رواية دموع خرساء الفصل الرابع 4 بقلم ورود الخالدي

ماجد:::وره الغدة ..امي ردهتهن كعدتهن بالديوانية  وكعدنه بغرفة ابوي انه وامي وابوي نسولف شراح نسوي بخصوصهن انه سألت ابوي:

بويه تره الحوش مو مال تعمير انه فتت جوه وشفته حيطانه كلها مهربشة ومايتحمل سكف جديد لاصب ولا شيلمان..

شني يعني نذبه للكاع ونبني من حله وجديد

اي ماترهم غير هاي 

امي طفرت من يمها

شني تبنون من حله وجديد عدكم فلوس زايدة..؟؟؟

يمه جا ماكو فايده اذا نحط سكف جديد فوك الحيطان المهربشة هم يرجع يفطر ويوكع السكف على روسهن..

 جا يرادله..بله وبليلة هذا..!!!

ابوي كلها..

اكلج ام راشد هي خسارة لو خسارتين ..احنا مسويها في سبيل الله وتره مايضيع شي بوجه الكريم

والنعم بالله بس بنيان من حله وجديد وعمال ودهر اسود يرادلكم شهر شهرين على هاي الحسبة ولهدات فلوس هم

الفلوس مو مشكله بس سالفه الوكت الج حك بيها. 

اي ..معناتها البنات وامهن راح يضلن يمنه شهر شهرين قابل يضلن بالديوانية..واحنا خطاطيرنه مسربه كل يوم!!

ابوي كلها

شني يضلن بالديوانيه شو حوشنا الحمد لله جبير  نفرغ الهن غرفه على ما الله يفرجها....شو غرفة راشد  خربيتي فارغة خلهن يدورن بيها..

شني يدورن بغرفه راشد تحجي صدك انت ..وخالدة اذا اجت تلكاهن بغرفتهه  كاعدات تريد تخليني علج بحلك شاهر ومليحة..

شني علج بحلك اخوج ومرته شني هنه معاشرات هو شهر زمان..

لا..لا ابد مايصير ..ما اريد خالدة تجي وتلكاهن بغرفته غير تنطحن وتموت تدري بيها ما مفاركتنا من راح المرحوم لليوم رايحة رادة علينه حتى ماترضة اتعرس شكثر وادم اجت عليها ومارضت ضاله على..رجلها لان نشميه وتعرف الاصول..

همه يسولفون على خالدة وانه بكلبي اضحك..حسبالهم خالدة رايحة رادة هلى مود غرفتها لو على مود راشد الله يرحمه مايدرون بالمضموم حكهم امي تصيح نشميه ماتدري جنتها..لازكتلي وتكلي ما اعرس..متانيتك تاخذني من طلكت لليوم هي لازكتلي وحتى كبل ما اطلك هي ..تفتر عليه..بس انه ما الي نفس يمها مرت اخوي ..ماتريدها روحي ..لو تطلع موخالدة لو نازله من السمه هم ما اريدها..وسمعت ابوي يكلها:

خلنا من غرفة راشد اذا خايفة على زعل بت اخوج..عود نفرشلهن وحده من الغرف الفوك شو خاليات من زمان..حتى مرت حامد ماترضة ادور فوك تكول حارات بالصيف هسه الدنيا شته ماكو حر..نكعدهن فوك منا لما يكمل حوشهن..

اي خوش نكعدهن فوك مابيها شي..

العصر صعدت امي ومرت حامد..واختي  امل..ونظفن الفوك وفرشن الغرفه ودران البنات وامهن فوك وانه بعدين التهيت بالحوش مالهن جيب العمال ودني العمال ذبيت الحوش للكاع..ابوي كالي بويه من تفلشه لاتبني هواي ابنيلك مطبخ زغير وغرفة وصالة زغيرة..وحمامات برة..وكمل الوارش البرة وهاي هيه....

