكاني
حجت
_مزن :: اعرف ب النقيب حزام تقدم الج نصيحتي الج وافقي انتِ حالياً قرارج وحياتج ب ايد السيد بس من تزوجين راح تصير حياتج ب ايدج وقرارج ب ايدج وبيد زوجج
رفعت عيوني اباوعلها
كلامها صح اني حالياً ماكدر أتقدم خطوه لان السيد كل ماتقدم يوكف بوجهي
بهذا اليوم حسمت قراري
ماكو شي يمنعني بعد
فتحت باب المصلى شفت السيد كاعد على المصلايه يسبح
رفع رأسه شافني واكفه بباب المصلى
هز رأسه وحجه
_عبد الروؤف :: ها بابا جهاد
_جهاد :: سيد اني موافقه
عكد حواجبه ب استغرب
حجه
_عبد الروؤف :: عن شنو موافقه ؟
_جهاد :: اني موافقه أتزوج الضابط جزام
فتح عيونه ب اندهاش مصدوم من قراري
دنك راسه على السجاده صافن
رجع رفع راسه
باوعلي وحجه
_عبد الروؤف :: شنو هل قرار المفاجأه
_جهاد :: لا اني من قبل جنت افكر ب الموضوع واليوم اخذت قراري اني اريد أعيش حياتي مثلي مثل غيري ماريد ابقى عمري كله غالقه على نفسي باب الحياه
جان السيد صافن بوجهي يسمع لكلامي
كل كلمه احجيها هوا يهز راسه مأيد كلامي
من ختمت كلامي
هز راسه ب اي منزل راسه على السجاده حجه يفر بسبحته
_عبد الروؤف :: ان شاءالله خير
هزيت راسي ب اي وطلعت من المصلى
وكفت بباب المصلى جسمي كله يرجف مامصدكه الي جاي يصير وشنو حجيت اني وعلى شنو وافقت ؟
مشيت لغرفتي الدنيا تدور بيه مادري قراري هذا وين راح يوديني وشنو نهايته بس الي اعرفه اني ما مرتاحه بهذا القرار
فتحت باب الغرفه دخلت للغرفه
كعدت على الجربايه صافنه
شسويتي جهاد
معقوله وصلت بيج تختارين الزواج حتى تجيبين ثار ابنج ؟
" وردة "
كاعده على القنفة بهدوء والكتاب مفتوح بين إيدي أقرا صفحاته بهدوء
بالي بعيد عن كل ضوضاء العالم وضجيجها
بأيدي الثانية كوب قهوا دافئ تتصاعد منه ريحة القهوا وتملي المكان بإحساس مريح الصالة هادئه والجو لطيف وناعم
كل شيء حولي متوكف حتى يمنحني هاللحظة الصغيرة من الراحة والسلام بين صفحة وصفحة جنت اخذ رشفة من القهوا مستمتعة بجمال الوقت وبساطة اللحظة
غمضت عيوني ابتسامتي ضايعه بقهر
فتحت عيوني عاضه على شفتي ب انزعاج وعصبيه
التفتت على صوت صرخته
شفته يصعد الدرج ركض
التفتت على باب الصاله شفته دخل يركض بسرعه لابس زيه العسكري الأسود والشفقه فوك راسه
ركض خلفه كل بايتين يصعدهم جمع
دخل خلفهم الثالث بيده حزام اسود لابس هم زيه العسكري
ركضو ثنينهم يصعدون الدرج
بعدت الكتاب عن حضني اخذت كوب الكهوا وركضت خلفهم
وكفت على الدرج صحت ب علو صوتي
_وردة :: ماماااااا جزام وصمد راح يكتلون طالب
حجيتها وركضت خلفهم بسرعه
توجهت بخطواتي لغرفه طالب جان الباب مفتوح
طليت براسي اباوع الهم
شفت جزام وصمد واكفين بوسط الغرفه واحد بيده حزام والثاني خشبه
انتبهت على طالب فاتح باب شباك غرفته وواكف عليه
يباوعلهم ويهدد ب صياح وخوف
_طالب :: بس تتقدمون أذب روحي انتحرررر والله
صاح صمد بيه
_صمد :: ولك إذا ماذبيت روحك هسه أنا اذبك
التفت طالب ب اتجاهي بأوعلي بتوسل وخوف
من شفت نظراته انقهرت عليه
دخلت للغرفه
صحت
_وردة :: شباب خطيه بس هل مره بعد مايمشي ويا بت ابو نرجس
التفتو الولد ثنيهم بصدمه يباوعولي
فتح طالب عيونه بصدمه يعضلي بشفايفه
باوعتلهم صافنه عليهم معقوله جفصت ؟؟
على الخط دخلت امي تركض للغرفه
ركضت على الولد رافعه ايديها
صاحت
_نغم :: مايعيدها بعدددد يمه مايروح للكوفي
انفتحت عيون الولد بصدمه اكثر
اباوع الطالب وجهه صار اصفر
التفت صمد على جزام
حجه
_صمد :: جاي اكتله لان ماخذ السياره يسوقها وانت ؟
_جزام :: معارك ابو علي جارنا
باوعو ثنينهم على طالب وصاحو
_جزام :: تروح للكوفي ولك طالب ؟؟؟
_صمد :: عمرك 17 وتحجي ويا بت ابو نرجس ؟؟؟
تقدمو الولد يردون يكتلو وهوا يصرخ يريد يذب روحه
صاحت امي بيهم فاتحه ايديها
_نغم :: رجليكم البسها برأسكم إذا تقدمتو
_صمد :: انتِ بس فهميني يمه تريدن تسربتين الولد من هسه ؟؟؟
صاحت أمي بيه
_نغم :: ليش اني ماسربتك مثلاً ماتذكر من لكفتك خاتل ب المطبخ تشرب جكاير وعمرك 11 سنه شسويتلك ماتذكر مو جويت ط#... ب الجكاره
بقت امي تهدد ب الولد محد يتقرب لطالب
سكتو الولد عنه منتظرين الوقت المناسب حتى يكتلو
نزلنا كلنا ب الصاله
تجمعنا على الطاوله نتغده
طالب كاعد بصف امي حتى مارفع عيونه على الولد من الخوف وهما شوي ويمددو على الطاله
بين الحديث والسوالف
سكتنا كلنا من جزام حجه
_جزام :: اريد اتزوج أنا
ابتسمت امي بفرح
هزت راسها ب اي وصاحت
_نغم :: يوم السعد هذا.... تدلل يمه اني عندي الك مره معدله حاجزتها الك صالي شهرين
حجه
_جزام :: موجوده المره بس اخذج تشوفيها
عكدت امي حواجبها ب استغراب
حجت
_نغم :: منو ؟
_جزام :: علويه ب النجف
التفتنا كلنا على جزام صافنين عليه
حتى صمد رفع راسه من صحن الاكل يباوع لجزام
حجه
_صمد :: الساده الي جدهم السيد .........
