رواية فصلية لظالم الفصل الخامس بقلم زينب نور
"""استغفرت الله ونزلت ورحت امشي وَيَا دخلنه للاستقبال لكيت النسوان كاعده وبعدها من دخلنه اجوي عمامي هم
حجة جدو كال بنيتي انتي جبيره وواعيه ومتفهمة واكيد لو احد طلب مساعدتج كلت بكلبي خير يا ستار شكو وره هالحجي هذا لازم اكو مصيبه متردينه
كتله اَي طبعا بس خير شعجب هيج دتحجي سكت بعدين كال يابه بروح ابوج طالبج بسالفه لا ترديني ابد كلتله هسه غير تكول شكو وتحجي خير يا ستار
كال انتي اهدي واني اسولفلج كلت بكلبي السالفة ابد مو هينه كلش
كعدت كال يابه بنيتي دتلاحضين ابن عمج الجبير ما موجود كتله ياهو منهم اني ما اعرفهم كال زيدان كتله ها اَي صح ما موجود خير ليش وبعدين ليش دتكلي يعني
كال جايج هسه بالموضوع يابه شكد اكره بشر يفت كلبي بالحجي
كال زيدان ابن عمج متعارك صارله اسبوع وشوي ويه واحد ابن عشيره أعداء ويانه الي من عدهم كتلو ابوج وهاي العشيرة احنه من ذاك اليوم لحد هذا اليوم متخاربين وياهه
لان عدنه ثارات هواي
وهسه ابن عمج جدد الثأر وصرنه احنه العايلين هالمرة بعد ما كل عشيره راحت بطريقها
كتله واني شكو بهاي السالفه كلها ودتحجيلي كال مو زيدان من متعارك مستفزة ذاك الولد وكام يحجي حجي مو زين
وابن عمج زيدان ضارب الولد ومتلاوين اخر شي كايله الولد هيه هاي رجولتك ابن الشيوخ وزيدان متخبل وساحب مسدس وضارب الولد ومكان الضربه حساس من كال هيج احس حيلي باد وانتهى
كال والد رأسا وبساع بمكانه حتى روح ما صاله بي كتله ليش وين الضربه جايه كال بصف ركبته
اتخبلت احس كمت ارجف كال وابن عمج ما قبل ينهزم لرمى الشرطة وهسه نايم بالسجن واحنا كعدنا كعدة عشاير وصار فصل
وأهل الولد متخبلين لان الولد الي مات عنده اخو اكبر منه همة ٢ فوك ٨ بنات :::::ادري بزون لو شنو :::::😅 كال وجانو يطالبون بدم زيدان
وبعد كعدت ثانيه وتدخلات شيوخ العشاير البقيه قررو الفصل يكون مرة و١٥٠مليون لان ابن الشيخ وبس هو وأخو
كتله اَي وبالله كال والمرة ماكو غير بس انتي من كال مدري شصار بيه كتله بعد ما صحيت من الصدمة ومن الهدوء الي عم المكان شنووووووو
كال اَي والله جدو مثل ما داكلج كتله وبيت حق وشنو بس اني بقيت وشجابكم عليه
وخلصت البنات بقيت بس اني كال بس دقيقه افهمج بنات العشيرة محد قبل ينطي
وبنات عمج كلهن زوجات ماكو بس من بنات عمتج واكيد ابهاتهن ميقبلون واصلا ميصير لازم من ولدي مو من بناتي وبقت بنات عمج الي ما مزوجات هنه زغار كلش عشر سنين ماكو عمرهن وذيج بت عمج مطلقه مقبلو بيها رادو بنيه علمود دم عذريتها بدال دم المرحوم ابنهم وبت عمج مطلقه وانتي بنيه بعدج
تخبلت ما بقه عقل براسي كمت أصيح واعيط تخبلت رد عمي ابو زيدان كال ترة هواي نطيناج مجال
احنه الفصلية هنا من ننطيها تكعد وتسكت زين من عدنا كاعدين نكلج ونفهمج تخبلت بالزايد كمت اعيط وأصيح كتلهم مسوين فضل عود بعد نص ساعه عياط وصياح ومخليت شي مسويته
كلت لماما امشي خلي نطلع دا اشوف بكيف منو اروح فصليه وبيا حق وبيا قانون يسوون هذا الشي
بده المصايح والمعايط ماما تخبلت وفقدت كالتله يعني ابوها راح بسبب هاي سوالفكم وعاداتكم المتخلفة تريدون هسه البنيه هم تروح مني
عاط بيها جدو كللها احترمي نفسج ولتجاوزين وتعليم صوتج عليه وتكولين متخلفين يالمثقفه
ردت عليه وهيه فاقده كالتله طول عمري جنت محترمة نفسي واسكت وابلع ويتجاوزون عليه ولدك وبناتك ومرتة حتى انته واسكت
بس لهنا وكافي اباوع على ماما صارت مثل اللبوه المجروحة وتريد تحافظ على أطفالها وهيه هيج تريد تحافظ عليه
بعد صياح وعياط كالت امشي ماما زمرد امشي خلي نطلع منا مو صوجهم صوجي اني الي اخليج تجين لهنا بس بعد هايهية
طلعنه وعلى صوت صياحهم علينه مهتميت شفت العشيرة الثانيه على حس لعياط طلعو مهتميت خليت وركبت بالسياره
بس شلون راح اطلع وسياراتهم صافه كدام سيارتي دكيت هورن حتى يؤخرونها بس لا حياه لمن تنادي خمس دقايق ومحد وخر السيارة
نزلت الجامه كتلهم اذا متوخرونهن ترة ادعمهن سمعت واحد من الشيوخ كال لجدو شيخ هيه هاي الفصلية رد جدو كله اَي
تخبلت شلون يكولون عليه فصليه ومنو نطاهم الحق شغلت السيارة ودست بإنزين ودعمت سيارتهم همة تخبلو حتى اهل بابا لان يعتبروني هذا الشي وكاحة وصلافه