من ذبيت الحوش طلعت غراضهن تلث ارباعهن ممرودات من الرطوبة والماي والطابوك حتى التلفزيون مالهن جانن مخلياته بالهول هم متفلش ..كلت ميخالف عود من اكمل اخذلهن جم غرض ..الحاصل ثاني يوم بلشت اساس وصب وبده البنيان بساع بساع لان البنيان قليل واطيت العمل يومية دبل حتى يضلون لليل يشتغلون..ويخلصون بساع ..بس شني ارجع للبيت صاير ونيدة بس احط راسي ع المخدة انام..ابوي اجه للحوش مال حجي سلمان وره اسبوع لكا البنيان واصل للعكادة كالي:

اي ولك خوش رابط العمال وكضو بساع..

جا شحسبالك اخليهم يسختون براسي؟؟

ههههه..ماتنغلب على ابوك

صار اسبوع ماشايفه ابد ماتنزل من فوك بس اخواتها مرات اشوفهن كاعدات يم امهن..اذا نزلت تسولف هي والحجية..اي..فكرت هي ماتنزل ضلت فوك تكلك شعندي نازله ..لا حجاية ولا رواية عندي بس انه تردون الصدك بودي اشوفها..بس ما اكدر اصعد فوك ماعندي عذر اصعد يمهن..زحمه...مرات احجي ويه روحي ..شبيك يماجد شبيها روحك ..هافة ع البت شعندك وياها..قابل ..عشكتها..شني تعشك وحدة خرسه..واذا صدك عشكتها شني قابل انت من هاي الشباب الماعدها ناموس تعشكها وتاخذ...رادتك..وتعوفها..بنيه جنها..ماي زلال..مبينه شريفه ومأدبه رغم ماتحجي بس البنيه الشريفه ذيج هي مبينه ماتحتاج عرفة..افرض عاشكها صدك وغرضك شريف شني راح تاخذها..اكيد لا..ابوك نفسه كالك خرسه لو مو خرسه اخذها الك زين نفرض ابوك عاجبته البت وقنع امك شلون تقنعها.؟؟.زين عوف امك وابوك..افرض ما همك احد وردت تاخذها رضو لو ما رضو شلون تعيش..وياها وهي ماتحجي شني هي مرة ... لو صورة تعلكها ع الحايط وتتنوع عليها..شلون تسولف وياها يعني يكضي العمر سكته لو شلون وخلفتك منها يجوز هم يطلعون خرسان مثلها...لا يماجد عوف البت وطلعها من راسك ماتفيدك..صح حلوة ..وعيونها تحجي وياك..من غير ماتسمع حسها..بس هذا مايكفي ..ولا يوفي وانت رجال مطلك وراك شمات وناس ...انعل الشيطان وانساها..صارلك اسبوع ما شايفها احسن ..ولا تفكر تشوفها بعد خلص حوشهن وخلي يدورن بيه حتى لاعين التشوف ولا كلب اليحزن..

وصدك هميت ايدي ع الحوش خلصته بشهر واحد وكلت لابوي راح اشتري جم غرض تلفزيون زغير وبوفيه بمجان بوفيتهن المكسرة..ومدات وبعد جم غرض وشي على شي رهمت وامهن راحت هي وامي شافت البيت  امي تكول خطية دمعت من الفرحة وكامت تعزل وترتب هي وبناتها ..اني تعمدت بعد ما اوصل اي ما اريد اشوفها ولا اريد عيوني تلاكي عيونها هواي اريد انساها..وابعد روحي لاتفيدني ولا افيدها عشكي ما منه فايدة لا عليه ولا عليها..وره ما دارن بحوشهن..ابوي ..تسوكلهن مسواك كامل ووداه بستوته الهن ..وره عشر ايام ابوي كالي.:

بويه روح للسوك اخذلك كيلو لحم ودجاجة..ومخضر..وروح على ام غادة خطية تلكة عيونهن ع الباب..و١٥٠مال السيد ماتكفيهن بنياتها.حديثات ويشتهن اللحمه والدجاجة والسمجة..

اي بويه صار..