هز جزام راسه ب اي
باوع صمد الامي وحجه
_صمد :: السيد ال .... يصير ابن عمه هذا السيد يعني كحلي عيونج إذا انطوج مره من عدهم
حجيت ب استغراب
_وردة :: بس احنا سنه ؟
باوعلي صمد صفح يلوج بحلكه
حجه
_صمد :: شنو الفرق مو امج كل محرم تطلع تدور قيمه
صفنت متذكره اي والله صح امي بمحرم ماتطبخ النا
نخلصها ثوابات ومجالس
حجت امي
_نغم :: ماكو مشكله واذا شيعيه اهل البيت تاج على الرأس . بس شنو البنيه غير نعرف عنها
نزل جزام الخاشوكه من ايده باوع الامي وحجه
_جزام :: علويه وعمرها ب 30 ماعرف بً الضبط شكد ....منفصله وعدها ابن مقتول جانت عايشه ب ايران هااا خريجه تربيه
صفنت امي على جزام بصدمه
صاحت بيه بعصبيه
_نغم :: صدك تحجي انت ؟
_جزام :: اي ليش ؟؟
_نغم :: شنو عمرها ب 30 شنو منفصله شنو عندها ابن ؟؟؟؟'
_جزام :: ماشوف بيها مشكله أنا كلش مقتنع بيها واشوفها مثل الفرصه الي اجتني وزين منها إذا وافقت وهااا أنا من قبل رايدها بس جانت رافضه
كام من مكانه يريد يمشي
باوع الامي وحجه
_جزام :: أنا متمكس بهاي الانسانه ام صمد باجر نطلع لبغداد نشوفها جهزي نفسج
حجاها ومشه مبتعد تاركنا بحيرتنا وحدنا
الموضوع ممكن البعض يشوفه طبيعي بس امي جانت رافضه لان
فكره البنيه عمرها بعمر اخوي تقريباً ومطلقه وعندها ابن متوفي ؟!؟!؟؟
سكتت امي بعدم رضا تاخذه جزام بواهسه
اتفقنا نروح يوم ثاني لنجف نشوف البنيه
سكتت امي بينها وبين نفسها وقررت تشوف البنيه وبعدها تقدم رفضها
بس كلشي تغير من صارت العلويه كدامنا
صارت عيوني اني وامي عليها
معقوله هاي هيئه إنسانه عمرها ب 30 ؟
طويله ورشيقه
صافنه على بطنها ماعدها كرش واني الي عمري 20 كرشي كرش حامل ب الشهر التاسع
شعرها كصير لكتفها....وبشرتها بيضهه
وجهه صافي مثل الكونكريت وين الحبوب وين التجاعيد وين كبر العمر
حواجبها ورموشها كثيفه وصاحبه شفايف وسطيه منفوخه
جانت كاعده كدامنا بكل ثقه
اني وامي صافنات عليها
اباوع الامي فاتحه حلكها تباوعلها من فوك ليجوا
كرصت امي من زرها اريدها تستوعب
سدت امي حلكها تباوعلي وترمش
انطيتها نضره مو وقت الصدمه باشري ب الموضوع
فجأه امي الي جانت رافضه موضوعها غيرت خطها كله
وصارت تتفق ويا العلويات على العرس
الشي الوحيد الي مافهمته من كالت
_جهاد :: اني ب النسبه الي ماريد حنه ولا عرس حتى حفله ماريد على كد العقد حفله بسيطه
عكدت امي حواجبها ب استغراب مافاهمه
حجت
_نغم :: ليش علويه ؟
_جهاد :: احنا عدنا حاله وفاة بنت ابن عمي وهيّا عزيزه عدنا مانريد حفله وبنته ماصار سنه من ماتت
هزت امي راسها ساكته عرفت بيها ضاجت لان تريد تفرح ب ابنها الجبير
حجت العلوية
_جهاد :: أنا هم ماحرمكم من فرحتكم ب ابنكم ماعندي مشكله تحتفلون بينكم وبين اهلكم
بنفس اليوم اتفقنا على كلشي لان هما عدهم علم بجيتنا ومن قبل اخوي مفتاحهم ب الموضوع باشرنا بموضوع الخطوبه
وأمانه جنت كلش مرتاحه وفرحانه بً العلويه
" مهره "
:- مرتاح يمَك وأحس كل الخساير قَبل
بيك الله عَوضها ♥️.
دخلت على بيت السيد عبد الروؤف
جنه وبنت ابنهم وعزيزتهم
شفت بيهم الي ماشفته ب اهلي
حب ... احترام ....خوف ... اهتمام .... تقدير ...
