رواية فصلية لظالم الفصل الرابع بقلم زينب نور
"""كعدت الصبح بأمر من بيبي تعجبت هاي اول مرة تكعدني كلت بكلبي يمكن صدك راح تودع
صبحت عليهم ولازم حسب أوامرهم أبوس بيبي وجدو من الصبح
بس اليوم مخبوصين واكو شيوخ من منطقتهم جايين وهمة ما اعرف شلون يباوعون عليه
احس البيت عبالك بي شي اني بطبعي مو فضوليه وأحب اسال واستفسر لا معليه بشي ميعنيني
قبل الغدة اجتي عمتي وياها كومة غراض وعلاليك سلمت وكعدت
صاحتني بيبي رحت عليها كالت هذا الج كتلها هو شنو كالت جهاز كامل كتلها خير بيبي شنو المناسبه
كالت يعني ميصير اشتريلج كتلها انبله ليش ميصير بس دا اكول متفاجئة والغراض كومة وهذا جهاز مال عروس كالت لا لا اني عجبني اشتريلج
بوستها واتشكرت منها كتلها تسلمين ربي يحفضج بس بكلبي كلت اكو شي لو هاي صدك دتودع
ماما كذلك متفاجئة متدري شكو اني وكاعدة اجاني دك فوني باوعت عالرقم مصطفى ابن خالتي اني وَيَا كلش أصدقاء
وأكثر وهو يحبني بس اني ما كايلتله شي او انو منطيته أمل لحد الان بس بيوم الي ميخابر او اشوفه كلش اضوج نص طلعاتنه سوه أصدقاء كلش
جاوبته بعد السلام كال رايدينج ترة بالكلية عود ارجعي بساع يكولون امر ضروري ما اعرف شكو كتله خومو شي مو زين كال لا بس ما اعرف مسوين مرشحات ويردون يختارونج وطالبين حضورج وموافقتج كتله انشالله صوفي اني اذا كدرت اليوم او باجر اجي
كال انشالله اني انتضرج كتله تمام سلمت عليه وسديته ماما كالت خير حبيبتي شنو يريد مصطفى كتلها السالفة كالت ها انشالله نرجع هاليومين كتلها لا ما اكدر اصلا هواي شغل عندي يجوز اليوم او باجر عمتي وبيبي وحده صافنة بوجه اللخ
كل ما يمشي الوقت كلما تزيد تصرفاتهم غرابه للضهر اجو جدو وعمامي دخلو البيت جانو بالديوان كالو الغدة بساع قبل لا يجون الشيوخ
كلت ذولي شبيهم هيج مخبوصين الا اكو شي يجوز عرس او غير شي بس جان كالو كمت اشوف جدو يصفن بوجهي
صبو الغدة وهالمرة جانو مسوين سمج شوي اكلت شوي منه
اني ما اكل أكلهم وكمت كامو يحجون تعبت واني اكول هذا اكلي جاوبتهم ماما هذا أكلها متآكل اكثر
ردت بيبي كالتلها شنو هذا الحجي راح تموتينها للبنيه بهالاكل لضلين حاطه بالها رشاقه ومدري شنو من تزوج رأسا جسمها يخرب بالحبالة كالتلها خاله اني شعليه هي هذا أكلها وراها خلصو غده وشربو جاي
بعدها انجمعنه بالاستقبال وكلهم بعكلهم ما ذبوها وكاعدين ويباوعون عالساعه وصار حديث وفتحو مواضيع ورجع جدو كال جدو بنتي انتي لازم منا ورايح تغيرين طريقه لبسج
كلت بكلبي اهو هم فتح السالفة وراح يعيد نفس الأسطوانة كتله انشالله جدو
كال لا بابا مو انشالله لازم وضروري كتله جدو اني سبق وان كلت الحجاب بقناعتي البسه وبكيفي رد ابن عمي كال وشنو يعني انتي ماكو الي يحكمج مآخذه الدنيا باستهتار