 تسوكت ورحت عليهم دكيت الباب وتمنيت ما اشوفها..والحمد لله ماشفتها..امها خذت مني المسواك وضلت تتشكر مني وكمت كل اسبوع اتسوك واخذلهن مسواك القاسمه الله. ..ثلت اشهر على هالوضع امر عليهن انزل المسواك وارد الشته خلص وفتنا ابداية الصيف والامور ماشيه ماكو شي جديد..ومره تعطلت صارت الساعة ١٢الظهر ومسواكهن ضل بالسيارة..لان صار عندي شغل وتعطلت ..رحت الظهر دكيت الباب محد فتحه..فكرت شني طالعات شو صار هوايه ادك بالباب محد طلع..منهن..وتذكرت امهن تكول اخذ البنات للمدرسة واردهن يمكن امهن طلعت راحت تجيبهن والمدرسه يم الجسر لا هنا ولاهنيه..كلت خلي ارد..والعصر ارجع..بعدني ما مشيت سمعت..دكة ع الباب..وعرفت هي دكت ع الباب لان ماتكدر تكلي ياهو الي يدك خليت اذني ع الباب دكت بعد كتلها:

انه ماجد ..خويه ..جايبلكم المسواك؟؟

فتحتلي الباب وياريت مافتحته لابسه دشداشه نص ردن..ورديه بالضبط نفس لون خدودها..شعلت اهل اهلي انا ..منا..كاض روحي وباعدها عنها بالكوه انوب طلعتلي جنها..وردة مفتحة ..انه ارتبكت كلت خلي اطيها العلاليك وافلت وصدك اطيتها العلاليك..هي فاتت جوه اخذتهن وردت بساع..

ها خويه معتازة شي بعد

شو هاي دنكت لزمت ايدي وتجرجر بيه..خره بالحظ..شبيها هاي كلبي لعب..معقوله ..تلزم ايدي وتريدني افوت جوه بس شعدها ؟؟!!بساع فكري راح لبعيد..معقوله عدها نيه عاطله وياي..وصلتني للصاله فتت كتلها:

شتريدين خويه..مايصير افوت جوه وانتي وحدج؟؟

اشرتلي بيدها..عود اصبر..

راحت فاتت جوة وردت بيدها القفص..

اخذت نفس..وكلت استغفر الله وين راح فكري..وين راح بالي..انه ..خطية تريد..تشوفني البلابل..الجبتهن الها..راحت كعدت ع القنفة الزغيره وتأشرلي عود تعال شوفهن انه تبسمت رحت كعدت يمها..شفتها فتحت القفص طلعت واحد من الافراخ وتأشرلي عود افتح ايدك..

فتحت ايدي خلته بيده كتلها:

اي والله نشميه مكبرتهن وصايرات حلوات..هي تبسمت..وراحت مشت جم خطوه وتاشلي عود هده..للطير..

هديته..بساع راح طار..وكف على متنها..وافتهمت عود تكلي شوف شلون كبرتهن..وعلمتهن عليه..شني من بت هاي موتتني شكد ترفة..وتهيسها ماتعرف لاشك ولاجذب....هيج كلب صافي مال جاهلة مابيه دغش..ابد..كضته ورجعت خلته بالقفص..كتلها:

اي شكو عليج صارن عدج اربعه..كلهن يحبنج ومتعلمات عليج

 هزت راسها..وتبسمت..اشتعلو اهلها ع هالشفه والسنون التضوي ..وهالعيون الماخذات نص وجهها والرمش المكحل الشاك خدها...بس انه وياها..كاعدين محد يمنا..هي سكتت..انه ضليت صافن راحت عيوني على شفتها على ركبتها على متونها على جفوف اديها على زنودها الطالع نصهن من ردن الدشداشة موبيدي هيه حلوة ما كدرت..امنع عيوني...شو..ماكو يمكن نص دقيقة اباوع عليها..شو وجهها تغير وانكلب..وبسرعة كامت..وتأشرلي ع الباب بس هيج بعصبيه حسبالك ..تكلي اطلع بره..شبيها ..ليش هيج بساع تغير وجهها..كتلها:

شبيج غادة شبيه الباب؟؟

اشرت عليه وع الباب..