مرات العوض مو شرط فلوس ولا سياره ولا بيت مرات العوض زوج واهل ينسوك كل حزنك
من دخلت لحياتهم عرفت الحياه صح عرفت ليش اني لازم أعيش وأكمل
صرت اكمل يومي بفرح وانتظر باجر يجي حتى ارجع أعيشه ويا عائله السيد بحب جديد
تعرفون شنو الفرق بين اهلي واهل مفرقد؟
اهلي مايعرفون الله والحرام
وبيت السيد عايشين على حب الله
نزلت الدرج شايله بيدي حسن على أكتافي
أضرب على ضهره بخفه اريد أسكته متنحس عليه اليوم بس يبجي
صارت كدامي عمتي رقيه ام مفرقد
باوعتلي ب ابتسامه
حجت
_رقيه :: مهرة بنيتي تكدرين تحظرين بس الجاي لسيد
_مهرة :: اي عمه تدللين
ابتسمت بوجهي ومشت لغرفتها تعدل بربطتها اعتقد راح تمشي للحوزه
مشيت ب اتجاه المطبخ اهز حسن ب ايدي واجهز ب الجاي
نفخت نفس ب انزعاج
صحت بحسن
_مهرة :: ولك ماما شبيك اتسودنت عليه اليوم
زاد ب البجي والصريخ واني اباوعله بقهر
هسه هذا شبي
خليت القوري على النار ومشيت ب اتجاه الحديقه اهز بيه احاول أضحكه واخلي يسكت
اشرت على الورده وصحت ب اندهاش
_مهرة :: واووو حسن وردة .... واوووو شجرة .... الله حديقه
احجي واهز ب حسن وهوا رافض يسكت
سمعت صوت ضحك من وراي
التفتت على مصدر الصوت
شفت مفرقد واكف لابس عمامته وبيده الكتب يريد يطلع للحوزه
اجه ب اتجاهنا مبتسم
اخذ حسن مني يضحك
حجه
_مفرقد :: ماراح يسكت لان مايفهم شنو جاي تحجين
_مهره :: ااف تعبني مايسكت
_مفرقد :: ليش شبي
حاول يسكته ويلاعبه ماكو نتيجه حسن على بجيه وحده
بإوعلي وحجه
_مفرقد :: خليني اخذه لسيد
_مهره :: لا مفرقد عيب
باوعلي ب استغراب
حجه
_مفرقد :: ليش عيب ؟
_مهره :: مو كل مايبجي ناخذه لسيد والسيد خطيه ينشغل بيه
ابتسم مفرقد يباوع لحسن
حجه
_مفرقد :: على الأغلب حسن تعلم على السيد
حجاها والتفت يطلع من الحديقه
ركضت ورا امشي خلفه
طلع من المطبخ وتوجه للمصلى
فتح باب المصلى شاف السيد كاعد على السجاده بيده القرأن يقره
ايده على حسين ابن ملاك وفقار نايم على السجاده
رفع السيد صوته على بجي حسن
اشر لمفرقد يجيب حسن
مشه مفرقد بيده حسن
وكف كدام السيد انطاه حسن الي خبص البيت ب البجي
رفع السيد ملابس حسن من بطنه يمسح عليه ويقره قران عيونه على القرأن بس ايديه على حسن
يقره قرأن ويمسح على جسم حسن
نيم حسن على بطنه ورفع ملابسه من ضهره يمسح عليهم
بقيت صافنه على حسن شلون بلش يسكت ويبتسم
ابتسمت على ابتسامه حسن
التفت مفرقد يباوعلي ب ابتسامه
رفع حواجبه يغمز بعيونه
خليت ايدي على راسي اضحك
اخخ منك حسن صار عنده روتين يومي يتقصد يخبصنه ب البجي والصريخ حتى ناخذه للسيد يمسح عليه ويقره
اباوع الحسن يهز رجليه يضحك
رفع ايديه على حسين ابن ملاك يضرب براسه
خطيه حسين فتح عيونه من نومته العميقه ب انزعاج
بلش حسين يبجي وحسن يضحك
رفع السيد ايده الثانيه يمسح على بطن حسين
اباوعلهم ثنينهم سكتو يتمضحكون
بقيت صافنه عليهم مبتسمه
سبحان الله السيد ايده مثل البلسم عليهم بحيث بس يسمعون صوته ويمسح عليهم يسكتون
حسن تعلم من اجيت إلى هذا اليوم إذا ما السيد يمسح عليه مايكمل يومه ولا ينام
واني مرات استحي لان احسه السيد ينشغل بيه
فتحت عيوني بصدمه متذكره الجاي
طلعت من المصلى اركض للمطبخ
شفت الجاي يفور طفيت النار
وصبيت استكانين جاي لسيد ومفرقد
اخذت الصينيه وطلعت من المطبخ
السيد من شاف الجاي ضحك يباوع الايديه
حاول مفرقد ياخذ الجهال منه رفض السيد وهما انخبصو ب البجي
انقهرت على السيد محتار ب الجهال
بس شنسوي هما جهالنا مايردونا
بعدها بكم يوم جانت خطبه العلوية جهاد
شكد جنت أتمنى اعرف قصتها وحياتها وخاصةً من عرفت عندها ابن مقتول بس استحيت اسأل مفرقد
بقيت ساكته كاتلني الفضول
يوم الخطبه جان من أجمل الأيام الي عشتها
ماشفت خطوبه مثل خطوبه العلويه جهاد
جانت لابسه فستان اخضر نوع القماش ثكيل الفستان منفوخ مثل فستان العرايس ب أكمام طويله خفيفه
لون الفستان اخضر ملكي مطرز بذهبي
لابسه طرحه على كامل الرأس ضاهر شعرها من كدام
الطرحه طويله نازله على الارض مفروشه مكياج العلويه يجننن وفخم لون الحمره مارونيه وهذا الشي العجبني ب المكياج جانت الحمره منطيه المكياج والملابس جماليه
لابسه ذهب على طولها حتى الحزام ذهب نازل من خصرها
العلويات كلهن موجودات بنات اخوها
جانن مطقمات ب البس كلهن لابسات هاشمي ب ألوان غامقه كل وحده لون مختلف وكل وحده تكول الزين عندي
انتبهت للعلويه جهاد طول الوقت متوتره وضايجه تحاول تبين نفسها طبيعيه بس رجفه ايدها فاضحتها
حتى من عقدو دخلت للغرفه عيونها مدمعه لحكنها أمها وصديقتها اسمها مزن وعمتها رفضو البنات يدخلن خلفها
بقيت اني والبنات برا نحاول نضيع السالفه كدام النسوان
رفضت العلويه تطلع وصار صوت بجيها مسموع من برا
صرنا اني والبنات وحده تباوع بوجهه الثانيه محتارات
