رواية نورة الفصل الرابع
ضل داوود ينزل كل شهر اسبوع ويرجع
بهذا الاسبوع خطيه يطلع يشتغل
حتى يوفر مصرف اله والنه
بوكتها الحرب الايرانيه كايمة علينا
وهو سوده علي محتار بعيشتنه
يجي من حلگ الموت ويشتغل
اگله انت تعبان مو مال شغل
يكلي
-جا شلون احلام اعوفج انت وبنتي بله مصرف
واني هم يحتاجلي مصرف وفلوس قرض البيت
كلها براسي واگعة
ماعدي حل ثاني
-كلشي مااريد بس اريدك ترتاح
وترجعلي سالم
والله من تروح لحد متجي انه خاله ايدي ع كلبي
-اسم الله ع كلبج
جا شسوي هذا شي مجبور عليه
وغصب عني تشوفين الي الفراري شيسوون بيه
ترديني افر
-لا بس بالي كله يمك
من تروح احس اضل جسد بدون روح
روحي تروح وياك
-سلامت روحج
انت بس ديري بالج ع نفسج وع الطفل الي ابطنج وع ورود
وربج الحافظ
اذا الله كاتبلي اموت
اموت باي مكان مو اله بالحرب
-اسم عليك فدوه لا دكول هيج
انه شعدي غيرك
ربي يحفظك الي ويرجعك سالم
الي كل مره
-الله ارحم الراحمين
باجر التحق دكومي حظري جنطتي
اي بعيوني
فتحت الجنطه
وخليت ملابس داخليه
وتك جكاير سومر
وباكيت موس حلاقه
والمكينه وسويتله قبل يوم كليجه ام التمر جان يحبها
خليتها بعلاكة وبالجنطة
وسديت السحابه
طفيت الضوه نومت بنتي واجيت اتمدد يمه
حضني كال اليوم يمج نايم ومرتاح وباجر
بالجبهة
-عمت عيني شبيدي عليك
-اخخ شيخلصنه من هالحرب السوده
انوب بيها وماتسوء الامور بينه وبين ايران وجنها مطوله الشغله
وماواگع بيها غيرنه
والله لو اشوفين حالنه هناك
جوع وتعب وبرد وقتل تشوفين جماعتج كبالج تموت وتنظرب
وانتي تعوفيهم وتشردين بروحج
فوك كل هذا العقوبات من الظباط
ع ابسط امر
اذا شافك نايم باثناء الواجب يعاقبك
ويسجنك
واذا البيريه واكعه من راسك كدامه تتعاقب ووووو
والعقابات انواع العذابات نشوفها
هواي من الجنود تنتحر كامت
لو تروح ليران تسلم نفسها
اخخخخخخ
لزم راسه
بسته وكتله
-داوود عوفك من هاي السوالف
يابعد عمري
خاف تأذيك
-اتأذيني ماتأذيني انه عايشها
والله كريم
وجه الصبح كمت اطلك
وداود شافني اطلك كال شلون
اعوفج واروح
كتله روح الله وياك
لا تتاخر وانوب تنسجن
لان جان الي يغيب يوم ينسجن بوكتها
عمتي توسلت بيه وراح
شال جنطته
وباسني وكال عين الله عليج
رايح اني
بس طلع عمتي اخذتني للجده
كمت ابجي ع داوود
وابجي من الوجع
واذكره شلون راح وباله يمي
دخلتني الجده
وبعد ساعه جبت بنيه
ثانيه
عمتي جنها ضاجت من شافت البت
كالت تمنيت يصير وليد عد داوود
الجده جاوبتها
البطن التجيب بنيه تجيب الولد
الحمد لله على سلامتها
-الف الحمد الله
بس ردت ولد يا ام احمد
وحك ربج البت احسن من الولد
شمحصلين غير بس شلاع الكلب
هالبني بالعسكريه وكلبي عليه
لو بيت ابو لؤي جابو ولدهم اثنينهم شهداء
وامهم تخبلت عليهم
الولد مايراد بهالوكت
-اي والله
حجيتي الصدك
كومني وشلت بنتي ورجعت للبيت مشي
تستمر القصة أدناه
لكيت ورود فحطانه البجي
وخطيه صفاء تسكت بيها
مو متعلمه بس علي
ضاله بس تبجي
شلتها وابوس بيها
عمتي صاحت يمه رحمج اخضر موزين عليج
تشيلين ثكل هسه
يمه الحافظ الله
دزت عمتي ع اهلي
واجت امي اخذتني يمها
بقيت شهر كامل