شني تريديني اطلع برة؟؟

هزت راسها يعني اي

متت بدمي من المستحة معقوله ..حست اني جنت اباوع عليها..اي حست والله حست بيه..

كتلها:

يعني اطرديني..؟؟

هزت راسها حيل...يعني اي..

ليش..ليش غادة انه شسويتلج..تره ماسويتلج شي؟؟!!!

عافتني وراحت وكفت يم الباب وتأشرلي على باب الحوش...ادنيت يمها..شفت عيونها يلمعن بيهن مثل بداية دمع كتلها:

اي اروح راح اروح لاتبجين..لاتبجين..؟؟

بسرعة طلعت من الباب حسيت الدنيا ضاكت بعيني متت من المستحة حست بيه بساع كلش ذكية ونبهه..وشريفه ما رضت عيني تمر على جسمها...تفتهم تعرف شني نظرة الرجال الغلط..خطية دخلتني للحوش مأمنه بيه تريد تشوفني البلابل بنيه صافيه..وانه المطي..ما كضيت روحي ولا منعت عيوني..منها..شهالثوالية شمالني تزوملت ..بساع...وخليتها حست بيه خطية تكلي اطلع وعيونها يلمعن عوزها شويه وتبجي..خافت مني ..خافت على روحها مني..صدك مطي وزمال ..انه.

بعدني كاعد بالسيارة افكر بعدني ماحركت وشفت امها واخواتها اجن امها شافتني بسرعة كتلها:

السلام عليكم..

هله بعد خالتك..

خويه جبت المسواك اطيته لغادة..

رحملله والديك..بس خاله انزل شويه اريد احجي وياك 

انقبضت روحي ما اريد انزل ولا اريد افوت لحوشهم تسولف عليه المرة بس شسوي كوه عليه نزلت:

اي خويه كولي!!

تعال نفوت جوه نحجي مو مال حجي بالباب..

فتت جوه كعدتني على نفس القنفة الجنت كاعد عليها كبل شويه بس..غادة ماكو يمكن بالغرفة اي همزين راحت ما اريد..عيني تصير بعينها ميت بدمي من المستحة..

اول ماكعدت كتلها:

خويه تره مستعجل انه عندي خطار اليوم

ها اذا مستعجل روح بعد خالتك!

لا كولي معتازة شي..حتى اجيبة واجي باجر؟؟

لا ممحتاجة شي خيركم مكفينا وزايد بس خالة مديرة المدرسه تريد مني البطايق المدرسية مال غصون وشجون..اني من نقلتهن اطوني بس كتاب تأييد وكالو تعالي بعدين ع البطايق..مالتهن وهسه المديرة تكول ما اكدر اسجلهن ويه طلاب البكلوريا بلا بطايق تعرف هنه سادس ابتدائي وحايرة شسوي..

وليش حايرة خويه انه اروح لبغداد واجيبلج بطايقهن!!

مو المديرة تكول البطايق متتسلم الا لولي الامر يعني لازم اني اروح استلمهن..

اي شكو بيها..انه اخذج واخذ امي ويانه..

اي..والبنات شلون اخليهن هنا وحدهن ما اكدر اخليهن نهار كامل وحدهن بالبيت اخاف عليهن ..اصلا اروح للمدرسة اجيبهن واجي ركض ركض لان يضل بالي على غادة وحدها..

شالسالفة خويه بيوم النروح يدورن عدنا ..يم اهلي..واحنا نروح ونرد بيومنا..

ها انت هيج تشوف مو خاف منلحك نرجع بنفس اليوم..

لا نلحك نطلع ويه صيحة الوذان..

زحمه تجي انت والحجية من الفجر..