دخلت أخت العريس باوعتلنا وصاحت
_وردةً:: يابه علويات نسوان حبيباتي اخواتي عزيزاتي بناتي
_نغم :: وردة ؟؟؟؟
_وردة :: اي صح نسوان بلا زحمه اتحجبن العريس يريد يدخل لعروسته
ابتعدنا كلنا نلبس عبينه طلعن العلويات من الغرفه تاركات العلويه وحدها
شوي ودخل الضابط جزام منزل راسه
جان لابس قاط صحراوي صاحب هيبه وشخصيه
دخل للغرفه عند العلويه جهاد
انتبهت على وردة اخته وكفتت كدام باب الغرفه عود خاف وحده تدخل لو اخوها يريد يطلع
بس انتبهت عليها تطلطل من الباب
مشيت اوكف قريب عليها
الباب جان مفتوح شوي وكفنا اني وردة طالات براسنا
انتبهت على جزام واكف كدام العلويه ماخذ ب ايديها يبوس بيها يحاول يهديها وهيّا على بجيه وحده
سمعته حجه
_جزام :: جهاد ماطلع جزام إذا ماجبت حق ابنج
_جهاد :: احترك كلبي جزام صار وجهه كدام عيوني
اخذ راسها على صدره يمسح على ضهرها
انتبهت على راس ثالث صار بوسطنا التفتنا اني ووردة على الرأس
انتبهت على شاهيناز وأكفنا بنصنا تاكل خيار وكيمر
كشت روحي من الخليط الي مسويته بس عذرتها حامل جاي تتوحم
ابتعدنا كلنا عن الباب من اجو يطلعون
الحمدلله محد منتبهه على وكفتنا جان العلوية سوتنا ميز رزايل
طلعو من الغرفه العلويه عيونها محمره من البجي
جزام ماعاف ايدها بقى متمسك بيها حتى وقت لبسو الحلقات
جان وياها بكل لحظة حتى هيا نست البجي والزعل وبقت مبتسمه
هوا يبوس بيها وهيّا أدنك خجلانه
انتهى العقد والاتفاق شهر للعرس بس ماجان اكو عرس أصلا مجرد العلويه تروح لكربلا هيا وجزام يبقون بكربلاء ثلاث ايام ويمشون لبغداد لبيت زوجها
وهيج بدت الأيام ايام حلوه بين حسن ومفرقد وبين بيت اعيالي
وبيوم من الأيام كعدت بالي عند الشهريه هذا الشهر اتأخرت عليه
سويت تحليل منزلي واكتشفت اني حامل
من حجيت المفرقد جان طايررر طاير من الفرح أخذني بنفس اليوم سويت تحليل ب المختبر وفعلاً جنت حامل
جنت فرحانه لان جنت منتظره هاي ألحظه
كل مره أشوف حب مفرقد الحسن اصفن واكول شلون راح يكون حبه الابنه إذن
وهنا اني ملكت الدنيا بمفرقد وحسن والي ببطني
" عاتكه "
اكثر شخص فرحان بزواج عمتي من الضابط اني جنت طايره من الفرح لان عمتي واخيراً شافت حياتها
هاي الخطوه فرصه الها حتى تكمل حياتها بعيد عن ثار عون وحزنها الشديد اله
بيوم الزواج ماكدرت اروح لان ماكو عرس كبل لكربلاء
جنت فرحانه لان عمتي راح تجي وتصير قريبه علينا ببغداد والي يونس اكثر جزام ودلهب اصدقاء مقربين يعني دوم مكابله عمتي وكاعده
بعد زواج عمتي وجزام ب أسبوعين انطانا دلهب علم انو صديقه عنده بستان على اطراف ديالى
وهوا والولد مقررين يجتمعون ويا نسوانهم ب البستان
تونست على السفره من عرفت عمتي وشاهيناز وجادح موجودين وفرحت اكثر من عرفت دلهب وجزام عازمين السيد والكل راح يكون موجود
فرحت حيل لان احب من نجتمع ويا اهلنا بمكان واحد احس الفرحه تكمل بيهم
فعلاً بيوم السفره الكل تجمع وطلعنا بسيارتنا للبستان
الكل موجود حتى حفيدات العلويه لباب بس مهجان رفضت تجي صح زعلت منها بس من عرفت عمتها مريضه عذرتها
وصلنا كلنا للبستان
نزلنا من السياره الجو بيه بروده حلوه
ريحه الشجر ماليه المكان
البستان معزول هوا وكم بستان ثاني لان كبار
على أطراف ديالى وبغداد
اول مانزلنا كدامنا صار بيت وعلى مسافه من البيت اكو فله بيضه بيها بلكونه خارجيه وبكل الجهات شبابيك وباب زجاجي منظرها يجنن
بهاي المسافه من البيت للفله من ترفعون راسكم راح يصير فوكم عناقيد عنب متشابكه على خشب على طول الطريق
موجود كدام الفله مسبح جبير واكو بستان جبير بس مثل المعزول ومرتب مابيه أشجار بس حشيش وملاعيب أطفال ومراجيح
على زاويته مجره نهري رايح لنهر فاصل بين محافظه ديالى وبغداد
البستان عباره عن جنه
موجود بيه فواكه مختلفه مثل العنب والرمان والبرتقال والتين
وحتى شجر زيتون اكو وغير الي ماشفناهن اني والبنات لان البستان جبير يحتاج سياره يلا نوصل لنهايته
انتبهت اكو حصن صغار وكبار يتراكضن وسط البستان وحتى بقر يمشن بمجموعات طبيعي يمرن من يمنا
صرخت شاهيناز بفرح تأشر على خليه نحل
_شاهيناز :: نحلل
ابتسمت بفرح عيوني على المكان بيني وبين نفسي صفنت متسأله إذا هذا بستان عادي ب الارض ف شلون راح تكون الجنه وجمالها ؟؟
يارب الجنة
وبيوت الجنة
وضياء الجنة
وصحبه الجنة
ورؤيه خالق الجنة
دخلنا للبيت جوا ننتظر اصدقاء دلهب يجون
بعد ساعتين تقريبا صفن كدام البيت اربع سيارات كل سياره نزلت منها عائله زوج وزوجه وأطفال
ونكدر تكون هذول أبطال الجزء الثاني لسراج الساده وكل عائله بيهم قصتها مشوقه اكثر من الثانيه
من تجمعنا كلنا بمكان واحد وعرفنا قصه كل وحده بينهم نصدمنا صدمه بعد صدمه لان كل وحده تكول الاكشن والحزن والحب يمي
بنفس اليوم تأقلمنا وياهن
" معراج "
كلام منقول .....