لحد مارجع داوود
واجاني بملابسه العسكريه
شاف البنيه عمرها شهر
ولهسه مامسميتها
منتظرته يجي
حضني وباسني
-والله والله طول الشهر افكر بيج
واكول كامت بالسلامه
شجابت
اخخخخخ شيخلصها تعبت وعلي
-بوست ايده الله كريم يبعد عمري
كلشي يهون بس كونك سالم
اخذني للبيت
هو شايل ورود
واني شايله الطفله الجديده
بهاي الفتره عادل هم التحق بالجيش
وماضل بالبيت بس رزاق
الي يدرس بالمدرسه
رجعنا للبيت
وداوود سمة البنيه امل
يكول لان امل يبقى عندي
كل مااروح انو ارجع الكم سالم
جان كلش تعبان خطيه
نفسبته زفت مع ذالك طلع يشتغل عماله
ويجمع كم فلس النه
اني ابوي ع طول يطيني فلوس
مامحتاجه
بس هو مايرضى
يكول لازم اشتغل بهذا الاسبوع
وهم التحق وراح
شهر وره شهر
يروح ويرجع وهم حبلت ع الاربعين
بلكت اجيب ولد لداوود وافرحه
فديوم جيرانه كالت اكو قطع اراضي
تبيعها الدوله رخيصه
ضلت تسولف عليها خوش كيعان ورخيصه
اني جنت اجمع مصروفي ومن اهلي اضم فلوس ومن داوود
جنت شاطره ومدبره الفلس مااصرفه ابد
ع خالي بلاش اكول تعب داوود خطيه
طلعتهن حسبتهن
بعد لازم اجمل
يله اشتري قطعة ارض
كمت وبعت ذهبي
وسويتهن فلوس قطعه مثل مكالت الي جيرانه ام سليم
وتانيت داوود يجي واكله
من اجه سالم
كتله داوود انه حامل
كال بيها الخير ان شاءالله
كتله ام سليم دكول الحكومه تبيع
قطع اراضي رخيصه
وبهيج مكان
كال
-اي واحنه منيلنه يا احلام هيج مبلغ
-عندي داوود اني من ازوجت لهذا اليوم اجمع صار ٣سنوات الفلس مااصرفه
وبعت ذهبي
وكملت الفلوس
شدكول اخذ كاع
ونخليها النه
وتبنيها ع كيفك
-صدك تحجين
عليج القران
-اي والله
باسني من گصتي
-ولج الف رحمة ع بطن النگلتج
صدك بنت اصول ومعدله
-اشكرك
ابتسمت لكلامه وحسيت بفخر
افتخرت بنفسي سويت شي فرحته بيه
-هسه شنو داوود اطيها الفلوس لام سليم
حتى تاخذنه كاع
-اتوكلي ع الله
وذهبج اعوضج ان شاءالله مادامني عايش
اجيبلج احسن منه
-يمعود شسوي بيه
حتى ملابسته
رحت دزيت الفلوس لام سليم
واتفقت وياها
تسجلها باسمي
كالت ان شاءالله
التحق داوود
ونزل عادل
عادل من يوم الي سحبوا اسمه بالعسكريه
بطل شرب
بس عصبي، وخبيث ومايتحاجه
مرات احسه يسكر من ينزل
بس هو يكول مااشرب
فديوم كاعده اغسل هدوم
بالطشت وافرك
طلع عادل من غرفته ويصيح
-احلااام احلااااام
-ها خويه خير،
-ولججج صدك انتي مشتريه كاع
-اي ليش
-ومنيلج فلوس هااا
ضامين فلوسكم علينا واحنه كاتلنه الجوع
ورجلج يكول ماكو
-وانت شكو تره الفلوس مالتي ذهبي ومصروفي ومن اهلي
-باعي كلاوتج متمشيها علي الفلوس ترجع
وكاع ماكو
-كله مو بكيفك عندي رجال وهو قابل
واذ كلي ارجعهن الفلوس
عود ارجعهن
-وج تكسرين كلمتي
ضل يغلط ويصيح
عمتي سمعت
-انت شعليك بيهم
هي شاطره واشترت ماخذه منك
-اي والله عمه كليله شعليه هو
عود بي خير يلم ويشتري
شبي غيران هو وهذيج الحيه تكرص وتضم راسها
اني حجيت هيج
وهو ركض علي
لزمني من ركبتي خنكني
خلي اموتج مثل ريحانه واخلص
خصرني ع الحايط
وهو خانكني
عمتي تصرخ وصفاء تصرخ
وبنتي تصرخ
اختنكت متت
طكت عيوني
احس روحي طلعت
يحاولون يجرونه
بس هو مجلب برگبتي