لا مو زحمة واذا تشوفينها زحمة..تعالي انت والبنات ليلة مانريد نروح باتن يمنه والفجر نطلع والبنيات يضلن يم مرت اخوي واختي امل

هاي هيه بس راح نتعبك ويانه..

لاتعب ولا شي ذني اخواتي ليش ما اتعب الهن!!!

الله يحفظك بعد خالتك..

انه اترخص هسه..

الله وياك باجر العصر نجي اني والبنات خلي خبر يم الحجي والحجية..

صار..

وطلعت من يمهن..روحي موجرة..واهيس مختنك كلش..

اليوم كله تنغص عليه حسبة تاخذني وحسبة تردني..بالي ضل يمها يم..عيونها اليلمعن هسه بيش تفكر..انه شني ابالها..كامت تخاف مني بعد ما تأمن بيه هسه انه ليش فتت جوه..مو صارلي شهور كاض روحي ومانع عيوني من شوفتها..ربي دخيلك ليش هيج صار بيني وبينها..والله مابنيتي شي عاطل..ولا فكرت ..ابد..اتجاوز حدي ولافكرت اكض شعرة من راسها..اصلا انه شارد من شوفتها  حتى كلبي يبرد وينساها..لعنة الله عليك ياشيطان ..وارجع اكل لروحي تره انه ماسويت شي باوعت بعيوني ليش بنادم يكدر يكض عيونه لو يمنعهن هيه حلوة..كلش..كلش حلوة ما كدرت امنع عيوني انه..اول وتالي رجال ..وهيه بت تاخذ العين والكلب..انوب اعاتب روحي ولك ماجد اكل خرة..شهالحجي تراضاها على عرضك انت ترضاها واحد يباوع على عرضك هالشكل..استغفر الله راح اسودن شلون بيه..وجمالة من طردتني روحي تولعت بيها بالزايد اي خوش بت شريفة حتى نظرة عين ماترضه على روحها...اخ..متت قهر صار ضيمي..ضيمين مو واحد..

ثاني يوم العصر اجت ام غادة وبناتها مثل ما اتفقنا..تعشن وصعدن نامن فوك حتى نغبش من الفجر انه وام غادة وامي لبغداد..هنه فوك وانه بغرفتي ماتغمض عيني اهلي كلهم متعودين ينامون من وكت..ومرت حامد فاتت هي وفروخها ورجلها هم نامو من وكت ضلت بس امل كاعدة تباوع على التمثيلية..شكثر حاولت اغمض عيوني ماكدرت شلون بيه اريد احجي وياها هيج عين بعين اريد اكلها ماعندي شي وياج لاتخافين مني ..بس شلون احاجيها بعد لا اكدر اصعد يمهن ولا هيه تنزل جوه..روحي دخنت ..طلعت صحت امل..اجت تركض. 

هاااا 

امل اصعدي بسكته وشوفي ام غادة والبنات نايمات لولا..اذا لكيتيهن نايمات روحي على كيفج كعدي غادة وجيبيها هنا!!

اجيبها هنا..يعني لغرفتك؟؟

لا..مو لغرفتي انه طالع بره بالحوش..جيبيها بره وتعاي؟؟

يااااا..شتريد من البنيه..

ولج شريد قابل اريد احجي وياها؟؟

شبيك خويه تسودنت انت مكعد البت ومنزلها..وشتحجي وياها وهي خرسه وماتحجي..

شلج غرض انتي انه عندي حجي وياها؟؟

عود هاي انت التعرف العيب ..شني منزل بت العالم بهالليل..ماجد شرايد من البت..تره سودنتني بحجيك

خررررب..ولج شني شفيتني ساحلها لغرفتي!!!! كتلج بره بالحوش احجي وياها..

بس كلي وانه اكلها..

لا مايصير الحجي بيني وبينها..

ياااا..

امل تره روحي ثاكبه..كتلج حجايتين اريد احجيهن وانتي عود اوكفي..بعيد وتنوعي علينه اذا خايفه ع البت

اذا هيج مايخالف راح اصعد واشوف..

الفصل الخامس من هنا