متجمعين كلنا بمكان خلف البيت مثل المصلى بس لا هوا مكان معزول السيد أضاف بيه لمساته وقت الصلاه خلانا نكنسه ونغسله ونفرش السجاده
جمعنا كلنا بيه وقت الصلاة نصلي
من كملنا صلاه جنا كاعدين نسبح بمكانا
انتبهت على واحد من الولد نزل يشم ريحه الصلايه
رفع وجهه كاشه روحه
حجه
_برهم :: يابه المصلايه بيها ريحه بول بس لا بزونه هنا مشخره وأنا اصلي
_مناف :: الله يتقبل ب النيات
_برهم :: ماتاكل خرا اكله ريحه بول
التفت عليهم السيد بهدوء
حجه
_عبد الروؤف :: ابني هاي ألفاظ مايصير تنطقها بعد الصلاه
صفن برهم بوجه السيد
هز راسه ب اي وحجه
_برهم :: ان شاءالله سيد اعتذر يعني الفظهن قبل الصلاة
التفت دلهب على برهم حجه
_دلهب :: لا تشاقه ويا السيد
سكت برهم يباوع لدلهب صفح
حجه السيد يشيل سجادته
_عبد الروؤف :: سيد معراج اقره دعاء الفرج
هزيت راسي ب اي
بلشت اقره والولد وياي
_معراج ::بسم الله الرحمن الرحيم
اللهم صلى على محمد وال محمد
اللهم كن لوليك الحجه ابن الحسن
صلواتك عليه وعلى ابائه
في هذه الساعه وفي كل ساعه
ولياً وحافظه وقائداً وناصرا
ودليلاً وعينا حتى تسكنه ارضك طوعا
وتمتعه فيها طويلا برحمتك يا ارحم الراحمين 🤍
" مهجان "
_برودك مانريدة احنة ويانة
واحس مجبور بل عشرة ويانة
تزعلني واعديلك ويانة
اراضيك وترد تزعل علية
انا المبحر بشوكك وراسي!
وانا والطيب بعضامي ورسي
تنام وبثلج راسك وراسي
قيامة وصايح الكفار بية
كاعده ب الحوش عيوني على السما عيوني كلهن دموع امسح بيهن ويرجعن يطيحين
شجاي يصير ليش هيج ؟
اني شنو سويت حتى هيج اتجازه
صافنه بيني وبين نفسي أتذكر معقوله مسويه غلط وجاي يعاقبني عليه ؟
بس لا ماسويت شي اني اعرف نفسي ماغلطانه بحقه
اني ويا احسب للحجايه الف أحساب قبل لا احجيها
ما مسويه شي ماغلطانه بحقه
زين ليش هيج جاي يسوي ؟؟
التفتت على صوت عمتي جانت واكفه بباب البيت تباوعلي بحزن
اجت تمشي ب اتجاهي كوا تمشي
حيلها رايح من المرض
كمت من مكاني مشيت ب اتجاهه امسح بدموعي
حجيت
_مهجان :: عمه ليش طلعتي بارده عليج
_زينب :: سوده عليه ولج يمه عيونج رايحه من البجي
دنكت راسي بحزن عاضه على شفتي الدموع بدت تسقط من عيوني
هزيت راسي بلا
حجيت
_مهجان :: لا من البرد عيوني دمعن
_زينب :: تجذبين عليه مهجه ولج يمه انتِ مثل بنيتي وكلبي يلجمني عليج ويعرف بحزنج
باوعتلها صافنه بعيونها الدموع تنزل من عيني
حجيت بغصه
_مهجان :: ياريت امي صدك عايشه وكلبها يلجمها عليه
_زينب :: يابعد روحي ولج يمه لاتبجين احلفج بروح اهلج
أخذتني بحضنها تمسح على راسي واني ابجي
حجيت اشهك بدموعي
_مهجان :: ليش هيج عمه شسويت اله اني حاطته بعيوني وهوا عامي عيوني من البجي
بعدتني من حضنها تباوعلي بحزن
أخذت ايدي تبوس بيها وتتوسل
_زينب :: مهجه يمه احلفج بعزاز كلبج لاتبجين وتنقهرين من داوود يمه انتِ علويه وبنيه نظيفه وبيج حوبه ماريد حوبتج تصيب ابني فدوه رحتلج
حجتها تبجي وتتوسل بيه
صفنت عليها روحي باهته
لحد هاي الحظه حتى المواسه لخاطر لا ابنها يتأذى من ابنها
هزيت راسي ب اي ساكته مسحت ادموعي واخذت ب ايد عمتي
_مهجان :: يلا عمه امشي ندخل الجو بارد
مشت وياي تمشي بصعوبه من المرض تحجي وياي واني أهز راسي ب اي ساكته
دخلتها لغرفتها غطيتها ب الحاف دفيتها وطلعت من الغرفه كاعده ب الصاله عيوني على باب البيت اباوع من الشباك
مر شريط ايامي ويا داوود بهاي كعدتي
شلون فجأه تغير داوود رغم هوا من البدايه جان هيج بس ماعرف هسه أحسه بارد مثل الثلج
مايريدني ينفرني بكل مره احاول أتقرب منه
شكد حاولت اصلح علاقتنه الي انتهت بدون سبب
فجأه داوود صار يبتعد عني ويتهرب مني
رغم احنا عرسان جدد وبعدنا ببدايه علاقتنه وهاي الأيام غيرنا يعيشها بحب وسعاده بس اني ؟
فزيت على صوت سياره داوود تصف كدام البيت
كمت من مكاني ركضت للغرفه غطيت روحي ب الحاف ومثلت النوم
طول ربع ساعه يلا دخل للغرفه
حسيت بيه اخذ المخده من الجربايه شمرها على الارض
بقيت مغطيه راسي أتنفس بصعوبه الشهكه مكتومه بنص بلعومي ماريد ابجي ويسمعني