تفاجئت شلون يحجي هيج ويكول ماما ضلت صافنة كتله من رخصه جدو انته اولا شعليك ثانيا منو انته من دون الكل نبيت من يمك وحجيت وثالثا هذا الشي عايد الي ومو بشي يخصك
كام يصيح ويكول ترة ادري بيج تروحين بغداد الي علمتج على هذا الاستهتار تروحين للقاعة مال الرياضه وتلعبين رياضة وهواي مطوره عندج الثقافة ترة والله لو مو الي صار هسه انهي عليج واكسر راسج هم
كتله وبصفتك شنو تنهي عليه وبعدين اَي اروح للجم وكلها تدري والثقافة الي تحجي عليها وتكول ممتجاوزه حدي بيها وبعدين شنو الي تكول لو مو الي صار وبعدين راس منو تكسر بالله
صاح جدو كلة جاسم اسكت معليك كام يصيح ويعيط ويغلط اني متحملت كتله لجدو عايفه كوم شغل عندي وجايه من بغداد لحد هنا تالي انهان هيج اهانه من رخصتك بس اني ما ابقى بعد
كومي ماما يله خلي نروح الضاهر اكو ناس صايره متعرف الأصول ضَل يعيط ويصيح
ما اهتميت كمت طلعت من الاستقبال ورحت للغرفه الم ملابسي وغراضي اجتي ماما كامت تحجي عليه وتكول عيب ماما اكعدي ميصير هسه جدج يكوم يحجي ويكول ممربايه
كتلها خلي شيريد يكول خلي يكول تدرين بيه اتخبل ولا واحد يتحكم بيه او يتفلسف براسي ضلت تحجي وياي واني قافله الا ارجع اني بيه طبع العناد والي براسي اسوي كتلها اني كتلج ارجع اليوم يعني ارجع
طلعت برة مدري وين راحت بدلت ملابسي ولميت غراضها سمعت صياح وعياط ورة شوي اجتي عيونها حمر عرفت ضوجوها بالحجي حلفت اذا ما اندمهم واخليهم يحلمون يشوفوني جايه لهذا البيت بسيطه
بدلت ملابسها وكملت شلت غراضي وغراضها وهيه هم شالت وياي وخليت وطلعت كمت داطلع الغراض للسيارة سمعت مرت عمي تكول وج عيني شكد صلفه هاي البنيه والله لو تدري شنو حيصير بيها جان كامت تلطم
مهتميت الها ولا احجيها طلعت الغراض السيارة جانت الشمس حاره طلعت ماما لبست النضارات طلعو جدو وعمامي كامو يحجون ويغلطون ويكولون بنيه بكد الفصمه محد يكدرلج ما جاوبتهم خليت وركبت بالسياره وماما هم ركبت شغلت السيارة وطلعت جانت طرمة بيتهم كلش جبيره وطويله
باب الكراج مفتوحة داطلع طبن يمكن عشر سيارت كله جكساره و تاهو صفن كبالي ونزلو منها شيوخ وشباب ومسلحين كلهم دشاديش كلت اهو وهاي تأخيره ثانيه وضربت الستيرن همة كلهم صافنين ويباوعون عليه
وصلو لحد يمهم جدو وعمامي والولد سمعت صياح ذوله الي نزلو ويكولون لجدو يا شيخ العشيرة والدواوين مو طولتها عاد مو كافي طولتها طوختها كلت من الصبح وهسه راح يصير العصر
فتح باب السيارة جدو وكال نزلي بابا نزلي كتله كوللهم يوخرون اريد اطلع ما ضَل وكت اكو ولد مخنزر عليه همة كلهم بس هذا بالذات كال نزلي عدي حجي وياج اتفضلو بالشيوخ دخلو جوة للمضيف هسه جاي وراكم مشو همة واني تافافت ونزلت كتله جدو اذا هم تكول ابقي ترة ما ابقى
كلا لا يابه عندي موضوع وياج كتله خير كول جدو كال لا مينحجي هيج عالواكف