كلش اختنكت روحي حسيتها جاي تطلع هذا البرود جاي يكتلني بروده جاي يخنك روحي والي يأذيني ويزيد قهري ماكو سبب
يمكن السبب الوحيد داوود من البدايه ماحبني ولا رادني
من تروجنا عرفت بيه ماعنده ولا ذره مشاعر الي
حتى المشاعر الي تصير بين المتزوجين
داوود ماعنده ولا ذره مشاعر لا حب ولا كره
حسيته تزوجني حتى اعتني ب أمه بس
كل وقته خارج البيت واذا جان ب البيت يكعد ويا أمه او ب التلفون
ماينطيني من وقته شوي
أتذكر من السيد اتصل عليه وأنطاني علم بسفره البستان
شكد عرفت كلت راح اكدر اكضي وقت ويا داوود واطلع من الخنكه والحزن
بس رد فعل داوود جانت مو مثل ما توقعتها
باوعلي عاكد حواجبه ب انزعاج
حجه
_داوود :: وشنو يعني مهجان ؟
_مهجان :: يعني نروح وياهم للبستان
_داوود :: وليش لازم كل ما اهلج يتجمعون احنا وياهم ؟
ضاعت ضحكتي عيوني تتنقل بين عمتي وداوود
حجيت
_مهجان :: ليش شكو بيها لو نتجمع ونغير جو
_داوود :: جاي تشوفين امي انتِ ؟؟
_مهجان :: اي عمتي نأخذها ويانا اصلاً هيا نفسيتها راح ترتاح بهاي السفره
دنك راسه على صينيه الاكل يأكل
باوعت العمتي ب ابتسامه
ابتسمت بوجهي وحجت
_زينب :: شكو بيها يمه داوود خلي البنيه تروح تتونس ويا العلويات
_داوود :: يمه انتِ تعبانه مو مال طريق طويل ولا اكدر اعوفج ب البيت وحدج
حجت عمتي
_زينب :: اي خلي مهجان تروح ويا البنات واني وياك نبقى
رفع داوود عيونه يباوعلي عاكد حواجبه بعصبيه
حجه
_داوود :: لا يمه مهجان مو أنانيه لهل درجه ماتقبلها على نفسها تعوفج وانتِ مريضه وتروح تتونس ... مو صح مهجان ؟؟
صفنت عليه ماعرف شحجي
هزيت راسي ب اي ساكته
رجعت لغرفتي اسمع عمتي وراي تحاول تقنعه بس هوا مصر على رأيه
أنطيت علم للسيد ماجي وياهم
رد عليه السيد ب استغراب
_عبد الروؤف :: ليش بنيتي حاسبين احسابج ويانا
_مهجان :: لا سيد على غير مره ان شاء الله
_عبد الروؤف :: داوود رفض ؟؟
_مهجان :: لا سيد بس اني ماكدر اروح وعمتي خطيه تعبانه ماكدر اتركها وحدها ان شاءالله على غير مره اني وياكم
ب الكوا كدرت اقنع السيد انو اني الرافضه الروحه مو داوود
البنات وقتها زعلن مني وضاجن
لان احنا متعلمات نشارك بكل الفعاليات واني جنت متحمسه اروح بس داوود جان عنده قرار ثاني
هيج خلصت ايامي ويا داوود اني احاول ارضيه وهوا يبعد عني اني احاول أطور علاقتنه واحافظ عليها وهوا بارد ب العلاقه مامهتم
حتى علاقتنه الزوجيه جانت بارده وبدون روح وحب
صار ينام بغرفه عمتي
مرات اعذره اكول تعبان لان أمه مريضه بس اني جاي اشوف العكس هوا يتهرب مني اني يعني مارايدني اني
بقيت ساكته ماشكي الأحد ولا افضفض وكاتمه بصدري ماريد اخرب علاقتي صح هوا بارد وياي بس اني احبه ومايهون عليه ابتعد عنه لهذا بقيت ساكته ماشكيت الأحد
ماجنت اعرف سكوتي راح يرجع عليه ب أذيه وخذلان
" قس "
أريدَك وَأدري كُـل شيء بيك يَنراد
يا أعَز نجمَة شِفتها بلون بَغداد .
من ذاك اليوم الي جفصت بيه كدام السيد معراج إلى هذا اليوم ما رجعنا تواصلنا على الفيس . شكد دعيت وتمنيت ماشك ولا انتبه لكلامي بس لا اكيد عرف ولكفها
لان بكل مره أرسله على الفيس يشوف الرساله بدون رد
وصلتني نتيجه غبائي وجفصاتي
السيد معراج عرف بيه اني الي أتواصل ويا كل هاي المده بشخصيه رجل
غميت كصتي بحركه كلب
هسه انتِ منين تطلعين بهاي سوالفج
حتى عيب شيكول هسه
كل ماتذكر السالفه كلبي يوجعني من القهر شلون هيج صار شلون جفصتها
هسه بينه وبين نفسه شفكر شنو اخذ من نضره
هم كال هاي ادبسزز وماعندها واحد يضبها
ضربت على فخدي بحركه كلب وصحت
_قس :: اي والله صدك ماعندي واحد يضبني
انتبهت على روحي كاعده بنص اهلي اخواني وعمي محمد ونضال كدامي يباوعولي ب استغرب
هزت نضال راسها ب اي وصاحت
_نضال :: لاعاب السانج صدك محد عرف يضبج
نزلت راسي ب خيبه وحزن
خليت ايدي على كلبي الخفقان من البارحه لازمني لعب ب احاولي لعب
الصدك الصدك ؟؟؟ اني ما متعبانه ومقهوره لان معراج عرف بيه ب العكس متونسه بس القاهرني شلون راح يرجع الايران
وخاصةً من قدس انطتني علم يريد يخطب دكتوره ب ايران
هيج كلبي مفرفح
مادري ليش ماعرف شصار بيه وليش هيج مقهوره
اتحسرت ايدي على خدي صح كاعده بنص اهلي بس بالي مو وياهم
بس عيوني عليهم بس بالي ابد مو وياهم بالي بمكان ثاني
عن حال قس :
_كلشي ياخذني عليك
الصفنه واشواكي وحسرتي
كلهن يذكرني بيك
وانه حالف ماجيك
حسيت ب ايد صارت على كتفي التفتت
شفت نضال كاعده بصفي تباوعلي ب استغرب
حجت بهمس ماتسمع الموجودين
_نضال :: شبيج ولج وضعج ماعاجبني
هزيت راسي بلا مابيه شي
رفعت حواجبها بعدم تصديق
حجت
_نضال :: لاتجذبين عبالج اني ماعرفج اني ربيتج واعرفج زين مثل ماعرف بنتي ابتهال ... هاي صفنتج والقهر بعيونج مو ماخليه
اتحسرت بحزن اريد انكر وأجذب بس ماكدرت
دمعتي سبقتني لامعه بعيوني
بسرعه مسحتها ب ايدي مدنكه راسي
فتحت نضال عيونها بصدمه من وضعي
سحبت ايدي بقوه لحضنها
همست
_نضال :: شبيج ولج قس منو وياج ؟
_قس :: مابيه شي بس مختنكه
_نضال :: ليش مختنكه مو اليوم تغدينه سمج
باوعتلها صفح هسه بلا هاي شتحجي وياها
حجيت
_قس :: نضال السمج شعلي ب المزاج
_نضال :: مو انتِ تحبين السمج.... واليحصل شي من اليحبه ماينقهر كون
صفنت عليها من حجت هيج
هزيت راسي ب اي وحجيت بحسره
_قس :: واذا ماحصلتي
_نضال :: وليش ماتحصلي ؟
هزيت راسي بلا
كمت من مكاني صاعده لغرفتي
امشي للغرفه بتعب كوا ارفع رجلي من الارض
دخلت للغرفه وشمرت نفسي على الفراش واهسي مكسور
هسه اريد افهم شبيه ؟
ليش هيج مزاجي نكلب من يمتى اني رابطه مشاعري ب إنسان ثاني واذا تزوج واذا سافر اني شكو
ضميت راسي ب الحاف الفراش مزعوجه
نكلبت على ضهري عيوني على سقف الغرفه
التفتت على التلفون جان على الفراش أخذته
اول مادخلت على الفيس
من شفته ناشر قصه كلبي كام يريد يطلع من مكانه
كمت على حيلي فتحت القصه جان ناشر صوره اله لابس قميص زيتوني وبنطرون ابيض مكتف ايديه خلفه المسبح
عرفت هاي الصوره ب البستان
القصه الثانيه فيديو مصوره كاعد كدام المسبح
كاتب على الفيديو
~ آخر ايامي في العراق ~
صوت باسم الكربلائي قصيده اخاف من اعوفك بعد ماشوفك معراج يصور ويقره
صفنت على الفيديو ايدي ترجف سديت التلفون وشمرته من ايدي ابجي
ضربت على فخدي بقهر احاول أسيطر على نفسي ماكدرت مادري ليش فجأه نهاريتت
رجعت أخذت التلفون من الارض
فتحته امسح بدموعي
دخلت على صفحه قدس اختي
ضغطت اتصال وفتحت اسبيكر انتظر قدس ترد
اجاني صوت قدس تحجي ب استعجال
_قدس :: ها قوسه
_قس :: قدس انتِ وين ؟؟
_قدس :: ب البستان
عضيت على صبعي ماعرف شلون احجي بدون ماخليها تحس علي
حجيت بتوتر
_قس :: كلكم ب البستان مو؟
_قدس :: اي الكل موجود
_قس :: حتى معراج ؟
سكتت قدس ماردت
شوي واجاني صوتها
_قدس :: ليش تسألين عنه ؟
_قس :: احجي لا اتعبيني
_قدس :: اي موجود .... العلويه لباب وحفيداتها وأولادها راح يرجعون الايران بعد كم يوم
صفنت اسمع الكلامها
كملت كلامها
_قدس :: السيد معراج مستعجل على رجعه ايران مو تعرفين يريد يخطب
صحت بعصبيه
_قس :: وشبي هيج مستعجل
_قدس :: يااا قس شبيج
_قس :: شبيه مابيه شي يلا باي
سديت الاتصال بوجهه مدلغمه بعصبيه
هزيت ايدي بعصبيه ماعاجبني والله يالله هسه استعجل على الزواج اني شعلي بس لاعبالكم مقهوره ابد بس شوي ضايجه لان جنت اخلص وقتي براسه هسه شسوي إذا عرس راح تحرمه مني
ضربت على كصتي
ولج قس هوا لو من البدايه يعرف بيج انتِ الي تراسلي جان مانطاج عين
انهضمت هواي ماتحملت كلبي مجمر تجمر
أخذت التلفون دخلت على صفحته ب الفيس
كعدت اقره بمحادثتنا القديمه
جان مخلصها عليه يحجي بفوائد الحليب والفواكه هسه ماتكليلي عليمن قاهره روحج شو سوالفه كلهن مال مثقفين وانتِ تحبين الطربكه عليمن حاركه كلبج يا قس شبيج
شفت صوره اله قديمه ب ايران جان ب المستشفى لابس لابكوت الطب كاعده بمكتبه
تذكرت كل مايريد يسمع صوتي اتحجج ب التلفون سماعته مو زينه واني فقير وماكدر اشتري غيره لو اصلحه مادري شلون اقتنع أتعجب عليه شلون بسرعه ينضحك على عقله
واني اقره ب المحادثه صفنت بيني وبين نفسي معقوله اني؟؟؟
لالالا مستحيل لا اني ممكن حابه وجوده وشخصيته بس مستحيل أكون حابه السيد معراج اني اعرف مشاعري
عضيت على صبعي صافنه
معقوله صدك !
رفعت ايدي صافنه عليهن
صافنه على رجفه ايدي معقوله هاي الرجفه مو من شي
أخذت التلفون بعدني بصفحه معراج
كتبت اله واني ارجف
_ السلام عليكم سيد معراج ... اعتذر على هاي الرساله المفاجأه الي راح توصلك مني ... اعرف انت سحبت نفسك لان عرفت اني منو رغم انت ماعاتبتني ولا حاولت تفهم مني وتسألني ليش اني هيج سويت ... اكيد وصلتك فكره اني قس اخت قدس زوجه غضنفر ماريد اطول عليك برسالتي واشرحلك السبب او احاول ابرر عملتي لان ماكو تبرير غير انو اني اندفعت بمشاعري تجاهك من ناحيه الفضول ولأن اعرف انت ماتحجي ويا نساء وتستحرم لهذا شفت ماكو حل غير أتنكر بهيئه رجل صح جنت فضوليه وياك هواي بس صدك ماجانت نيتي وياك شينه جنت مستمتعه وياك لان شخصيتك جانت تعجبني اماً حالياً ف اني اعتذر الك واتمنى منك ماتاخذ نضره مو حلوه تجاهي ... اعرف انت راح تخطب لهذا اني قررت اقدم اعتذاري وامشي عنك حتى ماسبب الك الحرام او الاذيه .... الأيام الي خلصتها وياك جانت احلى ايام فتحت عيني على هواي مواضيع جنت غافله عنها ب الدين والحياه وانطيتني جرعه من الاستمرار رغم انت ماتعرف اني منو بس جنت لطيف وياي .... شكراً الك معراج ماجنت أتمنى تنتهي وياك لهنا ...
دزيت الرساله وصفنت عليها اقره بيها
واني اقره شفته شاهد الرساله بسرعه كأنو جان منتظر هاي الرساله
من شفته شاهد الرساله حظرته من الحساب
خليت التلفون على جانبي وصفنت فاتحه عيوني بصدمه اني شسويت شمسلتت
حسيت الدنيا دارت بيه اريد اكوم على حيلي ماكدر رجلي مايحملني دوخه دوخه صابتني
ذبيت روحي على الفراش مغمضه عيوني ماعرف نمت لو اغمه عليه بس الي اعررفه اني مو بوعيي
رحت بنومتي اتهرب من واقعي يمكن البعض يحس جاي أبالغ بمشاعري بس من تتعلم على شخص وينبض اسمه بداخلك راح تعرفون اني مابالغ لان اني اكثر إنسانه تكره المبالغه ب المشاعر بس من جربت هل شعور عرفت الشعور صح
فتحت عيوني على صوت رنه التلفون جاي من فوك بطني
باوعت لتلفون على بطني يرن
أخذت التلفون اباوع المتصل رقم غريب
فتحت الاتصال وحجيت بصوت متعوب والدنيا طالعه من أحباله الصوتيه
_قس :: الوو
اجاني صوته اي صوته هذا اعرفه صوت السيد معراج
_معراج :: السلام عليكم
ماجني سمعت السلام عليكم لا الدنيا وكفت عندي عيوني تريد تطلع من مكانها
حجيت بصوت مكتوم
_قس :: عليكم السلام
_معراج :: احم... من الضهر اتصل ماكو رد انشغل بالي
_قس :: جنت .... نايمه اي نايمه
حجيتها واني بعدني مامستوعبه هذا نفسه معراج لو غيره هوا لو يدري اني جنت فاطسه بمكاني بسببه شنو رد فعله
حجه
_معراج :: اي إذا هيج الحمدلله توقعت غير شي
_قس :: لالا نايمه ليش غير شي
_معراج :: لا من باب الخوف فقط ... احم اي عندي موضوع وياج يا اخت قس
حجيت سابقته
_قس :: اعرف عن شنو راح تحجي سيد اني اعتذر الك اعرف حركتي وياك ما مقبوله بس صارت بعد واني اعتذر الك عن الحظر بس شفته الحل الوحيد حتى ماقهر نفسي وياك
حجه
_معراج :: ليش القهر ؟
_قس :: انت مو تريد تزوج ؟
_معراج :: اي صح
_قس :: اي بعد شكو شنو جاي تقهرني انت عيب عليك اني بنيه وعندي مشاعر يعني من هيج تسوي ماكلت هاي راح تنقهر
حجيت بعصبيه ممزوجه ب الدموع احجي وابجي
_قس :: على الأقل جان اجيت عاتبتني كلت ليش هيج تسوين مو تضل ساكت اني اكثر شي يقهرني البرود والتجاهل وانت اتجاهلتني حتى من عرفت اني قس ليش ماجيت عاتبت جان ماكلبي احترك هيج يعني صح جذبت عليك بس حيصير اكثر من سنه احجي وياك معقوله ما اهتميت وهيج الموضوع سهل عندك
جنت أخربط ب الحجي اجيب واحط ماعرف شحجي المهم اصيح وابجي
نصه صوتي وحجيت بهدوء
_قس :: يعني معقوله ماتعلقت بيه مثل ماتعلقت بيك ؟
سكتنا ثنينه وأني مامستوعبه شنو حجيت ولا شخلطت ب الحجي المهم اجيب واحط بعدين يطلع كوكتيل تمسلت
حجيت
_قس :: هاي هيه سيد اني اسفه خاف جفصت يمك مع السلامه مو صوجك
سديت الاتصال قبل لا اسمع رده
خليت التلفون جوا راسي ماعرف شريد معصبه مقهوره ضايجه من كلامي ضايجه على روحي
رجعت نمت لان شفت ماكو نتيجه حتى مشاعري تسكن غير ب النوم
اليوم الثاني خلصته كله صفنات التلفون ب ايدي ماعرف شمنتظره
جنت كاعده على الدرج اباوع العلي ابن باسم بيده المكص يبدع بشعره محد موجود خانس ويا روحه
صافنه عليه شلون شال كدلته كلها وهوا منا كصته عبالك ساحه من شالها طلع جنه فضائي
طلعت نضال من المطبخ ما منتبهه على علي
شافتني كاعده على الدرج
توها تريد تحجي وياي وانتبهت على علي
فتحت عيونها بصدمه تريد تستوعب هذا شجاي يسوي
بنفس الساعه رن تلفوني باوعت المتصل قدس
رديت عليها بين السلام والكلام سألتها
_قس :: العلويه لباب رجعت لايران ؟
_قدس :: مو كتلج يردون يخطبون لسيد معراج
بهتت روحي طفت
حجيت
_قس :: يعني سافرو؟
_قدس :: اي بس مو الايران
_قس :: وين ؟؟؟
سمعت صوت ضحكه قدس انوخذ التلفون منها سمعت صوت اعرفه زين هذا صوت السيد معراج
حجه
_معراج :. السلام عليكم
_قس :: ع،.. عليكم السلام
_معراج :: يكولون الماياخذ من ملته يموت بعلته ... توافقين نجي نخطبج ؟
